«Nanna zabani be»
«Nisiaasi Lázaro xhamigu nu peru ma chaaʼ, chi ucuaane Iaa» (JUAN 11:11).
DIIDXAʼ RIUUNDAʼ: 54 NE 51
1. ¿Xi gunna dxichi Marta? (Biiyaʼ dibuju ni zeeda ra ruzulú tema riʼ).
GUIZÁʼ guca xhamiga Marta Jesús ne gúcabe tobi de ca discípulo stiʼ. Nabé cayuubaʼ ladxidoʼbe purtiʼ guti Lázaro, bizáʼnabe. ¿Xi zanda gacané laabe para tiidiʼ yuubaʼ stibe yaʼ? Jesús gudxi laabe: «Zabani bizaʼna luʼ». Neca qué nidiʼdiʼ yuubaʼ que ora binadiágabe ca diidxaʼ riʼ, nanna Marta dxandíʼ ngue ni ná Jesús que. Marta guníʼ: «Nanna zabani be dxi iluxe guidxilayú, ra ibani irá binni» (Juan 11:20-24). Nanna dxíchibe ziasa Lázaro lu ca dxi ni zeeda ca. Peru, dxi queca bisibani Jesús laa.
2. ¿Xiñee racaláʼdxinu chuʼnu seguru cásica guyuu Marta?
2 Zándaca maʼ guti xheelanu, bixhózenu, jñaanu, tobi de ca bixhozebiidanu o ti xiiñinu ne pur nga gucananu. Racaláʼdxinu quiidxinu, binni ni nadxiinu ca sti biaje, guinínenu laa ne guxidxinenu laa. Dxandíʼ, gastiʼ nin ti razón para guni crenu zandisaʼ Jesús o Bixhoze laabe de lade gueʼtuʼ yanna riʼ. Peru, cásica Marta, ¿ñee dxandíʼ nuunu seguru zabiguetaʼ guibánibe sti biaje lu ca dxi ni zeeda ca la? Nápanu stale razón para guininu né guendanayecheʼ cásica guniʼbe: «Nanna zabani be [...], ra ibani irá binni». Neca zacá, galán guiníʼ íquenu xiñee nuunu seguru zaca ni.
3, 4. ¿Ximodo zándaca gucané ejemplu stiʼ ca binni ni bisibani Jesús que Marta?
3 Guleza Marta gaxha de Jerusalén. Ngue runi zándaca qué guínnibe ora bisibani Jesús xiiñiʼ ti viuda gaxha de guidxi Naín, ni nuu Galilea, peru zándaca binadiágabe de milagru ni guca que. Zacagá ni bizaaca dxi bisibani Jesús dxaapahuiiniʼ xiiñiʼ Jairo, zándaca ndaaniʼ guidxi Capernaum. Ca binni nuu raqué «nanna dxichi caʼ ma guti baʼdu que». Peru gunaazeʼ Jesús nabe ne ná rabi laabe: «Biasa xiiñeʼ». Oraqueca biásabe (Luc. 7:11-17; 8:41, 42, 49-55). Cásica Marta ne benda, María, nánnacaʼ zanda gusianda Jesús cani huará. Ngue runi guyuucabe seguru pa nindá Jesús ante la? qué ñati Lázaro. Peru ¿xi guizaaca yanna pa maʼ guti xhamigu Jesús ni nadxii riʼ yaʼ? Guníʼ Marta zabani Lázaro lu ca dxi ni zeeda ca, «dxi iluxe guidxilayú». ¿Xiñee nanna dxíchibe ziasa Lázaro yaʼ? Ne ¿xiñee zanda chuʼnu seguru zabani gueʼtuʼ lu ca dxi ni zeeda ca ne zanda guibani ca binni ni nadxiinu sti biaje yaʼ?
4 Nuu caadxi razón risaca ni zacané laanu gápanu fe ziasa gueʼtuʼ. Chiguidúʼyanu caadxi de laacani. Ra guidúʼndanu cani zeeda lu Biblia riʼ, zándaca guizíʼdinu caadxi cosa ni huaxiéʼ riníʼ íquenu de dxi guiasa ca gueʼtuʼ ca. Zacané cani laanu para gápanu jma fe zadúʼyanu ca binni ni nadxiinu sti biaje.
