1. ¿Xiñee nanna dxíchinu nabáninu lu ca últimu dxi?

¿ÑEE despué de iza 1914 gúleluʼ la? Pa zacá ni, maʼ huayuuyaluʼ guiráʼ cosa ni cazaaca lu ca «últimu dxi» stiʼ guidxilayú riʼ (2 Tim. 3:1). Cadúʼyanu ne cayunadiáganu lu ca noticia nuu guerra, guendarindaana, xu roʼ, guendahuará, stale cosa malu ne canazananda binni ca xpinni Dios (Mat. 24:3, 7-9, 12; Luc. 21:10-12). Laaca cayúʼyanu xi guiráʼ cayuni binni casi maca guníʼ apóstol Pablo (biiyaʼ cuadru ni láʼ « Ximodo binni tiempu riʼ»). Laanu, ca xpinni Jiobá nanna dxíchinu nabáninu ra «mayaca guiluxe» ca últimu dxi (Miq. 4:1).

2. ¿Xi chupa pregunta zacábinu lu artículo riʼ?

² Cumu maʼ gudiʼdiʼ stale iza dede 1914, mayaca guiluxe ca «últimu dxi». Ne maʼ cadi candaa zanitilú guidxilayú riʼ, nga runi caquiiñeʼ guicábinu chupa pregunta nabé risaca: ¿Xi chiguizaaca ra maʼ ziluxe ca «últimu dxi»? Ne ¿xi ribeza Jiobá gúninu laga guedandá dxi ca?

3. Casi ná 1 Tesalonicenses 5:1-3, ¿xi zaníʼ ca xaíque guidxi?

³ (Biindaʼ 1 Tesalonicenses 5:1-3, TNM). Pablo guníʼ de «dxi stiʼ» Jiobá. Ora riete diidxaʼ dxi stiʼ Jiobá lu textu riʼ, caniʼni de ti tiempu. Ne zuzulú tiempu riʼ dxi gucaalúcabe «Babilonia guidxi roʼ» o guiráʼ ca religión falsu ni nuu ndaaniʼ Guidxilayú riʼ, ne zaluxe ni ora guzulú Armagedón (Apoc. 16:14, 16; 17:5). Ante guzulú «dxi stiʼ» Jiobá, zaníʼ ca xaíque guidxi «maʼ nuu paz ne seguridad». Ne nuu tiru riníʼcabe maʼ chichuu paz ne seguridad para gacanécabe  ca guidxi ca chuʼcaʼ tobi si. * Peru maʼ gadxé anunciu ni riete lu Biblia zudii ca xaíque guidxi. ¿Xiñee yaʼ? Purtiʼ ora guiníʼ ca xaíque guidxi «maʼ nuu paz ne seguridad», zaníʼ ique binni maʼ biʼniʼ ca xaíque guidxi riʼ xiixa para guibani binni seguru. Peru óraca nga guzulú gran tribulación ne «málasi zanitilucaʼ» (Mat. 24:21).

4. a) ¿Xii nga ni qué gánnanu ora guiníʼ ca xaíque guidxi «maʼ nuu paz ne seguridad»? b) ¿Xi maʼ nánnanu de anunciu riʼ?

⁴ Nánnanu caadxi cosa ni zazaaca ora guiníʼ ca xaíque guidxi «maʼ nuu paz ne seguridad». Peru nuu cosa ni qué gánnanu, casi xi zucaa ca xaíque guidxi ca gudiicaʼ anunciu riʼ ne ximodo gúnicabe ni. Laaca qué gánnanu pa zudiicabe stale anunciu o ti anunciu si. Modo tiica si gácani, qué zudiʼnu lugar quítecabe laanu ne qué zuni crenu zaguucabe paz lu Guidxilayú, purtiʼ laani nga anunciu ni cabézanu, señal ni gusihuinni mayaca guzulú «dxi stiʼ» Jiobá.

