1. ¿Xi tipu pregunta zándaca guni ca compañeru de scuela o de dxiiñaʼ laanu?

 ¿XIMODO runi sentirluʼ ora guinabadiidxaʼ ti compañeru de dxiiñaʼ o de scuela lii de ca ni runi creluʼ? ¿Ñee ridxíbiluʼ la? Stale de laanu runi sentirnu zacá. Peru racané ca tipu pregunta riʼ laanu gánnanu xi riníʼ ique o xi runi sentir sti binni. Ne laaca racané ca ni laanu ganda guni predicarnu. Peru nuu biaje zándaca guinabadiidxacabe para si gucaalúcabe laanu, peru cadi naquiiñeʼ guidxagayaanu purtiʼ zándaca rúnibe ni pur ni gúdxicabe laabe de laanu (Hech. 28:22). Ne laaca purtiʼ nabáninu «lu ca últimu dxi», ne nuu stale binni «qué zanacaʼ chuʼcaʼ de acuerdu» ne nácacaʼ «naduxhuʼ» (2 Tim. 3:​1, 3).

2. ¿Xiñee galán gácanu binni nadóʼ?

² Zándaca caníʼ íqueluʼ ximodo gácaluʼ nachaʼhuiʼ ne nadóʼ ora tuuxa tinde pur xiixa ni runi creluʼ. Nuu ti cualidad ni zacané lii, laani nga: gácanu nadóʼ. Ti binni nadóʼ qué ridxiichi nagueenda, zanda gucueeza laca laa, qué rusihuinni cadxibi ora qué ganna xi guicabi o chuʼ tu gucaalú laa (Prov. 16:32). Zándaca guiníʼ íqueluʼ nagana gaca tobi nadóʼ. Peru zanda gápaluʼ cualidad riʼ. ¿Ximodo yaʼ? ¿Xi zacané lii gácaluʼ binni nadóʼ ora chuʼ tu gucaalú lii pur ni runi creluʼ yaʼ? Ne pa nápaluʼ xiiñiluʼ, ¿ximodo zanda gacaneluʼ laacabe para ganda guicábicabe né diidxaʼ nadóʼ ca ni guinabadiidxaʼ laacabe de ni runi crécabe yaʼ? Guidúʼyanu.

3. ¿Xiñee zanda guininu nadipaʼ ca binni nadóʼ? (2 Timoteo 2:​24, 25).

³ Ti binni nadóʼ la? cadi débil laa, sínuque nadipaʼ. ¿Xiñee  yaʼ? Purtiʼ para gácaluʼ nachaʼhuiʼ o nadóʼ ora gucaalúcabe lii naquiiñeʼ gúniluʼ stipa para gucueezaluʼ laca lii. Ti binni nadóʼ napa «cualidad stiʼ espíritu» santu (Gál. 5:​22, 23). Diidxaʼ griegu ni raca traducir «nadóʼ» stale biaje biquiiñecabe ni para guiníʼcabe de ti caballu guiʼxiʼ ni maʼ bisidóʼcabe. Guendaridxagayaa ndiʼ, ¿njaʼ? Bisaana de gácame naduxhuʼ ne neca maʼ nadoʼme peru nadiparume. Yanna, ¿laanu yaʼ? ¿Ximodo gácanu nadóʼ ne cadi gusaana de gácanu nadipaʼ? Stúbinu la? qué zanda diʼ. Caquiiñeʼ guinábanu espíritu santu stiʼ Dios. Ne zanda gácanu nadóʼ purtiʼ stale binni maʼ biziidicaʼ gácacaʼ zacá. Stale de ca Testigu rusihuínnicaʼ cualidad riʼ ora chuʼ tu gucaalú laacaʼ, ne ndiʼ huayacané ni xcaadxi guidxagayaacaʼ modo naca ca Testigu (biindaʼ 2 Timoteo 2:​24, 25). Yanna, ¿xi zanda gúniluʼ para gunibiáʼcabe lii casi ti binni nadóʼ yaʼ?

4. ¿Xi rusiidiʼ ejemplu stiʼ Isaac laanu?

