1, 2. a) ¿Xi ruuyaʼ Jiobá ora rié millón de binni dxi rietenaláʼdxinu Guendaroxhi stiʼ Señor? (Biiyaʼ foto ni zeeda lu portada). b) ¿Xi zazíʼdinu lu artículo riʼ?

XI RUUYAʼ Jiobá ora ridagulisaa millón de binni lu guidubi naca Guidxilayú para guietenaláʼdxicaʼ Guendaroxhi stiʼ Señor. Qué ruuyasibe ti grupu naroʼbaʼ de binni, sínuque ruuyabe cada tobi de cani rié. Ruuyabe cani rié guiráʼ iza. Nuu de laacaʼ riecaʼ neca nuu tu cucaalú laacaʼ. Xcaadxi qué rié ca reunión ni raca guiráʼ semana, peru ruuyacaʼ naquiiñeʼ checaʼ Conmemoración. Laaca ruuyaʼ Jiobá cani rié primé biaje, zándaca para si gánnacaʼ ximodo raca ni.

² Nanna dxíchinu guizáʼ riuulaʼdxiʼ Jiobá ora rié stale binni Conmemoración (Luc. 22:19). Peru ni jma risaca para laabe nga cadi panda binni rié, sínuque xiñee riécabe. Lu artículo riʼ zazíʼdinu de ti cosa nabé risaca: ¿Xiñee naquiiñeʼ chuunu ca reunión ni runi preparar Jiobá guiráʼ semana para cani nadxii laa, ne cadi ora si raca Guendaroxhi stiʼ Señor? Guidúʼyanu gunáʼ nga ca cualidad ni rucaa laanu chuunu reunión.

3, 4. a) ¿Xiñee riuunu ca reunión ca? b) ¿Xi cualidad rusihuínninu ora riuunu ca reunión ca? c) Pur ni na 1 Corintios 11:23-26, ¿xiñee cadi naquiiñeʼ guiaadxanu Conmemoración?

³ Riuunu reunión purtiʼ laani nga sti modo runi adorarnu Dios. Laaca riuunu purtiʼ racá nga rusiidiʼ Jiobá laanu. Ca binni ni runi cré laca laa riníʼ íquecaʼ guirutiʼ tu zanda gusiidiʼ laacaʼ (3 Juan 9). Peru laanu racaláʼdxinu gusiidiʼ  Jiobá ne xquidxi laanu (Is. 30:20; Juan 6:45).

⁴ Ora riuunu reunión, rusihuínninu humilde laanu ne racaláʼdxinu gusiidiʼ Dios laanu. Riuunu ora rietenaláʼdxinu guendaguti stiʼ Cristu purtiʼ ti obligación ni ne purtiʼ humilde laanu ne racaláʼdxinu chinándanu ni guníʼ Jesús: «Laguni ni para guietenalaʼdxi tu naa» (biindaʼ 1 Corintios 11:23-26). Reunión riʼ racané ni laanu cadi gunítinu esperanza ni nápanu ne rusietenalaʼdxiʼ ni laanu nadxii Jiobá laanu. Peru laabe nánnabe cadi ti biaje lu ti iza nga caquiiñenu uguucabe gana laanu ne quixhedxícabe ladxidoʼno. Nga runi, gudíxhebe gaca ca reunión ca guiráʼ semana ne cayuni mandarbe laanu chuunu cani. Pa humilde laanu la? zuzúʼbanu stiidxabe. Riquiiñenu stale hora cada semana para guni prepararnu ca reunión ca ne para chuunu cani.

5. ¿Xiñee ricaa ca binni humilde invitación stiʼ Jiobá?

⁵ Guiráʼ iza runi invitar Jiobá binni para gusiidibe laacaʼ, ne stale binni ricaa invitación riʼ purtiʼ humilde laacaʼ (Is. 50:4). Stale de laacabe primeru riécabe Conmemoración ne de racá ruzulúcabe riécabe xcaadxi reunión (Zac. 8:20-23). Cásica laanu ne zaqueca cani nacubi, nabé riuuláʼdxinu gusiidiʼ Dios laanu ne guluíʼ laanu xi gúninu, purtiʼ laabe nga Dios ni racané ne rulá laanu (Sal. 40:17). Nanna dxíchinu gastiʼ sti cosa jma galán ne jma risaca que chuunu reunión para gusiidiʼ Jiobá ne Jesús laanu (Mat. 17:5; 18:20; 28:20).

