1, 2. a) ¿Xiñee zanda guininu jneza biʼniʼ Jesús ra bisiidiʼ laanu guni conmemorarnu guendaguti stiʼ ti modo sencillu? b) ¿Xi cualidad stiʼ Jesús chiguizíʼdinu?

¿ÑEE zanda gusiéneluʼ xi rúninu guiráʼ iza ora rietenaláʼdxinu guendaguti stiʼ Jesús la? Zanda njaʼ, purtiʼ cadi nagana modo rúninu ni. Peru zándaca chuʼ tu guinabadiidxaʼ: «¿Ñee zanda gaca ti eventu nabé risaca ti modo sencillu la?».

² Dxi guyuu Jesús lu Guidxilayú riʼ, bisiidibe ca cosa ni jma risaca zeeda lu Biblia né diidxaʼ ni ganda guiene binni (Mat. 7:28, 29). Zacaca bisiidibe laanu guni conmemorarnu * guendaguti stibe, gúninu ni de ti modo sencillu ne neca gaca ni zacá nabé risaca ni. Guiduʼyaʼ chaahuinu xi guiráʼ raca lu eventu riʼ, zaqueca cani biʼniʼ ne cani guníʼ Jesús. Zacané ni laanu guiene chaahuinu humildad, valor ne guendarannaxhii stiʼ Jesús. Ne laaca zazíʼdinu xi naquiiñeʼ gúninu para gápanu ca cualidad ni nápabe.

3. Guidúʼndasinu Mateo 26:26-28, ¿xiñee zanda guininu cadi nagana modo gudixhestí Jesús gaca Conmemoración ne xii nga zeeda gaca pan sin levadura ne vinu?

³ Gudixhe Jesús gaca conmemorar guendaguti stiʼ nezalú ca once apóstol fiel stiʼ. Para ganda gúnicabe ni, biquiiñebe pan sin levadura ne vinu ni biaana ni biquiiñeʼ lu Pascua que (biindaʼ Mateo 26:26-28). Gúdxibe ca apóstol  stibe pan ne vinu ca nga chupa símbolo sencillu ni zeeda gaca cuerpu perfectu ne rini stibe ni chigudiibe pur laanu. Yanna, ¿xiñee qué nidxagayaa ca apóstol que ora biʼniʼ mandar Jesús gúnicabe Guendaroxhi stiʼ Señor de ti modo sencillu yaʼ?

4. ¿Xi conseju bidii Jesús Marta ne ximodo racané ni laanu guiénenu xiñee ti eventu sencillu Conmemoración?

⁴ Guietenaláʼdxinu ni bizaaca chupa chonna beeu ante guni Jesús Guendaroxhi stiʼ Señor, lu guionna iza de canayuni predicar Jesús. Ti dxi, yegánnabe ca xhamígube Lázaro, Marta ne María ne laga nuube ra lídxicaʼ bizulú bisiidibe laacaʼ. Neca nuu Marta ra yoo que, canayuni stale guendaró para gudii invitadu ni jma risaca stiʼ. Ne diidxaʼ nadóʼ gudxi Jesús laabe cadi caquiiñepeʼ gúnibe ti guendaró ni rudii dxiiñaʼ para gaca (Luc. 10:40-42). Ti tiempu despué, chupa chonna hora ante gátibe, bíʼnibe ni gúdxibe Marta que. Bíʼnibe ti eventu sencillu. ¿Xi rusiidiʼ ndiʼ laanu de Jesús yaʼ?

5. ¿Xi rizíʼdinu de Jesús ora biʼniʼ mandar gaca Conmemoración de ti modo sencillu, ne xiñee biaʼsi ni ne ni ná Filipenses 2:5-8?

⁵ Guiráʼ cani biʼniʼ ne cani guníʼ Jesús bisihuinni cani humilde laabe. Nga runi qué ridxagayaanu xiñee bisihuínnibe cualidad riʼ gueelaʼ ante gátibe (Mat. 11:29). Nanna dxiichiʼ Jesús mayaca gudii sacrificiu ni qué huayuu dxi gudii ti binni ne zandisaʼ Jiobá laabe de lade gueʼtuʼ para gácabe Rey guibáʼ. Peru neca nánnabe ni, qué ñúnibe ti eventu nagana ne naroʼbaʼ para gaca conmemorar guendaguti stibe. Ni gúdxibe ca discípulo stibe nga guietenaláʼdxicaʼ guendaguti stibe ora gúnicaʼ ti eventu sencillu ne apropiadu (Juan 13:15; 1 Cor. 11:23-25). Zaqué bisihuínnibe cadi orgulloso laabe. Guizáʼ riéchenu humilde Rey stinu ni nuu guibáʼ njaʼ. Biblia ná: «Laguiníʼ ique casi guníʼ ique Cristu Jesús. Neca de espíritu laabe casi Dios, qué niníʼ íquebe ñuube lugar stiʼ, ne ñácabe biaʼca laa, sínuque bisaanabe guiráʼ ni nápabe ne gúcabe casi ti esclavu ne beeda gácabe binni guidxilayú. Ne cadi ngasi, dxi maʼ nácabe binni, gúcabe humilde ne bizuubabe diidxaʼ dede bidiibe lugar biiticabe laabe, zacá nga guca ni, gútibe lu ti yaga» (Filipenses 2:5-8, TNM).

