1, 2. a) ¿Ximodo gucané ca diidxaʼ ni zeeda lu Isaías 41:10 hermana Yoshiko? b) ¿Turuʼ laa zanda gacané ca diidxaʼ guníʼ Jiobá riʼ yaʼ?

TI DXI bidiicabe ti noticia nabé feu ti hermana láʼ Yoshiko. Gudxi doctora stibe laabe maʼ chupa chonna beeu si zabánibe. ¿Xi biʼniʼ hermana riʼ yaʼ? Nagueendaca bietenaláʼdxibe tobi de ca textu ni jma riuuláʼdxibe, laani nga Isaías 41:10 (biindaʼ ni). Ngue runi nuudxí ladxidoʼbe ora gúdxibe doctora que cadi cadxíbibe, purtiʼ naaze Jiobá nabe. * Gudixhedxí textu riʼ ladxidoʼbe ne gucané ni laabe gápabe jma confianza Jiobá, ne laaca zanda gacané textu riʼ laanu ora guidxaagalunu guendanagana nabé nadipaʼ. Para guiénenu ximodo riguixhedxí textu riʼ ladxidoʼno la? guidúʼyanu primé xiñee bidii Jiobá mensaje riʼ Isaías.

² Primé la? bidii Jiobá mensaje riʼ laabe para quixhedxí ladxidóʼ ca judíu ni zié de esclavu ndaaniʼ guidxi Babilonia. Peru laaca guniʼbe guicá ni para gacané ni ca xpinni Cristu ni huabani dede dxiqué hasta nagasi (Is. 40:8; Rom. 15:4). Ca dxi nabáninu riʼ nabé nagana cani, nga runi jmaruʼ si caquiiñenu ca diidxaʼ ni zeeda lu libru stiʼ Isaías riʼ para uguu gana laanu (2 Tim. 3:1).

3. a) ¿Gunáʼ nga ca promesa ni riete lu textu stiʼ iza 2019? b) ¿Xiñee caquiiñenu ca promesa riʼ yaʼ?

³ Lu artículo riʼ, zadúʼyanu chonna promesa stiʼ Jiobá ni zuquidxi fe stinu, zeeda ni lu Isaías 41:10 ne laani nga textu stiʼ iza 2019. Primé, ziuu Jiobá gaxha de laanu.  Guiropa, laabe nga Dios stinu. Guionna, zacanebe laanu. ¿Xiñee caquiiñenu ca promesa riʼ yaʼ? * Purtiʼ cásica hermana Yoshiko, laanu laaca nápanu guendanagana. Ne laaca ridxaagalunu guiráʼ ca cosa malu nuu ndaaniʼ guidxilayú riʼ. Ne nuu tu laa dede rizananda ca gobiernu jma nadipaʼ laacaʼ.

4. a) ¿Gunáʼ nga primé promesa ni zadúʼyanu? (Biiyaʼ ni ná nota). b) ¿Ximodo rusihuinni Jiobá nadxii laanu? c) ¿Ximodo racané ca diidxaʼ ni cayabi Jiobá riʼ lii?

⁴ Riguixhedxí Jiobá ladxidoʼno ora rábibe laanu ca diidxaʼ riʼ: «Cadi guidxíbiluʼ, purtiʼ nuaaniáʼ lii». * Para gusihuinni Jiobá nuuné laanu la? rizaaláʼdxibe laanu ne rudiibe cariñu stibe laanu. Guidúʼyanu ximodo rusihuínnibe pabiáʼ nadxiibe laanu ora guniʼbe ca diidxaʼ riʼ: «Guizáʼ sicaruluʼ para naa, risácaluʼ ne nadxieeʼ lii» (Is. 43:4). Gastiʼ qué zanda gucueeza Jiobá de gannaxhii ca xpinni. Ne qué ziuu dxi guixélebe de laanu (Is. 54:10). Ora gánnanu nadxiibe laanu ne xhamígube laanu rudii ni stipa laanu. Zápabe laanu cásica gúpabe xhamígube Abrán (Abrahán). Gudxi Jiobá laabe: «Cadi guidxíbiluʼ, Abrán. Nacaʼ ti escudu para lii» (Gén. 15:1).

5, 6. a) ¿Xiñee nánnanu racalaʼdxiʼ Jiobá gacané laanu gudxíʼlunu ca guendanagana stinu? b) ¿Xi rizíʼdinu de ejemplu stiʼ hermana Yoshiko yaʼ?