6. Pur humilde ti señor, ¿ximodo gucané ni laabe chebe Conmemoración?

⁶ Guiráʼ iza rúninu stipa pur guni invitarnu guiráʼ binni cheʼ dxi rietenaláʼdxinu guendaguti stiʼ Cristu. Stale binni humilde huabeendú ni galán pur huayé. Guidúʼyanu ti ejemplu. Raca chupa chonna iza biʼniʼ invitar ti hermanu ti señor, peru señor que gudxi laabe qué zanda cheʼ. Gueelaʼ chigaca Conmemoración que nabé bidxagayaa hermanu que ora biiyaʼ laabe biuube ndaaniʼ Yoo stiʼ Reinu. Nabé bidxagayaa señor que modo bidxaagalúcabe laa dede bizulú guyé guiráʼ reunión. Ne lu ti iza chonna reunión si biaadxabe. ¿Xi gucané laabe quixhe íquebe chebe guiráʼ reunión yaʼ? Gudiʼdiʼ si tiempu guníʼ hermanu ni biʼniʼ invitar laabe que sicaríʼ: «Guizáʼ humilde laabe». Rihuinni dxichi Jiobá gulidxi laabe para chuʼbe ndaaniʼ xquidxi. Yanna riʼ maʼ ti Testigu ni maʼ guyuunisa laabe (2 Sam. 22:28; Juan 6:44).

7. ¿Ximodo racané cani rizíʼdinu lu reunión ne cani ridúʼndanu lu Biblia laanu para gácanu humilde?

⁷ Ni rizíʼdinu lu reunión ne ni ridúʼndanu lu Biblia racané cani laanu gácanu humilde. Lu ca reunión ni rápanu ante de Conmemoración rizíʼdinu pabiáʼ humilde guca Jesús ra bidii xquendanabani pur laanu. Ne ora maʼ cadxiña dxi gaca Conmemoración ca rábicabe laanu guidúʼndanu ca relatu zeeda lu Biblia ni caníʼ xi bizaaca dxi mayaca gatiʼ Jesús ne ra biásabe de lade gueʼtuʼ. Guiráʼ ni rizíʼdinu rucaa cani laanu gudiʼnu xquíxepeʼ Jesús pur sacrificiu ni biʼniʼ. Nga racané laanu gácanu humilde casi laabe ne gúninu ni ná Dios neca gaca ni nagana para laanu (Luc. 22:41, 42).

8. ¿Ximodo bisihuinni Jesús gupa valor?

⁸ Sti cualidad stiʼ Jesús ni racaláʼdxinu gápanu nga valor. Guiníʼ íquenu ximodo  bisihuínnibe ni ca dxi mayaca gátibe que. Gúnnabe maʼ cadi candaa zuni burla ca xhenemígube laabe, zaguucabe chicote laabe ne zuuticabe laabe (Mat. 20:17-19). Neca gúnnabe zacá ni, guyuube listu para gátibe. Ora bidxiña hora que, gúdxibe ca apóstol ni nuuné laabe ndaaniʼ jardín de Getsamaní: «Laguiasa, ma chuu nu. Laguuya mápeca zeda dxiña ni chi uluíʼ naa» (Mat. 26:36, 46). Ne ora yenaazeʼ ti grupu de binni nanda guiibaʼ laabe, bireebe lucaʼ ne gúdxibe laacaʼ tu laabe ne gúdxibe ca soldadu que gudiicaʼ lugar cheʼ ca apóstol stibe (Juan 18:3-8). ¿Ñee cadi dxandíʼ bisihuínnibe nápabe valor la? Yanna riʼ, cásica ca ungidu ne ca xcaadxi dendxuʼ rúninu stipa pur gápanu valor cásica laabe. ¿Ximodo yaʼ?

