1. ¿Xi dxiiñaʼ bidii Jehová apóstol Pedro ante gatiʼ?

 BIʼNIʼ apóstol Pedro ni ná Jehová pur stale iza. Biʼniʼ predicarnebe Jesús, yenebe ca noticia galán stiʼ Reinu ra nuu ca binni ni cadi naca judíu ne guyuube lade grupu ni zániru. Ne dxi mayaca gátibe, bidii Jehová laabe stiʼ dxiiñaʼ nabe risaca. Biaʼ lu iza 62 hasta 64 despué de ca dxi stiʼ Jesús, biquiiñeʼ Dios espíritu santu stiʼ para gucaabe chupa carta: primé ne guiropa carta stiʼ Pedro. Ne ni gucalaʼdxiʼ apóstol Pedro nga gacaneruʼ ca carta riʼ ca xpinni Cristu despué de gátibe (2 Ped. 1:​12-15).

2. ¿Xiñee biaʼsi tiempu bicaa Pedro ca carta stiʼ?

² Biaʼsi tiempu cadiʼdiʼ ca xpinni Cristu «lu gadxé gadxé guendanagana» nga bicaa Pedro ca carta riʼ (1 Ped. 1:6). Lade ca hermanu que guyuu caadxi hombre ni bisiidiʼ caadxi cosa ni cadi jneza ne biyúbicaʼ guni bidiicaʼ xquendabiaaniʼ ca hermanu ndaaniʼ congregación (2 Ped. 2:​1, 2, 14). Zuuyaʼ ca xpinni Cristu ni nabezaʼ Jerusalén «maʼ zedadxiña dxi guiluxe guiráʼ cosa», ne bizaaca ni dxi binítiluʼ ejércitu stiʼ Roma guidxi que ne templu stini (1 Ped. 4:7). Guizáʼ gucané ca carta stiʼ Pedro ca xpinni Cristu de tiempu que para ganda gudxiilucaʼ ca guendanagana ni cadíʼdicaʼ ne chuʼcaʼ listu para ca ni gueeda despué. b

3. ¿Xiñee galán guni estudiarnu ca carta stiʼ Pedro?

³ Bicaa Pedro ca carta riʼ para ca xpinni Cristu de primé siglu. Ne gucalaʼdxiʼ Jehová guicá ca ni lu Biblia para gacané ca ni laanu (Rom. 15:4). Laanu laaca nabáninu lade binni  ni runi cosa dxabaʼ ne ridxaagalunu guendanagana ni zándaca gucueeza laanu de gúninu ni ná Jehová. Ne maʼ cadi candaa zadúʼyanu ca dxi chuʼ yuubaʼ jma naroʼbaʼ que ni guyuu dxi binítiluʼ Jerusalén ne templu que. Nga runi, zacané guiropaʼ carta stiʼ Pedro laanu para gatananu ora gueeda dxi stiʼ Jehová, cadi guidxíbinu binni ne guizíʼdinu gannaxhiinu de guidubi ladxidoʼno ca hermanu stinu. Laaca zacané ca ni bizéʼtenu riʼ ca ancianu para ganda gudiicaʼ guiráʼ ni caquiiñeʼ ca dendxuhuiiniʼ stiʼ Dios.

4. ¿Xi zándaca gusirá fe stinu? (2 Pedro 3:​3, 4).

⁴ Stale binni qué riná guni cré ca ni ruzeeteʼ Biblia chiguizaaca despué. Cumu maʼ zinenu stale iza de cayuni predicarnu zedandá fin stiʼ guidxilayú riʼ la? zándaca zuni burla ca binni ni rucaalú laanu ne guiniʼcaʼ qué ziuu dxi guedandá fin ca (biindaʼ 2 Pedro 3:​3, 4). Ne pa tuuxa ni runi predicarnu, ti compañeru de dxiiñaʼ o ti familia stinu gabi laanu zacá la? zándaca chaahuiʼ chaahuiʼ zará fe stinu. Yanna, ¿xi zacané laanu yaʼ? Guidúʼyanu ni bisiene Pedro.

5. ¿Xi zacané laanu cuézanu né paciencia gueeda fin? (2 Pedro 3:​8, 9).

