1. ¿Xi maʼ cadi candaa zuni Jesús?

 NABÁNINU ti tiempu ra chiguizaaca stale cosa ni zuchaa xquendanabáninu. Maʼ cadi candaa zuni juzgar Jesús guiráʼ binni nabani lu Guidxilayú. ¿Ximodo nánnanu mayaca guizaaca ni yaʼ? Purtiʼ gudxi Jesús ca discípulo stiʼ ti profecía ni zeeda gaca ti «señal» ni gusihuinni presencia stiʼ «dxi guiluxe guidxilayú riʼ» (Mat. 24:3). Zeeda profecía riʼ lu Mateo capítulo 24 ne 25 ne laaca zeedani lu Marcos capítulo 13 ne Lucas capítulo 21.

2. ¿Xi zadúʼyanu lu artículo riʼ, ne xiñee?

² Para gacané Jesús laanu chuʼnu listu bizeetebe chonna parábola o ejemplu ni zacané laanu gatananu. Laacani nga: ejemplu stiʼ ca dendxuʼ ne ca chiva, chii binnidxaapaʼ ne stiʼ ca talentu. Cada tobi de laacani rusihuinni zuni juzgar Jesús binni pur ni guni. Lu artículo riʼ zadúʼyanu guionnaʼ ejemplu riʼ ne xi rusiidicani laanu. Primé guidúʼyanu ejemplu stiʼ ca dendxuʼ ne ca chiva.

CA DENDXUʼ NE CA CHIVA

3. ¿Padxí nga guni juzgar Jesús binni?

³ Bisiidiʼ Jesús ora guni juzgar binni ni zuuyabe nga pa biʼniʼ crecaʼ ca noticia galán ne pa gucanecaʼ ca ungidu (Mat. 25:​31-46). ¿Padxí zaníʼ Jesús tuu nga ca binni ni zeeda gaca casi dendxuʼ o chiva yaʼ? Zúnibe ni lu «gran tribulación», ante guzulú Armagedón (Mat. 24:21; nota). Cásica ribeechú ti pastor dendxuʼ lade chiva zaqueca  zuni Jesús, zabeechube ca binni ni cayacané ca ungidu de lade ca binni ni cadi cayacané laacaʼ.

4. Casi riete lu Isaías 11:​3, 4, ¿xiñee zanda chuʼnu seguru jneza modo zuni juzgar Jesús binni? (Biiyaʼ ca imagen ).

⁴ Maʼ biʼniʼ Jehová Jesús juez, ne Biblia ná jneza modo zuni Juzgarbe (biindaʼ Isaías 11:​3, 4). Laabe ruuyabe ni riníʼ ique binni, ni riníʼ, ni runi ne modo runi tratarcaʼ ca ungidu (Mat. 12:​36, 37; 25:40). Zánnabe tuu nga gucané ca ungidu lu dxiiñaʼ ni bíʼnicaʼ. a Ne ti modo jma risaca gacanenu laacabe nga ra guni predicarnu. Ca binni ni gacané laacabe zuuyaʼ Dios laacaʼ casi binni «nachaʼhuiʼ» ne zanda guibánicaʼ sin qué chuʼ dxi gáticaʼ lu Guidxilayú riʼ (Mat. 25:46; Apoc. 7:​16, 17). ¡Pabiáʼ sicarú ndaayaʼ zacaa ca ni qué gusaana de gacané ca ungidu! Pa qué guixélecabe de Jehová lu gran tribulación ne despué la? qué zaxiá lácabe «lu libru de guendanabani» (Apoc. 20:15).

5. ¿Xi rusiidiʼ ejemplu stiʼ ca dendxuʼ ne ca chiva laanu, ne tuu nga caquiiñeʼ gucaadiaga chaahuiʼ ca ni?

