1. ¿Ximodo nga ti binni ni zanda gapa xcaadxi confianza laa?

 TI BINNI ni zanda gápacabe confianza runi stipa guni cumplir ni maʼ bidii stiidxaʼ ne qué rusiguii (Sal. 15:4). Nanna xcaadxi zanda gápacaʼ confianza laabe. Racaláʼdxinu guʼyaʼ ca hermanu stinu laanu zacá. Yanna, ¿xi zacané laanu para gápacabe confianza laanu yaʼ?

2. ¿Ximodo zanda gusihuínninu nácanu binni ni zanda gapa xcaadxi confianza?

² Qué zanda gucaʼnu xcaadxi gapa confianza laanu, naquiiñeʼ guni ganarnu ni. Zeeda gácani casi bueltu, nagana para gaca ganar ni peru nagueenda riniti ni. Jehová nga ni jma nápanu confianza. Ne siempre zanda gápanu confianza laabe pur guiráʼ ni rúnibe (Sal. 33:4). Ne ribézabe chinándanu ejemplu stibe (Efes. 5:1). Lu artículo riʼ, zazíʼdinu de caadxi xpinni Jehová ni yenanda ejemplu stibe ne bisihuínnicaʼ zanda gapa binni confianza laacaʼ. Laaca zaninu de gaayuʼ cualidad ni zacané laanu gácanu binni ni zanda gapa xcaadxi confianza.

3, 4. a) ¿Ximodo bisihuinni Daniel naca ti binni de confianza? b) ¿Xi naquiiñeʼ guinabadiidxanu?

³ Bisaana profeta Daniel ti ejemplu galán para laanu. Dxi yenécabe laabe de esclavu Babilonia, nin cadi xadxí de yendabe raqué gunna binni nácabe tuuxa de confianza. Ne jmaruʼ si gunna binni zacá ni dxi gucané Jehová laabe guiniʼbe xi raca significar ca bacaandaʼ gupa rey  Nabucodonosor. Ti biaje bidiibe rey Nabucodonosor ti mensaje nabé nadipaʼ, laani nga maʼ cadi cayuulaʼdxiʼ Jehová ni cayuni. Guca Daniel nadxibalú purtiʼ guizáʼ naduxhuʼ Nabucodonosor (Dan. 2:12; 4:20-22, 25). Gudiʼdiʼ si stale iza biguetaʼ Daniel bisihuinni naca ti binni de confianza dxi guníʼ xi raca significar mensaje ni bihuinni guriá palaciu stiʼ Babilonia (Dan. 5:5, 25-29). Despué Darío ne ca hombre ni runi dxiiñaʼ ra palaciu stiʼ bidiicaʼ cuenta naca Daniel ti hombre nachaʼhuiʼ. Biiyacabe nácabe ti binni de confianza, ni runi dxiiñaʼ ne ni qué ribaʼnaʼ (Dan. 6:3, 4). Dede ca gobernante ni qué runi adorar Jehová bidiicaʼ cuenta zanda gápacaʼ confianza xpinni Jehová riʼ.

⁴ Rucaa ejemplu stiʼ Daniel laanu guiníʼ íquenu ndiʼ: «¿Xi riníʼ ique binni ni cadi naca Testigu de naa? ¿Ñee ruuyacabe naa casi ti binni de confianza ne ni runi cumplir dxiiñaʼ stiʼ la?». Nabé risaca gúninu ca pregunta riʼ, purtiʼ ora gusihuínninu nácanu binni de confianza rusisácanu Jehová.

5. ¿Xiñee binibiáʼ binni Hananías casi ti hombre de confianza?

⁵ Lu iza 455 ante de ca dxi stiʼ Jesús, biluxe guca chaahuiʼ si ca muru stiʼ Jerusalén, gulí gobernador Nehemías caadxi hombre de confianza para gápacaʼ guidxi que. Tobi de laacabe nga Hananías, laa guca encargadu stiʼ lugar ra riaana ca soldadu. Biblia ná guca Hananías  ti hombre ni guizáʼ gúpacabe confianza ne bidxíbibe Dios ni dxandíʼ jma que xcaadxi (Neh. 7:2). Cumu nadxii Hananías Jehová ne ridxibi guniná laabe la? Ngue bicaa laa guni cumplir dxiiñaʼ ni gucuaa. Ne laaca ca cualidad riʼ nga racané ca xpinni Dios gácacaʼ binni de confianza.

6. ¿Ximodo bisihuinni Tíquico zanda gapa apóstol Pablo confianza laa?

