Ra bizulú iza 1940, biʼniʼ estudiar jñaaʼ ne bixhozeʼ Biblia né ca testigu stiʼ Jehová. Neca bisaana de guni estudiárcabe gucuaaruʼ jñaaʼ revista La Atalaya ne ¡Despertad! Lu iza 1950 guca ti asamblea internacional ndaaniʼ guidxi Nueva York ne guyé familia stinneʼ.

Gudiʼdiʼ si ti tiempu, yeganna hermanu Lawrence Jeffries laadu ne bíʼnibe stipa gusiidibe naa de lu Biblia. Dxiqué guníʼ iqueʼ naquiiñeʼ chuʼ ca testigu stiʼ Jehová lu política ne gúnicaʼ serviciu militar. Gudxeʼ laabe pa qué náʼ ca binni de Estados Unidos checaʼ lu guerra nagueenda ziuu ca enemigu ndaaniʼ guidxi que. Gupa hermanu Jeffries paciencia ora guniʼné naa. Gúdxibe naa: «¿Xi rábiluʼ ñuni Jehová pa guiráʼ binni de Estados Unidos ñúnicaʼ ni nabe ne ñeeda ca enemigu ñeeda gucaalucaʼ laacabe?». Ni bisiénebe naa de tema riʼ ne de xcaadxi cosa gucané ca ni naa gudieeʼ cuenta cadi jneza modo riníʼ iqueʼ ne bicaa ni naa chuulaʼdxeʼ guiziideruaʼ jma.

Guizáʼ biindaʼ revista La Atalaya ne ¡Despertad! ni guluu chaahuiʼ jñaaʼ. Gudiʼdiʼ si tiempu bidieeʼ cuenta dxandíʼ ngue ni caziideʼ. Ngue runi, bidieeʼ lugar gudii hermanu Jeffries estudiu naa. Laaca maʼ qué ñaadxaʼ reunión. Yendá ni caziideʼ que ndaaniʼ ladxiduáʼ ne gucaʼ publicador. Bichaa ca meta stinneʼ ora bieneʼ «maʼ gaxha nuu dxi roʼ stiʼ Jehová» (Sof. 1:14). Lugar de nicá iqueʼ ñaaʼ universidad, yanna jma gucuá iqueʼ gacaniáʼ xcaadxi guiziidiʼ de lu Biblia.

Binduuxeʼ scuela preparatoria 13 de junio iza 1956, ne chonna dxi despué guyuaanisaʼ lu ti asamblea de circuito. Qué niníʼ iqueʼ  guiráʼ ca ndaayaʼ chiguicaaʼ pur bidieeʼ xquendanabaneʼ para guiziideʼ de Jehová ne gusiideʼ de lu Biblia.

Xhoopaʼ beeu de guyuaanisaʼ, gucaʼ precursor regular. Ministerio del Reino ni biree diciembre iza 1956, lu diidxaʼ inglés, guluuni gana ca hermanu chigacanecaʼ ra caquiiñeʼ jma publicador. Bineʼ sentir para naa información que purtiʼ racalaʼdxeʼ chigacaniáʼ ra jma caquiiñeʼ tu guni predicar ca noticia galán (Mat. 24:14).

Yendezaʼ Edgefield (Carolina del Sur), ndaaniʼ ti congregación ra nuu tapa si publicador. Né naa gúcadu gaayuʼ. Ra lidxi ti hermanu bínidu ca reunión que. Guiráʼ beeu bineʼ predicar 100 hora. Guizáʼ guyuu xhiiñaʼ, bineʼ predicar, bineʼ tender ca asignación stinneʼ ne bineʼ preparar ca discursu ni chigutiideʼ ra reunión. Ra jma bineʼ ni ná Jehová jma biziideʼ de laabe.

Bidieeʼ estudiu ti señora, dueña stiʼ ti funeraria, ni nuu ndaaniʼ guidxi Johnston, ti lugar ni nuu gaxha de ra nabezaʼ. Nachaʼhuiʼ señora que, bidiibe naa dxiiñaʼ chupa chonna dxi ne bitiiñebe laadu ti yoo para gúnidu ca reunión stidu.