9. a) ¿Xiñee zándaca caquiiñenu valor para cadi guiaadxanu reunión? b) ¿Ximodo racané ejemplu stinu ca hermanu ni deguyoo pur cani runi crecaʼ?

⁹ Para cadi guiaadxanu ca reunión ca la? naquiiñeʼ gácanu nadxibalú ti ganda gudxíʼlunu xiixa guendanagana. Nuu caadxi hermanu huaracaʼ, guizáʼ triste nuucaʼ o careecaʼ gana. Xcaadxi cucaalú binnilídxicaʼ laacaʼ o ca gobiernu, peru cayácacaʼ nadxibalú ti cadi gusaanacaʼ de checaʼ reunión. Guiníʼ íquenu ca hermanu deguyoo pur ni runi crecaʼ. ¿Ñee huaníʼ íquenu zanda gacané ejemplu stinu laacabe la? (Heb. 13:3). Ora ránnacabe cadi cusaana de guni servirnu Jiobá neca nápanu guendanagana la? rudii nga stipa laacabe para iguidxi fe stícabe, gápacabe valor ne cadi gucheenécabe Jiobá. Ne nga nga ni bizaaca apóstol Pablo. Dxi deguyoobe Roma, riéchebe gánnabe cadi cusaana ca hermanu de guni xhiiñaʼ Dios (Filip. 1:3-5, 12-14). Zándaca ante gundaacabe laabe o despué, bicaabe carta ra nuu ca hebreu. Lu carta que gúdxibe ca hermanu que cadi gusaanacaʼ de gaca reunircaʼ ne laaca gúdxibe laacaʼ: «Cadi gusaana de gannaxhiisaatu casi nadxiitu familia stitu» (Heb. 10:24, 25; 13:1, TNM).

10, 11. a) ¿Tuu nga cani naquiiñeʼ guni invitarnu cheʼ Conmemoración? b) ¿Xi razón cudii Efesios 1:7 laanu para chuunu dxi ca?

¹⁰ Laaca riquiiñeʼ gápanu valor para guni invitarnu familia stinu, cani runinenu dxiiñaʼ ne ca vecinu stinu checaʼ Conmemoración. ¿Xiñee naquiiñeʼ gúninu ni yaʼ? Purtiʼ rudiʼnu xquíxepeʼ Jiobá ne Jesús pur ni bíʼnicaʼ pur laanu. Ne laaca rúninu ni purtiʼ racaláʼdxinu guiziidicabe ximodo zanda gacané ni bidii Jiobá laanu pur nachaʼhuiʼ ra bidii Xiiñiʼ gati pur laanu (biindaʼ Efesios 1:7; Apoc. 22:17).

¹¹ Ora riuunu ca reunión ca laaca rusihuínninu sti cualidad. Cásica Jiobá ne zaqueca Jesús nabé risaca modo huasihuínnicabe cualidad ni chiguzéʼtenu riʼ.

12. a) ¿Xiñee racané ca reunión laanu jma gannaxhiinu Jiobá ne Jesús? b) Casi ná 2 Corintios 5:14, 15, ¿ximodo zanda chinándanu ejemplu stiʼ Jesús?

¹² Cumu nadxiinu Jiobá ne Jesús la? rucaa nga laanu chuunu reunión. Ne cani rizíʼdinu lu ca reunión ca racané cani laanu jma gannaxhiinu Jiobá ne Xiiñiʼ, purtiʼ lúcani gatigá rieeteʼ ni huayúnicabe pur laanu (Rom. 5:8). Conmemoración ca rusietenalaʼdxiʼ laanu pabiáʼ nadxiicabe laanu, dede né cani caʼruʼ gusisaca ni gudíxecabe pur laanu. Cumu nabé rudiʼnu xquíxepeʼ laacabe la? rúninu stipa pur chinándanu ejemplu stiʼ Jesús lu xquendanabáninu guiráʼ dxi (biindaʼ 2 Corintios 5:14, 15). Ne de ladxidoʼno riale gusisácanu Jiobá pur bidii xquendanabani Xiiñiʼ. Ti modo zanda gusihuínninu ni nga ra guni comentarnu lu ca reunión de guidubi ladxidoʼno.

