1, 2. ¿Xiñee galán guni estudiarnu ejemplu stiʼ Sansón?

 ¿XI RINÍʼ íqueluʼ ora gunadiágaluʼ de Sansón? Zándaca riníʼ íqueluʼ ti hombre guizáʼ nadipaʼ, ne zacá ni; peru laaca bicheebe, pur ni bíʼnibe ca gúpabe guendanagana. Neca bicheebe, biiyaʼ Jehová pabiáʼ fe bisihuínnibe lu xquendanabánibe ne guná guicá lu Biblia ejemplu stibe para ganda guizíʼdinu de laabe.

² Biquiiñeʼ Jehová Sansón para gacané Israel, xquidxi. Pur espíritu santu gudxi Jehová apóstol Pablo, gucá lá Sansón lu lista ra zeeda lá ca ni gupa fe (Heb. 11:​32-34). Neca gudiʼdiʼ Sansón lu guendanagana, peru qué nusaana de nuyubi ñacané Jehová laa. Lu artículo riʼ zadúʼyanu xi zanda guizíʼdinu de ejemplu stibe ne ximodo zanda cuʼ ni gana laanu.

3. ¿Xi dxiiñaʼ gucuaa Sansón?

³ Dxi gule Sansón nuu guidxi Israel lu náʼ ca filisteu (Juec. 13:1). Nabé malu guca ca filisteu, guizáʼ biquiichinacaʼ guidxi Israel, ngue runi nabé gucaná ca israelita. Pur ngue gulí Jehová Sansón para ganda gulabe guidxi «Israel de lu náʼ ca filisteu» (Juec. 13:5). ¡Aque nagana dxiiñaʼ riʼ xa! Ngue runi caquiiñeʼ guyubi Sansón gacané Jehová laa.

4. ¿Ximodo gucané Jehová Sansón? (Jueces 15:​14-16).

⁴ Guidúʼyanu ti biaje ra bisihuinni Sansón napa confianza Jehová. Guyé caadxi soldadu filisteu guidxi Lehí,  ni zándaca nuu ndaaniʼ guidxi Judá, para guinaazecaʼ Sansón. Guizáʼ bidxibi ca hombre de Judá, ngue runi bidiicabe Sansón ca hombre que. Ca bíʼchibe israelita, bindiibicaʼ laabe né chupa doo naguidxi ne yenecaʼ laabe ra nuu ca filisteu que (Juec. 15:​9-13). Peru «bidii espíritu stiʼ Jehová laabe stipa», ne gunda bichuugube doo que. Ne despué, «bidxélabe ti quijada stiʼ ti burru ni deruʼ guti», gucuaabe ni ne biitinebe ni ti mil filisteu (biindaʼ Jueces 15:​14-16).

5. ¿Ximodo bisihuinni Sansón napa confianza Jehová?

⁵ ¡¿Ti quijada stiʼ ti burru la?! ¿Xiñee nga peʼ biquiiñeʼ Sansón yaʼ? Purtiʼ nánnabe ni jma risaca nga guyúbibe gacané Jehová laabe ne cadi ni iquiiñebe para tindenebe ca binni que. Biquiiñeʼ hombre fiel riʼ ni bidxela óraque para ganda guni ni racalaʼdxiʼ Jehová. Ne cumu biyúbibe gacané Jehová laabe la? biree ca cosa que jneza.

6. ¿Xi rizíʼdinu de ni bizaaca Sansón?

⁶ Zudii Jehová laanu stipa para ganda gúninu dxiiñaʼ ni maʼ bidiibe laanu ndaaniʼ organización stibe neca ruluíʼ qué zanda gúninu ca ni. Zanda gacanebe laanu modo cadi cabézanu, dede zadxagayaanu. Pa guyúbiluʼ gacané Jehová lii la? gunna dxichi zacanebe lii gúniluʼ ni racaláʼdxibe ne zudiibe stipa lii cásica bidiibe ni Sansón (Prov. 16:3).

7. ¿Xi ejemplu rusihuinni risaca nga chinándanu ni gabi Jehová laanu?

