1. ¿Xiñee nabé risaca nga chúʼnisa tuuxa? (Biiyaʼ foto ni zeeda ra ruzulú tema riʼ).

GUIRÁʼ iza, riuunisa mil binni runi estudiar Biblia. Stale de laacaʼ nácacaʼ joven o dede né xcuidi. Zándaca biniisicabe ti lugar ra guiráʼ familia stícabe naca xpinni Cristu. Lii yaʼ, ¿ñee maʼ guyuunísaluʼ la? Pa maʼ la? runi felicitardu lii. Laani nga tobi de ca cosa ni naquiiñeʼ guni guiráʼ xpinni Cristu para guilá (Mat. 28:19, 20; 1 Ped. 3:21).

2. ¿Xiñee cadi naquiiñeʼ guidxíbinu gudiʼnu laanu Jiobá?

² Neca ora riuunisa binni racané ni para guicaa stale ndaayaʼ, laaca cadi naquiiñeʼ guidúʼyanu ni casi guendariguite. ¿Xiñee yaʼ? Purtiʼ dxi guyuunísaluʼ, guniʼluʼ «maʼ» ora gunabadiidxacabe: «Pur fe ni nápaluʼ lu sacrificiu stiʼ Jesús, ¿maʼ guca arrepentirluʼ de ca pecadu stiluʼ ne maʼ bidiiluʼ lii Jiobá para guʼnuʼ ni ná la?». Ora guyuunísaluʼ bisihuínniluʼ maʼ bidiiluʼ lii Dios, laani nga promesa ni bíʼniluʼ Jiobá de gannaxhiiluʼ laa ne guʼnuʼ ni ná primeru lu xquendanabániluʼ. ¿Ñee naquiiñeʼ gaca  arrepentirluʼ de compromisu nabé risaca riʼ la? Coʼ. Qué ziuu dxi gaca arrepentirluʼ pa gudiiluʼ lugar guluíʼ Jiobá lii ximodo guibániluʼ. Purtiʼ, ¿xiruʼ ndiʼ zanda guʼnuʼ yaʼ? Pa qué gúniluʼ ni ná Jiobá la? ziuuluʼ lu náʼ Binidxabaʼ. Ne laa qué lica rizaalaʼdxiʼ guilaluʼ. Ni racaláʼdxibe nga, pa ñanda si nunítiluʼ esperanza de guibániluʼ sin gátiluʼ ra guyubuʼ ladu stibe ne gucaanaluʼ gobiernu stiʼ Jiobá.

3. ¿Xi guiráʼ ndaayaʼ maʼ gucuaaluʼ pur bidiiluʼ xquendanabániluʼ Jiobá?

³ Guníʼ ique ca ndaayaʼ ni maʼ gucuaaluʼ pur maʼ bidiiluʼ lii Dios ne maʼ guyuunísaluʼ. Yanna ra maʼ bidiiluʼ xquendanabániluʼ Jiobá, jmaruʼ si né stale confianza zanda guiniʼluʼ: «Jiobá nuuné naa; qué zadxibediáʼ. ¿Xi zanda guni binni naa yaʼ?» (Sal. 118:6). Gástiruʼ sti cosa jma risaca que chuʼnu ladu stiʼ Dios ne gánnanu riuuláʼdxibe ni cayúninu.

4, 5. a) ¿Xiñee zanda guininu lu náʼ cada tobi nga nuu gudii xquendanabani Dios? b) ¿Xi ridxaagalú guiráʼ ca xpinni Cristu biaʼ tiica iza nápacaʼ?

⁴ Pa maʼ guyuunísaluʼ, cadi naquiiñeʼ gúʼyaluʼ amistad ni napaneluʼ Jiobá casi ora ñápaluʼ ti teléfono ne maʼ bixhoʼzoʼ ne jñoouʼ niguixe saca ni. Dede pa nabézarouʼ ra lidxi bixhózeluʼ ne jñaaluʼ, lu naluʼ nga nuu pa racaláʼdxiluʼ guilaluʼ, cadi lu nácabe. ¿Xiñee nabé risaca guietenaláʼdxiluʼ nga yaʼ? Purtiʼ qué gánnaluʼ xi guendanagana zadxaagaluluʼ despué. Zándaca guyuunísaluʼ de dxi nahuiiniluʼ. Peru yanna maʼ jovenhuiiniʼ lii, zándaca maʼ gadxé ni runi sentirluʼ ne maʼ gadxé guendanagana ridxaagaluluʼ. Sicaríʼ cusiene ti baʼdudxaapaʼ ni: «Ora nahuiiniluʼ, qué zadxiichiluʼ qué goloʼ pastel stiʼ tuuxa ni cusaa iza ra scuela, purtiʼ testigu stiʼ Jiobá lii. Peru ra tiidiʼ iza ne deseu de gapa tobi relación sexual ca gácani jma nadipaʼ la? naquiiñeʼ chuʼluʼ seguru ni jma galán nga gúniluʼ ni ná ca ley stiʼ Dios guiráʼ ora».

