1. ¿Xiñee raca nagana para stale hermanu guni estudiar?

NABÉ nagana ca dxi nabáninu riʼ. Stale hermanu runi dxiiñaʼ guidubi dxi para ganda gudii ni caquiiñeʼ familia stiʼ. Xcaadxi napa xidé guni viajar zitu para chindá ra runi dxiiñaʼ ne ora guibiguetaʼ ra lidxi maʼ bidxaga. Ne nuu tu laa guizáʼ ridxaga purtiʼ runi dxiiñaʼ nadipaʼ. Ora riluxe dxi la? maʼ bidxaga ca hermanu riʼ ne ni jma racaláʼdxicaʼ nga guiziiláʼdxicaʼ lugar de guni estudiarcaʼ.

2. ¿Pora runi estudiarluʼ?

² Caquiiñeʼ cueenu tiempu para guni estudiarnu Stiidxaʼ Dios ne ca publicación ni nápanu, peru caquiiñeʼ gúninu ni jneza. Pa gúninu ni la? zápanu ti amistad galán né Jiobá ne zabáninu para siempre (1 Tim. 4:15, 16). Caadxi hermanu riasa tempranu guiráʼ dxi para guni estudiarcaʼ laga cadi cayaca ruidu ra lídxicaʼ ne nuudxí xquendabiaanicaʼ. Ne xcaadxi ribee tiempu ora maʼ ziluxe dxi para guni estudiar ne guni meditar.

3, 4. ¿Xi cambiu maʼ guca né ca publicación stinu, ne xiñee?

³ Nánnanu guizáʼ risaca cueenu tiempu para guni estudiarnu. Peru ¿xi caquiiñeʼ guni estudiarnu yaʼ? Zándaca guiníʼ íquenu nápanu stale cosa para guidúʼndanu ne raca nagana para laanu guidúʼndanu guiráʼ información o alimentu espiritual ni ricaanu. Nuu tu laa randa runi estudiar ca ni maʼ bizéʼtenu ca, peru stale hermanu raca nagana para laacaʼ gúnicani. Nga runi, biʼniʼ decidir Grupu ni Zaniruʼ guiree jma huaxiéʼ publicación, cásica ni raca imprimir zaqueca lu formatu electrónicu.

⁴ Tobi de ca publicación ni maʼ qué riree nga libru ni láʼ  Anuario de los testigos de Jehová, purtiʼ zanda guidxélanu stale experiencia ni cuʼ gana laanu lu sitiu de Internet jw.org^®, ne lu ca programa ni ridiʼdiʼ guiráʼ beeu lu JW Broadcasting^®. Ne laaca maʼ chonna biaje si riree revista ni láʼ ¡Gutaná! ne Torre stiʼ ni rapa ni riree para guiráʼ binni lu ti iza. Guca ca cambiu riʼ cadi para iquiiñenu tiempu stinu para xcaadxi cosa, sínuque para guiduʼyaʼ chaahuinu «xii nga ni jma risaca» (Filip. 1:10, TNM). Zazíʼdinu xii nga ni jma caquiiñeʼ guisaca para laanu ne ximodo zanda cueendunu ni galán ora guni estudiarnu Biblia.

5, 6. ¿Xiruʼ caquiiñeʼ guni estudiarnu?

⁵ ¿Xii nga ni jma caquiiñeʼ guisaca para laanu ora guni estudiarnu? Nánnanu caquiiñeʼ cueenu tiempu para guni estudiarnu Stiidxaʼ Dios guiráʼ dxi. Tiempu riʼ, jma huaxiéʼ capítulo stiʼ Biblia riuundaʼ lu reunión. Nga runi maʼ nápanu tiempu para guni meditarnu ni guidúʼndanu ne para guyúbinu xcaadxi información. Cadi caquiiñeʼ si guidúʼndanu ca capítulo ni maca nexheʼ guiuundaʼ, sínuque naquiiñeʼ gudiʼnu lugar chindá mensaje stiʼ Biblia ndaaniʼ ladxidoʼno ne guchiñani laanu jma gaxha de Jiobá (Sal. 19:14).