⁵ Bisihuinni nácaluʼ ti binni ni qué zaxeleʼ de Jehová. Ejemplu stiʼ ca dendxuʼ ne ca chiva caniʼni de ca binni ni napa esperanza de guibánicaʼ lu Guidxilayú riʼ sin qué chuʼ dxi gáticaʼ. Cadi rusihuinnisícabe qué rixélecabe de Jehová ora racanécabe ca biʼchiʼ Cristu lu predicación, sínuque laaca rúnicabe ni ora rinándacabe ca instrucción ni rudii grupuhuiiniʼ ni maʼ gulí Jesús (Mat. 24:45). Ca ni napa esperanza de guibani guibáʼ laaca caquiiñeʼ gucaadiaga chaahuicabe ni cusiidiʼ ejemplu riʼ. ¿Xiñee yaʼ? Purtiʼ cayuuyaʼ chaahuiʼ Jesús ni cayúnicabe, ni riníʼ íquecabe ne cayunadiaga ni riníʼcabe. Nga runi laacabe laaca caquiiñeʼ gusihuínnicabe qué zaxélecabe de Jehová. Ne Jesús peʼ guníʼ xhupa ejemplu ra cayete xi peʼ caquiiñeʼ guni ca ungidu ne zeedacani lu Mateo capítulo 25. Yanna, guidúʼyanu ejemplu o parábola stiʼ chii binnidxaapaʼ.

CHII BINNIDXAAPAʼ

6. ¿Ximodo bisihuinni gaayuʼ binnidxaapaʼ que nuu xpiaanicaʼ? (Mateo 25:​6-10).

⁶ Lu ejemplu riʼ guníʼ Jesús de chii binnidxaapaʼ ni bireecaʼ zidxaagalucaʼ novio (Mat. 25:​1-4). Guirácabe nuucabe chúʼcabe ne novio que ra chigaca guendaxheelaʼ que. Guníʼ Jesús gaayuʼ binnidxaapaʼ que «nahuati», ne gaayuʼ de laacaʼ «nuu xpiaaniʼ». Ca ni nuu xpiaaniʼ que nuucaʼ listu ne nexhenacaʼ ne gudixhe íquecaʼ cuézacaʼ dede ora guedandá novio que neca maʼ huaxhinni guedandabe. Ngue runi zinecaʼ lámpara para guzaaniʼ huaxhinni ne aparte zinecaʼ frascu daʼ aceite ndaaniʼ pa málasi guindaa novio que. Zaqué guluucaʼ lámpara sticaʼ listu para cadi guizuíʼ (biindaʼ Mateo 25:​6-10). Ora bedandá novio que, ca binnidxaapaʼ ni nuu listu que biuunecaʼ novio que ra chigaca guendaxheelaʼ que. Zacagá nga zazaaca né ca xpinni Cristu ungidu ca ni qué guixeleʼ de Jehová ne gatanacaʼ dede ora guedandá novio, Jesús, zanda chuʼcaʼ lu Reinu stiʼ Dios ni nuu guibáʼ (Apoc. 7:​1-3). b ¿Xi zazaaca ne gaayuʼ binnidxaapaʼ nahuati que yaʼ?

7. ¿Xi bizaaca ca binnidxaapaʼ nahuati que, ne xiñee?

 ⁷ Maʼ gadxé modo naca ca binnidxaapaʼ nahuati que de ca ni nuu xpiaaniʼ, purtiʼ laacaʼ qué ñuucaʼ listu para ora guedandá novio que. Lu parábola que riete ora binadiágacabe mayaca guedandá novio que bidiicabe cuenta mayaca guizuíʼ lámpara que. Ne cumu qué ninécabe aceite para nuchácabe ndaaniʼ lámpara stícabe la? gupa xidé yesícabe ni. Ora bedandá novio que caʼruʼ guibiguétacabe. Peru «ca binnidxaapaʼ ni nuu listu que biuunecaʼ novio que ra chigaca guendaxheelaʼ que, ne bieeguʼ puertaʼ» (Mat. 25:10). Ora bibiguetaʼ ca binnidxaapaʼ nahuati que gucaláʼdxicaʼ ñuucaʼ, peru gudxi novio que laacaʼ: «Qué runebiaʼyaʼ laatu» (Mat. 25:​11, 12). Qué ñuucaʼ listu ne nibézacaʼ dede ora ñedandá novio que. ¿Xi rusiidiʼ parábola riʼ ca ungidu yaʼ?

8, 9. ¿Xi rusiidiʼ ejemplu stiʼ chii binnidxaapaʼ ca ungidu? (Biiyaʼ ca imagen ca).