13. Bisiene ximodo rusihuínninu pabiáʼ nadxiinu Dios ne Xiiñiʼ.

¹³ Rusihuínninu guizáʼ nadxiinu Dios ne Xiiñiʼ ora rúninu sacrificiu pur laacabe. Stale biaje caquiiñeʼ guni sacrificarnu caadxi cosa para ganda chuunu reunión. Guzéʼtenu ti ejemplu, nuu caadxi congregación rápacaʼ reunión ni raca ndaaniʼ semana ca huadxí despué de maʼ guyuunu dxiiñaʼ ne zándaca guizáʼ maʼ bidxáganu. Ne sti reunión ca raca ni fin de semana, ca dxi riziilaʼdxiʼ binni. ¿Ñee rudii Jiobá cuenta riuunu ca reunión ca neca maʼ bidxáganu la? Rudiibe cuenta pue. Ne ora jma nadipaʼ stipa cayúninu, jma rusisaca Jiobá modo rusihuínninu pabiáʼ nadxiinu laa (Mar. 12:41-44).

14. ¿Xi ejemplu risaca bidii Jesús laanu?

¹⁴ Jesús biluíʼ laanu ximodo nga gúninu xiixa sacrificiu pur nadxiinu stobi. Cadi purtiʼ si gunabe gátibe pur ca xpínnibe, sínuque purtiʼ guiráʼ dxi bisihuínnibe jma rizaaláʼdxibe laacaʼ que nizaaláʼdxibe laca laabe. Bidagulisaanebe laacaʼ neca maʼ bidxágabe ne naná nuu ladxidoʼbe (Luc. 22:39-46). Jma biyúbibe xi zanda gudiibe xcaadxi, ne cadi xi zanda gudiicabe laabe (Mat. 20:28). Pa nadxiinu Jiobá ne ca hermanu stinu casi bíʼnibe ca la? zúninu stipa pur chuunu dxi guietenaláʼdxinu Guendaroxhi stiʼ Señor ne guiráʼ ca reunión ca.

15. ¿Tuu nga cani jma racaláʼdxinu gacanenu?

 ¹⁵ Nuunu lade ca xpinni Cristu ni dxandíʼ nadxiicaʼ ne de guidubi ladxidoʼno ribeenu tiempu dede biaʼ gándatiʼ para guni invitarnu binni chuʼ ládenu. Peru ni jma racaláʼdxinu nga gacanenu «ca hermanu» (Gál. 6:10). Rusihuínninu nadxiinu laacabe ora riguʼnu gana laacabe chécabe reunión, ne jmaruʼ si para chécabe Conmemoración. Cásica Jiobá ne Jesús, laanu laaca guizáʼ riéchenu ora ribiguetaʼ tuuxa ni maʼ qué rié reunión ra nuu Pastor stinu ne Bixhózenu ni nadxii laanu (Mat. 18:14).

16. a) ¿Xi para naquiiñeʼ uguʼnu gana xcaadxi, ne xi zacané reunión laanu gúninu? b) Ca diidxaʼ ni guníʼ Jesús lu Juan 3:16, ¿xiñee biáʼsipeʼ nga guietenaláʼdxinu cani ca dxi ante gaca Conmemoración?

¹⁶ Lu ca semana zeeda ca, naquiiñeʼ guni invitarnu guiráʼ binni guidagulisaanecaʼ laanu viernes huaxhinni 19 de abril de 2019, dxi guietenaláʼdxinu guendaguti stiʼ Jesús (biiyaʼ recuadru ni láʼ « ¿Ñee zuni invitarnu xcaadxi binni la?»). Ne lu iza riʼ uguʼnu gana xcaadxi ra cadi guiaadxanu ca reunión ca. Zeʼ dxi jma gaxha nuunu de fin. Nga runi, cadi naquiiñeʼ guiaʼdxanu guiráʼ reunión ti gacané cani laanu gácanu humilde, gápanu valor ne gannaxhiinu (1 Tes. 5:8-11). Gusihuínninu pabiáʼ rudiʼnu xquixe Jiobá ne Xiiñiʼ pur nadxiicaʼ laanu stale (biindaʼ Juan 3:16).