1, 2. a) ¿Xi zacané laanu gudxíʼlunu ca guendanagana ridxaagalunu guiráʼ dxi? Bisiene ni. b) ¿Xi zadúʼyanu lu artículo riʼ?

ORA maʼ gudídinu xiixa guendanagana, stale de laanu riníʼ íquenu qué ñanda nudxíʼlunu ni stúbinu. Zándaca guninu zacá despué de guníʼ íquenu ximodo gunda bidxíʼlunu ti guendahuará malu ne ora guti ti binnilídxinu. Runi sentirnu gunda gudídinu ca guendanagana stinu purtiʼ rudii espíritu santu stiʼ Jehová «poder» laanu (2 Cor. 4:7-9).

² Laaca riquiiñenu gacané espíritu santu laanu para gudxíʼlunu ca cosa malu nuu lu guidxilayú riʼ (1 Juan 5:19). Ne laaca caquiiñenu ni purtiʼ cudxíʼlunu «ca demonio» (Efes. 6:12). Cumu maʼ nánnanu xi guiráʼ guendanagana nga cadxaagalunu la? chiguidúʼyanu chupa modo racané espíritu santu laanu. Laaca zazíʼdinu xi caquiiñeʼ gúninu para gacané ni laanu jma.

3. ¿Xi ti modo racané espíritu santu laanu para guni huantarnu ca guendanagana stinu?

³ Rudii espíritu santu stiʼ Jehová laanu poder, o stipa ni caquiiñenu para gúninu xhiiñanu ne gúninu jma lu xhiiñaʼ Dios neca cadxaagalunu guendanagana. Guníʼ ique apóstol Pablo zanda guni ni ná Jehová neca guidxaagalú guendanagana purtiʼ racané «poder stiʼ Cristu» laa (2 Cor. 12:9). Lu guiropa viaje misional biʼniʼ apóstol Pablo, cadi biʼniʼ predicársibe, sínuque bíʼnibe dxiiñaʼ para ganda gápabe ni iquiiñebe. Ndaaniʼ guidxi Corinto, biaanabe ra lidxi Áquila ne Priscila, ca binni riʼ rúnicaʼ tienda de campaña. Cumu ngueca dxiiñaʼ rúnibe la? bininebe laacaʼ dxiiñaʼ chupa chonna gubidxa lu ti semana (Hech. 18:1-4). Bidii espíritu santu stipa laabe para bíʼnibe dxiiñaʼ que ne para guni predicarbe.

4. Casi ná 2 Corintios 12:7b-9, ¿xi guendanagana bidxiilú Pablo?

 ⁴ (Biindaʼ 2 Corintios 12:7b-9). ¿Xi nuu Pablo guiníʼ ora bicaa daabi «ti guichi lu beela» ladi? Pa nidaabi ti guichi laanu, ¿cadi dxandíʼ ñuniná ni laanu stale la? Nga runi, guníʼ Pablo cadiʼdiʼ xiixa guendanagana ni cayuniná laa. Guniʼbe zeeda gaca ni casi ora «cagapa ti ángel stiʼ Binidxabaʼ» ruaabe. Zándaca cadi Binidxabaʼ ne ca demonio stiʼ nga bitaabi guichi riʼ laabe, o cadi pur laacaʼ nápabe guendanagana. Peru, ora biʼyaʼ ca demonio daabi ti «guichi lu beela» ladi Pablo, zándaca gucaláʼdxicaʼ nutaabicaʼ ni laabe jma, para guninacaʼ laabe jma. ¿Xi biʼniʼ apóstol riʼ yaʼ?

5. ¿Ximodo bicabi Jehová ca oración stiʼ Pablo?

⁵ Gucalaʼdxiʼ Pablo niree «guichi» ni cayuniná laa. Sicaríʼ guniʼbe: «Chonna biaje gunabaʼ Señor [Jehová] cuee ni». Neca gunábabe Dios cuee guichi ca lu beela ládibe, peru qué niree diʼ ni. ¿Ñee riníʼ ndiʼ qué nicabi Jehová ca oración stibe la? Coʼ. Bicabi Jehová ca oración stibe. Neca qué nibee Jehová guendanagana que, bidii stipa laabe para biʼniʼ huantarbe ni. Ne gudxi laabe: «Rihuinni pabiáʼ nadipaʼ poder stinneʼ ora huaxiéʼ stipa nápaluʼ» (2 Cor. 12:8, 9). Pur gucané Dios laabe, gunda bibánibe nayecheʼ ne gutadxí ladxidoʼbe (Filip. 4:4-7).