⁸ Bisihuinni nuuluʼ listu ne nexhenaluʼ. Ca diidxaʼ guníʼ Jesús riʼ qué rusihuínnicani ziuu chupa grupu de ungidu: Ti grupu ni ziuu listu ora guedandá fin stiʼ guidxilayú riʼ ne ti grupu ni qué ziuu listu. Sínuque ni cusiénebe ca ungidu nga pa qué chuʼcaʼ listu ora guedandá fin, qué zacaacaʼ premiu sticaʼ (Juan 14:​3, 4). ¡Nabé risaca ca diidxaʼ riʼ! Pa cabézanu guibáninu guibáʼ o lu Guidxilayú, guiranu caquiiñeʼ gucaadiaga chaahuinu ni rusiidiʼ parábola stiʼ chii binnidxaapaʼ riʼ laanu. Caquiiñeʼ chuʼnu listu ne gatananu ti guni huantarnu ora gueeda fin (Mat. 24:13).

⁹ Casi maʼ bidúʼyanu lu ejemplu stiʼ chii binnidxaapaʼ que, bisiidiʼ Jesús risaca nga cadi gusaana de chuʼnu listu ne gatananu. Despué guniʼbe ejemplu stiʼ ca talentu, ra bizeetebe risaca nga gácanu binni runi dxiiñaʼ.

 CA TALENTU

10. ¿Ximodo bisihuinni guiropaʼ esclavu que jneza ni rúnicaʼ? (Mateo 25:​19-23).

¹⁰ Lu parábola riʼ, guníʼ Jesús de chonna esclavu, chupa de laacaʼ bíʼnicaʼ ni jneza né ni biaananecaʼ ne tobi ca coʼ (Mat. 25:​14-18). Ante cheʼ xpixuaanacabe sti guidxi, bisaanané laacabe caadxi talentu, ni caninu nga stale bueltu. Guiropaʼ esclavu ni biʼniʼ ni jneza ne ni biaananecaʼ bíʼnicaʼ dxiiñaʼ para guni ganarcaʼ jma talentu para xpixuaanacaʼ. Ngue runi ora bibiguetaʼ xpixuaanacabe maʼ biʼniʼ ganarcaʼ doble de ni bisaanané laacabe. Guníʼ xpixuaanacabe biaʼsi ni bíʼnicabe ne gudxi cada tobi de laacabe: «Gudáʼ ne biechené xpixuaanaluʼ» (biindaʼ Mateo 25:​19-23). Yanna, ¿xi biʼniné guionna esclavu que bueltu ni bisaanané xpixuaanaʼ laa yaʼ?

11. ¿Xi bizaaca esclavu nachaabaʼ que, ne xiñee?

¹¹ Guionna esclavu que bidii xpixuaanaʼ laa ti talentu para gutale ni. Peru «nachaabaʼ» esclavu riʼ, ngue runi gudaañe ndaaniʼ yu ne bicaachiʼ ni. Ora bibiguetaʼ xpixuaanabe bidxiguétabe laa ni bidii laabe. Lugar de ninábabe nutiidilaʼdxiʼ xpixuaanabe laabe, laga bisihuínnibe nácabe ti esclavu malu ne guniʼbe naca xpixuaanabe «ti hombre ni rinabaʼ stale cosa». Pur ni bizaaca riʼ gudindené xpixuaanabe laabe guxha laabe talentu que ne guladxi laabe de ra lidxi (Mat. 25:​24, 26-30).

12. ¿Tu zeeda gaca guiropaʼ esclavu ni biʼniʼ ni jneza que?

¹² Guiropaʼ esclavu ni biʼniʼ ni jneza que zeeda gácacabe ca xpinni Cristu ungidu ni qué rusaana de gúnicaʼ ni ná Dios. Jesús, ni naca xpixuaanacabe, cayabi cada tobi de laacabe: «Gudáʼ ne biechené xpixuaanaluʼ». Ni cayabibe laacaʼ nga zacaacaʼ premiu sticaʼ guibáʼ, laani nga primé resurrección (Mat. 25:​21, 23; Apoc. 20:5a). Peru ejemplu ni cadi jneza stiʼ esclavu ni nachaabaʼ que riguixhenani ca ungidu. Guidúʼyanu xiñee.