Hermanu Jolly Jeffries, xiiñiʼ hermanu ni bidii estudiu de lu Biblia naa, yendézabe Brooklyn (Nueva York), lugar ra nabezaʼ que ne beeda gácabe compañeru stinneʼ purtiʼ laaca precursor laabe. Gulézadu ndaaniʼ ti yoohuiiniʼ ni napa rueda ni bitiiñeʼ ti hermanu laadu.

Nabé huaxiéʼ riguíxecabe laadu ladu sur de Estados Unidos. Biʼniʼ ganardu chupa o chonna dólar pur ti dxi dxiiñaʼ. Ti dxi biquiiñeʼ ca últimu nabiuxe ni napaʼ para guziéʼ ni gudahuaʼ. Ora bireeʼ de ra tienda que, bidxiña ti señor naa ne gunabadiidxaʼ naa: «¿Cuyúbiluʼ dxiiñaʼ la? Zudieeʼ dxiiñaʼ lii ne zaguixeʼ lii ti dólar pur hora». Gucuaaʼ dxiiñaʼ que ne chonna gubidxa bisiayaʼ lu ti terrenu ra cayaca ti construcción. Raqué nga biiyaʼ ximodo cayacané Jehová naa guiaanaʼ ndaaniʼ guidxi Edgefield. Neca zaqué, gunda guyaaʼ asamblea internacional ni guca lu iza 1958 ndaaniʼ guidxi Nueva York.

Guiropa dxi de asamblea que binebiaʼyaʼ Ruby Wadlington, ti precursora regular ni cayuni servir ndaaniʼ guidxi Gallatin (Tennessee). Cumu guirópadu racaláʼdxidu gácadu misioneru, guyuudu reunión para ca ni racalaʼdxiʼ cheʼ Escuela de Galaad. Qué nindaa, biséʼndasaadu carta ra nuudu. Despué, biʼniʼ invitárcabe naa chigudieeʼ discursu ndaaniʼ guidxi Gallatin, ne bineʼ aprovechar para guinabadiidxaʼ Ruby pa zachaganáʼ naa. Yeguneʼ servir ndaaniʼ congregación ra rié Ruby ne bichaganadu lu iza 1959.

Dxi napaʼ 23 iza, biʼniʼ nombrárcabe naa siervo de congregación (ni yanna runibiaʼnu casi coordinador stiʼ cuerpu de ancianu) ndaaniʼ guidxi Gallatin. Laadu ngue primé congregación ni yeganna ti superintendente de circuito nacubi ni láʼ  Charles Thompson. Ti hermanu ni nabé napa experiencia. Neca zacá, gunabadiidxabe xi caquiiñeʼ ca hermanu ne xi huayuni xcaadxi superintendente de circuito para gacanecaʼ laacabe. De laabe biziideʼ galán nga guinabadiidxaʼ ne gannaʼ xi guiráʼ bizaaca ante guicaaʼ xiixa decisión.

Lu beeu mayo iza 1964, biʼniʼ invitárcabe naa chaaʼ Escuela del Ministerio del Reino, rindaa ni ti beeu ne gúcani ndaaniʼ guidxi South Lansing (Nueva York). Gucané ca instructor que naa chuulaʼdxeʼ guiziideʼ jma de Jehová ne cadi gusaana de guneʼ progresar.

Lu beeu enero iza 1965, biʼniʼ invitárcabe naa ne Ruby para guni servirdu lu dxiiñaʼ de circuito. Biʼniʼ asignárcabe laadu chigánnadu ca congregación ni nuu Knoxville (Tennessee) hasta Richmond (Virginia). Laaca guca tocar laadu chigánnadu ca congregación ni nuu Carolina del Norte, Kentucky ne Virginia Occidental. Rigánnadu ca congregación ra nuu ca hermanu de raza negru, purtiʼ para tiempu que nabé nuu racismo ladu sur stiʼ Estados Unidos, ne qué zanda chuʼ binni negru ra nuu binni blancu. Huaxiéʼ bueltu napa ca hermanu que, ngue runi bidiʼdu de ni nápadu laacabe. Bisiidiʼ ti superintendente de circuito ni napa stale experiencia naa ti cosa nabé risaca. Sicaríʼ gúdxibe naa: «Ora chigánnaluʼ ti congregación, cadi gusihuínniluʼ lii nga jefe stiʼ ca hermanu. Jma zacaneluʼ laacabe pa gúʼyacabe lii casi ti hermanu».