⁴ Lu Biblia zeeda stale ejemplu ni rusihuinni pabiáʼ risaca gácanu binni nadóʼ. Guidúʼyanu ejemplu sti Isaac dxi guleza Guerar, bizulú gupa ca filisteu ni nabeza raqué envidia laabe ne bichiicaʼ ca bizé ni gundaa ca siervu stiʼ bixhózebe. Qué nidíndebe pur ca bizé que, ¿xi bíʼnibe ya? Lugar de ngue guyebe zitu ne gundaabe xcaadxi bizé (Gén. 26:​12-18). Peru ca filisteu guniʼcaʼ laaca sticaʼ nisa ni nuu raqué. Neca bizaaca ndiʼ, qué nusaana Isaac de ñaca nadóʼ (Gén. 26:​19-25). ¿Xi gucané laabe gácabe nadóʼ neca bicaalúcabe laabe stale biaje yaʼ? Zándaca biziidibe de modo naca bixhózebe ne jñaabe. Guca Abrahán ti binni ni ruyubi chuʼ paz ne Sara guca ti binni «nachaʼhuiʼ ne nadóʼ» (1 Ped. 3:​4-6; Gén. 21:​22-34).

5. ¿Xi ejemplu rusihuinni zanda gusiiditu ca xiiñitu risaca nga gácacaʼ nadóʼ?

⁵ Ca ni napa xiiñiʼ, laaca zanda gusiiditu ca xiiñitu gácacaʼ nadóʼ. Guidúʼyanu ni bizaaca ti joven ni napa 17 iza láʼ Maxence. Cásica ra scuela ne zaqueca lu predicación nabé ridxaagalube binni ni ridxiichi nagueenda. Né stale paciencia gucané jñaabe ne bixhózebe laabe gácabe nadóʼ. Laacaʼ guniʼcaʼ: «Yanna maʼ biene xiiñidu jma caquiiñeʼ gapa stipa para ganda gucueeza laca laa que guquixe ni gúnicabe laa». ¡Aque galán nga biziidiʼ Maxence gaca nadóʼ!

6. ¿Ximodo racané oración laanu gácanu binni jma nadóʼ?

⁶ Yanna, ¿xi gúninu ora gucaalú tuuxa laanu yaʼ? Guzéʼtenu ti ejemplu, ora guiníʼ tuuxa mal de Jehová o de Stiidxaʼ. Galán guinábanu Jehová gudii laanu espíritu stiʼ ne guendanuuxpiaaniʼ para ganda guicábinu né diidxaʼ nadóʼ. Yanna, ¿xi zanda gúninu pa gudiʼnu cuenta huaxiéʼ galán bicábinu yaʼ? Guinínenu Jehová sti biaje ne guiníʼ íquenu ximodo ñanda nicábinu pa málasi nizaacani sti biaje. Pa gúninu ca ni bizéʼtenu riʼ, zudii Jehová laanu espíritu santu ti ganda gucueezanu laca laanu ne guluinu nácanu binni nadóʼ.

7. Pa guizíʼdinu caadxi textu de memoria, ¿ximodo zanda gacané ca ni laanu ora gucaalú tuuxa laanu? (Proverbios 15:​1, 18).

⁷ Zanda gacané caadxi textu ni zeeda lu Biblia laanu guininu né diidxaʼ nadóʼ ora guidxaagalunu tuuxa ni gucaalú laanu. Zacané espíritu santu laanu guietenaláʼdxinu ca versículo ca (Juan 14:26). Casi lu libru stiʼ Proverbios ridxélanu caadxi principiu ni zacané laanu gácanu binni nadóʼ (biindaʼ Proverbios 15:​1, 18). Laaca rusihuinni libru riʼ ca ndaayaʼ ni rapa tuuxa ni nanna gucueeza laca laa neca  cadiʼdiʼ ra nagana (Prov. 10:19; 17:27; 21:23; 25:15).

8. ¿Xi caquiiñeʼ gánnanu ora guinabadiidxaʼ tuuxa laanu de ca ni runi crenu?

