1. ¿Pora nga jma nagana gúninu ni ná Jehová?

¿PORA nga jma nagana gúninu ni ná Jehová yaʼ? ¿Ora nápanu guendanagana la? ¿Ora gastiʼ cadi cazaacanu la? Ora nápanu guendanagana nagueendaca ruyúbinu gacané Jehová laanu. Peru ¿xi rúninu ora cadi cazaacanu gastiʼ yaʼ? ¿Ñee rábiluʼ zándaca guiaandaʼ laanu pabiáʼ risaca nga gúninu ni ná Dios la? Gudixhená Jehová ca israelita para cadi guizaacacaʼ ni bizéʼtenu riʼ (Deut. 6:10-12).

2. ¿Xi ejemplu galán bisaana rey Asá para laanu?

² Bisaana rey Asá ti ejemplu nabé galán para laanu purtiʼ gudixhe íquebe gápabe confianza Jehová de guidubi ladxidoʼbe. Bíʼnibe ni ná Jehová tiempu gudíʼdibe ra nagana, ne laaca bíʼnibe ni tiempu gúpabe paz. Dede dxi joven «Asá bizuubaʼ stiidxaʼ Jehová de guidubi ladxidóʼ» ne bíʼnibe ni biaʼ dxi bibánibe (1 Rey. 15:14). Bisihuínnibe ni ora guleebe adoración falsu ndaaniʼ guidxi Judá. Biblia ná «guleebe ca altar stiʼ ca dios de sti guidxi ne ca lugar nasoo, binitilube ca poste sagradu ne bisábabe ca pilar sagradu» (2 Crón. 14:3, 5). Dede gúxhabe puestu de reina ni napa jñaabiidabe, Maacá, purtiʼ biʼniʼ ti bidóʼ para guni adorar guidxi que (1 Rey. 15:11-13).

3. ¿Xi zazíʼdinu lu artículo riʼ?

³ Cadi gulee si Asá adoración falsu. Laaca gucanebe ca  binni de Judá guni adorarcaʼ Jehová sti biaje. Guluu Dios ndaayaʼ Asá ne guidxi Judá ra bidiibe laacaʼ ti tiempu de paz. * Dxi cayuni mandarbe, chii iza gúpacabe paz (2 Crón. 14:1, 4, 6). Lu artículo riʼ zazíʼdinu xi biʼniʼ Asá tiempu guyuu paz. Despué zadúʼyanu ejemplu stiʼ ca xpinni Cristu ni bibani lu primé siglu, ca ni biquiiñeʼ tiempu stiʼ jneza cásica biʼniʼ Asá ni. Ne últimu la? zacábinu pregunta riʼ: pa nabézanu ti lugar ra qué rucueezacabe laanu para guni adorarnu Jehová, ¿ximodo zanda iquiiñenu tiempu stinu jneza?

4. Casi ná 2 Crónicas 14:2, 6, 7, ¿xi biʼniʼ Asá tiempu guyuu paz?

⁴ (Biindaʼ 2 Crónicas 14:2, 6, 7). Gudxi Asá guidxi que pur Jehová nga nuu paz «guiráʼ lugar». Peru qué niníʼ íquebe tisi nuu paz maʼ cadi naquiiñeʼ gúnibe gastiʼ. Lugar de nga la? bicuibe guidxi, bizuhuaabe muru, bíʼnibe torre ne puertaʼ. Gúdxibe ca binni de Judá: «Nuuruʼ guidxi riʼ lu nanu». ¿Xi nuube guiniʼbe né ca diidxaʼ riʼ yaʼ? Ni nuube gábibe laacaʼ nga zanda gúnicaʼ dxiiñaʼ lu layú ni maʼ bidii Dios laacaʼ ne gucuicaʼ guidxi sin gucaalú ca enemigu sticaʼ laacaʼ. Ngue runi guluube gana guidxi que iquiiñecaʼ tiempu sticaʼ jneza laga nuu paz.

5. ¿Xiñee biʼniʼ Asá ejércitu stiʼ jma nadipaʼ?

