MAʼ XCAADXI si cayaadxaʼ para tidiʼ ca israelita guiiguʼ Jordán ne guiuucaʼ lu layú ni maca gudxi Dios gudii laacaʼ. Ti dxi, málasi guyé caadxi gunaa de sti guidxi ra nuu ca hombre que ne biʼniʼ invitarcaʼ laacabe ti guendaró. Zándaca biiyacabeni casi ti oportunidad para gunibiáʼcabe xcaadxi binni, guyaacabe ne gócabe. Napa ca gunaa que costumbre sticaʼ ne qué rinándacaʼ ni ná Ley bidii Dios guidxi Israel, ne zándaca guníʼ ique caadxi de ca hombre que zápacaʼ cuidadu ne qué zazaacacaʼ gastiʼ.

 Peru ¿xi bizaaca yaʼ? Biblia ná: «Biʼniʼ cometercaʼ pecadu sexual né ca gunaa xiiñiʼ ca binni de Moab». Ni racalaʼdxiʼ ca gunaa riʼ nga guni adorar ca israelita que ca dios falsu sticaʼ. Ne ngapeʼ nga ni bíʼnicabe. Ngue runi bidxiichiné Jiobá guidxi Israel (Núm. 25:1-3).

Bicheené ca israelita Ley stiʼ Dios de chupa modo, bizuxíbicaʼ nezalú dios falsu ne biʼniʼ cometercaʼ pecadu sexual. Guti stale mil de laacaʼ purtiʼ qué nuzuubacaʼ diidxaʼ (Éx. 20:4, 5, 14; Deut. 13:6-9). ¿Xiñee nabé triste ni bíʼnicabe riʼ yaʼ? Purtiʼ bicheenécabe Ley stiʼ Dios dxi mayaca tídicabe guiiguʼ Jordán ne chúʼcabe ndaaniʼ Tierra Prometida (Núm. 25:5, 9).

Ra bietenalaʼdxiʼ apóstol Pablo ni bizaaca ca israelita que la? bicaa ca diidxaʼ riʼ para quixhená laanu: «Irá nga bizaaca ca bixhoze gola nu ne ucuá ni lu Xquiʼchi Dios para iziʼdi nu iduʼya gá nu laanu, cani nabani nu ra ma zeda iluxe guidxilayú riʼ» (1 Cor. 10:7-11). Guizáʼ biecheʼ Binidxabaʼ ora biʼyaʼ bichee ca israelita que ne maʼ qué ñuucaʼ ndaaniʼ Tierra Prometida. Naquiiñeʼ guizíʼdinu ti cosa nabé risaca de ni bizaaca ca israelita que, purtiʼ nanna dxíchinu qué racalaʼdxiʼ Binidxabaʼ chuʼnu ndaaniʼ guidxilayú cubi ni maʼ guníʼ Dios chigudii laanu.

Para gucaa Binidxabaʼ ti xpinni Cristu guchee la? riquiiñeʼ trampa ni maca huaquiiñeʼ ne ni maʼ bicaa stale binni guchee. Casi bidúʼyanu nagasi, bicaabe ca israelita gucheecaʼ ora gúpacaʼ relación sexual. Tiempu riʼ laaca nácani ti trampa nabé peligroso. Ne zanda guiábanu luni pa guidúʼyanu pornografía.

Tiempu riʼ, zanda guʼyaʼ binni pornografía sin ganna xcaadxi pa rúnini. Dxiqué, pa racalaʼdxiʼ binni guʼyaʼ pornografía la? caquiiñeʼ cheʼ cine o siʼ xiixa revista o libru para gúʼyani. Zándaca stale de laacaʼ qué ñúnicani purtiʼ rituílucaʼ guʼyaʼ binni laacaʼ ca lugar ca o gaxha de laacani. Peru yanna riʼ tutiica binni ni napa Internet zanda guʼyaʼ pornografía ra runi dxiiñaʼ o ndaaniʼ carru stiʼ. Ne ndaaniʼ stale guidxi, stale hombre ne gunaa zanda gúʼyacaʼ pornografía ra lídxicaʼ.

Peru cadi ngasi nga laani. Yanna riʼ maʼ zanda guʼyaʼ binni ni lu ca dispositivu móvil stiʼ. Zanda gúʼyacabe imagen dxabaʼ lu teléfono o tableta stícabe laga zécabe ndaaniʼ autobús, lu tren o laga zizácabe lu calle.

