1. ¿Xiñee caquiiñeʼ guni adorarnu Jiobá si?

RACALAʼDXIʼ JIOBÁ guni adorarnu laasi purtiʼ laa bizáʼ ne bidii guendanabani laanu (Apoc. 4:11). Peru neca nadxiinu Jiobá ne runi respetarnu laa, nuu caadxi cosa ni zanda guxheleʼ ne gucueeza laanu de guni adorarnu laabe modo riuuláʼdxibe. Nga runi caquiiñeʼ guiénenu ximodo zándaca gueeda guizaacanu ni. Peru primeru guidúʼyanu xi caquiiñeʼ gúninu para guni adorarnu Jiobá si.

2. Casi ná Mateo 4:10, ¿xi cosa qué zúninu pa runi adorarnu Jiobá si?

² Biblia ná ora nadxiinu Jiobá de guidubi ladxidoʼno zuni adorarnu laasi. Nga runi, cadi gudiʼnu lugar chuʼ tuuxa o xiixa ni guxheleʼ laanu de Jiobá (biindaʼ Mateo 4:10, TNM).

3. ¿Xi racané laanu guni adorarnu Jiobá si?

³ Racané guiráʼ ni maʼ bizíʼdinu de Jiobá laanu guni adorarnu laasibe. Ridxagayaanu pabiáʼ sicarú guiráʼ ca cualidad ni nápabe. Nánnanu xi riuuláʼdxibe ne xi coʼ, ne para laanu biaʼsi ni. Ne laaca riénenu xi racaláʼdxibe para laanu ne rúninu ni gábibe laanu. Riéchenu stale purtiʼ rudii Dios laanu oportunidad gaca xhamígunu laa (Sal. 25:14). Guiráʼ ni maʼ bizíʼdinu de Dios ni bizáʼ laanu racanécani laanu guidxíñanu jma gaxha de laa (Sant. 4:8).

4. a) ¿Xi riquiiñeʼ Binidxabaʼ para cadi guni adorarnu Jiobá si? b) ¿Xi zadúʼyanu lu artículo riʼ?

 ⁴ Riquiiñeʼ Binidxabaʼ guidxilayú ra cayuni mandar para gucaa laanu gúninu ni ná ca deseu stinu ne guiníʼ íquenu jma risaca gúninu ni riuuláʼdxinu (Efes. 2:1-3; 1 Juan 5:19). Racaláʼdxibe gannaxhiinu xcaadxi cosa ne cadi guni adorarnu Jiobá si. Zadúʼyanu chupa modo rúnibe ni. Primé, rucaabe laanu gannaxhiinu bidxichi. Ne guiropa, rucaabe laanu cuinu entretenimientu ni cadi jneza.

5. ¿Xiñee caquiiñeʼ chuʼnu cuidadu para cadi gannaxhiinu bueltu?

⁵ Guiranu racaláʼdxinu gápanu ni guidoʼno, lari ni gácunu ne ti lugar ra guibáninu. Peru caquiiñeʼ chuʼnu cuidadu para cadi gannaxhiinu bueltu. Tiempu riʼ, stale binni nadxii «bueltu» ne ni zanda sícabe né laani (2 Tim. 3:2). Gunna Jesús zándaca gannaxhii ca xpinni bueltu, nga runi gúdxibe laacaʼ: «Qué zanda diʼ gapa ti esclavu chupa xpixuaanaʼ, purtiʼ zaca nanaláʼdxibe tobi ne zannaxhiibe stobi, o zacánube tobi ne zuni despreciarbe stobi. Qué zanda gácatu esclavu stiʼ Dios ne laaca gácatu esclavu stiʼ Bidxichi» (Mat. 6:24, TNM). Binni ni runi adorar Dios ne ruyubi gaca ricu la? rusihuinni napa chupa xpixuaanaʼ ne qué runi adorar Jiobá si.

6. ¿Xi rizíʼdinu de ca diidxaʼ gudxi Jesús ca hermanu de Laodicea?

