1, 2. ¿Xiñee galán modo bizáʼ Jehová laanu?

 NABÉ galán modo bizáʼ Jehová laanu purtiʼ jma nayecheʼ riuʼnu ora rudiʼnu que ora ricaanu (Hech. 20:35). Dxandíʼ riéchenu ora rudii tuuxa laanu ti regalu peru jma riéchenu ora rúninu xiixa pur tuuxa. Ne ribeendunu ni galán purtiʼ bizáʼ Jehová laanu zacá. ¿Xiñee yaʼ?

² Purtiʼ ra bizáʼ Jehová laanu zacá, rudiibe lugar lu nanu riaana guyúbinu modo chuʼnu jma nayecheʼ. Pa cada dxi guyúbinu modo gacanenu binni, ziuʼnu jma nayecheʼ. ¿Cadi dxandíʼ guizáʼ galán modo bizáʼ Jehová laanu la? (Sal. 139:14).

3. ¿Xiñee ná Biblia naca Jehová «ti Dios ni nayecheʼ»?

³ Ruzeeteʼ Biblia nayecheʼ riuu ca binni ni rudii, nga runi qué ridxagayaanu naca Jehová «ti Dios ni nayecheʼ» (1 Tim. 1:11). Laabe nga primé ni bidii de ni napa ne gástiruʼ stobi casi laabe. Casi guníʼ apóstol Pablo, «purtiʼ laabe bizaʼbe laanu, pur laabe nabáninu ne riniibinu» (Hech. 17:28). Ne «guiráʼ regalu sicarú ne guiráʼ cosa nachaʼhuiʼ» zeedacani de Jehová (Sant. 1:17).

4. ¿Xi zacané laanu chuʼnu jma nayecheʼ?

⁴ ¿Xi zanda gúninu pa racaláʼdxinu chuʼnu jma nayecheʼ ora gudiʼnu de ni nápanu yaʼ? Lu artículo riʼ zadúʼyanu zanda chinándanu ejemplu stiʼ Jehová, laa riuulaʼdxiʼ gudii de guidubi ladxidóʼ (Efes. 5:1). Laaca zadúʼyanu xi zanda gúninu pa runi sentirnu qué rusisaca binni ni rúninu pur laa. Zacané ca ni bizéʼtenu riʼ laanu, chuʼnu jma nayecheʼ ne cadi gusaana de guiéchenu ora gudiʼnu de ni nápanu.

 CHINÁNDANU EJEMPLU STIʼ JEHOVÁ, LAA RIUULAʼDXIʼ GUDII

5. ¿Xi rudii Jehová laanu?

⁵ Guidúʼyanu caadxi modo rusihuinni Jehová riuulaʼdxiʼ gudii. Guzéʼtenu ti ejemplu, rudiibe laanu ca cosa ni caquíʼñenu. Zándaca cadi guiráʼ diʼ biaje nápanu jma de biaʼ caquíʼñenu, peru ruuyaʼ Jehová cadi guiaadxaʼ laanu ni peʼ caquíʼñenu. Casi guendaró, lari gácunu ne ti lugar ra cuézanu (Sal. 4:8; Mat. 6:​31-33; 1 Tim. 6:​6-8). Ne rúnibe ni cadi purtiʼ si napa xidé gúnibe ni. Peru ¿xiñee rúnibe ni yaʼ?

6. ¿Xi rusiidiʼ ni zeeda lu Mateo 6:​25, 26 laanu?

⁶ Rudii Jehová laanu ni caquíʼñenu purtiʼ nadxiibe laanu. Guidúʼyanu ca diidxaʼ ni guníʼ Jesús lu Mateo 6:​25, 26 (biindaʼ ni). Lu ca versículo riʼ, guníʼ Jesús ejemplu stiʼ ca pájaru ripapa guibáʼ ne guniʼbe: «Qué rudxiibacame ne qué rindísacame cosecha ne qué ruchácame troja». Despué bizeetebe: «Peru rudii Bixhózetu ni nuu guibáʼ ni gócame». De raqué gunabadiidxabe: «¿Ñee cadi jma risácatu que laacame la?». Ni gucalaʼdxiʼ Jesús nusiidiʼ nga para Jehová jma risaca ca xpinni que ca maniʼ. Pa rapa Jehová laacame zanda chuʼnu seguru laaca zápabe laanu. Cumu Bixhózenu laabe ne guizáʼ nadxiibe laanu la? rudiibe laanu ni caquíʼñenu (Sal. 145:16; Mat. 6:32).

