ARTÍCULO DE ESTUDIU 37
Caquiiñeʼ guzúʼbanu stiidxaʼ Jiobá
«¿Ñee cadi jma naquiiñeʼ guzúʼbanu stiidxaʼ Bixhózenu [...] la?» (HEB. 12:9, TNM).
CANCIÓN sjj 9 ¡Jiobá nga Rey stinu!
NI ZAZÍʼDINU *
1. ¿Xiñee caquiiñeʼ guzúʼbanu stiidxaʼ Jiobá?
CAQUIIÑEʼ guzúʼbanu stiidxaʼ * Jiobá. Laabe nga bizaʼbe laanu, ne nápabe derechu para quíxhebe norma ni caquiiñeʼ chinándanu (Apoc. 4:11). Peru nápanu sti razón para guzúʼbanu stiidxabe: purtiʼ guizáʼ galán runi gobernarbe. Ra maʼ gudiʼdiʼ iza, huayapa stale gobernante autoridad ne poder luguiáʼ binni. Peru Jiobá nga gobernante ni jma nuu xpiaaniʼ, ni nadxii, ni riene ne ni riá binni (Éx. 34:6; Rom. 16:27; 1 Juan 4:8).
2. Casi ná Hebreos 12:9-11, ¿xiñee ruzúʼbanu stiidxaʼ Jiobá?
2 Racalaʼdxiʼ Jiobá guzúʼbanu stiidxaʼ, purtiʼ nadxiinu laa ne ridúʼyanu laa casi Bixhózenu ni nadxii laanu, ne cadi purtiʼ ridxíbinu laa. Lu carta ni bicaa Pablo para ca hebreu, bicaabe caquiiñeʼ guzúʼbanu stiidxaʼ Jiobá purtiʼ racané ca ni rusiidibe laanu (biindaʼ Hebreos 12:9-11).
3. a) ¿Ximodo rusihuínninu ruzúʼbanu stiidxaʼ Jiobá? b) ¿Xi chiguicábinu lu artículo riʼ?
3 Ruzúʼbanu stiidxaʼ Jiobá ora rúninu ni ná ne ora qué rúninu ni ná íquenu (Prov. 3:5). Pa gunibiaʼnu ca cualidad napa Dios la? qué zaca nagana para laanu guzúʼbanu stiidxaʼ, purtiʼ rihuinni ca cualidad stibe lu guiráʼ ni rúnibe (Sal. 145:9). Ra gunibiaʼnu Dios jma, zannaxhiinu laa jma. Ne pa nadxiinu laabe, cadi caquiiñenu ti lista ra cá xi zanda ne xi qué zanda gúninu. Nga runi, rúninu stipa pur gannaxhiinu ni jneza ne gacananaláʼdxinu ni cadi jneza, cásica runi Jiobá ni (Sal. 97:10). Peru ziuu biaje zaca nagana para laanu guzúʼbanu stiidxabe. ¿Xiñee yaʼ? ¿Ne xi zanda guiziidiʼ ca ancianu, ca hombre ne ca gunaa ni napa xiiñiʼ de ejemplu stiʼ Nehemías, rey David ne María, jñaa Jesús? Lu artículo riʼ chiguicábinu ca pregunta ni bizéʼtenu riʼ.
XIÑEE RACA NAGANA PARA LAANU GUZÚʼBANU STIIDXAʼ JIOBÁ
4, 5. Casi ná Romanos 7:21-23, ¿xiñee raca nagana para laanu guzúʼbanu stiidxaʼ Jiobá?
4 Nuu ora raca nagana para laanu guzúʼbanu stiidxaʼ Jiobá purtiʼ binni ruchee laanu. Nga runi, qué riuuláʼdxinu guzúʼbanu diidxaʼ. Dxi bicaalú Adán ne Eva Jiobá ne gudocaʼ cuananaxhi ni guidxi Dios laacaʼ cadi gocaʼ la? gudixhécabe xii nga ni jneza ne ni cadi jneza para laacabe (Gén. 3:22). Ne casi laacabe, yanna riʼ stale binni qué runi ni ná Dios ne riguíxhecaʼ xii nga ni jneza ne ni cadi jneza para laacaʼ.