5. ¿Ximodo racané 1 Tesalonicenses 5:4-6 laanu chuʼnu listu ora guzulú «dxi stiʼ» Jiobá?

⁵ (Biindaʼ 1 Tesalonicenses 5:4-6, TNM). Cayabi Pablo laanu xi caquiiñeʼ gúninu para chuʼnu listu ante guzulú «dxi stiʼ» Jiobá. Cadi gudiʼnu lugar guicá bacaandaʼ laanu «casi modo nuu stale binni», sínuque naquiiñeʼ gatananu. Guzéʼtenu ti ejemplu, caquiiñeʼ gatananu para cadi guiuʼnu lu ca cosa ni zeeda de política pacaa zuchéʼnenu Jiobá. Pa gúninu ni zácanu «parte de guidxilayú» riʼ (Juan 15:19). Nánnanu Reinu si stiʼ Dios nga guedané paz lu Guidxilayú riʼ.

6. ¿Xi caquiiñeʼ gúninu ne xiñee?

⁶ Caquiiñeʼ gatananu peru laaca caquiiñeʼ gacanenu xcaadxi binni gataná. ¿Ximodo gúninu ni yaʼ? Gacanenu laacabe gánnacabe xi rusiidiʼ Biblia zazaaca guidxilayú riʼ. Cadi guiaandaʼ laanu ora guzulú gran tribulación, maʼ qué zanda guyubi binni Jiobá. Nga runi caquiiñeʼ guni predicarnu nagueendaca. *

7. ¿Xi racalaʼdxiʼ Jiobá gúninu tiempu riʼ?

⁷ Cumu maʼ xcaadxi si dxi riaadxaʼ para guzulú «dxi stiʼ» Jiobá la? ni racaláʼdxibe nga cadi gusaana de guni predicarnu. Nga runi, caquiiñeʼ guidúʼyanu pa cayúninu «xhiiñaʼ Señor» biaʼ gándatiʼ (1 Cor. 15:58). Ora guníʼ Jesús xi guiráʼ cosa zazaaca lu ca últimu dxi riʼ laaca guniʼbe xi zuni ca xpinni Dios. Sicaríʼ  guniʼbe: «Naquiiñeʼ gaca predicar ca noticia galán riʼ primeru ndaaniʼ guiráʼ guidxi» (Mar. 13:4, 8, 10; Mat. 24:14). Cadi guiaandaʼ ndiʼ laanu: Cada biaje guni predicarnu, cayacanenu gaca cumplir profecía riʼ.

8. ¿Ximodo nánnanu guizáʼ cayaca predicar tiempu riʼ?

⁸ Cada iza stale binni rucaadiaga ca noticia galán stiʼ Reinu. Guidúʼyanu pabiáʼ cadale publicador lu ca últimu dxi riʼ. Lu iza 1914, guyuu 5,155 publicador ndaaniʼ 43 país. Ne tiempu riʼ nuu biaʼ 8,500,000 publicador ndaaniʼ 240 guidxi ne territorio. Peru caʼruʼ diʼ guiluxe dxiiñaʼ stinu. Caquiiñeruʼ gábinu binni Reinu stiʼ Dios nga zabee guiráʼ ca guendanagana ni nuu (Sal. 145:11-13).

9. ¿Xiñee caquiiñeʼ guni predicarnu mensaje stiʼ Reinu?

⁹ Qué zusaana de guni predicarnu dede ora gabi Jiobá laanu maʼ biluxe dxiiñaʼ stiʼ. ¿Pabiáʼ tiempu napa binni para gunibiáʼ Jiobá ne Jesucristu yaʼ? (Juan 17:3). Qué gánnanu. Peru laga caʼruʼ guzulú gran tribulación, zándaruʼ gucaadiaga binni ca noticia galán stiʼ Reinu, laacabe nga ca «ni nachaʼhuiʼ ladxidóʼ ni maʼ nuu para guicaa guendanabani ni qué zaluxe» (Hech. 13:48, TNM). ¿Xi zanda gúninu para gacanenu ca binni riʼ ante guzulú ca últimu dxi yaʼ?