6. ¿Ximodo zanda gácanu humilde cásica guca Jesús?

⁶ Ti modo zanda gácanu humilde casi guca Jesús nga ora rizaaláʼdxinu xcaadxi jma que laanu (Filip. 2:3, 4). Guzéʼtenu xi bíʼnibe gueelaʼ ante gátibe. Neca nánnabe guizáʼ  naná modo chiguuticabe laabe la? guizáʼ guyuube xizaa pur ca yuubaʼ chiguidxaagalú ca discípulo fiel stibe. Ngue runi bisiidibe laacaʼ, guluube gana ne gudixhedxibe ladxidoʼcaʼ guidubi gueelaʼ que (Juan 14:25-31). Bisihuinni Jesús jma rizaalaʼdxiʼ ni caquiiñeʼ xcaadxi binni que ni caquiiñeʼ. Guizáʼ galán ejemplu de humildad ni bisaanabe para laanu njaʼ.

7. ¿Ximodo bisihuinni Jesús guizáʼ napa valor despué de bíʼnibe últimu Guendaroxhi stiʼ Señor?

⁷ Biʼniʼ si Jesús últimu Guendaroxhi stiʼ Señor bisihuinni guizáʼ napa valor. ¿Ximodo yaʼ? Guyuube dispuestu gúnibe ni ná Dios neca nánnabe zusituícabe lube ne zaníʼcabe caniʼbe mal de Dios ne zuuticabe laabe (Mat. 26:65, 66; Luc. 22:41, 42). Qué lica nucheené Jesús Dios ne bisisácabe lá, biʼniʼ defenderbe derechu napa Dios de guni mandar ne pur ni bíʼnibe ca zanda gapa ca binni ni gaca arrepentir guendanabani ni qué zaluxe. Ne laaca biʼniʼ prepararbe ca discípulo stibe para ca guendanagana ni chiguidxaagalucaʼ.

8. a) ¿Xi gudxi Jesús ca apóstol fiel stiʼ? b) Despué de guti Jesús, ¿ximodo bisihuinni ca discípulo stibe laaca nápacaʼ valor cásica laabe?

⁸ Laaca bisihuinni Jesús valor ra jma bizaalaʼdxiʼ ni caquiiñeʼ ca apóstol fiel stiʼ que ca cosa ni naguu xizaa laa. Gunábasibe Judas guiree de ra nuucabe que, bíʼnibe ti eventu sencillu ni zusietenalaʼdxiʼ cani gaca discípulo ungidu xi guiráʼ zanda cueenducaʼ pur rini ni chiguxhiibe ne ra gácacaʼ parte de pactu nacubi (1 Cor. 10:16, 17). Para gacanebe laacaʼ gácacaʼ fiel ne ganda checaʼ guibáʼ, gúdxibe laacaʼ xi ribézabe ne xi ribeza Bixhózebe de laacaʼ (Juan 15:12-15). Laaca guníʼnebe laacaʼ de ca prueba ni chiguidxaagalucaʼ.  Despué gúdxibe laacaʼ gácacaʼ valiente cásica laabe (Juan 16:1-4a, 33). Stale iza despué bisihuinni ca discípulo stibe yenándacaʼ ejemplu stibe purtiʼ laaca bíʼnicaʼ sacrificiu pur xcaadxi ne bisihuínnicaʼ nápacaʼ valor ora guyuucaʼ dispuestu gacanacaʼ pur xcaadxi ne gacanésaacaʼ (Heb. 10:33, 34).

9. ¿Ximodo zanda chinándanu ejemplu de valor stiʼ Jesús?