5 Dede laanu, ca ni runibiaʼnu ne nadxiinu Dios, nuu biaje raca nagana para laanu guzúʼbanu stiidxabe lu guiráʼ ni gúninu. Ngapeʼ nga ni bizaaca apóstol Pablo (biindaʼ Romanos 7:21-23, TNM). Cásica laabe, laaca racaláʼdxinu gúninu ni riuulaʼdxiʼ Dios. Nga runi, caquiiñeʼ gúninu stipa para cadi gúninu ni cadi jneza.
6, 7. ¿Xi sti cosa zanda gucaa laanu cadi guzúʼbanu stiidxaʼ Jiobá? Bizeeteʼ ti ejemplu.
6 Laaca zanda gaca nagana para laanu guzúʼbanu stiidxaʼ Jiobá pur modo bisiniisicabe laanu. Ne stale binni zaníʼ cosa ni cadi dxandíʼ de Jiobá. Nga runi, caquiiñeʼ gúninu stipa para cadi guiníʼ íquenu casi riníʼ ique ca binni riʼ. Guzéʼtenu ti ejemplu.
7 Ndaaniʼ caadxi guidxi, rucaacabe ca joven gúnicaʼ dxiiñaʼ para guni ganarcaʼ stale bueltu. Ngapeʼ nga ni bizaaca ti hermana láʼ Mary. * Ante gunibiaʼbe Jiobá, biʼniʼ estudiarbe ndaaniʼ tobi de ca universidad jma risaca nuu ndaaniʼ xquídxibe. Bicaa familia stibe laabe gápabe ti dxiiñaʼ ra guni ganarbe stale bueltu ne gácabe ti binni risaca. Ne ngapeʼ nga ni racaláʼdxibe. Peru bichaa guiráʼ ni naguixhe íquebe gúnibe dxi binibiaʼbe Jiobá ne gunnaxhiibe laa. Neca zacá, sicaríʼ guníʼ Mary: «Nuu biaje riníʼ iqueʼ zanda guzuluáʼ caadxi negocio para guneʼ ganar stale bueltu, peru pa guneʼ ni zándaca zusaanaʼ de guneʼ ni ná Jiobá. Pur modo bisiniisicabe naa, nuu biaje rácaruʼ nagana para naa guinieeʼ qué zacaaʼ ca dxiiñaʼ ca. Runeʼ orar Jiobá ne rinabaʼ laabe gacanebe naa cadi guicaaʼ xiixa dxiiñaʼ ni guxheleʼ naa de laabe» (Mat. 6:24).
8. ¿Xi chiguidúʼyanu lu ca xcaadxi párrafo ca?
8 Casi maʼ bizíʼdinu, ribeendunu stale cosa galán ora ruzúʼbanu stiidxaʼ Jiobá. Nga runi, pa guzuubaʼ ca ancianu, ca hombre ne ca gunaa ni napa xiiñiʼ stiidxaʼ Dios la? zanda gacanécabe xcaadxi binni neca nápacabe autoridad. Chiguidúʼyanu caadxi ejemplu zeeda lu Biblia ni zacané laanu gánnanu iquiiñenu autoridad ni nápanu modo riuulaʼdxiʼ Jiobá.
XI ZANDA GUIZIIDIʼ CA ANCIANU DE EJEMPLU STIʼ NEHEMÍAS
Racané ca ancianu ora raca chaahuiʼ Yoo stiʼ Reinu, cásica biʼniʼ Nehemías ni dxi guca chaahuiʼ ca muru stiʼ Jerusalén. (Biiyaʼ párrafo 9 hasta 11). *
9. ¿Xi guendanagana bidxaagalú Nehemías dxi yendá Jerusalén?
