1, 2. Laanu, ca xpinni Jehová, ¿xiñee nabáninu nayecheʼ? (Santiago 1:​22-25).

 RACALAʼDXIʼ JEHOVÁ ne Xiiñiʼ guibáninu nayecheʼ. Hombre ni bicaa Salmo 119:2 guníʼ: «Nayecheʼ ribani ca ni rucaadiaga guiráʼ ni rusietenaláʼdxibe laa, ca ni ruyubi laabe de guidubi ladxidóʼ». Ne laaca guníʼ Jesús: «¡Dichoso nga ca ni rucaadiaga stiidxaʼ Dios ne rúnicaʼ ni ná ni!» (Luc. 11:28).

² Laanu, ca xpinni Jehová nabáninu nayecheʼ. ¿Xiñee yaʼ? Purtiʼ nápanu stale razón para guni sentirnu zacá, ne tobi de laacani ne ni jma risaca nga purtiʼ ridúʼndanu Stiidxaʼ Dios ne rúninu stipa gúninu ni ná ni ne ni rusiidini laanu (biindaʼ Santiago 1:​22-25).

3. ¿Xi ndaayaʼ ricaanu ora rúninu ni ná Stiidxaʼ Dios?

³ ¿Xi ndaayaʼ ricaanu pur rúninu ni ná Stiidxaʼ Dios? Tobi de laani nga rusiéchenu Jehová, ne ra gánnanu rusiéchenu laabe laaca riuʼnu nayecheʼ (Ecl. 12:13). Ra chinándanu ca conseju ni zeeda lu Stiidxaʼ Dios racaneni laanu chuʼnu tobi si né familia stinu ne gaca xhamígunu ca hermanu de ndaaniʼ congregación. Zándaca maʼ biiyaluʼ zacá ni. Ne laaca qué rápanu guendanagana casi rapa ca ni qué rinanda ca ley stiʼ Jehová. Zeeda gácani casi guníʼ rey David lu ti canción despué de bizeetebe ley stiʼ Jehová, ca ni gudixhe ne ca ley stiʼ ni caníʼ modo gaca juzgar binni, guniʼbe: «Ca ni chinanda ni nani zacaacaʼ stale ndaayaʼ» (Sal. 19:​7-11).

4. ¿Xiñee nuu biaje raca nagana para laanu gúninu ni ná Stiidxaʼ Dios?

⁴ Dxandíʼ, nuu biaje raca nagana guidúʼndanu ne gúninu  ni ná Stiidxaʼ Dios. Neca nabé nuu xhiiñanu, caquiiñeʼ cueenu tiempu para guidúʼndanu ne guni estudiarnu Biblia, zacá ziénenu ni racalaʼdxiʼ Jehová gúninu. Nga runi, lu artículo riʼ zadúʼyanu caadxi conseju ni zacané laanu guidúʼndanu Biblia guiráʼ dxi. Ne laaca zadúʼyanu ni zacané laanu guiníʼ íquenu ni cadúʼndanu ne guyúbinu modo gúninu ni lu xquendanabáninu.

GULEE TIEMPU PARA GÚʼNDALUʼ STIIDXAʼ DIOS

5. ¿Xiñee nabé nuu xhiiñanu?

⁵ Laanu, ca xpinni Jehová, nabé nuu xhiiñanu. Riquíʼñenu tiempu para guni tendernu ca responsabilidad ni zeeda lu Biblia. Guzéʼtenu caadxi ejemplu, stale de laanu caquiiñeʼ gúninu dxiiñaʼ para gápanu ni caquíʼñenu ne ni caquiiñeʼ familia stinu (1 Tim. 5:8). Stale de ca hermanu stinu rápacaʼ familia sticaʼ ni maʼ huará o maʼ huaniisi. Ne guiranu laaca caquiiñeʼ cueenu tiempu para gápanu laca laanu ti chuʼnu nazaaca. Ne laaca nuu ca dxiiñaʼ ni nápanu ndaaniʼ congregación. Ne ti dxiiñaʼ ni jma risaca ni nápanu nga guni predicarnu. Pur guiráʼ ca cosa ni bizéʼtenu riʼ, zándaca guiníʼ íqueluʼ: «¿Xi zanda guneʼ para cueeʼ tiempu guundaʼ Biblia guiráʼ dxi, guiníʼ iqueʼ ni cayuundaʼ ne guneʼ ni nani yaʼ?».

6. ¿Xi zanda gúniluʼ para cadi gusaana de gúʼndaluʼ Biblia? (Biiyaʼ imagen ca).

