1. ¿Xi ñuuláʼdxinu ñuni familia stinu?

TI HERMANA láʼ Pauline * guníʼ: «Dede dxi bizuluáʼ caziideʼ de Dios, laaca gupaʼ gana niziidiʼ guiráʼ familia stinneʼ para ñuʼdu ndaaniʼ Paraísu juntu, peru ni jma gucalaʼdxeʼ nga ñuni xheelaʼ ne xiiñehuiineʼ ni ná Jiobá». Zándaca riénenu hermana riʼ pa cadi guiráʼ familia stinu runi ni ná Jiobá.

2. ¿Xi pregunta chiguicábinu lu artículo riʼ?

² Qué zanda diʼ gucaʼnu familia stinu guiziidicaʼ de Dios para guicaacaʼ guendanabani ni qué zaluxe. Peru zanda gacanenu laacabe gucaadiágacabe mensaje zeeda lu Biblia (2 Tim. 3:14, 15). ¿Xiñee naquiiñeʼ guni predicarnu familia stinu? ¿Xiñee naquiiñeʼ gúninu stipa pur guiénenu laacabe? ¿Xi naquiiñeʼ gúninu para gannaxhiicabe Jiobá cásica nadxiinu laa? ¿Ne ximodo zanda gacané ca hermanu de congregación laanu? Lu artículo riʼ chiguicábinu ca pregunta ca.

3. Casi ná 2 Pedro 3:9, ¿xiñee naquiiñeʼ guni predicarnu familia stinu?

³ Maʼ cadi candaa, zunitilú Jiobá guidxilayú stiʼ Binidxabaʼ. Ca binni si ni maʼ nuu para guicaa guendanabani ni qué zaluxe nga zalá (Hech. 13:48). Rúninu stipa ne ribeenu stale tiempu para chiguni predicarnu ca vecinu stinu, nga runi laaca racaláʼdxinu guni familia stinu ni ná Jiobá. Cumu nadxii Bixhózenu ni nuu guibáʼ laanu la? «cabeza be inaba irá binni perdón laabe, purti qué racalaʼdxi be initilú nin tobi» (biindaʼ 2 Pedro 3:9).

4. ¿Xi ti cosa cadi jneza zándaca gúninu ora runi predicarnu familia stinu?

 ⁴ Nuu biaje gadxé modo runi predicarnu ti binni ni qué runibiaʼnu ne gadxé modo runi predicarnu familia stinu. Zándaca ora runi predicarnu ti binni ni qué runibiaʼnu rinínenu laa ne diidxaʼ nadóʼ peru ora rinínenu xfamílianu ridindenenu laacaʼ.

5. ¿Xi caquiiñeʼ gúninu ora guni predicarnu familia stinu?

⁵ Ora rietenaláʼdxinu modo biʼniʼ predicarnu familia stinu primé biaje, zándaca guiníʼ íquenu ñanda ñúninu ni jma galán. Bidii apóstol Pablo conseju riʼ ca xpinni Cristu: «Siempre laguiníʼ diidxaʼ ni guiaba binni, ne cásica riaba zidi lu guendaró para gaca nanixe, zacaca laguni né stiidxatu, ti gánnatu ximodo guicábitu cada binni» (Col. 4:5, 6, TNM). Caquiiñeʼ chinándanu conseju riʼ ora guni predicarnu familia stinu. Purtiʼ pa qué gúninu ni la? zuxhélenu laacabe de Dios lugar de guidxíñacabe gaxha de laa.

6, 7. Bizeeteʼ ti ejemplu ni rusihuinni xiñee naquiiñeʼ guiene tuuxa ni runi sentir xheelaʼ ni cadi naca Testigu.

⁶ Guiénenu laacaʼ. Pauline, hermana ni bizéʼtenu ora bizulunu que ná: «Nacubigá, puru si de Biblia maʼ canieniáʼ xheelaʼ ne qué rinidu de sti cosa». Peru huaxiéʼ nanna Wayne, xheelabe, de Biblia ne qué riene guiráʼ ni rabi Pauline laa. Dede guníʼ íquebe puru si religión stiʼ Pauline maʼ cá ique. Bidxíbibe purtiʼ guníʼ íquebe nuu xheelabe lade ti secta malu ne caguítecabe laa.

