1. Ora raca expulsar tuuxa, ¿ximodo runi sentir familia stiʼ?

ORA raca expulsar tuuxa de ndaaniʼ congregación, nánnanu guizáʼ racaná ladxidóʼ familia stiʼ. Ti hermana láʼ Hilda * guníʼ: «Despué de 41 iza de bichaganayaʼ, guti xheelaʼ ne qué nusaanabe Jehová. Naa rabeʼ ngue nga yuubaʼ ni jma naná gudideʼ. Peru jma gucaná ladxiduáʼ ora bisaana xiiñeʼ congregación, xheelaʼ ne ca xiiñiʼ».

2, 3. Casi ná Salmo 78:40, 41, ¿ximodo runi sentir Jehová ora rusaana ca xpinni laa?

² Guiníʼ íquenu pabiáʼ gucaná ladxidóʼ Jehová dxi bidxiideche stale ángel stiʼ laa, familia ndaʼ stibe laacaʼ (Jud. 6). Ne ¿ñee riníʼ íquenu pabiáʼ gucaná ladxidoʼbe dxi bicheené ca israelita laabe stale biaje, laandacaʼ nácacaʼ guidxi ni nabé nadxiibe la? (Biindaʼ Salmo 78:40, 41). Pa guixeleʼ ti binni ni nadxiiluʼ de Jehová. Cadi guiaandaʼ lii laaca racaná ladxidóʼ Bixhózenu ni nuu guibáʼ. Nánnabe xi yuubaʼ cayuni sentirluʼ, riabe lii stale ne zacanebe lii ra gudiibe lii stipa ni caquiiñeluʼ.

³ Lu artículo riʼ zadúʼyanu xi zanda gúninu para gacané Jehová laanu ora gaca expulsar ti binni ni nadxiinu. Ne laaca zadúʼyanu ximodo zanda gacanenu ca hermanu ni nuu ndaaniʼ congregación stinu ni cadiʼdiʼ lu guendanagana riʼ. Peru primeru la? guidúʼyanu gunáʼ nga caadxi cosa ni cadi naquiiñeʼ guiníʼ íquenu.

4. ¿Ximodo runi sentir stale hermanu ora rusaana xiiñicaʼ Jehová?

⁴ Ora rusaana xiiñiʼ ca hermanu Jehová, stale de laacaʼ riníʼ íquecaʼ xi biaadxaʼ ñúnicaʼ para ñacanecaʼ xiiñicaʼ cadi nixeleʼ de Jehová. Despué de guca expulsar xiiñiʼ ti hermanu láʼ Luke guníʼ: «Guníʼ iqueʼ napaʼ donda ne dede guníʼ xcaandaʼ  cosa feu. Guyuu biaje biinaʼ ne guizáʼ gucaná ladxiduáʼ». Ne ti hermana láʼ Elizabeth ni laaca guca expulsar xiiñiʼ guníʼ: «Guníʼ iqueʼ zándaca cadi jneza modo bisiniiseʼ xiiñeʼ ne biaadxaruʼ ñacaniaʼ laabe ñánnaxhiibe Jehová».

5. ¿Tu napa donda pa guixeleʼ ti binni de Jehová?

⁵ Cadi guiaandaʼ laanu, guiranu rudii Jehová lugar laanu guicaanu decisión stinu. Nga runi cada tobi de laanu zanda cuí pa zúninu ni nabe o coʼ. Nuu caadxi joven qué nusiidiʼ bixhózecaʼ ne jñaacaʼ laacaʼ de Jehová peru maʼ gudixhe íquecaʼ gúnicaʼ ni nabe ne qué huasaanacaʼ laabe. Ne xcaadxi la? biʼniʼ bixhózecaʼ ne jñaacaʼ stipa pur gusiidicaʼ laacaʼ de Jehová peru ora biniisicaʼ, bisaanacaʼ Jehová. Cada tobi de laanu nga naquiiñeʼ cuí pa zuni ni ná Jehová o pa coʼ (Jos. 24:15). Nga runi, pa maʼ bixeleʼ xiiñiluʼ de Jehová cadi ugaaniluʼ donda íqueluʼ.

