1. ¿Xi meta zanda quixhe íquenu ugaandanu ora maʼ ziniisinu?

ORA maʼ ziniisinu zándaca chuʼnu triste ne guiníʼ íquenu maʼ qué zúninu jma lu xhiiñaʼ Jehová casi bíninu ni dxi nahuiininu. Zándaca maʼ qué gápanu stipa biaʼ gúpanu dxiqué, peru zanda iquiiñenu experiencia stinu ne de cani maʼ bizíʼdinu para gacanenu ca hermanu ni jma nahuiiniʼ gacanecaʼ jma ndaaniʼ xquidxi Jehová ne chuʼcaʼ dispuestu guicaacaʼ jma dxiiñaʼ. Sicaríʼ guníʼ ti hermanu ni maʼ ziné stale iza de naca ancianu: «Dxi bineʼ sentir maʼ huaxiéʼ cosa randa runeʼ purtiʼ maʼ ziniiseʼ guizáʼ biecheʼ purtiʼ nannaʼ nuu hermanu ni jma nahuiiniʼ ni nuu dispuestu guni intiica si dxiiñaʼ».

2. ¿Xi zazíʼdinu lu artículo riʼ?

² Lu artículo gudiʼdiʼ que bizíʼdinu xi zabeendú ca ni nahuiiniʼ pa gaca xhamígucaʼ ca hermanu ni maʼ huaniisi. Ne lu artículo riʼ zazíʼdinu pa gaca ca hermanu ni maʼ huaniisi humilde, gánnacaʼ nuu cosa ni qué zanda gúnicaʼ, gudiicaʼ xquixe peʼ xcaadxi ne gudiicaʼ de ni nápacaʼ la? zacané ni laacaʼ gúnicaʼ dxiiñaʼ né ca ni nahuiiniʼ tobi si ne laaca zacané ni congregación.

3. a) Casi ná Filipenses 2:3, 4, ¿ximodo nga ti binni humilde? b) ¿Ximodo racané cualidad riʼ ca xpinni Cristu?

³ Pa racalaʼdxiʼ ca hermanu ni maʼ huaniisi ca gacanecaʼ ca ni nahuiiniʼ naquiiñeʼ gácacaʼ humilde. Ti binni humilde la? Riníʼ ique jma risaca xcaadxi que laa (biindaʼ Filipenses 2:3, 4). Ca hermanu ni maʼ huaniisi ni naca humilde  nánnacaʼ nuu xcaadxi modo zanda guni cumplir tuuxa xiixa asignación sin gucheené ni ná Biblia. Nga runi, qué ribézacabe guni guirá hermanu xiixa cosa cásica bíʼnicabe ni dxiqué (Ecl. 7:10). Neca nápacabe stale experiencia ni gábicabe xcaadxi hermanu nánnacabe «maʼ cuchaa guiráʼ cosa ni cayaca lu guidxilayú». Nga runi zándaca laaca naquiiñeʼ guchaacabe ne guiziidicabe gúnicabe ca cosa ca de sti modo (1 Cor. 7:31).

4. ¿Ximodo rusihuinni ca superintendente de circuito nácacaʼ casi guca ca levita?

⁴ Ca hermanu ni maʼ huaniisi ni naca humilde riénecaʼ maʼ qué zanda gúnicaʼ biaʼ bíʼnicaʼ lu xhiiñaʼ Jehová dxi nahuiinicaʼ. Casi ca hermanu ni naca superintendente de circuito. Ora rusaacaʼ 70 iza, ridxaa asignación sticaʼ. Zándaca gácani nagana para laacabe purtiʼ riuuláʼdxicabe gacanécabe ca hermanu lu asignación ni nápacabe de superintendente de circuito. Guizáʼ riuuláʼdxicabe asignación stícabe peru nánnacabe jma galán guni tender ti hermanu jma nahuiiniʼ asignación ca. Zeeda gácacabe casi ca levita ni guyuu ndaaniʼ guidxi Israel de dxiqué purtiʼ dxi gusaacaʼ 50 iza naquiiñeʼ gusaana de guni servircaʼ ndaaniʼ tabernáculo que. Cadi pur privilegiu ni gupa ca levita que nga guyuucaʼ nayecheʼ, sínuque purtiʼ bíʼnicaʼ xhiiñacaʼ né stale gana ne gucanecaʼ ca levita ni jma nahuiiniʼ (Núm. 8:25, 26). Tiempu riʼ, stale hermanu ni guca superintendente de  circuito maʼ qué rigánnacaʼ stale congregación, peru guizáʼ riguucabe gana ne racanécabe ca hermanu ni nuu ndaaniʼ congregación ra cayuni servírcabe.