⁶ Ra maʼ ziluxe primé siglu, stale xpinni Cristu de congregación ni nuu Laodicea bichacaʼ bi yánnicaʼ purtiʼ guníʼ íquecaʼ ricu laacaʼ, nápacaʼ stale bueltu ne gastiʼ cayaadxaʼ laacaʼ. Peru para  Jiobá ne Jesús cadi nayecheʼ nuucabe, dede peʼ ñácabe laacaʼ, pobre ne ciegu laacaʼ, ne xieeládicaʼ. Bidii Jesús conseju ca hermanu riʼ cadi purtiʼ ricu laacaʼ, sínuque purtiʼ jma cá íquecaʼ gápacaʼ bidxichi ne cuxheleʼ ni laacaʼ de Jiobá (Apoc. 3:14-17). Pa gudiʼnu cuenta cayannaxhiinu bidxichi la? gúninu xiixa nagueendaca para cueenu ni de ndaaniʼ ladxidoʼno (1 Tim. 6:7, 8). Pa qué gúninu xiixa la? zannaxhiinu xcaadxi cosa risaca ne maʼ qué ziuulaʼdxiʼ Jiobá adoración stinu, purtiʼ racaláʼdxibe guni adorarnu laasibe (Deut. 4:24). ¿Xi zándaca gucaa laanu gannaxhiinu bueltu yaʼ?

7-9. ¿Xi rizíʼdinu de ejemplu stiʼ ti ancianu láʼ David?

⁷ Guidúʼyanu ni bizaaca David, ti ancianu ni nabeza Estados Unidos. Guniʼbe responsable laabe ra dxiiñaʼ stibe. Gucuaabe ti puestu risaca ndaaniʼ empresa ra rúnibe dxiiñaʼ ne biʼniʼ ganarbe stale bueltu, ne gúcabe tobi de ca binni ni jma nanna guni xhiiñaʼ ndaaniʼ guidxi ra nabézabe. Sicaríʼ guniʼbe: «Guníʼ iqueʼ pur Jiobá ngue napaʼ guiráʼ ndaayaʼ que». Peru ¿ñee dxandíʼ ni la?

⁸ Bidii David cuenta cuxheleʼ dxiiñaʼ stiʼ laa de Jiobá. Laabe guniʼbe: «Ora riaaʼ reunión ne predicación nisi dxiiñaʼ maʼ caníʼ iqueʼ. Runeʼ ganar stale bueltu, peru ra zidiʼdiʼ tiempu gucaʼ estresar stale ne gupaʼ guendanagana lu xquendaxheelaʼ».

⁹ Nga runi, guníʼ ique David xii nga ni jma risaca para laa. Sicaríʼ guniʼbe: «Gudixheʼ iqueʼ guneʼ chaahueʼ guendanagana que». Nga runi, guníʼ íquebe guchaabe horariu stibe ra dxiiñaʼ  ne gúdxibe ni jefe stibe. Peru binítibe dxiiñaʼ que. ¿Xi bíʼnibe yaʼ? Laabe guniʼbe: «Sti dxi que, bidieeʼ solicitud stinneʼ para gacaʼ precursor auxiliar stale beeu». Para gápabe ni iquiiñebe la? laabe ne xheelabe bizulú bíʼnicabe dxiiñaʼ de limpieza. Gudiʼdiʼ si tiempu, guca David precursor regular ne despué laaca guca xheelabe precursora. Gudixhe íquecabe gúnicabe ti dxiiñaʼ ni qué riuulaʼdxiʼ stale binni, peru laacabe qué ruuyacabe ni zacá. Neca jma huaxiéʼ bueltu runi ganárcabe que dxiqué, guiráʼ beeu nápacabe ni caquiiñecabe para guibánicabe. Ni jma racaláʼdxicabe nga gúnicabe ni ná Jiobá ne bidiicabe cuenta racané Jiobá ca xpinni ni riguixhe ique guni xhiiñaʼ Reinu primé lu xquendanabani (Mat. 6:31-33).

10. ¿Xi zanda gúninu para gápanu ladxidoʼno?

¹⁰ Pa huaxiéʼ o stale cosa risaca nápanu, caquiiñeʼ gápanu ladxidoʼno. ¿Ximodo gúninu ni yaʼ? Cadi gannaxhiinu bidxichi ne cadi gannaxhiinu dxiiñaʼ stinu jma que xhiiñaʼ Jiobá. Para gánnanu pa cazaacanu ni bizéʼtenu riʼ, caquiiñeʼ gúninu ca pregunta riʼ laanu: «¿Ñee nisi dxiiñaʼ stinneʼ maʼ caníʼ iqueʼ ora maʼ nuaaʼ ra reunión ne lu predicación la? ¿Ñee nabé riníʼ iqueʼ pa zapaʼ ni guibaneniaʼ despué la? ¿Ñee napaʼ guendanagana lu guendaxheelaʼ stinneʼ pur bueltu ne xcaadxi cosa risaca la? ¿Ñee zacaaʼ ti dxiiñaʼ ni qué riuulaʼdxiʼ xcaadxi para guneʼ jma lu xhiiñaʼ Jiobá la?» (1 Tim. 6:9-12). Ora guiníʼ íquenu ca ni bizéʼtenu riʼ, guietenaláʼdxinu nadxii Jiobá laanu ne maʼ bíʼnibe promesa riʼ: «Qué zusaanaʼ lii ne qué ziaanadxieeʼ de gacaniaʼ lii». Nga runi bidii apóstol Pablo conseju riʼ: «Lagusihuinni cadi nadxiitu bueltu pur modo nabánitu» (Heb. 13:5, 6, TNM).

