1-3. a) ¿Gunáʼ nga tobi de ca cosa risaca ni runi crenu? b) ¿Xiñee risaca ni yaʼ? (Biiyaʼ dibuju ni zeeda ra ruzulú tema riʼ).

PA NINABADIIDXAʼ tuuxa laanu xii nga ca cosa jma risaca ni runi crenu, ¿xi nicábinu yaʼ? Ni jma seguru nicábinu nga Jiobá bizáʼ guiráʼ ni nuu ne laa bidii guendanabani laanu. Laaca nininu runi crenu Jesucristu, ni gutiʼ pur ca pecadu stinu. Ne laaca zándaca nininu zabáninu sin gátinu ndaaniʼ ti Paraísu. Peru ¿ñee laaca nuzéʼtenu de dxi guiasa gueʼtuʼ la?

² Neca nápanu confianza zalanu dxi gueeda gran tribulación ne zabáninu lu Guidxilayú riʼ sin gátinu, nápanu stale razón para guininu tobi de ca cosa risaca ni runi crenu nga ziasa cani maʼ guti de lade gueʼtuʼ. Bisihuinni apóstol Pablo xiñee risaca ni runi crenu riʼ ora guníʼ: «Purti pa qué ribani gueʼtuʼ la? nin Cristu qué nibani». Pa ñaca qué ñasa Jesús de lade gueʼtuʼ, qué ñácabe Rey ni runi mandar laanu ne pur gana si guiráʼ ni rusíʼdinu de gobiernu stibe (biindaʼ 1 Corintios 15:12-19). Peru nuunu seguru dxandíʼ biasa Jesús de lade gueʼtuʼ. Cadi nácanu casi ca saduceu, caadxi xaíque yuʼduʼ stiʼ ca judíu ni guyuu dxiqué, laacaʼ qué ñuni crecaʼ pa zabani gueʼtuʼ sti biaje. Laanu runi defendernu ni rusiidiʼ Biblia  riʼ neca runi burla binni laanu (Mar. 12:18; Hech. 4:2, 3; 17:32; 23:6-8).

³ Pablo bicaa «ziuu dxi guiasa binni de lade gueʼtu», laani nga tobi de cani naquiiñeʼ guiziidiʼ ca xpinni Cristu primé (Heb. 6:1, 2). Ne bisiénebe nápabe fe zabani gueʼtuʼ sti biaje (Hech. 24:10, 15, 24, 25). Peru neca naca ni tobi de ca cosa ni cadi nagana ni rusiidiʼ Stiidxaʼ Dios, qué riníʼ diʼ nga qué risaca ni (Heb. 5:12). ¿Xiñee coʼ yaʼ?

4. ¿Xi zándaca guinabadiidxaʼ tuuxa de dxi guiasa gueʼtuʼ?

⁴ Ora ruzulú runi estudiarnu Biblia, ridúʼndanu de ca binni ni biasa de lade gueʼtuʼ dxiqué, casi ra biasa Lázaro. Rizíʼdinu guyuu Abrahán, Job ne Daniel seguru zabani ca gueʼtuʼ ca lu ca dxi ni zeeda ca. Peru zándaca chuʼ tu guinabadiidxaʼ: ¿Ñee risácaruʼ ca promesa ni guca ra caníʼ ziasa gueʼtuʼ neca maʼ raca stale iza o siglu de guca cani la? Ne, ¿ñee dxandíʼ ruzeeteʼ Biblia padxí guiasa ca gueʼtuʼ ca la? Respuesta stiʼ ca pregunta riʼ zuquidxi cani fe stinu. Nga runi, guidúʼyanu xi rusiidiʼ Stiidxaʼ Dios.

5. ¿Xidé chiguininu primeru?

⁵ Zándaca qué zaca nagana para laanu guiníʼ íquenu zanda guiasa tuuxa ni cadi xadxí de guti (Juan 11:11; Hech. 20:9, 10). Peru ¿ñee zanda guni crenu promesa ra caníʼ ziasa tuuxa de lade gueʼtuʼ neca cayaadxaʼ stale iza o siglu para gaca ni la? ¿Zanda guni crenu ni pa huaxiéʼ tiempu o maʼ xadxí de guti tuuxa la? Ni dxandíʼ nga, guiranu runi crenu biasa ti binni de lade gueʼtuʼ neca gudiʼdiʼ gayuaa iza de bidii stiidxacabe zaca ni. ¿Tu laabe yaʼ? Ne ¿ximodo racané ni laanu yanna né esperanza ni nápanu ziasa cani maʼ guti lu ca dxi ni zeeda ca yaʼ?