5. ¿Xi rusiidiʼ ejemplu stiʼ Dan ne Katie lii?

⁵ Guzéʼtenu ejemplu stiʼ Dan, bíʼnibe dxiiñaʼ de circuito 23 iza. Dxi bisaabe 70 iza, laabe ne xheelabe Katie guca nombrárcabe precursor especial. ¿Ximodo cayeni laacabe lu asignación nacubi ni gucuaacabe yaʼ? Dan guníʼ, guizáʼ cayuni dxiiñaʼ ndaaniʼ congregación, cayacanebe ca hermanu gácacaʼ siervu ministerial ne cusiidibe xcaadxi para guni predicarcaʼ ca lugar ra ridiʼdiʼ stale binni ne ndaaniʼ cárcel. Hermanu ni maʼ huaniisicaʼ, pa nuutu lu serviciu de tiempu completu o coʼ, zanda gacanetu xcaadxi, ¿ximodo zanda gúnitu ni yaʼ? Ra gánnatu nuu cosa ni maʼ qué zanda gúnitu, quíxhetu meta ne guicá íquetu ca cosa ni zanda gúnitu.

6. ¿Xiñee nabé risaca guiénenu nuu cosa ni qué zanda gúninu? Bizeeteʼ ti ejemplu.

⁶ Naquiiñeʼ gánnanu nuu cosa ni qué zanda gúninu (Prov. 11:2). Ne tuuxa ni naca zacá la? nabani nayecheʼ ne qué rusaana de guni dxiiñaʼ. Zanda guchaaganu ti binni zacá né tuuxa ni zigusá carru ne ziguiʼbaʼ ti lugar ra nasoo, para ganda quíbabe la? naquiiñeʼ cuʼbe ti cambiu ne chebe chaahuiʼ. Zacaca nga ti binni ni nanna nuu cosa ni qué zanda guni, nánnabe pora naquiiñeʼ casi ñaca cuʼbe ti cambiu para chebe jma chaahuiʼ ne zacá gúnirube xhiiñaʼ Jehová ne gacanebe xcaadxi (Filip. 4:5).

7. ¿Ximodo bisihuinni Barzilái nanna nuu cosa ni maʼ qué zanda guni?

⁷ Guzéʼtenu ejemplu stiʼ Barzilái, napa hombre riʼ 80 iza dxi gudxi rey David laa pa zuni dxiiñaʼ ndaaniʼ palaciu stiʼ. Gunna hombre riʼ nuu cosa ni maʼ qué zanda guni, ngue runi maʼ qué nicaabe invitación stiʼ rey riʼ. Gunna Barzilái maʼ huaniisi ne nuu caadxi cosa ni maʼ qué zanda guni, ngue runi guniʼbe mejor cheʼ Kimham, ti hombre ni jma nahuiiniʼ lugar stibe (2 Sam. 19:35-37). Cásica Barzilái, ca hermanu ni maʼ huaniisi laaca riéchecaʼ ora rudiicaʼ lugar xcaadxi hermanu ni jma nahuiiniʼ guni tendercaʼ xiixa dxiiñaʼ.

8. ¿Ximodo bisihuinni David nanna nuu cosa ni maʼ qué zanda guni ora gucalaʼdxiʼ nucuí ti templu?

