1. Bisiene ximodo ruuyaʼ Jiobá ca binni humilde.

NADXII JIOBÁ ca binni humilde. Ca binni humilde si nga zanda gaca xhamígucaʼ laabe ne zannaxhiibe laacaʼ. Peru qué ridxaagabe ca «binni orgulloso» (Sal. 138:6). Guiranu racaláʼdxinu gúninu ni riuulaʼdxiʼ Jiobá ne guni sentirnu nadxiibe laanu, nga runi risaca guizíʼdinu gácanu humilde.

2. ¿Xi chiguizíʼdinu lu artículo riʼ?

² Lu artículo riʼ chiguicábinu ca pregunta riʼ. Primé, ¿ximodo nga ti binni humilde? Guiropa, ¿xiñee caquiiñeʼ gápanu cualidad riʼ? Ne guionna, ¿pora zanda gaca nagana para laanu gácanu humilde? Laaca zazíʼdinu, rusiéchenu Jiobá ne ribeendunu stale cosa galán ora humilde laanu (Prov. 27:11; Is. 48:17).

3. ¿Ximodo nga ti binni humilde?

³ Gadxé nga ti binni humilde de ti binni orgulloso. Biblia ná, ti binni humilde la? nanna jma risaca Jiobá que laa, ne laaca nanna jma risaca xcaadxi binni que laa (Filip. 2:3, 4).

4, 5. ¿Ñee modo naca binni nga ni rusihuinni pa humilde laa la? Bisiene ni.

⁴ Nuu binni ruluíʼ humilde laa, peru cadi dxandíʼ ni. Zándaca natuicaʼ, nadoʼcaʼ ne runi tratarcaʼ binni né respetu pur cultura sticaʼ o pur modo biniisicaʼ. Peru zándaca pur dentru nabé orgulloso laacaʼ. Ne zedandá  dxi zusihuínnicaʼ tu nácacaʼ (Luc. 6:45).

⁵ Laaca nuu binni cadi natuiʼ, nabé directu modo riníʼ peru cadi orgulloso laa (Juan 1:46, 47). Neca zacá, naquiiñeʼ gápacabe cuidadu para cadi gudxiibacabe laca laacabe. Nga runi, modo tiica si nácanu, naquiiñeʼ gúninu stipa para cadi gusaana de gácanu humilde.

6. ¿Xi rusiidiʼ 1 Corintios 15:10 laanu de Pablo?

⁶ Guidúʼyanu ejemplu stiʼ apóstol Pablo. Biquiiñeʼ Jiobá laabe para guyuu congregación nacubi xcaadxi lugar. Ninruʼ sti apóstol qué ñuni biaʼ biʼniʼ Pablo lu xhiiñaʼ Dios. Neca zacá, qué niníʼ íquebe jma risácabe que xcaadxi hermanu, sínuque gúcabe humilde ne guniʼbe: «Jma huaxiéʼ naa para ca xcaadxi apóstol, ne qué iquiiñe para gabi cabe naa apóstol purti uzaya nanda ca xpinni Dios» (1 Cor. 15:9). Ne despué guniʼbe xhamígube Jiobá purtiʼ guca nachaʼhuiʼ né laabe ne cadi pur ca cualidad stibe o pur ca ni bíʼnibe (biindaʼ 1 Corintios 15:10). Bisihuinni Pablo humilde laa dxi bicaa carta para ca hermanu de Corinto, neca nánnabe caníʼ caadxi de ca hermanu que mal de laabe (2 Cor. 10:10).

7. ¿Ximodo bisihuinni hermanu Karl Klein humilde laa?

⁷ Nabé riuu stale Testigu gana ora ruundacaʼ historia stiʼ hermanu Karl Klein, ni guyuu lu Grupu ni Zániru. Lu historia stibe bisihuínnibe humilde laabe ra guniʼbe ca guendanagana ni bidxaagalube stale iza. Guzéʼtenu caadxi de laacani. Lu iza 1920 yeguni  predicarbe de yoo pur yoo primé biaje, guizáʼ nagana gúcani para laabe ne pur ngue chupa iza bisaana de guni predicarbe. Ne dxi maʼ nuube Betel, guyuu ti tiempu bidxiichinebe ti hermanu purtiʼ bidii laabe caadxi conseju. Ne laaca guca huarabe purtiʼ guizáʼ guca estresarbe, peru despué biándabe. Laaca gúpabe stale asignación guizáʼ galán. ¿Cadi dxandíʼ gupa xidé guca hermanu riʼ humilde para guníʼ ca guendanagana stiʼ la? Stale xpinni Jiobá nabé riuucaʼ gana ora ruundacaʼ historia stiʼ hermanu Karl Klein. *

8. ¿Ximodo racané 1 Pedro 5:6 laanu guiénenu riuulaʼdxiʼ Jiobá gácanu humilde?