9 Maʼ bidii Jiobá ca ancianu ti dxiiñaʼ nabé risaca, gápacabe ca xpinni (1 Ped. 5:2). Zanda guiziidiʼ ca ancianu stale de modo biʼniʼ tratar Nehemías xquidxi Jiobá. Cumu gobernador laabe guidubi guidxi Judá la? gúpabe stale autoridad (Neh. 1:11; 2:7, 8; 5:14). Guidúʼyanu xi guendanagana bidxaagalú Nehemías. Casi yendabe raqué, gúnnabe biʼniʼ biidiʼ ca judíu que yuʼduʼ stiʼ Dios ne qué racanecaʼ ca levita casi ná ley. Ne laaca qué riziiláʼdxicaʼ dxi sábadu ne bichaganacaʼ gunaa de sti guidxi. ¿Xi biʼniʼ Nehemías yaʼ? (Neh. 13:4-30).
10. ¿Xi biʼniʼ Nehemías ora bidxaagalú guendanagana?
10 Jneza modo biquiiñeʼ Nehemías autoridad stiʼ, purtiʼ qué nucaabe ca judíu gúnicaʼ ni nabe. Lugar de nga la? biʼniʼ orarbe Jiobá de guidubi ladxidoʼbe, ne gunábabe laa gacané laabe para ganda gusiidibe guidxi que ni ná Ley stiʼ (Neh. 1:4-10; 13:1-3). Laaca gúcabe humilde dede bíʼnibe dxiiñaʼ né ca bíʼchibe para gurí muru stiʼ Jerusalén sti biaje (Neh. 4:15).
11. Casi ná 1 Tesalonicenses 2:7, 8, ¿ximodo naquiiñeʼ guni tratar ca ancianu ca hermanu nuu ndaaniʼ congregación?
11 Zándaca qué zadxaagalú ca ancianu ca guendanagana bidxaagalú Nehemías. Peru zanda chinándacabe ejemplu stiʼ Nehemías de gadxé gadxé modo. Runi ca ancianu stale dxiiñaʼ para gacanecaʼ ca hermanu sticaʼ. Ne qué rudxiibacabe laca laacabe pur autoridad ni nápacabe, sínuque rannaxhiicabe ca hermanu nuu ndaaniʼ congregación (biindaʼ 1 Tesalonicenses 2:7, 8). Rihuinni humilde laacabe ne nadxiicabe ca hermanu pur modo riniʼnécabe laacaʼ. Sicaríʼ guníʼ Andrew, ti hermanu ni maʼ ziné stale iza de naca ancianu: «Maʼ bidieeʼ cuenta runi ca hermanu ni jneza ora riniʼné ca ancianu laacabe né diidxaʼ nadóʼ ne rannaxhiicaʼ laacabe. Racané ca cualidad riʼ laacabe para guninécabe ca ancianu dxiiñaʼ tobi si». Ne Tony, ti hermanu ni maʼ ziné stale iza de naca ancianu guníʼ: «Runeʼ stipa chinandaʼ ni ná Filipenses 2:3 ne runeʼ stipa pur guiníʼ iqueʼ jma risaca xcaadxi hermanu que naa. Nga racané naa para cadi gucaaʼ ca hermanu gúnicaʼ ni racalaʼdxeʼ».
12. ¿Xiñee caquiiñeʼ gaca ca ancianu humilde?
12 Naquiiñeʼ gaca ca ancianu humilde, cásica Jiobá. Neca laabe nga Dios ni jma nandxóʼ, ratagudaabe para guindísabe ca humilde ni nexheʼ layú (Sal. 18:35; 113:6, 7). Ne ribixhiláʼdxibe ca binni orgulloso (Prov. 16:5).
13. ¿Xiñee naquiiñeʼ gapa ca ancianu cuidadu né ni riniʼcaʼ ne modo riniʼcaʼ?