Ti biaje yegánnadu ti congregación nahuiiniʼ ne raqué bizulú Ruby bidii estudiu ti señora joven ni napa ti dxaapahuiiniʼ de ti iza. Cumu guirutiʼ zanda gudii estudiu señora que la? maʼ pur carta bidii Ruby estudiu laabe. Sti biaje yegánnadu congregación que, maʼ qué ñaadxaʼ señora que reunión. Despué, yendeza chupa precursora especial lugar que ne maʼ laacaʼ bidiicaʼ estudiu laabe dede dxi guyuunísabe. Gudiʼdiʼ si 30 iza, lu iza 1995, dxi nuudu Betel ni nuu Patterson, bidxiña ti hermana joven Ruby ne bigapadiuxi laabe. Gúcasibe xiiñiʼ xa señora ni bidii Ruby estudiu. Yanna, baʼdudxaapaʼ que ne xheelaʼ nuucaʼ lu clase 100 de Escuela de Galaad.

Guiropa circuito ni yegánnadu, nuuni centru stiʼ guidxi Florida. Para tiempu que, caquiiñedu ti carru. Ngue runi guzidu tobi biaʼ xpuéltudu. Peru primé semana guzidu ni guca feu bomba nisa stini ne qué gápadu bueltu para guni chaahuidu ni. Nagueendaca gunieniaʼ ti hermanu ni zanda gacané laadu. Gúdxibe ti trabajador stibe guni chaahuiʼ carru que ne qué ninabe niguíxedu laabe. Gúdxibe laadu: «Zaa nuu nga». Dede bidiibe laadu ti ndaa bueltu. Raqué nga bidúʼyadu modo rapa Jehová ca xpinni ne bisietenalaʼdxiʼ ni laadu pabiáʼ risaca nga gudiʼdu de ni nápadu.

Ora rigánnadu ca congregación que siempre riaanadu ra lidxi ca hermanu ne zaqué guca xhamígudu laacaʼ. Ti dxi cucaaʼ ti informe stiʼ ti congregación ne bisaana ni lu máquina de escribir stinneʼ. Ora biguetaʼ huadxí que biiyaʼ maʼ binduuxeʼ xcuidihuiiniʼ de chonna iza, xiiñiʼ ca hermanu que informe ni cayuneʼ. Gudiʼdiʼ si iza, naa ne laabe bixidxirudu de ni bizaaca que.

Lu iza 1971, gucuaaʼ ti carta ra cayuni asignárcabe naa guneʼ servir de superintendente de distrito ndaaniʼ guidxi Nueva York. ¡Cadi lica cabézadu ngue!, deruʼ 34 iza napaʼ dxi bichaacabe laadu de asignación. Naa nga primé superintendente de distrito negru ni gupa ca hermanu, peru nayecheʼ bidxaagalúcabe naa.

Dxi nacaʼ superintendente de distrito guizáʼ riuuladxeʼ gusiideʼ de Jehová ca fin de semana lu ca asamblea de circuito. Stale de ca superintendente de circuito que jma nápacaʼ experiencia que naa. Tobi de laacabe nga hermanu ni bidii discursu dxi guyuaanisaʼ. Stobi de laacabe nga Theodore Jaracz, gudiʼdiʼ si tiempu guyuube lade Grupu ni Zániru. Laaca nabé guyuu hermanu ni napa experiencia ni biʼniʼ servir ndaaniʼ Betel stiʼ Brooklyn. Bineʼ sentir galán purtiʼ guca ca superintendente de circuito ne ca betelita que nachaʼhuiʼ né naa. Naa piaʼ biiyaʼ nácacabe pastor nachaʼhuiʼ, nápacabe confianza Stiidxaʼ Dios ne rinándacabe ni ná organización. Cumu naca ca  hermanu riʼ humilde la? qué ñaca nagana para naa ñacaʼ superintendente de distrito.