⁷ Bidii Pauline cuenta jma stale tiempu caquiiñeʼ para cheʼ reunión, predicación  ne para chiganna ca hermanu ra lídxicaʼ lugar de ñuni tender xheelaʼ. Sicaríʼ guniʼbe: «Nuu biaje runi sentir Wayne stubi ora rindá ra yoo ne guirutiʼ guinni». Ne nápabe razón para guni sentirbe zacá purtiʼ ribánabe xheelabe ne xiiñibe. Qué runibiaʼbe ca binni ni ridxaaga Pauline ne para laabe la? jma risaca ca xhamigu xheelabe que laabe. Ngue runi, gúdxibe laa zaca divorciarbe de laa. ¿Cadi dxandíʼ jma galán ñuni Pauline pa ñene ni cayuni sentir xheelaʼ la?

8. Casi ná 1 Pedro 3:1, 2, ¿xii nga ni jma ruuyaʼ familia stinu de laanu?

⁸ Gácanu ti ejemplu galán. Stale biaje jma ruuyaʼ familia stinu ni rúninu que ni rininu (biindaʼ 1 Pedro 3:1, 2). Ra gudiʼdiʼ tiempu, bidii Pauline cuenta dxandíʼ ca diidxaʼ riʼ. Laabe guniʼbe: «Nannaʼ nadxii Wayne naa ne xiiñeʼ ne cadi dxandíʼ nuu gaca divorciar de naa. Peru ora gúdxibe naa zaca divorciarbe de naa la? bidieeʼ cuenta naquiiñeʼ guneʼ ca cosa ca modo racalaʼdxiʼ Jiobá. Lugar de guinieniáʼ laabe puru si de lu Biblia la? naquiiñeʼ gacaʼ ti ejemplu né ca ni guneʼ». Ngue runi, maʼ qué nucaabe xheelabe guiniʼné laabe de Biblia ne bizulú guníʼcabe de gadxé gadxé cosa. Bidii Wayne cuenta maʼ bichaa xheelaʼ, jma nacháʼhuibe ne jma ruzuubaʼ xiiñibe diidxaʼ (Prov. 31:18, 27, 28). Ora bíʼyabe pabiáʼ cayacané Biblia familia stibe la? jma guyuuláʼdxibe gucaadiágabe stiidxaʼ Dios (1 Cor. 7:12-14, 16).

9. ¿Xiñee cadi naquiiñeʼ guireʼnu gana?

⁹ Cadi guireʼnu gana. Rudii Jiobá laanu ti ejemplu galán purtiʼ cudiibe tiempu  binni para guicaacaʼ mensaje stibe ti gápacaʼ guendanabani ni qué zaluxe (Jer. 44:4). Gudxi apóstol Pablo Timoteo cadi gusaana de gacané binni purtiʼ zacá zalabe ne zulabe ca ni gucaadiaga laabe (1 Tim. 4:16). Cumu nadxiinu familia stinu la? racaláʼdxinu guiziidicabe ni rusiidiʼ Biblia. Pur guirá cosa galán ni biʼniʼ ne ni guníʼ Pauline gunda gucané familia stiʼ. Guizáʼ nayecheʼ nuube yanna purtiʼ maʼ cayuni xheelabe ni ná Jiobá, guirópacabe nácacabe precursor ne yanna maʼ ancianu Wayne.

10. ¿Xiñee caquiiñeʼ gápanu paciencia?

¹⁰ Gápanu paciencia. Ora maʼ rúninu ni ná Biblia lu xquendanabáninu la? zándaca gaca nagana para familia stinu guiaacaʼ ni runi crenu ne modo nabáninu. Tobi de ca cosa ni ruuyacabe primé nga maʼ qué riuunu ca saa ni rúnicabe ne maʼ qué riuʼnu lu política. Ne zándaca guidxiichinécabe laanu (Mat. 10:35, 36). Peru cadi naquiiñeʼ guiníʼ íquenu maʼ qué zuchaacabe. Pa gusaana de gacanenu laacabe guiénecabe ni runi crenu la? casi ñaca cayuni juzgarnu laacabe ne niníʼ íquenu qué zacaacabe guendanabani ni qué zaluxe. Cadi guiaandaʼ laanu, maʼ gulí Jiobá Jesús para guni juzgar binni ne laasibe nga zanda gúnibe ni (Juan 5:22). Nga runi, pa gápanu paciencia zándaca chuulaʼdxiʼ familia stinu gucaadiaga stiidxaʼ Dios despué (biiyaʼ recuadru ni láʼ « Iquiiñenu sitiu ni nápanu lu Internet»).

