1. ¿Xi cosa galán zazaaca ora maʼ guni mandar Cristu ti mil iza?

 ¿ÑEE ruxuíʼlunu pabiáʼ sicarú zaca dxi maʼ guzulú guiasa ca binni ni maʼ guti lu Guidxilayú dxi maʼ guni mandar Cristu ti mil iza la? Guiranu ca ni maʼ guti ti binni ni nadxiinu, racaláʼdxinu guidúʼyanu laacabe sti biaje. Ne ngaca racalaʼdxiʼ Jehová (Job 14:15). Guiníʼ íquenu panda binni ziecheʼ lu guidubi Guidxilayú riʼ ora guʼyaʼ familia stiʼ sti biaje. Casi bizíʼdinu lu artículo ni gudiʼdiʼ que, «ca ni biʼniʼ ni jneza» ni maʼ cá lá lu libru de guendanabani, ziásacaʼ para guicaacaʼ guendanabani (Hech. 24:15; Juan 5:29). Zándaca stale de ca binni ni nadxiinu ni maʼ guti zácacaʼ primé de ca ni guiasa lu Guidxilayú riʼ. b Ne ca binni «ni qué ñuni ni jneza», ni qué ñapa oportunidad de ñunibiáʼ Jehová ne ñuni ni nabe ante gatiʼ la? ziásacaʼ «para gaca juzgarcaʼ».

2, 3. a) Casi ná Isaías 11:9, 10, ¿xi para chigaca ti programa ra guiziidiʼ binni de Dios lu guidubi Guidxilayú? b) ¿Xi zadúʼyanu lu artículo riʼ?

² Guiráʼ ca binni ni guiasa de lade gueʼtuʼ, zaziidicaʼ stale cosa (Is. 26:9; 61:11). Nga runi, ziuu ti programa  lu guidubi Guidxilayú ra zaziidiʼ binni (biindaʼ Isaías 11:9, 10). Ca binni ni qué ñuni ni jneza napa xidé guiziidicaʼ de Jesucristu, de Reinu stiʼ Dios, ni biaxa pur laanu, pabiáʼ risaca lá Jehová ne xiñee laa si nga jma jneza runi mandar. Ne ca binni ni biʼniʼ ni jneza napa xidé guiziidicaʼ ca cosa nacubi ni maʼ bisiidiʼ Jehová xquidxi. Stale de ca xpinni Jehová gúticaʼ ante guiluxe guicá Biblia, nga rusihuinni napa xidé guiziidiruʼ ca binni ni biʼniʼ ni jneza ne ca ni qué ñuni ni jneza.

³ Lu artículo riʼ zacábinu ca pregunta riʼ: ¿ximodo nga chigaca programa ra guiziidiʼ binni de Dios tiempu ca? ¿xi zazaaca ca binni ni quixhe ique guiziidiʼ lu programa ca? ne ¿xi zazaaca ca binni ni qué naʼ guiziidiʼ? Nabé risaca gánnanu ca respuesta ca tiempu riʼ. Zadúʼyanu caadxi profecía ni zeeda lu libru stiʼ Daniel ne Apocalipsis ni zacané laanu guiénenu xi zazaaca ora maʼ guzulú guiasa binni lu Guidxilayú riʼ. Peru primeru guidúʼyanu caadxi cosa risaca ni ruzeeteʼ profecía ni zeeda lu Daniel 12:1, 2.

4, 5. ¿Xi ruzeeteʼ Daniel 12:1 zazaaca tiempu ra mayaca gueeda fin?

⁴ (Biindaʼ Daniel 12:1). Lu libru stiʼ Daniel riete xi orden zazaaca caadxi cosa tiempu ra mayaca gueeda fin. Casi lu Daniel 12:1 riete zuzuhuaa Miguel, o Jesucristu, para gapa xquidxi Dios. Bizulú guca cumplir ti parte stiʼ profecía riʼ lu iza 1914, dxi guca Jesús Rey lu Reinu stiʼ Dios ni nuu guibáʼ.

