1. ¿Xiñee qué ridxagayaanu ora ridúʼyanu maʼ qué ridxela binni tu gapa confianza?

 NDAANIʼ guidxilayú stiʼ Binidxabaʼ riʼ, maʼ qué ridxela binni tu laa gapa confianza. Ruuyacabe qué runi ca empresariu, ca políticu ne ca líder stiʼ ca religión ca ni riniʼcaʼ. Ne zacaca riníʼ íquecabe naca ca xhamígucabe, ca vecinu stícabe dede né familia stícabe. Ne qué ridxagayaanu guidúʼyanu ndiʼ, purtiʼ Biblia maca guníʼ «lu ca últimu dxi» riʼ zucheené binni xhamigu, zaniʼcaʼ mal de sti binni ne zuni traicionarcaʼ stobi. Ndiʼ riníʼ zaca binni casi Binidxabaʼ, dios ni naaze guidxilayú riʼ ne guirutiʼ zanda gapa confianza laa (2 Tim. 3:1-4; 2 Cor. 4:4).

2. a) ¿Tuu nga zanda gápanu confianza? b) ¿Xi zándaca guiníʼ ique tuuxa?

² Peru ca ni dxandíʼ xpinni Cristu, nánnanu zanda gápanu confianza Jehová (Jer. 17:7, 8). Nanna dxíchinu nadxiibe laanu ne qué ziuu dxi guixélebe de ca xhamígube (Sal. 9:10). Laaca zanda gápanu confianza Jesucristu purtiʼ bidii xquendanabani pur laanu (1 Ped. 3:18). Ne nanna dxíchinu zanda gápanu confianza guiráʼ ca ni zeeda lu Biblia purtiʼ maʼ huayacané ca ni laanu (2 Tim. 3:16, 17). Nuunu seguru zanda gápanu confianza Jehová, Jesús ne Biblia. Peru zándaca chuʼ tu guiníʼ ique pa guiráʼ ora nga zanda gápanu confianza ca hermanu de congregación. Pa zacá ni la? guidúʼyanu xiñee.

3. ¿Xi privilegiu naroʼbaʼ nápanu? (Marcos 10:29, 30).

³ Maʼ bidii Jehová laanu privilegiu de chuʼnu ndaaniʼ familia stiʼ, ca xpinni ni nuu lu guidubi Guidxilayú. Pur nga ricaanu stale ndaayaʼ (biindaʼ Marcos 10:29, 30). Lu guidubi Guidxilayú nuu hermanu ne hermana ni laaca nadxii  Jehová ne rúnicaʼ stipa pur guni respetarcaʼ ca ley stibe. Zándaca gadxé idioma stinu, cultura ne modo rácunu lari, peru rannaxhiinu ca hermanu riʼ dede primé dxi runibiaʼnu laacaʼ. Ni jma risaca nga riuuláʼdxinu guni adorarnu ne gusisácanu Bixhózenu ni nuu guibáʼ ne ni nadxii guiranu (Sal. 133:1).

4. ¿Xiñee caquiiñenu ca hermanu stinu?

⁴ Tiempu riʼ nga jma naquiiñeʼ chuʼnu tobi si. Nuu biaje racané ca hermanu stinu laanu tídinu lu xiixa guendanagana (Rom. 15:1; Gál. 6:2). Laaca racanécabe laanu cadi gusaana de gúninu xhiiñaʼ Jehová ne chuʼ fe stinu jma naguidxi (1 Tes. 5:11; Heb. 10:23-25). Guizáʼ triste nga pa ñaca qué ñuu ca hermanu stinu para ñacanecaʼ laanu nudxíʼlunu ca enemigu stinu, Binidxabaʼ ne guidxilayú malu stiʼ. Maʼ cadi candaa, laabe ne ca xpínnibe zucaalúcabe ca xpinni Dios ne zudiʼnu xquixe peʼ purtiʼ zápanu ca hermanu stinu gaxha de laanu.

5. ¿Xiñee nuu tu laa raca nagana para laa gapa confianza ca hermanu?