6. a) ¿Ximodo zanda guicabi Jehová ca oración stinu? b) ¿Xi textu zeeda lu párrafo riʼ zanda gacané laanu?

⁶ ¿Huayuu dxi guinábanu Jehová cuee xiixa guendanagana luguianu, cásica biʼniʼ Pablo la? Pa bíninu ni ne neca zacá qué niree guendanagana stinu o jma naroʼbaʼ gúcani, zándaca guiníʼ íquenu maʼ qué riuulaʼdxiʼ Jehová modo cayuni adorarnu laa. Pa riníʼ íquenu zacá, guietenaláʼdxinu ejemplu stiʼ Pablo. Cásica bicabi Jehová ca oración stibe zacaca zacabi ca oración stinu. Neca cadi cuee Jehová ca guendanagana stinu, zaquiiñebe espíritu stibe para gudii stipa laanu ti guni huantarnu (Sal. 61:3, 4). Zándaca gusaba ca guendanagana riʼ laanu, peru Jehová qué zusaana laanu (2 Cor. 4:8, 9; Filip. 4:13).

7, 8. a) ¿Ximodo nga zeeda gaca espíritu santu casi bi? b) ¿Ximodo guníʼ Pedro runi espíritu santu dxiiñaʼ?

⁷ ¿Xi sti modo racané espíritu santu laanu? Zanda guchaaganu espíritu santu stiʼ Dios né bi ni rucaanáʼ ti barcu para chindá lugar ra zeʼ neca cadiñentaa nisadóʼ. Zacaca nga espíritu santu stiʼ Dios, racaneni laanu neca cadxaagalunu guendanagana para ganda chindanu lu guidxilayú cubi ni maʼ guníʼ Dios gudii laanu.

⁸ Cumu guca apóstol Pedro pescador la? nánnabe modo rié barcu lu nisadóʼ. Zándaca pur ni nánnabe ca gunda bisiénebe ximodo runi espíritu santu dxiiñaʼ. Laabe bicaabe: «Cadi de xquendabiaaniʼ binni nga biree ca profecía ca, sínuque gucané espíritu santu ca hombre riʼ para guiniʼcaʼ xii nga racalaʼdxiʼ Dios». Diidxaʼ «gucané» raca significar ni «biʼniʼ guiar» casi ná nota stiʼ textu riʼ (2 Ped. 1:21; nota).

9. ¿Xi gucalaʼdxiʼ Pedro niníʼ ique binni ora biquiiñeʼ diidxaʼ «biʼniʼ guiar»?

⁹ ¿Xi gucalaʼdxiʼ Pedro niníʼ ique binni ora biquiiñeʼ diidxaʼ «biʼniʼ guiar»? Lucas, ni bicaa libru stiʼ Hechos, biquiiñeʼ sti diidxaʼ casi ni bizéʼtenu riʼ para guiníʼ zanda gucaanáʼ bi ti barcu (Hech. 27:15). Nga runi, ora guníʼ Pedro «biʼniʼ guiar» espíritu santu ca hombre ni bicaa Biblia, ti hombre ni nanna de Biblia guníʼ  bicaabe binni guiníʼ ique modo rucaanáʼ bi ti barcu. Peru ni nuu Pedro guiníʼ raríʼ nga cásica racané bi ti barcu para chindá ra zeʼ, zacaca gucané espíritu santu ca profeta ne ca hombre ni bicaa Biblia para gúnicaʼ dxiiñaʼ bidii Dios laacaʼ. Laaca hombre ni nanna de Biblia que guníʼ: «Zanda guininu gundisaʼ ca profeta que ca vela stiʼ barcu». Nga runi, biseendaʼ Jehová «bi» o espíritu stiʼ para gacané laacabe. Ne yenanda ca hombre bicaa Biblia que ni ná espíritu stiʼ Dios.

10, 11. ¿Xi chupa cosa naquiiñeʼ gúninu para guicaanu espíritu santu? Bizeeteʼ ti ejemplu.

¹⁰ Ca dxi riʼ, maʼ qué riquiiñeʼ Jehová espíritu santu para guicá xiixa libru ni gaca parte de Biblia. Peru caquiiñerube ni para guni guiarbe ca xpínnibe. Nga runi, Jehová cayúniruʼ ni raca caber laa. Yanna, tiempu riʼ laaca naquiiñeʼ gúninu ni raca caber laanu ti ganda gacané espíritu santu laanu. ¿Ximodo gúninu ni yaʼ?