⁸ Nabé risaca gácanu humilde purtiʼ riuulaʼdxiʼ Jiobá gácanu zacá, casi bisiene apóstol Pedro ni (biindaʼ 1 Pedro 5:6). Pur ni bisiénebe ca, libru “Ven, sé mi seguidor” ná: «Zeeda gaca orgullo casi ti venenu ni ruuti. Purtiʼ pur laani dede ti binni ni jma nuu xpiaaniʼ reeda gaca casi ti cosa ni qué iquiiñeʼ para Dios. Peru ora humilde tuuxa, neca huaxiéʼ risaca riquiiñeʼ Jiobá laa». Ne laaca ná ni «zaguu Jiobá ndaayaʼ laanu pa gácanu humilde». * Nanna dxíchinu gástiruʼ sti cosa jma galán que gusiéchenu Jiobá (Prov. 23:15).

9. ¿Xiñee riuulaʼdxiʼ binni guidxaaga ca ni naca humilde?

⁹ Ora humilde laanu la? rusiéchenu Jiobá, ribeendunu cosa galán ne laaca riuulaʼdxiʼ xcaadxi binni guidxaaga laanu. Para guiénenu ni la? guiníʼ íquenu tu clase binni riuuláʼdxinu guidxaaganu (Mat. 7:12). Qué riuuláʼdxinu guidxaaganu ca binni ni racalaʼdxiʼ gaca puru si ni ná ne qué rucaadiaga ora gábicabe laacaʼ xiixa. Peru riuuláʼdxinu guidxaaganu ca hermanu ni runi sentir ni cayuni sentir stobi, ni rannaxhii stobi casi familia stiʼ, ni riá xcaadxi ne ni naca humilde (1 Ped. 3:8). Nga runi, pa riuuláʼdxinu guidxaaganu ca binni humilde la? ziuulaʼdxiʼ xcaadxi guidxaagacaʼ laanu pa humilde laanu.

10. ¿Xi xcaadxi cosa ribeendunu ora humilde laanu?

¹⁰ Ora humilde laanu, laaca racaneni laanu gudxiilunu ca guendanagana stinu.  Normal nga gúʼyanu ruluíʼ cadi jneza caadxi cosa. Dede rey Salomón guníʼ: «Huayuuyaʼ mozo dxiʼbaʼ caballu, peru ca príncipe maʼ zecaʼ a pie cásica runi ca mozo» (Ecl. 10:7). Cadi guiráʼ diʼ biaje rusisácacabe ca binni ni napa xiixa habilidad ne nuu biaje jma rusisácacabe ca binni ni huaxiéʼ napa habilidad. Peru biene Salomón ni jma jneza guni binni nga guiaa modo nabani ne cadi guidxiichinu pa qué guiree ca cosa ca modo racaláʼdxinu (Ecl. 6:9). Pa humilde laanu la? qué zaca nagana para laanu guiaʼnu modo nabáninu neca qué guiree ca cosa ca modo racaláʼdxinu.

11. ¿Xiñee naquiiñeʼ gácanu humilde ora gudii tuuxa conseju laanu?

¹¹ Zanda gusihuínninu humilde laanu guiráʼ dxi. Guidúʼyanu pora zanda gusihuínninu ni. Ora rudiicabe conseju laanu. Cadi guiaandaʼ laanu, pa gulee tuuxa tiempu para gudii conseju laanu la? zándaca bíʼnibe ni purtiʼ cadi jneza ni bíninu ne qué nudiʼnu cuenta. Peru zándaca qué zudiʼnu lugar gacanebe laanu, guininu cadi jneza modo guníʼnebe laanu ne dede guininu mal de laabe. Peru pa humilde laanu la? zúninu stipa para guchaʼnu modo laanu.

12. Casi ná Proverbios 27:5, 6, ¿xiñee naquiiñeʼ gudiʼnu xquíxepeʼ tuuxa ora gudii conseju laanu? Bizeeteʼ ti ejemplu.

¹² Ora humilde binni la? rudii xquíxepeʼ ora rudiicabe conseju laa. Guníʼ ique ejemplu riʼ. Bixuiʼlú nuuluʼ ra Yoo stiʼ Reinu caníʼneluʼ xcaadxi hermanu diidxaʼ. Peru tobi de laacabe guleechú lii ne gudxi lii cá ti ndaa guendaró xa láyaluʼ. Neca bituí luluʼ, bidiiluʼ xquíxepeʼ laabe. Peru ñuuláʼdxiluʼ ñabi tuuxa ni lii ante. Ngaca nga laanu, naquiiñeʼ gácanu humilde ne gudiʼnu xquíxepeʼ tuuxa hermanu ora gaca nadxibalú para gudii laanu xiixa conseju ora jma caquiiñenu ni. Cadi gúʼyanu laabe casi enemigu stinu, casi tuuxa ni nanalaʼdxiʼ laanu, sínuque casi ti xhamígunu ni nadxii laanu (biindaʼ Proverbios 27:5, 6; Gál. 4:16).

13. ¿Ximodo rusihuínninu humilde laanu ora ricaa xcaadxi hermanu privilegiu?