⁵ Yanna, ¿xiñee nuu tu laa raca nagana para laa gapa confianza ca hermanu yaʼ? Zándaca purtiʼ gupa tuuxa confianza ti hermanu ne gudxi laabe xi cazaaca, peru despué gunna cananiʼbe ni. O guníʼ tuuxa zuni xiixa, peru despué maʼ qué ñúnini. Ne zándaca pur ni guníʼ ti hermanu o ni biʼniʼ bininá laanu. Yanna, ¿xi zacané laanu gápanu jma confianza ca hermanu stinu yaʼ?

6. Pa nadxiinu ca hermanu stinu, ¿ximodo zacaneni laanu gápanu jma confianza laacaʼ? (1 Corintios 13:4-8).

⁶ Pa nadxiinu binni, zápanu confianza laa. Lu 1 Corintios capítulo 13 riete stale cosa ni zanda gúninu pa nadxiinu binni. Zacané ni laanu gápanu jma confianza xcaadxi o guibiguetaʼ gápanu confianza tuuxa (biindaʼ 1 Corintios  13:4-8). Guzéʼtenu ti ejemplu, lu versículo 4 stini ná «ti binni ni napa amor la? napa paciencia ne nachaʼhuiʼ». Napa Jehová paciencia laanu neca ruchéʼnenu laa. Nga runi, laanu laaca naquiiñeʼ gápanu paciencia ca hermanu stinu pa guiniʼcaʼ o gúnicaʼ xiixa cosa ni guchiichi laanu o ni guniná laanu. Versículo 5 stini ná, ti binni ni napa amor «qué ridxiichi nagueenda» ne «qué rugabaʼ panda biaje guninácabe laa». Qué racaláʼdxinu ugábanu panda biaje maʼ bininá ca hermanu stinu laanu. Eclesiastés 7:9 cayabi laanu cadi naquiiñeʼ guidxiichinu nagueenda. Jma galán chinándanu conseju ni zeeda lu Efesios 4:26: «Cadi gudiitu lugar guiaaziʼ gubidxa cadxiichirutu».

7. ¿Ximodo racané ca principiu zeeda lu Mateo 7:1-5 laanu gápanu jma confianza ca hermanu stinu?

⁷ Sti cosa ni zacané laanu gápanu jma confianza ca hermanu stinu nga guidúʼyanu laacabe cásica ruuyaʼ Jehová laacabe. Nadxii Jehová laacabe ne qué rugabaʼ panda biaje maʼ bicheecabe. Nga runi, laanu laaca cadi naquiiñeʼ ugábanu panda biaje maʼ bicheecabe (Sal. 130:3). Lugar de guidúʼyanu ra cucheecabe, naquiiñeʼ gúninu stipa pur guidúʼyanu ca cualidad sicarú ni nápacabe ne gúninu stipa guidúʼyanu ca cosa galán ni rúnicabe (biindaʼ Mateo 7:1-5). Qué rininu malu laacabe, purtiʼ ti binni ni napa amor la? «runi cré guiráʼ cosa» (1 Cor. 13:7). Peru qué riníʼ diʼ ndiʼ cayabi Jehová laanu gápanu confianza tuuxa pa qué runibiaʼnu laa, sínuque ribézabe gápanu confianza ti binni ni rusihuinni dxandíʼ nachaʼhuiʼ. b

8. ¿Xi zanda gúniluʼ para jma gápaluʼ confianza xcaadxi?

⁸ Naquiiñeʼ tidiʼ tiempu para gápanu confianza tuuxa. ¿Xi zanda gúniluʼ para gápaluʼ jma confianza xcaadxi yaʼ? Binibiáʼ chaahuiʼ laacabe. Guniʼné laacabe lu ca reunión, laguni predicar juntu, gupa paciencia ne bidii lugar gusihuínnicabe zanda gápaluʼ confianza laacabe. Pa qué runibiáʼ chaahuiluʼ tuuxa, zándaca gaca nagana para lii guiníʼneluʼ laabe de ca cosa ni cazaacaluʼ. Peru ra gunibiáʼ chaahuiluʼ binni ca, zándaca dede zudii gana lii gábiluʼ laabe ximodo nuuluʼ (Luc. 16:10). Yanna, ¿xi zanda gúniluʼ pa gunítiluʼ confianza ti hermanu purtiʼ biʼniʼ lii xiixa yaʼ? Cadi gusaana de gaca xhamíguluʼ laabe ne guleza tidiʼ tiempu. Cadi gudiiluʼ lugar pur ni biʼniʼ tuuxa lii maʼ cadi gápaluʼ confianza xcaadxi. Ti cosa ni zacané laanu nga guidúʼyanu ejemplu stiʼ ca xpinni Jehová ni qué nusaana de ñapa confianza xcaadxi neca bininácabe laacaʼ.