⁵ Zándaca ziuu tu zaníʼ ique candaa Jehová para gunduuxeʼ guidxilayú malu riʼ. Peru guníʼ Pedro ti cosa ni rucaa laanu guiníʼ íquenu. Bisietenaláʼdxibe laanu maʼ gadxé modo ruuyaʼ Jehová tiempu de modo ruuyaʼ biʼniʼ ni (biindaʼ 2 Pedro 3:​8, 9). Para Jehová, ti mil iza zeeda gácani casi ti dxi. Nápabe paciencia ne qué racaláʼdxibe guinítiluʼ nin tobi. Peru zedandá dxi stibe. . . , ne zeeda fin stiʼ guidxilayú malu riʼ. Nga runi, galán iquíʼñenu tiempu stinu jneza para guni predicarnu guiráʼ binni de gadxé gadxé guidxi.

6. ¿Ximodo zanda chuʼnu pendiente ora guedandá dxi stiʼ Jehová? (2 Pedro 3:​11, 12).

⁶ Bizeeteʼ Pedro naquiiñeʼ chuʼnu «pendiente ora guedandá dxi stiʼ Jehová» (biindaʼ 2 Pedro 3:​11, 12). ¿Ximodo zanda chuʼnu pendiente yaʼ? Zanda gúninu ra guiníʼ íquenu guiráʼ dxi pabiáʼ sicarú zaca guendanabani stinu ndaaniʼ guidxilayú cubi ca. ¿Ñee ruxuíʼluluʼ cayoloʼ guendaró nanixe ne cacaaluʼ bi nayá la? ¿Riníʼ íqueluʼ maʼ cayasa ca binni ni nadxiiluʼ de lade gueʼtuʼ ne cadxaagaluluʼ laacaʼ la? ¿Ñee ruxuíʼluluʼ cusiidiluʼ ca binni de dxiqué ximodo guca cumplir ca profecía ni zeeda lu Biblia la? Ra guiníʼ íquenu lu ca cosa riʼ zacané ca ni laanu gatananu ne guietenaláʼdxinu maʼ nabáninu lu ca últimu dxi. Cumu maʼ nánnanu ni chiguizaaca la? qué zudiʼnu lugar cueechú ca binni ni rusiidiʼ ca cosa ni cadi jneza laanu (2 Ped. 3:17).

7. ¿Xi zazaaca pa guidxíbinu binni?

⁷ Nánnanu maʼ gaxhadóʼ nuu dxi stiʼ Jehová. Nga runi, racaláʼdxinu ganna binni de ca noticia galán stiʼ Reinu. Peru ziuu ora zadxíbinu guni predicarnu, ¿xiñee yaʼ? Purtiʼ zándaca ridxíbinu xi guni binni laanu o xi riníʼ íquecaʼ de laanu. Ne nga peʼ nga ni bizaaca Pedro gueelaʼ gunaazecabe Jesús. Bidxíbibe ñánnacabe nácabe discípulo stiʼ ne guyuu biaje biʼniʼ negarbe laa (Mat. 26:​69-75). Peru bisaana de guidxíbibe binni, ngue runi despué bidiibe conseju riʼ: «Cadi guidxíbitu ni ridxíbicabe ne cadi chuʼtu xizaa» (1 Ped. 3:14). Ca diidxaʼ riʼ rusihuinni ca ni zanda gusaana de guidxíbinu binni.

8. ¿Xi zacané laanu cadi guidxíbinu binni? (1 Pedro 3:15).

 ⁸ ¿Xi zacané laanu gusaana de guidxíbinu binni yaʼ? Rudii Pedro conseju riʼ laanu: «Lagusisaca Cristu casi Señor ndaaniʼ ladxidoʼto» (biindaʼ 1 Pedro 3:15). Rinándanu conseju riʼ ora riníʼ íquenu puestu ne poder ni napa Jesucristu, Señor ne Rey stinu. Nga runi, pa riuuluʼ nervioso o ridxíbiluʼ ora guni predicarluʼ la? galán guiníʼ íqueluʼ maʼ cayuni mandar Rey stinu guibáʼ ne nuu millón de ángel ra nuube. Ne cadi guianda lii, maʼ gucuaabe «guiráʼ xixé autoridad guibáʼ ne lu guidxilayú» ne qué ziuu dxi guixélebe de lii «dede ora guiluxe guidxilayú riʼ» (Mat. 28:​18-20). Sicaríʼ guníʼ Pedro: «Lachuu listu para guicábitu guiráʼ ca ni guinabadiidxaʼ laatu». ¿Ñuuláʼdxiluʼ ñuni predicarluʼ ra dxiiñaʼ, ra scuela o ráticaʼ nuuluʼ la? Pa zacá ni, galán guiníʼ íqueluʼ pora nga jma galán gúniluʼ ni, ne quixhe chaahuiluʼ xi chiguiniʼluʼ. Gunabaʼ Jehová gudii lii valor ne gupa confianza zacanebe lii cadi guidxíbiluʼ binni (Hech. 4:29).