Lu iza 1974, biʼniʼ asignar Grupu ni Zániru ti grupu de superintendente de circuito para gácacaʼ de distrito. Ngue runi biguetaʼ gucaʼ superintendente de circuito ndaaniʼ guidxi Carolina del Sur. Para tiempu que maʼ tobi si nuu ca congregación ne circuito de raza blancu ne negru ne ngue guizáʼ bisiécheni ca hermanu.

Ra maʼ ziluxe iza 1976, biʼniʼ asignárcabe naa ndaaniʼ guidxi Georgia, lu ti circuito ni nuu Atlanta ne Columbus. Qué ziuu dxi guiaandaʼ naa dxi bidieeʼ ti discursu de funeral stiʼ gaayuʼ baʼduhuiiniʼ negru ni gutiʼ purtiʼ guyuu tu bizaaquiʼ lídxicaʼ. Gupa xidé guyé jñaacabe ra hospital purtiʼ bidxuíʼ. Stale hermanu de raza blancu ne negru, guyecaʼ ra hospital que para quixhedxicaʼ ladxidóʼ ca hermanu que. Biiyaʼ pabiáʼ nga nadxiisaa ca hermanu ne ca hermana. Ora racanesaa ca xpinni Dios racané ni laacaʼ gudxiilucaʼ ca prueba jma nagana tídicaʼ.

Lu iza 1977, gunábacabe laadu chuudu Betel stiʼ Brooklyn para gacanedu chupa chonna beeu lu ti dxiiñaʼ. Dxi mayaca guiluxe dxiiñaʼ que guniʼné chupa hermanu ni nuu lu Grupu ni Zániru que naa ne gunabadiidxacaʼ naa pa zanda guiaanadu guni servirdu ndaaniʼ Betel. Naa ne Ruby gucuaadu invitación que.

Bineʼ dxiiñaʼ lu Departamentu de Servicio 24 iza, ra ricabi ca hermanu pregunta nagana. Ra zidiʼdiʼ iza, rudii Grupu ni Zániru instrucción ni zeeda lu Biblia. Riquiiñeʼ ca instrucción riʼ para guicábicabe pregunta, guni capacitárcabe ca superintendente de circuito, ca ancianu ne ca precursor. Capacitación ca racané ni stale hermanu guni progresar ne laaca racaneni chuʼ organización stiʼ Jehová jma naguidxi.

Lu iza 1995 hasta 2018 yegannaʼ caadxi sucursal casi representante stiʼ central mundial, dxiqué biree lá ni superintendente de zona. Guca reunirniaʼ ca comité de sucursal, betelita ne ca misioneru para cuaaʼ gana laacaʼ ne gacaniáʼ laacaʼ lu intiica guendanagana ni cadxagalucaʼ. Naa ne Ruby laaca riuʼdu gana ora rucaadiágadu ca experiencia ni gábicabe laadu. Casi dxi guyuudu Ruanda lu iza 2000. Guizáʼ bidxagayaadu ora guniʼné ca hermanu ne ca betelita laadu xi bizaaca tiempu gutiʼ stale binni ndaaniʼ guidxi que lu iza 1994. Stale de laacabe guti familia stícabe. Neca zaqué, rihuinni napa ca hermanu que fe, nápacaʼ esperanza ne nuucaʼ nayecheʼ.

Yanna maʼ nápadu jma de 80 iza. Maʼ gande iza ziniaʼ de cayacaniáʼ lu Comité de Sucursal ni nuu Estados Unidos. Qué ñuu dxi ñaaʼ universidad, peru guizáʼ huasiidiʼ Jehová ne organización stiʼ naa. Guizáʼ huayacané ndiʼ naa para gusiideʼ xcaadxi de lu Biblia purtiʼ zacané ni laacabe stale (2 Cor. 3:5; 2 Tim. 2:2). Maʼ biiyaʼ ximodo huayacané Biblia binni guchaa xquendanabani ne gueeda gácacaʼ xhamigu Jehová (Sant. 4:8). Naa ne Ruby, riguʼdu gana xcaadxi gusisácacaʼ privilegiu ni nápacaʼ de guiziidicaʼ de Jehová ne gusiidicaʼ xcaadxi binni de lu Biblia... privilegiu jma risaca ni napa ca xpinni Jehová.