1. Casi riete lu Malaquías 3:16, ¿xi libru cucaa Jehová, ne xi zeeda luni?

 MAʼ STALE iza ziné Jehová cucaa lu ti libru lá stale binni. Abel nga primé ni gucuá lá purtiʼ laa nga primé ni biʼniʼ ni ná Dios (Luc. 11:50, 51). b Ne ra zidiʼdiʼ iza, maʼ bicaa Jehová lá millón de binni lu libru ca. Lu Biblia, gadxé gadxé modo riete lá libru riʼ, laaca ni nga: «ti libru para guietenaláʼdxibe», «libru de guendanabani» ne «rollo de guendanabani». Lu artículo riʼ zaninu «libru de guendanabani» (biindaʼ Malaquías 3:16; Apoc. 3:5; 17:8).

2. ¿Tu lá maʼ cá lu libru de guendanabani, ne xi caquiiñeʼ gúninu para guicá lanu lu libru ca?

² Nabé risaca libru riʼ purtiʼ luni cá lá guiráʼ ca ni runi adorar Jehová né stale respetu ne nadxiicaʼ labe. Nápacaʼ esperanza guibánicaʼ sin qué chuʼ dxi gáticaʼ, guibáʼ o lu Guidxilayú riʼ. Zanda guicá lanu lu libru ca, pa gúninu stipa gaca xhamígunu Jehová ra gápanu fe lu sacrificiu stiʼ Xiiñiʼ, Jesucristu (Juan 3:16, 36). ¿Cadi dxandíʼ guiranu racaláʼdxinu guicá lanu lu libru ca la?

3, 4. a) Pa maʼ cá lanu lu libru de guendanabani, ¿ñee riníʼ nga zabáninu sin qué chuʼ dxi gátinu la? b) ¿Xi zadúʼyanu lu artículo riʼ ne lu stobi ca?

 ³ Yanna, pa cá lanu lu libru de guendanabani ca, ¿ñee riníʼ nga zacaanu guendanabani ni qué zaluxe la? Zadxélanu respuesta ca lu Éxodo 32:33, sicaríʼ gudxi Jehová Moisés: «Zuxhiayaʼ lá ca ni maʼ bicheené naa lu libru stinneʼ». Ndiʼ riníʼ zanda guixiá lá ca ni maʼ cá lá lu libru ca; casi xa ñaca nucaa Jehová lácabe né lápiz (Apoc. 3:5). Nga runi caquiiñeʼ gúninu stipa cadi guixiá lanu lu libru ca dede maʼ ora gucaa Jehová ni né tinta ni qué rixiá.

⁴ Zándaca guiníʼ íquenu ca pregunta riʼ, ¿xi ruzeeteʼ Biblia de ca ni maʼ cá lá lu libru de guendanabani ne ca ni cadi cá lá lu libru ca? ¿Padxí guicaa ca ni cá lá lu libru ca guendanabani ni qué zaluxe? ¿Xi guizaaca de ca binni ni guti ne qué ñunibiáʼ Jehová yaʼ? ¿Ñee cá lácabe lu libru ca la? Zacábinu ca pregunta ca lu artículo riʼ ne lu stobi ca.

¿TUU NGA CA NI MAʼ CÁ LÁ LU LIBRU RIʼ?

5, 6. a) Casi ná Filipenses 4:3, ¿tuu nga ca ni maʼ cá lá lu libru de guendanabani? b) ¿Pora nga maʼ qué zaxiá lácabe lu libru ca?

⁵ ¿Tuu nga ca ni maʼ cá lá lu libru simbólicu riʼ yaʼ? Para guicábinu pregunta riʼ, zaninu de gaayuʼ grupu de binni. Nuu grupu maʼ cá lacaʼ lu libru de guendanabani, ne xcaadxi, coʼ.