⁶ Guidúʼndanu Biblia nga tobi de ca cosa «jma risaca» para ti xpinni Cristu, nga runi caquiiñeʼ gúninu ni (Filip. 1:10). Sicaríʼ ruzulú libru stiʼ Salmos nayecheʼ nga riuu hombre ni «riuulaʼdxiʼ guʼndaʼ ley stiʼ Jehová, ne ruundaʼ ley stibe ridxíʼ ne huaxhinni ne riníʼ ique ni nani» (Sal. 1:​1, 2). Naquiiñeʼ cueenu tiempu para guidúʼndanu Stiidxaʼ Dios. Peru ¿pora nga jma galán guidúʼndanu ni yaʼ? Maʼ cada tobi de laanu quixhe pora gúnini. Peru naquiiñeʼ guidúʼyanu cadi chuʼ xiixa ni gucueeza laanu ora maʼ  gudíxhenu guidúʼndanu ni. Ti hermanu láʼ Víctor guníʼ: «Riuuladxeʼ guundaʼ Biblia guiráʼ siadóʼ. Cadi purtiʼ si riuuladxeʼ guiasaʼ siadóʼ, sínuque óraca nga zanda guneʼ ni purtiʼ gastiʼ ni guchiiñaʼ naa, ne cumu gastiʼ ni cá iqueʼ óraca la? qué raca nagana para naa guieneʼ ni cayuundaʼ». ¿Ñee laaca ni runi Víctor ca nga rúniluʼ la? Galán guiníʼ íqueluʼ ndiʼ: «Para naa, ¿pora nga jma galán guʼndaʼ Biblia?».

GUNÍʼ IQUE NI CAYUUNDALUʼ

7, 8. Biquiiñeʼ ti ejemplu para gusiéneluʼ xi cadi naquiiñeʼ gúninu ora guidúʼndanu Biblia.

⁷ Ora maʼ gudíxhenu pora zanda guidúʼndanu Biblia laaca galán guʼyaʼ chaahuinu cadi guiábanu lu trampa de guidúʼndanu ni sin guiaananenu gastiʼ lu xquendabiaaninu. ¿Ñee huayuundaluʼ xiixa ne despué maʼ qué rietenaláʼdxiluʼ de laani la? Dxandíʼ, guiranu zándaca huazaacanu ni. ¡Peru triste guininu ni, zanda gueeda guizaacanu ni ora guidúʼndanu Biblia! Zándaca maʼ gudixhe íquenu guidúʼndanu chupa chonna capítulo guiráʼ dxi. Galán nga quíxhenu meta ne gúninu stipa pur gúninu cani (1 Cor. 9:26). Pa racaláʼdxinu gacané Biblia laanu la? cadi caquiiñeʼ si guidúʼndanu ni, laaca caquiiñeʼ gúninu sti cosa.

⁸ Guzéʼtenu ti ejemplu. Caquiiñeʼ ca yagahuiiniʼ ca de nisaguié. Peru ora guiaba dxacha nisaguié la? qué zanda gueʼ guidxilayú ca ziáʼ nisa ne qué zacaneni ca yagahuiiniʼ ca guiroobacaʼ. Nga runi, jma galán nga caadxi ga guiaba nisaguié para ganda gueʼ layú ca nisa ca ne gacaneni ca yagahuiiniʼ ca guiroobacaʼ. Zaqueca nga rizaaca ora guidúʼndanu Biblia, pa gúninu ni nagueenda nagueenda la? qué ziénenu, qué zietenaláʼdxinu ne qué zanda gúninu ni cadúʼndanu (Sant. 1:24).

9. ¿Xi naquiiñeʼ gúninu pa nabé nagueenda ridúʼndanu Biblia?

⁹ Guníʼ ique cayuundaluʼ Biblia peru cayuundaluʼ ni nagueenda nagueenda. ¿Xi zanda gúniluʼ yaʼ? Biʼniʼ stipa gúʼndaluʼ  chaahuidugá para ganda guiníʼ íqueluʼ ni cayuundaluʼ. Cadi guiníʼ íqueluʼ qué zanda gúniluʼ ni. Primé, zanda cuʼluʼ xhupa xhonna minutu lu tiempu ni maʼ gudixhe íqueluʼ gúʼndaluʼ para ganda guiníʼ íqueluʼ ni cayuundaluʼ o guiropa, zanda gúʼndaluʼ chupa chonna versículo si ne iquiiñeluʼ tiempu ni guiaana ca para guiníʼ íqueluʼ ni cayuundaluʼ. Víctor, hermanu ni bizéʼtenu lu párrafo 6 que, guníʼ: «Qué ruundaʼ stale versículo, zándaca biaʼ ti capítulo si. Cumu dede siadóʼ ruundaʼ la? napaʼ guidubi dxi para guiníʼ iqueʼ ni biindaʼ que». Dxandíʼ, risaca nga quíxheluʼ pabiáʼ gúʼndaluʼ, peru ni jma risaca nga cadi gúʼndaluʼ ni nagueenda nagueenda ti ganda guiníʼ íqueluʼ ni cayuundaluʼ ne gacaneni lii (Sal. 119:97; biiyaʼ cuadru ni láʼ « Caadxi pregunta ni zacané lii guiníʼ íqueluʼ»).