6. ¿Ximodo zándaca guni sentir tuuxa ora guixeleʼ bixhoze o jñaa de Dios?

⁶ Nuu biaje la? bixhoze o jñaa binni nga rusaana Jehová ne nuu tu laa rixeleʼ de familia stiʼ (Sal. 27:10). Guizáʼ runiná ndiʼ xiiñiʼ binni purtiʼ ruuyacaʼ bixhózecaʼ ne jñaacaʼ casi ti ejemplu. Sicaríʼ biʼniʼ sentir ti hermana láʼ Esther dxi guca expulsar bixhoze, laa guníʼ: «Guizáʼ biinaʼ purtiʼ cadi chaahuiʼ chaahuiʼ bixélebe de Jehová, sínuque laapebe guniʼbe maʼ qué zácabe xpinni Jehová. Guizáʼ nadxieeʼ bixhozeʼ, nga runi dxi guca expulsarbe guizáʼ gucuá iqueʼ laabe. Dede guyuu biaje guizáʼ bidxibeʼ».

7. ¿Xi runi sentir Jehová pur ca joven ni maʼ guca expulsar bixhoze o jñaa?

⁷ Joven caʼ, pa maʼ guca expulsar bixhózetu o jñaatu, nánnadu xi cayuni sentirtu. Ne cadi guiaandaʼ laatu nanna Jehová xi cayuni sentirtu, nadxiibe laatu ne guizáʼ riéchebe purtiʼ cadi cusaanatu laabe. Ne zacaca runi sentir ca hermanu ne hermana ni nuu ndaaniʼ congregación stitu. Ne cadi guiaandaʼ laatu qué gápatu donda pur ca decisión ni guicaa bixhózetu o jñaatu. Casi maʼ bizéʼtenu que, rudii Jehová lugar cuinu pa zúninu ni ná. Ne cada tobi de ca xpinni Dios ni maʼ guca dedicar ne maʼ guyuunisa «zuáʼ carga de responsabilidad stiʼ» (Gál. 6:5, nota).

8. ¿Xi zanda guni ca hermanu laga cabézacaʼ guibiguetaʼ familia sticaʼ ndaaniʼ xquidxi Jehová? (Laaca zanda gúʼyaluʼ cuadru ni láʼ « Racalaʼdxiʼ Jehová guibiguétaluʼ»).

⁸ Ora rusaana ti binni ni nadxiinu Jehová normal nga guiníʼ íquenu ziuu ti dxi zabiguétabe ndaaniʼ xquidxi Jehová. ¿Xi zanda gúniluʼ laga cabézaluʼ guedandá dxi ca yaʼ? Cadi gusaana de guquídxiluʼ fe stiluʼ. Pa gúniluʼ ni, zudiiluʼ ti ejemplu galán ca familia stiluʼ dede zándaca né binni ni guca expulsar ca. Ne zacaneni lii para cadi chuʼluʼ triste. Guidúʼyanu caadxi cosa ni zanda gúniluʼ para guquídxiluʼ fe stiluʼ.

9. ¿Xi zacané lii gaca fe stiluʼ naguidxi? (Biiyaʼ cuadru ni láʼ « Ca textu ni zaguu gana lii pa maʼ bixeleʼ ti familia stiluʼ de Jehová»).

