1. ¿Xi bidxaagalú Jehoás, Uzías ne Josías?

 GUNÍʼ ique nácaluʼ ti xcuidihuiiniʼ o ti jovenhuiiniʼ ne ñábicabe lii ñácaluʼ rey ndaaniʼ xquidxi Dios, ¿xi ñunineluʼ poder ne autoridad ni nudiicabe lii ca yaʼ? Ruzeeteʼ Biblia beeda gaca caadxi jovenhuiiniʼ rey stiʼ Judá. Casi, Jehoás beeda gaca rey dxi napa 7 iza, Uzías, dxi napa 16 ne Josías dxi napa 8 iza. ¡Guizáʼ naroʼbaʼ dxiiñaʼ gucuaacabe! Ne gucané Jehová laacabe para gúnicabe ni ne zacá gúnicabe ni jneza lu xquendanabánicabe.

2. ¿Xiñee galán gúʼndanu ejemplu stiʼ Jehoás, Uzías y Josías?

² Rusiidiʼ ni bizaaca guionnaʼ rey riʼ laanu cosa risaca neca cadi nácanu rey nin reina. Zanda guizíʼdinu stale cosa de ca decisión jneza ne ni cadi jneza gucuaacabe. Rusiidiʼ ejemplu stícabe laanu pabiáʼ risaca cuinu tu gaca xhamígunu, gácanu humilde ne cadi gusaana de guyúbinu Jehová.

3. ¿Xi biʼniʼ Jehoás pur ni bisiidiʼ Jehoiadá laa?

³ Gucuaa decisión jneza casi Jehoás. Dxi nahuiiniʼ Jehoás guti bixhozeʼ. Bisiniisi sumo sacerdote Jehoiadá laabe casi xiiñiʼ ne bisiidiʼ laabe stale de Jehová. Guca Jehoás binni nuu xpiaaniʼ purtiʼ binadiágabe ca conseju ni bidii Jehoiadá laabe ne pur nga bíʼnibe ni ná Dios ne gucanebe guidxi que gúnicaʼ zaqueca. Ne biʼniʼ mandarbe gaca chaahuiʼ templu que (2 Crón. 24:​1, 2, 4, 13, 14).

4. Ra chinándanu ca ley stiʼ Jehová, ¿ximodo racané ca ni laanu? (Proverbios 2:​1, 10-12).

⁴ Pa cusiidiʼ bixhózeluʼ ne jñaaluʼ o sti binni lii gannaxhiiluʼ Jehová ne chinándaluʼ ca norma stiʼ, cudiicabe lii ti regalu guizáʼ galán (biindaʼ Proverbios 2:​1, 10-12). De stale  modo nga zanda gusiidiʼ ca padre ca xiiñicaʼ. Guidúʼyanu xi biʼniʼ bixhoze ti hermana láʼ Katia para gacané laa guicaa decisión jneza. Guiráʼ dxi riníʼnebe xiiñibe de textu ni biaba dxi que laga zisaanabe laa ra scuela. Katia guníʼ: «Gucané guiráʼ ni riníʼnebe naa que gudxieeluáʼ ca guendanagana ridxaagaluáʼ guiráʼ dxi». Peru zándaca iquiiñeʼ bixhózeluʼ ne jñaaluʼ Biblia para gábicaʼ lii xi gúniluʼ ne laani gucaani lii guiníʼ íqueluʼ qué rinácabe gúniluʼ ni racaláʼdxiluʼ. Yanna, ¿xi zanda gacané lii para chinándaluʼ ni gábicabe lii yaʼ? Ti hermana láʼ Anastacia ruzeeteʼ cadi riníʼ si bixhózebe ne jñaabe xi naquiiñeʼ gúnibe, sínuque ribeecaʼ tiempu para gusiénecaʼ laabe xiñee rúnicabe ni. Laabe guniʼbe: «Gucané ni naa guieneʼ qué rúnicabe ni para gucueezacabe naa de guneʼ xiixa, sínuque para gusihuínnicabe nadxiicabe ne rápacabe naa».