Cumu yanna riʼ zanda guʼyaʼ binni pornografía sin ganna xcaadxi la? guizáʼ cayuniná trampa riʼ binni jma qué dxiqué. Pur laani rilaa stale guendaxheelaʼ, racaná conciencia sticaʼ ne ruchaani modo laacaʼ. Ne ni jma feu nga zanda guníticaʼ amistad ni nápacaʼ né Jiobá. Guizáʼ racaná binni ora ruuyaʼ pornografía. Zándaca chaahuidugá guiaandaʼ laacaʼ ni bíʼyacaʼ, peru zuchiiñaruʼ conciencia sticaʼ laacaʼ.

Cadi guiaandaʼ laanu racané Jiobá laanu para cadi guiábanu lu trampa stiʼ Binidxabaʼ riʼ. Pa racaláʼdxinu gapa Jiobá laanu la? caquiiñeʼ gúninu ni qué ñuni ca israelita que, caquiiñeʼ guzúʼbanu stiidxaʼ Dios (Éx. 19:5). Naquiiñeʼ guiénenu nanalaʼdxiʼ Dios pornografía. ¿Xiñee yaʼ?

Guiníʼ íquenu ndiʼ: Ca ley bidii Dios guidxi Israel dxiqué guizáʼ galán cani. Zeeda gaca cani casi ti muru ni ruxheleʼ ca israelita que de ca cosa yuudxuʼ runi ca guidxi nuu gaxha de laacaʼ (Deut. 4:6-8). Ca ley riʼ rusihuinni dxichicani nanalaʼdxiʼ Jiobá ca pecadu sexual.

Bizeeteʼ si Jiobá guiráʼ ca cosa yuudxuʼ runi ca guidxi nuu gaxha de Israel la? gúdxibe ca israelita ca diidxaʼ riʼ: «Cadi naquiiñeʼ gúnitu ni runi ca binni de Canaán, ra chiniáʼ  laatu. [...] Maʼ guca biidiʼ guidxilayú riʼ, ne zusabanaʼyaʼ ni pur donda stini». Para Dios stiʼ Israel nabé nayuudxuʼ modo nabani ca cananeu, dede guniʼbe guizáʼ maʼ guca biidiʼ guidxi riʼ (Lev. 18:3, 25).

Neca binitilú Jiobá ca cananeu, qué ninitilú ca cosa dxabaʼ ni bíʼnicaʼ. Jma de ti mil gaayuʼ gayuaa iza despué, guníʼ Pablo «qué rituí lú» ca binni ni nuu ra nabeza ca xpinni Cristu gúnicaʼ cosa dxabaʼ. Ne rúnicaʼ cosa malu sin guituílucaʼ ne rúnicaʼ cosa yuudxuʼ «dede biaʼ gapa ca gana» (Efes. 4:17-19). Ne yanna riʼ nuu stale binni ni qué rituilú guni cosa dxabaʼ. Laanu ca xpinni Cristu rúninu stipa para cadi guidúʼyanu ca cosa dxabaʼ ruuyaʼ binni tiempu riʼ.

Ca binni ni ruuyaʼ pornografía qué runi respetarcaʼ Dios. Bizaʼbe laanu cásica laabe, ne bidiibe lugar cuinu xii nga ni jneza ne ni cadi jneza. Cumu nuu xpiaanibe la? gudíxhebe ley ni caníʼ de relación sexual ne lú cani ná ti hombre ne ti gunaa ni maʼ bichaganáʼ si nga zanda gapa relación sexual (Gén. 1:26-28; Prov. 5:18, 19). Peru ca binni ni rucaa xcaadxi guʼyaʼ pornografía rucaanacaʼ ca norma moral stiʼ Dios ne qué runi respetarcaʼ laabe. Ne pur nga zuni juzgar Dios ca binni riʼ (Rom. 1:24-27).

¿Xi zazaaca ca binni ni riuuladxiʼ guʼyaʼ o guʼndaʼ ni napa pornografía yaʼ? Zándaca guiníʼ caadxi de laacaʼ cadi malu guʼyaʼ binni pornografía purtiʼ qué zúnini laacaʼ gastiʼ. Peru cucaanáʼ ca binni riʼ ca normal moral stiʼ Dios. Ne zándaca cadi nga diʼ nga cá íquecabe ora bizulú biiyacabe pornografía. Peru laanu ca xpinni Dios nánnanu caquiiñeʼ gucáʼnanu ne gacananaláʼdxinu pornografía. Biblia cayabi laanu: «Laatu cani nadxii Jiobá, lagaca nanalaʼdxiʼ ni cadi jneza» (Sal. 97:10).

