¿Padxí bizulú biquiiñecabe sinagoga?

DIIDXAʼ sinagoga naca ni ti diidxaʼ griegu ni raca significar «asamblea» o «reunión». Biáʼsipeʼ diidxaʼ riʼ, purtiʼ dede dxiqué guca ca sinagoga riʼ lugar ra guca reunir ca judíu para guiziidicaʼ ne guni adorarcaʼ Dios. Lu ca Escrituras Hebreas qué riete pa guyuu sinagoga. Peru lu Escrituras Griegas Cristianas riete maca guyuu ca lugar ra raca reunir binni lu primé siglu que.

Casi guiráʼ ca hombre ni nanna de historia ná bizulú biquiiñecabe ca sinagoga dxi guyuu ca israelita de esclavu ndaaniʼ guidxi Babilonia. Encyclopaedia Judaica ná: «Cumu zitu nuucabe de xquídxicabe ne zitu riaana Templu que de ra nuucabe la? gatigá bidagulisaacabe para gatadxí ladxidóʼcabe, zándaca rúnicabe ni ca Sábadu, ne ruundacabe Stiidxaʼ Dios». Peru zándaca dxi maʼ qué ñaca ca judíu esclavu ne dxi bireecaʼ de Babilonia nga guca reunircaʼ para guni orarcaʼ ne gúʼndacaʼ Stiidxaʼ Dios, ne de raqué nga bizulú biquiiñecabe ca sinagoga ndaaniʼ ca guidxi ra yendézacabe.

Lu primé siglu que la? ndaaniʼ ca sinagoga que nga bidagulisaa ca judíu ni nabeza lu Mediterráneo, ne lu Medio Oriente ne zaqueca cani nabeza ndaaniʼ guidxi Israel para guidxaagacaʼ xcaadxi binni ne para guni adorarcaʼ Dios. Sicaríʼ guníʼ profesor Lee Levine, ni runi dxiiñaʼ ra Universidad Hebrea de Jerusalén: «Ndaaniʼ ca sinagoga que runi estudiárcabe, runi tendércabe xiixa casu judicial, ridopa bueltu ni caquiiñeʼ guidxi que, rócabe guendaró ca Sábadu o lu ca dxi cayaca xiixa saa ne rié binni para gunibiáʼ xcaadxi o para guni adorarcaʼ Dios». Laaca bizeetebe: «Tobi de ca cosa jma risaca ni raca ndaaniʼ ca sinagoga que nga runi adorárcabe Dios». Nga runi qué ridxagayaanu xiñee gatigá guyé Jesús ra sinagoga (Mar. 1:21; 6:2; Luc. 4:16). Ndaaniʼ ca sinagoga que nga bisiidicabe, bidiibe conseju ne guluucabe gana binni. Despué de biasastí primé congregación cristiana la? gupa Pablo costumbre guni predicar ndaaniʼ ca sinagoga que. Cumu gunna Pablo rié binni ni racalaʼdxiʼ guiziidiʼ jma de Dios ndaaniʼ ca sinagoga que la? primé ca ni rúnibe ora chindabe raqué nga runi predicarbe ndaaniʼ sinagoga (Hech. 17:1, 2; 18:4).