6. ¿Ximodo guca cumplir ca diidxaʼ zeeda lu Salmo 118 luguiáʼ Jesús?

⁶ Lu Salmo 118 ridxélanu caadxi diidxaʼ ni caníʼ ziasa tuuxa de lade gueʼtuʼ, zándaca David nga bicaa ca diidxaʼ riʼ. Sicaríʼ ná ti ndaa de salmo ca: «¡Bilá laadu, Jiobá, rinábadu ni lii! [...] Guisaca binni ni zeeda lu lá Jiobá». Zándaca guietenaláʼdxinu ca binni ni biʼyaʼ ziyuu Jesús ndaaniʼ guidxi Jerusalén 9 de nisán, ante gátibe, guniʼcaʼ ca diidxaʼ ni caníʼ de Mesías riʼ (Sal. 118:25, 26; Mat. 21:7-9). Peru ¿xiñee zanda guininu caníʼ ca diidxaʼ ni zeeda lu salmo riʼ de tuuxa ni chiguiasa de lade gueʼtuʼ stale iza despué yaʼ? Laaca cuzeeteʼ ni de «guié ni bicaanáʼ cani cucuí yoo que nga beeda gaca guié ni jma risaca» (Sal. 118:22).

7. ¿Xi biʼniʼ ca judíu que Jesús?

⁷ Ca xaíque stiʼ ca judíu que nga beeda gácacaʼ «cani cucuí yoo» ni bicaanáʼ Jesús, Mesías que. Cadi qué ñuni crésicaʼ pa laabe nga Cristu. Stale de ca judíu que dede gunábacaʼ gátibe (Luc. 23:18-23). Ngue runi laacabe gúpacabe donda pur gútibe.

8. ¿Ximodo nga gueeda gaca Jesús «guié ni jma risaca» que yaʼ?

⁸ Pa bicaanácabe Jesús ne biiticabe laa, ¿ximodo nga gueeda gácabe «guié ni jma risaca» que yaʼ? Zácabe ni pa guiásabe de lade gueʼtuʼ. Laapebe bisiénebe ni dxi guniʼbe historia stiʼ ti hombre ni biseendaʼ mensajeru ra nuu caadxi hombre runiné laa dxiiñaʼ layú. Peru ca hombre riʼ laga bininacaʼ ca mensajeru que. Cásica bizaaca lu historia riʼ, ca israelita que bininacaʼ ca profeta ni biseendaʼ Dios ra nuucaʼ. Últimu la? biseendaʼ hombre que xiiñiʼ ni jma nadxii, ni chiguiaanané herencia stiʼ, ne guleza nucaadiágacabe xiiñiʼ. Peru ca hombre runi dxiiñaʼ lu layú que biiticaʼ xiiñibe que.  Biluxe guníʼ si Jesús historia riʼ, guniʼbe ca diidxaʼ riguixhená ni zeeda lu Salmo 118:22 (Luc. 20:9-17). Apóstol Pedro laaca bizeeteʼ ni ná lu versículo riʼ ora guniʼné ca xaíque guidxi, ca ancianu ne ca escriba judíu ni dagulisaa Jerusalén. Guniʼbe de Jesucristu de guidxi Nazaret, ni bicaacabe lu ti yaga, peru «undisa Dios laa de lade gueʼtu». Nayá guieʼ modo gúdxibe laacaʼ: «Ni biʼni tu Jesús ca zeda gaca casi ñaca nusaʼbi tu ti guie ra cucuí tu yoo, ne nidxiña dxi ma guie que pe ninaaze yoo que» (Hech. 3:15; 4:5-11; 1 Ped. 2:5-7).

9. ¿Xi ti cosa bizeeteʼ Salmo 118:22 zazaaca ne zadxagayaa binni ni?

⁹ Casi maʼ bidúʼyanu, lu Salmo 118:22 maca cá ziasa tuuxa de lade gueʼtuʼ neca cayaadxaruʼ stale siglu para gaca ni. Zucaa nácabe Mesías que ne zuuticabe laa, peru zabiguetaʼ zabánibe ne zeeda gácabe «guié ni jma risaca» que. Biasa si xiiñiʼ Dios de lade gueʼtuʼ, laasibe beeda gácabe modo gudixhe Dios para gacané laanu guilanu, «purti iruti ru stobi ndaani guidxilayú ni huaguixhe Dios ulá binni, sínuque laasi be» (Hech. 4:12; Efes. 1:20).

