1, 2. a) ¿Xiñee naquiiñeʼ guiecheʼ binni ora guzulú Armagedón? b) ¿Xi tapa pregunta zacábinu lu artículo riʼ?

ORA runadiaga binni diidxaʼ Armagedón ruxuíʼlucaʼ stale cosa feu, casi ti guerra nuclear o riníʼ íquecaʼ chiguinitilú Guidxilayú riʼ pur guiráʼ contaminación ni nuu. Peru ca ni rusiidiʼ Biblia de Armagedón la? rusiecheʼ cani laanu purtiʼ ruzeeteʼ ni zazaaca stale cosa galán (Apoc. 1:3). Qué zunitilú diʼ Armagedón guiráʼ binni guidxilayú, sínuque zalá caadxi de laacaʼ. ¿Ximodo zaca nga yaʼ?

² Biblia rusiidiʼ zanitilú guiráʼ ca gobiernu ni nuu lu guidxilayú riʼ lu Armagedón, zanitilú guiráʼ binni malu, peru zalá guiráʼ ca binni nachaʼhuiʼ ne qué zanitilú Guidxilayú riʼ (Apoc. 11:18). Para guiene chaahuinu ni maʼ bizéʼtenu ca la? zacábinu tapa pregunta: ¿Xii nga Armagedón? ¿Xi guiráʼ zazaaca ora mayaca guzuluni? ¿Xi caquiiñeʼ gúninu para guilanu? Ne ¿xi zanda gúninu para cadi guixélenu de Jiobá ante guzulú Armagedón?

3. a) ¿Xi raca significar diidxaʼ Armagedón? b) Casi ná Apocalipsis 16:14, 16, ¿xiñee nánnanu cadi ti lugar ni nuu lu Guidxilayú riʼ nga Armagedón?

³ (Biindaʼ Apocalipsis 16:14, 16, TNM). Ti biaje si riete diidxaʼ Armagedón lu Biblia ne zeedani de ti diidxaʼ hebreu ni raca significar dani stiʼ Meguidó (Apoc. 16:16). Meguidó nga ti guidxi ni guyuu ndaaniʼ guidxi Israel dxiqué (Jos. 17:11). Nga runi, cadi ti lugar ni nuu lu guidxilayú riʼ nga Armagedón, purtiʼ laani nga ora guieeguʼ «ca  rey nuu lu guidubi guidxilayú» riʼ para gucaalucaʼ Dios (Apoc. 16:14). Peru lu artículo riʼ laaca zaquiiñenu diidxaʼ Armagedón para guininu de guerra ni chigaca despué de guieeguʼ ca rey ni nuu lu Guidxilayú. ¿Xiñee nánnanu cadi ti lugar ni nuu lu guidxilayú riʼ nga Armagedón yaʼ? Primé, purtiʼ gastiʼ ti dani láʼ Meguidó yanna. Guiropa, purtiʼ nahuiiniʼ lugar nuu gaxha de Meguidó para tinde guiráʼ «ca rey nuu lu guidubi guidxilayú» riʼ, ne qué zanda chuʼ ejércitu ne guiráʼ guiibaʼ sticaʼ raqué. Ne guionna, purtiʼ casi chiguizíʼdinu lu artículo riʼ, zuzulú Armagedón ora gucaalú «ca rey» stiʼ guidxilayú riʼ guiráʼ ca xpinni Dios.

4. ¿Xiñee bizeeteʼ Jiobá Meguidó ora guníʼ de guerra stiʼ?

⁴ ¿Xiñee bizeeteʼ Jiobá Meguidó ora guníʼ de guerra stiʼ? Purtiʼ nabé guca guerra Meguidó ne ndaaniʼ ti valle ni riaana gaxha de raqué ni láʼ Jezreel . Nuu biaje la? Jiobá peʼ nga bidii náʼ xquidxi para guni ganar. Ti biaje gucanebe ti juez israelita láʼ Barac para gunduuxeʼ ca cananeu ni ziné Sísara gaxha de ra daʼ nisa stiʼ dani Meguidó. Bidii Barac ne Débora xquíxepeʼ Jiobá pur milagru ni biʼniʼ para biʼniʼ ganárcabe. Lu ti canción guníʼcabe dede guibáʼ gudindené ca beleguí Sísara, ne «ziné arroyo stiʼ Cisón laacabe» (Juec. 5:19-21).

5. ¿Xiñee maʼ gadxé Armagedón de guerra ra gudinde Barac?