¹¹ Guiníʼ íquenu ejemplu riʼ. Pa racalaʼdxiʼ ti marineru gacané bi barcu stiʼ, caquiiñeʼ guni chupa cosa. Primé, caquiiñeʼ chinebe barcu stibe ra cundubi bi, purtiʼ qué zaniibi barcu ca pa nuunebe ni zitu de ra cundubi bi. Guiropa, caquiiñeʼ guindísabe ne guchiabe guiráʼ ca vela stini, óraca maʼ zanda gucaanáʼ bi barcu ca. Zacaca nga laanu, zanda gúninu ni ná Jehová pa gacané espíritu santu laanu. Para gúninu ni, laaca caquiiñeʼ gúninu chupa cosa. Primé, casi ñaca nuzuhuaʼnu ra cundubi bi, ora gúninu xiixa ni gacané laanu guicaanu espíritu santu stiʼ Dios. Guiropa, casi ñaca «nindísanu ca vela stinu», ora gúninu biaʼ gándatiʼ lu xhiiñaʼ Dios (Sal. 119:32). Pa gúninu ca ni bizéʼtenu riʼ, zucaa espíritu santu laanu cadi gusaana de gúninu ni ná Jehová sin guchéʼnenu laa neca chuʼ tu gucaalú laanu ne neca gápanu guendanagana, zacatiʼ zanda chindanu lu guidxilayú cubi stiʼ Dios.

12. ¿Xi chiguizíʼdinu lu xcaadxi párrafo riʼ?

 ¹² Maʼ bíʼyanu xi chupa modo racané espíritu santu stiʼ Dios laanu. Rudiini stipa laanu ne racaneni cadi gusaananu Jehová ora guidxaagalunu xiixa guendanagana. Laaca racaneni laanu cadi gusaana de gúninu ni ná Jehová ne guicá íquenu ni chigudiibe laanu, guendanabani ni qué zaluxe. Zazíʼdinu stapa cosa ni caquiiñeʼ gúninu ti ganda gacané espíritu santu laanu.

13. a) Casi ná 2 Timoteo 3:16, 17, ¿ximodo zanda gacané Stiidxaʼ Dios laanu? b) ¿Xi caquiiñeʼ gúninu?

¹³ Primé, guni estudiarnu Stiidxaʼ Dios (biindaʼ 2 Timoteo 3:16, 17). «Dios nga guníʼ xi guicá» lu Biblia. Biquiiñeʼ Jehová espíritu santu stiʼ para gunda gudxi ca hombre bicaa Biblia xi gucaacaʼ luni. Ora ridúʼndanu Stiidxaʼ Dios ne riníʼ íquenu de ni ridúʼndanu, riuu Stiidxabe ndaaniʼ íquenu ne riaazini ndaaniʼ ladxidoʼno. Ne ca ni rizíʼdinu rucaacani laanu guibáninu casi modo riuulaʼdxiʼ Dios (Heb. 4:12). Peru, para ganda gacané espíritu santu stiʼ Dios laanu jma la? caquiiñeʼ cueenu tiempu para guni estudiarnu Biblia ne guiníʼ ique chaahuinu ni ridúʼndanu. Zacá zanda gacaneni laanu lu ca ni guininu ne lu ca ni gúninu.

14. a) ¿Xiñee zanda guininu casi ora «cundubi bi» ra reunión stinu? b) ¿Xi zanda gúninu para gacané espíritu santu laanu casi racané bi ti barcu ni maʼ «bibiaa ca vela stiʼ»?

¹⁴ Guiropa, chuʼnu tobi si para guni adorarnu Dios (Sal. 22:22). Zanda guininu casi ora «cundubi bi» ra reunión stinu purtiʼ nuu espíritu santu stiʼ Jehová lúcani (Apoc. 2:29). ¿Xiñee yaʼ? Purtiʼ ora ridagulisaanu rinábanu lu oración espíritu santu, ridúʼndanu canción ni zeeda lu Stiidxaʼ Dios ne rucaʼdiáganu ca instrucción ni zeeda lu Biblia ni rusiidiʼ ca hermanu ungidu. Ne laaca racané espíritu riʼ ca hermana para guni prepararcaʼ ne gutiidicaʼ ca demostración sticaʼ. Yanna, pa racaláʼdxinu gacané espíritu ca laanu, caquiiñeʼ chuunu ca reunión ca ne gaca prepararnu para guicábinu lúcani. Zacá zacané espíritu santu laanu casi racané bi ti barcu ni maʼ «bibiaa ca vela stiʼ».

15. ¿Xi caquiiñeʼ gúninu para gacané espíritu santu laanu ora guni predicarnu?