CAADXI RELATU NI RUDII ESPERANZA
5. ¿Xiñee biʼniʼ cré Marta zabani Lázaro sti biaje?
5 Ridúʼyanu cadi guníʼ diʼ Marta cabeza guiasa bizaʼnaʼ, sínuque nánnabe ziasa. ¿Xiñee dxandíʼ biʼniʼ crebe ni yaʼ? Purtiʼ dxi nahuiinibe, ante guzulú Jesús guni predicar, zándaca maca binadiágabe riníʼcabe ra lídxibe ne ndaaniʼ sinagoga maʼ guca clase milagru ca. Zándaca guietenaláʼdxinu chonna relatu ni zeeda lu Stiidxaʼ Dios.
6. ¿Xi milagru rihuinni dxíchica maca nanna Marta?
6 Profeta Elías nga gundisaʼ primé gueʼtuʼ ni ruzeeteʼ Biblia. Guca ni tiempu bidii Jiobá poder laabe para gúnibe milagru. Ndaaniʼ ti guidxi stiʼ Fenicia láʼ Sarepta ni riaana gaxha de nisadóʼ, guleza ti viuda pobre ni guca hospitalaria né profeta riʼ. Ngue runi, biiyaʼ Dios cadi guirá aceite ne harina stiʼ, ne pur laani gunda bilá viuda riʼ né xiiñiʼ (1 Rey. 17:8-16). Gudiʼdiʼ si tiempu, guca huará hombrehuiiniʼ que ne guti. Peru gudaʼnaʼ Elías gueʼtuʼ que ne guníʼ: «Dios stinneʼ, canabaʼ lii gudxiguétaluʼ xquendanabani hombrehuiiniʼ riʼ». Bicaadiaga Jiobá oración stiʼ Elías ne bidxiguetaʼ xquendanabani hombrehuiiniʼ que (biindaʼ 1 Reyes 17:17-24). Rihuinni dxíchica maca nanna Marta de milagru naroʼbaʼ ni guca riʼ.
7, 8. a) ¿Xi biʼniʼ Eliseo pur ti gunaa ni nabé nuu triste? b) ¿Xi bisihuinni milagru ni biʼniʼ Eliseo que de Jiobá?
7 Eliseo, ni guca profeta despué de Elías, laa nga biʼniʼ guiropa milagru ni ruzeeteʼ Biblia ra bibani gueʼtuʼ. Ndaaniʼ guidxi Sunem, guleza ti gunaa israelita ni risaca, qué gapa xiiñiʼ ne maʼ huaniisi xheelaʼ. Cumu gúcabe hospitalaria né Eliseo la? guluu Dios ndaayaʼ laabe ra bidii laabe ti xiiñibe. Caadxi iza despué guti hombrehuiiniʼ que. Nanna dxíchinu guizáʼ guyuube triste. Né stiidxaʼ xheelabe, guyebe dede lu dani Carmelo, ni riaana biaʼ 30 kilómetru de raqué, yeguuyabe profeta que. Biseendaʼ Eliseo Guehazí, hombre ni racané laa gaca dxiiñaʼ stiʼ, cheʼ guidxi Sunem. Peru qué ñanda nusibani laabe. Óraque bedandá jñaa hombrehuiiniʼ que ne Eliseo (2 Rey. 4:8-31).
8 Guyuu profeta que ndaaniʼ yoo que ne biʼniʼ orar gaxha de ra nexheʼ cuerpu stiʼ hombrehuiiniʼ que. Óraque bidxiguetaʼ Jiobá xquendanabánibe. Guizáʼ biecheʼ jñaabe ora biʼyaʼ laabe (biindaʼ 2 Reyes 4:32-37). Ne zándaca bietenaláʼdxibe oración ni biʼniʼ Ana, laa qué ñanda ñapagá xiiñiʼ. Dxi yenebe xiiñibe Samuel ndaaniʼ tabernáculo, guniʼbe Jiobá nga ni zanda «guindeteʼ ndaaniʼ baʼ» ne «laa zanda guindisaʼ» (1 Sam. 2:6). Rihuinni dxíchica, ora gundisaʼ Dios xiiñiʼ gunaa de Sunem que, bisihuinni zanda gusibani ca gueʼtuʼ.