⁵ Sicaríʼ biluxe Barac ne Débora canción cayuundacaʼ: «Zacá guinitilú guiráʼ ca xhenemíguluʼ Jiobá, ne cani nadxii lii gácacaʼ nadipaʼ casi gubidxa ora riree» (Juec. 5:31). Zati ca enemigu stiʼ Jiobá lu Armagedón, peru zalá ca ni nadxii laabe. Peru maʼ gadxé si Armagedón de guerra ra gudinde Barac. Purtiʼ qué zadinde diʼ ca xpinni Dios lu Armagedón, ne qué zinécabe guiibaʼ. Ni zacané laacabe nga cadi guidxíbicabe ne gápacabe confianza zacané Jiobá ne guiráʼ ca ángel stiʼ laacabe (Is. 30:15; Apoc. 19:11-15).

6. ¿Ximodo chigunduuxeʼ Jiobá ca enemigu stiʼ lu Armagedón?

⁶ ¿Ximodo chigunduuxeʼ Jiobá ca enemigu stiʼ lu Armagedón yaʼ? Zanda gúnibe ni de stale modo. Zándaca iquiiñebe xu, granizu ne rayu (Job 38:22, 23; Ezeq. 38:19-22). Laaca zanda gucaabe ca enemigu stibe tindesaacaʼ (2 Crón. 20:17, 22, 23). O iquiiñebe ca ángel stibe para guuti guiráʼ ca binni malu (Is. 37:36). Intiica si gúnibe zuni ganarbe. Zanitilú guiráʼ ca enemigu stibe, peru zalá guiráʼ ca ni nachaʼhuiʼ (Prov. 3:25, 26).

7, 8. a) Casi ná 1 Tesalonicenses 5:1-6, ¿xi zaníʼ ca xaíque stiʼ ca guidxi ca? b) ¿Xiñee guizáʼ feu guendarusiguii riʼ?

⁷ Zaníʼ binni «¡maʼ nuu paz ne seguridad!» ante guzulú «dxi stiʼ» Jiobá (biindaʼ 1 Tesalonicenses 5:1-6, TNM). Ora riete «dxi stiʼ» Jiobá lu 1 Tesalonicenses 5:2 la? caniʼni de gran tribulación o dxi tidiʼ binni stale yuubaʼ (Apoc. 7:14). ¿Ximodo gánnanu ora mayaca guzulú gran tribulación? Lu Biblia riete zuzuluni dxi guiníʼ ca xaíque stiʼ ca guidxi ca «¡maʼ nuu paz ne seguridad!».

⁸ ¿Xiñee zaníʼcabe ca diidxaʼ ca yaʼ? Qué gánnadinu. ¿Ñee guiráʼ ca xaíque stiʼ ca guidxi ca zaniʼcaʼ ni la? Zándaca. Purtiʼ laani nga sti cosa ni zaquiiñeʼ ca demonio ca para quítecaʼ binni. ¿Xiñee guizáʼ feu guendarusiguii riʼ yaʼ? Purtiʼ zucaani  binni guiníʼ ique qué zazaaca gastiʼ ora mayaca guzulú gran tribulación. Peru «málasi zanitilucaʼ. Zaca ni casi ora rinaazeʼ yuubaʼ ti gunaa ora maʼ gunda dxi gapa baʼduʼ». Peru ¿xi zazaaca né ca xpinni Jiobá yaʼ? Zándaca zadxagayaacabe ora guzuluni, peru ziuucabe listu para laani.

9. ¿Ximodo chigunitilú Jiobá guidxilayú stiʼ Binidxabaʼ?

⁹ Qué zunitilú Jiobá guidxilayú stiʼ Binidxabaʼ cásica biʼniʼ ni ca dxi bibani Noé, purtiʼ dxiqué binitilube ca binni malu que juntu. ¿Ximodo chigúnibe ni yaʼ? Primé, chigunitilube Babilonia guidxi roʼ, laani nga guiráʼ ca religión falsu ni nuu lu Guidxilayú riʼ. Ne despué zunduuxebe restu binni malu ni guiaana lu Guidxilayú riʼ, casi ca políticu, ca soldadu ne guiráʼ negocio ni nuu ndaaniʼ ni. Lu xcaadxi párrafo ca ziene chaahuinu guiropaʼ cosa riʼ.

10. Casi ná Apocalipsis 17:1, 6; 18:24, ¿xiñee chigunitilú Jiobá Babilonia guidxi roʼ?

¹⁰ «Chi guiaba ná gunaa dxaba» (biindaʼ Apocalipsis 17:1, 6; 18:24). Maʼ biʼniʼ biidiʼ Babilonia guidxi roʼ lá Dios. Maʼ bisiidiʼ ni jma cosa ni cadi dxandíʼ de laabe ne nácani casi ti gunaa dxabaʼ, purtiʼ racaneni guiráʼ ca gobiernu nuu lu guidxilayú riʼ. Riquiiñeʼ Babilonia poder ni napa para quiteʼ ca xpinni. Ne maʼ biiti ni stale binni, lade ca binni ni maʼ guti ca nuu ca xpinni Dios (Apoc. 19:2). ¿Ximodo chigunitilú Jiobá Babilonia guidxi roʼ yaʼ?