9. a) ¿Xi biʼniʼ Ana neca bichee Elí ne ca xiiñiʼ? b) ¿Xi rusiidiʼ ejemplu stiʼ Ana lii? (Biiyaʼ dibuju).

⁹ ¿Ñee huayuniná tuuxa hermanu ni napa xiixa privilegiu ndaaniʼ congregación lii la? Pa zacá ni, zanda gacané ejemplu stiʼ Ana lii. Tiempu bibánibe, binni bisiidiʼ guidxi Israel de Dios nga sumo sacerdote Elí. Peru familia stibe cadi jneza ni rúnicaʼ. Ca xiiñiʼ Elí neca sacerdote laacaʼ, gúpacaʼ relación sexual né ca gunaa ni runi dxiiñaʼ ndaaniʼ templu que, peru qué ñuni Elí xiixa para nucueeza laacabe para cadi gúnicabe ni. Neca zaqué, bidiiruʼ Jehová lugar gaca Elí sumo sacerdote. ¿Xi biʼniʼ Ana yaʼ? Qué nusaana de ñebe niguni adorarbe Jehová ndaaniʼ tabernáculo que. Ti dxi guyebe  ra tabernáculo que yeguni orarbe purtiʼ guizáʼ cayacanabe ne ora biʼyaʼ Elí laabe nagueendaca guníʼ ique naxúdxibe ne dede gudindené laabe (1 Sam. 1:12-16). Biʼniʼ prometer Ana Jehová pa gapa ti xiiñiʼ, ziné laabe para gúnibe dxiiñaʼ ndaaniʼ tabernáculo que. Ne bíʼnibe ni biʼniʼ prometerbe neca nánnabe Elí nga gapa baʼduhuiiniʼ que (1 Sam. 1:11). Peru ¿ñee caquiiñeʼ chuʼ tu guni corregir ca xiiñiʼ Elí que la? Caquiiñeʼ pue, ne Jehová peʼ biʼniʼ ni ora caquiiñecabe ni (1 Sam. 4:17). Laga caʼruʼ guizaacabe ngue la? guluu ndaayabe Ana ra bidiibe laa ti baʼduhuiiniʼ ni biree lá Samuel (1 Sam. 1:17-20).

10. ¿Ximodo bisihuinni David qué nusaana de ñapa confianza xcaadxi neca bidxiidéchecabe laa?

¹⁰ ¿Ñee huayuni traicionar ti xhamíguluʼ lii la? Pa zacá ni, guníʼ ique ni bizaaca rey David. Dxi gucalaʼdxiʼ xiiñibe Absalón ñaxha reinu stibe, bidxiideche xhamígube Ahitofel laabe. Guizáʼ gucaná David ora bicaalú xiiñiʼ laa ne bidxiideche xhamigu laa. Peru ni bizaaca David riʼ, qué nucaani laa nusaana de ñapa confianza xcaadxi binni. Gúparube confianza Husái, ti xhamígube ni qué nudxiideche laabe. Ne biaʼsi bíʼnibe gúpabe confianza Husái purtiʼ dede guluu hombre riʼ xquendanabani lu peligru para gacané laabe (2 Sam. 17:1-16).

11. ¿Ximodo bisihuinni ti siervu stiʼ Nabal napa confianza xcaadxi?