9. ¿Ximodo biasa ra guionna binni ni rieeteʼ lu Biblia biasa de lade gueʼtuʼ?
9 Peru cadi nga nga últimu milagru ni biʼniʼ Eliseo. Despué de cincuenta iza de nácabe profeta, guca huarabe ne gútibe. Gudiʼdiʼ si ti tiempu, dxi maʼ ca dxita ládisibe riaana, gudiʼdiʼ caadxi israelita gaxha de ra nuu xpaʼbe zigucaachicaʼ ti hombre. Málasi biiyacabe zeeda caadxi de ca enemigu stícabe, ngue runi biree guxooñecabe ne bilaacabe gueʼtuʼ que ndaaniʼ xpaʼ Eliseo. Biblia ná: «Ora bidiiñe ladi hombre que ca dxita ladi Eliseo, bibánibe sti biaje ne bizuhuaabe» (2 Rey. 13:14, 20, 21). Guiníʼ íquenu xi guiráʼ biziidiʼ Marta de ca relatu riʼ. Nanna dxíchibe napa Dios poder para guni ganar guendaguti. Ne guiníʼ íquenu xi zanda guizíʼdinu. Rucaa cani laanu guni crenu naroʼbaʼ poder stiʼ Dios ne gastiʼ ni qué zanda gúnibe.
CAADXI RELATU DE PRIMÉ SIGLU
10. ¿Xi biʼniʼ Pedro pur ti gunaa xpinni Cristu ni maʼ guti?
10 Laaca zeeda caadxi relatu stiʼ chupa chonna xpinni Dios ni gundísacaʼ gueʼtuʼ lu Escrituras Griegas Cristianas. Maʼ bizéʼtenu cani biʼniʼ Jesús gaxha de Naín ne ra lidxi Jairo. Caadxi iza despué, bisibani apóstol Pedro ti gunaa xpinni Cristu láʼ Dorcas o Tabita. Guyuube ndaaniʼ cuartu ra nuu cuerpu stiʼ gunaa que, biʼniʼ orarbe Jiobá ne guniʼbe: «Tabita, biasa». Oraqueca bibánibe, ne biluíʼ Pedro ca hermanu que «ma nabani Tabita». Pur milagru ni bidxagayaa binni riʼ «stale tu bini cre Señor». Maʼ zanda guiníʼ ca discípulo cubi riʼ de Jesús ne de poder ni napa Jiobá para gusibani cani maʼ guti (Hech. 9:36-42).
11. ¿Xi guníʼ Lucas de ni bizaaca ti joven, ne ximodo zándaca gucané milagru ni biʼniʼ Pablo ca binni nuu raqué?
11 Guininu de dxi bibani sti gueʼtuʼ ne laaca biiyaʼ stale binni. Ti dxi, dede gunda galaa gueelaʼ caguu apóstol Pablo ti discursu ndaaniʼ ti yoo ni nuu guidxi Troas, ni riaana ladu noroeste stiʼ Turquía yanna. Gusi Eutico, ti joven ni zuba ruaa ti ventana cucaadiaga laabe, ne biaba dede lu chonna pisu. Zándaca primé binni yendá ra nuube nga Lucas, purtiʼ doctor laa. Laabe guniʼbe cadi bieeguʼ si hombrehuiiniʼ que, sínuque guti. Biete Pablo de lu ca escalera que, gudiidxi hombrehuiiniʼ que ne gudxi guirácabe nabani Eutico. ¡Nanna pabiáʼ bidxagayaa guiráʼ cani biʼyaʼ milagru que yaʼ! Zándaca gutadxí ladxidóʼcabe ora bidiicabe cuenta biiyacabe ra biasa ti gueʼtuʼ (Hech. 20:7-12).
TI ESPERANZA NI DXANDÍʼ
12, 13. Despué de bidúʼyanu caadxi relatu stiʼ caadxi binni ni bibani sti biaje, ¿xi pregunta zacábinu?