⁶ Guidúʼyanu ejemplu stiʼ Tíquico, tobi de ca compañeru stiʼ Pablo ni guizáʼ gúpabe confianza. Dxi deguyoo Pablo ra lidxi, gucané Tíquico laabe ne guniʼbe naca tobi ni «qué rusaana de guni xhiiñaʼ Señor» (Efes. 6:21, 22). Cadi gúpasibe confianza laa para chiné caadxi carta ni bicaabe para ca hermanu de Éfeso ne Colosas, sínuque laaca para cuʼ gana ne quixhedxí ladxidóʼ ca hermanu que. Cásica Tíquico tiempu riʼ nuu stale hermanu ni zanda gápanu confianza purtiʼ rudiicaʼ laanu ni caquiiñenu para chuʼnu gaxha de Jehová (Col. 4:7-9).

7. ¿Xi ejemplu galán rudii ca ancianu ne ca siervu ministerial de congregación stinu laanu?

⁷ Tiempu riʼ, guizáʼ rusisácanu dxiiñaʼ runi ca ancianu ne ca siervu ministerial, purtiʼ nácacaʼ hermanu de confianza. Cásica Daniel, Hananías ne Tíquico, rúnicabe xhiiñacabe jneza. Guzéʼtenu ti ejemplu, ora riuunu reunión ni raca ndaaniʼ semana nánnanu maca nexheʼ tu laa gutiidiʼ cada ndaa stiʼ programa ca. Rudii ca ancianu ca xquixe peʼ ora gaca preparar ca hermanu ca jneza ne gutiidicaʼ asignación sticaʼ. Ne ora guni invitarnu ca estudiante stinu reunión ni raca fin de semana, qué riníʼ íquenu pa bidxélacabe tu gudii discursu públicu. Laaca nánnanu zápanu ca publicación ni caquiiñenu. Rudiʼnu quixe peʼ Jehová purtiʼ rapa ca hermanu riʼ laanu. Peru ¿ximodo zanda gusihuínninu zanda gápacabe confianza laanu yaʼ?

8. ¿Ximodo rusihuínninu dxandíʼ rizaláʼdxinu xcaadxi? (Proverbios 11:13).

⁸ Nadxiinu ca hermanu ne ca hermana stinu ne riuʼnu xizaa pur laacaʼ. Peru naquiiñeʼ chuʼnu cuidadu cadi chuʼnu lu xpídacabe. Ndaaniʼ ca congregación ni guyuu lu primé siglu que guyuu binni nabé chismoso, riuucaʼ lu xpida binni ne riniʼcaʼ cosa ni cadi naquiiñeʼ guiniʼcaʼ (1 Tim. 5:13). Nánnanu qué racaláʼdxinu gácanu clase binni ca. Guxuíʼlunu gudxi tuuxa laanu xiixa peru cadi para sanu guininu ni. Guzéʼtenu ti ejemplu, zándaca gudxi ti hermana laanu napa xiixa guendahuará o cadiʼdiʼ lu sti prueba, ne gunábabe laanu cadi gábinu ni guirutiʼ. Naquiiñeʼ guni respetarnu ni gunábabe laanu (biindaʼ Proverbios 11:13). b ¿Pora ruʼ cadi naquiiñeʼ guininu ni gábicabe laanu?

9. ¿Ximodo zanda gusihuinni ca ni nuu ndaaniʼ ti familia nácacaʼ binni de confianza?

⁹ Ni rizaaca ndaaniʼ familia. Guiranu cadi naquiiñeʼ guininu ni rizaaca ndaaniʼ familia stinu. Guzéʼtenu ti ejemplu, zándaca runi xheelaʼ ti hermanu xiixa cosa ni rucaa laa guxidxi. Cumu nadxii hermanu riʼ xheelaʼ qué zusituí lube ne qué zazá zaníʼ ni rúnibe (Efes. 5:33). Cadi naquiiñeʼ guiaandaʼ ca padre riuulaʼdxiʼ  ca xiiñicabe ni naca adolescente guni tratárcabe laacaʼ né respetu. Nga runi, qué zuzituícabe lucaʼ ora guiníʼcabe xiixa cosa cadi jneza rúnicaʼ nezalú stiʼ binni (Col. 3:21). Ne ca xcuidi naquiiñeʼ chuʼcaʼ cuidadu cadi guiniʼcaʼ cosa ni gusituí lú familia sticaʼ (Deut. 5:16). Pa guiráʼ guni stipa cadi guiníʼ cosa ni bizaaca ndaaniʼ familia stiʼ, ziuu familia ca tobi si.

10. ¿Xi runi ti binni ni dxandíʼ xhamígunu? (Proverbios 17:17).