⁵ Peru laaca bizeeteʼ Daniel zuzuhuaa Jesús «tiempu zapa binni yuubaʼ ni qué huayuu dxi guihuinni dede dxi bizulú guyuu ti guidxi roʼ hasta ca dxi que». Tiempu zapa binni yuubaʼ, laca laani nga «gran tribulación» ni riete lu Mateo 24:21, nota. Zuzuhuaa Jesús, o zuni defender xquidxi Dios, ra maʼ ziluxe tiempu zapa binni yuubaʼ, o lu Armagedón. Libru stiʼ Apocalipsis ruzeeteʼ ca binni riʼ nga «gran muchedumbre» ni guilá tiempu gapa binni «stale yuubaʼ» (Apoc. 7:9, 14, nota).

6. ¿Xi zazaaca guilá si stale binni lu gran tribulación, ne xiñee cuzéʼtenu ni? (Laaca zanda gúʼyaluʼ lu revista riʼ artículo «Ni rinabadiidxaʼ ca ni ruundaʼ» ni caníʼ de ora guiasa ca binni ni maʼ guti lu Guidxilayú riʼ).

⁶ (Biindaʼ Daniel 12:2). ¿Xi zazaaca ca binni ni guilá lu Armagedón yaʼ? Profecía ca cuzeeteʼ ziasa ca binni ni maʼ guti. Peru cadi caníʼ diʼ ni ora guiasa ca ungidu para checaʼ guibáʼ lu ca últimu dxi, casi biénenu ni dxiqué, c sínuque caniʼni ora guiasa ca ni maʼ guti para guibánicaʼ ndaaniʼ guidxilayú cubi. ¿Xiñee caninu zacá yaʼ? Lu Job 17:16 laaca riquiiñeʼ ni diidxaʼ «ndaaniʼ yu» para guiniʼni de «Baʼ». Ndiʼ rusihuinni caníʼ Daniel 12:2 de ora guiasa ca binni ni maʼ guti para guibánicaʼ lu Guidxilayú riʼ tidiʼ si Armagedón.

7. a) ¿Ximodo ndiʼ ziasa caadxi binni para guicaa «guendanabani ni qué zaluxe»? b) Ora guiasa ca binni riʼ de lade gueʼtuʼ, ¿xiñee zaca ni ti modo jma galán?

⁷ Yanna, ¿xii nga caníʼ Daniel 12:2 ora ruzeeteʼ ziasa caadxi binni «para  guicaacaʼ guendanabani ni qué zaluxe» yaʼ? Ndiʼ riníʼ ca binni ni guiasa de lade gueʼtuʼ, ne guiziidicaʼ o qué gusaana de guiziidicaʼ de Jehová ne de Jesús ne guzuubacaʼ diidxaʼ lu 1,000 iza ca, zacaacaʼ guendanabani ni qué zaluxe (Juan 17:3). Jma galán zabani ca binni riʼ que ca binni ni biasa de lade gueʼtuʼ dxiqué (Heb. 11:35). ¿Xiñee yaʼ? Purtiʼ biguetaʼ guti ca binni ni biasa dxiqué.

8. ¿Ximodo nga ziasa caadxi binni para gusituí Dios lucaʼ ne gucaanabe laacaʼ?

⁸ Peru cadi guiráʼ diʼ ca binni ni guiasa de lade gueʼtuʼ zanacaʼ gusiidiʼ Jehová laacaʼ. Profecía ni zeeda lu Daniel ca ná ziuu tu laa ziasa «para gusituibe lucaʼ ne qué zusaana de gucaanabe laacaʼ». Pur nácacabe binni ni qué ruzuubaʼ diidxaʼ, qué zacá diʼ lácabe lu libru de guendanabani ne qué zacaacabe guendanabani ni qué zaluxe. Profecía ca ná zusituibe lucaʼ o zanitilucaʼ. Nga runi Daniel 12:2 caniʼni de ni zazaaca ca binni ni guiasa de lade gueʼtuʼ pur ni gúnicaʼ despué de guiásacaʼ de lade gueʼtuʼ d (Apoc. 20:12). Nuu de laacabe zacaa guendanabani ni qué zaluxe ne nuu tu laa coʼ.

9, 10. a) Casi riete lu Daniel 12:3, ¿xiruʼ zazaaca despué de gran tribulación? b) ¿Tuu nga ca ni guizáʼ zuzaani «casi guibáʼ»?

