Eclesiastés 5:8 nga ti versículo ni rucaa laanu guiníʼ íquenu, purtiʼ ná ni: «Pa gúʼyaluʼ cuquiichiʼ náʼ ti gobernador ca binni pobre xquídxiluʼ ne cadi cayaca justicia ne cadi cayuni respetárcabe derechu stiʼ binni, cadi guidxagayaaluʼ. Purtiʼ nuu ti binni jma risaca cayuuyaʼ ni cayuni funcionariu ca ne despué de laacabe nuu xcaadxi jma risaca».

Para binni, versículo riʼ caníʼ cani de ca binni ni napa autoridad lu gobiernu. Peru laaca cusiidiʼ ni laanu ti cosa nabé risaca de Jehová ni riguixhedxí ladxidoʼno.

Caníʼ Eclesiastés 5:8 de ti gobernante ni runi abusar de ca pobre ne cadi jneza runi justicia. Naquiiñeʼ guietenalaʼdxiʼ hombre ca cayuuyaʼ sti binni ni napa jma autoridad laa. Ne zándaca nuu xcaadxi binni ni napa ti puestu jma risaca que laacabe. Triste guininu ni, peru stale de ca gobernante qué rúnicaʼ ni jneza ne pur nga racaná binni.

Ne ora guiníʼ íquenu maʼ qué zanda gúninu gastiʼ la? ratadxí ladxidoʼno ora gánnanu cayuuyaʼ Jehová ni cayuni ca funcionariu stiʼ gobiernu. Zanda guni rogarnu Dios gacané laanu ne gulaʼnu ni nuanu luguiabe (Sal. 55:22; Filip. 4:6, 7). Nánnanu «cayuuyaʼ chaahuiʼ Jehová lu guidubi guidxilayú ti iquiiñebe stipa stibe para gacanebe ca ni runi ni nabe de guidubi ladxidóʼ» (2 Crón. 16:9).

Nga runi, racané Eclesiastés 5:8 laanu guiénenu siempre nuu ti binni ni jma napa autoridad que stobi lu ca gobiernu ca. Ne ni jma risaca nga rusietenalaʼdxiʼ versículo riʼ laanu Jehová nga autoridad jma risaca ni nuu lu universu. Tiempu riʼ, caquiiñebe Jesucristu, Xiiñibe, ni naca Rey lu Reinu stibe para guni mandarbe. Cayuuyaʼ Dios ni jma napa poder guiráʼ ni cazaaca ne jneza guiráʼ ni runi, ne Xiiñibe laaca zacá laa.