7. ¿Ximodo zanda chinándanu ejemplu stiʼ Jehová ra gudiʼnu de ni nápanu? (Biiyaʼ ca imagen ca).

⁷ Nadxiinu binni cásica Jehová, ne pur nga rúninu stipa gudiʼnu laacaʼ ni caquiiñecaʼ. ¿Ñee runibiaʼluʼ ti hermanu o hermana ni caquiiñeʼ guendaró o lari la? Zanda iquiiñeʼ Jehová lii para gacaneluʼ laabe ne gudiiluʼ ni caquiiñebe. Runibiáʼcabe ca xpinni Jehová casi binni ni riuuladxiʼ gudii, jmaruʼ si ora guizaaca xiixa desgracia. Guiníʼ íquenu ni bizaaca lu pandemia stiʼ COVID-19 que. Guyuu hermanu bidii guendaró, lari ne xcaadxi cosa para ca hermanu ni caquiiñeʼ ni. Ne stale hermanu bidii donación para obra mundial ti iquiiñeʼ bueltu que lu ca labor de socorro ni guca lu guidubi Guidxilayú. Guirácabe bíʼnicabe ni ná Hebreos 13:16: «Cadi guiaandaʼ laatu gacanetu stobi ne gudiitu de ni nápatu, purtiʼ zeeda gaca ni casi ti sacrificiu ni riuulaʼdxiʼ Dios guicaa».

8. ¿Xi zanda gúninu purtiʼ rudii Jehová laanu stipa? (Filipenses 2:13).

 ⁸ Rudii Jehová laanu stipa. Qué rirá poder stibe ne riuuláʼdxibe gudiibe ni ca xpínnibe ni qué rusaana laabe (biindaʼ Filipenses 2:13). ¿Ñee huayuu biaje huanábaluʼ Jehová gudii stipa lii para gudxiiluluʼ xiixa tentación o para gudxiiluluʼ ti guendanagana guizáʼ naroʼbaʼ la? o huanábaluʼ laabe stipa para ganda gúniluʼ ca cosa ni rúniluʼ guiráʼ dxi la? Ora bíʼyaluʼ bidii Jehová stipa lii zándaca biʼniʼ sentirluʼ cásica biʼniʼ sentir apóstol Pablo, laa guníʼ: «Napaʼ stipa para guneʼ intiica cosa purtiʼ rudii Dios poder naa» (Filip. 4:13).

9. ¿Ximodo zanda chinándanu ejemplu stiʼ Jehová? (Biiyaʼ imagen ca).

⁹ Laanu, qué gápanu poder para gudiʼnu stipa binni cásica runi Jehová. Peru zanda chinándanu ejemplu stibe, laabe rudiibe de guidubi ladxidoʼbe. ¿Ximodo zanda gúninu ni yaʼ? Ra iquíʼñenu stipa stinu para gacanenu xcaadxi binni. Guzéʼtenu caadxi ejemplu. Pa maʼ huaniisi ti hermanu o huará la? zanda chuunu mandadu stibe o gacanenu laabe né ca dxiiñaʼ ni raca ra yoo. Ne laaca zanda gacanenu ora riá ne ora raca chaahuiʼ ra Yoo stiʼ Reinu. Pa iquíʼñenu stipa ni nápanu para gúninu ca cosa riʼ la? guizáʼ zacanenu ca hermanu stinu.

10. ¿Ximodo zanda gudiʼnu stipa tuuxa?