5. Pur ca decisión guicaaluʼ, ¿xi zándaca guni sentir bixhózeluʼ, jñaaluʼ ne Jehová? (Proverbios 22:6; 23:​15, 24, 25).

⁵ Guizáʼ zusiécheluʼ bixhózeluʼ ne jñaaluʼ pa chinándaluʼ ca conseju ni gudiicaʼ lii ni zeeda lu Biblia. Ne ni jma risaca nga zusiécheluʼ Jehová ne qué zusaana de gaca xhamíguluʼ laabe (biindaʼ Proverbios 22:6; 23:​15, 24, 25). Ne ndiʼ nga caadxi razón galán ni nápaluʼ para chinándaluʼ ejemplu stiʼ Jehoás dxi guca jovenhuiiniʼ.

6. ¿Tu stiʼ conseju yenanda Jehoás ne xi bizaacabe pur laani? (2 Crónicas 24:​17, 18).

⁶ Biziidiʼ de ca decisión cadi jneza gucuaa Jehoás. Guti si Jehoiadá, guca xhamigu Jehoás binni ni qué runi ni jneza (biindaʼ 2 Crónicas 24:​17, 18). Bicaadiágabe ca conseju stiʼ ca príncipe de Judá ni qué runi ni ná Jehová. Cadi naquiiñeʼ nucaadiágabe ca conseju sticaʼ (Prov. 1:10). Peru bíʼnibe ni cadi jneza ne bíʼnibe ni ná ca xhamígube. Ne ora gucalaʼdxiʼ xprímube Zacarías niguu jneza laabe, biʼniʼ mandarbe gúticabe laa (2 Crón. 24:​20, 21; Mat. 23:35). Guizáʼ feu ni bíʼnibe, ¿njaʼ? Bisihuinni Jehoás maʼ cadi nuu xpiaaniʼ. Dxi ndaʼ nahuiiniʼ biʼniʼ cosa ni jneza peru beeda gácabe ti apóstata ne biitibe binni. Despué, laaca ca xpínnibe biiti laabe (2 Crón. 24:​22-25). Pa ñaca qué nusaana de nucaadiágabe Jehová ne ca ni nadxii laabe la? maʼ gadxé si ñaca xquendanabánibe. ¿Xi rusiidiʼ relatu riʼ lii yaʼ?

7. ¿Tu binni naquiiñeʼ cuinu gaca xhamígunu? (Biiyaʼ imagen ca).

⁷ Pur ca decisión ni cadi jneza gucuaa Jehoás, zanda guizíʼdinu ti cosa risaca: naquiiñeʼ cuinu tu gaca xhamígunu, binni  ni zanda gacané laanu, ca ni nadxii ne racaláʼdxicaʼ gusiéchecaʼ ladxidóʼ Jehová. Ne laaca zanda gápanu xhamígunu ni jma huaniisi o jma nahuiiniʼ que laanu. Bietenalaʼdxiʼ jma nahuiiniʼ Jehoás que Jehoiadá. Yanna, guníʼ ique ca xhamíguluʼ ne gunabadiidxaʼ ndiʼ lii: «¿Ñee racanécabe naa para gapa jma fe Jehová la? ¿Ñee riguucabe gana naa para guibaneʼ modo ná Jehová la? ¿Ñee riuuláʼdxicabe guiníʼcabe de Jehová ne de ni ruundacabe de lu Biblia? ¿Ñee runi respetárcabe ca ley stiʼ Jehová la? ¿Ñee rábicabe naa ora runeʼ xiixa cosa ni cadi jneza la? o qué rábicabe naa gastiʼ?» (Prov. 27:​5, 6, 17). Ni dxandíʼ la? cadi caquiiñeluʼ amigu ni cadi nadxii Jehová. Peru pa ca xhamíguluʼ nadxii Jehová la? cadi guixéleluʼ de laacaʼ purtiʼ qué zusaana de gacanecaʼ lii (Prov. 13:20).

8. ¿Xi caquiiñeʼ gánnaluʼ ora iquiiñeluʼ ca red social?