9. ¿Pora nga qué nusihuinni Pedro guendarannaxhii? (Biiyaʼ imagen ca).

⁹ Biziidiʼ Pedro ximodo nga naquiiñeʼ gannaxhii binni. Nuube ora guníʼ Jesús: «Cudieeʼ laatu ti mandamientu nacubi:  gannaxhiisaatu, cásica huayannaxhieeʼ laatu, zacaca naquiiñeʼ gannaxhiisaatu» (Juan 13:34). Peru despué yenanda Pedro ni runi xcaadxi ne qué niná ñoné ca xpinni Cristu ni cadi naca judíu. Ngue runi gudxi apóstol Pablo laabe nácabe ti hipócrita (Gál. 2:​11-14). Gucuaa Pedro conseju ni bidii Pablo laa ne bichaa modo riníʼ ique. Lu guiropaʼ carta stibe bisiénebe cadi naquiiñeʼ si guni sentirnu nadxiinu ca hermanu, sínuque laaca naquiiñeʼ gusihuínninu ni.

10. ¿Xi zacané laanu gusihuínninu dxandíʼ nadxiinu ca hermanu cásica nadxiinu familia stinu? (1 Pedro 1:22).

¹⁰ Guníʼ Pedro naquiiñeʼ gusihuínninu dxandíʼ nadxiinu stobi cásica nadxiinu familia stinu (biindaʼ 1 Pedro 1:22). Ne rannaxhiinu zacá, purtiʼ rinándanu ni dxandíʼ. Ne ti cosa ni dxandíʼ rusiidiʼ Stiidxaʼ Dios nga «biaʼca risaca guiráʼ binni nezalú Dios» (Hech. 10:​34, 35). Pa gusihuínninu nadxiinu caadxi si hermanu de congregación stinu la? cadi cusihuínninu guendarannaxhii ni guníʼ Jesús. Dxandíʼ, zándaca jma xhamígunu caadxi hermanu, cásica bizaaca Jesús né chupa chonna de ca discípulo stiʼ (Juan 13:23; 20:2). Peru rusietenalaʼdxiʼ Pedro laanu caquiiñeʼ gannaxhiinu ca hermanu cásica nadxiinu familia stinu (1 Ped. 2:17).

11. ¿Xi riníʼ diidxaʼ gannaxhiinu de guidubi ladxidoʼno?

¹¹ Bidii Pedro conseju riʼ: «Lagannaxhiisaa de guidubi ladxidoʼto». Lu contextu riʼ, diidxaʼ «de guidubi ladxidoʼto» rusihuinni ni caquiiñeʼ gannaxhiinu neca gácani nagana para laanu. Guzéʼtenu ti ejemplu, cumu nácanu binni ruchee, ¿xi ñándaca ñúninu pa ti hermanu ñuni o niníʼ xiixa ni ñuniná laanu yaʼ? Zándaca niníʼ íquenu nuquíxenu ni laabe lugar de nuluinu nadxiinu laabe. Peru pa gúninu zacá la? qué ziuulaʼdxiʼ Jehová ni, ne nga peʼ nga ni bisiidiʼ Jesús Pedro (Juan 18:​10, 11). Bicaa Pedro ca diidxaʼ riʼ: «Cadi uquíxetu ni gúnicabe laatu, ne cadi cúʼditu ora cuʼdícabe laatu, sínuque lauguu ndaayaʼ laacabe» (1 Ped. 3:9). Pa nadxiiluʼ binni de guidubi ladxidoʼloʼ la? zácaluʼ nachaʼhui dede né ca binni ni guniná lii.

12. a) ¿Xiruʼ zúninu pa nadxiisaanu? b) Ra gúʼyaluʼ videu ni láʼ Chuʼnu tobi si né ca hermanu stinu, ¿xi rucaa ni lii gúniluʼ?