⁸ Laaca bisaana rey David ti ejemplu nabé galán purtiʼ gunna nuu cosa ni qué zanda guni. Guizáʼ gucaláʼdxibe nucuibe ti yoo galán para Jehová, peru ora gudxi Jehová laabe Salomón chigucuini la? qué nidxiichibe ne gucanebe Salomón chuʼ listu para gucuí yoo que (1 Crón. 17:4; 22:5). Qué niníʼ ique diʼ David laa nga nucuí templu que purtiʼ nahuiiniruʼ Salomón ne qué gapa experiencia (1 Crón. 29:1). Nanna David para ganda cuí yoo que la? naquiiñeʼ cuʼ ndaayaʼ Jehová dxiiñaʼ que ne cadi purtiʼ nahuiiniʼ o qué gapa binni ni chigucuí yoo ca experiencia. Cásica David, ca xpinni Cristu ni maʼ huaniisi cayúnirucaʼ xhiiñaʼ Jehová neca maʼ bichaa ca privilegiu ni nápacaʼ ne laaca nánnacabe zaguu Jehová ndaayaʼ ca hermanu ni nahuiiniʼ ni cayuni ca dxiiñaʼ ni bíʼnicabe dxiqué.

9. ¿Ximodo bisihuinni ti hermanu ni nuu lu Comité stiʼ Sucursal nanna nuu cosa ni qué zanda guni?

⁹ Guidúʼyanu yanna ximodo bisihuinni ti hermanu láʼ Shigeo, nanna nuu cosa ni maʼ qué zanda guni. Lu iza 1976, dxi nápabe 30 iza, biʼniʼ nombrárcabe laabe  miembru stiʼ Comité stiʼ Sucursal. Ne lu iza 2004, beeda gácabe coordinador stiʼ comité que. Gudiʼdiʼ si tiempu, bidiibe cuenta maʼ qué gápabe stipa casi dxiqué ne maʼ nanene rúnibe xhiiñabe. Ngue runi gúdxibe Jehová xi cazaacabe ne guníʼ íquebe xiñee jma galán ti hermanu jma nahuiiniʼ guni dxiiñaʼ ni cayúnibe que. Tiempu riʼ, maʼ cadi coordinador laabe, peru nácarube parte de Comité stiʼ Sucursal ne cayúnirube dxiiñaʼ né xcaadxi hermanu ni nuu luni. Ejemplu stiʼ Barzilái, rey David ne Shigeo rusiidini laanu ora naca ti binni humilde ne nanna nuu cosa ni qué zanda guni, qué riníʼ ique huaxiéʼ experiencia napa ca hermanu ni jma nahuiiniʼ, sínuque riníʼ ique zanda gúnicabe intiica dxiiñaʼ guicaacabe. Ne zuuyacabe laaca casi compañeru stícabe ne cadi casi tuuxa ni racalaʼdxiʼ tidiʼ lúcabe (Prov. 20:29).

10. ¿Ximodo ruuyaʼ ca hermanu huaniisi ca hermanu ni jma nahuiiniʼ ni nuu ndaaniʼ congregación?

¹⁰ Ruuyaʼ ca hermanu ni maʼ huaniisi ca ni jma nahuiiniʼ casi ti regalu ni zeeda de Jehová ne rudiicaʼ xquixe peʼ pur ni rúnicabe. Cumu maʼ zirá stipa stícabe la? Nga runi, riéchecabe nuu hermanu nahuiiniʼ ni daʼ gana ne ni racalaʼdxiʼ gacané ndaaniʼ congregación.

11. ¿Ximodo rusihuinni ni ná Rut 4:13-16 ribeendú ca hermanu ni maʼ huaniisi ni galán ora rudiicaʼ lugar gacané ca ni jma nahuiiniʼ laacaʼ?

¹¹ Lu Biblia zeeda ejemplu galán casi stiʼ Noemí, purtiʼ neca maʼ huaniisi peru bidii xquixe ne bidii lugar gacané ti binni ni nahuiiniʼ laa. Despué de guti xiiñiʼ Noemí, gúdxibe xuaalídxibe, Rut, guibiguetaʼ ra nuu familia stiʼ peru qué niná Rut nusaana laabe, ngue runi bidii Noemí lugar chinebe laa Belén  (Rut 1:7, 8, 18). Ne nabé gucané ni guirópacabe (biindaʼ Rut 4:13-16). Ca hermanu ni maʼ huaniisi ni naca humilde rinándacaʼ ejemplu stiʼ Noemí.