⁸ Tiempu riʼ zanda gacané ca red social ca laanu para ganda guinínenu familia stinu ne ca xhamígunu. Peru stale tu rudxiibaʼ foto ne videu de ca cosa ni maʼ guzíʼ para guʼyaʼ si xcaadxi ni nápacaʼ. Para riquiiñeluʼ ca red social ca, zanda guiníʼ íqueluʼ «¿Ñee nuaaʼ guidxagayaaʼ xcaadxi ni runeʼ la? ¿Xii ndiʼ nuaaʼ guneʼ, nuaaʼ gacaniáʼ xcaadxi la? o gusisácacabe naa? ¿Ñee rudieeʼ lugar guicá modo riníʼ, modo riníʼ ique o ni runi binni naa la?». Ti biaje hermanu Nathan Knorr ni guyuu lu grupu ni zaniruʼ bidii conseju riʼ: «Cadi gúnitu ni riuulaʼdxiʼ binni purtiʼ que zusiéchetu guirácabe. Laguni ni ná Jehová ne zusiéchetu ca ni nadxii laabe».

9. ¿Xi gunda biʼniʼ Uzías purtiʼ gucané Jehová laa? (2 Crónicas 26:​1-5).

⁹ Gucuaa decisión jneza casi Uzías. Dxi guca rey Uzías joven guca humilde ne biziidibe «guidxíbibe Dios ni dxandíʼ». Bibánibe 68 iza, ne guluu Jehová ndaayaʼ laabe casi lu guidubi naca xquendanabánibe (biindaʼ 2 Crónicas 26:​1-5). Biʼniʼ ganar Uzías ca guidxi ni bicaalú laa ne biiyabe guiaapaʼ guidxi Jerusalén (2 Crón. 26:​6-15). Guyuu Uzías nayecheʼ pur guiráʼ ni biʼniʼ purtiʼ gucané Jehová laa (Ecl. 3:​12, 13).

10. ¿Xi bizaaca Uzías?

¹⁰ Biziidiʼ de ca decisión cadi jneza ucuaa Uzías. Cumu maʼ biaa rey Uzías guni xcaadxi ni ná la? zándaca nga bicaa laabe guiníʼ íquebe zanda gúnibe ni gacaláʼdxibe. Ti dxi guyubeʼ ndaaniʼ templu stiʼ Jehová ne bizaaquibe guʼxhuʼ lu altar que, ti cosa ni cadi naquiiñeʼ guni ca rey (2 Crón. 26:​16-18). Guluu jneza sumo sacerdote Azarías laabe, peru Uzías guizáʼ bidxiichi. Triste guininu ni peru maʼ qué ñuni Uzías ni ná Jehová, ne laa biʼniʼ castigar laabe né lepra (2 Crón. 26:​19-21). Maʼ gadxé si ñaca xquendanabánibe pa qué nusaanabe de ñácabe humilde.

11. ¿Xi runi ti binni ni naca humilde? (Biiyaʼ ca imagen ca).

¹¹ Ora beeda gaca Uzías ti rey ni napa poder, bisiaandabe Jehová ngue gucané laabe lu guiráʼ ni bíʼnibe. ¿Xi rusiidiʼ ndiʼ laanu yaʼ? Rusiidiʼ ni laanu cadi naquiiñeʼ gusiáʼndanu guiráʼ cosa galán ni rizaacanu lu xquendanabáninu ne ra cayúninu xhiiñaʼ Jehová zeeda ca ni de laabe. Ne cadi guni presumirnu pur ca ni maʼ bíninu, sínuque gusisácanu Jehová pur laacani (1 Cor. 4:7). b Risaca gácanu humilde ne guiníʼ íquenu nácanu binni ruchee ne naquiiñeʼ uguu jnézacabe laanu. Ti hermanu ni napa jma de 60 iza bicaa: «Maʼ biziideʼ  cadi gusisacaʼ laca naa. Ora uguu jneza tuuxa naa pur ca cosa ni cadi jneza guneʼ, runeʼ stipa pur guchaaʼ ne guneʼ ca cosa ca jma galán». Pa gácanu humilde ne guidxíbinu guchéʼnenu Jehová zabáninu galán (Prov. 22:4).

12. ¿Xi biʼniʼ Josías dxi naca jovenhuiiniʼ para chuʼ gaxha de Jehová? (2 Crónicas 34:​1-3).