⁷ Rusihuinni ca hermanu ne hermana ni runi dxiiñaʼ lu proyectu de construcción nápacaʼ confianza Jehová. Dxiqué la? organización stiʼ Jehová nga ruuyaʼ gaca diseñar ne cuiʼ casi guiráʼ ca Yoo stiʼ Reinu ne xcaadxi edificiu casi laacani. Peru cumu ziroobaʼ xquidxi Jehová la? gupa xidé bichaa caadxi cosa. Ngue runi biyubi ca hermanu ni ruuyaʼ gaca ca dxiiñaʼ riʼ gacané Jehová laacaʼ ne bizulú biquiiñecaʼ gadxé gadxé modo  para gúnicaʼ ca dxiiñaʼ riʼ. Tobi de ca cosa ni bíʼnicabe nga guzíʼcabe layú ra maʼ zuba yoo ne bizulú biʼniʼ chaahuicabe ca ni. Ti hermanu láʼ Robert, ni huayuni dxiiñaʼ lu guidubi Guidxilayú, lu ca últimu iza riʼ lu stale proyectu de construcción guníʼ: «Primeru gaʼ que, nagana guca para laadu guizíʼdidu iquíʼñedu modo nexheʼ gúnidu dxiiñaʼ riʼ. Maʼ gadxé ni de modo biaʼdu gúnidu dxiiñaʼ. Peru guná ca hermanu que gúnicaʼ dxiiñaʼ modo nexheʼ gaca ni yanna, zaqué bihuinni caguu Jehová ndaayaʼ ca cambiu riʼ». Ni bidúʼyanu riʼ, rusihuinni ni Jehová peʼ nga cayabi xquidxi xi guni para ganda gúnicaʼ ni racaláʼdxibe. Nga runi, gatigá galán guiníʼ íquenu: «¿Ñee ruzuubaʼ stiidxa Jehová ne runeʼ stipa chinandaʼ ora guidxaa xiixa ndaaniʼ xquídxibe la?».

8. ¿Xi biʼniʼ Sansón ti dxi guizáʼ cayati nisa?

⁸ Zándaca rietenaláʼdxiluʼ ni biʼniʼ Sansón. Casi dxi bicaalube ne biitibe ti lión ne despué biitibe 30 filisteu de guidxi Asquelón (Juec. 14:​5, 6, 19). Gunna dxiichiʼ Sansón pa qué ñacané Jehová laa qué ñanda ñuni ca cosa riʼ. Ne bihuinni ximodo biyúbibe gacané Jehová laabe purtiʼ despué de biitibe ti mil filisteu guizáʼ bisiati ni laabe nisa ne lugar de nuyúbibe nisa la? biyúbibe gacané Jehová laabe (Juec. 15:18).

9. ¿Ximodo bicabi Jehová Sansón? (Jueces 15:19).

⁹ ¿Ximodo bicabi Jehová Sansón yaʼ? bíʼnibe ti milagru, biʼniʼ Jehová guidá nisa. Ora güeʼ Sansón nisa que «biguetaʼ stipa stiʼ ne guyuu gana» (biindaʼ Jueces 15:19). Ne fuente ra biree nisa riʼ nuuruʼ ni ca iza bicaa profeta Samuel libru stiʼ Jueces. Zándaca ora guʼyaʼ ca israelita que ra bidá nisa riʼ rusietenalaʼdxiʼ ni laacaʼ pa guyúbicaʼ gacané Jehová laacaʼ la? zacanebe laacaʼ ora tídicaʼ lu xiixa guendanagana.

10. ¿Xi caquiiñeʼ gúninu para gacané Jehová laanu? (Biiyaʼ ca imagen ca).

¹⁰ Cásica Sansón, guiranu naquiiñeʼ guyúbinu Jehová. Guiranu caquíʼñenu de laabe, gastiʼ naca xi habilidad o privilegiu maʼ bigaandanu ndaaniʼ xquídxibe. Nga runi, caquiiñeʼ gánnanu nuu cosa ni qué zanda gúninu ne guyúbinu gacané Jehová laanu. Cásica biguetaʼ stipa stiʼ Sansón ora güeʼ nisa ni bidii Jehová laa que la? zaqueca zazaaca né laanu pa guicaanu guiráʼ ca cosa ni rudii Jehová para gacané laanu. Zacané ca ni laanu chuʼnu jma gaxha de laabe (Mat. 11:28).

11. Para cueendunu ni galán, ¿xi caquiiñeʼ gúninu ora gacané Jehová laanu? Ne ¿xi rizíʼdinu de ni bizaaca ti guendaxheelaʼ?