⁹ Tiempu riʼ, ¿ximodo zanda chinándanu ejemplu de valor stiʼ Jesús yaʼ? Guzéʼtenu ti ejemplu, rúninu ni ora racanenu ca hermanu ni canazanándacabe laacaʼ pur ni runi crecaʼ. Nuu biaje ruseguyoocabe laacaʼ neca qué gápacaʼ donda. Ne ora guizaaca nga la? naquiiñeʼ gúninu guiráʼ ni nuu lu nanu para gacanenu laacabe, casi guni orarnu ne guni defendernu laacabe nezalú ca autoridad pa caquiiñeʼ gúninu ni (Filip. 1:14; Heb. 13:19). Sti modo rusihuínninu nápanu valor nga ora qué rusaana de guni predicarnu sin guidxíbinu (Hech. 14:3). Cásica Jesús, laanu laaca nuunu decididu guni predicarnu mensaje stiʼ Reinu neca sanándacabe laanu o gucaalúcabe laanu. Yanna, ¿xi zanda gúninu pa nuu biaje runi sentirnu qué gápanu valor yaʼ?

10. ¿Xi naquiiñeʼ gúninu ca semana ante gaca Conmemoración, ne xiñee?

¹⁰ Stiʼ cosa zacané laanu gápanu valor nga guiníʼ íquenu esperanza ni nápanu pur sacrificiu biʼniʼ Jesús (Juan 3:16; Efes. 1:7). Ca semana ante gaca Conmemoración, zanda gusihuínninu dxandíʼ rudiʼnu xquíxepeʼ pur guti Jesús pur laanu. Ti modo zanda gúninu ni nga guidúʼndanu ca textu ni maca nexheʼ guiuundaʼ ca dxi ante de Conmemoración ne guiníʼ íquenu xi guiráʼ cosa bizaaca ante gatiʼ Jesús. Pa gúninu ni, ora chuunu Conmemoración ziene chaahuinu xi raca representar pan,  vinu ne sacrificiu jma naroʼbaʼ ni biʼniʼ Jesús. Ora riénenu ni maʼ biʼniʼ Jiobá ne Jesús pur laanu, ne guiráʼ ni ribeendunu ne familia stinu pur laani zaca esperanza stinu jma naguidxi ne jma rápanu valor para guni huantarnu dede ora gueeda fin (Heb. 12:3).

11, 12. ¿Xi guiráʼ maʼ bizíʼdinu?

¹¹ Hasta nagasi maʼ bidúʼyanu cadi rusietenalaʼdxiʼ si Guendaroxhi stiʼ Señor laanu pabiáʼ risaca ni biʼniʼ Jesús pur laanu, sínuque laaca rusiidiʼ ni laanu pabiáʼ humilde guca Jesús ne napa valor. Rudiʼnu xquíxepeʼ laabe de guidubi ladxidoʼno pur qué rusaanabe de gusihuínnibe ca cualidad riʼ dede yanna ne pur riniʼbe pur laanu ra maʼ nácabe Sumo Sacerdote guibáʼ (Heb. 7:24, 25). Para gusihuínninu rudiʼnu xquíxepeʼ pur sacrificiu stiʼ Jesús. Naquiiñeʼ gúninu ni cayuni mandarbe laanu, guietenaláʼdxinu guendaguti stibe (Luc. 22:19, 20). Rúninu ni guiráʼ iza dxi riaba 14 de nisán, beeu stiʼ ca judíu, lu calendariu stinu, ne laani nga fecha jma risaca riaba cada iza.

¹² Ora guiníʼ íquenu pabiáʼ sencillu modo raca Guendaroxhi stiʼ Señor, ridúʼyanu cualidad bicaa Jesús gatiʼ pur laanu. Ne nabé bisihuínnibe cualidad riʼ dxi guyuube lu Guidxilayú. Guidúʼyanu xii ni.

13. ¿Ximodo rusihuinni ni ná Juan 15:9 ne 1 Juan 4:8-10 pabiáʼ nadxii Jiobá ne Jesús laanu ne tu guiráʼ ribeendú ni galán pur guendarannaxhii ca yaʼ?

¹³ Lu guiráʼ ni biʼniʼ Jesús bisihuinni pabiáʼ nadxii Jiobá laanu (biindaʼ Juan 15:9; 1 Juan 4:8-10). Pur nadxii Jesús laanu nga bidii xquendanabani pur laanu. Nga runi pa ungidu laanu o pa nácanu de ca «xcaadxi dendxu», zanda cueendunu ni galán pur sacrificiu ni biʼniʼ Jiobá ne Jesús pur laanu purtiʼ nadxiicaʼ laanu (Juan 10:16; 1 Juan 2:2). Guidúʼyanu ximodo biene ne gunnaxhii Jesús ca discípulo stiʼ pur modo biʼniʼ últimu Guendaroxhi stiʼ Señor que.

14. ¿Ximodo bisihuinni Jesús nadxii ca discípulo stiʼ?