¹³ Ora ricaa xcaadxi hermanu privilegiu. Sicaríʼ guníʼ ti ancianu láʼ Jason: «Ora ruuyaʼ rudiicabe privilegiu xcaadxi hermanu, riníʼ iqueʼ xiñee qué nudiicabe  ni naa». ¿Ñee huayuni sentirluʼ zacá la? Cadi malu diʼ nga gúninu stale stipa para gúninu jma lu xhiiñaʼ Jiobá (1 Tim. 3:1). Peru naquiiñeʼ gápanu cuidadu né ca cosa ni riníʼ íquenu, purtiʼ pa qué gúninu ni la? zándaca guicaa xcu orgullo ndaaniʼ ladxidoʼno. Guzéʼtenu ti ejemplu. Zándaca guiníʼ ique ti hermanu laasi zanda guni tender ti asignación ne gúnini jma galán. O zándaca guiníʼ ique ti hermana jma nanna xheelaʼ qué xcaadxi hermanu. Pa dxandíʼ humilde laanu la? qué zaníʼ íquenu zacá.

14. ¿Xi rusiidiʼ ni biʼniʼ Moisés laanu ora ricaa xcaadxi privilegiu?

¹⁴ Guidúʼyanu xi biʼniʼ Moisés dxi gucuaa xcaadxi israelita privilegiu ne xi rizíʼdinu de laani. Gúcabe xaíque stiʼ guidxi Israel ne nabé bisisácabe privilegiu que. Peru ¿ñee bidxiichibe ora bidii Jiobá lugar gacané xcaadxi israelita laabe la? Coʼ (Núm. 11:24-29). Laaca bisihuínnibe humilde laabe ne bidiibe lugar gacané xcaadxi laabe para gaca juzgar guidxi Israel (Éx. 18:13-24). Cumu guyuu stale juez la? jma nagueenda guca tender ca guendanagana stiʼ ca israelita que. Jma bizaalaʼdxiʼ Moisés chuʼ ca israelita que galán que ca privilegiu stiʼ. Bisaana Moisés ti ejemplu galán para laanu. Nga runi, pa racaláʼdxinu iquiiñeʼ Jiobá laanu la? jma risaca gácanu humilde que gápanu stale habilidad. Casi ná Salmo 138:6, «neca risaca Jiobá, rizaalaʼdxiʼ ti binni humilde».

15. ¿Xi maʼ bichaa lu xquendanabani stale hermanu?

¹⁵ Ora ruchaa modo nabáninu. Tiempu riʼ, stale hermanu ni maʼ ziné stale iza de cayuni ni ná Jiobá maʼ bidxaacaʼ de asignación. Guzéʼtenu ti ejemplu. Lu iza 2014, bidxaa stale superintendente  de distrito ne xheelacaʼ de asignación. Ne dede lu iza ca laaca naquiiñeʼ gusaana ca superintendente de circuito asignación sticaʼ dxi gusaacaʼ 70 iza. Ne ca hermanu ni maʼ napa 80 iza o jma, maʼ qué zanda gácacaʼ coordinador de cuerpu de ancianu. Lu ca iza ni maʼ gudiʼdiʼ ca, maʼ biree stale hermanu ni guyuu Betel para gácacaʼ precursor. Nuu xcaadxi maʼ bisaanacaʼ asignación sticaʼ purtiʼ huaracaʼ, pur familia sticaʼ o pur sti cosa.

16. ¿Ximodo maʼ bisihuinni caadxi hermanu humilde laacaʼ?

¹⁶ Raca nagana para stale hermanu ora ridxaacaʼ de asignación. Caadxi de laacabe riuu triste, purtiʼ napa xidé gusaanacabe ti asignación ni maʼ xadxí de cayúnicabe ne ni riuuláʼdxicabe. Peru chaahuidugá riaacabe ni. ¿Xiñee yaʼ? Purtiʼ nadxiicabe Jiobá, ne qué riaandaʼ laacabe maʼ gúdxicabe laa zúnicabe xhiiñaʼ né stale gana ne cadi pur privilegiu nápacabe (Col. 3:23). Cumu humilde laacabe la? riéchecabe gúnicabe ni ná Jiobá ratiica si. Rulaa ca hermanu riʼ ni riguu xizaa laacaʼ luguiabe purtiʼ nánnacaʼ rizaaláʼdxibe laacaʼ (1 Ped. 5:6, 7).

17. ¿Xi runi sentirnu ora rusiidiʼ Stiidxaʼ Dios laanu gácanu humilde?

¹⁷ Riéchenu stale purtiʼ rusiidiʼ Stiidxaʼ Dios laanu gácanu humilde. Ora rácanu humilde ribeendunu ni galán ne laaca racaneni xcaadxi binni. Laaca racané cualidad galán riʼ laanu para gudxiilunu ca guendanagana stinu, peru ni jma risaca nga riuʼnu jma gaxha de Jiobá, Bixhózenu ni nuu guibáʼ. Guizáʼ riéchenu gánnanu neca guizáʼ risaca ne nandxóʼ Jiobá, nadxii ne rizaalaʼdxiʼ ca xpinni ni naca humilde (Is. 57:15).