10. ¿Xi guiráʼ rudii Jiobá laanu para gusíʼdinu binni?

¹⁰ Riquiiñeʼ Jiobá xquidxi para gudii laanu guiráʼ ni caquiiñenu ti gusíʼdinu binni ni dxandíʼ. Guzéʼtenu ti ejemplu, rusiidibe laanu lu reunión ni raca ndaaniʼ semana xi gábinu binni primé biaje guinínenu laa, ora gúninu revisita ne ximodo gudiʼnu estudiu. Rudii xquidxi Jiobá laanu caadxi herramienta ni nuu lu kit de enseñanza. Sicaríʼ zanda gacané ca herramienta riʼ laanu:

• guzulú guinínenu binni,

• gacanenu binni chuulaʼdxiʼ guiziidiʼ,

• uguʼnu gana laacabe gánnacabe jma,

• gusíʼdinu laacabe ni dxandíʼ ora maʼ cudiʼnu estudiu laacabe,

• gábinu laacabe guiuucabe lu sitiu de Internet stinu ne chigánnacabe laanu ra Yoo stiʼ Reinu.

 Pa maʼ nápanu ca herramienta riʼ gúninu stipa pur iquiiñenu cani. * Guzéʼtenu ti ejemplu, pa bicaadiaga ti binni laanu ne rusihuinni racalaʼdxiʼ guiziidiʼ jma ne bisaananenu laa ti tratadu o ti revista, zanda gúʼndabe jma de tema ni guninu ora guibiguétanu ra nuube sti biaje. Cada tobi de laanu caquiiñeʼ guni predicarnu guiráʼ beeu.

11. ¿Xiñee nuu ti sección lu sitiu stinu para guicaa binni estudiu?

¹¹ Guidúʼyanu sti modo cayacané Jiobá binni para guiziidiʼ ni dxandíʼ. Lu sitiu jw.org^® nuu ti sección ra zanda guni estudiar binni Biblia ni láʼ biʼniʼ estudiar Biblia lu Internet. * ¿Xiñee nuuni yaʼ? Purtiʼ guiráʼ beeu, stale binni, lu guidubi Guidxilayú, ruyubi gudiicabe estudiu laa lu Internet. Estudiu ni ricaacabe lu sitiu stinu zanda gacané laacabe guiziidicabe ni rusiidiʼ Stiidxaʼ Dios. Nuu binni qué riná guicaa estudiu ora gábinu laa pa zaziidiruʼ. Pa zacá ni la? guluinu laacabe sección ra zanda guinábacabe ti estudiu lu Internet o guséʼndanu ti enlace ra nuucabe ni chiné laacabe lu sitiu stinu lu diidxaʼ ni riníʼcabe.

12. ¿Xi zaziidiʼ binni lu estudiu ni guicaa lu Internet?

¹² Lu estudiu riʼ zaziidiʼ binni de Biblia ne tu guníʼ xi guicá luni, tuu nga ca binni ni jma riete lu Biblia ne xi esperanza rudiini laanu. Ora guʼndaʼ binni ca lección riʼ zaziidiʼ:

• ximodo racané Biblia laanu,

• tuu nga Jiobá, Jesús ne ca ángel,

• xiñee bizáʼ Dios binni ne

• xiñee nuu stale yuubaʼ ne cosa malu.

Lu estudiu ca laaca zaziidiʼ binni ca tema riʼ:

• xi zuni Jiobá para cuee yuubaʼ ne guendaguti,

• xi zúnibe para gusibánibe ca ni maʼ guti ne

• ximodo zunitilú Reinu stibe ca gobiernu ni qué iquiiñeʼ ni nuu lu Guidxilayú.