⁹ (Biindaʼ Daniel 12:3). ¿Xiruʼ zazaaca tidiʼ si «tiempu zapa binni yuubaʼ» ni maʼ nuu gaxha ca yaʼ? Aparte de ca cosa ni maʼ bidúʼyanu lu Daniel 12:2, versículo 3 ruzeeteʼ sti cosa ni zazaaca despué de gran tribulación.

¹⁰ ¿Tuu nga ca ni guizáʼ zuzaaniʼ «casi guibáʼ» yaʼ? Ca diidxaʼ ni guníʼ Jesús lu Mateo 13:43 zacané laanu gánnanu respuesta ca. Laabe guniʼbe: «Tiempu ca, zuzaaniʼ ca binni justo casi ruzaaniʼ gubidxa lu Reinu stiʼ Bixhózecaʼ». Ora guníʼ Jesús ca diidxaʼ riʼ caniʼbe «ca xiiñiʼ Reinu», laacabe nga ca bíʼchibe ni naca ungidu ni chiguni mandarné laabe lu Reinu ni nuu guibáʼ (Mat. 13:38). Nga runi Daniel 12:3 caniʼni de ca ungidu ne dxiiñaʼ ni chigúnicaʼ ora guni mandar Cristu ti mil iza.

11, 12. ¿Xi dxiiñaʼ chiguni 144,000 lu ti mil iza ca?

¹¹ Ziné ca xpinni Cristu ungidu stale binni lu «neza stiʼ justicia». ¿Ximodo zúnicabe ni yaʼ? Ra gacanécabe Jesucristu gaca dirigir dxiiñaʼ de guiziidiʼ binni de Dios lu 1,000 iza. Cadi rey si chigaca 144,000, sínuque laaca zácacabe sacerdote (Apoc. 1:6; 5:10; 20:6). Nga runi zacanécabe para «guianda guiráʼ nación» ra gacanécabe binni gácacaʼ perfectu chaahuiʼ chaahuiʼ (Apoc. 22:1, 2; Ezeq. 47:12). ¡Guizáʼ ziecheʼ ca ungidu dxi gúnicaʼ ni bizéʼtenu riʼ!

¹² ¿Tuu nga ca binni zié lu neza stiʼ justicia yaʼ? Ca ni guiasa de lade gueʼtuʼ, ca ni guilá lu Armagedón ne ca xcuidihuiiniʼ ni gale ndaaniʼ guidxilayú cubi. Ra guiluxe ti mil iza ca, guiráʼ binni ni guibani ndaaniʼ Guidxilayú riʼ zácacaʼ perfectu. Yanna, ¿padxí nga maʼ qué zaxiá lácabe lu libru de guendanabani ca yaʼ?

13, 14. ¿Xi naquiiñeʼ guni ca binni ni gaca perfectu ante guicaacaʼ guendanabani ni qué zaluxe?

¹³ Cadi guiaandaʼ laanu, ora maʼ perfectu tuuxa qué riníʼ diʼ ni maʼ biʼniʼ ganar guendanabani ni qué zaluxe. Guietenaláʼdxinu ni bizaaca Adán ne Eva. Neca perfectu laacaʼ, peru naquiiñeʼ nuzuubacaʼ stiidxaʼ Jehová para nicaacaʼ guendanabani ni qué zaluxe. Peru qué ñúnicabe ni (Rom. 5:12).

¹⁴ Casi maʼ bidúʼyanu ca, ra guiluxe ti mil iza ca, guiráʼ ca binni guibani ndaaniʼ Guidxilayú riʼ zácacaʼ perfectu. Peru ¿ñee zuni apoyar ca binni perfectu riʼ gobiernu stiʼ Jehová la? ¿O ziuu tu zaca casi Adán ne Eva, neca perfectu laacaʼ, peru qué nuzuubacaʼ diidxaʼ? ¿Ximodo gánnanu ni yaʼ?

15, 16. a) ¿Padxí zusihuinni binni pa qué zudxiideche Jehová? b) ¿Xi zazaaca tidiʼ si binni lu últimu prueba ca?