10. a) ¿Xi maca bizeeteʼ Salmo 16:10 zazaaca? b) ¿Xiñee nuunu seguru qué ñaca cumplir ni ná salmo riʼ luguiáʼ David?

¹⁰ Guidúʼndanu sti versículo ni bizeeteʼ ziasa tuuxa de lade gueʼtuʼ. Gucuá ni jma de ti mil iza ante guizaaca ni. Zacané ndiʼ laanu gaca confianza stinu jma naguidxi ne guni crenu dxandíʼ ziasa binni de lade gueʼtuʼ neca maʼ xadxí de bidii stiidxacabe zaca ni. Lu Salmo 16 guníʼ David caadxi diidxaʼ, nani: «Qué zusaanaluʼ naa ndaaniʼ baʼ. Qué zudiiluʼ lugar guiaana ni qué rusaana lii ndaaniʼ baʼ» (Salmo 16:10). Cadi caníʼ diʼ David qué zati ne laaca cadi caniʼbe qué zagaachibe ndaaniʼ baʼ, casi xcaadxi binni. Stiidxaʼ Dios ná bigola David, gútibe ne bicaachicabe laabe ndaaniʼ Guidxi stiʼ David ra gaʼchiʼ ca bixhozególabe (1 Rey. 2:1, 10). Yanna, ¿tudé nga caníʼ Salmo 16:10 yaʼ?

11. ¿Padxí bisiene Pedro ca diidxaʼ ni zeeda lu Salmo 16:10?

¹¹ Jma de ti mil iza despué de bicaa David ca diidxaʼ riʼ, bisiene apóstol Pedro tudé ngue caníʼ ni. Chupa chonna semana de guti Jesús ne biasa de lade gueʼtuʼ, bidii apóstol riʼ ti discursu ra nuu mil de judíu ne binni de sti guidxi ra bisiene ni ná Salmo 16:10 (biindaʼ Hechos 2:29-32). Gúdxibe cani cucaadiaga laabe que xiixa ni maca nánnacaʼ: guti David ne bigaachiʼ. Ne despué bizeetebe casi ñaca biiyaʼ David ra bibani Mesías ni nexheʼ gueeda que ne guníʼ de laani. Relatu riʼ ná ni guníʼ Pedro riʼ guirutiʼ niníʼ cadi dxandíʼ ni.

12. ¿Ximodo guca cumplir ni ná Salmo 16:10, ni rusihuinni dxandíʼ ziasa gueʼtuʼ?

¹² Para gusihuinni Pedro pabiáʼ risaca ni caníʼ que, bizeeteʼ ca diidxaʼ ni guníʼ David lu Salmo 110:1 (biindaʼ Hechos 2:33-36). Ra biquiiñebe ca diidxaʼ ni zeeda lu Stiidxaʼ Dios, bicaabe ca binni que guni crecaʼ Jesús nga Señor ne laaca laa nga Cristu. Guirácabe biʼniʼ crécabe guca cumplir ni ná Salmo 16:10 que dxi biasa Jesús de lade gueʼtuʼ. Gudiʼdiʼ si ti tiempu, laaca biquiiñeʼ apóstol Pablo modo bisiene Pedro riʼ ora guniʼné caadxi judíu de guidxi Antioquía de Pisidia. Nabé bidxagayaa ca binni riʼ dede gunábacaʼ laabe gusiénebe laacaʼ jma cosa (biindaʼ Hechos 13:32-37, 42). Modo bisiene Pedro ca diidxaʼ riʼ, laaca naquiiñeʼ gucaa cani laanu guni crenu ca profecía zeeda lu Biblia ra cayete ziasa cani maʼ guti, neca maʼ raca gayuaa iza de gucuá cani.

13. ¿Xi zándaca guinabadiidxaʼ tuuxa de dxi guiasa ca gueʼtuʼ ca?