⁵ Laaca biquiiñeʼ Asá tiempu guyuu paz para guni ejércitu stiʼ jma nadipaʼ (2 Crón. 14:8). ¿Ñee bíʼnibe ni purtiʼ qué gápabe confianza Jehová la? Coʼ, nápabe confianza Jehová, peru cumu rey laabe la? nánnabe caquiiñeʼ guni prepararbe guidxi que para ca guendanagana ni guidxaagalúcabe despué. Nánnabe zedandá dxi maʼ  qué zapa guidxi que paz, zaqué guca ni, ne nga peʼ nga ni chiguizíʼdinu.

6. ¿Ximodo biquiiñeʼ ca xpinni Cristu de primé siglu tiempu sticaʼ jneza dxi guyuu paz?

⁶ Neca stale biaje guzanándacabe ca xpinni Cristu de primé siglu la? laaca guyuu ora gúpacaʼ paz. ¿Ximodo biquiiñecaʼ tiempu sticaʼ jneza yaʼ? Gudixhe íquecaʼ guni predicarcaʼ ca noticia galán. Lu relatu ni zeeda lu Hechos ná runi congregación que ni ná «Jehová», ne cumu qué nusaana de ñuni predicarcaʼ la? «bidale ca hermanu que». Rihuinni dxichi guluu Jehová ndaayaʼ laacaʼ purtiʼ bíʼnicabe stipa guni predicárcabe tiempu nuu paz (Hech. 9:26-31).

7, 8. Bisiene xi biʼniʼ Pablo ne xcaadxi xpinni Cristu para biʼniʼ predicarcaʼ.

⁷ Ca discípulo ni bibani lu primé siglu biquiiñecaʼ tiempu sticaʼ jneza para guni predicarcaʼ ca noticia galán. Guzéʼtenu ti ejemplu, gudixhe ique apóstol Pablo guiaana ndaaniʼ guidxi Éfeso ora biʼyaʼ casi ora zuxeleʼ «ti puertaʼ naroʼbaʼ» para guni predicar ne gacané ca binni que gácacaʼ discípulo stiʼ Cristu (1 Cor. 16:8, 9).

⁸ Lu iza 49, dxi bihuinni pa naquiiñeʼ gaca circuncidar binni, biʼniʼ aprovechar Pablo ne xcaadxi xpinni Cristu para biʼniʼ predicarcaʼ (Hech. 15:23-29). Ora gúdxicabe ca congregación xi decisión gucuaacabe la? biʼniʼ ca discípulo que guiráʼ ni nuu lu nacaʼ para guni predicarcaʼ «ca noticia galán de stiidxaʼ Jehová» (Hech. 15:30-35). ¿Xi bizaaca pur ngue yaʼ? Biblia ná «zeʼ dxi jma naguidxi ziyaca fe stiʼ ca congregación que ne zeʼ dxi jmaruʼ si zidálecaʼ» (Hech. 16:4, 5).

9. ¿Xi randa rúninu tiempu riʼ, ne xi pregunta caquiiñeʼ guiníʼ íquenu?

⁹ Tiempu riʼ, stale lugar randa runi predicarnu purtiʼ libre laanu. Pa nabézanu ndaaniʼ ti guidxi ra qué rucueezacabe laanu para guni adorarnu Dios, guiníʼ íquenu ndiʼ: «¿Ñee caquiiñeʼ libertad stinneʼ jneza la?». Lu ca últimu dxi riʼ, dxiiñaʼ jma risaca para organización stiʼ Jehová nga guni predicarnu ne gusíʼdinu binni (Mar. 13:10). ¡Guizáʼ galán ndiʼ purtiʼ laanu, ca xpinni Jehová, nápanu stale dxiiñaʼ ni gúninu!

10. ¿Xi rucaa 2 Timoteo 4:2 laanu gúninu?

¹⁰ Pa nabézanu ti lugar ra nuu paz, ¿xi zanda gúninu para iquiiñenu libertad stinu jneza? (Biindaʼ 2 Timoteo 4:2). Guníʼ ique pa zanda gúniluʼ o zanda guni ti familia stiluʼ jma lu predicación o dede gaca precursor. Tiempu riʼ maʼ cadi naquiiñeʼ guyúbinu gápanu stale bueltu ne stale cosa risaca, purtiʼ zanitilúcani lu gran tribulación (Prov. 11:4; Mat. 6:31-33; 1 Juan 2:15-17).

11. ¿Xi huayuni caadxi publicador para guni predicarcaʼ jma binni?