12. ¿Ximodo bisihuinni apóstol Pablo rudii xquixe peʼ ca hermanu stiʼ?

¹² Laaca bisaana apóstol Pablo ti ejemplu galán. Purtiʼ bidii xquixe peʼ pur gucanécabe laa. Ti biaje bidiibe xquixe peʼ ca xpinni Cristu de Filipos purtiʼ biseendacaʼ xiixa para gacanecaʼ laabe (Filip. 4:16). Laaca bidiibe xquixe peʼ Timoteo pur gucané laabe (Filip. 2:19-22). Ne bidiibe xquixe peʼ Dios pur biseendaʼ ca hermanu para cuʼcaʼ gana laabe dxi zebe Roma para guieguyoobe (Hech. 28:15). Guca Pablo ti hombre ni runi dxiiñaʼ ne biʼniʼ viajar stale kilómetru para guni predicar ne cuʼ gana ca congregación. Peru qué ñácabe ti binni orgulloso, sínuque bidiibe lugar gacané ca hermanu stibe laabe.

13. ¿Ximodo rusihuinni ca hermanu ni maʼ huaniisi rusisácacaʼ guiráʼ dxiiñaʼ ni runi ca ni jma nahuiiniʼ?

¹³ Hermanu ni maʼ huaniisicaʼ, stale modo zanda gusihuínnitu rusisácatu dxiiñaʼ ni runi ca hermanu ni jma nahuiiniʼ ni nuu ndaaniʼ congregación stitu. Lagudii lugar gacanécabe laatu, pa gábicabe laatu chisícabe cosa stitu o pa gacanécabe laatu gaca xcaadxi cosa, laguuyaʼ ni casi ñaca Jehová nga cayacané laatu. Zándaca racá guzulú gaca xhamígutu ca hermanu ni jma nahuiiniʼ. Ne laguizaalaʼdxiʼ gacanetu ca hermanu ni jma nahuiiniʼ chuʼcaʼ gaxha de Jehová. Lagabi laacabe guizáʼ riéchetu purtiʼ guizáʼ cayúnicabe stipa gacanécabe jma ndaaniʼ congregación. Ne lacuee tiempu para laacabe ne laguiniʼné laacabe ca experiencia stitu. Ora gúnitu ni la? zusihuínnitu rudiitu xquixe peʼ Jehová pur ca hermanu ni nahuiiniʼ ni nuu ndaaniʼ congregación (Col. 3:15; Juan 6:44; 1 Tes. 5:18).

14. ¿Ximodo bisihuinni rey David riuulaʼdxiʼ gudii de ni napa?

¹⁴ Bisihuinni rey David ti cualidad nabé risaca ni naquiiñeʼ gapa ca xpinni Cristu. Laani nga gudiicaʼ de ni nápacaʼ. Bidiibe stale cosa risaca ni nápabe para gacanebe cuí templu stiʼ Jehová (1 Crón. 22:11-16; 29:3, 4). Ne bíʼnibe ni neca nánnabe zaníʼ binni Salomón nga bicuí templu que. Pa maʼ huaniisiluʼ ne maʼ qué gápaluʼ stipa para gúniluʼ dxiiñaʼ lu construcción zándaruʼ gacaneluʼ ca hermanu ni jma nahuiiniʼ ra gudiiluʼ donación biaʼ zanda ne guniʼné ca ni jma nahuiiniʼ guiráʼ experiencia ni huayápaluʼ biaʼ dxi nabániluʼ.

15. ¿Xi guiráʼ cosa risaca bisiidiʼ Pablo Timoteo?

