¿ÑUULÁʼDXINU ñápanu ti dxiiñaʼ ndaaniʼ congregación ni qué zanda gúninu yanna la? Zándaca gácani ti dxiiñaʼ ni napa tuuxa hermanu o ti privilegiu ni gúpanu dxiqué. Peru zándaca pur iza stinu, guendahuará, qué gápanu bueltu o xiixa cosa ni guizaaca familia stinu gucueeza cani laanu de gúninu ni racaláʼdxinu. O purtiʼ bidxaa xiixa ndaaniʼ xquidxi Jiobá nga maʼ qué ganda gúninu ca dxiiñaʼ ni bíninu pur stale iza. Modo tiica gácani, zándaca guni sentirnu cadi cayúninu ni ná Jiobá casi modo ñuuláʼdxinu. Pa zacá ni, normal nga chuʼnu triste. Yanna, ¿xi zanda gúninu para cadi gaca desanimarnu, chuʼnu triste o dede guidxiichi stúbinu yaʼ? ¿Xi zacané laanu para cadi gusaana de chuʼnu nayecheʼ yaʼ?

Ejemplu stiʼ Juan ni Riguunisa rusiidini laanu ti cosa. Laabe gucuaabe caadxi dxiiñaʼ risaca. Peru zándaca cadi cabeza Juan xi chiguizaaca lu xquendanabani, jma stale tiempu zadaguyoobe que guni predicarbe. Neca zaqué nayecheʼ bibánibe. ¿Xi gucané laabe? ¿Ne xi zanda gúninu para cadi gusaana de chuʼnu nayecheʼ neca nápanu guendanagana yaʼ?

Lu beeu abril de iza 29 de ca dxi stinu riʼ, bizulú Juan biʼniʼ preparar binni para guidxaagalú Mesías, casi modo gudxi Jiobá laa. Laabe guniʼbe: «Lainaba perdón Dios, purti ma zeda dxiña dxi guni mandar» (Mat. 3:2; Luc. 1:12-17). Stale tu bicaadiaga laabe. Ne stale de ca binni que beedacaʼ de guidxi zitu para gucaadiágacaʼ mensaje stibe, ne guyuu stale tu guca arrepentir ne guyuunisa. Qué nidxibi Juan ora gudxi ca xaíque yuʼduʼ que xi castigu guicaacaʼ pa qué guchaacaʼ modo laacaʼ (Mat. 3:5-12). Beeu octubre de iza 29 que nga iza jma bisaca lu dxiiñaʼ stibe, purtiʼ guluunísabe Jesús. Dede dxi que, guluube gana binni chinanda Jesús, Mesías ni maca nexheʼ gueeda que (Juan 1:32-37).

Pur dxiiñaʼ risaca biʼniʼ Juan, sicaríʼ guníʼ Jesús de laabe: «De lade irá binni, qué huaree tobi jma nandxóʼ que Juan Bautista»  (Mat.11:11). Nanna dxíchinu bisisácabe guiráʼ ni gunda bíʼnibe pur Jiobá ne biéchebe pur ca ndaayaʼ gucuaabe. Cásica laabe, tiempu riʼ ca xpinni Cristu ni maʼ huayuni xhiiñaʼ Jiobá de guidubi ladxidóʼ, laaca huacaacaʼ stale ndaayaʼ. Guidúʼyanu ni bizaaca ti hermanu láʼ Terry, ni ziné jma de cincuenta iza de tiempu completu laa né xheelaʼ, Sandra. Laabe guniʼbe: «Guizáʼ sicarú ca privilegiu huayapaʼ. Maʼ gucaʼ precursor regular, betelita, precursor especial, superintendente de circuito ne de distrito, yanna maʼ nacaʼ precursor especial sti biaje». Ora guicaanu ca tipu de asignación riʼ riuʼnu nayecheʼ. Peru ora guchaa circunstancia stinu, zándaca gueeda gunítinu guendanayecheʼ stinu, casi bizaaca Juan.