13 Rusihuinni ca ancianu ruzuubacaʼ stiidxaʼ Jiobá ora rápacaʼ cuidadu né ni riniʼcaʼ ne modo riniʼcaʼ. Pa qué gúnicabe ni la? zándaca cadi jneza guicábicabe tuuxa hermanu ora qué guni respetar laacabe (Gál. 5:14, 15; Sant. 1:26). Andrew, hermanu ni maca bizéʼtenu que guníʼ: «Nuu biaje, rucueezaʼ laca naa para cadi guicabeʼ ti hermanu ni rabeʼ cadi cayuni respetar naa. Ne ora riníʼ iqueʼ ca ejemplu stiʼ ca hombre ni biʼniʼ ni ná Jiobá dxiqué la? racané ni naa gacaʼ humilde ne nadóʼ». Rusihuinni ca ancianu ruzuubacaʼ stiidxaʼ Jiobá ora rannaxhiicaʼ ne ora riquiiñecaʼ diidxaʼ nadóʼ para guiníʼnecaʼ ca hermanu ne xcaadxi ancianu (Col. 4:6).
XI ZANDA GUIZIIDIʼ CA HOMBRE NAPA XIIÑIʼ DE EJEMPLU STIʼ REY DAVID
14. ¿Xi responsabilidad maʼ bidii Jiobá ca hombre napa xiiñiʼ, ne xi ribézabe gúnicaʼ?
14 Maʼ gudixhe Jiobá gaca ca hombre xaíque ndaaniʼ familia sticaʼ, ne ribézabe gusiniisicaʼ xiiñicaʼ galán ne uguu jnézacaʼ laacabe (1 Cor. 11:3; Efes. 6:4). Neca napa ca hombre riʼ autoridad, qué zanda iquiiñeʼ cani modo racaláʼdxicaʼ. Jiobá nga gudixhestí familia, nga runi ca hombre nga responsable de familia stiʼ nezalú Dios (Efes. 3:14, 15). Rusihuínnicabe ruzuubacabe stiidxaʼ Dios ora riquiiñecabe autoridad stícabe modo riuulaʼdxiʼ Jiobá. Zanda guiziidiʼ ca hombre riʼ stale cosa pa gúʼndacaʼ ejemplu stiʼ rey David.
Ca oración ni guni ca hermanu ni napa xiiñiʼ naquiiñeʼ gusihuínnicani humilde laacaʼ. (Biiyaʼ párrafo 15 ne 16). *
15. ¿Xiñee naca rey David ti ejemplu galán para ca hombre ni napa xiiñiʼ?
15 Gulí Jiobá David para gaca xaíque ndaaniʼ familia stiʼ ne gaca xaíque stiʼ guidxi Israel. Cumu rey laabe la? nápabe stale autoridad. Peru guyuu ora cadi jneza biquiiñebe autoridad stibe ne bíʼnibe cosa ni cadi jneza (2 Sam. 11:14, 15). Neca zacá bisihuínnibe ruzuubabe stiidxaʼ Jiobá ra bidiibe lugar gulidxe Dios laabe. Gúdxibe Jiobá guiráʼ ni bíʼnibe ne bíʼnibe stipa para gúnibe ni ná Dios (Sal. ). Ne laaca gúcabe humilde purtiʼ gucuaabe conseju ni bidii hombre ne gunaa laabe ( 51:1-41 Sam. 19:11, 12; 25:32, 33). Neca bicheebe gucaneni laabe para gúnibe ni jneza ne gudixhe íquebe gúnibe ni ná Jiobá.
16. ¿Xi zanda guiziidiʼ ca hombre napa xiiñiʼ de ejemplu stiʼ David?
16 Guidúʼyanu xi zanda guiziidiʼ ca hombre napa xiiñiʼ de ejemplu stiʼ rey David. Biquiiñeʼ autoridad bidii Jiobá lii jneza. Biʼniʼ aceptar ra bicheeluʼ ne gucuaa ca conseju gudiicabe lii. Pa gúniluʼ ni, zuni respetar xheelaluʼ ne ca xiiñiluʼ lii purtiʼ nácaluʼ humilde. Ne ora guni orarneluʼ laacabe, gudxi Jiobá guiráʼ ni caquiiñetu. Pa gúniluʼ ni, zudii familia stiluʼ cuenta pabiáʼ nápatu confianza Dios. Ne ni jma risaca nga biʼniʼ ni ná Dios (Deut. 6:6-9). Ejemplu stiluʼ nga regalu jma galán zanda gudiiluʼ familia stiluʼ.