¹⁰ Ni gabi ca xhamígunu laanu. Guiranu riuuláʼdxinu gápanu ti xhamígunu ni gábinu laa xi cazaacanu. Nuu biaje raca ni nagana. Purtiʼ zándaca cadi biaʼnu gábinu tuuxa xi nuu ndaaniʼ ladxidoʼno. Ne pa bíninu ni ne despué gúnnanu canazá xhamígunu ca cananiʼ ni gúdxinu laa, zándaca chuʼnu triste pur nga. Peru guizáʼ riéchenu gápanu ti xhamígunu ni qué guiníʼ ni gábinu laa. ¡Laa huaxa nga «ni dxandíʼ xhamígunu»! (biindaʼ Proverbios 17:17).

11. a) ¿Ximodo rusihuinni ca ancianu ne xheelacaʼ nácacaʼ binni de confianza? b) ¿Xi rizíʼdinu de ti ancianu ni runi tratar ti asuntu confidencial ndaaniʼ congregación ne despué nuu né familia stiʼ? (Biiyaʼ foto).

¹¹ Ni rizaaca ndaaniʼ congregación. Ca ancianu ni nanna gapaʼ ti asuntu confidencial «zeeda gácacaʼ casi ti lugar ra zanda chuʼ binni ora cundubi bi» (Is. 32:2). Nánnanu zanda gábinu laacabe intiica cosa ni cazaacanu purtiʼ nápanu confianza qué zazácabe zaníʼcabe ni. Ne qué zucaʼnu laacabe gábicabe laanu cosa ni qué zanda guiníʼcabe. Ne rusisácanu xheelaʼ ca ancianu purtiʼ qué rucaacaʼ laacabe guiníʼcabe cosa confidencial. Galán runi ca ancianu ora qué rábicaʼ xheelacaʼ ca cosa ni cazaaca ca hermanu. Sicaríʼ guníʼ ti hermana, xheelaʼ ti ancianu: «Rudieeʼ xquixe peʼ xheelaʼ purtiʼ qué rabi naa ni cazaaca ca hermanu ni rigánnacabe ora rúnicabe visita de pastoreu o ca ni cayacanécabe para chuʼ jma gaxha de Jehová. Nin lá ca hermanu ca qué rábibe  naa. Riecheʼ purtiʼ qué rábibe naa cosa ni qué zanda guneʼ xiixa para gacaniaʼ. Zacá qué zaníʼ iqueʼ xiixa cosa de ca hermanu. Ne nannaʼ ora gabeʼ xheelaʼ de xiixa guendanagana ni gupaʼ o ximodo cayuneʼ sentir qué zábibe ni guirutiʼ». Guiranu riuuláʼdxinu gunibiáʼ binni laanu casi tuuxa de confianza. Guidúʼyanu gaayuʼ cualidad ni zacané laanu para gácanu zacá.

12. Bisiene xiñee racané guendarannaxhii laanu gácanu binni de confianza.

¹² Pa nápanu amor zacané ni laanu gácanu binni de confianza. Jesús guníʼ guiropaʼ mandamientu jma risaca nga gannaxhiinu Jehová ne gannaxhiinu prójimo (Mat. 22:37-39). Cumu nadxiinu Jehová la? racaláʼdxinu gácanu casi laabe purtiʼ laa nga binni ni jma zanda gápanu confianza. Ne pur nadxiinu ca hermanu stinu qué zazanu zaninu xiixa cosa ni gábicaʼ laanu. Qué chuʼ dxi gúninu xiixa ni guniná o gusituí lucaʼ (Juan 15:12).

13. Pa humilde laanu, ¿ximodo zacané ni laanu gácanu binni de confianza?

¹³ Pa humilde laanu zacané ni laanu gácanu binni de confianza. Ti xpinni Cristu ni naca humilde qué zuyubi gaca primé ni guiníʼ xiixa cosa (Filip. 2:3). Laaca qué zaníʼ íquenu risácanu purtiʼ si nánnanu xiixa cosa ni qué zanda guininu. Ne pa humilde laanu qué zazanu zaninu xiixa cosa ni riníʼ íquenu de ni qué riete lu Biblia o lu ca publicación.