12 Ca relatu ni maʼ bíʼyanu riʼ naquiiñeʼ gucaa cani laanu guni crenu ni biʼniʼ cré Marta: zanda gudxiguetaʼ Jiobá guendanabani stiʼ ca gueʼtuʼ, purtiʼ laa nga bidii ni laanu. Risaca gánnanu guiráʼ biaje biasa ca gueʼtuʼ que guyuu ti xpinni Dios, casi Elías, Jesús o Pedro. Ne bizaaca guiráʼ ni tiempu biʼniʼ Jiobá milagru. Yanna, ¿xi zazaaca né cani maʼ guti tiempu ra maʼ qué raca ca milagru ca yaʼ? ¿Ñee zanda cueza ca xpinni Dios de dxiqué guindisaʼ Jiobá ca gueʼtuʼ ca lu ca dxi ni zeeda ca la? ¿Zanda gusihuínnicabe laaca nápacabe confianza ni gupa Marta ora guníʼ de bizaʼnaʼ: «Nanna zabani be dxi iluxe guidxilayú, ra ibani irá binni» la? ¿Xiñee biʼniʼ crebe nga, ne xiñee laaca zanda guni crenu ni yaʼ?
13 Lu Biblia zeeda stale relatu ni rusihuinni gunna ca xpinni Dios ni bizuubaʼ diidxaʼ de dxiqué ziasa gueʼtuʼ lu ca dxi ni zeeda. Guidúʼyanu caadxi de laacani.
14. ¿Xi zanda guizíʼdinu lu relatu stiʼ Abrahán de dxi guiasa ca gueʼtuʼ?
14 Isaac nga ni guleza Abrahán xadxí para guiaanané herencia stiʼ. Peru ti dxi gudxi Dios laabe guicaabe xiiñibe, ni nadxiibe stale, ne gudiibe laa «casi ti ofrenda ni riaʼquiʼ» (Gén. 22:2). Guxuíʼlunu ximodo biʼniʼ sentirbe. Maca bidii stiidxaʼ Jiobá laabe zaguu ndaayaʼ guiráʼ guidxi pur descendencia stibe (Gén. 13:14-16; 18:18; Rom. 4:17, 18). Ne maca gudxi laabe zeeda descendencia que «de Isaac» (Gén. 21:12). Peru ¿ximodo gaca cumplir promesa que pa chiguuti Abrahán Isaac yaʼ? Gucané Dios Pablo para gusiene biʼniʼ cré Abrahán napa Dios poder para gusibani xiiñiʼ (biindaʼ Hebreos 11:17-19). Qué ruzeeteʼ diʼ Biblia biʼniʼ cré Abrahán, pa guzuubaʼ diidxaʼ, zabani xiiñiʼ tiidiʼ si chupa chonna hora o chupa chonna dxi. Qué gánnabe padxí guibani Isaac sti biaje. Peru gúpabe confianza zusibani Jiobá laa.
15. ¿Xi esperanza gupa patriarca Job?
15 Patriarca Job laaca gunna ziasa gueʼtuʼ lu ca dxi ni zeeda. Biénebe pa ugácabe ti yaga, zanda igaa sti biaje ne gaca casi ti yaga nacubi. Peru cadi zacaca rizaaca né binni (Job 14:7-12; 19:25-27). Pa gatiʼ tuuxa qué zanda guiree de ndaaniʼ baʼ stubi si ne guibani sti biaje (2 Sam. 12:23; Sal. 89:48). Qué riníʼ diʼ ca diidxaʼ ca qué zanda gusibani Dios laabe sti biaje. Biʼniʼ cré Job zaguixhe Jiobá ti fecha para guietenalaʼdxiʼ de laa (biindaʼ Job 14:13-15). Neca qué gánnabe padxí guizaaca ngue, gúpabe confianza zietenalaʼdxiʼ ni bidii guendanabani que de laabe ne zaquiiñeʼ poder stiʼ para gusibani laabe sti biaje.
16. ¿Xi gudxi ti ángel profeta Daniel para cuʼ gana laabe?