⁵ Dxandíʼ, cadi ca joven si nga ridxaagalú guendanagana lu xquendanabani. Cani riuunisa maʼ huaniisi laaca ridíʼdicaʼ lu guendanagana ni cadi cabézacaʼ ra rihuinni pa naguidxi nuu fe sticaʼ. Zanda gueeda cani lu guendaxheelaʼ stícabe, guendahuará o pur dxiiñaʼ. Dxandipeʼ la? biaʼ tiica iza nápanu, guiranu ridxaagalunu guendanagana ra rihuinni pa zuzúʼbanu stiidxaʼ Jiobá (Sant. 1:12-14).

6. a) ¿Ximodo nga rúninu guiráʼ ni bidii stiidxanu Jiobá dxi bidiʼnu xquendanabáninu laa? b) ¿Xi rusiidiʼ Filipenses 4:11-13 lii?

⁶ Ti cosa ni zacané lii guzuubaluʼ stiidxaʼ Jiobá guiráʼ ora nga guietenaláʼdxiluʼ gúdxiluʼ Jiobá zúniluʼ guiráʼ ni ná dxi bidiiluʼ xquendanabániluʼ laa. Ndiʼ riníʼ maʼ bidii stiidxaluʼ Rey stiʼ universu ca qué zusaanaluʼ de gúniluʼ ni ná intiica si gaca, neca bixhózeluʼ ne jñaaluʼ o ca xhamíguluʼ gusaanacaʼ de gúnicaʼ ni (Sal. 27:10). Intiica si guizaaca, zanda guinábaluʼ Jiobá gacané lii gápaluʼ stipa guni huantarluʼ ne guni cumplirluʼ ni maʼ bidii stiidxaluʼ Dios (biindaʼ Filipenses 4:11-13).

7. ¿Xi rusihuinni ca diidxaʼ gácanu nadóʼ ne guidxíbinu ra cadi gusaana de gúninu ni jneza dede dxi guilanu?

⁷ Racalaʼdxiʼ Jiobá gaca xhamíguluʼ laa. Peru naquiiñeʼ gúniluʼ stipa para cadi guirá amistad ca ne gúniluʼ dxiiñaʼ para ugaandaluʼ guilaluʼ. Filipenses 2:12 ná: «Laucaalaʼdxi guni tu ni jneza, dede dxi ilá chaahui tu. Lagaca nadóʼ ne laidxibi». Ca diidxaʼ riʼ rusihuinni cani naquiiñeʼ guiníʼ ique chaahuiluʼ xi gúniluʼ para gápaluʼ amistad ni nápaluʼ né Jiobá ne cadi gusaana de guzuubaluʼ stiidxabe neca guidxaagaluluʼ guendanagana. Ne cadi gápaluʼ  confianza laca lii. Cadi guiaandaʼ lii nuu binni ni biʼniʼ ni ná Dios stale iza laaca bicheenecaʼ laabe. Yanna, ¿xi zacané lii cadi gusaana de guʼnuʼ ni jneza para ganda guilaluʼ yaʼ?

8. a) ¿Ximodo nga naquiiñeʼ gúniluʼ estudiu personal? b) ¿Xiñee nabé risaca gapa tobi estudiu personal?

⁸ Para gaca xhamígunu Jiobá la? naquiiñeʼ gucaʼdiáganu laabe ne guinínenu laabe. Modo jma risaca para gucaʼdiáganu ni gábibe laanu nga ra gápanu ti estudiu personal de lu Biblia. Nga riníʼ naquiiñeʼ guidúʼndanu Stiidxaʼ Dios ne ca publicación ni zeeda de laani, ne guiníʼ íquenu ni guidúʼndanu. Ora gúniluʼ ni, cadi guiaandaʼ lii cadi para si gucaaluʼ xquendabiaaniluʼ guni dxiiñaʼ nga ora guni estudiarluʼ Biblia, casi ñaca cayaananeluʼ información para gúniluʼ ti examen ra scuela. Laani naca ni casi ora nizaluʼ paxaraa ra zanda guyúbiluʼ ne guidxélaluʼ xcaadxi cosa de modo naca Jiobá. Ra gúniluʼ ndiʼ, zacané ni lii guidxíñaluʼ gaxha de laabe, ne laabe zadxíñabe gaxha de lii (Sant. 4:8).