13. Pa cacaa ti binni estudiu lu Internet, ¿ñee caquiiñeruʼ guicaa estudiu ra lidxi la? Bisiene ni.

¹³ Neca cacaa binni estudiu lu Internet, caquiiñeruʼ guicaa estudiu ra lidxi. Maʼ bidii Jesús laanu privilegiu de gacanenu binni gaca discípulo. Nuu binni racalaʼdxiʼ guiziidiʼ jma. Nga runi racaláʼdxinu gúʼndacabe ca lección ni nuu lu sitiu stinu, gusisácacabe ni caziidicabe ne chuuláʼdxicabe guiziidicabe jma. Pa gúnicabe ni, zándaca gudiicabe lugar chiganna ti publicador laacabe. Despué de maʼ biindaʼ binni ti lección, raca invitar guinabaʼ chiganna tuuxa laa ra lidxi para guiziidiʼ jma. Guiráʼ dxi, lu guidubi Guidxilayú, biaʼ 230 binni rinabaʼ gudiicabe laa estudiu lu Internet. Nga runi, caquiiñeʼ chuʼ tuuxa gudii estudiu ca binni riʼ.

14. Casi ná Mateo 28:19, 20, ¿xi dxiiñaʼ bisaanané Jesús laanu gúninu ne xiñee?

¹⁴ (Biindaʼ Mateo 28:19, 20, TNM). Ora gudiʼnu estudiu, caquiiñeʼ gúninu stipa para gacanenu binni gaca discípulo ne gusíʼdinu laacaʼ guzuubacaʼ stiidxaʼ Jesús. Laaca caquiiñeʼ gacanenu binni guiene pabiáʼ risaca guni ni ná Jiobá. Nga runi, gúninu stipa para gacanenu laacabe gúnicabe ni caziidicabe,  gudiicabe xquendanabánicabe Jiobá ne chuʼnísacabe. Pa gúnicabe ni la? zalácabe ora gueeda dxi stiʼ Jiobá (1 Ped. 3:21).

15. ¿Xi qué zúninu ne xiñee?

¹⁵ Casi maʼ bizíʼdinu, maʼ cadi candaa para guinitilú guidxilayú riʼ. Nga runi, qué zunítinu tiempu ra nuu ca binni ni qué racalaʼdxiʼ gaca discípulo stiʼ Cristu (1 Cor. 9:26). Peru caquiiñeʼ gúninu dxiiñaʼ riʼ nagueenda purtiʼ nuuruʼ stale binni ni racalaʼdxiʼ gucaadiaga mensaje stiʼ Reinu ante guedandá dxi stiʼ Jiobá.

16. Casi ná Apocalipsis 18:2, 4, 5, 8, ¿xiruʼ caquiiñeʼ gúninu? (Laaca zanda gúʼyaluʼ ni ná nota).

¹⁶ (Biindaʼ Apocalipsis 18:2, 4, 5, 8, TNM). Racané ca versículo riʼ laanu gánnanu racalaʼdxiʼ Jiobá gúninu sti cosa. Guiráʼ ca ni dxandíʼ xpinni Cristu caquiiñeʼ guixélenu de Babilonia guidxi roʼ. Zándaca nuu tuuxa binni ni cacaa estudiu guyuu lade ca religión falsu ante guiziidiʼ ni dxandíʼ. Zándaca dxiqué bidiibe xiixa serviciu ti religión, biʼniʼ participarbe lu ca cosa ni runi xiixa religión o dede bidiibe bueltu. Ante gaca aprobar binni riʼ para gaca publicador ni caʼruʼ chúʼnisa, caquiiñeʼ gusaanabe guiráʼ ca cosa stiʼ religión falsu. Ne caquiiñeʼ gucaabe ti carta ra yuʼduʼ guyebe para gábibe laacaʼ maʼ bireebe de ládecaʼ o guixélebe de xcaadxi organización ni zeeda de Babilonia guidxi roʼ. *

17. ¿Xi dxiiñaʼ qué zacaa ca xpinni Cristu, ne xiñee?