¹⁰ Guietenaláʼdxinu napa ca diidxaʼ ca poder ne zanda iquíʼñenu cani para gudiʼnu stipa tuuxa. ¿Ñee runibiaʼluʼ tuuxa ni caquiiñeʼ gábicabe laa ti diidxaʼ galán o diidxaʼ ni quixhedxí ladxidóʼ la? Pa zacá ni, ¿xiñee qué gúniluʼ xiixa pur laabe yaʼ? Zanda chigánnaluʼ laabe, guiníʼneluʼ laabe pur teléfono o guseendaluʼ ti nota o ti mensaje ra nuube. Cadi caquiiñeʼ peʼ gábiluʼ laabe stale diidxaʼ, sínuque guiree ca diidxaʼ ca de ndaaniʼ ladxidoʼloʼ. Neca chupa chonna si diidxaʼ ni, peru pa gusihuínniluʼ nadxiiluʼ laabe la? zándaca nga nga ni caquiiñebe para cadi guixélebe de Jehová ne chuʼbe gana (Prov. 12:25; Efes. 4:29).

11. ¿Xi runi Jehová né sabiduría stiʼ?

¹¹ Rudii Jehová laanu sabiduría. Sicaríʼ bicaa discípulo Santiago: «Pa cayaadxaʼ sabiduría tuuxa de laatu la? guinabaʼ ni Dios». Ne laaca guniʼbe: «Purtiʼ rudii Dios de guidubi ladxidóʼ ne qué ridxiichiné binni» (Sant. 1:5; nota). Casi ruzeeteʼ versículo riʼ, qué riaanané Jehová sabiduría ca para laa si, sínuque riuulaʼdxiʼ Jehová gudii ni xcaadxi ne laaca «qué ruchá  ni lú binni» o «qué ridxiichiné binni», ni nani nga, qué racalaʼdxiʼ Jehová guni sentirnu mal purtiʼ canábanu gacanebe laanu. Ni racaláʼdxibe nga guinábanu ni laabe (Prov. 2:​1-6).

12. ¿Ximodo zanda chinándanu ejemplu stiʼ Jehová ra gusíʼdinu xcaadxi binni ni nánnanu?

¹² Yanna, ¿laanu yaʼ? ¿Ñee zanda chinándanu ejemplu stiʼ Jehová ra gusíʼdinu xcaadxi binni ni nánnanu la? (Sal. 32:8). ¡Zanda pue! Ndaaniʼ xquidxi Jehová nuu stale modo ra zanda gusíʼdinu ni maʼ nánnanu. Casi rusíʼdinu ca ni nacubi ximodo guni predicarcaʼ. Ne ca ancianu racanecaʼ né stale paciencia ca siervu ministerial ne xcaadxi hermanu ni maʼ guyuunisa para ganda gúnicaʼ dxiiñaʼ ni nápacaʼ ndaaniʼ congregación. Ne stale hermanu ne hermana ni napa experiencia lu construcción ne lu mantenimientu, rusiidicaʼ xcaadxi hermanu para gúnicaʼ dxiiñaʼ riʼ ndaaniʼ ca Yoo stiʼ Reinu ne xcaadxi lugar casi laani.

13. ¿Ximodo zanda chinándanu ejemplu stiʼ Jehová ra gusíʼdinu xcaadxi?

¹³ Caquiiñeʼ chinándanu ejemplu stiʼ Jehová ora guni capacitarnu xcaadxi hermanu. Casi maʼ bidúʼyanu, riuulaʼdxiʼ Jehová gudii laanu sabiduría stiʼ. Laanu laaca riuuláʼdxinu gacanenu ca ni deruʼ caziidiʼ. Qué riaananenu ni nánnanu o ni maʼ bizíʼdinu gúninu purtiʼ si cadxíbinu guiaanané binni ni cayuni capacitarnu ca «dxiiñaʼ ni cayúninu», ne laaca qué riníʼ íquenu: «¡Naa guirutiʼ nusiidiʼ naa!, guiziidibe stúbibe». Laanu ca ni nuunu ndaaniʼ xquidxi Jehová cadi galán diʼ guiníʼ íquenu zacá. Qué ruluísinu ni nánnanu, sínuque rúninu stipa gusíʼdinu xcaadxi hermanu guiráʼ ni nánnanu (1 Tes. 2:8). Zacá, «ora maʼ biziidicaʼ la? maʼ zanda gusiidicaʼ xcaadxi binni» (2 Tim. 2:​1, 2). Gudiiluʼ de ni nápaluʼ ti binni zusiécheni lii ne laaca zusiécheluʼ binni ca, zeeda gácani casi ti cadena, zucaaluʼ laabe gúnibe xiixa pur sti binni, guiéchebe ne gusiéchebe sti binni.