11. ¿Xi zanda gucaa ca entretenimientu ca laanu gúninu?

¹¹ Racalaʼdxiʼ Jiobá chuʼnu nayecheʼ, ne entretenimientu nga racané laanu para guibáninu nayecheʼ. Biblia peʼ ná «ni jma galán para ti hombre nga gó ne gueʼ ne guiecheʼ pur dxiiñaʼ nadipaʼ ni runi» (Ecl. 2:24). Zanda guniná stale de ca entretenimientu ni nuu yanna riʼ laanu, ne laaca zanda gucaacaʼ ni  laanu chuuláʼdxinu o dede gannaxhiinu ca cosa ni qué riuulaʼdxiʼ Jiobá.

12. Casi ná 1 Corintios 10:21, 22, ¿xiñee caquiiñeʼ chuʼnu cuidadu ora cuinu xiixa entretenimientu?

¹² Racaláʼdxinu guni adorarnu Jiobá si, nga runi, qué zanda diʼ guidoʼno ruaa «mexaʼ stiʼ» Jiobá ne guidóʼcanu «ruaa mexaʼ stiʼ ca demonio» (biindaʼ 1 Corintios 10:21, 22, TNM). Ora roné ti binni tuuxa rusihuinni xhamigu laabe. Pa cuinu entretenimientu ra ridinde binni, ni napa ocultismo, inmoralidad o xcaadxi cosa ni qué riuulaʼdxiʼ Dios la? zeeda gaca ni casi ora nidóʼnenu ca enemigu stiʼ Dios. Pa gúninu ni, zuninanu laca laanu ne maʼ qué zaca xhamígunu Jiobá.

13, 14. a) ¿Xiñee zanda guchaaganu entretenimientu né guendaró yaʼ? b) Casi ná Santiago 1:14, 15, bisiene xiñee runiná entretenimientu ni cadi jneza laanu.

¹³ ¿Xiñee zanda guchaaganu entretenimientu né guendaró yaʼ? Purtiʼ ora ridoʼno, runi controlarnu ni nuu ndaaniʼ ruaanu. Peru ora maʼ gúbinu ni maʼ cuerpu stinu nga runi dxiiñaʼ para guicaa ca nutriente stiʼ guendaró ca. Pa ridoʼno guendaró ni gacané cuerpu stinu ziuʼnu nazaaca, peru pa coʼ la? zaca huaranu. Ne despué nga guihuinni ne cadi oraqueca.

¹⁴ Zacaca nga rizaaca ora cabinu xiixa entretenimientu, óraca nga zanda guni controlarnu ni riníʼ íquenu. Peru ora maʼ guyuuni lu xquendabiaaninu, maʼ qué randa runi controlarnu ni riníʼ íquenu ne ni runi sentirnu. Ora ribinu xiixa entretenimientu ni jneza, runi sentirnu galán, peru ora ribinu entretenimientu ni cadi jneza, runiná ni laanu (biindaʼ Santiago 1:14, 15, TNM). Ne despué nga zahuinni pa cayuniná xiixa entretenimientu laanu ne cadi oraqueca. Nga runi, Biblia caguixhená laanu: «Cadi quítetu laca laatu: guirutiʼ qué zanda quite Dios. Purtiʼ ni gudxiibaʼ binni la? ngaca guni cosechar. Ti binni ni guibani para si guni ni ná ca deseu malu stiʼ la? zunitilú ca deseu ca laa» (Gál. 6:7, 8, TNM). Nga runi, risaca gucáʼnanu intiica diversión ni nanalaʼdxiʼ Jiobá (Sal. 97:10).

15. ¿Xi regalu maʼ bidii Jiobá laanu?