⁶ Primé grupu ca nga ca ungidu ni chiguni mandarné Cristu guibáʼ. ¿Maʼ cá lácabe lu libru de guendanabani ca la? Maʼ. Pur ca diidxaʼ ni gudxi apóstol Pablo ca ni biʼniné dxiiñaʼ de Filipos, maʼ cá lá ca xpinni Cristu ungidu lu libru de guendanabani (biindaʼ Filipenses 4:3). Peru para cadi guixiáʼ lácabe  lu libru riʼ, cadi naquiiñeʼ gucheenécabe Jehová. Ne ante gáticabe o ante guzulú gran tribulación, zacaacabe últimu sellu, ne óraca maʼ qué zaxiá diʼ lácabe lu libru ca (Apoc. 7:3).

7. ¿Ximodo racané Apocalipsis 7:16, 17 laanu gánnanu pora maʼ qué zaxiá lá grupu stiʼ gran muchedumbre lu libru de guendanabani?

⁷ Guiropa grupu ca nga stale binni o gran muchedumbre. ¿Ñee maʼ cá lácabe lu libru de guendanabani ca la? Maʼ. Ne qué zaxiá diʼ lácabe despué de Armagedón (Apoc. 7:14). Jesús guníʼ naca ca binni riʼ casi dendxuʼ ne zápacaʼ «guendanabani ni qué zaluxe» (Mat. 25:46). Peru ca ni guilá lu Armagedón cadi maca zicaacaʼ guendanabani ni qué zaluxe. Zanda guininu cá lácabe lu libru de guendanabani ca né lápiz. Ora maʼ guni mandar Jesús ti mil iza, laa peʼ ziné laacabe «ra cadá nisa de guendanabani». Ca ni chinanda instrucción stiʼ Cristu ne qué gucheenecaʼ Jehová, maʼ qué zaxiá lacaʼ lu libru de guendanabani ca (biindaʼ Apocalipsis 7:16, 17).

8. ¿Tuu nga ca ni cadi cá lá lu libru de guendanabani, ne xi zazaacacaʼ?

⁸ Guionna grupu riʼ nga ca chiva, ni chiguinitilú lu Armagedón. Cadi cá diʼ lacaʼ lu libru de guendanabani. Jesús guníʼ zanitilucaʼ «ne maʼ qué ziuuruʼ dxi guibánicaʼ» (Mat. 25:46). Ne gucané espíritu santu Pablo para guníʼ «condena ni guicaacabe nga guinitilúcabe para siempre» (2 Tes. 1:9; 2 Ped. 2:9). Nga ca nga ca binni ni laa peʼ huacheené espíritu santu. Laaca zanitilucaʼ para siempre ne qué zacaacaʼ guendanabani ni qué zaluxe. Ndiʼ rusiidiʼ laanu maʼ qué ziásacabe de lade gueʼtuʼ (Mat. 12:32; Mar. 3:28, 29; Heb. 6:4-6). Yanna la? guininu de chupa grupu ni ziasa para guibani lu Guidxilayú.

CA NI ZIASA DE LADE GUEʼTUʼ

9. ¿Xi chupa grupu ziasa para guibani lu Guidxilayú riʼ, ne xiñee maʼ gadxé cada grupu? (Hechos 24:15).

⁹ Biblia ruzeeteʼ de chupa grupu de binni ni ziasa de lade gueʼtuʼ ne zápacaʼ oportunidad de guibánicaʼ sin qué chuʼ gáticaʼ lu Guidxilayú, guiropaʼ grupu riʼ nga: «ca ni biʼniʼ ni jneza ne ca ni qué ñuni ni jneza» (biindaʼ Hechos 24:15). «Ca ni biʼniʼ ni jneza» nga ca ni biʼniʼ ni ná Jehová biaʼ dxi bibánicaʼ. Ne «ca ni qué ñuni ni jneza» nga ca binni ni qué ñuni ni ná Jehová ante gáticaʼ. Ne zándaca dxi bibánicabe qué lica ninándacabe ca ley stiʼ Dios. Cumu ziasa guiropaʼ grupu riʼ de lade gueʼtuʼ, ¿ñee riníʼ nga maʼ cá lácabe lu libru de guendanabani la? Para guicábinu pregunta riʼ, guidúʼyanu xcaadxi cosa de cada grupu.