¹⁵ Guionna, guni predicarnu. Ora ridúʼndanu lu Biblia ximodo guni predicarnu ne gusíʼdinu, rudiʼnu lugar gacané espíritu santu laanu (Rom. 15:18, 19). Peru cadi caquiiñeʼ gusaana de guni predicarnu ne iquiiñenu Biblia biaʼ gándatiʼ ti gacané espíritu santu laanu. Ni zacané laanu para guinínenu binni jma galán nga iquiiñenu ca ni zeeda lu xhiiñaʼ Dios ne modo nabáninu.

16. ¿Ximodo jma zanda gápanu espíritu santu?

¹⁶ Guidapa, guni orarnu Jehová (Mat. 7:7-11; Luc. 11:13). Ti modo zanda guicaanu espíritu santu stiʼ Jehová jma nagueenda nga guinábanu ni laa. Gastiʼ qué zanda gucueeza oración stinu para cadi chindá ra nuu Jehová, nin ca muru stiʼ ti cárcel nin Binidxabaʼ, ne qué zanda gucueezacaʼ laanu de guicaanu espíritu santu, ti regalu stiʼ Dios (Sant. 1:17). ¿Ximodo naquiiñeʼ guni orarnu para gacané espíritu santu laanu jma? Para ganda guicábinu pregunta riʼ, guidúʼyanu ejemplu ni zeeda lu Evangeliu stiʼ Lucas, * racá zaziidiʼ chaahuinu de tema riʼ.

17. Casi ná Lucas 11:5-9, 13, ¿xi rusiidiʼ parábola stiʼ Jesús laanu de oración?

¹⁷ (Biindaʼ Lucas 11:5-9, 13). Parábola ni bizeeteʼ Jesús lu textu riʼ ruluiʼni laanu ximodo caquiiñeʼ guinábanu espíritu santu. Lu relatu ca ridúʼyanu gucuaa hombre que ni caquiiñeʼ purtiʼ biʼniʼ insistir. Qué nidxíbibe ora gunábabe gacané xhamígube laabe neca maʼ galaa gueelaʼ ni (biiyaʼ nota de estudiu ni biree lu xhiiñaʼ Dios ne modo nabáninu beeu julio de 2018 ni láʼ «para ma cadi niziñe rouʼ laabe»). ¿Ximodo bichaaga Jesús ejemplu riʼ né oración? Laa guníʼ: «Laguinabaʼ ne zacaatu, laguyubi ne zadxélatu, laguxhidxináʼ ne zaxeleʼ chuʼtu». Nga runi, para ganda gacané espíritu santu laanu caquiiñeʼ guni insistirnu.

18. ¿Xiñee zanda chuʼnu seguru zudii Jehová laanu espíritu santu stiʼ?

¹⁸ Laaca racané ejemplu riʼ laanu guiénenu xiñee rudii Jehová laanu espíritu santu stiʼ. Lu ejemplu guníʼ Jesús bizeeteʼ de ti hombre ni racalaʼdxiʼ guni tender binni ni beeda ganna laa maʼ huaxhinni. Caquiiñeʼ gudiibe xiixa ni gó binni ni ziganna laabe que peru qué gápabe gastiʼ. Jesús guníʼ, bidii xpesínube laabe pan para gudiibe ni beeda ganna laabe que purtiʼ biʼniʼ insistirbe. ¿Xi nuu Jesús gusiidiʼ laanu yaʼ? Pa ti binni ni gulené donda racané ti vecinu stiʼ purtiʼ runi insistir, nuu jma razón guiníʼ íquenu racalaʼdxiʼ Bixhózenu ni nadxii laanu gudii espíritu santu ca ni runi insistir. Nga runi, guinábanu gudii Jehová laanu espíritu santu stiʼ ne nuunu seguru zudii ni laanu (Sal. 10:17; 66:19).

19. ¿Xiñee nuunu seguru zuni ganarnu Binidxabaʼ?

¹⁹ Cumu qué zusaana Binidxabaʼ de cuee gana laanu la? caquiiñeʼ chuʼnu seguru zuni ganarnu laabe. ¿Xiñee yaʼ? Purtiʼ racané espíritu santu laanu de chupa modo. Primé, rudiini poder laanu para gudxíʼlunu guendanagana. Guiropa, laani nga stipa ni rucaanáʼ laanu para cadi gusaana de gúninu ni ná Jehová dede ra chindanu lu guidxilayú cubi. Nga runi, gudiʼnu lugar gacané espíritu santu laanu biaʼ gándatiʼ.