¹⁵ Stale xpinni Jiobá riuulaʼdxiʼ guʼyaʼ ni ridiʼdiʼ lu canal JW Broadcasting^®, canal de televisión stinu ni nuu lu Internet. Sicaríʼ guníʼ ti hermana láʼ Marilyn: «Cayacané canal riʼ naa guibaneʼ nayecheʼ, ne cadi caquiiñeʼ guneʼ controlar ni ruuyaʼ. Ora runeʼ sentir stubeʼ o maʼ careeʼ gana, siempre ridxelaʼ xiixa discursu o adoración matutina ni riguu gana naa. Nga racané naa guidxiñaʼ jma gaxha de Jiobá ne organización stiʼ. Huayacané canal JW Broadcasting naa lu xquendanabaneʼ». ¿Ñee caquiiñenu regalu ni maʼ bidii Jiobá laanu la? Zanda guidúʼyanu programa ni ridiʼdiʼ guiráʼ beeu, laaca zanda guidúʼyanu guiráʼ videu ni nuu lu ni ora tiica si, ne laaca zanda gucaʼdiáganu xiixa programa lu audio ne canción ni uguu gana laanu.

16, 17. ¿Xi zanda gúninu para guni controlarnu tiempu ni riquiiñenu lu entretenimientu, ne ximodo zanda gúninu ni?

¹⁶ Risaca cuinu ximodo gaca divertirnu. Peru laaca risaca guidúʼyanu pabiáʼ tiempu runítinu lu cani, purtiʼ pa qué gúninu ni la? zándaca iquiiñenu tiempu stinu para gaca divertirnu lugar de gúninu ni ná Jiobá. Nuu tu laa  raca nagana gucueeza laaca laa. Guzéʼtenu ti ejemplu, Abigail, ti hermana de 18 iza guníʼ: «Despué de ti dxi dxiiñaʼ, laga caziiladxeʼ ruuyaʼ televisión. Peru pa qué gapaʼ cuidadu, zanda guniteʼ stale hora luni». Sicaríʼ guníʼ Samuel: «Nuu biaje, ruuyaʼ videu nachucu lu Internet. Primeru ruuyaʼ tobi, peru ora rudieeʼ cuenta maʼ ziniaʼ chonna o tapa hora de cayuuyaʼ ca videu ca».

¹⁷ ¿Xi zanda gúninu para guni controlarnu tiempu ni riquiiñenu lu entretenimientu? Primé ni zanda gúninu nga guidúʼyanu pabiáʼ tiempu cunítinu lu cani. Nga runi, zanda gucaʼnu lu ti calendariu pabiáʼ tiempu runítinu lu televisión, lu Internet ne ora maʼ caguítenu dispositivo móvil stinu. Pa gudiʼnu cuenta runítinu stale tiempu lu cani la? gúninu xiixa. Primeru gucaʼnu lu calendariu stinu ca cosa ni jma risaca ne despué gucaʼnu pabiáʼ tiempu iquiiñenu para gaca divertirnu. Despué guinábanu Jiobá gacané laanu chinándanu ni ná calendariu ca. Zacá zápanu tiempu ne stipa ni caquiiñenu para guidúʼndanu Biblia, gápanu adoración en familia, chuunu reunión, guni predicarnu ne gacanenu binni gaca discípulo. Pa gúninu ni, qué zuni sentirnu mal ora gaca divertirnu.

18, 19. ¿Ximodo zanda gusihuínninu runi adorarnu Jiobá si?

¹⁸ Bicaa apóstol Pedro zanitilú Binidxabaʼ ne zaca Guidxilayú riʼ ti paraísu, laaca guniʼbe: «Hermanu ni nadxieeʼ caʼ, cumu cabézatu gaca ca cosa riʼ la? laguni stipa pur guidxélabe laatu sin mancha, ne cadi cayúnitu xiixa cosa malu ne nuutu tobi si né laabe» (2 Ped. 3:14, TNM). Ora rinándanu conseju riʼ ne rúninu stipa pur guibáninu modo riuulaʼdxiʼ Dios, rusihuínninu cayuni adorarnu Jiobá si.

¹⁹ Zuyúbiruʼ Binidxabaʼ ne guidxilayú stiʼ modo gusaana de gúninu ni ná Jiobá (Luc. 4:13). Peru intiica guendanagana guidxaagalunu, qué zudiʼnu lugar chuʼ tuuxa o xiixa ni guxheleʼ laanu de Jiobá. Nuunu dispuestu guni adorarnu Jiobá si de guidubi ladxidoʼno.