11-13. ¿Xi rusiidiʼ ejemplu stiʼ Alice laanu?

¹¹ Gácanu nadóʼ peru guzuhuaʼnu dxiichiʼ lu ni runi crenu (Prov. 15:2). Guzéʼtenu ni bizaaca Alice. Biziidibe de Jiobá dxi nabézabe sti guidxi, zitu de bixhózebe ne jñaabe. Neca qué runi crecaʼ Dios ne nabé riuucaʼ lu política la? bidiibe cuenta caquiiñeʼ guiníʼnebe laacaʼ de ni caziidibe. Sicaríʼ guníʼ Alice: «Pa cuézaluʼ tidiʼ tiempu para gábiluʼ familia stiluʼ ni runi creluʼ la? zadxiichicabe jma». Nga runi, bicaabe ti carta ra nuu bixhózebe ne jñaabe ra canabadiidxabe laacaʼ xi riníʼ íquecaʼ de tema ni zeeda lu Biblia ni nánnabe ziuuláʼdxicaʼ, casi guendarannaxhii (1 Cor. 13:1-13). Bidiibe xquíxepeʼ laacaʼ pur bisiniisicaʼ laabe ne pur gúpacaʼ laabe ne biseendabe regalu para laacaʼ. Ne ora rigánnabe laacaʼ rúnibe stipa pur gacanebe jñaabe né ca vuelta ni raca ra yoo. Peru nacubigá que la? qué ñuulaʼdxiʼ bixhózebe ne jñaabe ora gúdxibe laacaʼ ni runi crebe.

¹² Dxi nuube ra lidxi bixhózebe ne jñaabe qué nusaana de ñuundabe Biblia guiráʼ dxi. Alice ná nabé gucaneni jñaa para guʼyaʼ pabiáʼ risaca Stiidxaʼ Dios. Tiempu queca gudixhe ique bixhózebe guʼyaʼ xi rusiidiʼ Biblia para ganna xi riníʼ ique xiiñiʼ ne para guʼyaʼ paraa rucheeni. Sicaríʼ guníʼ Alice: «Bisigaʼdeʼ laabe ti Biblia ne bicaa caadxi diidxaʼ ndaaniʼ ni para laabe». ¿Xi bizaaca despué yaʼ? Qué nidxela bixhózebe paraa rucheeni ne guizáʼ bidxagayaa ni biʼndaʼ luni.

¹³ Naquiiñeʼ gácanu nachaʼhuiʼ peru laaca naquiiñeʼ guzuhuaʼnu dxiichiʼ lu ni runi crenu neca tídinu prueba (1 Cor. 4:12b). Guzéʼtenu ti ejemplu. Gupa xidé biʼniʼ huantar Alice neca qué ñuulaʼdxiʼ jñaa ni caziidiʼ. Sicaríʼ guniʼbe: «Dxi guyuaanisaʼ gudxi jñaaʼ naa qué ruzuubaʼ stiidxaʼ». ¿Xi biʼniʼ Alice yaʼ? Laabe guniʼbe: «Lugar de nuchaaʼ de diidxaʼ, né stale respetu gudxeʼ laabe maʼ gudixheʼ iqueʼ gacaʼ testigu stiʼ Jiobá ne qué zabiesaʼyaʼ.  Gudxeʼ laabe guizáʼ nadxieeʼ laabe. Guizáʼ bidúʼnadu, ne bineʼ ti guendaró nanixe para laabe. Dede óraque bidii jñaaʼ cuenta cayacané Biblia naa para gacaʼ ti binni nachaʼhuiʼ».

14. ¿Xiñee cadi naquiiñeʼ gudiʼnu lugar guchaa familia stinu ni maʼ gudixhe íquenu gúninu?