10. ¿Ximodo zanda gúniluʼ ni cayuundaluʼ lu Biblia? Bizeeteʼ ti ejemplu (1 Tesalonicenses 5:​17, 18).

¹⁰ Neca maʼ gudíxheluʼ pora gúʼndaluʼ Biblia ne pabiáʼ tiempu gúniluʼ ni peru biyubi modo gúniluʼ ni nani lu xquendanábaniluʼ. Pa cayuundaluʼ ti ndaʼ de lu Stiidxaʼ Dios, guníʼ ique: «¿Ximodo zanda chinandaʼ ni nani yannadxí o huidxe yaʼ?». Guzéʼtenu ti ejemplu, guníʼ ique biindaluʼ ni ná 1 Tesalonicenses 5:​17, 18 (biindaʼ ni). Despué de biindaluʼ ni, guníʼ ique ca oración ni rúniluʼ. ¿Ñee rúniluʼ cani de guidubi ladxidoʼloʼ la? ¿Panda biaje runi orarluʼ? ¿Xi ca cosa nápaluʼ ne ñuuláʼdxiluʼ nudiiluʼ xquixe peʼ Jehová pur laacani? Zándaca quixhe íqueluʼ gudiiluʼ xquixe peʼ laabe pur chonna cosa ni bidiibe o bíʼnibe pur lii. Pa cueeluʼ tiempu para guiníʼ íqueluʼ ni cayuundaluʼ neca chupa chonna minutu cadi zacané si ni lii gucaadiágaluʼ Stiidxaʼ Dios, sínuque zacaneni lii gúniluʼ ni nani. Ne pa guiráʼ dxi gúniluʼ ni caninu riʼ ora gúʼndaluʼ Biblia la? Ra zidiʼdiʼ dxi zacaneni lii chuʼluʼ jma gaxha de Jehová. Peru ¿xi zanda gúniluʼ pa nuuruʼ xcaadxi cosa ra naquiiñeʼ guchaaluʼ yaʼ?

GUDIXHE META NI ZANDA UGAANDALUʼ

11. ¿Xiñee ziuu biaje zareeluʼ gana ora gúʼndaluʼ Biblia? Bizeeteʼ ti ejemplu.

¹¹ Ora maʼ cayuundaluʼ Biblia zándaca ziuu biaje zareeluʼ gana purtiʼ zudiiluʼ cuenta nuu stale cosa ra caquiiñeʼ guchaaluʼ. Guníʼ ique bizaaca ndiʼ: ti dxi cayuundaluʼ chupa chonna versículo ni caníʼ cadi galán diʼ nga gusisácanu caadxi binni ne gúninu menu xcaadxi (Sant. 2:​1-8) Cumu gucané ni lii gúʼyaluʼ  ximodo nga guni tratarluʼ binni la? gudixheʼ íqueluʼ gúniluʼ ni. Né biaʼsi peʼ nga ni bíʼniluʼ ca. Sti dxi que biindaluʼ xcaadxi textu ni caníʼ naquiiñeʼ gusidóʼ binni ludxi (Sant. 3:​1-12). Raqué bidiiluʼ cuenta nuu biaje huaniluʼ cosa ni cadi galán o ni huayuniná tuuxa, nga runi gudixhe íqueluʼ guyúbiluʼ guiniʼluʼ cosa sicarú ne ni cuʼ gana binni. Guionna gubidxa que biindaluʼ cadi naquiiñeʼ gaca xhamígunu binni guidxilayú (Sant. 4:​4-12). Gucaneni lii gápaluʼ cuidadu xi tipu película ruuyaluʼ ne xi música rucaadiagaluʼ. Lu guidapa gubidxa que zándaca maʼ bireeluʼ gana ra guníʼ íqueluʼ guiráʼ ra caquiiñeʼ guchaaluʼ.

12. ¿Xiñee cadi naquiiñeʼ guireeluʼ gana pa gudiiluʼ cuenta nuu ra caquiiñeʼ guchaaluʼ ora maʼ cayuundaluʼ Biblia? (Biiyaʼ nota ca).