9. ¿Xi herramienta ni maʼ bidii organización stiʼ Dios huayacané lii lu estudiu personal stiluʼ?

⁹ Maʼ bidii organización stiʼ Jiobá lii stale herramienta para gacané lii gapuʼ ti programa de ximodo guni estudiarluʼ. Guidúʼyanu chupa ejemplu de ni zanda guidxélaluʼ lu sitiu jw.org. Lu sección ni láʼ «Jovenes» zadxélaluʼ ra ná «Actividades para estudiar la Biblia», ni zacané lii gúʼyaluʼ xi zanda guiziidiluʼ de caadxi relatu zeeda lu Biblia. Laaca lu sección ca, zadxélaluʼ ca guía de estudiu ni láʼ «¿Qué enseña realmente la Biblia?», ni zacané lii gaca fe stiluʼ jma naguidxi ne ganda gusiéneluʼ cani runi creluʼ. Ne lu revista ¡Despertad! ni biree lu beeu abril 2009, zadxeʼluʼ xcaadxi modo para guni estudiarluʼ lu tema ni láʼ «Los jóvenes preguntan. ¿Cómo disfrutar la lectura de la Biblia?». Nabé risaca nga guni estudiarluʼ ne guiníʼ íqueluʼ ni gúʼndaluʼ para cadi gusaana de gúniluʼ ni jneza para guilaluʼ (biindaʼ Salmo 119:105).

10. ¿Xiñee nabé risaca oración para ca xpinni Cristu ni maʼ guyuunisa?

¹⁰ Maʼ bidúʼyanu ora runi estudiarnu Biblia nga rusihuínninu rucaʼdiáganu Jiobá.  Peru, pa racaláʼdxinu guinínenu laabe la? naquiiñeʼ guni orarnu laabe. Laanu, ca xpinni Cristu, cadi naquiiñeʼ diʼ guidúʼyanu oración ca casi xiixa ni maʼ biaʼnu gúninu o casi xiixa ni gacané laanu para si guiree ca cosa ca laanu jneza. Oración ca nga xiixa ni dxandíʼ racané laanu guinínenu ni bizáʼ guiráʼ ni nuu. Ne Jiobá racalaʼdxiʼ gucaadiaga lii (biindaʼ Filipenses 4:6). Ora maʼ nuuluʼ xizaa pur xiixa, bietenalaʼdxiʼ rudii Biblia conseju riʼ lii: «Bilaa ni nualuʼ luguiáʼ Jiobá» (Sal. 55:22). ¿Ñee dxandíʼ raʼbuʼ zanda gacané ndiʼ lii la? Millón hermanu zanda gabi lii huayacané ni laacaʼ. Ne laaca zanda gacané ni lii.

11. ¿Xiñee naquiiñeʼ gudiiluʼ xquíxepeʼ Jiobá guiráʼ ora?

¹¹ Naquiiñeʼ guni orarnu Jiobá guiráʼ ora, cadi ora si racaláʼdxinu gacanebe laanu. Biblia ná gudiʼnu xquíxepeʼ laabe (Col. 3:15). Zándaca nuu biaje jma chuʼnu xizaa de ca guendanagana stinu dede gusiáʼndanu guiráʼ ndaayaʼ ni ricaanu. ¿Xiñee qué quíxheluʼ meta guiníʼ íqueluʼ neca chonna razón para gudiiluʼ xquíxepeʼ Jiobá cada dxi yaʼ? Ti dxaapahuiiniʼ láʼ Abigail, ni guyuunisa dxi napa 12 iza, ná: «Riníʼ iqueʼ guirútiruʼ runi merecer gudiʼnu xquíxepeʼ lu guidubi universu pa cadi Jiobá si. Nápanu xidé gudiʼnu xquíxepeʼ laabe guiráʼ ora pur guiráʼ ni maʼ bisigáʼdebe laanu. Nabé rietenalaʼdxeʼ ti cosa ni binadiagaʼ ti biaje: “Guxuíʼlunu bibáninu ti siadóʼ ne ni nápasinu nga ca cosa ni bidiʼnu xquíxepeʼ Jiobá pur laacaʼ ti dxi ante. ¿Panda cosa ñápanu yaʼ?”». *

12, 13. ¿Xiñee nabé risaca guiníʼ íqueluʼ ximodo huayuuyaluʼ lii piouʼ pabiáʼ nachaʼhuiʼ Jiobá?