¹⁴ Zándaca cadi casi zeʼ familia stinu guiene xiñee nabé risaca para laanu gúninu ni ná Jiobá. Guzéʼtenu ni bizaaca Alice sti biaje. Dxi gudixhe íquebe gácabe precursora lugar de gunduuxebe carrera ni gulí jñaabe ne bixhózebe gúʼndabe, bizulú jñaabe cayuunaʼ sti biaje. Peru bizuhuaa dxiichiʼ Alice lu ni runi cré ne guníʼ: «Pa gudiiluʼ lugar guchaa familia stiluʼ ni maʼ gudixhe íqueluʼ gúniluʼ la? zucaacabe lii guchaaluʼ xcaadxi cosa. Peru pa guzuhuaa dxiichiluʼ lu ni runi creluʼ ne gusiéneluʼ ni né diidxaʼ nadóʼ la? zándaca gucaadiágacabe lii». Nga peʼ nga ni bizaaca Alice, yanna maʼ precursor bixhózebe ne jñaabe ne maʼ ancianu bixhózebe.

15. Casi ná Mateo 5:14-16 ne 1 Pedro 2:12, ¿ximodo zanda gacané ca hermanu familia stinu?

¹⁵ Riquiiñeʼ Jiobá ca cosa jneza ni runi ca xpinni para chuulaʼdxiʼ xcaadxi binni guiziidiʼ de laabe (biindaʼ Mateo 5:14-16; 1 Pedro 2:12). Pa cadi testigu stiʼ Jiobá xheelaluʼ, ¿ñee runibiaʼbe ca hermanu de congregación stiluʼ la? Pauline, hermana ni bizéʼtenu ra bizulunu que ná biʼniʼ invitar ca hermanu ra lidxi para gunibiáʼ xheelabe laacaʼ. Rietenalaʼdxiʼ Wayne ximodo gucané ti hermanu laa para  cadi guiníʼ ique mal de ca hermanu. Sicaríʼ guniʼbe: «Gunabaʼ hermanu riʼ vacación ti dxi para guʼyané naa ti partidu. Raqué bidieeʼ cuenta rúnibe xcaadxi cosa ne cadi religión si stibe maʼ cá íquebe».

16. ¿Xiñee naquiiñeʼ guni invitarnu familia stinu ca reunión rápanu?

¹⁶ Ti modo zanda gacanenu familia stinu nga guni invitarnu laacabe chinécabe laanu reunión (1 Cor. 14:24, 25). Primé biaje guyé Wayne reunión nga dxi guca Conmemoración, ne gunda guyebe purtiʼ maʼ biguétabe de dxiiñaʼ ne qué rindaapeʼ ni. Sicaríʼ bizeetebe: «Qué ñeneʼ guiráʼ ni biete raqué peru qué ziuu dxi guiaandaʼ naa modo bidxaagalúcabe naa. Bidxíñacabe ne bidiinácabe naa, raqué bidieeʼ cuenta dxandíʼ nacháʼhuicabe». Nuu ti guendaxheelaʼ ndaaniʼ congregación que ni nabé gucané Pauline ne baʼduhuiiniʼ stiʼ ra reunión ne lu predicación. Ngue runi, dxi maʼ gudixhe ique Wayne guiziidiʼ ni runi cré Pauline la? gunábabe xheelaʼ hermana ni gucané Pauline que gudii estudiu laabe.

17. ¿Xiñee cadi naquiiñeʼ ugáʼninu donda íquenu pa qué naʼ familia stinu guni ni ná Jiobá, peru xiñee cadi naquiiñeʼ gusaana de gacanenu laacabe?

¹⁷ Racaláʼdxinu guidxiña dxi guni familia stinu ni ná Jiobá. Peru neca gúninu guiráʼ ni nuu lu nanu para gacanenu laacabe, zándaca qué ziuu dxi gúnicabe ni ná Jiobá. Pa guizaaca ndiʼ, qué chuʼ dxi ugáʼninu donda íquenu pur ni gúnicabe. Purtiʼ qué zanda gucaʼnu guirutiʼ guni cré ni runi crenu. Neca zacá, pa guʼyaʼ familia stinu pabiáʼ nayecheʼ cayúninu ni ná Jiobá la? zanda gacaneni laacabe. Guni orarnu pur laacabe, guni predicarnu laacabe né respetu ne cadi gusaana de gacanenu laacabe (Hech. 20:20). Cadi guiaandaʼ laanu zaguu Jiobá ndaayaʼ stipa gúninu. Ne pa gucaadiaga familia stinu laanu la? zalácabe.