⁹ Biʼniʼ cosa ni zanda guquidxi fe stiluʼ. Nabé risaca chuʼluʼ gaxha de Jehová ne gaxha de familia stiluʼ. ¿Ximodo zanda  gúniluʼ ni yaʼ? Ni zacané lii para gaca fe stiluʼ naguidxi nga cadi gusaana de gúʼndaluʼ Stiidxaʼ Dios, guiníʼ íqueluʼ ni cayuundaluʼ ne cadi guiaadxaluʼ reunión. Guiníʼ íquenu ni bizaaca Joanna. Bixeleʼ bixhózebe ne béndabe de xquidxi Jehová. Sicaríʼ guniʼbe: «Ratadxí ladxiduáʼ ora ruundaʼ de ca binni ni riete lu Biblia casi Abigaíl, Ester, Job, José ne Jesús. Racané ejemplu stícabe naa para guiníʼ iqueʼ cosa ni cuʼ gana naa ne ni quixhedxí ladxiduáʼ. Laaca guizáʼ riuaaʼ gana ora rucaadiaʼgaʼ ca canción ni zeeda lu JW Broadcasting».

10. Casi ná Salmo 32:6-8, ¿xi zanda gúninu pa guizáʼ nuunu xizaa?

¹⁰ Gudxi Jehová xi naguu xizaa lii. Ora nuuluʼ xizaa cadi gusaanaluʼ de guni orarluʼ. Gunabaʼ Jehová, Dios ni nadxii laanu, gacané lii gúʼyaluʼ guendanagana stiluʼ ca modo ruuyabe ca ni, gánnaluʼ xi gúniluʼ ne cadi guixéleluʼ de lu neza stibe (biindaʼ Salmo 32:6-8). Normal nga gaca nagana para lii gábiluʼ laabe xi cayuni sentirluʼ. Peru cadi gusiaandaluʼ ndiʼ, riene Jehová lii, guizáʼ nadxiibe lii ne cayabibe lii gábiluʼ laabe ximodo cayuni sentirluʼ (Éx. 34:6; Sal. 62:7, 8). 

11. Casi ná Hebreos 12:11, ¿xiñee naquiiñeʼ guni respetarnu ora guni disciplinar Jehová tuuxa? (Biiyaʼ cuadru ni láʼ « Ora raca expulsar tuuxa rusihuínnini nadxii Jehová binni»).

¹¹ Biʼniʼ respetar decisión ni guicaa ca ancianu. Ora raca expulsar tuuxa raca ni para gacanécabe binni ni bichee ca ne para gacaneni guiráʼ hermanu (biindaʼ Hebreos 12:11). Zándaca nuu tu guiníʼ cadi jneza biʼniʼ ca ancianu ra biʼniʼ expulsarcaʼ tuuxa binni, peru cadi guiaandaʼ lii qué ganna diʼ binni ca xi guiráʼ bizaaca. Ne laaca qué gánnanu xi guiráʼ bizaaca. Nga runi, ni jma jneza nga chinándanu decisión ni gucuaa ca ancianu ni guyuu lu comité  judicial ca purtiʼ yenándacaʼ ca principiu ni zeeda lu Biblia ne biʼniʼ juzgarcaʼ para Jehová (2 Crón. 19:6).

12. ¿Xi huabeendú caadxi hermanu pur biʼniʼ respetarcaʼ disciplina stiʼ Jehová?

¹² Pa guni respetarnu decisión ni gucuaa ca ancianu de guni expulsarcaʼ ti familia stinu la? zanda gacanenu binni ni guca expulsar ca guibiguetaʼ ra nuu Jehová. Sicaríʼ guníʼ Elizabeth, hermana ni bizéʼtenu lu párrafo tapa que: «Neca maʼ huaniisi xiiñeʼ guca nagana para naa cadi lica guidxaagaʼ laabe. Ne ora biguétabe ndaaniʼ xquidxi Jehová, guniʼbe biaʼsi ngue guca expulsarbe. Ne gudiʼdiʼ si tiempu gúdxibe laadu biziidibe stale cosa nabé risaca. Ngue gucané naa gusisacaʼ ne guneʼ respetar disciplina ni rudii Jehová». Ne xheelabe ni láʼ Mark guníʼ: «Caadxi iza despué, gudxi xiiñidu laadu gudixhe ique guibiguetaʼ ndaaniʼ xquidxi Jehová purtiʼ bínidu ni naquiiñeʼ gúnidu ra qué nidxaagadu laa. Guizáʼ rudieeʼ xquixe peʼ Jehová purtiʼ gucané laadu guzúʼbadu stiidxaʼ».