⁸ Pa guiénenu xiñee cayaca ti cosa, zanda gacané ni laanu (Prov. 19:11). Ti binni ni riene nanna gucueeza laca laa ora gucaalú tuuxa laa pur ni runi cré. Guzéʼtenu ti ejemplu. Guiráʼ ni racalaʼdxiʼ binni ganna zeeda gácani casi nisa ni daʼ dede ra jma gueteʼ. Nga runi, ora guinabadiidxaʼ tuuxa laanu xiixa, stale biaje qué gánnanu xi pur canabadiidxabe ni. Galán guietenaláʼdxinu ni jma jneza nga gánnanu xiñee racaláʼdxibe gánnabe de laani (Prov. 16:23).

9. ¿Ximodo bisihuinni Gedeón naca ti binni ni riene ne nadóʼ?

⁹ Guzéʼtenu ejemplu stiʼ Gedeón. Ti dxi gunabadiidxaʼ ca hombre de tribu stiʼ Efraín laabe né xiana xiñee qué ninebe laacaʼ para nucaalucaʼ ca enemigu stiʼ guidxi Israel. ¿Xiñee né xiana guníʼcabe yaʼ? ¿Ñee nabé orgulloso laacabe la? Qué gánnanu pa zacá ni, peru ni nánnanu nga guca Gedeón ti binni ni riene, biʼniʼ respetarbe modo cayuni sentircaʼ ne bicábibe né diidxaʼ nadóʼ. ¿Xi bizaaca pur ngue yaʼ?  «Cumu zaqué bicábibe laacaʼ la? guca calmarcaʼ» (Juec. 8:​1-3).

10. Ora guinabadiidxacabe laanu xiixa ni runi crenu, ¿xi zanda gacané laanu guicábinu né diidxaʼ nadóʼ? (1 Pedro 3:15).

¹⁰ Zándaca guinabadiidxaʼ ti compañeru ni runinenu dxiiñaʼ o ni rinenu scuela laanu xiñee qué rúninu casi laacaʼ ne xiñee rúninu ni ná Biblia. Neca racaláʼdxinu gusiénenu ni runi crenu, peru caquiiñeʼ gúninu ni né stale respetu ne caquiiñeʼ guni respetarnu ni riníʼ ique binni (biindaʼ 1 Pedro 3:15). Ne ti cosa ni zacané laanu nga guiníʼ íquenu zanda gánnanu xi runi preocupar binni ca, que gúʼyanu ni casi ora cucaalube laanu o caniʼbe mal de laanu. Cumu qué gánnanu xi pur gunabadiidxabe laanu la? ni jma jneza gúninu nga guicábinu laabe né diidxaʼ nadóʼ ne gácanu nachaʼhui. Zacá zanda gueeda guchaabe modo riníʼ íquebe. Cadi guianda laanu caquiiñeʼ gácanu nadóʼ né guiráʼ xixé binni neca gacaláʼdxicaʼ gucaalucaʼ ne guxhídxicaʼ laanu (Rom. 12:17).

11, 12. ¿Xi caquiiñeʼ gúninu ante guicábinu? Bizeeteʼ ti ejemplu de ximodo zanda gacané ni laanu chuulaʼdxiʼ binni gucaadiaga laanu. (Biiyaʼ imagen ca).

¹¹ Guiníʼ íquenu pa guinabadiidxaʼ ti compañeru ni runinenu dxiiñaʼ laanu xiñee qué rúninu lanibidóʼ. ¿Xi zándaca niníʼ íquenu ante guicábinu laabe yaʼ? ¿Ñee riníʼ íquebe qué rúninu xiixa para chuʼnu nayecheʼ la? ¿O riníʼ íquebe pur laanu maʼ qué ziuu xcaadxi compañeru nayecheʼ la? Zanda gábinu laabe galán rizaaláʼdxibe ca compañeru ne despué zanda gábinu laabe laanu laaca riuuláʼdxinu chuʼnu nayecheʼ ra dxiiñaʼ. Ne zacá zándaca guiénebe laanu ne gudiibe lugar gusiénenu laabe xi rusiene Biblia de lanibidóʼ.