14. Pa nácanu ti binni ni riene, ¿ximodo zanda gacané ni laanu gácanu binni de confianza?

¹⁴ Ti xpinni Cristu ni nuu xpiaaniʼ nanna pora zanda guiníʼ ne pora naquiiñeʼ igani (Ecl. 3:7). Ndaaniʼ caadxi guidxi nuu ti refrán ni ná «Ora guiníʼ binni zeeda gácani casi plata ne ora rigani binni zeeda gácani casi oro». Ni ná ca diidxaʼ riʼ nga nuu biaje mejor cadi guiníʼ diʼ tuuxa. Nga runi, Proverbios 11:12 ná: «Ti binni ni dxandíʼ riene qué riníʼ gastiʼ». Guzéʼtenu ejemplu stiʼ ti ancianu ni napa experiencia ni gatigá rinábacabe laa gacané xcaadxi congregación para gaca tender xiixa asuntu nagana. Sicaríʼ guníʼ sti ancianu de laabe: «Siempre riuube cuidadu ne qué riniʼbe xiixa información confidencial stiʼ xcaadxi congregación». Cumu naca ancianu riʼ ti hermanu ni riene la? runi respetar xcaadxi ancianu de congregación stibe laabe, purtiʼ nánnacabe qué zazabe zaniʼbe xiixa cosa confidencial.

15. Biquiiñeʼ ti ejemplu para gusiéneluʼ ximodo zapa binni confianza laanu pa gácanu honradu.

¹⁵ Ti binni ni naca honradu zacané ni laa gaca ti binni de confianza. Cumu siempre riníʼcabe ni dxandíʼ la? qué raca nagana para binni gapa confianza laacabe (Efes. 4:25; Heb. 13:18). Guzéʼtenu ti ejemplu, guxuíʼlunu nuu ti hermanu gudii ca discursu stiʼ jma galán. Zándaca zanábabe ti xhamígube gucaadiaga laabe ne gabi laabe paraa naquiiñeʼ guni mejorarbe. ¿Ñee ziebe ra nuu tuuxa ni gabi laabe puru si ni galán la? o ziebe ra nuu ti hermanu ni zabi laabe né diidxaʼ nadóʼ paraa naquiiñeʼ guni mejorarbe? Biblia ná: «Jma galán ora riguu jnézacabe binni que gannaxhiicabe laa ne qué gusihuínnicabe ni. Tuuxa ni dxandíʼ xhamígunu zudii conseju laanu neca gacaná ladxidoʼno» (Prov. 27:5, 6). Ni gabi ti  xhamígunu laanu zándaca gaca nagana para laanu guicaanu ca ni, peru zacané ca ni laanu.

16. ¿Ximodo rusihuinni Proverbios 10:19 pabiáʼ risaca nga gucueezanu laca laanu?

¹⁶ Nabé risaca gucueezanu laca laanu pa racaláʼdxinu gapa xcaadxi confianza laanu. Racané cualidad riʼ laanu para gucueezanu ruaanu ti cadi guininu xiixa asuntu confidencial (biindaʼ Proverbios 10:19). Ca red social ca zanda gucaa ca ni laanu gusihuínninu pa rucueezanu laca laanu. Purtiʼ pa qué gápanu cuidadu la? zanda gudxíʼbanu xiixa información confidencial ne stale binni zuuyaʼ ni. Ne ora maʼ bidxíʼbanu xiixa maʼ qué zanda gúninu gastiʼ para gucueezanu xiixa guendanagana ni zándaca guedané ni. Ora rucueezanu laanu laaca racaneni laanu cadi guininu ora gusiguii ca enemigu stinu laanu para gábinu laacaʼ cosa ni zándaca cuʼ ca hermanu stinu lu peligru. Zanda guizaaca ndiʼ pa gucueeza policía laanu ne nuunu ndaaniʼ ti guidxi ra rucueeza gobiernu dxiiñaʼ stinu. Pa guizaaca ndiʼ galán chinándanu principiu riʼ: «Zaguaaʼ ti bozal ruaaʼ para gucueeza ni ruaaʼ» (Sal. 39:1). Familia stinu, ca xhamígunu, ca hermanu stinu ne tutiica si binni naquiiñeʼ gúʼyacabe laanu casi ti binni de confianza. Ne para guizaaca nga la? naquiiñeʼ gucueezanu laca laanu.

17. ¿Xi zanda gúninu para chuʼ confianza lade ca hermanu de congregación?

¹⁷ Rudiʼnu xquixe peʼ Jehová purtiʼ maʼ guluu laanu ndaaniʼ ti familia ra nuu stale hermanu ne hermana ni nadxiisaa ne ni napasaa confianza. Cada tobi de laanu naquiiñeʼ guni stipa para gapa ca hermanu confianza laanu ne cadi naquiiñeʼ gusaana de gúninu ni. Pa cada tobi de laanu gusihuinni guendarannaxhii, gaca humilde, gaca binni ni riene, honradu ne gucueeza laca laa zacané para chuʼ confianza lade ca hermanu de congregación. Chinándanu ejemplu stiʼ Jehová, Dios stinu, ne cadi gusaana de gusihuínninu napa ca hermanu stinu confianza laanu.