⁵ Nánnanu racalaʼdxiʼ Jiobá gacané laanu para gudxíʼlunu ca guendanagana stinu, nga runi cayúnibe promesa riʼ laanu: «Ora tiidiluʼ lu nisa, naa ziuaaʼ gaxha de lii; ne ora tiidiluʼ ndaaniʼ guiiguʼ qué zalaahualuʼ. Ora saluʼ lu gui qué zadxuíʼ ñeeluʼ, ne nin qué zuzaaquiʼ bele lii» (Is. 43:2). ¿Xi riníʼ ca diidxaʼ riʼ yaʼ?

⁶ Cadi cayuni prometer Jiobá laanu zabee guiráʼ ca guendanagana ni runiná laanu, peru laaca cadi cayábibe laanu zudiibe lugar guniná ca guendanagana ni zeeda gaca casi «guiiguʼ» ni ruluahua o casi «bele» ni ruzaaquiʼ laanu. Cayábibe laanu ziuube gaxha para  gacanebe laanu gudxíʼlunu cani. Ne zacanebe laanu cadi chúʼpenu xizaa para cadi gusaananu laabe neca gátinu (Is. 41:13). Ne ngapeʼ nga ni biʼniʼ Yoshiko, xa hermana ni bizéʼtenu ra bizulú artículo riʼ. Sicaríʼ guníʼ xiiñidxaapabe: «Guizáʼ bidxagayaadu pabiáʼ nuudxí jñaaʼ. Rihuinni dxiichiʼ Jiobá nga caguixhedxí ladxidoʼbe. Ne dede dxi gútibe, qué nusaanabe de niníʼnebe ca enfermera ne xcaadxi binni huará de Jiobá ne de ca promesa stiʼ». ¿Xi rizíʼdinu de ejemplu sti hermana Yoshiko yaʼ? Pa gápanu confianza ca promesa stiʼ Jiobá la? ziuube gaxha de laanu, ne zápanu valor para guni huantarnu ca guendanagana stinu.

7, 8. a) ¿Gunáʼ nga guiropa promesa ni zadúʼyanu, ne xi riníʼ ca diidxaʼ «cadi chuʼluʼ xizaa» yaʼ? b) ¿Xiñee gudxi Jiobá ca judíu ni nuu de esclavu cadi chuʼcaʼ xizaa? c) ¿Xi guníʼ Jiobá lu Isaías 46:3, 4 para quixhedxí ladxidóʼ xquidxi?

⁷ Guidúʼyanu guiropa promesa ni bicaa Isaías: «Cadi chuʼluʼ xizaa, purtiʼ naa nga Dios stiluʼ». ¿Xi riníʼ ca diidxaʼ «cadi chuʼluʼ xizaa» yaʼ? Lu idioma original ni gucuá ca diidxaʼ riʼ caníʼ ni casi ora nutiixhilú ti binni purtiʼ cadxibi xiixa o tuuxa ni zándaca guniná laa o cadxibi xhaataʼ tuuxa purtiʼ nuu lu peligru.

⁸ ¿Xiñee gudxi Jiobá ca judíu ni zeʼ de esclavu Babilonia cadi chuʼcaʼ xizaa yaʼ? Purtiʼ nánnabe zadxibi ca binni de Babilonia ora gucaalú ejércitu stiʼ medopersa laacaʼ ora mayaca guizaa setenta iza de nuu ca judíu de esclavu Babilonia. Ejércitu ca nga chiguiquiiñeʼ Jiobá para cuee xquidxi de esclavu (Is. 41:2-4). Ora bidii ca binni de Babilonia ne ca binni de xcaadxi guidxi que cuenta maʼ cadxiña ca enemigu sticaʼ la? bíʼnicabe stipa pur gácacabe nadxibalú, ngue runi guluusaacabe gana laacabe ora guníʼcabe sicaríʼ: «Cadi guidxíbiluʼ». Laaca bíʼnicabe xcaadxi dios purtiʼ guníʼ íquecabe zápacaʼ laacabe (Is. 41:5-7). Peru gudixhedxí Jiobá ladxidóʼ xquidxi ora gúdxibe laacaʼ: «Lii, Israel, [cadi nácaluʼ casi ca xcaadxi guidxi purtiʼ lii nga] siervu stinneʼ». Ne para cadi chuʼcaʼ xizaa, gúdxibe laacaʼ: «Naa nga Dios stiluʼ» (Is. 41:8-10). Ora guníʼ Jiobá «naa nga Dios stiluʼ», cayábibe ca judíu caʼruʼ gusiaandabe laacaʼ ne nácarucaʼ xquídxibe. Ne laaca gúdxibe laacaʼ zápabe ne zacanebe laacaʼ guireecaʼ de guidxi Babilonia. Nanna dxiichinu guizáʼ guluu ca diidxaʼ ni guníʼ Jiobá gana ca judíu ni nuu de esclavu que (biindaʼ Isaías 46:3, 4).