⁶ ¿Xiruʼ caquiiñeʼ guni estudiarnu yaʼ? Caquiiñeʼ guni prepararnu artículo de estudiu stiʼ revista Torre stiʼ ni rapa, ne libru ni raca estudiar ra riuundaʼ Biblia ne xcaadxi información ni riuundaʼ lu reunión rápanu ndaaniʼ semana. Laaca caquiiñeʼ guidúʼndanu ca revista ni láʼ ¡Gutaná! ne Torre stiʼ ni rapa ni riree para guiráʼ binni.

7. ¿Ñee caquiiñeʼ guireʼnu gana pa qué ganda guidúʼyanu ne guidúʼndanu guiráʼ información nápanu lu sitiu de Internet ne lu JW Broadcasting la?

⁷ Peru nuu tu laa zándaca guiníʼ: «¿Xi guneʼ né guiráʼ ni nuu lu sitiu de Internet ne lu canal JW Broadcasting yaʼ? Purtiʼ guizáʼ stale información...». Guníʼ ique ejemplu chiguzéʼtenu riʼ. Ndaaniʼ luguiaa ridoo stale guendaró nanixe, peru qué zanda diʼ gó binni guiráʼ cani, nga runi ricaacaʼ caadxi si de laacani para gocaʼ. Ngaca nga rizaacanu, cadi guireʼnu gana pa qué ganda guidúʼyanu ne guidúʼndanu guiráʼ información nápanu lu formatu electrónicu. Guidúʼndanu ne guidúʼyanu biaʼ ganda laanu. Peru ¿xi caquiiñeʼ gúninu ora maʼ cayuni estudiarnu ne xi zanda gúninu para cueendunu ni galán de laani yaʼ?

8. a) ¿Xi caquiiñeʼ gúninu ora maʼ cayaca prepararnu né revista Torre stiʼ ni rapa? b) ¿Xi zabeendunu pa chinándanu ca conseju riʼ?

⁸ Ora maʼ cayuni estudiarnu la? cadi caquiiñeʼ si guidúʼndanu información ca ne guni subrayarnu ca respuesta stini, sínuque naquiiñeʼ guiduʼndaʼ chaahuinu información ca para ganda guizíʼdinu. Guidúʼyanu ximodo zanda gúninu ni bizéʼtenu riʼ ora gaca prepararnu né revista Torre stiʼ ni rapa. Primé, guiduʼyaʼ chaahuinu ca diidxaʼ ni ruzuluné cada artículo, lani ni zazíʼdinu. Despué, guidúʼndanu título, ca subtítulo ne ca pregunta de repasu zeeda luni. De racá la? guidúʼndanu artículo ca chaahuidugá né stale atención. Naquiiñeʼ guiduʼndaʼ chaahuinu primé oración ruzuluné cada párrafo, purtiʼ zacaneni laanu guiénenu xidé caníʼ párrafo ni cadúʼndanu ca. Ora maʼ cadúʼndanu ti artículo, guidúʼyanu tobi si ni cusiene cada  párrafo ne ca subtítulo ne tobi si cani né tema principal stiʼ artículo ca. Gucaʼnu ca diidxaʼ ni que runibiaʼnu ne ca puntu ni chuuláʼdxinu guni investigarnu jma.

9. a) ¿Xiñee caquiiñeʼ guiduʼndaʼ chaahuinu ca textu zeeda lu revista Torre stiʼ ni rapa ora maʼ cayuni estudiarnu, ne ximodo caquiiñeʼ gúninu ni? b) Casi ná Josué 1:8, ¿xiruʼ caquiiñeʼ gúninu aparte de guidúʼndanu ca textu zeeda lu revista riʼ?

⁹ Ora runi estudiarnu revista Torre stiʼ ni rapa casi xa ñaca ñuni estudiarnu Biblia. Nga runi, naquiiñeʼ guiduʼndaʼ chaahuinu ca textu stiʼ Biblia zeeda lu revista riʼ, jmaruʼ si cani chiguiuunda lu reunión ora guiuundaʼ artículo riʼ. Guiduʼyaʼ chaahuinu tobi si ca diidxaʼ risaca zeeda lu textu ca né ni cusiene cada párrafo. Ne laaca caquiiñeʼ cueenu tiempu para guni meditarnu ne ximodo gúninu ni ná cani lu xquendanabáninu (biindaʼ Josué 1:8).