10. ¿Xiñee ziasa «ca ni biʼniʼ ni jneza», ne xi privilegiu zapa caadxi de laacabe? (Laaca zanda gúʼyaluʼ artículo ni zeeda lu revista riʼ «Ni rinabadiidxaʼ ca ni ruundaʼ» ni caníʼ de ora guiasa binni de lade gueʼtuʼ lu Guidxilayú riʼ).

¹⁰ Guidapa grupu ca nga «ca ni biʼniʼ ni jneza». Ante gáticabe maʼ cá lácabe lu libru de guendanabani. ¿Ñee bixiá lácabe ora gúticabe la? Coʼ, purtiʼ nuurucabe ndaaniʼ xquendabiaaniʼ Jehová. Biblia ná: «Cadi Dios stiʼ ca ni maʼ guti laabe, sínuque Dios stiʼ ca ni nabani, purtiʼ para laabe guiracaʼ nabánicaʼ» (Luc. 20:38). Ndiʼ riníʼ ora guiasa ca ni biʼniʼ ni jneza de lade gueʼtuʼ, caruʼ lacaʼ lu libru de guendanabani. Peru zanda guininu  né lápiz nga cá lácabe (Luc. 14:14). Zándaca caadxi de ca ni guiasa de lade gueʼtuʼ zápacaʼ privilegiu de gácacaʼ príncipe lu guidubi Guidxilayú (Sal. 45:16).

11. ¿Xi caquiiñeʼ guiziidiʼ ca binni «ni qué ñuni ni jneza» para ganda guicá lacaʼ lu libru de guendanabani?

¹¹ Últimu la? guininu de «ca ni qué ñuni ni jneza», né laacabe nga rizaa gaayuʼ grupu riʼ. Zándaca cumu qué ñunibiáʼcabe ca ley stiʼ Jehová, bíʼnicabe cosa ni cadi jneza ante gáticabe. Nga runi cadi cá diʼ lácabe lu libru de guendanabani. Peru ora guindisaʼ Dios laacabe de lade gueʼtuʼ zudii laacabe oportunidad de guicá lácabe lu libru ca ra tidiʼ tiempu. Zaquiiñeʼ grupu riʼ tu gacané laa. Nuu de laacaʼ ante gáticaʼ, bíʼnicaʼ cosa guizáʼ feu. Nga runi naquiiñeʼ guiziidicabe guibánicabe modo ná ca ley stiʼ Jehová. Para ganda gaca ndiʼ, zaguixhe chaahuiʼ Reinu stiʼ Dios ti programa ni zaca lu guidubi Guidxilayú para ganda guiziidicabe de Dios.

12. a) ¿Tuu nga ca ni chigusiidiʼ ca binni ni qué ñuni ni jneza? b) ¿Xi zazaaca ca binni ni qué náʼ guni ni caziidiʼ?

¹² ¿Tu chigusiidiʼ ca binni ni qué ñuni ni jneza yaʼ? Ca ni nuu lu gran muchedumbre ne ca binni ni biʼniʼ ni jneza ni guiasa de lade gueʼtuʼ. ¿Xi caquiiñeʼ guni ca binni ni qué ñuni ni jneza pa racaláʼdxicaʼ guicá lacaʼ lu libru de guendanabani ca yaʼ? Naquiiñeʼ gaca xhamígucaʼ Jehová ne guni dedicarcaʼ xquendanabánicaʼ laabe. Ora maʼ naca Jesús ne ca ungidu juez, zuuyacaʼ pa cayuni grupu riʼ ni caziidiʼ (Apoc. 20:4). Pa chuʼ tuuxa qué náʼ gacanécabe laa, maʼ qué zabani neca gapa ti gayuaa iza (Is. 65:20). Randa ruuyaʼ Jehová ne Jesús xi nuu ndaaniʼ ladxidóʼ binni, ne zuuyacabe cadi chuʼ binni ni guni cosa malu  ndaaniʼ guidxilayú cubi ca (Is. 11:9; 60:18; 65:25; Juan 2:25).