Dede ca binni ni qué racalaʼdxiʼ guʼyaʼ pornografía rudiicaʼ cuenta cadi nagana guiaba binni lu trampa riʼ. Cumu imperfectu laanu la? zándaca cudxíʼlunu xiixa deseu sexual yuudxuʼ. Ne zándaca gucaa ladxidoʼno laanu guiníʼ íquenu cadi malu guchéʼnenu ley stiʼ Dios (Jer. 17:9). Peru stale de ca ni maʼ naca hermanu stinu yanna maʼ bisaana de gúʼyacaʼ  pornografía. Ni huayuni ca hermanu riʼ zanda cuʼ ni gana ca binni ni cayuni stipa pur gudxiilú guendanagana riʼ. Guidúʼyanu ximodo zanda gacané Stiidxaʼ Dios laanu para cadi guiábanu lu pornografía, ti trampa stiʼ Binidxabaʼ.

Casi bidúʼyanu ra ruzulú artículo riʼ, bichee stale israelita purtiʼ bidiicaʼ lugar guxheleʼ ca deseu sticaʼ laacaʼ de Jiobá. Laaca zanda guizaacanuni yanna. Sicaríʼ guníʼ Santiago, mediu hermanu stiʼ Jesús de peligru riʼ: Cada tobi «rigubayú deseu stiʼ laa ne [...] ruquiindeni laa. Ora maʼ guca deseu ca nadipaʼ, rucaani binni guni pecar» (Sant. 1:14, 15, TNM). Ora rudii binni lugar guicaa xcu xiixa deseu malu ndaaniʼ ladxidóʼ la? zándaca jma nagueenda gueeda guchee. Nga runi, gusaana de guiníʼ íquenu cosa dxabaʼ ne gucáʼnanu cani.

Pa gudiʼnu cuenta riníʼ íquerunu cosa dxabaʼ la? gúninu xiixa nagueendaca. Jesús guníʼ: «Pa cucaa naluʼ o ñeeluʼ lii gucheeluʼ, bigá ni ne bisaʼbiʼ ni zitu. [...] Ne pa cucaa guié luluʼ lii gucheeluʼ, guxha ni ne bisaʼbiʼ ni zitu» (Mat. 18:8, 9, TNM). Cadi caníʼ diʼ Jesús guninanu laca laanu, sínuque ni racaláʼdxibe gusiénebe laanu nga caquiiñeʼ guixélenu de ca cosa ni zanda gucaa laanu gucheʼnu. ¿Ximodo zanda chinanda ca ni ruuyaʼ pornografía conseju riʼ yaʼ?

Guxuíʼlunu málasi nidúʼyanu ti imagen pornográfico. Cadi guiníʼ íquenu qué zazaacanu gastiʼ. Naquiiñeʼ gutiixhilunu nagueendaca. Gusuinu televisión, computadora o dispositivu móvil stinu nagueendaca. Ne guiníʼ íquenu ca cosa ni riuulaʼdxiʼ Dios. Pa gúninu ca ni bizéʼtenu riʼ la? zacanécani laanu gucueezanu ni riníʼ íquenu, para cadi guni controlar ca deseu malu stinu laanu.

Ti binni ni maʼ bisaana de guʼyaʼ pornografía qué riaandaʼ laa guiráʼ ni biʼyaʼ, ne pa málasi guietenalaʼdxiʼ cani la? zándaca gucaani laa gaca masturbar. Pa maʼ bisaanaluʼ  de gúʼyaluʼ pornografía ne málasi guietenaláʼdxiluʼ xiixa imagen dxabaʼ la? naquiiñeʼ gánnaluʼ zazaacaluʼ nga ne naquiiñeʼ chuʼluʼ listu para gudxiiluluʼ ca deseu malu ca.