10. Né ni ná Hebreos 5:14, ¿xiñee caquiiñeʼ gusiidiʼ ca padre xiiñicaʼ guni estudiarcaʼ ne guni investigarcaʼ ora maʼ cayúnicaʼ adoración en familia?

¹⁰ Yanna, guininu de adoración en familia. Normal nga gacalaʼdxiʼ ca padre chuulaʼdxiʼ ca xiiñicaʼ adoración en familia. Neca naquiiñeʼ quixheʼ ca padre xi gúnicaʼ luni la? cadi siempre naquiiñeʼ gúnicaʼ xiixa drama zeeda lu Biblia o xcaadxi cosa casi laani. Zanda gúʼyacabe ca programa ni ridiʼdiʼ guiráʼ beeu lu JW Broadcasting o gatigá zanda gúnicabe xiixa proyectu especial, casi ti maqueta de arca stiʼ Noé. Peru laaca guizáʼ risaca gusiidiʼ ca padre ca xiiñicaʼ guni estudiarcaʼ. Naquiiñeʼ guiziidiʼ ca xcuidihuiiniʼ ca gaca prepararcaʼ para ca reunión ni rápanu o guni investigarcaʼ xiixa tema ni binadiágacaʼ ra scuela (biindaʼ Hebreos 5:14). Pa cueecabe tiempu para guni investigárcabe ti tema zeeda lu Biblia ra lídxicabe la? qué zaca nagana para laacabe quíxhecabe atención ra reunión ne ca asamblea rápanu, neca qué tiidiʼ videu. ¿Pabiáʼ naquiiñeʼ guindaa ca adoración en familia ca yaʼ? Naquiiñeʼ guʼyaʼ ca padre personalidad stiʼ ca xiiñicaʼ ne panda iza nápacaʼ para guni decidircaʼ pabiáʼ guindaani.

11. ¿Xiñee nabé risaca gusíʼdinu ca binni ridúʼndanenu Biblia guni estudiarcaʼ ora gúʼndacaʼ Biblia?

¹¹ Laaca naquiiñeʼ guiziidiʼ ca binni ridúʼndanenu Biblia guni estudiarcaʼ. Guizáʼ riéchenu ora runi subrayárcabe publicación ridúʼndanenu laacabe ne ora raca preparárcabe para ca reunión rápanu. Peru caquiiñeʼ gusíʼdinu laacabe guni investigárcabe ne guni estudiárcabe stúbicabe. Pa guiziidicabe gúnicabe ni la? qué zanabadiidxacabe ca hermanu xi gúnicabe  ora guidxaagalúcabe guendanagana, sínuque zánnacabe ximodo guyúbicabe ne guidxélacabe información ni caquiiñecabe.

12. ¿Xi meta caquiiñeʼ gápanu ora guni estudiarnu?

¹² Pa qué riuuláʼdxinu guni estudiarnu la? zándaca guiníʼ íquenu qué ziuu dxi chuuláʼdxinu ni. Peru zanda gúninu ni. Ora guzulunu la? gúninu ni ti ratuhuiiniʼ, de racá chaahuidugá cuʼnu xcaadxi tiempu luni. Quixhe íquenu ugaandanu xiixa ora maʼ cayuni estudiarnu. Meta ni jma risaca naquiiñeʼ gápanu nga gaca amistad ni nápanu né Jiobá jma naguidxi. Peru ti meta ni zanda ugaandanu nagueenda nga guicábinu xiixa pregunta ni biʼniʼ tuuxa laanu o guyúbinu información ni gacané laanu gudxíʼlunu xiixa guendanagana nápanu.

13. a) ¿Xi caquiiñeʼ guni ti joven para guni defender ni runi cré ra scuela? b) ¿Ximodo zanda gúniluʼ ni ná Colosenses 4:6?