¹¹ Guidúʼyanu xi huayacané ti hermanu de Rusia láʼ Alexéi gudxiilú guendanagana ra canazanándacabe ca hermanu stinu. ¿Xi rudii stipa laabe para guni huantarbe yaʼ? Laabe ne xheelabe rúnicabe ca cosa ni ruchiña laacabe jma gaxha de Jehová. Alexéi guníʼ: «Runeʼ stipa chinandaʼ ti programa ni guchiñaʼ naa gaxha de Jehová, ruundaʼ ne runeʼ estudiar Biblia guiráʼ dxi. Ne guiráʼ siadóʼ naa ne xheelaʼ ridúʼndadu textu stiʼ cada dxi ne runi orardu Jehová». ¿Xi rizíʼdinu de ejemplu riʼ yaʼ? Rusiidiʼ ni laanu cadi guiníʼ íquenu stúbisinu zanda gudxíʼlunu ca guendanagana stinu, sínuque caquíʼñenu gacané Jehová laanu. ¿Ximodo yaʼ? Guquídxinu fe  stinu ra guidúʼndanu Biblia, guni orarnu, chuunu ca reunión ne guni predicarnu. Pa gúninu ca ni bizéʼtenu riʼ, zaguu Jehová ndaayaʼ laanu ne zacanebe laanu gúninu ni nabe. Cásica bidiibe stipa Sansón, laaca zudiibe stipa laanu.

12. ¿Xi decisión cadi jneza gucuaa Sansón, ne xiñee maʼ gadxe ni de xcaadxi decisión ni gucuaabe?

¹² Cumu guca Sansón binni ruchee cásica laanu la? laaca guyuu biaje gucuaabe decisión ni cadi jneza ne bicheebe. Gúpabe guendanagana pur ti decisión cadi jneza ni gucuaabe. Dxi maʼ zinebe iza de nácabe juez, «guyuuláʼdxibe ti gunaa láʼ Dalila ni nabeza ndaaniʼ valle stiʼ Sorec» (Juec. 16:4). Ante gunibiaʼbe Dalila, gucaláʼdxibe nichaganabe ti gunaa filistea ne Biblia ná «Jehová ngue cayúnini para gunitilú ca filisteu». Despué guyé Sansón ndaaniʼ ti guidxi stiʼ ca filisteu ni láʼ Gaza ne raqué biaanabe ra lidxi ti prostituta. Gucané Jehová Sansón para gaxhaʼ ca puertaʼ ni nuu entrada stiʼ guidxi que, zaqueca ca poste ne ca barra stini (Juec. 14:​1-4; 16:​1-3). Peru maʼ gadxe si nga guichaganabe Dalila. ¿Xiñee yaʼ? Purtiʼ zándaca naca gunaa riʼ israelita, ngue runi qué zacané ndiʼ laabe para gunitilube ca filisteu.

13. ¿Xi biʼniʼ Dalila para gabi Sansón laa secretu stiʼ?

¹³ Racalaʼdxiʼ ca filisteu guni traicionar Dalila Sansón. Ne gunabe gúnibe ni purtiʼ gúdxicabe laabe zudiicabe laabe stale moneda de plata. Peru ¿ximodo ndiʼ qué nudii Sansón cuenta ni racalaʼdxiʼ Dalila guni? ¿Ñee purtiʼ guizáʼ riuuláʼdxibe gunaa que la? Cumu qué nusaana de  niziñe Dalila Sansón ne gucuabe tema gabi laabe paraa zeeda stipa stiʼ la? ngue runi gudxi laabe secretu stiʼ. Pur ni biʼniʼ Sansón riʼ biniti stipa stiʼ ne maʼ qué ñapa ndaayaʼ stiʼ Jehová pur ti tiempu (Juec. 16:​16-20).

14. ¿Xi bizaaca Sansón pur gupa confianza Dalila?

¹⁴ Jma gupa Sansón confianza Dalila que Jehová, ngue runi cadi galán ni guleendube. Yené ca filisteu laabe ne gúxhacaʼ guiropaʼ guielube. Despué biseguyoocabe laabe ndaaniʼ guidxi Gaza —guidxi ra gúxhabe ca puertaʼ que— ne raqué bíʼnicabe laabe esclavu ne bicaacabe laabe gúʼtube semiá né ti molinu. Despué biʼniʼ ca filisteu ti saa para guni adorarcaʼ Dagón, dios sticaʼ, purtiʼ zacaxacaʼ pur laabe nga biʼniʼ ganarcaʼ Sansón. Biblia ná: «Guleecabe Sansón de ra deguyoo para guxhídxicabe laa» (Juec. 16:​21-25).

15. ¿Ximodo biyubi Sansón gacané Jehová laa sti biaje? (Jueces 16:​28-30; biiyaʼ dibuju ni zeeda lu portada).

¹⁵ Neca bichee Sansón peru qué niree gana. Racaláʼdxibe gúnibe dxiiñaʼ ni bidii Jehová laabe, laani nga tindenebe ca filisteu (biindaʼ Jueces 16:​28-30). Ngue runi de guidubi ladxidóʼ Sansón gunabaʼ Jehová: «Bidii lugar guquixe ca filisteu ni bíʼnicaʼ». Bicaadiaga Dios oración stibe ne bidxiguetaʼ stipa stibe stiʼ biaje. Ne zaqué nga biiti Sansón stale filisteu jma que biaʼ huayuuti.