11. ¿Tuu nga «bestia salvaje color naxiñáʼ rini», ne tu chiguiquiiñeʼ Jiobá para gunitilú Babilonia guidxi roʼ?

¹¹ Zaquiiñeʼ Jiobá «chii cachu» stiʼ «ti bestia salvaje color naxiñáʼ rini» para gunitilú gunaa dxabaʼ riʼ. Bestia salvaje riʼ nga Organización de las Naciones Unidas, ne ca cachu ca nga ca gobiernu ni racaneni. Zucaa Jiobá ca gobiernu riʼ gucaalucaʼ  Babilonia guidxi roʼ. «Zunduuxecaʼ laabe ne zusaanacaʼ laabe xieeládibe» ra gáxhacaʼ laabe guiráʼ ni nápabe ne guiráʼ cosa maʼ bíʼnibe (Apoc. 17:3, 16, TNM). Nagueenda zanitilú Babilonia casi xa ñaca ti dxi si, dede zadxagayaa ca ni racané laabe purtiʼ qué rusaana de guiniʼbe: «Zubaʼ casi reina; cadi viuda diʼ naa ne qué ziuu dxi guunaʼ» (Apoc. 18:7, 8, TNM).

12. ¿Xi qué zudii Jiobá lugar guni ca gobiernu ne xiñee?

¹² Qué zudii Dios lugar gunduuxeʼ ca gobiernu ca xpinni, purtiʼ ruzuubacaʼ stiidxabe ne maʼ bireecaʼ lade religión falsu (Hech. 15:16, 17; Apoc. 18:4). Laaca racané ca xpinni Dios xcaadxi binni para guireecaʼ lade religión falsu. Ne pur nga qué zanaazeʼ guiráʼ guendananá gueeda luguiáʼ ca religión falsu laacaʼ. Peru neca zacá naquiiñeʼ gaca fe stiʼ ca xpinni Dios naguidxi para guni huantarcaʼ.

13. a) ¿Tuu nga Gog? b) Casi ná Ezequiel 38:2, 8, 9, ¿xiñee zucaalú Gog ca xpinni Dios?

¹³ Dxi gucaalú Gog ca xpinni Dios (biindaʼ Ezequiel 38:2, 8, 9). Ora maʼ binitilú guiráʼ religión falsu ni nuu lu Guidxilayú riʼ, ziaana ti religión si, ca xpinni Jiobá. Nga runi guizáʼ zadxiichi Binidxabaʼ. Ne pur nga zaquiiñebe ca demonio stibe para guiniʼcaʼ cosa ni cadi dxandíʼ ne zacá gucaalú ti grupu de guidxi roʼ ca xpinni Jiobá (Apoc. 16:13, 14). Grupu de guidxi roʼ ca nga Gog de guidxi Magog. Ne dxi gucaalúcabe xquidxi Dios la? zuzulú Armagedón (Apoc. 16:16).

14. ¿Xi zudii Gog cuenta?

¹⁴ Zapa Gog confianza stipa stiʼ ca ejércitu ni nuu lu Guidxilayú riʼ (2 Crón. 32:8). Peru laanu zápanu confianza Jiobá, Dios stinu. Ne pur nga zuxidxi ca gobiernu ca laanu. Purtiʼ neca guizáʼ nadipaʼ Babilonia guidxi roʼ, qué nulá ca dios  stiʼ laa de «bestia salvaje» ne de «chii cachu» stiʼ (Apoc. 17:16). Nga runi zaníʼ ique Gog cadi nagana para gunitilú laanu. Cásica ruchii za ti guidxi, zacaca nga ora gucaalú Gog xquidxi Jiobá (Ezeq. 38:16). Peru nagueendaca zudiibe cuenta biábabe lu ti trampa. Cásica bizaaca Faraón ndaaniʼ nisadóʼ Xiñáʼ que, zudii Gog cuenta Jiobá nga cucaalú (Éx. 14:1-4; Ezeq. 38:3, 4, 18, 21-23).

15. ¿Xi chiguni Jesús lu Armagedón?

¹⁵ Zapa Cristu ne ejércitu de ángel stiʼ ca xpinni Dios ne zunduuxecaʼ ca xpinni Gog (Apoc. 19:11, 14, 15). Peru ¿xi chiguizaaca Binidxabaʼ, enemigu stiʼ Jiobá lu Armagedón yaʼ? Zulaa Jesús laabe né ca demonio stibe ndaaniʼ ti abismo, ne racá zadeguyoocabe ti mil iza (Apoc. 20:1-3).