¹³ ¿Ñee ti joven lii ne rieluʼ scuela la? Zándaca runi cré ca compañeru stiluʼ evolución. Ne ñuuláʼdxiluʼ ñuni defenderluʼ ni rusiidiʼ Biblia de laani peru runi sentirluʼ qué zanda gúniluʼ ni. Nga runi, caquiiñeʼ guni investigarluʼ. Zanda quixhe íqueluʼ ugaandaluʼ chupa cosa. Primé, guni creluʼ dxandipeʼ Dios bizáʼ guiráʼ xixé cosa. Ne guiropa, guiziidiʼ chaahuiluʼ modo guni defenderluʼ ni dxandíʼ rusiidiʼ Biblia (Rom. 1:20; 1 Ped. 3:15). Naquiiñeʼ guiníʼ íqueluʼ xiñee runi cré ca compañeru stiluʼ evolución. De racá la? biʼniʼ investigar chaahuiʼ xi rusiidiʼ ca publicación nápanu. Zudiiluʼ cuenta cadi tan nagana guni defenderluʼ cani runi creluʼ. Nuu tu laa runi cré evolución purtiʼ si gudxi tuuxa ni laa. Peru ora maʼ bidxélaluʼ información la? maʼ zanda guicábiluʼ tuuxa ni dxandíʼ racalaʼdxiʼ guiziidiʼ (biindaʼ Colosenses 4:6).

14-16. a) ¿Xi zanda gúninu para gunibiáʼ chaahuinu libru ni huaxiéʼ huadúʼndanu? b) ¿Ximodo racané ca textu riʼ laanu guizíʼdinu jma de libru ni bicaa Amós? (Laaca zanda gúʼyaluʼ recuadru ni láʼ « ¡Gunibiáʼ chaahuinu ca personaje zeeda lu Biblia!»).

¹⁴ Guníʼ ique chigaca analizar tobi de ca libru nahuiiniʼ bicaa ca profeta lu sti reunión chigápanu, ne zándaca huaxiéʼ huadúʼndanu ni. Primé cosa ni caquiiñeʼ gúninu nga gápanu deseu de guizíʼdinu jma de ni bicaa profeta ca. ¿Ximodo gúninu ni yaʼ?

¹⁵ Para guzulunu la? caquiiñeʼ guiníʼ íquenu xi nánnanu de profeta bicaa libru ca, tu gúcabe, paraa gulézabe ne xi dxiiñaʼ bíʼnibe. Zacané información riʼ laanu guiénenu xiñee bicaabe caadxi diidxaʼ o ejemplu. Ne ora maʼ cadúʼndanu, guyúbinu frase o diidxaʼ ni gusihuinni xi personalidad gupa profeta bicaa libru ca.

¹⁶ Despué, guyúbinu padxí gucuá libru ca. Para ganda gúninu ni la? zanda guidúʼyanu «Tabla de los libros de la Biblia» ni zeeda ra ruzulú Traducción del Nuevo Mundo de las Santas Escrituras (con referencias). Laaca zanda gúʼndaluʼ tabla ni láʼ ca profeta ne ca rey ni zeeda lu ndaa 3 stiʼ folletu Ni zacané lii guiéneluʼ Stiidxaʼ Dios. Cumu puru profecía zeeda lu libru ni cayuni estudiarnu la? galán guni investigarnu ximodo bibani binni tiempu gucuá ni. Zanda guyúbinu xi práctica cadi jneza nuu profeta ca gaca chaahuiʼ ne tu ca binni bibani tiempu bibánibe. Para ganda guiene chaahuinu  ni cadúʼndanu la? zándaca caquiiñeʼ guidúʼndanu xcaadxi libru stiʼ Biblia. Guzéʼtenu ti ejemplu, para guiénenu xipeʼ bizaaca ca dxi bibani profeta Amós, zanda guidúʼndanu Amós 1:1, de raca guidúʼndanu ca referencia marginal stini, laacani nga 2 Reyes ne 2 Crónicas. Laaca zanda guidúʼndanu libru stiʼ Oseas, sti profeta ni bibani ca dxi bibani Amós. Zacané guiráʼ información riʼ laanu guiene chaahuinu ximodo bibani binni tiempu bibani Amós (2 Rey. 14:25-28; 2 Crón. 26:1-15; Os. 1:1-11; Amós 1:1).

17, 18. Bisiene xiñee ziuuláʼdxiluʼ gúʼndaluʼ Biblia pa guni investigarluʼ dede né ca detalle jma nahuiiniʼ zeeda luni. Biquiiñeʼ ca ejemplu ni zeeda lu ca párrafo riʼ o xcaadxi ni nánnaluʼ.