¹² Gucané Jiobá rey David gudxiilú stale guendanagana naroʼbaʼ. Ngue runi nanna David xii ngue caníʼ ora bizeeteʼ ca diidxaʼ riʼ: «Lagudii cuenta ne laguuyaʼ pabiáʼ nachaʼhuiʼ Jiobá; nayecheʼ nga riuu hombre ni guyubi laabe para guilá» (Sal. 34:8). Versículo riʼ rusihuinni pabiáʼ risaca nga gúʼyaluʼ lii piouʼ pabiáʼ nachaʼhuiʼ Jiobá. Ora gúʼndaluʼ Biblia ne ca publicación stinu, ne ora cheluʼ reunión, riziidiluʼ historia stiʼ binni ni huayacané Dios para cadi gusaanacaʼ de guzuubacaʼ diidxaʼ. Peru, ra maʼ ziniisiluʼ casi ti xpinni Cristu, naquiiñeʼ gúʼyaluʼ lii piouʼ ximodo racané Jiobá lii lu xquendanabániluʼ. ¿Ximodo huayuuyaluʼ lii piouʼ pabiáʼ nachaʼhuiʼ Jiobá yaʼ?

¹³ Nuu ti modo ra guiráʼ xpinni Cristu huadúʼyanu pabiáʼ nachaʼhuiʼ Jiobá. Maʼ biʼniʼ invitarbe laanu guidxíñanu laabe ne Xiiñibe. Jesús guníʼ: «Biseenda Bixhoze naa, ne iruti zanda gueeda ra nuaaʼ, pa qué cuidxi be laa» (Juan 6:44). ¿Ñee raʼbuʼ maʼ gulidxi Jiobá lii la? Zándaca guiníʼ ique ti joven: «Gulidxi Jiobá bixhozeʼ ne jñaaʼ ne naa zinanda siáʼ laacabe». Peru, ra bidiiluʼ xquendanabániluʼ Dios ne guyuunísaluʼ, bisihuínniluʼ nápaluʼ ti amistad nabé risaca né Jiobá. Yanna, laabe maʼ runibiaʼbe lii. Biblia rabi laanu: «Ni nadxii Dios la? runibiáʼ Dios laa» (1 Cor. 8:3). Cadi gusaanaluʼ de gusisácaluʼ lugar ni nápaluʼ ndaaniʼ organización stiʼ Jiobá.

14, 15. ¿Xiñee jma zaguidxi fe stiluʼ ora guni predicarluʼ?

¹⁴ Zándaca ruuyaluʼ pabiáʼ nachaʼhuiʼ Jiobá ora ruuyaluʼ modo racanebe lii guiniʼluʼ de fe stiluʼ lu predicación ne ra scuela. Nuu tu laa raca nagana para laa guni predicar ca compañeru stiʼ ra scuela purtiʼ qué ganna ximodo gúʼyacabe ni. Zándaca huazaacaluʼ zacá. Ne jmaruʼ si raca ni nagana ora chiguiniʼluʼ nezalú ti grupu naroʼbaʼ. ¿Xi zanda gacané lii yaʼ?

 ¹⁵ Primé, guníʼ ique xiñee nuuluʼ seguru de cani runi creluʼ. Lu sitiu jw.org, nuu caadxi guía de estudiu lu stale idioma ne guyáʼ cani para gacané cani lii guiníʼ íqueluʼ xi runi creluʼ, xiñee runi creluʼ ni ne ximodo zanda gusiéneluʼ ni. ¿Xiñee qué cueeluʼ tiempu para guyubuʼ cani yaʼ? Pa dxandipeʼ nuuluʼ seguru de cani runi creluʼ ne gaca preparar chaahuiluʼ, jma zacaláʼdxiluʼ guiniʼluʼ de lá Jiobá (Jer. 20:8, 9).

16. ¿Xi zanda gacané lii para cadi guidxíbiluʼ guiniʼluʼ de cani runi creluʼ?