PA RUNI SENTIRNU GUIRUTIʼ RUSISACA NI RÚNINU

14. ¿Xi rizaaca ora rúninu xiixa pur xcaadxi binni?

¹⁴ Stale biaje ora rúninu xiixa pur xcaadxi binni, jmaruʼ si ora rúninu xiixa pur ca hermanu stinu, rusihuínnicaʼ rusisácacaʼ ni bíninu pur laacaʼ ne rudiicaʼ xquixe peʼ laanu. Zándaca rúnicabe ni lu ti mensaje, lu ti nota o de sti modo (Col. 3:15). Ne guizáʼ riéchenu ora rúnicabe ni.

15. ¿Xi cadi naquiiñeʼ guiaandaʼ laanu pa qué gudiicabe xquixe peʼ laanu?

¹⁵ Peru ni dxandíʼ la? cadi guiráʼ diʼ ora zudii binni xquixe peʼ laanu pur xiixa ni bíninu pur laacaʼ. Zándaca gudiʼnu tuuxa tiempu stinu, stipa o ni nápanu para gacanenu laa ne despué guni sentirnu qué nusisácabe ni bíninu pur laabe. Ora guizaaca ndiʼ, ¿xi zanda gacané laanu cadi gunítinu guendanayecheʼ stinu, chuʼnu triste o guidxiichinu yaʼ? Cadi guiaandaʼ laanu ni ná Hechos 20:​35, textu ra biree artículo riʼ. Riuʼnu nayecheʼ purtiʼ rudiʼnu de ni nápanu ne cadi pa rudiicabe xquixe peʼ laanu. Lu nanu nuu cadi gusaana de chuʼnu nayecheʼ neca ruluíʼ cadi cusisácacabe ni rúninu. Guidúʼyanu caadxi cosa ni zanda gacané laanu.

16. ¿Xi naquiiñeʼ guiníʼ íquenu?

¹⁶ Guníʼ ique zinándaluʼ ejemplu stiʼ Jehová nga ora rudiiluʼ de ni nápaluʼ. Rudiibe binni ni galán neca qué gusisácacaʼ ni (Mat. 5:​43-48). Cayuni prometer Jehová ca xpinni, «cadi  cuézatu gudxiguétacabe laatu xiixa», purtiʼ «naroʼbaʼ premiu nuu para laatu» (Luc. 6:35). Nga runi cadi chuʼluʼ triste pa qué gudiicabe xquixe peʼ lii pur ni rúniluʼ. Bietenalaʼdxiʼ zaguixe Jehová lii pur ca cosa galán ni gúniluʼ pur xcaadxi binni ne purtiʼ cudiiluʼ ni «né guendanayecheʼ» (2 Cor. 9:7; Prov. 19:17).

17. ¿Xi zacané laanu guixhe íquenu chinándanu ejemplu stiʼ Jehová? (Lucas 14:​12-14).

¹⁷ Ti cosa ni zacané laanu chinándanu ejemplu stiʼ Jehová nga gúninu ni ná Lucas 14:​12-14 (biindaʼ ni). Dxandíʼ, gastiʼ naca guidxaagalunu o gudiʼnu de ni nápanu ca ni zanda guni xiixa pur laanu. Peru ¿xi naquiiñeʼ gúninu pa gudiʼnu cuenta cudiʼnu purtiʼ si cabézanu gudiicabe laanu xiixa yaʼ? Galán chinándanu ejemplu stiʼ Jesús: gudiʼnu de ni nápanu tuuxa ni qué zanda quixe ni laanu. Pa gúninu ni, ziuʼnu nayecheʼ purtiʼ zinándanu ejemplu stiʼ Jehová. Ne pa cadi cuézanu gudiicabe laanu xiixa la? qué zusaana de gudiʼnu né guendanayecheʼ neca qué gudiicabe xquixe peʼ laanu.

18. ¿Xi zacané laanu cadi guiníʼ íquenu mal de xcaadxi binni?