13. ¿Xi zacané lii para cadi chuʼluʼ triste?

¹³ Guniʼné ca xhamíguluʼ ni guiene ni cayuni sentirluʼ. Guyuu gaxha de ca hermanu ne hermana ni napa experiencia ni zanda gacané lii guiníʼ íqueluʼ cosa ni cuʼ gana lii (Prov. 12:25; 17:17). Joanna, hermana ni bizéʼtenu lu párrafo gaʼ que guníʼ: «Bineʼ sentir stubeʼ, peru ni gucané naa nga guinieniaʼ ca xhamiguaʼ ni napaʼ confianza». Yanna, ¿xi zanda gúniluʼ pa gabi ti hermanu o ti hermana lii xiixa ni cuee gana lii yaʼ?

14. ¿Xiñee naquiiñeʼ guni huantarsaanu ne guni perdonarnu de guidubi ladxidoʼno?

¹⁴ Gupa paciencia ca hermanu. Ziuu ora zuchee ca hermanu ora gábicaʼ laanu xiixa (Sant. 3:2). Guiranu rucheʼnu, nga runi cadi naquiiñeʼ guidxagayaanu pa qué guidxela tuuxa xi gabi laanu o chuʼ tuuxa guiníʼ xiixa ni guniná laanu. Naquiiñeʼ chinándanu conseju bidii apóstol Pablo ni ná: «Laguni huantarsaa ne laguni perdonar de guidubi ladxidoʼto ni guni stobi laatu» (Col. 3:13). Sicaríʼ guníʼ ti hermana ni guca expulsar familia stiʼ: «Huayacané Jehová naa guneʼ perdonar ca hermanu ni gucalaʼdxiʼ niguu gana naa peru qué ñúnicaʼ ni». Guidúʼyanu yanna xi zanda guni ca hermanu de congregación para gacanecaʼ ca hermanu ni guca expulsar ti familia stiʼ.

15. ¿Ximodo zanda gacanenu ca hermanu ni cadi tan xadxí de guca expulsar familia stiʼ?

¹⁵ Gácanu nachaʼhuiʼ né ca hermanu ni guca expulsar familia stiʼ. Ti hermana láʼ Míriam guníʼ bidxibi cheʼ reunión despué de guca expulsar bizaʼnaʼ. Sicaríʼ guniʼbe: «Bidxibeʼ xi guiníʼ xcaadxi. Peru laaca guyuu caadxi xhamiguaʼ de congregación ni guyuu triste ne qué niniʼcaʼ mal de bizanaʼ. Pur gucanécabe naa qué ñuneʼ sentir stubeʼ». Ne sti hermana guníʼ sicaríʼ: «Dxi guca expulsar xiiñidu, beeda caadxi hermanu ra lidxeʼ ne gudixhedxicaʼ  ladxidoʼdo. Nuu de laacaʼ guniʼcaʼ qué guidxélacaʼ xi gábicaʼ laadu. Biinanécabe naa ne nuu tu laa bicaa caadxi diidxaʼ para naa. Guizáʼ gucané ngue naa».

16. ¿Ximodo ruʼ zanda gacané ca hermanu de congregación ca hermanu ni guca expulsar familia stiʼ?

¹⁶ Cadi gusaana de gacanenu ca hermanu ni guca expulsar familia stiʼ. Yanna nga jma naquiiñeʼ gusihuínninu nadxiinu laacabe (Heb. 10:24, 25). Ca hermanu ni guca expulsar ti familia stiʼ nuu biaje ruuyacaʼ maʼ qué riná ca hermanu de congregación guidxaaga laacaʼ, casi ñaca laaca guca expulsárcabe. ¡Qué chuʼ dxi gúninu nga! Naquiiñeʼ cuʼnu gana ne guni felicitarnu ca joven ni guca expulsar bixhoze o jñaa. Ti hermana láʼ María guníʼ xi guca dxi guca expulsar xheelaʼ ne bisaana laacabe: «Beeda caadxi de ca xhamiguaʼ ra lidxeʼ bíʼnicaʼ guendaró para laadu ne gucanecaʼ naa guneʼ estudiarniaʼ ca xiiñeʼ. Laaca gucanácabe cásica cayacanaʼyaʼ ne biinanécabe naa. Ne ora guníʼ binni cosa ni cadi dxandíʼ de naa la? biʼniʼ defendércabe naa. Guizáʼ guluucabe gana naa» (Rom. 12:13, 15).