¹¹ Guidúʼyanu ni bizaaca ti siervu stiʼ Nabal, ti israelita nabé ricu. Gucané David né ca xpinni ca siervu stiʼ Nabal ne gúpacabe laacaʼ. Gudiʼdiʼ si ti tiempu, gunabaʼ David Nabal guendaró para ca xpinni, biaʼ zanda gudiibe laacaʼ. Cumu qué ninabe nudiibe ni la? guizáʼ bidxiichi David dede guníʼ zuuti laabe ne ca xpínnibe. Tobi de ca siervu stiʼ Nabal, yetídxibe Abigaíl, xheelaʼ Nabal xi bizaaca. Nánnabe nuu xquendanabánibe lu peligru pa qué guni gunaa que xiixa. Ne qué nuxooñebe, sínuque gúpabe confianza zuni Abigaíl xiixa purtiʼ runibiáʼ binni laa casi ti gunaa ni nuu xpiaaniʼ. Guleendú hombre riʼ ni galán purtiʼ gupa confianza. Guca Abigaíl nadxibalú ne bicueezabe David para cadi guni ni cá ique guni  (1 Sam. 25:2-35). Ne Abigaíl la? gupa confianza zuni David ni jneza.

12. ¿Ximodo bisihuinni Jesús gupa confianza ca discípulo stiʼ neca bicheecaʼ?

¹² Gupa Jesús confianza ca discípulo stiʼ neca bicheecaʼ (Juan 15:15, 16). Dxi gunabaʼ Santiago ne Juan laabe gudiibe laacaʼ ti puestu risaca lu Reinu, qué niníʼ ique Jesús pur ngue nga cayúnicabe ni ná Jehová ne qué niníʼ diʼ maʼ qué zácacabe ca apóstol stiʼ (Mar. 10:35-40). Ne gueelaʼ gunaazecabe laabe bisaana guiráʼ discípulo stibe laabe (Mat. 26:56). Peru qué nusaana Jesús de ñapa confianza laacabe. Neca biiyabe ra cucheecaʼ, «gunnaxhiibe laacaʼ dede dxi biluxe xquendanabánibe» (Juan 13:1). Ne biásasibe de lade gueʼtuʼ, bisaananebe ca 11 apóstol stibe dxiiñaʼ de gúnicaʼ discípulo ne gápacaʼ ca dendxuhuiiniʼ stibe (Mat. 28:19, 20; Juan 21:15-17). Ne qué nucheebe ra gúpabe confianza ca hombre riʼ neca binni ruchee laacaʼ. Guirácabe gúcacabe fiel dede dxi biluxe xquendanabánicabe lu Guidxilayú riʼ. Casi bidúʼyanu ca, Ana, David, siervu stiʼ Nabal, Abigaíl ne Jesús gúpacabe confianza binni ruchee. Racané ejemplu stícabe laanu gúninu cásica bíʼnicabe.

13. ¿Xiñee zándaca gaca nagana para laanu gápanu confianza xcaadxi?

¹³ ¿Ñee gúdxinu ti hermanu xiixa ni cazaacanu ne despué gúnnanu cananiʼbe ni la? Nabé feu nga ora gúnicabe nga laanu purtiʼ riniti confianza nápanu binni ca. Ti dxi, guniʼné ti hermana ti ancianu ne gúdxibe laa xi cazaacabe. Peru sti dxi que, guniʼné xheelaʼ ancianu que laabe para cuʼ gana laabe. Ne bizaaca ndiʼ purtiʼ gudxi ancianu que xheelaʼ ni gudxi hermana que laa. Nánnanu guca nagana para hermana riʼ guibiguetaʼ gapa confianza ancianu riʼ. Peru biʼniʼ hermana riʼ ti cosa nabé galán, guníʼnebe sti ancianu ne hermanu riʼ gucané laabe guibiguetaʼ gápabe confianza ca ancianu.

14. ¿Xi gucané ti hermanu guibiguetaʼ gapa confianza xcaadxi?

¹⁴ Xadxí bidxiichiné ti hermanu chupa ancianu purtiʼ para laabe qué zanda gapa binni confianza laacaʼ. Peru despué bietenaláʼdxibe ni guníʼ ti hermanu ni nabé runi respetarbe. Sicaríʼ guníʼ hermanu que: «Binidxabaʼ nga enemigu stinu ne cadi ca hermanu stinu». Bicaa ca diidxaʼ riʼ hermanu que guiníʼ ique ne biʼniʼ orar. Gudiʼdiʼ si tiempu biʼniʼ chaahuibe guendanagana ni gupanebe guiropaʼ ancianu que.