¹¹ Stale publicador maʼ biziidiʼ sti idioma para guni predicarcaʼ ne gusiidicaʼ jma binni. Para gacané organización stiʼ Jehová laacabe la? rúnicaʼ stale publicación ni biree de lu Biblia lu stale idioma. Guzéʼtenu ti ejemplu, lu iza 2010 nuu publicación lu gaayuʼ gayuaa idioma, peru tiempu riʼ nuu publicación lu jma de ti mil idioma.

12. ¿Xi runi sentir binni ora riniʼnécabe laa de stiidxaʼ Dios lu diidxaʼ gulené? Bizeeteʼ ti ejemplu.

¹² ¿Xi runi sentir binni ora riniʼnécabe laa de stiidxaʼ Dios lu diidxaʼ gulené? Guzéʼtenu ti experiencia. Guyé ti hermana  ti asamblea ni guca Memphis (Tennessee, Estados Unidos) lu diidxaʼ ni gulené, kiniaruanda, riníʼcabe idioma riʼ Ruanda, República Democrática del Congo ne Uganda. Biluxe si asamblea que guniʼbe: «Maʼ raca diecisiete iza de nabezaʼ Estados Unidos, ne ndiʼ nga primé biaje guieneʼ ni riete lu ti asamblea». Rihuinni dxichi ora binadiaga hermana riʼ información que lu stiidxaʼ yendá ni ndaaniʼ ladxidóʼ. Pa ganda gúninu ni, ¿xiñee qué guizíʼdinu sti idioma para gacanenu binni ni nabeza neza ra runi predicarnu? ¿Cadi rábiluʼ ziuulaʼdxiʼ binni gucaadiaga lii pa guiníʼneluʼ laa lu diidxaʼ gulené la? Cadi guiaandaʼ lii, risaca stipa ni gúniluʼ.

13. ¿Ximodo biʼniʼ aprovechar ca hermanu stinu de Rusia tiempu guyuu paz?

¹³ Cadi guiráʼ ca hermanu stinu nápacaʼ libertad para guni predicarcaʼ, purtiʼ nuu lugar rucueeza gobiernu dxiiñaʼ stinu. Ti ejemplu nga ca hermanu stinu de Rusia. Despué de stale iza de guzanándacabe laacaʼ, lu beeu marzo de 1991 guca legalizar obra stinu raqué. Tiempu que, nuu biaʼ dieciséis mil publicador Rusia. Gande iza despué, nuu jma de ti gayuaa sesenta mil publicador. Rihuinni dxichi biʼniʼ aprovechar ca hermanu stinu tiempu sticaʼ jneza. Ne neca cadi xadxí guyuu paz lugar que, dede yanna cayúnicabe ni ná Jehová né stale gana ne cayúnicabe biaʼ gándatiʼ neca rizananda gobiernu laacabe.

14, 15. ¿Ximodo biquiiñeʼ Jehová poder stiʼ para gucané Asá?

¹⁴ Guininu sti biaje de ca dxi bibani Asá. Biluxe paz ni guyuu ndaaniʼ guidxi Israel, purtiʼ bicaalú ti ejércitu etíope ni napa biaʼ ti millón soldadu guidxi  que. Zérah, comandante stícabe, guyuu seguru zuni ganárcabe guidxi Judá. Peru napa Asá confianza Jehová. Ngue runi biʼniʼ rogarbe Jehová: «Gucané laadu, Jehová, Dios stidu, purtiʼ dxandipeʼ nápadu confianza lii ne pur laluʼ nga biúpadu para gucáʼludu guiráʼ binni riʼ» (2 Crón. 14:11).

¹⁵ Neca napa ejércitu etíope doble de soldadu biaʼ napa ejércitu stiʼ Judá la? nanna Asá napa Jehová poder para gacané xquidxi. Ne qué nusaana Jehová laabe. Guizáʼ feu modo biniti ejércitu etíope que (2 Crón. 14:8-13).

16. ¿Xiñee nánnanu zedandá dxi zaluxe tiempu de paz ni nápanu yanna?

