NORMAL nga gacaláʼdxinu gúʼyacabe laanu casi ti binni nachaʼhuiʼ ne ni runi ni jneza. Peru nagana gúninu ni ca dxi riʼ, purtiʼ stale binni nanalaʼdxiʼ «irá ni jneza» (2 Tim. 3:3). Ne zándaca maʼ laacabe riguíxhecabe xii nga ni jneza ne ni cadi jneza, purtiʼ para laacabe «ni jneza nga cadi jneza ne ni cadi jneza nga jneza» (Is. 5:20). Guiranu rudxíʼlunu imperfección stinu ne ca cosa ni cadi jneza bíninu dxiqué, nga runi zándaca guni sentirnu cásica biʼniʼ sentir ti hermana ni maʼ napa stale iza de cayuni servir Jiobá, laa guníʼ: «Guizáʼ nagana raca para naa guiníʼ iqueʼ zanda gacaʼ ti binni nachaʼhuiʼ».

Guizáʼ galán nga gánnanu zanda guni cultivarnu cualidad riʼ. Laani naca ni parte de fruto ni rudii espíritu santu stiʼ Dios, ne jma nadipaʼ ni que ca guendanagana ni zanda guidxaagalunu, casi ora gucaalú binni laanu o guchiiñaʼ conciencia stinu laanu pa bíninu xiixa dxiqué. Guidúʼyanu xii nga guendanachaʼhuiʼ o bondad ne ximodo zanda gusihuínninu ni lu xquendanabáninu.

Guendanachaʼhuiʼ o bondad ca nga tobi de ca cualidad ni rusihuinni ti binni nachaʼhuiʼ, ni cadi naca malu nin corrupto ne ni runi ni jneza lu xquendanabani. Ti binni nachaʼhuiʼ siempre ruyubi ximodo gacané xcaadxi binni.

Zándaca runibiaʼnu caadxi binni ni nuu dispuestu guni cosa galán pur ca xhamigu ne familia stiʼ. Peru cadi ngasi nga runi ti binni nachaʼhuiʼ nezalú Dios. Ni dxandíʼ la? nin tobi de laanu qué zanda gusihuinni cualidad riʼ de ti modo perfectu, purtiʼ Biblia ná «gastiʼ nin ti hombre justo ndaaniʼ guidxilayú riʼ ni guni puru si ni jneza sin guchee» (Ecl. 7:20). Apóstol Pablo guníʼ: «Nanna binni guidxilayú naa, ne gasti enda nachaʼhui nuu luguiaʼyaʼ» (Rom. 7:18). Nga runi, pa racaláʼdxinu guni cultivarnu cualidad riʼ la? naquiiñeʼ guni analizarnu ejemplu stiʼ Jiobá, purtiʼ ra nuube nga cadá guendanachaʼhuiʼ.

Jiobá si nga riguixhe xii nga ni jneza. Ti hombre ni bicaa ti salmo guníʼ: «Nacháʼhuiluʼ ne rúniluʼ ni jneza. Bisiidiʼ naa ca norma stiluʼ» (Sal. 119:68). Guidúʼyanu chupa cosa ni rusihuinni guendanachaʼhuiʼ stiʼ Jiobá ni riete lu versículo riʼ.

Nachaʼhuiʼ Jiobá. Guendanachaʼhuiʼ ca nga tobi de ca cualidad jma risaca de personalidad stiʼ Jiobá. Guidúʼyanu xi bizaaca ora gúdxibe Moisés ca diidxaʼ riʼ: «Zadideʼ nezaluluʼ para gúʼyaluʼ guendanachaʼhuiʼ stinneʼ». Nga runi, laga zidiʼdiʼ gloria ne guendanachaʼhuiʼ stiʼ Dios nezalú Moisés, binadiaga ca diidxaʼ riʼ: «Jiobá, Jiobá, ti Dios ni napa misericordia ne nachaʼhuiʼ, rindaa para guidxiichi ne qué rusaana de gannaxhii ne fiel laa, qué rusaana de gannaxhiibe stale mil binni, runi perdonarbe cani ruchee ne cani qué ruzuubaʼ diidxaʼ, peru qué zusaanabe cani napa donda sin castigu» (Éx. 33:19; 34:6, 7). Nga runi, nápanu stale razón para guiénenu rihuinni guendanachaʼhuiʼ stiʼ Jiobá lu personalidad stiʼ. Dxi guyuu Jesús ndaaniʼ Guidxilayú riʼ, bisaanabe ti ejemplu guizáʼ galán de guendanachaʼhuiʼ. Peru neca zacá guníʼ: «Iruti ru nachaʼhui jma que tobi lucha Dios» (Luc. 18:19).