16 Laaca ruzeeteʼ Escrituras Hebreas de profeta Daniel, ti hombre bizuubaʼ diidxaʼ. Qué ñuu dxi nixeleʼ Dios de laabe purtiʼ qué nusaanabe laa biaʼ dxi bibánibe. Ti biaje biiyabe ti ángel ni gudxi laabe: «Nadxii Dios lii». Ne laaca guníʼ: «Gatadxí ladxidoʼloʼ. Guca nadipaʼ» (Dan. 9:22, 23; 10:11, 18, 19).
17, 18. ¿Xi bidii stiidxaʼ Jiobá Daniel zazaaca né laa lu ca dxi ni zeeda?
17 Tiempu que napa Daniel casi 100 iza ne mayaca gatiʼ. Zándaca rinabadiidxabe laca laabe xi zazaaca né laabe lu ca dxi ni zeeda que. ¿Ñee zabánibe sti biaje la? Zabánibe. Ra ziluxe libru stiʼ Daniel, ridúʼndanu bidii stiidxaʼ Jiobá laabe: «Peru lii la? biʼniʼ huantar dede ora guiluxe xquendanabániluʼ. Zaziiláʼdxiluʼ» (Dan. 12:13). Nanna profeta gola que caziilaʼdxiʼ si ca gueʼtuʼ ca ne maʼ qué zanda guiníʼ ique binni xi guni, maʼ gastiʼ zanna ne maʼ qué zaca binni nuu xpiaaniʼ ndaaniʼ baʼ (Ecl. 9:10). Neca mayaca gátibe, peru cadi raqué chiguiluxe guiráʼ ni. Bidii stiidxaʼ Dios laabe zazaaca ti cosa sicarú né laabe lu ca dxi ni zeeda.
18 Lu mensaje ni gucuaa Daniel que guniʼruʼ Dios: «Ziásaluʼ para guicaaluʼ ni maʼ nexheʼ guicaaluʼ ora maʼ guiluxe ca dxi ca». Qué ñábidicabe laabe padxipeʼ chiguizaaca guiráʼ ngue. Naquiiñeʼ gátibe ne guiziiláʼdxibe. Peru ca diidxaʼ «ziásaluʼ para guicaaluʼ ni maʼ nexheʼ guicaaluʼ» rusihuinni dxíchicani ziásabe lu ca dxi ni zeeda ca. ¿Padxí yaʼ? «Ora maʼ guiluxe ca dxi ca», tiidiʼ si stale tiempu de gátibe. Nueva Biblia al Día rutiixhi ca diidxaʼ ni zeeda lu promesa riʼ sicaríʼ: «Ra guiluxe ca tiempu ca zareeluʼ de ndaaniʼ xpaʼluʼ para guicaaluʼ premiu stiluʼ».
Cásica Marta, zanda gápanu confianza ziasa ca gueʼtuʼ. (Biiyaʼ párrafo 19 ne 20).
19, 20. a) Pur cani maʼ bizíʼdinu lu tema riʼ, ¿xiñee riénenu yanna xi pur gudxi Marta ca diidxaʼ que Jesús? b) ¿Xi zacábinu lu sti tema ca?
19 Rihuinni dxíchica napa Marta razón para gapa confianza ziasa Lázaro, bizaʼnaʼ ni ruzuubaʼ diidxaʼ, «ora maʼ guiluxe ca dxi ca». Ni bidii stiidxaʼ Dios Daniel que ne modo bisihuinni Marta dxandíʼ runi cré pur modo bicabi Jesús, naquiiñeʼ gucaa cani laanu gápanu confianza dxandíʼ ziasa ca binni ni maʼ guti.
20 Maʼ bidúʼyanu caadxi relatu ni dxandíʼ bizaaca dxiqué ni rusihuinni zanda guibani ca gueʼtuʼ ca sti biaje. Laaca maʼ guninu de caadxi xpinni Dios ni gúnnacaʼ ziuu ti dxi ziasa ca binni ni maʼ guti. Yanna, ¿ñee nápanu xiixa prueba ni gusihuinni dxandíʼ ziasa ca binni ni maʼ guti neca maʼ xadxí de guca promesa riʼ la? Pa zacá ni, jmápeca zápanu razón para cuézanu guiasa ca binni ni maʼ guti ca cásica guleza Marta ni. Peru ¿padxí yaʼ? Lu sti tema ca zacábinu ca pregunta riʼ.