Gudixheʼ ique guiníʼ íqueluʼ ne gúniluʼ guiráʼ ni rusiidiʼ Dios. Yenanda ejemplu stiʼ Pablo, laa guníʼ: «Runeʼ castigar cuerpu stinneʼ ne runeʼ controlar ni casi rúnicabe né ti esclavu» (1 Cor. 9:27, TNM). Cadi gudiiluʼ lugar guinaaze ca deseu dxabaʼ ca lii. Biʼniʼ ni ná Romanos 12:2, ná ni: «Laudii lugar uchaa Dios laatu ne cuee irá ni ucuá ique tu chiqué. Zacá zanna tu xii nga racalaʼdxi Dios guni tu, ni nachaʼhui ne ni chuʼlaʼdxiʼ ne ni jneza peʼ». Cadi guiaandaʼ lii pa guiníʼ íqueluʼ ne gúniluʼ ni rusiidiʼ Jiobá zusiécheni lii jma que ca deseu malu ni zanda gucaa lii gucheeluʼ.

Biʼniʼ stipa guiziidiluʼ caadxi textu zeeda lu Biblia de memoria ni zanda gacané lii guiníʼ íqueluʼ ni riníʼ ique Jiobá de pornografía ne guiéneluʼ ni racaláʼdxibe gúniluʼ. Nga runi, ora guietenaláʼdxiluʼ xiixa cosa ni cadi jneza la? guníʼ ique ni ná ca textu ca. Caadxi de ca textu riʼ nga Salmo 119:37, Isaías 52:11, Mateo 5:28, Efesios 5:3, Colosenses 3:5 ne 1 Tesalonicenses 4:4-8.

¿Xi naquiiñeʼ gúniluʼ pa málasi gápaluʼ deseu de gúʼyaluʼ o guiníʼ íqueluʼ cosa dxabaʼ yaʼ? Yenanda ejemplu ni bisaana Jesús (1 Ped. 2:21). Despué de guyuunísabe, gucalaʼdxiʼ Binidxabaʼ nucaa laabe nucheebe chupa chonna biaje. ¿Xi biʼniʼ Jesús yaʼ? Qué nudiibe lugar nusaba Binidxabaʼ laabe lu ca trampa stiʼ. Bicaanabe guiráʼ ca cosa ni gudxi Binidxabaʼ laabe ne biquiiñebe ni zeeda lu Stiidxaʼ Dios para bicábibe laa. Sicaríʼ gúdxibe laa: «Biree de ra nuaa binidxabaʼ», ne laa zeʼ. Cásica qué nudii Jesús lugar nusaba Binidxabaʼ laa, laaca cadi naquiiñeʼ gudiiluʼ lugar gusaba Binidxabaʼ lii (Mat. 4:1-11). Racalaʼdxiʼ Binidxabaʼ gucaa laanu guiníʼ íquenu cosa dxabaʼ, peru cadi gudiʼnu lugar gúnibeni. Zanda gucáʼnanu pornografía, ne zanda gucáʼlunu Binidxabaʼ purtiʼ zacané Jiobá laanu.

Cadi gusaana de guni orarnu Jiobá ne guinábanu laa gacané laanu. Pablo guníʼ: «Lainaba laa irá ni caquiiñe tu, ne laudii diuxquixe laa. Ne óraque zaguixhe dxí ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu, purti nuu né tu Cristu Jesús tobi si» (Filip. 4:6, 7). Zaguixhedxí Jiobá xquendabiaaninu para cadi guchéʼnenu laa. Pa guidxíñanu Dios la? laa zadxiñaʼ gaxha de laanu (Sant. 4:8).

Ni jma zapa laanu para cadi guiábanu lu trampa stiʼ Binidxabaʼ nga chuʼnu gaxha de Jiobá, Dios ni jma nandxóʼ. Sicaríʼ guníʼ Jesús de Binidxabaʼ: «Ma zeda xaíque sti guidxilayú riʼ. Qué zanda guni mandar be naa» (Juan 14:30). ¿Xiñee guniʼbe qué zanda guni mandar Binidxabaʼ laabe yaʼ? Ti biaje guniʼbe ca diidxaʼ riʼ: «Biseenda Bixhoze naa, ne nuu né naa. Qué huasaana be naa stube purti qué riaana dxie de gune ni riulaʼdxi be» (Juan 8:29). Pa gúninu ni riuulaʼdxiʼ Dios la? laaca qué zusaanabe laanu stúbinu. Gucáʼnanu pornografía, trampa ni riquiiñeʼ Binidxabaʼ, ne zacá zanda guni ganarnu laa.