Cumu nabé bidii Juan ni Riguunisa xquíxepeʼ Jiobá pur ca privilegiu ni gupa la? qué nusaana de ñuu nayecheʼ. Casi dxi guyuunisa Jesús la? bizulú bixiéʼ ca discípulo stiʼ Juan, peru ca discípulo stiʼ Jesús jma zidale. Ni bizaaca riʼ guluuni xizaa ca discípulo stiʼ Juan, ngue runi gúdxicaʼ laabe: «Caguu nisa dxa hombre [...]ni byuíʼ lu stiidxa que, ne irá binni cayé ra nuu» (Juan 3:26). Óraque gudxi Juan laacabe: «Ra ti enda xheela nabé rieche xhamigu novio ni zuhuaa raqué cucaa diaga ni caníʼ novio. Zacaca nga ma cayeche yanna» (Juan 3:29). Qué ñuuyaʼ diʼ Juan Jesús casi ti enemigu ne qué niníʼ íquebe qué risaca dxiiñaʼ stibe, purtiʼ nánnabe jma risaca dxiiñaʼ stiʼ Jesús. Lugar de nga, biéchebe purtiʼ nácabe «xhamigu novio».

Modo guca Juan que gucané ni laa chuʼ nayecheʼ neca nagana dxiiñaʼ biʼniʼ. Cumu nazareu laabe dede dxi gúlebe la? qué zanda guebe vinu (Luc. 1:15). Qué nibani Juan casi ti ricu, sicaríʼ guníʼ Jesús de laabe: «Beeda Juan, ne biiya cabe qué ño ne qué ñeʼ». Peru Jesús ne ca discípulo stiʼ gudocaʼ ne güeʼcaʼ ne normal modo bibánicaʼ, cadi casi ca nazareu (Mat. 11:18, 19). Ne neca qué ñuni Juan milagru, nanna zanda guni ca discípulo stiʼ Jesús ni dede né caadxi de cani guca discípulo stibe (Mat. 10:1; Juan 10:41). Peru Juan qué niníʼ ique de laacani, sínuque jma gucuá ique dxiiñaʼ ni bidii Jiobá laa.

Pa laanu gusisácanu cani rúninu lu xhiiñaʼ Jiobá yanna, qué zusaana de chuʼnu nayecheʼ. Sicaríʼ guníʼ Terry, hermanu ni maca bizéʼtenu que: «Guníʼ iqueʼ lu cada asignación ni gucuaaʼ». Ora guietenaláʼdxibe xi guiráʼ maʼ bíʼnibe lu serviciu de tiempu completu, riniʼbe: «Qué lica racaʼ arrepentir. Puru ni galán si rietenalaʼdxeʼ».

Jma nayecheʼ ziuʼnu pa guiníʼ íquenu xiñee risaca intiica asignación ricaanu, ne ti privilegiu para laanu guininu «tobi si runi né du Dios dxiiñaʼ» (1 Cor. 3:9). Quíxhenu ti ejemplu, pa gápanu ti cosa ni risaca ni bisaanané familia stinu laanu, neca tidiʼ tiempu qué zaca feu ni. Zacaca nga pa guiníʼ íquenu ti privilegiu nga gúninu xhiiñaʼ Jiobá, qué zusaana de chuʼnu nayecheʼ. Qué zuchaaganu ni rúninu ne ni runi xcaadxi ne qué zaníʼ íquenu huaxiéʼ risaca privilegiu ni nápanu que privilegiu ni napa xcaadxi (Gál. 6:4).

Zándaca nanna Juan qué zandaa dxiiñaʼ ni gucuaaʼ que stale tiempu, neca qué niníʼ íquebe pa málasi nilúxeni (Juan 3:30). Biʼniʼ mandar rey Herodes guseguyoocabe laabe lu iza 30, xhoopaʼ beeu de guluunísabe Jesús. Neca zaqué, bíʼnibe stipa pur gudiibe testimonio (Mar. 6:17-20). ¿Xi gucané laabe para guyuube nayecheʼ neca bichaa xquendanabánibe yaʼ? Jma gucuá íquebe gúnibe xhiiñaʼ Dios.