¹³ Dxandipeʼ riéchenu gánnanu zanda guiasa gueʼtuʼ, neca maʼ gudiʼdiʼ gayuaa iza de bidii stiidxacabe zaca ni. Peru, zándaca guinabadiidxaʼ tuuxa: «¿Ñee riníʼ nga napa xidé cuezaʼ xadxí para guibiguetaʼ guuyaʼ ca binni ni nadxieeʼ sti biaje la? ¿Padxí nga maʼ guzulú guiasa ca gueʼtuʼ ca pue?». Cadi guiaandaʼ laanu gudxi Jesús ca discípulo stiʼ nuu cosa ni qué gánnacaʼ ne qué zanda gánnacaʼ para tiempu que. Nuu cosa ni Bixhózesibe «nanna padxí ne pora gaca ni gudixhe gacaʼ» (Hech. 1:6, 7; Juan 16:12). Peru qué riníʼ diʼ nga qué gánnanu gastiʼ de padxí guzulú guiasa ca gueʼtuʼ ca.

14. Ra biasa Jesús de lade gueʼtuʼ, ¿xiñee maʼ gadxé ni de cani biasa ante de laabe?

¹⁴ Ora guietenaláʼdxinu de ca binni ni ruzeeteʼ Biblia biasa de lade gueʼtuʼ zacané cani laanu guiénenu jma de ni caninu riʼ. Nánnanu binni ni jma risaca biasa de lade gueʼtuʼ nga Jesús. Pa ñaca qué ñásabe la? nin tobi de laanu qué ñapa esperanza de ñuuyaʼ ca binni ni nadxii. Ca binni ni biasa ante de laabe, casi tiempu bibani Elías ne Eliseo, qué nibánicabe xadxí. Biguetaʼ gúticabe sti biaje, bigaachicabe ne gúcacabe yú. Peru Jesús maʼ biasa «de lade gueʼtuʼ» ne «ma qué zati ruʼ» purtiʼ «ma qué zanda guni mandar enda guti laabe». Nabánibe guibáʼ ne maʼ qué ziuu dxi gátibe (Rom. 6:9; Apoc. 1:5, 18; Col. 1:18; 1 Ped. 3:18).

15. ¿Xiñee ná Biblia Jesús nga «nirudóʼ»?

¹⁵ Biasa Jesús para guibani casi ti espíritu guibáʼ. Laabe nga primé binni ni biasa zacá ne ni jma risaca, peru cadi laasibe ziásabe zacá (Hech. 26:23). Laabe bidii stiidxabe ca apóstol ni ruzuubaʼ stiidxabe ziecaʼ guibáʼ para guni mandárnecaʼ laabe (Luc. 22:28-30). Peru, para guicaacabe premiu riʼ la? primeru naquiiñeʼ gáticabe ne despué guiásacabe né ti cuerpu de espíritu, cásica Jesús. Zacagá bisiene Pablo ni. Sicaríʼ bicaabe: «Dxandí bibani Cristu de lade gueʼtuʼ, ne nirudóʼ laabe biasa be lade irá xixé cani ma guti». Despué, guniʼbe ziasa xcaadxi para guibánicaʼ guibáʼ, aparte de Jesús. Guniʼbe: «Sicarí nga gudixhe Dios aca ni: nirudóʼ ibani Cristu, ne dxi gueeda [o presencia stiʼ] la? óraque ibani ca xpinni» (1 Cor. 15:20, 23).

16. ¿Ximodo racané Biblia laanu gánnanu padxí guzulú guiasa cani cheʼ guibáʼ?

¹⁶ Ca diidxaʼ riʼ rucaa cani laanu guiníʼ íquenu padxí nga maʼ guzulú guiasa cani cheʼ guibáʼ: lu presencia stiʼ Cristu. Maʼ raca stale iza, ca testigu stiʼ Jiobá maʼ bisihuínnicaʼ né Biblia bizulú presencia stiʼ Jesús lu iza 1914. Nabánirunu lu presencia riʼ, ne mayaca guedandá dxi guinitilú guidxilayú malu riʼ.

17, 18. ¿Xi zazaaca né caadxi ungidu lu presencia stiʼ Cristu?

 ¹⁷ Biblia rusiene xcaadxi cosa de dxi guiasa cani cheʼ guibáʼ. Nani: «Racalaʼdxi du ganna tu xi raca binni ora ma guti [...]. Runi cre nu cásica guti Jesús ne bisibani Dios laa zacaca zusibani be cani guti ma runi cre laa para guedané ca laa». Laaca nani: «Pa nabani nu dxi ibigueta Señor [o presencia stiʼ], qué zazá niru nu lú cani ma guti. Purti sicarí nga chi aca ni. Zacá ti ridxi casi ora cayuni mandar tuuxa». Ne despué cusiene ni: «Nirudóʼ ibani ca xpinni Cristu ni ma guti, ne óraque laanu cani nabani, guiasa né nu laaca tobi si lu bi para idxaaga nu Señor lade za. Ma qué ziuu ru dxi ixele nu de laa» (1 Tes. 4:13-17).