ZIASA BINNI PARA GUIBANI NE ZIASA BINNI PARA GACA JUZGAR

13, 14. a) ¿Ximodo biénenu dxiqué ca diidxaʼ ni guníʼ Jesús ni zeeda lu Juan 5:29? b) ¿Xi naquiiñeʼ guiene chaahuinu ora guidúʼndanu ca diidxaʼ ca?

¹³ Laaca guníʼ Jesús de ca ni chiguiasa lu Guidxilayú riʼ. Laabe guniʼbe: «Zedandá dxi zunadiaga guiráʼ ca ni nuu ndaaniʼ baʼ voz stibe ne zareecaʼ. Ziasa ca ni biʼniʼ ni jneza para guibánicaʼ ne ziasa ca ni biʼniʼ cosa malu para gaca juzgarcaʼ» (Juan 5:28, 29). ¿Xii nga gucalaʼdxiʼ Jesús niníʼ yaʼ?

¹⁴ Dxiqué biʼniʼ crenu caníʼ Jesús de ca cosa ni guni ca binni riʼ despué de guiásaca de lade gueʼtuʼ. Ndiʼ riníʼ, despué de guiasa ca ni maʼ guti, nuu tu laa zuni cosa ni jneza, peru xcaadxi zuni cosa malu. Peru qué niníʼ diʼ Jesús ca ni guiree ndaaniʼ baʼ zúnicaʼ cosa ni jneza o zúnicaʼ cosa malu. Laabe guniʼbe de cosa ni maʼ guca, purtiʼ guniʼbe «ca ni biʼniʼ ni jneza» ne «ca ni biʼniʼ cosa malu». Ndiʼ riníʼ caniʼbe de ca cosa ni bíʼnicaʼ ante gáticaʼ. Ne biaʼsi ni purtiʼ ndaaniʼ guidxilayú cubi ca maʼ qué zudii Jehová lugar chuʼ tuuxa ni guni cosa malu. Ante gatiʼ ca binni ni qué runi ni jneza nga bíʼnicaʼ ca cosa malu ca. Yanna, ¿xii ndiʼ nuu Jesús guiníʼ ora bizeeteʼ ziasa binni «para guibánicaʼ» ne ziasa binni «para gaca juzgarcaʼ» yaʼ?

15. ¿Tuu ndiʼ ziasa para guicaa guendanabani, ne xiñee?

¹⁵ Ca binni ni biʼniʼ ni jneza ante gatiʼ, ziásacaʼ «para guibánicaʼ» purtiʼ maʼ cá lacaʼ lu libru de guendanabani. Ndiʼ riníʼ ora riete lu Juan 5:29 «ziasa ca ni biʼniʼ ni jneza», laaca laa ni nga ni riete lu Hechos 24:15 «ziasa ca ni biʼniʼ ni jneza». Ne laaca zanda guchaaganu ni né ni ná Romanos 6:7: «Ni maʼ guti la? maʼ guca perdonar ca pecadu stiʼ». Ora rati ca binni ni biʼniʼ ni jneza, rixiá ca pecadu sticaʼ, peru qué rusiaandaʼ Jehová guiráʼ ni bíʼnicabe pur laa (Heb. 6:10). Peru ora guiasa ca binni ni biʼniʼ ni jneza, napa xidé guzuubarucaʼ stiidxaʼ Dios para cadi guixiá lacaʼ de lu libru de guendanabani.

16. ¿Ximodo nga guiasa binni para gaca juzgar?