¹⁶ Peru, zándaca guni sentirluʼ nervioso cada biaje guiniʼluʼ de cani runi creluʼ neca gaca preparar chaahuiluʼ. Ti dxaapahuiiniʼ de 18 iza ni guyuunisa dxi napa 13 iza ná: «Nannaʼ xi runeʼ cré, peru nuu biaje raca nagana para naa guiniéʼ ni». ¿Xi rúnibe yaʼ? Nabe rúnibe stipa pur guiniʼbe cani dxandíʼ ca casi ora maʼ cayuiʼbe diidxaʼ. Laabe bisiénebe: «Ca compañeru stinneʼ de ra scuela riniʼcaʼ de ca cosa sticaʼ sin gucacaʼ. ¿Xiñee qué guneʼ zacaca yaʼ? Nga runi, ora maʼ cayabeʼ laacabe xiixa, ruzeeteʼ: “Nase cusiideʼ ti binni de lu Biblia ne...”. De raqué rabeʼ laacabe ni canidu que. Neca qué lica riete de Biblia lu cani canidu que, nuu de laacabe riuulaʼdxiʼ ganna jma de ni bizeeteʼ que ne nuu tiru rinabadiidxacaʼ ximodo nga rusiideʼ de lu Biblia. Ra jma iquiiñeʼ modo riʼ, jma fácil raca para naa güeʼ diidxaʼ. Ne runeʼ sentir galán cada biaje guiniéʼ de cani dxandíʼ».

17. ¿Xiñee naquiiñeʼ chuʼnu seguru ora maʼ cayuinu de cani runi crenu?

¹⁷ Pa gápaluʼ respetu xcaadxi binni ne guizaaláʼdxiluʼ laacaʼ, zándaca zacaca guni tratárcabe lii. Sicaríʼ guníʼ ique Olivia, ti dxaapahuiiniʼ de 17 iza ni guyuunisa dxi jma nahuiiniʼ: «Ora maʼ cayuéʼ diidxaʼ, qué rinaʼyaʼ guzeeteʼ xiixa de lu Biblia purtiʼ bidxibeʼ ñuuyaʼ binni naa casi tuuxa ni puru si de religión maʼ caníʼ». Peru despué biiyabe ca cosa que gadxé modo. Lugar de niníʼ íquebe cani ruchibi si laabe, sicaríʼ guníʼ íquebe: «Stale joven qué ganna gastiʼ de ca testigu stiʼ Jiobá, ne laasidu nga ca Testigu ni runibiáʼcabe. Ngue runi ni gúnidu zanda gacané ni laacabe. Pa huaxiéʼ rinínenu laacabe de cani runi crenu purtiʼ nabé natuinu o ridxíbinu ora maʼ caninu de laacani la? zándaca guiníʼ íquecabe qué riuuláʼdxinu gácanu ti Testigu. Dede zándaca guidxiichicabe purtiʼ qué gápanu confianza cani runi crenu. Peru, pa gusihuínninu nuunu seguru de cani runi crenu ne rininu de laacani casi ora maʼ cayuinu diidxaʼ la? jma nagueenda zápacabe respetu laanu».

18. ¿Xi naquiiñeʼ gúniluʼ para cadi gusaana de gúniluʼ ni jneza para guilaluʼ yaʼ?

¹⁸ Maʼ bidúʼyanu lu nanu nga nuu gúninu ni jneza para guilanu, ne cadi guendariguite ni. Para gúniluʼ ni la? naquiiñeʼ gúʼndaluʼ Biblia ne guiníʼ íqueluʼ ni gúʼndaluʼ, guni orarluʼ Dios ne guiníʼ íqueluʼ ca ndaayaʼ ni maʼ bidiibe lii. Zacané ca cosa riʼ lii chuʼluʼ jma seguru xhamíguluʼ Jiobá. Ne nga zucaa lii guiniʼluʼ de cani runi creluʼ (biindaʼ Salmo 73:28).

19. ¿Xiñee risaca gúninu stipa pur ganda guilanu?

¹⁹ Jesús guníʼ: «Tu gacalaʼdxi gaca xpinne la? gusiaanda laca laa, cadi lica guiá xpida, ne sa nanda naa» (Mat. 16:24). Rihuinni dxíchica, sananda tobi Jesús riníʼ ni gudiʼnu xquendanabáninu Jiobá ne chuʼnísanu. Ndiʼ racané laanu guicaanu stale ndaayaʼ yanna ne ti guendanabani ni qué zaluxe lu guidxilayú cubi ni cudii stiidxaʼ Dios gudii laanu. Nga runi nápanu stale razón para cadi gusaana de gúninu ni jneza para guilanu.