¹⁸ Tiidiʼ si caadxi tiempu de guzulú presencia stiʼ Cristu, zuzulú guiasa cani cheʼ guibáʼ. Ca ungidu ni nabani lu Guidxilayú ora guzulú gran tribulación ziásacaʼ para idxágalucaʼ Señor lade za. Biblia ná cani guiasa para idxaagalú Señor lade za qué ziaanacaʼ xadxí lu guendaguti, ni riníʼ ca diidxaʼ riʼ nga cadi xadxí záticabe. Zuchaa Dios guirácabe «dxi xhidxi últimu trompeta que. Ne zaca ni ti ratu huiini casi ora riguiñe laga cabe» (1 Cor. 15:51, 52; Mat. 24:31).

19. ¿Xiñee «jma galán» modo chiguiasa binni lu ca dxi ni zeeda ca?

¹⁹ Stale de ca xpinni Cristu ni ruzuubaʼ diidxaʼ de yanna riʼ cadi ungidu laacaʼ ne cadi gucuacaʼ ridxi para guni mandárnecaʼ Cristu guibáʼ. Cabézacaʼ dxi guinitilú guidxilayú malu riʼ ora guedandá dxi stiʼ Jiobá. Guirutiʼ zanda ganna padxí guedandá fin ca, peru guiráʼ ni cazaaca yanna riʼ cusihuinni maʼ cadi candaa ni (1 Tes. 5:1-3). Despué ziasa xcaadxi binni. Millón binni ziásacaʼ para guibánicaʼ ndaaniʼ Paraísu ni chigaca lu Guidxilayú riʼ. Zápacaʼ esperanza gácacaʼ perfectu ne maʼ qué gáticaʼ. Ziasa gueʼtuʼ sti biaje ne zaca ni «jma galán» que modo guca ni dxiqué purtiʼ cani biasa dxiqué gúticaʼ sti biaje (Heb. 11:35).

20. ¿Xiñee zanda gápanu confianza nexheʼ chaahuiʼ modo chiguiasa ca gueʼtuʼ ca?

²⁰ Biblia ná zabánicabe guibáʼ casi maʼ «gudixhe Dios aca ni» (1 Cor. 15:23). Nga runi, zanda gápanu confianza laaca nexhe chaahuiʼ modo guiasa binni lu Guidxilayú riʼ. Zándaca gucaa ndiʼ laanu guinabadiidxanu: «¿Padxí guiasa cani gutiʼ tiempu nabáninu riʼ yaʼ? ¿Zaca ni tiidihuiiniʼ si tiempu de guzulú ti mil iza de guni mandar Cristu para guidxaagalú ca familia stícabe laacabe ne ca xhamígucabe la? ¿Laga ca hombre ni bizuubaʼ diidxaʼ de dxiqué ni guzániru nezalú xquidxi Dios yaʼ? ¿Ñee ziuucabe lade cani guiasa primé para gacanécabe gatachaahuiʼ modo guibani ca xpinni Dios la? ¿Xi zazaaca né ca binni ni qué ñuni ni ná Jiobá yaʼ? ¿Padxí ne paraa zabánicabe yaʼ?». Nuu stale cosa ni zándaca guinabadiidxanu, peru cadi naquiiñeʼ guizaaláʼdxinu gánnanu cani yanna. Jma galán cuézanu ne guidúʼyanu xi chigaca. Nuunu seguru, guizáʼ sicarú guidúʼyanu modo guni Jiobá.

21. ¿Xi esperanza nápanu?

²¹ Laga cabézanu guedandá dxi ca, naquiiñeʼ guquídxinu fe ni nápanu Jiobá. Laabe bidii stiidxabe laanu pur Jesús zusibánibe cani nuu lu xquendabiaanibe (Juan 5:28, 29; 11:23). Bidii Jesús sti prueba zanda guindisaʼ Dios ca gueʼtuʼ ca ora guníʼ, para laa nabani Abrahán, Isaac ne Jacob (Luc. 20:37, 38). Nga runi, nápanu stale razón para guininu cásica guníʼ Pablo: «Naa rune cre zusibani Dios gueʼtuʼ» (Hech. 24:15).