¹² Gucuaa decisión jneza casi Josías. Biyubi Josías Jehová dxi naca ti jovenhuiiniʼ. Racaláʼdxibe gunibiáʼ chaahuibe Dios stibe ne gúnibe ni ná. Peru nagana para Josías gaca rey, ¿xiñee yaʼ? Purtiʼ ca dxi que stale binni runi adorarcaʼ xcaadxi dios. Ngue runi gúcabe nadxibalú para guni adorarbe Dios ni dxandíʼ. ¡Biaʼsi peʼ modo bíʼnibe ni! Purtiʼ nin 20 iza qué gápabe dxi bizulú guleebe de ndaaniʼ guidxi que guiráʼ ca cosa ni biquiiñeʼ para gaca adorar ca dios ni cadi dxandíʼ (biindaʼ 2 Crónicas 34:​1-3).

13. ¿Xi zabeenduluʼ pa gudiiluʼ xquendanabániluʼ Jehová?

¹³ Neca nahuiiniluʼ zanda gácaluʼ casi Josías. ¿Ximodo yaʼ? Ra guyúbiluʼ Jehová ne guiziidiluʼ jma de ca cualidad sicarú stiʼ. Ndiʼ zucaa ni lii gudiiluʼ xquendanábaniluʼ Jehová. ¿Xi zabeenduluʼ pur laani yaʼ? Ti hermanu ni guyuunisa dxi napa 14 iza láʼ Luke, guníʼ: «Dede yannadxí zuneʼ ni ná Jehová primé lu xquendanabaneʼ ne zuneʼ stipa pur gusiecheʼ laa» (Mar. 12:30). Zacaaluʼ stale ndaayaʼ pa quixhe íqueluʼ gúniluʼ zacá.

14. ¿Ximodo rinanda caadxi joven ejemplu stiʼ rey Josías?

¹⁴ ¿Xi zándaca guidxagalú ca joven ni runi ni ná Jehová? Ti hermanu láʼ Johan ni guyuunisa dxi napa 12 iza, guniʼbe nabé racalaʼdxiʼ ca compañeru de scuela stibe gucaa laabe cúbabe gueza electrónicu. ¿Xi rúnibe para gudxiilube ni yaʼ? riníʼ íquebe ximodo zanda guniná ni laabe ne ximodo zanda guxheleʼ ni laabe de gaca xhamígube Jehová. Ti hermana láʼ Rachel ni guyuunisa dxi napa 14 iza guníʼ xi runi para gudxiilú ca guendanagana ni rapa ra scuela, laabe guniʼbe: «Runeʼ stipa pur guchaaga ca ni ruuyaʼ né ca ni rusiidiʼ Biblia. Nuu  biaje ni riziidiʼ lu clase de historia rusietenalaʼdxiʼ ca ni naa xiixa relatu o profecía ni zeeda lu Biblia. Ne nuu biaje ora maʼ caníʼcabe de xiixa, rietenalaʼdxeʼ ti textu ni zeeda lu Biblia ni zanda gulueeʼ tuuxa». Zándaca cadi casi ca guendanagana ni gupa rey Josías nga nápaluʼ, peru zanda gácaluʼ ti binni ni nuu xpiaaniʼ ne cadi gusaanaluʼ Jehová casi bíʼnibe. Pa guiziidiluʼ gudxiiluluʼ ca guendanagana stiluʼ yanna, ziuuluʼ listu para guidxaagaluluʼ ca ni zeeda ca.

15. ¿Xi gucané Josías para cadi gusaana de guni ni ná Jehová? (2 Crónicas 34:​14, 18-21).

¹⁵ Dxi napa Josías 26 iza, bizulú biʼniʼ chaahuiʼ templu que. Laga cayúnicabe dxiiñaʼ que bidxélacabe «libru stiʼ Ley stiʼ Jehová, ni bidii Moisés guidxi que». Ne ora binadiaga rey que ni ná libru que, nagueendaca bichaa para guni ni ná Ley stiʼ Jehová (biindaʼ 2 Crónicas 34:​14, 18-21). ¿Ñee ñuuláʼdxiluʼ ñuundaluʼ Biblia la? ¿Ñee cayúniluʼ stipa para gúniluʼ ni la? Pa cayúniluʼ stipa para gúniluʼ ni, ¿ñee cayuuláʼdxiluʼ ni la? ¿Ñee cayúniluʼ xiixa para cadi gusiaandaluʼ ca versículo ni zanda gacané lii la? Luke, ni bizéʼtenu lu párrafo 13 que, napa ti cuadernu ra rucaa ca cosa ni jma riuulaʼdxiʼ ora maʼ cayuni estudiar. Pa gúninu casi biʼniʼ Luke zacané ni laanu guietenaláʼdxinu ca textu o xiixa ni guyuuláʼdxinu. Ra jma gunibiaʼluʼ Biblia ne gannaxhiiluʼ ni, jma ziuuláʼdxiluʼ gúniluʼ ni ná Jehová. Ne cásica bizaaca rey Josías zucaa Stiidxaʼ Dios lii gúniluʼ ni jneza.