13, 14. ¿Xi rusiidiʼ parábola stiʼ ca talentu ca ungidu? (Biiyaʼ ca imagen ca).

 ¹³ Bisihuinni nácaluʼ binni runi dxiiñaʼ. Lu parábola stiʼ ca talentu que, qué niníʼ diʼ Jesús zaca ca ungidu nachaabaʼ. Sínuque ni racaláʼdxibe nga gatanacaʼ, cásica guniʼbe lu parábola stiʼ chii binnidxaapaʼ que. Bizeetebe xi zazaacacaʼ pa chuʼ dxi guireecaʼ gana: qué ziuucaʼ «lade ca binni ni maʼ guníʼnebe ne ni maʼ gulibe» ne qué ziuucaʼ lu Reinu stiʼ Dios guibáʼ (2 Ped. 1:10).

¹⁴ Lu parábola stiʼ chii binnidxaapaʼ ne ca talentu que, bisiidiʼ Jesús ca xpinni Cristu ungidu caquiiñeʼ chuʼcaʼ listu, gatanacaʼ ne gácacaʼ binni runi dxiiñaʼ. Peru laaca gudxi Jesús laacabe sti cosa para quixhená laacabe. Zeedani lu Mateo 24:​40, 41. Guidúʼyanu xi ná ca versículo ca.

TU «ZIÉ»

15, 16. Casi riete lu Mateo 24:​40, 41, ¿xiñee risaca gataná ca ungidu?

¹⁵ Ante guiníʼ Jesús guionnaʼ parábola que, guniʼbe de chupa hombre ni cayuni dxiiñaʼ lu layú ne de chupa gunaa ni cayuutuʼ lu molinu de manu. Lu cada tobi de ca ejemplu ca ruluíʼ si ngueca nga ni cayuni guiropaʼ binni ca. Peru Jesús guníʼ: «zié tobi ne ziaana tobi» (biindaʼ Mateo 24:​40, 41). Lu sti versículo ca gúdxibe ca discípulo stibe: «Lagataná, purtiʼ qué gánnatu padxí gueeda Señor stitu» (Mat. 24:42). Cásica ca diidxaʼ riʼ nga guníʼ Jesús despué de bizeetebe parábola stiʼ chii binnidxaapaʼ (Mat. 25:13). Nga runi, zanda guininu ruluíʼ si ngueca nga ni ná ca diidxaʼ riʼ. Bisiene Jesús zedandá ora zahuinni tuu nga ca ungidu ni zié guibáʼ. Ti xpinni Cristu ni dxandíʼ naca ungidu ne qué guixeleʼ de Dios «zié» guibáʼ, ni nani nga, zadxaagalú Jesús laabe lu Reinu ni nuu guibáʼ (Juan 14:3).

¹⁶ Bisihuinni nexhenaluʼ. Pa qué gataná ti ungidu ne qué chuʼ gaxha de Jehová la? qué ziuudibe ora gaca reunir ca ni maʼ gulí Jesús (Mat. 24:31). Laaca caquiiñeʼ gucaadiaga chaahuiʼ guiráʼ ca ni napa esperanza guibani lu guidxilayú riʼ ca diidxaʼ ni guníʼ Jesús ne cadi guixélecaʼ de Jehová ne gatanacaʼ.

17. ¿Xiñee cadi naquiiñeʼ chuʼnu xizaa pa quixhe ique Jehová cuiruʼ xcaadxi ungidu lu ca últimu dxi riʼ?

¹⁷ Cumu runibiáʼ chaahuinu Jehová la? nuunu seguru jneza guiráʼ ni rúnibe. Nga runi cadi naquiiñeʼ chuʼnu xizaa pa quixhe ique Jehová cuiruʼ xcaadxi ungidu lu ca últimu dxi riʼ. c Guietenaláʼdxinu ejemplu ni guníʼ Jesús de ca trabajador ni yeguni dxiiñaʼ lu layú uva biaʼ las 5 de la tarde (Mat. 20:​1-16). Ca trabajador ni bizulú biʼniʼ dxiiñaʼ huadxí que biáʼqueca biaxacaʼ que ca trabajador ni bizulú biʼniʼ dxiiñaʼ siadóʼ que. Zaqueca nga zazaaca ne guiráʼ xixé ungidu ni chuʼ gaxha de Jehová, zacaacaʼ premiu sticaʼ de checaʼ guibáʼ gastiʼ naca pora gulí Jehová laacaʼ.