¹⁷ Naquiiñeʼ guidúʼndanu Biblia né stale curiosidad. Guzéʼtenu ti ejemplu, guxuíʼlunu cadúʼndanu capítulo 12 stiʼ profecía ni bicaa Zacarías ni caníʼ de guendaguti stiʼ Mesías (Zac. 12:10). Ne ora chindanu lu versículo 12, ridúʼndanu zuunaʼ familia stiʼ Natán ora gatiʼ Mesías. Lugar de guidúʼndasinu ni, guiníʼ íquenu ndiʼ: «¿Xiñee ruzeeteʼ relatu riʼ Mesías ne familia stiʼ Natán? ¿Paraa zanda guidxelaʼ jma información?». Nga runi, guni investigarnu caadxi de tema riʼ. Ruseendaʼ ti referencia marginal laanu guidúʼndanu 2 Samuel 5:14, luni riete tobi de ca xiiñiʼ David nga Natán. Sti referencia nápanu nga Lucas 3:31, ra cusiene zá Jesús de Natán purtiʼ zá María de familia stiʼ Natán (biindaʼ Torre stiʼ ni rapa de agosto de 2017, yaza 32, párrafo 4). ¡Guizáʼ galán datu ca njaʼ! Maca nánnanu zá Jesús de familia stiʼ David (Mat. 22:42). Peru gupa David jma de gande xiiñiʼ. Ora guni investigar chaahuinu ca datu riʼ, qué zadxagayaanu  xiñee bicaa Zacarías zuunaʼ familia stiʼ Natán ora gatiʼ Jesús.

¹⁸ Guzéʼtenu sti ejemplu, lu primé capítulo stiʼ Lucas ridúʼndanu yeganna ángel Gabriel María ne gúdxibe laa ca diidxaʼ riʼ de baʼduhuiiniʼ chigapa: «Zaca be nandxóʼ ne zabi cabe laabe Xiiñi Dios ni nuu ibáʼ. Ne zucuí Dios laabe de rey ra gurí bixhoze gola be David. Zaca be rey sti irá cani za de Israel, ne qué ziuu dxi guiasa be» (Luc. 1:32, 33). Zándaca maʼ bidiʼnu cuenta gudxi ángel riʼ María zábicabe Jesús «Xiiñi Dios». Peru laaca gudxi ángel riʼ laabe zácabe rey. Peru ¿xi rábiluʼ guníʼ ique María ora gudxi ángel riʼ laa ca diidxaʼ riʼ yaʼ? ¿Ñee guníʼ íquebe zaca Jesús rey stiʼ Israel gati si Herodes la? ¿Ñee guníʼ íquebe zabani familia stibe ra palaciu ne zácabe reina purtiʼ jñaa rey laabe la? Qué ruzeeteʼ diʼ Biblia pa gunabadiidxabe ángel Gabriel ca cosa riʼ. Laaca qué ruzeeteʼ Biblia pa gunábabe guicaabe ti puestu risaca lu Reinu stiʼ Dios, casi biʼniʼ chupa de ca discípulo stiʼ Jesús (Mat. 20:20-23). Ca cosa riʼ rusihuinni guca María ti gunaa nabé humilde.

19, 20. Casi ná Santiago 1:22-25 ne 4:8, ¿xii nga ni jma caquiiñeʼ guisaca para laanu ora guni estudiarnu?

¹⁹ Cadi guiaandaʼ laanu ni jma risaca ora guni estudiarnu Stiidxaʼ Dios ne ca publicación stinu nga guidxíñanu jma gaxha de Jiobá. Peru laaca racaláʼdxinu gánnanu xi clase binni nácanu ne xi caquiiñeʼ guchaʼnu para chuulaʼdxiʼ Dios ni rúninu (biindaʼ Santiago 1:22-25; 4:8). Nga runi, cada biaje guni estudiarnu la? nabé risaca guinábanu Jiobá gudii laanu espíritu santu stiʼ. Ne laaca caquiiñeʼ guinábanu laabe gacanebe laanu cueendunu ni galán ora guni estudiarnu ne guidúʼyanu laanu casi modo ruuyabe laanu. 

²⁰ Guiranu naquiiñeʼ gácanu casi xpinni Dios ni riete lu Salmo 1:2, 3 ra ná: «Riuulaʼdxiʼ guʼndaʼ ley stiʼ Jiobá, ne ruundaʼ ley stibe chaahuidugá dxi ne gueelaʼ. [...] Ne guiráʼ ni guni zaree ni laa galán».