¹⁴ Casi maʼ bidúʼyanu, qué ñuni mandar Jesús ca xpinni ni bibí gúnicaʼ ti eventu nagana, sínuque ti guendaroxhi sencillu. Ne ra zidiʼdiʼ iza, rietenalaʼdxiʼ ca xpinni Jesús guendaguti stiʼ guiráʼ iza neca nápacaʼ stale guendanagana, o nuu tiru neca nuucaʼ ndaaniʼ cárcel (Apoc. 2:10). ¿Ñee rúnicabe ni biʼniʼ mandar Jesús laacabe la? Rúnicabe ni pue.

15, 16. ¿Xiñee huayanda huayuni stale hermanu Conmemoración neca cadíʼdicaʼ ra nagana?

¹⁵ Qué rusaana cani dxandíʼ xpinni Cristu de guietenaláʼdxicaʼ guendaguti stiʼ Jesús. Rúnicabe stipa pur chinándacabe guiráʼ ni biʼniʼ mandar Jesús laacabe neca gaca ni nagana para laacabe. Guidúʼyanu ejemplu stiʼ hermanu Harold King. Cumu deguyoobe ndaaniʼ cárcel stiʼ guidxi China la? biyúbibe modo gúnibe Conmemoración raqué. Nagaʼchiʼ runi prepararbe pan ne vinu né ca cosa si ni nápabe. Ne laaca rúnibe stipa pur guni calcularbe fecha stiʼ Conmemoración. Ne ora ganda dxi que la? stúbibe rúnibe Conmemoración, ruundabe, runi orarbe ne rudiibe ti discursu.

¹⁶ Guidúʼyanu sti ejemplu. Dxi guca Segunda Guerra Mundial, ti grupu de hermana ni deguyoo ndaaniʼ ti campu de concentración, guluucaʼ xquendanabánicaʼ ra naxoo para gúnicaʼ Conmemoración. Cumu cadi nagana para gúnicabe ni la? gunda bíʼnicabe ni nagaʼchiʼ. Sicaríʼ guníʼ tobi de ca hermana que: «Bizuhuaʼdu guidubi  buelta ti banguʼ, gudíxhedu ti lari blancu luni ne raqué bizuhuaʼdu pan ne vinu. Ne pa nucáʼguidu biaaniʼ la? zándaca ñuuyacabe laadu ngue runi bicaʼguidu ti guiʼriʼ. [...] Bínidu voto Bixhózedu stiʼ biaje de iquiiñedu guiráʼ stipa stidu para gusihuínnidu nayá labe». ¡Guizáʼ naroʼbaʼ fe bisihuínnicabe! Cumu ti eventu sencillu nga Conmemoración la? zanda gúninu ni neca cadídinu ra nagana ne nga rusihuinni pabiáʼ nadxii Jesús laanu.

17. ¿Xi pregunta caquiiñeʼ gúninu laca laanu?

¹⁷ Ora maʼ zeeda dxiña Conmemoración, galán guinabadiidxanu laca laanu: «¿Ximodo zanda gannaxhieeʼ cásica gunnaxhii Jesús yaʼ? ¿Ñee jma rizaaladxeʼ ni caquiiñeʼ ca hermanu stinneʼ que cani caquiiñeʼ la? ¿Ñee ribezaʼ gúnicabe stale cosa o riníʼ iqueʼ nuu xi zanda ne nuu xi qué zanda gúnicabe la?». Chinándanu ejemplu stiʼ Jesús ne gusihuínninu riénenu ni runi sentírcabe (1 Ped. 3:8).

18, 19. a) ¿Xi ti cosa nanna dxiichinu? b) ¿Xi cá íqueluʼ gúniluʼ dede ca yanna?

¹⁸ Xcaadxi si maʼ qué zietenaláʼdxinu guendaguti stiʼ Jesús. Dxi guibiguetaʼ Jesús lu gran tribulación zinebe ca ungidu ni nuu lu Guidxilayú riʼ guibáʼ. Ne dede dxi ca maʼ qué zácaruʼ Conmemoración (1 Cor. 11:26; Mat. 24:31).

¹⁹ Zanda chuʼnu seguru ora maʼ qué gaca Conmemoración zietenaláʼdxinu né cariñu eventu sencillu riʼ ni rusihuinni pabiáʼ valor, humildad ne guendarannaxhii bisihuinni Jesús, xiixa ni qué huayuu dxi gusihuinni ti binni. Nuunu seguru guiráʼ cani guyé Conmemoración zuíʼnecaʼ ca binni ni guiasa de lade gueʼtuʼ de laani. Stale cosa galán zabeendú cani gunadiaga ni. Yanna, para cueendunu ni galán de Conmemoración dede yanna la? napa xidé gúninu stipa pur gácanu humilde, gápanu valor ne gannaxhiinu casi gunnaxhii Jesús. Pa gúninu ni la? nuunu seguru zaguu Jiobá ndaayaʼ laanu (2 Ped. 1:10, 11).