Neca deguyoo Juan, gunna xi guiráʼ biʼniʼ Jesús (Mat. 11:2; Luc. 7:18). Nanna dxíchibe Jesús nga Mesías, peru zándaca guníʼ íquebe pa zaca cumplir guiráʼ ni cá lu Stiidxaʼ Dios de Mesías que. Cumu nánnabe zaca Jesús rey la? guníʼ íquebe, pa maʼ chiguni mandar Jesús. Ne pa zabee laabe de ndaaniʼ cárcel. Nuube ganna chaahuibe xi chiguni  Jesús, ngue runi biseendabe chupa discípulo stibe chinabadiidxaʼ: «¿Ñee lii nga ni chigueeda que la? o zabézadu gueeda stobi?» (Luc. 7:19). Ora bibiguétacabe, bicaadiaga Juan guiráʼ ni caníʼcabe de ca milagru ni biʼniʼ Jesús ne ni gudxi Jesús laacabe gábicabe laabe: «Ma riná cani nacheepa lú, ma rizá cani nachiita ñee, ma bianda cani gupa lepra, ma runa diaga ca diaga cuaataʼ, ne bibani ni ma guti, ne ma cayuna diaga ca pobre stiidxa Dios» (Luc. 7:20-22).

Nuunu seguru guluu guiráʼ ndiʼ gana Juan. Bidiibe cuenta dxandíʼ cayuni cumplir Jesús ca profecía ni caníʼ de Mesías que. Neca qué zabee Jesús Juan de ndaaniʼ cárcel, gúnnabe risaca dxiiñaʼ ni bíʼnibe. Neca zaqué, gúpabe razón para chuʼbe nayecheʼ.

Pa gúninu casi biʼniʼ Juan ne guiníʼ íquenu cani maʼ bíninu lu xhiiñaʼ Dios, zanda guni huantarnu ne guendanayecheʼ ne paciencia (Col. 1:9-11). Zanda guni huantarnu pa guidúʼndanu Biblia ne guiníʼ íquenu de ni cadúʼndanu, purtiʼ rusietenaláʼdxini laanu cadi pur gana si cayúninu xhiiñaʼ Dios (1 Cor. 15:58). Sandra, ti hermana ni maca bizéʼtenu que guníʼ: «Guundaʼ ti capítulo stiʼ Biblia guiráʼ dxi racané ni naa chuaaʼ jma gaxha de Jiobá, guiníʼ iqueʼ jma de laabe que guiníʼ iqueʼ de naa». Laaca zanda guidúʼyanu xi guiráʼ cayaca pur Reinu stiʼ Dios. Zacá qué zaníʼ íquepenu de laanu, sínuque jma zaníʼ íquenu de ni cayuni Jiobá. Sandra guníʼ: «Pur ca programa stiʼ JW Broadcasting^® ni riree guiráʼ beeu, runi sentirdu jma gaxha nuudu de xquidxi Dios ne racané ni laadu chuʼdu nayecheʼ lu xhiiñaʼ Jiobá».

Cadi xadxipeʼ biʼniʼ Juan ni Riguunisa xhiiñaʼ Dios, peru tiempu ca gúpabe «espíritu ne poder stiʼ Elías». Ne casi Elías, gúcabe «ti hombre de sentimientu cásica laanu» (Luc. 1:17; Sant. 5:17). Ora rudiʼnu xquíxepeʼ ne riguixhe íquenu gúninu xhiiñaʼ Jiobá casi biʼniʼ Juan, laaca zabáninu nayecheʼ ora gúninu xhiiñaʼ Reinu neca guidxaagalunu intiica cosa.