¹⁸ Cadi guiníʼ íqueluʼ mal de xcaadxi binni (1 Cor. 13:7). Pa gúninu xiixa pur sti binni ne qué gudiibe xquixe peʼ laanu la? zándaca guiníʼ íquenu ndiʼ: «¿Ñee qué nusisácabe ni bineʼ pur laabe la? o biaandaʼ nudiibe xquixe peʼ naa?». Zándaca nuuruʼ xi bicaa laabe para cadi gudii xquixe peʼ laanu. Zándaca nuube nayecheʼ peru raca nagana para laabe guiniʼbe ni runi sentirbe. O zándaca rituílube gacanécabe laabe, jmaruʼ si pa dxiqué gucanebe xcaadxi binni ne yanna maʼ qué randa rúnibe ni. Pa dxandíʼ nadxiinu ca hermanu stinu la? qué zaníʼ íquenu mal de laacaʼ ne qué zusaana de gudiʼnu né guendanayecheʼ (Efes. 4:2).

19, 20. ¿Xiñee galán gápanu paciencia? (Biiyaʼ ca imagen ca).

¹⁹ Gupa paciencia. Sicaríʼ bizeeteʼ rey  Salomón de ora rudii binni de ni napa de guidubi ladxidóʼ, laa bicaa: «Bilaa pan stiluʼ lu nisa, tidiʼ si stale dxi zadxeʼluʼ ni sti biaje» (Ecl. 11:1). Rusiidiʼ ca diidxaʼ riʼ laanu zándaca ziuu binni zudii xquixe peʼ laanu «tidiʼ si stale dxi». Guidúʼyanu ti ejemplu ni rusihuinni zacá ni.

²⁰ Maʼ xadxí, bicaa xheelaʼ ti superintendente de circuito caadxi diidxaʼ ra nuu ti hermana ni deruʼ guyuunisa, guluube ganna laa cadi guixeleʼ de Jehová. Gudiʼdiʼ si xhono iza bicaa hermana que ti carta ra nuu xheelaʼ circuito que, sicaríʼ nani: «Cucaaʼ ra nuuluʼ purtiʼ naquiiñeʼ gánnaluʼ pabiáʼ huayacaneluʼ naa neca nuuluʼ zitu». Ne laaca bicaabe: «Ca diidxaʼ ni gúdxiluʼ naa que nannaʼ né stale cariñu bicaaluʼ cani, peru ni jma yendá ndaaniʼ ladxiduáʼ nga textu ni bicaaluʼ que ne qué huayuu dxi gusiaandaʼ ni». a Despué de gúdxibe xheelaʼ circuito que ca guendanagana bidxaagalube lu ca últimu iza que, bicaabe: «Nuu biaje guizáʼ maʼ bidxagaʼ ne riníʼ iqueʼ: gusaanaʼ de gacaʼ testigu ne ca responsabilidad stinneʼ. Peru textu ni bicaaluʼ que ridíʼdini ndaaniʼ iqueʼ ne racaneni naa cadi guireeʼ gana. Lu xhono iza ni huadiʼdiʼ ca laani nga ti cosa ni jma huayacané naa». ¡Nanna pabiáʼ biecheʼ xheelaʼ circuito que ora gucuaa carta riʼ yaʼ! Pa gúninu xiixa pur tuuxa la? zándaca zudiibe xquixe peʼ laanu «tidiʼ si stale dxi».

21. ¿Xiñee maʼ gudixhe íqueluʼ chinándaluʼ ejemplu stiʼ Jehová?

²¹ Casi maʼ bidúʼyanu, guizáʼ galán modo bizáʼ Jehová laanu: jma nayecheʼ riuʼnu ora rudiʼnu que ora ricaanu. Runi sentirnu galán ora racanenu ca hermanu stinu ne riuuláʼdxinu ora gudiicabe xquixe peʼ laanu. Nuu biaje qué zudiicabe xquixe peʼ laanu, peru riéchenu purtiʼ bíninu ni jneza. Biaʼ tiica si gudiʼnu cadi guiaandaʼ laanu ni ná 2 Crónicas 25:9: «zudii Jehová lii jma que biaʼcá» o jma que biaʼ bidiiluʼ. ¡Guirutiʼ zanda gudii biaʼ rudii Jehová! Nga runi galán chinándanu ejemplu stiʼ Jehová bixhózenu ni nuu guibáʼ, laa riuulaʼdxiʼ gudii de guidubi ladxidóʼ.