BICAADIAGA CHAAHUIʼ NI CUSIIDIʼ NI LII

18, 19. ¿Xi maʼ bizíʼdinu lu artículo riʼ?

¹⁸ ¿Xi maʼ bizíʼdinu lu artículo riʼ? Bizíʼdinu lu ejemplu stiʼ ca dendxuʼ ne ca chiva pabiáʼ risaca nga para ca ni napa esperanza de guibánicaʼ lu guidxilayú riʼ cadi guixélecaʼ de Jehová yanna ne lu gran tribulación. Ne ora guedandá tiempu ca zaníʼ Jesús tuu nga ca ni qué nixeleʼ de Dios ne «zápacaʼ guendanabani ni qué zaluxe» (Mat. 25:46).

 ¹⁹ Laaca maʼ bidúʼyanu chupa ejemplu ni caguixhená ca ungidu. Lu ejemplu stiʼ chii binnidxaapaʼ que gaayuʼ de laacabe bisihuinni nuucaʼ listu ne nexhenacaʼ. Gucaacaʼ nuu xpiaaniʼ ne gutanacaʼ dede ora bedandá novio que, cumu xcaayu que gucaacaʼ nahuati ne qué ñuucaʼ listu la? qué niná novio que ñuucaʼ ra cayacaʼ guendaxheelaʼ que. ¿Xi rusiidiʼ ni laanu yaʼ? Caquiiñeʼ chuʼnu listu ne cuézanu dede ora guedané Jesús fin stiʼ guidxilayú riʼ. Lu ejemplu stiʼ ca talentu que bidúʼyanu de chupa esclavu ni nácacaʼ binni ni runi dxiiñaʼ. Cumu qué nucheenécabe xpixuaanacabe ne bíʼnicabe stipa gutálecabe xpueltu la? guyuulaʼdxiʼ ni bíʼnicabe. Peru esclavu nachaabaʼ que bisáʼbicabe laa fuera. ¿Xi rusiidiʼ ni laanu yaʼ? Cadi naquiiñeʼ gusaana de gúninu xhiiñaʼ Dios dede ora gueeda fin. Ne últimu la? bidúʼyanu bisiidiʼ Jesús caquiiñeʼ gataná ca ungidu para ganda chuʼcaʼ lu Reinu ni nuu guibáʼ. De guidubi ladxidóʼ ca ungidu racaláʼdxicaʼ gaca reunírnecaʼ Jesús guibáʼ. Ne despué de Armagedón, zácacabe novia ni chichaganáʼ Jesús «lu boda stiʼ Dendxuhuiiniʼ» (2 Tes. 2:1; Apoc. 19:9).

20. ¿Xi zuni Jehová pa gucaadiaga chaahuinu ni cayabi laanu?

²⁰ Maʼ cadi candaa zuni juzgar Jesús binni, peru cadi naquiiñeʼ guidxíbinu. Pa qué guixélenu de Bixhózenu ni nuu guibáʼ ni nadxii laanu la? zudii laanu poder stiʼ ni «jma nadipaʼ» que poder stinu para ganda guzuahuaanu «nezalú Xiiñiʼ Hombre» (2 Cor. 4:7; Luc. 21:36). Nga runi, pa cabézanu guibáninu guibáʼ o ndaaniʼ guidxilayú riʼ la? caquiiñeʼ gucaadiaga chaahuinu xi rusiidiʼ ca parábola ni guníʼ Jesús que. Ne pa gúninu ni la? ziuulaʼdxiʼ Bixhózenu ni cayúninu ne cumu guizáʼ nadxiibe laanu la? zucaabe lá cada tobi de laanu «lu libru de guendanabani» (Dan. 12:1; Apoc. 3:5).