¹² Lu primé carta ni bicaa Pedro laaca biquiiñebe diidxaʼ «gannaxhiisaatu». Pa gannaxhiisaanu zacá la? zuni perdonarnu ni gúnicabe laanu, ne cadi ti biaje si, sínuque siempre ziuʼnu dispuestu guni perdonarnu (1 Ped. 4:8). Zándaca bietenalaʼdxiʼ Pedro dxi bisiidiʼ Jesús laa caadxi iza ante ximodo nga naquiiñeʼ guni perdonar. Dxi gudxi Pedro Jesús zuni perdonar tuuxa «hasta gadxe biaje», zándaca guníʼ íquebe zaqué cusihuínnibe nabé nacháʼhuibe. Peru bisiidiʼ Jesús laabe naquiiñeʼ guni perdonarbe «hasta 77 biaje», ni riníʼ ca diidxaʼ riʼ nga, siempre naquiiñeʼ guni perdonarbe. Laanu laaca caquiiñeʼ chinándanu conseju riʼ (Mat. 18:​21, 22). ¿Ñee raca nagana para lii gúniluʼ ni la? Pa zaca ni, cadi guireeluʼ gana. Cumu nácanu binni ruchee la? guiranu casi xpinni Jehová huayuu biaje raca nagana para laanu guni perdonarnu. Yanna, ¿xi zanda gúniluʼ yaʼ? Ni jma risaca nga, gúniluʼ guiráʼ ni nuu lu naluʼ para guni perdonarluʼ hermanu stiluʼ ne guyúbiluʼ chuʼluʼ tobi si né laa. c

13. ¿Xiñee zándaca gaca nagana para ca ancianu gápacaʼ ca dendxuhuiiniʼ?

¹³ Zándaca qué ñuu dxi ñaandaʼ Pedro ni gudxi Jesús laa: «Gupa ca dendxuhuiiniʼ stinneʼ» (Juan 21:16). Pa nácaluʼ ancianu, nánnaluʼ laaca caquiiñeʼ chinándaluʼ instrucción riʼ. Peru zándaca gaca nagana para lii cueeluʼ tiempu para guni cumplirneluʼ responsabilidad risaca riʼ. ¿Xiñee yaʼ? Primé, purtiʼ ca ancianu napa xidé gúʼyacaʼ guiráʼ ni caquiiñeʼ familia sticaʼ, chúʼcabe nazaaca, gatadxí ladxidóʼcabe ne cadi gusaana de chúʼcabe gaxha de Jehová. Ne laaca caquiiñeʼ guni predicar ca ancianu ca né stale gana, gaca prepararcaʼ jneza para ganda gusiidicaʼ lu ca reunión ca ne gutiidicaʼ discursu lu asamblea. Nuu de laacaʼ racanecaʼ lu Comité de Enlace né ca Hospital o lu Departamento Local de Diseño y Construcción. Rihuinni dxíchicaʼ guizáʼ nuu xhiiñaʼ ca ancianu.

14. ¿Xiñee racalaʼdxiʼ ca ancianu gápacaʼ ca dendxuhuiiniʼ ne xi zanda gacané laacaʼ gúnicaʼ ni? (1 Pedro 5:​1-4).

¹⁴ Gudxi Pedro xcaadxi xpinni Cristu ni laaca nácacaʼ ancianu: «Lagapa ca dendxuhuiiniʼ stiʼ Dios» (biindaʼ 1 Pedro 5:​1-4). Nánnanu guizáʼ nadxii ca ancianu ca hermanu ne racaláʼdxicaʼ gápacaʼ laacabe. Peru nuu biaje zándaca zuni sentir ca ancianu qué zanda guni cumplircaʼ né dxiiñaʼ ni gucuaacaʼ, purtiʼ nuu xhiiñacaʼ o maʼ bidxágacaʼ. Pa nga nga cazaacaluʼ la? ¿xi zanda gúniluʼ yaʼ? Galán gábiluʼ Jehová ximodo cayuni sentirluʼ. Sicaríʼ bicaa Pedro: «Pa nuu tuuxa racané stobi la? guni ni né stipa ni rudii Dios laa» (1 Ped. 4:11). Zándaca nuu de ca hermanu stiluʼ nápacaʼ guendanagana ni qué zanda gaca chaahuiʼ lu guidxilayú riʼ. Peru bietenalaʼdxiʼ jma zanda gacané Jesucristu, «pastor ni jma risaca», laacabe. Ne zanda gúnibe ni yanna ne zaqueca lu guidxilayú cubi ca. Ni racalaʼdxiʼ Jehová nga gannaxhii ca ancianu ca hermanu, gápacaʼ laacabe ne gácacaʼ «ti ejemplu para ca dendxuhuiiniʼ».