¹⁵ Zieguyoo Binidxabaʼ 1,000 iza. Tiempu ca qué zanda gusiguiibe guirutiʼ. Peru ra guiluxe 1,000 iza ca, zalaa Binidxabaʼ ne zuyubi modo gusiguii ca binni ni maʼ naca perfectu. Lu prueba ca, nápacabe oportunidad de gusihuínnicabe pa runi respetárcabe lá Dios ne runi apoyárcabe gobiernu stiʼ (Apoc.  20:7-10). Ni gúnicabe zusihuínnini pa maʼ qué zaxiá lácabe lu libru de guendanabani.

¹⁶ Nuu tu laa —qué gánnanu panda— zácacaʼ casi Adán ne Eva, ne zucaanacaʼ gobiernu stiʼ Jehová. ¿Xi zazaaca ca binni riʼ yaʼ? Apocalipsis 20:15 ná: «Bilaacabe guiráʼ ni cadi cá lá lu libru de guendanabani ndaaniʼ lago de bele». Ca binni ni qué guzuubaʼ diidxaʼ zanitilucaʼ para siempre. Peru stale de ca binni perfectu zadíʼdicaʼ lu últimu prueba ca ne maʼ qué zaxiá lacaʼ lu libru de guendanabani.

17. ¿Xi gudxi ti ángel Daniel zazaaca ca dxi stinu riʼ? (Daniel 12:4, 8-10).

¹⁷ ¡Guizáʼ riéchenu ora guiníʼ íquenu ca cosa ni chiguizaaca lu ca dxi ni zeeda ca! Peru laaca gudxi ti ángel Daniel xi zazaaca tiempu nabáninu riʼ o «tiempu gueeda fin» (biindaʼ Daniel 12:4, 8-10; 2 Tim. 3:1-5). Gúdxibe laa: «Stale tu zaziidiʼ ni dxandíʼ». Ndiʼ rusihuinni jma ziene xquidxi Dios ca profecía zeeda lu libru stiʼ Daniel. Laaca guniʼruʼ ángel que xiruʼ sti cosa zazaaca tiempu gueeda fin. Guniʼbe: «Ca binni malu zúnicaʼ  cosa qué iquiiñeʼ ne nin ti binni malu qué ziene».

18. ¿Xi zazaaca ca binni malu?

¹⁸ Tiempu nabáninu riʼ, ruluíʼ gastiʼ rizaaca ca binni ni runi cosa malu (Mal. 3:14, 15). Peru maʼ cadi candaa zuni juzgar Jesús ca binni ni naca casi chiva ne zuxhélebe laacaʼ de ca binni ni naca casi dendxuʼ (Mat. 25:31-33). Qué zalá ca binni malu riʼ lu gran tribulación ne qué ziásacaʼ para guibánicaʼ ndaaniʼ guidxilayú cubi. Qué zacá lacaʼ lu «libru para guietenaláʼdxibe», ni riete lu Malaquías 3:16.

19. ¿Xi caquiiñeʼ gúninu yanna, ne xiñee? (Malaquías 3:16-18).

¹⁹ Yanna nga zanda gusihuínninu cadi nuunu lu grupu ra nuu ca binni malu (biindaʼ Malaquías 3:16-18). Cucaalisaa Jehová «ti guidxi risaca» para laa. ¿Cadi dxandíʼ riuuláʼdxinu chuʼnu ndaaniʼ guidxi ca la?

20. ¿Xi últimu promesa biʼniʼ Jehová Daniel, ne xiñee maʼ racaláʼdxiluʼ gaca cumplir ni?

²⁰ Tiempu riʼ cazaaca cosa ni guizáʼ cadxagayaanu. Peru maʼ cadi candaa zazaaca xcaadxi cosa ni jma zadxagayaanu. Maʼ cadi candaa zaree guiráʼ cosa malu. Despué, zadúʼyanu ximodo gaca cumplir promesa ni biʼniʼ Jehová Daniel ora gúdxibe laa: «Ziásaluʼ para guicaaluʼ ni maʼ nexheʼ guicaaluʼ ora maʼ guiluxe ca dxi ca» (Dan. 12:13). ¿Ñee maʼ racaláʼdxiluʼ guedandá dxi guiasa Daniel ne ca familia stiluʼ de lade gueʼtuʼ la? Pa zacá ni, biʼniʼ stipa gácaluʼ fiel, ne qué zaxiá laluʼ lu libru de guendanabani stiʼ Jehová.