¹⁶ Neca qué gánnanu xi peʼ guizaaca cada xpinni Dios la? ni nánnanu nga zedandá dxi zaluxe tiempu de paz ni zándaca nápanu tiempu riʼ. Cadi guiaandaʼ laanu maca guníʼ Jesús «zaca nanalaʼdxiʼ guiráʼ guidxi» ca discípulo stiʼ (Mat. 24:9). Ne zacaca guníʼ apóstol Pablo: «Guiráʼ ca ni racalaʼdxiʼ chuʼ tobi si né Cristu Jesús ne ca ni racalaʼdxiʼ guni adorar Dios, laaca zazanándacabe laacaʼ» (2 Tim. 3:12). Ne cumu «guizáʼ cadxiichi» Binidxabaʼ, cadi naquiiñeʼ guiníʼ íquenu qué zucaalube laanu (Apoc. 12:12).

17. ¿Ximodo zándaca zadiʼdiʼ fe stinu prueba?

¹⁷ Maʼ cadi candaa, zadiʼdiʼ fe stiʼ ca xpinni Cristu prueba. Mayaca tídinu lu «gran tribulación». Ne Biblia ná «dede dxi bizulú guidxilayú hasta nagasi, qué huayuu dxi chuʼ yuubaʼ casi laani» (Mat. 24:21, nota). Tiempu ca, zándaca gucaalú ca familia stinu laanu ne gucueeza gobiernu dxiiñaʼ stinu (Mat. 10:35, 36). Guiníʼ íquenu ndiʼ: «¿Ñee zinandaʼ ejemplu stiʼ Asá ne zapaʼ confianza zacané ne zapa Jehová naa la?».

18. Casi ná Hebreos 10:38, 39, ¿xi zacané laanu chuʼnu listu para ni chiguizaaca?

¹⁸ Racalaʼdxiʼ Jehová chuʼnu listu para ni chiguizaaca, ne pur nga cayacanebe laanu para gaca fe stinu jma naguidxi. Caquiiñebe «mozo ni nuu xpiaaniʼ ne ni runi jneza» para gudii laanu guendaró espiritual ora peʼ caquiiñenu ni ti guzuhuaʼnu dxiichiʼ (Mat. 24:45). Nga runi,  ni caquiiñeʼ gúninu yanna nga guquídxinu fe stinu dede biaʼ gándatiʼ (biindaʼ Hebreos 10:38, 39).

19, 20. Casi ná 1 Crónicas 28:9, ¿xi caquiiñeʼ guinabadiidxanu laanu ne xiñee?

¹⁹ Cásica biʼniʼ rey Asá, laanu laaca naquiiñeʼ guyúbinu Jehová (2 Crón. 14:4; 15:1, 2). Ruzulú ruyúbinu laabe ora runibiaʼnu laabe ne riuʼnísanu. Ne yanna nga iquiiñenu tiempu stinu para gannaxhiinu Jehová jma. Para gánnanu pa cayúninu ni la? guiníʼ íquenu ndiʼ: «¿Ñee runeʼ stipa pur chaaʼ guiráʼ reunión la?». Lu ca reunión riuʼnu gana para gúninu ni ná Jehová ne riuʼnu tobi si né ca hermanu stinu (Mat. 11:28). Laaca zanda guinabadiidxanu ndiʼ laanu: «¿Ñee napaʼ ti buen programa de estudiu personal la?». Pa nabezanenu familia stinu, ¿ñee rúninu adoración en familia guiráʼ semana la? O pa nabézanu stúbinu, ¿ñee ribeenu tiempu para guni estudiarnu cásica runi ca familia ca la? ¿Ñee rúninu stipa pur guni predicarnu ne gusíʼdinu xcaadxi de Jehová la?

²⁰ ¿Xiñee caquiiñeʼ gúninu ca pregunta riʼ laanu yaʼ? Biblia ná ruuyaʼ Jehová xi caníʼ íquenu ne xi nuu ndaaniʼ ladxidoʼno. Nga runi laanu laaca caquiiñeʼ guidúʼyanu cani (biindaʼ 1 Crónicas 28:9). Pa gudiʼnu cuenta caquiiñeʼ guchaʼnu ca meta stinu, actitud stinu o modo riníʼ íquenu, guinábanu Jehová gacané laanu. Yanna nga caquiiñeʼ chuʼnu listu para ca prueba ni chigueeda. Nga runi, pa nabáninu ti tiempu ra nuu paz, iquiiñenu tiempu stinu jneza ne cadi gudiʼnu lugar gastiʼ gucueeza laanu.