9, 10. ¿Xiñee cadi naquiiñeʼ chuʼnu xizaa? Bizeeteʼ ti ejemplu.

⁹ Tiempu riʼ, nabé nuu binni xizaa pur guiráʼ ca cosa malu ni cazaaca ndaaniʼ guidxilayú riʼ. Ne laaca runiná cani laanu. Peru cadi naquiiñeʼ chuʼnu xizaa, purtiʼ Jiobá cayabi laanu: «Naa nga Dios stiluʼ». Guizáʼ riguixhedxí ca diidxaʼ riʼ ladxidoʼno. ¿Xiñee yaʼ?

¹⁰ Guzéʼtenu ti ejemplu. Guxuíʼlunu zeʼ Juan ne Bruno lu ti avión, peru ni málasi bizulú caniibi dxacha avión que. Ne óraque guníʼ tuuxa lu micrófono ne ná rabi ca binni zeʼ lu avión que: «Caniʼné pitolo stiʼ avión riʼ laatu, bidxagalunu ti bi nadipaʼ. Laguni favor lacuu chaahuiʼ cinturón de seguridad stitu ne cadi guizaaláʼdxitu nagasi maʼ gudiʼdiʼ ni». Guizáʼ cadxibi Juan, peru ora bíʼyabe nuu dxí Bruno, gunabadiidxabe laa: «¿Xiñee  cadi cadxíbiluʼ pue?». Dede cuxidxihuiiniʼ Bruno ná rabi laabe: «Runebiaʼyaʼ piloto ca, bixhozeʼ laabe. Bidii lugar güeniáʼ lii pabiáʼ nánnabe gusabe avión, ne óraca maʼ qué zadxíbiluʼ».

11. ¿Xi rizíʼdinu de ejemplu stiʼ guiropaʼ binni zeʼ lu avión que?

¹¹ ¿Xi rizíʼdinu de ejemplu riʼ yaʼ? Cásica Bruno, qué riuʼnu xizaa purtiʼ runibiaʼnu Jiobá, Bixhózenu ni nuu guibáʼ. Nánnanu zacanebe laanu gudxíʼlunu ca guendanagana ni rápanu lu ca últimu dxi riʼ, cani zeeda gaca casi bi nadipaʼ ni biniibi avión que (Is. 35:4). Neca qué ridxela stale binni guidxilayú xi guni ora napa guendanagana, laanu qué riúʼpenu xizaa purtiʼ nápanu confianza Jiobá (Is. 30:15). Ne cásica biʼniʼ Bruno, laanu laaca rábinu binni xi razón nápanu para gápanu confianza Dios. Ne ora rúninu ni, racanenu laacabe chúʼcabe seguru zacané Jiobá laacabe neca guidxaagalúcabe intiica guendanagana.

12. a) ¿Gunáʼ nga guionna promesa ni zadúʼyanu? b) Ora runadiáganu diidxaʼ náʼ Jiobá, ¿xi rusietenalaʼdxiʼ ni laanu de laabe?

¹² Guidúʼyanu guionna promesa stiʼ Jiobá: «Zudieeʼ stipa lii. Dxandíʼ, zacaniáʼ lii». Maca bisiene Isaías ximodo zudii Jiobá stipa xquidxi. Laa guníʼ: «Zeeda Jiobá né poder, ne nabe zuni mandarbe» (Is. 40:10). Riquiiñeʼ Biblia diidxaʼ náʼ ora caníʼ ni de poder. Nga runi, ca diidxaʼ ni guníʼ Isaías riʼ rusietenalaʼdxiʼ ni laanu naca Jiobá ti Rey ni napa stale poder. Ne dxiqué biquiiñebe poder stibe ni qué rihuinni para gacanebe ne gulabe ca xpínnibe. Tiempu riʼ, laaca racanebe ne rápabe cani napa confianza laabe (Deut. 1:30, 31; Is. 43:10).

13. a) ¿Pora nga jma runi cumplir Jiobá promesa stiʼ ne rudii stipa laanu? b) ¿Xi ti cosa cayabi Jiobá laanu dxandíʼ zuni?

 ¹³ Runi cumplir Jiobá promesa ni maʼ biʼniʼ ora rudii stipa laanu, ne jmaruʼ si rúnibe ni ora canazananda ca enemigu stinu laanu. Nuu lugar cayuni stale binni guiráʼ ni nuu lu náʼ para gucueezacaʼ predicación o gucueezacaʼ guiráʼ dxiiñaʼ ni rúninu. Ora rúnicabe ca cosa ca, qué riuu xhaatanu xizaa purtiʼ cayabi Jiobá laanu dxandíʼ zuni xiixa ni zacané ne zudii confianza laanu. Sicaríʼ nabe: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ» (Is. 54:17). Rusietenalaʼdxiʼ promesa riʼ laanu chonna cosa nabé risaca.