XI ZANDA GUIZIIDIʼ CA GUNAA NAPA XIIÑIʼ DE EJEMPLU STIʼ MARÍA
17. ¿Xi dxiiñaʼ maʼ bidii Jiobá ca gunaa ni napa xiiñiʼ?
17 Maʼ bidii Jiobá ca gunaa napa xiiñiʼ ti dxiiñaʼ nabé risaca ndaaniʼ familia sticaʼ ne laaca maʼ bidiibe laacaʼ caadxi autoridad luguiáʼ ca xiiñicaʼ (Prov. 6:20). Ne zanda gacané o guniná ti gunaa xiiñiʼ pur ni guni ne ni guiníʼ (Prov. 22:6). Guidúʼyanu xi zanda guiziidiʼ ca gunna ni napa xiiñiʼ de ejemplu stiʼ María, jñaa Jesús.
18, 19. ¿Xi zanda guiziidiʼ ca gunaa napa xiiñiʼ de ejemplu stiʼ María?
18 Binibiáʼ chaahuiʼ María ni zeeda lu Stiidxaʼ Dios. Guizáʼ biʼniʼ respetarbe Jiobá ne gúpabe ti amistad galán né laa. Bíʼnibe stipa pur gúnibe ni ná Jiobá neca bichaa xquendanabánibe (Luc. 1:35-38, 46-55).
Ora maʼ bidxaga o cadxiichi ti gunaa ni napa xiiñiʼ, zándaca caquiiñeʼ guni stipa pur gusihuinni nadxii familia stiʼ. (Biiyaʼ párrafo 19). *
19 Guidúʼyanu xi zanda guiziidiʼ ca gunaa napa xiiñiʼ de ejemplu stiʼ María. Primé, biindaʼ Biblia ne biʼniʼ orar Jiobá para cadi gunítiluʼ amistad stibe. Guiropa, biʼniʼ stipa pur gúniluʼ ni ná Jiobá neca guchaa xquendanabániluʼ. Guzéʼtenu ti ejemplu, zándaca cadi jneza modo bisiniisi bixhózeluʼ ne jñaaluʼ lii ne gúcacaʼ naduxhuʼ né lii. Ne zándaca ra biniisiluʼ guníʼ íqueluʼ laaca zacaca naquiiñeʼ gusiniisiluʼ ca xiiñiluʼ. Peru neca maʼ biziidiluʼ ximodo racalaʼdxiʼ Jiobá guni tratarluʼ ca xiiñiluʼ, zándaca gaca nagana para lii gápaluʼ paciencia ne gucueezaluʼ laca lii, jmaruʼ si ora maʼ bidxágaluʼ ne ora qué ruzuubaʼ ca xiiñiluʼ diidxaʼ (Efes. 4:31). Oracaruʼ nga jma caquiiñeʼ guni orarluʼ Jiobá. Ti gunaa napa xiiñiʼ láʼ Lydia guníʼ: «Nuu biaje rinieniáʼ Jiobá de guidubi ladxiduáʼ para cadi tindeniaʼ xiiñeʼ ora qué ruzuubaʼ stiidxaʼ. Huayuu ora rucueezaʼ laca naa ora maʼ canieeʼ ne rinabaʼ Jiobá gacané naa. Runeʼ orar para ganda gucueezaʼ laca naa» (Sal. 37:5).
20. ¿Xi guendanagana ridxaagalú caadxi gunaa ni napa xiiñiʼ, ne xi zanda gúnicabe para guchaacabe?