¹⁶ Yanna, ¿xi guizaaca de ca binni ni biʼniʼ cosa malu ante gatiʼ yaʼ? Neca ora gúticabe bixiá ca pecadu stícabe, peru qué ñúnicabe ni ná Jehová tiempu bibánicabe. Ne cadi cá diʼ lácabe lu libru de guendanabani. Nga runi ora riete «ziasa ca ni biʼniʼ cosa malu» laca laani nga ni riete lu Hechos 24:15 ra ná ziasa «ca ni qué ñuni ni jneza». Ne ziásacabe «para gaca juzgárcabe». c Ziasa ca ni biʼniʼ ni cadi jneza, peru zuni juzgar Jesús laacabe ra guʼyaʼ pa dxandíʼ cayúnicabe ni caziidicabe (Luc. 22:30). Zadiʼdiʼ tiempu para guihuinni tu naquiiñeʼ guicá lá lu libru de guendanabani. Para gaca nga la? ca binni ni qué ñuni ni jneza napa xidé gusaanacaʼ modo gúcacaʼ dxiqué ne gaca dedicarcaʼ Jehová.

17, 18. ¿Xi zuni ca binni ni guiasa de lade gueʼtuʼ lu Guidxilayú, ne xii nga ca cosa ni bíʼnicabe ni riete lu Apocalipsis 20:12, 13?

 ¹⁷ Ca binni ni biʼniʼ ni jneza ne ca ni qué ñuni ni jneza dxiqué ni guiasa de lade gueʼtuʼ, napa xidé chinándacaʼ ca ley stiʼ ca rollo nacubi ni zaxeleʼ lu ti mil iza. Sicaríʼ bicaa apóstol Juan ni biʼyaʼ lu ti visión: «Biiyaʼ zuhuaa ca gueʼtuʼ —ca ni huaniisi ne ca ni nahuiiniʼ— nezalú trono que, ne bixeleʼ caadxi rollo. Peru bixeleʼ sti rollo: laani nga rollo de guendanabani. Ne guca juzgar ca gueʼtuʼ que pur ni bíʼnicaʼ, según ni cá lu ca rollo que» (Apoc. 20:12, 13).

¹⁸ ¿Xi «pur» chigaca juzgar ca binni ni guiasa de lade gueʼtuʼ? ¿Ñee pur ca cosa ni bíʼnicabe ante gáticabe la? Coʼ. Cadi guiaandaʼ laanu bixiá pecadu stícabe dxi gúticabe. Nga runi ca diidxaʼ «pur ni bíʼnicaʼ», cadi caníʼ diʼ ni ca cosa ni bíʼnicabe ante gáticabe, sínuque ca cosa ni gúnicabe ora guiziidicabe ndaaniʼ guidxilayú cubi ca. Dede ca xpinni Dios ni bibani dxiqué ni bizuubaʼ diidxaʼ casi Noé, Samuel, David ne Daniel napa xidé guiziidicaʼ de Jesucristu ne gápacaʼ fe lu sacrificiu stibe. ¡Jmaruʼ si naquiiñeʼ guni ca ni qué ñuni ni jneza ni!

19. ¿Xi zazaaca ca binni ni qué naʼ guiziidiʼ?

¹⁹ ¿Xi zazaaca ca binni ni qué naʼ guiziidiʼ yaʼ? Apocalipsis 20:15 ná sicaríʼ: «Ne bilaacabe guiráʼ ni cadi cá lá lu libru de guendanabani ndaaniʼ lago de bele». Zacá ni, zanitilúcabe ne maʼ qué ziuuruʼ dxi guibánicabe. Nga runi, nabé risaca gúninu stipa guicá lanu lu libru de guendanabani ne cadi guixiá ni.

20. ¿Xi dxiiñaʼ chigaca ora maʼ guni mandar Jesús ti mil iza? (Biiyaʼ dibuju ni zeeda lu portada).

²⁰ Ora guni mandar Cristu ti mil iza, zaca ni ti tiempu guizáʼ galán. Ziuu ti programa lu guidubi Guidxilayú para guiziidiʼ binni de Dios. Laaca zaca ni ti tiempu ra guʼyaʼ Jesús conducta stiʼ ca ni biʼniʼ ni jneza ne ca ni qué ñuni ni jneza (Is. 26:9; Hech. 17:31). ¿Ximodo nga chiguiziidiʼ binni de Dios tiempu ca yaʼ? Lu sti artículo ca zadúʼyanu ni ne zacané ni laanu gusisácanu ni.