¹² Ne laaca zanda guicábinu zacá ora guinabadiidxaʼ tuuxa laanu ni runi crenu. Guzéʼtenu ti ejemplu, zándaca guzeeteʼ ti compañeru ni rinenu scuela caquiiñeʼ guchaa ca testigu stiʼ Jehová modo riníʼ íquecaʼ o modo ruuyacaʼ gaca tuuxa muxeʼ o gunaa nguiuʼ. ¿Ñee guniʼbe ni purtiʼ qué gánnabe xi runi cré ca Testigu la? ¿Nápabe ti xhamígube o ti familia stibe naca muxeʼ o gunaa nguiuʼ la? ¿Ñee riníʼ íquebe nanaláʼdxinu ca muxeʼ ne ca gunaa nguiuʼ la? Nga runi, galán gábinu laabe rizaaláʼdxinu guiráʼ binni ne runi respetarnu ca decisión sticaʼ (1 Ped. 2:17). b Zándaca zacá zudiibe lugar gusiénenu laabe xiñee galán nga chinándanu ca conseju zeeda lu Biblia.

13. ¿Ximodo zanda gacaneluʼ tuuxa ni riníʼ ique guendanahuati nga guni creluʼ nuu Dios?

¹³ Ora maʼ gadxé ni runi cré tuuxa de ni runi crenu cadi nagueendacaʼ guiníʼ íquenu maʼ nánnanu xi runi crebe o xi riníʼ íquebe (Tito 3:2). Guzéʼtenu ti ejemplu, zándaca gabi ti compañeru ni rineluʼ scuela lii guendanahuati nga guni creluʼ nuu Dios. ¿Ñee zaníʼ íqueluʼ runi crebe evolución ne nánnabe stale de laani la? Ni dxandíʼ nga zándaca nin qué huaníʼ íquebe de laani. Nga runi, lugar de tinde diidxaluʼ pur evolución la? ni jma galán gúniluʼ nga gábiluʼ laabe xiixa ni guiníʼ iquenebe. Zándaca galán guseendaluʼ ti enlace stiʼ ti artículo o ti videu ra nuube ni zeeda lu jw.org ni caníʼ ximodo bizáʼ Dios guiráʼ xixé ni nuu. Ne zándaca zanabe gúʼyabe xcaadxi de laacani. Ne pa guiníʼneluʼ laabe né respetu zándaca zucá nga laabe pa jneza ni runi crebe.

14. ¿Ximodo biquiiñeʼ Niall jw.org para gacané xcompañeru ni maʼ gadxé ni riníʼ ique de ca Testigu?

 ¹⁴ Ti hombrehuiiniʼ láʼ Niall biquiiñebe jw.org para gacanebe tuuxa ganna ni dxandíʼ runi crenu. Niall guníʼ: «Gupaʼ ti compañeru de scuela ni qué nusaana de ñabi naa qué runeʼ cré ciencia ne jma runeʼ cré Biblia, purtiʼ para laa zeeda gaca ni ti libru de cuentu». Cumu qué riná xcompañérube gusiénebe laa xi runi crebe la? rabi Niall laabe gúʼyabe sección ni láʼ «Biblia ne ciencia» ni zeeda lu jw.org. Ne despué, guníʼ ique Niall zándaca biindaʼ xcompañeru información ni biseenda ra nuube que, ngue runi maʼ qué ñaca nagana para laa niniʼné laabe ximodo beeda chuʼ guiráʼ xixé cosa lu Guidxilayú. Pa gúninu zacá la? laaca zieni laanu galán.

15. ¿Ximodo zanda gacanetu ca xiiñitu gánnacaʼ guicábicaʼ né diidxaʼ nadóʼ?

¹⁵ Zanda gusiiditu ca xiiñitu ganda guicábicaʼ né diidxaʼ nadóʼ ora guinabadiidxaʼ tuuxa laacaʼ ni runi crecaʼ (Sant. 3:13). Nuu caadxi hermanu riquiiñecaʼ adoración en familia para guni ensayarnecaʼ ca xiiñicaʼ. Ruyúbicabe tema ni zándaca guidxaagalú ca xiiñicabe ra scuela ne racanécabe laacaʼ gánnacaʼ ximodo guicábicaʼ ne diidxaʼ nadóʼ ne chuulaʼdxiʼ xcompañérucaʼ gucaadiágacaʼ laacaʼ. Ne despué, runi ensayarnécabe laacaʼ. (Biiyaʼ cuadru ni láʼ « Pa guni ensayarnetu familia stitu zanda gacané ni laatu»).

