Guidúʼyanu xi rusiidiʼ Biblia.

Hechos 24:15 ná zabani «ca ni biʼniʼ ni jneza ne ca ni qué ñuni ni jneza». Ca binni ni biʼniʼ ni jneza nga ca ni bizuubaʼ stiidxaʼ Dios ante gáticaʼ, nga runi cá lacaʼ lu libru de guendanabani (Mal. 3:16). Lade ca binni ni qué ñuni ni jneza nuu ca ni qué ñapa oportunidad de ñunibiáʼ Jehová ante ñáticaʼ, nga runi cadi cá lacaʼ lu libru de guendanabani.

Ca grupu ni riete lu Juan 5:28, 29 laca laacani nga ni riete lu Hechos 24:15. Jesús guníʼ «ziasa ca ni biʼniʼ ni jneza para guibánicaʼ ne ziasa ca ni biʼniʼ cosa malu para gaca juzgarcaʼ». Ca binni ni biʼniʼ ni jneza nga ca ni biʼniʼ cosa galán ante gatiʼ. Ziásacaʼ para guibánicaʼ purtiʼ cá lacaʼ lu libru de guendanabani. Ne ca binni ni biʼniʼ cosa malu nga ca ni qué ñuni ni jneza ante gáticaʼ. Laacaʼ ziásacaʼ para gaca juzgarcaʼ. Caʼruʼ diʼ guicá lácabe lu libru de guendanabani, ne zadíʼdicabe ti tiempu de prueba. Tiempu ca, zápacabe oportunidad de guiziidicabe de Jehová ne guicá lácabe lu libru de guendanabani.

Apocalipsis 20:12, 13 cusiene napa xidé chinanda guiráʼ ca ni guiasa de lade gueʼtuʼ «ni cá lu ca rollo que», laaca ni nga ca ley nacubi ni zacaanu ndaaniʼ guidxilayú cubi ca. Ca ni qué guzuubaʼ diidxaʼ zanitilucaʼ (Is. 65:20).

Daniel 12:2 cuzeeteʼ caadxi de ca ni nisiaasiʼ lu guendaguti zabánicaʼ «para guicaacaʼ guendanabani ni qué zaluxe ne xcaadxi para gusituibe lucaʼ ne qué zusaana de gucaanabe laacaʼ». Textu riʼ cusiene xi zazaaca ca ni guiasa de lade gueʼtuʼ, nuu de laacaʼ ziásacaʼ «para guicaacaʼ guendanabani ni qué zaluxe» ne xcaadxi ziásacaʼ «ne qué zusaana de gucaanabe laacaʼ». Nga runi ra guiluxe 1,000 iza zacaa caadxi guendanabani ni qué zaluxe ne xcaadxi zanitilucaʼ para siempre (Apoc. 20:15; 21:3, 4).

Guiropaʼ grupu ni chiguiasa de lade gueʼtuʼ zanda guchaaganu laacabe caadxi binni ni racalaʼdxiʼ cueza ndaaniʼ sti guidxi. Ca binni ni biʼniʼ ni jneza zeeda gácacaʼ casi ti extranjeru ni ricaa ti permisu para guni dxiiñaʼ raqué o cueza raqué. Peru ca binni niʼ qué ñuni ni jneza zeeda gácacaʼ casi ti extranjeru ni ricaa ti permisu para cueza ndaaniʼ guidxi que ti tiempu si. Para ganda cuézabe ndaaniʼ guidxi ca, napa xidé guchabe caadxi requisitu ni rinabaʼ ley stiʼ guidxi ca. Yanna, para ganda guiaana binni ndaaniʼ Paraísu ni chichuu lu Guidxilayú, ca binni ni qué ñuni ni jneza napa xidé chinándacaʼ ca ley stiʼ Jehová ne gusihuínnicaʼ nácacaʼ binni ni runi ni jneza. Intiica permisu guicaa ti extranjeru para chuʼ ndaaniʼ ti guidxi, ra tidiʼ tiempu nuu tu laa rudiicabe laa permisu para guiaana raqué ne xcaadxi rudxiguétacabe laa xquidxi. Pur modo guibánicabe ndaaniʼ guidxi ca zahuinni pa zabézacabe ndaaniʼ ni o coʼ. Zacaca nga zazaaca ca binni ni guiasa de lade gueʼtuʼ, naquiiñeʼ guibánicabe modo racalaʼdxiʼ Dios ndaaniʼ guidxilayú cubi ca ne gusihuínnicabe ruzuubacabe diidxaʼ pa racaláʼdxicabe guilácabe.

Cadi naca si Jehová ti Dios ni riá, sínuque laaca nácabe ti Dios ni runi jneza (Deut. 32:4; Sal. 33:5). Zahuinni guendarannaxhii stibe ora guindísabe ca binni ni biʼniʼ ni jneza ne ca ni qué ñuni ni jneza, peru laaca zabézabe chinándacaʼ ca ley stibe ni caníʼ xii nga ni jneza ne ni cadi jneza. Ca ni gannaxhii laabe ne chinanda ca ley stibe qué zusaana de guibánicaʼ ndaaniʼ guidxilayú cubi.