15. ¿Xiñee riné tiempu guibiguetaʼ gápanu confianza tuuxa? Bizeeteʼ ejemplu stiʼ Grete.

¹⁵ ¿Ñee maʼ binítiluʼ xiixa privilegiu ndaaniʼ congregación la? Pa zacá ni, zándaca bininá ni lii. Guidúʼyanu ni bizaaca Grete ne jñaa, chupa hermana ni qué nusaana Jehová lu iza 1930. Gulézacabe ndaaniʼ guidxi Alemania, ra bicueeza gobiernu nazi dxiiñaʼ ni rúninu. Gucané Grete gaca copia stiʼ revista Torre stiʼ ni rapa para ca hermanu. Peru despué gunna ca hermanu rucaalú bixhoze Grete dxiiñaʼ ni rúninu. Bidxíbicabe nudii hombre que información stiʼ congregación que ngue runi gúxhacabe dxiiñaʼ que Grete. Peru bidxaagalú Grete xcaadxi guendanagana. Lu Segunda Guerra Mundial, pur qué gapa ca hermanu que confianza laacabe qué nudiicaʼ laabe ne jñaabe revista ne qué nugapadiúxicaʼ laacabe ora ridxaagalucaʼ laacabe lu calle. ¡Guizáʼ bininá ndiʼ Grete! Ne gudiʼdiʼ tiempu para biʼniʼ perdonarbe ca hermanu que ne biguetaʼ gúpabe  confianza laacaʼ. Gudiʼdiʼ si iza biene Grete maʼ biʼniʼ perdonar Jehová ca hermanu que ngue runi laaca naquiiñeʼ gúnibe ni. c

16. ¿Xiñee naquiiñeʼ gúninu stipa guibiguetaʼ gápanu confianza xcaadxi?

¹⁶ Pa huazaacaluʼ cásica bizaaca ca hermanu ni bizéʼtenu riʼ, biʼniʼ stipa guibiguetaʼ gápaluʼ confianza ca hermanu. Zándaca ziné ni tiempu peru zabeenduluʼ ni galán pa gúniluʼ stipa ca. Guiníʼ íquenu ndiʼ. Pa gudoʼno xiixa ne bininá ni laanu, para sti biaje la? zápanu jma cuidadu. Peru cadi pur nga zusaananu de guidoʼno. Zaqueca nga laanu, cadi pur bininá ti hermanu laanu zusaana de gápanu confianza ca hermanu stinu neca nácacaʼ binni ruchee. Pa guibiguetaʼ gápanu confianza laacabe jma ziuʼnu nayecheʼ ne jma zuyúbinu chuʼ confianza ládenu ndaaniʼ congregación.

17. a) ¿Xiñee nabé risaca chuʼ confianza ládenu? b) ¿Xi zadúʼyanu lu sti artículo ca?

¹⁷ Lu guidxilayú stiʼ Binidxabaʼ maʼ gastiʼ confianza. Peru lu guidubi Guidxilayú nápanu ti familia ra nuu stale hermanu ne hermana ra nuu confianza purtiʼ nadxiisaanu. Pur confianza riʼ nuunu nayecheʼ ne nuunu tobi si yanna. Ne lu ca dxi nagana ni zeeda ca, zacané confianza ca laanu. Peru pa bininá tuuxa laanu ne maʼ qué gápanu confianza laa yaʼ, zanda guibiguetaʼ gápanu confianza laabe pa gúninu stipa guidúʼyanu ca cosa ca modo ruuyaʼ Jehová ni, chinándanu ca principiu zeeda lu Biblia ne guyúbinu modo gannaxhiinu ca hermanu stinu jma. Laaca naquiiñeʼ chinándanu ca ejemplu ni zeeda lu Biblia. Pa gúninu ni, zápanu stale xhamígunu ni zacané laanu jma que ti bíʼchinu (Prov. 18:24). Peru cadi caquiiñeʼ si gápanu confianza xcaadxi. Ca hermanu stinu laaca caquiiñeʼ gápacaʼ confianza laanu. Lu sti artículo ca zadúʼyanu xi naquiiñeʼ gúninu para gapa binni confianza laanu.