 Runi Jiobá ni jneza. Rihuinni guendanachaʼhuiʼ stiʼ Jiobá lu guiráʼ ni runi. Biblia ná: «Nachaʼhuiʼ Jiobá né guiráʼ binni, ne misericordia stibe rihuinni ni lu guiráʼ ni huayúnibe» (Sal. 145:9). Rusihuinni Jiobá nachaʼhuiʼ ora qué runi menu ne ora rudii guendanabani binni ne ora rudii laacaʼ ni caquiiñecaʼ para guibánicaʼ (Hech. 14:17). Laaca rusihuínnibe ni ora runi perdonarbe ca pecadu stinu. Ti hombre ni bicaa ti salmo guníʼ: «Lii, Jiobá, nacháʼhuiluʼ ne nuuluʼ listu para guni perdonarluʼ» (Sal. 86:5). Zanda chuʼnu seguru qué rucueeza Jiobá de gudii «ni galán para cani canazá sin donda» (Sal. 84:11).

Cumu bizáʼ Jiobá laanu cásica laa la? zanda gácanu binni nachaʼhuiʼ ne gúninu ni jneza (Gén. 1:27). Neca zacá, Biblia cayabi ca xpinni Dios: «Laguiziidiʼ gácatu nachaʼhuiʼ» (Is. 1:17). Guidúʼyanu chonna cosa ni zanda gúninu para guni desarrollarnu cualidad guizáʼ galán riʼ.

Primé, guni orarnu para guinábanu espíritu santu, laani zacané ni laanu para gácanu nachaʼhuiʼ nezalú Dios (Gál. 5:22). Ya, zacané espíritu stiʼ Dios laanu gannaxhiinu ni jneza ne gucáʼnanu cosa malu (Rom. 12:9). Ne cadi ngasi, Biblia ná zanda gacané Jiobá laanu lu guiráʼ ni gúninu ne lu guiráʼ ni guininu (2 Tes. 2:16, 17).

Guiropa, naquiiñeʼ guidúʼndanu Stiidxaʼ Dios. Ora rúninu ni la? rusiidiʼ Jiobá laanu sanu lu neza ni nachaʼhuiʼ ne runi prepararbe laanu para gúninu intiica dxiiñaʼ (Prov. 2:9; 2 Tim. 3:17). Ora ridúʼndanu Stiidxaʼ Dios ne runi meditarnu ni guidúʼndanu la? riaana ca cosa risaca stiʼ Dios ne ca ni racaláʼdxibe gúninu ndaaniʼ ladxidoʼno. Ne reeda gaca ca ni casi ti tesoro ni zanda gacané laanu ora caquiiñenu ni (Luc. 6:45; Efes. 5:9).

Guionna, gúninu stipa pur chinándanu ejemplu stiʼ ca ni «canayuni jneza» (3 Juan 11). Ndaaniʼ Biblia zeeda stale ejemplu stiʼ binni ni guca nachaʼhuiʼ ne zanda chinándanu ca ni. Peru ca ejemplu jma galán nápanu nga stiʼ Jiobá ne Jesús. Ne laaca nápanu xcaadxi ejemplu galán, casi ejemplu stiʼ Tabita ne Bernabé (Hech. 9:36; 11:22-24). ¿Xiñee qué guni estudiarnu ni ruzeeteʼ Biblia de laacabe ne guiduʼyaʼ chaahuinu xi bíʼnicabe para gucanécabe xcaadxi binni? Ne guiníʼ íquenu xi zanda gúninu para gacanenu ti familia stinu o tuuxa hermanu de congregación stinu. Guiduʼyaʼ chaahuinu ca ndaayaʼ gucuaa Tabita ne Bernabé pur bíʼnicaʼ ni jneza. Ne laanu laaca zanda guicaanu ca ndaayaʼ ni gucuaacabe.

 Laaca zanda guietenaláʼdxinu ca binni ni racané xcaadxi tiempu riʼ. Ti ejemplu nga ca ancianu de congregación, guizáʼ rúnicabe dxiiñaʼ ne nadxiicabe ni jneza. Ne cadi gusiáʼndanu ca hermana fiel stinu, ca ni rusiidiʼ «ni jneza» pur guiráʼ ni rúnicaʼ ne ni riniʼcaʼ (Tito 1:8; 2:3). Ti hermana lá Roslyn guníʼ: «Napaʼ ti xhamigaʼ ni runi intiica si cosa para gacané ne guni animar ca hermanu de ra congregación. Riníʼ ique chaahuibe xipeʼ cadiʼdiʼ ca hermanu ne rusigáʼdebe laacaʼ xiixa regaluhuiiniʼ o racanebe laacaʼ de gadxé gadxé modo. Para naa la? guizáʼ nacháʼhuibe».