¹⁷ Laanu ca ni dxandíʼ xpinni Cristu, caquiiñeʼ chuʼnu cuidadu para cadi gúninu xiixa dxiiñaʼ ni zeeda de Babilonia guidxi roʼ (2 Cor. 6:14-17). Qué zúninu dxiiñaʼ ndaaniʼ ti yuʼduʼ. Pa rúninu dxiiñaʼ para ti empresa, qué zacaanu ti dxiiñaʼ naroʼbaʼ ndaaniʼ ti edificiu stiʼ ca religión falsu. Ne pa nápanu ti negocio la? qué ziyúbinu dxiiñaʼ o qué zacaanu xiixa dxiiñaʼ ni zeeda de Babilonia guidxi roʼ. ¿Xiñee runi ca xpinni Cristu ndiʼ yaʼ? Purtiʼ qué racaláʼdxinu gácanu cómplice stícabe ne de guiráʼ ca pecadu ni runi ca religión falsu ni qué runi ni ná Dios (Is. 52:11). *

18. ¿Xi biʼniʼ ti hermanu ora gudxi ti contratista laa pa zuni ti dxiiñaʼ ndaaniʼ ti yuʼduʼ?

 ¹⁸ Raca caadxi iza, gunabaʼ ti contratista ti ancianu de congregación ni napa ti carpintería guni ti dxiiñaʼ nahuiiniʼ ndaaniʼ ti yuʼduʼ ni nuu neza ra nabézacabe. Maca nanna contratista riʼ gudxi hermanu riʼ laa qué zacaa nin ti dxiiñaʼ ndaaniʼ ti yuʼduʼ. Neca zaqué guyebe ra nuu hermanu riʼ sti biaje purtiʼ caquiiñebe tu guni ti dxiiñaʼ stibe nagueenda. Peru yenanda hermanu riʼ ni ná ca principiu stiʼ Biblia ne qué niná ñuni dxiiñaʼ que. Ti semana despué, biree ti foto lu periódicu stiʼ sti carpinteru ni cuzuhuaa ti cruz ique yuʼduʼ que. Pa nicaa hermanu riʼ dxiiñaʼ que la? laa nga niree lu periódicu. ¿Ximodo rábiluʼ ñuuyaʼ ca hermanu de congregación stibe laabe ne ximodo ñuni sentir Jiobá yaʼ?

19, 20. a) ¿Xi guiráʼ maʼ bizíʼdinu lu artículo riʼ? b) ¿Xiruʼ caquiiñeʼ gúninu?

¹⁹ Casi riete lu ca profecía ni zeeda lu Biblia, maʼ cadi candaa zaníʼ ca xaíque guidxi «maʼ nuu paz ne seguridad», ne laani nga sti cosa risaca ni cabézanu guizaaca. Peru maʼ bisiidiʼ Jiobá laanu qué zanda diʼ guedané ca guidxi ca paz ni qué zaluxe lu Guidxilayú riʼ. ¿Xi caquiiñeʼ gúninu ante guiníʼcabe ca diidxaʼ riʼ ne málasi guinitilú guiráʼ ni nuu yaʼ? Racalaʼdxiʼ Dios cadi gusaana de guni predicarnu ne gacanenu jma binni gaca discípulo. Ne laaca naquiiñeʼ guixélenu de ca cosa ni zeeda de ca religión falsu. Ne nuu biaje caquiiñeʼ guireʼnu de ndaaniʼ ca religión ca ne cadi gúninu xiixa dxiiñaʼ ni zeeda de Babilonia guidxi ro.

²⁰ Nuuruʼ xi chiguizaaca ra maʼ ziluxe ca «últimu dxi» riʼ ne nuuruʼ xcaadxi cosa ni ribeza Jiobá gúninu. ¿Xi ribézabe gúninu yaʼ? Ne ¿xi caquiiñeʼ gúninu para gudxíʼlunu guiráʼ ca cosa ni zeeda ca? Zacábinu ca pregunta riʼ lu sti artículo ca.