14. ¿Xiñee cadi naquiiñeʼ guidxagayaanu ora gucaalú ca enemigu stiʼ Dios laanu?

¹⁴ Primé, cadi guiaandaʼ laanu zaca nanalaʼdxiʼ binni laanu (Mat. 10:22). Ne Jesús peʼ gudxi ca discípulo stiʼ guizáʼ zazanándacabe laacaʼ lu ca últimu dxi (Mat. 24:9; Juan 15:20). Guiropa, cayabi profecía stiʼ Isaías laanu cadi zaca nanalaʼdxiʼ si ca enemigu stinu laanu sínuque zuyúbicaʼ modo guninacaʼ laanu. Zándaca zusiguii ca enemigu stinu para gusihuínnicaʼ dxandíʼ ni caniʼcaʼ, zaniʼcaʼ xiixa ni cadi dxandíʼ ne zazanándacaʼ laanu dede guninacaʼ laanu (Mat. 5:11). Qué zucueeza diʼ Jiobá ca enemigu stinu para cadi gucaalucaʼ laanu (Efes. 6:12; Apoc. 12:17). Peru ¿xiñee cadi naquiiñeʼ guidxíbinu yaʼ?

15, 16. a) ¿Gunáʼ nga guionna cosa ni naquiiñeʼ guietenaláʼdxinu ne xiñee biaʼsi ni né ni ná Isaías 25:4, 5? b) ¿Xi ruzeeteʼ Isaías 41:11, 12 zazaaca ca binni ni gucaalú laanu?

¹⁵ Guionna cosa ni cadi naquiiñeʼ guiaandaʼ laanu nga maʼ guníʼ Jiobá intiica guiibaʼ iquiiñeʼ ca enemigu para gucaalucaʼ laanu, «qué zabeendunedícabe ni gastiʼ». Purtiʼ cásica rapa ti muru o ti barda  ti binni ora cundubi ti bi nadipaʼ la? zacaca rapa Jiobá laanu «ora rucaalú ca binni malu» laanu (biindaʼ Isaías 25:4, 5). Ne zedandá dxi ra maʼ qué zuniná ca enemigu stinu laanu (Is. 65:17).

¹⁶ Para gápanu jma confianza Jiobá la? cayabibe laanu xi chiguizaaca ca binni ni gucaalú laanu (biindaʼ Isaías 41:11, 12). Intiica si guni ca enemigu para gucaalucaʼ xquidxi Dios qué zabeenducaʼ gastiʼ purtiʼ zanitilucaʼ.

17, 18. a) Pa guidúʼndanu Biblia, ¿ximodo zacané ni laanu gápanu jma confianza Dios? Bizeeteʼ ti ejemplu. b) ¿Xiñee naquiiñeʼ guiníʼ íquenu ni ná textu stiʼ iza 2019?

¹⁷ Zápanu jma confianza Jiobá ora gunibiaʼnu laabe jma. Ne ti modo zanda gunibiaʼnu laabe nga guidúʼndanu Biblia ne cueenu tiempu para guni meditarnu ni ridúʼndanu. Lu Biblia zeeda caadxi historia ni dxandíʼ bizaaca ni rusihuinni ximodo gupa Jiobá xquidxi dxiqué ne ora ridúʼndanu cani rucaa cani laanu guni crenu zápabe laanu tiempu riʼ.

¹⁸ Guidúʼyanu pabiáʼ galán ejemplu biquiiñeʼ Isaías para gacané laanu guiénenu ximodo rapa Dios laanu. Bichaagabe Dios ti pastor ni rapa ca dendxuʼ stiʼ. Sicaríʼ ná ni: «Ne nabe zutópabe ca dendxuhuiiniʼ; ne ndaaniʼ nabe zinebe laacaʼ» (Is. 40:11). Ora runi sentirnu nuunu ndaaniʼ náʼ Jiobá la? qué ridxíbinu purtiʼ nánnanu cayápabe laanu. Para gacanebe laanu chúʼdxinu neca guidxaagalunu guendanagana la? maʼ gulí mozo ni nuu xpiaaniʼ textu stiʼ Isaías 41:10 para iza 2019, sicaríʼ ná ni: «Cadi chuʼluʼ xizaa, purtiʼ naa nga Dios stiluʼ». Pa guiníʼ íquenu ni ná ca diidxaʼ galán riʼ la? zápanu stipa ne confianza para gudxíʼlunu ca guendanagana ni guidxaagalunu.