Jiobá cayabi ca xpinni guyúbicaʼ gúnicaʼ ni nachaʼhuiʼ (Amós 5:14). Pa gúninu ni la? qué zánnaxhiisinu ca norma stibe, sínuque jma zúninu stipa pur gúninu ni jneza nezalú Dios.

Peru cadi guiníʼ íquenu caquiiñeʼ gúninu stale cosa naroʼbaʼ para gácanu nachaʼhuiʼ. Guzéʼtenu ti ejemplu, para guiroobaʼ ti yaga la? qué zagaʼnu ziáʼ nisa ñee ni ti biaje si, sínuque zuzenu ni stale biaje né biaʼ nisa caquiiñeʼ ni. Zacaca nga laanu, pa gúninu stale cosahuiiniʼ pur xcaadxi la? zusihuinni nacháʼhuinu.

Biblia ná caquiiñeʼ chuʼnu listu ne gaca prepararnu para gúninu ni jneza (2 Tim. 2:21; Tito 3:1). Pa guʼyaʼ chaahuinu xi cazaaca prójimo stinu la? zuyúbinu modo gacanenu laa «uzuhuaa chaahuiʼ» (Rom. 15:2). Ne zándaca caquiiñeʼ guni compartirnu xiixa ni nápanu (Prov. 3:27). Zándaca guni invitarnu tuuxa para chuʼnu nayecheʼ ti ratu o guidóʼnenu laa ti guendaró sencillu. Ne pa runibiaʼnu tuuxa ni huará, zanda guséʼndanu xiixa tarjeta o mensaje ra nuu, chigánnanu o guni marcarnu laa pur teléfono. Nga runi, nápanu stale oportunidad de guininu xiixa diidxaʼ «ni zanda acané stobi uzuhuaa chaahuiʼ» (Efes. 4:29).

Cásica Jiobá, laaca rúninu stipa pur gácanu nachaʼhuiʼ né guiráʼ binni. Nga runi qué rúninu menu guirutiʼ. Ti modo jma galán zanda gúninu ni nga ora chinenu ca noticia galán stiʼ Reinu ra nuucabe. Casi biʼniʼ mandar Jesús, rúninu stipa pur gacanenu dede ca ni nanalaʼdxiʼ laanu (Luc. 6:27). Qué zucheʼnu pa gácanu amable ne guni tratarnu xcaadxi galán, purtiʼ gástiruʼ sti cosa jma galán gúninu (Gál. 5:22, 23). Pa gúninu ni jneza neca gucaalúcabe laanu o guidxaagalunu guendanagana la? zándaca gucaʼnu binni guiziidiʼ ni dxandíʼ ne gusisácanu Dios (1 Ped. 3:16, 17).

Biblia ná zacaa hombre ni nachaʼhuiʼ ndaayaʼ pur ca cosa galán ni runi (Prov. 14:14). ¿Gunáʼ nga caadxi de ca ndaayaʼ ca yaʼ? Zándaca guni tratar binni laanu galán (Prov. 14:22). Ne neca qué gúnicabe ni, pa qué gusaana de gusihuínninu nacháʼhuinu la? zándaca chuʼdxícabe ne iguudxi ladxidóʼcabe (Rom. 12:20).

Stale tu laa zanda guiníʼ huayapa stale beneficiu purtiʼ maʼ bisaana de guni cosa malu para guni ni jneza. Guidúʼyanu ni bizaaca Nancy, laa guníʼ: «Gucaʼ ti binni irresponsable, inmoral ne qué ñuneʼ respetar binni. Peru, dxi biziideʼ de ca norma stiʼ Dios ni caníʼ xii nga ni jneza la? bineʼ ni ná ca ni, ne bineʼ sentir jma nayecheʼ. Yanna maʼ napaʼ dignidad ne maʼ nadxieeʼ laca naa».

Razón jma risaca para guni cultivarnu guendanachaʼhuiʼ nga purtiʼ rusiéchenu Jiobá. Ruuyabe ca ni rúninu neca qué guʼyaʼ xcaadxi ni. Ruuyabe ca cosa galán ni riníʼ íquenu ne ca ni rúninu (Efes. 6:7, 8). Pa qué gusaana de guni cultivarnu cualidad riʼ la? ziuulaʼdxiʼ Jiobá ni gúninu (Prov. 12:2). Nga runi, cadi gusaana de guni cultivarnu guendanachaʼhuiʼ. Cayuni prometer Jiobá zudii gloria, zusisaca ne zaguixhedxí ladxidóʼ ca ni guni ni jneza (Rom 2:10).