16. ¿Xiñee gucuaa Josías ti decisión ni cadi jneza ne xi rusiidiʼ ni laanu?

¹⁶ Biziidiʼ de ca decisión cadi jneza gucuaa Josías. Dxi napa Josías 39 iza la? gucuaabe ti decisión ni cadi jneza ne pur ngue guutibe. Qué ninábabe ñacané Jehová laabe, sínuque bíʼnibe ni para laabe biaʼsi (2 Crón. 35:​20-25). ¿Xi rusiidiʼ ndiʼ laanu yaʼ? Biaʼ tiica iza nápanu o biaʼ tiica tiempu nápanu de cayúʼndanu Biblia, naquiiñeʼ  guyúbinu Jehová. Ne para guyúbinu Jehová la? naquiiñeʼ guyúbinu gacanebe laanu, guidúʼndanu Stiidxabe ne gucaadiáganu conseju ni gudii ca hermanu laanu. Pa gúninu ndiʼ, zándaca gacané ni laanu para cadi guicaanu decisión ni cadi jneza ne zabáninu nayecheʼ (Sant. 1:25).

17. ¿Xi rusiidiʼ historia stiʼ guionnaʼ rey de Judá riʼ laanu?

¹⁷ Joven, zanda gúniluʼ stale cosa galán laga nahuiiniluʼ. Historia stiʼ Jehoás, Uzías ne Josías racané ni ca jovenhuiiniʼ ne ca ni nahuiiniʼ guicaacaʼ decisión jneza ne gusiéchecaʼ Jehová. Dxandíʼ, bíʼnicabe cosa ni cadi jneza ne gucanácabe pur laani. Peru pa gúniluʼ stipa pur gúniluʼ ca cosa galán ni bíʼnicabe ne cadi chinándaluʼ ra bicheecabe la? zieni lii galán lu xquendanabániluʼ.

18. ¿Xi ejemplu zeeda lu Biblia zanda gacané laanu para guibáninu nayecheʼ? (Biiyaʼ imagen ca).

¹⁸ Biblia laaca ruzeeteʼ de xcaadxi joven ni guyuu gaxha de Jehová ne guyuuláʼdxibe ni bíʼnicaʼ ne guyeni laacaʼ galán lu xquendanabánicaʼ, tobi de laacabe nga David. Dxi gúcabe joven, guca xhamígube Jehová ne gúcabe ti rey ni qué nusaana de ñuni ni nabe. Dxandíʼ, guyuu biaje bicheebe, peru biiyaʼ Jehová laabe casi ti binni ni guca fiel (1 Rey. 3:6; 9:​4, 5; 14:8). Ra gúʼndanu modo bibani David, ejemplu stibe zacané ni laanu gácanu fiel Jehová. Sti cosa ni zanda gúninu ora guni estudiarnu nga guidúʼndanu de Marcos ne Timoteo. Guirópacabe bíʼnicabe ni ná Jehová dxi gúcacabe joven ne gúcacabe fiel. Pur decisión ni gucuaacabe ca bisiéchecabe Jehová ne bibánicabe galán.

19. ¿Ximodo zanda gaca xquendanabániluʼ?

¹⁹ ¿Ximodo racaláʼdxiluʼ gaca xquendanabániluʼ? Ni gúniluʼ dede yanna zusihuinni xi racaláʼdxiluʼ. Pa gápaluʼ confianza Jehová ne cadi gápaluʼ confianza laca lii, zacanebe lii guicaaluʼ decisión jneza (Prov. 20:24). Lii zanda gápaluʼ ti guendanabani nabé sicarú ne nayecheʼ. Cadi guiaandaʼ lii zusisaca Jehová guiráʼ ni gúniluʼ pur laa. Zabeendunu stale ni galán pa gúninu ni ná Bixhózenu ni nuu guibáʼ ni nadxii laanu. ¡Gastiʼ sti cosa jma galán!