15. ¿Xi runi ti ancianu para ganda gapa ca dendxuhuiiniʼ stiʼ Dios? (Biiyaʼ imagen ca).

¹⁵ Ti hermanu láʼ William, ni maʼ ziné stale iza de naca ancianu, nabéʼ risaca para laa gapa ca dendxuhuiiniʼ stiʼ Dios. Dxi bizulú pandemia stiʼ COVID-19, laabe  ne xcaadxi ancianu biiyacabe risaca nga guiniʼnécabe guiráʼ semana ca publicador ni nuu lu grupu stícabe. ¿Xiñee yaʼ? Laabe guniʼbe: «Stale de ca hermanu ca nuucaʼ stúbicaʼ ne qué gápacaʼ tu güínecaʼ diidxaʼ. Ngue runi jma nagueenda guiníʼ íquecaʼ ca cosa ni runiná laacaʼ». Ora napa ti hermanu xiixa guendanagana, rucaadiaga chaahuiʼ William laabe para ganna xii nga caquiiñebe ne xi riguu xizaa laabe. De raqué, ruyubi William información ni peʼ caquiiñeʼ hermanu riʼ ne jma nga riquiiñebe videu ni nuu lu sitiu de internet stinu. Laabe bizeetebe: «Dxiiñaʼ ni jma risaca naquiiñeʼ gúninu nga gápanu ca dendxuhuiiniʼ. Pa rúninu stipa para gacanenu binni gunibiáʼ Jehová la? laaca caquiiñeʼ gúninu stipa para gacanenu ca dendxuhuiiniʼ stibe ti cadi gusaana de gúnicaʼ ni nabe».

16. ¿Ximodo chinándanu ca conseju ni bizíʼdinu lu ca carta stiʼ Pedro?

¹⁶ Lu artículo riʼ bidúʼyanu caadxi si cosa ni zeeda lu guiropaʼ carta bicaa Pedro. Zándaca bidiiluʼ cuenta nuu cosa ra caquiiñeʼ gúniluʼ dxiiñaʼ. Guzéʼtenu caadxi ejemplu: ¿Ñuuláʼdxiluʼ niníʼ íqueluʼ ximodo zabániluʼ lu guidxilayú cubi ca la? ¿Ñee maʼ gudixhe íqueluʼ guni predicarluʼ ra dxiiñaʼ, ra scuela o ra tiica si nuuluʼ la? ¿Ñee maʼ guni íqueluʼ ximodo zanda gusihuínniluʼ nadxiiluʼ de guidubi ladxidoʼloʼ ca hermanu la? Ne pa ancianu lii, ¿ñee maʼ gudixhe íqueluʼ gúniluʼ stipa gápaluʼ ca dendxuhuiiniʼ stiʼ Jehová sin guireeluʼ gana la? Pa gúʼyaluʼ nuu ra naquiiñeʼ gúniluʼ dxiiñaʼ la? cadi guireeluʼ gana. Cadi gusiaandaluʼ «pabiáʼ nachaʼhuiʼ Señor», ne laa zacané lii gúniluʼ ca cosa ca jneza (1 Ped. 2:3). Ne Pedro guníʼ: «Dios […] gunduuxeʼ entrenamientu stitu. Zuni laatu fiel, zuni laatu nadipaʼ ne zuzuhuaa laatu lu ti base naguidxi» (1 Ped. 5:10).

17. ¿Xi premiu zacaanu pa qué guireʼnu gana ne gudiʼnu lugar gunduuxeʼ Jehová entrenamientu stinu?

¹⁷ Ti biaje biʼniʼ sentir Pedro qué runi merecer guzuhuaa nezalú Xiiñiʼ Dios (Luc. 5:8). Peru cumu bisihuinni Jehová ne Jesús nadxiicaʼ ne gucanecaʼ laabe la? qué nusaanabe de ninándabe Cristu. Ngue runi gunda gucuaabe ndaayaʼ de chuʼbe «lu Reinu ni qué ziuu dxi guiluxe stiʼ Jesucristu Señor stinu ni bilá laanu» (2 Ped. 1:11). ¡Guizáʼ naroʼbaʼ ndaayaʼ riʼ, ¿njaʼ?! Yanna, cásica Pedro, pa qué guireeluʼ gana ne gudiiluʼ lugar gunduuxeʼ Jehová entrenamientu stiluʼ la? zacaaluʼ premiu ni cabeza lii, guendanabani ni qué zaluxe ne zalaluʼ purtiʼ nápaluʼ fe (1 Ped. 1:9).