20 Ridxaagalú caadxi gunaa ni napa xiiñiʼ xcaadxi guendanagana, raca nagana para laacaʼ gusihuínnicaʼ pabiáʼ nadxiicaʼ ca xiiñicaʼ (Tito 2:3, 4). Ne zándaca runi sentírcabe zacá purtiʼ qué ñannaxhii bixhózecabe ne jñaacabe laacabe dxi nahuiinicabe. Peru cadi naquiiñeʼ guni tratárcabe ca xiiñicabe zacá. Ca gunaa ni ruzuubaʼ stiidxaʼ Jiobá zándaca caquiiñeʼ guiziidicaʼ gusihuínnicaʼ nadxiicaʼ xiiñicaʼ. Ne zándaca gaca nagana para laacabe guchaacabe modo riníʼ íquecabe, ni runi sentírcabe ne ni rúnicabe, peru zanda guchaacabe. Ne pa gúnicabe ni la? zabaninécabe familia stícabe jma nayecheʼ.
CADI GUSAANA DE GUZÚʼBANU STIIDXAʼ JIOBÁ
21, 22. Casi ná Isaías 65:13, 14, ¿xi ribeendunu ora ruzúʼbanu stiidxaʼ Jiobá?
21 Guleendú rey David stale cosa galán ra bizuubaʼ stiidxaʼ Jiobá. Sicaríʼ bicaabe: «Jneza ca ni gudixhe Jiobá guni binni, rusiecheʼ cani ladxidoʼcaʼ, ne nayá mandamientu stiʼ Jiobá, racané ni guiaaniʼ bizalú binni». Ne laaca bicaabe: «Laaca maʼ gudixhená cani siervu stiluʼ; ne zacaa stale ndaayaʼ pa chinanda ni ná cani» (Sal. 19:8, 11). Tiempu riʼ, zanda guidúʼyanu xi ribeendú ca ni ruzuubaʼ stiidxaʼ Jiobá ne ca ni qué runi ni nabe. Riuu ca binni ni ruzuubaʼ stiidxaʼ Dios nayecheʼ «purtiʼ nayecheʼ nuu ladxidoʼcaʼ» (biindaʼ Isaías 65:13, 14).
22 Ora ruzuubaʼ ca ancianu, ca hombre ne ca gunaa ni napa xiiñiʼ stiidxaʼ Jiobá la? ribánicaʼ jma galán, riuu familia sticaʼ jma nayecheʼ, ne riuu ca congregación ca tobi si. Ne ni jma risaca nga rusiéchecaʼ ladxidóʼ Jiobá (Prov. 27:11). ¡Nga nga ni jma rusiecheʼ laanu!
CANCIÓN sjj 123 Gácanu leal ra gúninu guiráʼ ni ná Jiobá
^ párrafo 5 Lu artículo riʼ zazíʼdinu xiñee caquiiñeʼ guzúʼbanu stiidxaʼ Jiobá. Laaca zadúʼyanu xi zanda guiziidiʼ ca ni napa autoridad, casi ca ancianu, ca hombre ne ca gunaa ni napa xiiñiʼ de ejemplu stiʼ Nehemías, rey David ne María, jñaa Jesús.
^ párrafo 1 IDEA RISACA: Stale binni qué riuulaʼdxiʼ guzuubaʼ diidxaʼ ora rábicabe laacaʼ gúnicaʼ ni, peru laanu ca xpinni Cristu, maʼ gudixhe íquenu guzúʼbanu stiidxaʼ Dios.
^ párrafo 7 Lu artículo riʼ bidxaa lá caadxi binni.
^ párrafo 62 NI RIHUINNI LU FOTO RIʼ: Cayacané ti ancianu ne xiiñiʼ ra cayaca chaahuiʼ Yoo stiʼ Reinu, cásica biʼniʼ Nehemías ni dxi guca chaahuiʼ ca muru stiʼ Jerusalén.
^ párrafo 64 NI RIHUINNI LU FOTO RIʼ: Cayuni orarné ti hermanu familia stiʼ ne cayábibe Jiobá xi guiráʼ cazaacacabe.
^ párrafo 66 NI RIHUINNI LU FOTO RIʼ: Maʼ stale hora de caguite ti hombrehuiiniʼ videojuego ne qué ñuni tariá stiʼ ne laaca qué nutopa ca cosa stiʼ. Neca maʼ bidxaga jñaabe caguu jneza laabe, peru cayúnini né diidxaʼ nadóʼ ne cucueeza laca laa.