17. ¿Xi zanda guni ca ancianu para quixhedxicaʼ ladxidóʼ ca hermanu ni cayacaná?

¹⁷ Ancianu caʼ, lagacané ca hermanu ni guca expulsar familia stiʼ iguidxi fe sticaʼ. Laatu nga jma naquiiñeʼ quixhedxitu ladxidóʼ ca hermanu ni maʼ bixeleʼ familia stiʼ de Jehová (1 Tes. 5:14). Laquixhe ique cuʼtu gana laacabe ante ne despué de reunión. Lachiganna laacabe ne laguni orar pur laacabe. Laaca zanda guni predicárnetu laacabe o guni invitartu laacabe lu adoración en familia stitu. Naquiiñeʼ guiaʼ, gannaxhii ne gacané ca ancianu ca dendxuhuiiniʼ stiʼ Jehová ni cayacaná (1 Tes. 2:7, 8).

18. Casi riete lu 2 Pedro 3:9, ¿xi racalaʼdxiʼ Jehová guni ca binni ni maʼ bixeleʼ de laa?

¹⁸ Qué racalaʼdxiʼ Jehová «guinitilú nin tobi, ni racaláʼdxibe nga gaca arrepentir guiráʼ binni» (biindaʼ 2 Pedro 3:9). Neca guni cometer binni ti pecadu grave  risácaruʼ xquendanabánibe para Dios. Cadi guiaandaʼ lii nabé naroʼbaʼ ni gudixe Jehová pur cada tobi de laanu: bidiibe xquendanabani Xiiñibe ni nadxiibe pur laanu. Né guendarannaxhii cayacané Jehová ca binni ni maʼ bisaana laa guibiguétacaʼ ra nuube. Ne racaláʼdxibe guibiguétacaʼ ra nuube casi riete ni lu parábola ni guníʼ Jesús stiʼ hijo pródigo (Luc. 15:11-32). Stale de ca ni bisaana xquidxi Jehová maʼ biguétacaʼ ra nuube ne galán modo huadxaagalú ca hermanu de congregación laacaʼ. Guizáʼ nayecheʼ guyuu Elizabeth, hermana ni maca bizéʼtenu ante que, dxi biguetaʼ xiiñiʼ ndaaniʼ xquidxi Jehová. Laa guníʼ: «Guizáʼ rudieeʼ xquixe peʼ ca hermanu ni gucané laadu para cadi guireʼdu gana».

19. ¿Xiñee zanda gápanu confianza Jehová?

¹⁹ Siempre zanda gápanu confianza Jehová. Qué ziuu dxi guinábabe laanu xiixa ni guniná laanu. Laabe nga Bixhózenu riabe ne nadxiibe ca ni nadxii laabe ne ni runi adorar laabe. Cadi guiaandaʼ ndiʼ laanu, qué ziuu dxi gusaana Jehová laanu ora cadídinu ra jma nagana (Heb. 13:5, 6). Mark, hermanu ni bizéʼtenu lu párrafo 12 que guníʼ: «Qué lica nusaana Jehová laadu. Ne qué nixélebe de laadu ora gudídidu ra jma nagana». Jma nadipaʼ poder stiʼ Dios que intiica cosa ne zudiibe ni laanu (2 Cor. 4:7). Nga runi, zanda gaca fe stinu naguidxi ne cadi guireʼnu gana neca guixeleʼ ti familia stinu de Jehová.