16, 17. Ra guni ensayarnetu familia stitu, ¿ximodo zanda gacané ni ca joven?

¹⁶ Pa guni ensayarnenu familia stinu zacané ni ca joven ca guicábicaʼ jneza, ne laaca zacané ni laacaʼ chuʼcaʼ seguru nuu prueba dxandíʼ ni runi crecaʼ. Lu sección  ni láʼ «Ca joven», ni zeeda lu jw.org, zadxélaluʼ ti sección ni láʼ «Ponlo por escrito», guca ni para gacané ni iguidxi fe stiʼ ca joven ca ne ganda gusiénecaʼ né stiidxacaʼ ni runi crecaʼ. Pa guidúʼyanenu familia stinu ca sección riʼ, zacané ni laanu para ganda gusiénenu ni runi crenu ti modo chuulaʼdxiʼ binni ne gácani né diidxaʼ nadóʼ.

¹⁷ Ti joven láʼ Matthew, ruzeeteʼ ti cosa ni nabé racané laa nga guni ensayarné xfamilia. Lu adoración en familia stícabe stale biaje runi investigárcabe xiixa tema ni zándaca gueeda guinabadiidxacabe laabe ra scuela. Laabe guniʼbe: «Despué de guni estudiardu, riníʼ íquedu ni zándaca gueeda guizaaca ne runi ensayardu ximodo zanda gudxieeluáʼ ca ni. Ora nannadxicheʼ ni runeʼ cré la? qué ridxibeʼ ne qué raca nagana para naa gaca nadóʼ né xcaadxi».

18. Casi ná Colosenses 4:​6, ¿xi nga ni jma jneza gúninu?

¹⁸ Neca guiniʼluʼ de ca prueba ni nuu stale biaje qué rucuudxi ni binni. Peru pa guiniʼluʼ né diidxaʼ nadóʼ ne gánnaluʼ ximodo guicábiluʼ zacané ni lii (biindaʼ Colosenses 4:6). Ora guinínenu tuuxa ni runi crenu, zeeda gaca ni casi ora nundaʼnu ti pelota ra nuu, zanda gundaʼnu ni chaahuidugá o gundaʼnu ni nadipaʼ. Ora gundaʼnu ni chaahuiʼ la? qué raca nagana para sti binni ca ganda ni ne zaná quitené laanu. Zaqueca zazaaca pa guicábinu binni né diidxaʼ nadóʼ, zándaca zaná binni ca gucaadiaga laanu. Pa gacalaʼdxiʼ tuuxa gucaalú o guni burla laanu la? ni jma galán nga cadi guyúbinu tíndenu (Prov. 26:4). Peru cadi guiráʼ diʼ binni naca zacá. Zándaca stale tu zaná gucaadiaga laanu.

19. ¿Xi zanda gacané laanu gácanu binni nadóʼ ora gusiénenu ni runi crenu?

¹⁹ Casi bidúʼyanu, quixe íquenu gácanu binni nadóʼ nabé racané ni laanu. Gunabaʼ Jehová gudii stipa lii gácaluʼ nadóʼ ora guzeeteʼ tuuxa binni xiixa tema para si tíndecaʼ o guiniʼcaʼ mal de ni runi creluʼ. Pa gácaluʼ binni nadóʼ zacané ni lii cadi tíndeluʼ. Ne pa gúniluʼ stipa guicábiluʼ né diidxaʼ nadóʼ ne respetu la? zacané ni xcaadxi guchaa modo riníʼ ique de laanu o de ni rusiidiʼ Biblia. Nga runi, guyuu listu para guicábiluʼ ni guinabadiidxacabe lii «né diidxaʼ nadóʼ ne stale respetu» (1 Ped. 3:15). ¡Guca binni nadóʼ ne nadxibalú!