16. ¿Xi rizíʼdinu de Sansón?

¹⁶ Neca gupa xidé bidxiilú Sansón guiráʼ ni bizaaca pur ti cosa ni cadi jneza biʼniʼ la? qué nusaana de ñúnibe stipa pur gúnibe ni ná Jehová. Nga runi, laanu laaca cadi caquiiñeʼ guireʼnu gana pa bíninu xiixa ni cadi jneza ne pur laani gudiicabe laanu xiixa disciplina o gunítinu xiixa privilegiu. Peru cadi guiaandaʼ laanu, qué riníʼ ique Jehová maʼ qué zanda guchaʼnu (Sal. 103:​8-10). Neca gucheʼnu, risácanu para laabe ne zanda iquiiñebe laanu cásica bíʼnibe né Sansón.

17, 18. ¿Ximodo racané ejemplu stiʼ Michael laanu? (Biiyaʼ ca imagen ca).

¹⁷ Guidúʼyanu ni bizaaca ti hermanu láʼ Michael. Nabé nuu xhiiñabe purtiʼ cayúnibe ni ná Jehová, nácabe siervu ministerial ne precursor regular. Peru málasi  bíʼnibe ti cosa ni cadi jneza ne pur ngue binítibe ca privilegiu ni nápabe. Laabe guniʼbe: «Né stale gana bizuluáʼ bineʼ ni ná Jehová peru málasi bizaaca xiixa ni bicueeza naa. Casi ñaca nidxelasaaʼ guriá yoo. Nannadxicheʼ qué zusaana Jehová naa, peru riníʼ iqueʼ pa ziuu dxi zaca xhamiguaʼ laabe sti biaje casi dxiqué o pa zabiguetaʼ gapaʼ ca responsabilidad ni gupaʼ ndaaniʼ congregación».

¹⁸ Galán biʼniʼ Michael, qué niree gana. Laabe guniʼbe: «Bineʼ stipa guidxiñaʼ jma gaxha de Jehová. Ni gucané naa nga biaaʼ guneʼ orar laabe de guidubi ladxiduáʼ, guneʼ estudiar ne guiníʼ iqueʼ ni cayuundaʼ». Ra gudiʼdiʼ tiempu, biguetaʼ gucuaa Michael ca privilegiu ni biniti que. Yanna nácabe ancianu ne precursor regular. Laabe ruzeetebe: «Nabé gucané ca hermanu que naa, jmaruʼ si ca ancianu, gucanécabe naa guuyaʼ qué huasaana Jehová de gannaxhii naa. Yanna, maʼ zanda guneʼ ni ná Jehová sin guchiiñaʼ conciencia stinneʼ. Ni bizaaca riʼ rusiidiʼ ni naa runi perdonar Jehová tuuxa ni dxandíʼ peʼ gaca arrepentir». Cásica Michael, neca gucheʼnu risácarunu para Jehová. Pa gúninu stipa guchaʼnu ne guyúbinu gacanebe laanu la? zaquiiñebe laanu ne qué zusaana de cuʼbe ndaayaʼ laanu (Sal. 86:5; Prov. 28:13).

19. ¿Ximodo riguu ejemplu stiʼ Sansón gana lii?

¹⁹ Lu artículo riʼ maʼ bidúʼyanu caadxi cosa ni bizaaca Sansón. Neca guyuu ra bicheebe ne jmaruʼ si ni bizaacanebe Dalila. Peru qué nireebe gana, qué nusaana de ñúnibe ni ná Jehová. Qué niníʼ ique diʼ Jehová maʼ qué zanda guchaabe. Sínuque biquiiñeruʼ laabe para gusihuínnibe poder stiʼ. Biiyaʼ Jehová Sansón casi tobi de ca hombre ni guizáʼ gupa fe, ngue runi bidiibe lugar guicá lá lu lista ra zeeda lá ca binni ni gupa fe ni zeeda lu libru stiʼ Hebreos capítulo 11. Nabé riuunu gana ora gánnanu guizáʼ nadxii Jehová laanu ne racaláʼdxibe gudiibe stipa ni caquíʼñenu, jmaruʼ si ora cadídinu lu guendanagana ne caquíʼñenu gacanebe laanu. Nga runi, cásica Sansón, gábinu Jehová: «Bietenalaʼdxiʼ de naa Dios stinneʼ, rinabaʼ lii gudiiluʼ naa stipa» (Juec. 16:28).