16. a) ¿Xi caquiiñeʼ gúninu para gusihuínninu runibiaʼnu Dios? b) ¿Xi chiguizaaca ca binni ni runibiáʼ Dios lu Armagedón?

¹⁶ Pa deruʼ o maʼ xadxí de nuunu ndaaniʼ xquidxi Jiobá, caquiiñeʼ gusihuínninu runibiaʼnu Dios ne rúninu ni ná «ca noticia galán ni ruzeeteʼ de Señor Jesús» para guilanu lu Armagedón (2 Tes. 1:7-9, TNM). Runibiaʼnu Dios ora nánnanu xi riuulaʼdxiʼ ne xi qué riuulaʼdxiʼ ne gunáʼ nga ca ley stiʼ. Ne rusihuínninu runibiaʼnu laabe purtiʼ nadxiinu laabe, ruzúʼbanu stiidxabe ne laasibe rusisácanu (1 Juan 2:3-5; 5:3). Ora rusihuinni tuuxa runibiáʼ Dios, laaca «runibiáʼ Dios laa» ne zalá dxi gueeda Armagedón (1 Cor. 8:3). ¿Xiñee yaʼ? Purtiʼ ora «runibiáʼ Dios» tuuxa la? riuuláʼdxibe ni runi.

17. ¿Xi caquiiñeʼ gúninu para chinándanu ni ná «ca noticia galán ni ruzeeteʼ de Señor Jesús»?

¹⁷ Lade «ca noticia galán ni ruzeeteʼ de Señor Jesús» zeeda ca ni bisiidibe ne ridxélanu ca ni ndaaniʼ Biblia. Rúninu ni nácani ora rinándanu cani lu xquendanabáninu. Para ganda chinándanu ni bisiidiʼ Jesús la? naquiiñeʼ gúninu ni ná Jiobá primé lu xquendanabáninu, guni  respetarnu ca ley stibe ne guininu de Reinu stibe (Mat. 6:33; 24:14). Ne para gacanenu ca hermanu ungidu la? naquiiñeʼ guni predicarnu ne gacanenu binni gaca discípulo (Mat. 25:31-40).

18. ¿Ximodo zaguu ca ungidu ndaayaʼ ca «xcaadxi dendxu» ni gucané laacaʼ?

¹⁸ Maʼ cadi candaa, zaguu ca ungidu ndaayaʼ ca «xcaadxi dendxu» ni gucané laacaʼ (Juan 10:16). ¿Ximodo chigúnicabe ni yaʼ? Ante guzulú Armagedón, zié 144,000 ungidu guibáʼ, zácacaʼ espíritu ne qué ziuu dxi gáticaʼ. Ziuucabe lade ejércitu ni nuu guibáʼ para gunduuxecabe Gog ne zápacabe guiráʼ ca «binni» nadóʼ o gran muchedumbre ni naca casi dendxuʼ (Apoc. 2:26, 27; 7:9, 10). Ti privilegiu guizáʼ naroʼbaʼ gupa ca binni nadóʼ riʼ, purtiʼ gucanecaʼ ca ungidu dxi bibánicaʼ lu Guidxilayú riʼ.

19, 20. Neca guidxaagalunu guendanagana, ¿xi zacané laanu para cadi guixélenu de Jiobá ante guzulú Armagedón?

¹⁹ Lu ca últimu dxi riʼ, laanu ca xpinni Jiobá cadxaagalunu stale guendanagana. Peru zanda guni huantarnu ne chuʼnu nayecheʼ (Sant. 1:2-4). Ti cosa ni zacané laanu nga cadi gusaana de guni orarnu (Luc. 21:36). Laaca naquiiñeʼ guni estudiarnu Biblia ne guni meditarnu ni guidúʼndanu, casi ca profecía ni cayaca cumplir yanna (Sal. 77:12). Pa gúninu ca ni maʼ bizéʼtenu riʼ, ne guni predicarnu né stale gana la? zaca fe stinu jma naguidxi ne qué zusiáʼndanu esperanza ni nápanu.

²⁰ Bixuiʼlú pabiáʼ nayecheʼ ziuʼnu dxi guinitilú Babilonia guidxi roʼ ne dxi guiluxe Armagedón. Peru ni jma zusiecheʼ laanu nga ora gaca vindicar lá Jiobá ne guihuinni laasibe nápabe derechu para guni mandarbe (Ezeq. 38:23). Ti noticia guizáʼ galán nga ora guzulú Armagedón para ca ni runibiáʼ Jiobá, ca ni ruzuubaʼ stiidxaʼ Xiiñibe ne para cani guni huantar dede ora gueeda fin (Mat. 24:13).