¹⁵ Laaca bisihuinni apóstol Pablo riuulaʼdxiʼ gudii de ni napa. Biʼniʼ invitar Pablo Timoteo chiné laa lu ca viaje ni biʼniʼ dxi biʼniʼ predicar ne bisiidiʼ laabe modo runi predicar ne modo rusiidiʼ (Hech. 16:1-3). Gucané guiráʼ ni bisiidiʼ Pablo Timoteo para gaca ti maestru ni nanna gusiidiʼ de Dios (1 Cor. 4:17). Ne biquiiñeʼ Timoteo guiráʼ ni bisiidiʼ Pablo laa para gusiidiʼ xcaadxi.

16. ¿Xiñee bisiidiʼ Shigeo xcaadxi hermanu?

¹⁶ Qué riníʼ ique ca hermanu ni maʼ huaniisi maʼ qué zaquiiñecaʼ ndaaniʼ xquidxi Jehová pa gusiidicaʼ ca hermanu ni jma nahuiiniʼ guni ca dxiiñaʼ ni bíʼnicaʼ dxiqué ndaaniʼ congregación. Guininu ni biʼniʼ Shigeo, hermanu ni bizéʼtenu lu párrafo gaʼ, laa xadxí bisiidiʼ ca hermanu ni jma nahuiiniʼ ni nuu lu Comité stiʼ Sucursal. Bíʼnibe ni para gacanebe dxiiñaʼ stiʼ Reinu ndaaniʼ guidxi ra cayuni servirbe. Ngue  runi ora bisaanabe dxiiñaʼ de coordinador que la? maʼ nuu ti hermanu ni bisiidibe ni zanda guni dxiiñaʼ ni bíʼnibe que. Riníʼneruʼ Shigeo ca hermanu ni jma nahuiiniʼ guiráʼ experiencia ni huayapa lu jma de 45 iza de nuu lu Comité stiʼ Sucursal. Naca ca hermanu casi Shigeo ti ndaayaʼ ndaaniʼ xquidxi Dios.

17. ¿Xi zanda guni ca hermanu ni maʼ huaniisi pur xcaadxi? (Lucas 6:38).

¹⁷ Hermanu ni maʼ huaniisicaʼ, rusihuínnitu zabáninu galán pa gúninu ni ná Jehová ne gápanu fe laa. Ejemplu stitu rusihuinni nabé risaca gunibiaʼnu ca conseju zeeda lu Biblia ne gúninu ca ni lu xquendanabáninu. Nánnatu ximodo guca caadxi dxiiñaʼ ndaaniʼ xquidxi Jehová dxiqué, peru laaca nánnatu naquiiñeʼ guchaatu modo rúnitu ca dxiiñaʼ ca tiempu riʼ, ne pa nuu de laatu deruʼ guyuunisa, laaca zanda gacanetu xcaadxi. Zanda gábitu xcaadxi hermanu xiñee riéchetu binibiaʼtu Jehová neca maʼ huaniisitu. Guizáʼ ziecheʼ ca ni nahuiiniʼ gucaadiaga ca experiencia stitu ne guiráʼ ca ni maʼ biziiditu. Pa nápaluʼ costumbre de guiníʼneluʼ xcaadxi de ca experiencia stiluʼ, guizáʼ zaguu Jehová ndaayaʼ lii (biindaʼ Lucas 6:38).

18. ¿Ximodo zanda gacanesaa ca hermanu ni maʼ huaniisi ne ca ni nahuiiniʼ?

¹⁸ Ora guidxiña ca hermanu ni maʼ huaniisi ca hermanu ni nahuiiniʼ zanda gacanésaacaʼ (Rom. 1:12). Cada tobi zanda gacané stobi. Ca hermanu ni maʼ huaniisi nánnacaʼ stale ne nápacaʼ experiencia pur ca iza ni huabánicaʼ, ne ca ni nahuiiniʼ la? nápacaʼ stipa ne daʼcaʼ gana. Ora runi ca hermanu ni nahuiiniʼ né ca ni huaniisi dxiiñaʼ juntu, rusisácacaʼ Bixhózenu ni nuu guibáʼ ne nácacaʼ ti ndaayaʼ para congregación.