¹² Pa maʼ bidiiluʼ cuenta nuu ra caquiiñeʼ guchaaluʼ la? cadi guireeluʼ gana. Ndiʼ rusihuinni nánnaluʼ xi pur cayuundaluʼ Biblia, nácaluʼ humilde ne nánnaluʼ nuu ra caquiiñeʼ guchaaluʼ. a Cadi guiaandaʼ lii, cadi naquiiñeʼ gusaana tuuxa de guibani modo cusiidiʼ Dios laa (Col. 3:10). ¿Xi zacané lii cadi gusaana de gúniluʼ ni ná Stiidxa Dios yaʼ?

13. ¿Xi conseju zanda gacané lii? (Biiyaʼ ca imagen ca).

¹³ Ti cosa ni zacané lii nga guiéneluʼ nuu cosa ni qué zanda gúniluʼ nga runi, cadi gacaláʼdxiluʼ gúniluʼ guiráʼ ni caziidiluʼ tobi si tiru (Prov. 11:2). Zanda gúniluʼ ndiʼ: bicaa lu ti lista ca cosa ra caquiiñeʼ guchaaluʼ, gulí tobi o chupa de laacani ne gudixheʼ ique gúniluʼ ni, ne chaahuidugá maʼ ziyúniluʼ xcaadxi cosa ni  zeeda lu lista ca. Peru ¿ximodo guzululuʼ yaʼ?

14. ¿Xi meta zanda quixhe íqueluʼ ugaandaluʼ primé?

¹⁴ Primé, zanda quixhe íqueluʼ ugaandaluʼ meta ni cadi gaca nagana para lii o ra jma caquiiñeʼ guchaaluʼ. Ora maʼ gudixhe íqueluʼ xi meta guzuluneluʼ la? biyubi información lu ca publicación stinu, zanda iquiiñeluʼ Índice de las publicaciones Watch Tower o Ca tema ni huabee ca testigu stiʼ Jiobá. Biʼniʼ orar Jehová ne gunabaʼ laa gudii lii «deseu ne poder» para gúniluʼ «guiráʼ ni riuuláʼdxibe» (Filip. 2:13). Despué, gudixheʼ ique gúniluʼ ni caziidiluʼ. Ora gúʼyaluʼ maʼ bigaandaluʼ meta stiluʼ, zacaneni lii chuʼluʼ gana para ugaandaluʼ sti meta. Ne zándaca ra gúniluʼ stipa guchaaluʼ xiixa lu xquendanabániluʼ zacané ni lii ganda gúniluʼ xcaadxi cosa ni bicaaluʼ lu lista que.

BIDII LUGAR GACANÉ STIIDXAʼ DIOS LII

15. ¿Xiñee maʼ gadxe laanu, ca xpinni Jehová de xcaadxi binni ni ruundaʼ Biblia? (1 Tesalonicenses 2:13).

¹⁵ Nuu binni riníʼ stale biaje maʼ biindaʼ Biblia, peru ¿ñee runi crécabe ni nani ne rudiicabe lugar guchaa ca conseju stini xquendanabánicabe la? Triste guininu ni, peru stale de laacabe qué rinándacabe ni ná ca conseju stini. Peru ¡maʼ gadxe si nácanu laanu, ca xpinni Jehová! Cásica ca xpinni Cristu de primé siglu que, ricaanu ni ná Biblia «casi stiidxaʼ Dios». Nga runi, rúninu stipa gusihuínninu cayacaneni laanu lu xquendanabáninu (biindaʼ 1 Tesalonicenses 2:13).

16. ¿Xi zacané laanu gúninu ni ná Stiidxaʼ Dios?

¹⁶ Nuu biaje raca nagana para laanu guidúʼndanu ne gúninu ni ná Stiidxaʼ Dios. Zándaca raca nagana para laanu cueenu tiempu para guidúʼndanu ni. Zándaca ridúʼndanu ni nagueenda ne qué riaananenu ni cadúʼndanu. O zándaca guireʼnu gana ra gudiʼnu cuenta stale nga ra caquiiñeʼ guchaʼnu. Peru intiica si guendanagana guidxaagaluluʼ zacané Jehová lii gudxiiluluʼ ca ni. Bidii lugar gacanebe lii, cadi gúʼndaluʼ Stiidxaʼ Dios ne despué gusiaandaluʼ ni nani, sínuque gudixhe ique gúniluʼ ni cayuundaluʼ. Ra jma gúʼndaluʼ Biblia ne gúniluʼ ni nani la? jma nayecheʼ zabániluʼ (Sant. 1:25).