Cumu qué ñuu ca 70 discípulo que ra nuu Jesús dxi gudixhestí Guendaroxhí stiʼ Señor la? cadi guiníʼ íquenu bisaanacaʼ laabe o qué ñuulaʼdxiʼ Jesús xhiiñacabe. Ni racalaʼdxiʼ Jesús nga chuʼ laasi né ca apóstol stiʼ ocasión que.

Riuulaʼdxiʼ Jesús dxiiñaʼ stiʼ ca 12 ne zaqueca ca 70 discípulo que. Primé gulibe 12 hombre lade guiráʼ ca discípulo stibe ne gulee laabe laacaʼ apóstol (Luc. 6:​12-16). «Biseendacaa Jesús ca Doce» dxi nuu ndaaniʼ guidxi Galilea ne «biseendabe laacaʼ para chiguni predicarcaʼ Reinu stiʼ Dios ne para gusiándacaʼ binni» (Luc. 9:​1-6). Despué, maʼ ndaaniʼ guidxi Judea gulibe «sti 70 ne biseendabe laacaʼ delante de laabe de chupa chupa» (Luc. 9:51; 10:1). Ngue runi ra tiica guca predicar mensaje stiʼ Reinu guyuu discípulo.

Guiráʼ iza rúniruʼ ca judíu ni beeda gaca xpinni Cristu Pascua zándaca né familia sticaʼ (Éx. 12:​6-11, 17-20). Ante gati Jesús guyé Jerusalén né ca apóstol stiʼ. Peru qué ninabaʼ diʼ Jesús ca discípulo stiʼ ni nuu ndaaniʼ guidxi Judea, Galilea ne Perea ñuni celebrarnecaʼ laabe Pascua que. Ruluíʼ né ca apóstol si stibe nga racaláʼdxibe chuʼbe ocasión que. Ngue runi gúdxibe laacaʼ: «Qué gánnatu pabiáʼ napaʼ gana gahuaniaʼ laatu Pascua riʼ ante guzulú guneʼ sufrir» (Luc. 22:15).

¿Xiñee racaláʼdxibe chuʼbe stúbibe né ca apóstol que yaʼ? Nuu ti razón nabé risaca, ¿xii ni yaʼ? Maʼ cadi candaa zátibe casi «Dendxuhuiiniʼ stiʼ Dios ni ribee pecadu ndaaniʼ guidxilayú» (Juan 1:29). Zátibe ndaaniʼ guidxi Jerusalén, lugar ra maʼ xadxí rudiicabe sacrificiu Dios. Dendxuʼ stiʼ Pascua que rusietenalaʼdxiʼ ni ca israelita gulee Jehová laacaʼ de ndaaniʼ guidxi Egipto peru guendaguti stiʼ Jesús zeeda gácani sacrificiu ni jma risaca purtiʼ zulani binni guidxilayú de lu ná pecadu ne guendaguti (1 Cor. 5:​7, 8). Pur sacrificiu riʼ zeeda gaca ca 12 apóstol que parte de base stiʼ congregación (Efes. 2:​20-22). Zuba xquidxi Dios, Jerusalén «lu 12 guié», ne «cá 12 nombre stiʼ 12 apóstol stiʼ Dendxuhuiiniʼ que lu ca guié que» (Apoc. 21:​10-14). Rihuinni dxíchica zapa ca apóstol ni qué guixeleʼ de Jehová ti dxiiñaʼ nabé risaca para gaca cumplir propósitu stiʼ. Nga runi zanda guininu, racalaʼdxiʼ Jesús guniné ca apóstol si stiʼ últimu Pascua que ne despué de laani, gudixhestibe Guendaroxhí stiʼ Señor.

Qué ñuu diʼ ca 70 ne xcaadxi discípulo que né Jesús lu ocasión que. Neca zaqué guiráʼ ca discípulo ni gusihuinni qué zaxeleʼ de Dios zacaacaʼ ndaayaʼ pur Guendaroxhí stiʼ Señor. ¿Xiñee yaʼ? Purtiʼ zuninebe guiráʼ ca xpinni Cristu ni bibí ti pactu para ti reinu, pactu ni bíʼnibe gueelaʼ nuunebe ca apóstol que (Luc. 22:​29, 30).