1. ¿Xiñee zanda guininu nabáninu ti tiempu nabé risaca lu historia stiʼ Guidxilayú?

NABÁNINU ti tiempu nabé risaca lu historia stiʼ Guidxilayú riʼ. Casi maca bizeeteʼ Biblia, cutagulisaa Jiobá ti gran muchedumbre «de irá ladu ne de irá guidxi ne irá idioma riníʼ binni». Guirácabe nácacabe «ti guidxi nadipaʼ» ra nuu jma de xhono millón binni ne nuucabe nayecheʼ cusisácacabe Dios «ridxí ne huaxhinni ndaani yuʼdu roʼ stiʼ» (Apoc. 7:9, 15; Is. 60:22). Qué huayuu dxi chuʼ stale binni ni gannaxhii Dios ne gannaxhii xcaadxi binni casi yanna.

2. ¿Ximodo nga guendarannaxhii ni cadi jneza napa ca binni ni nuu zitu de Dios? (Biiyaʼ dibuju ni zeeda ra ruzulú tema riʼ).

² Peru laaca maca bizeeteʼ Biblia, ca dxi stinu riʼ, ca binni ni nuu zitu de Dios zusihuínnicaʼ ti clase guendarannaxhii ni cadi jneza, jma zannaxhiicaʼ laca laacaʼ. Apóstol Pablo bicaa «ora mayaca izaa xhi guidxilayú», «zuyubi binni para laa si», «nisi bidxichi zacá ique caʼ» ne zuyúbicaʼ ni chuuláʼdxicaʼ lugar de guyúbicaʼ Dios (2 Tim. 3:1-4). Guendarannaxhii riʼ maʼ gadxé ni de guendarannaxhii ni rapa tobi Dios. Purtiʼ binni ni riníʼ ique puru para laasi qué ribani nayecheʼ  casi ruxuiʼlú ni. Laga rucaa ni laacaʼ guyúbicaʼ puru para laasicaʼ ne jma nagana modo ribánicaʼ.

3. ¿Xi chiguidúʼyanu lu tema riʼ ne xiñee?

³ Gunna Pablo zedandá dxi zannaxhii binni jma laca laa ne zeeda gaca ni ti peligru para laanu, ca xpinni Cristu. Nga runi cayábibe laanu guixélenu de ca binni ni rusihuinni clase guendarannaxhii ni cadi jneza ca (2 Tim. 3:5). Dxandíʼ, qué zanda diʼ gusaananu de guinínenu ca binni ca. Yanna, ¿ximodo zanda gúninu para cadi guicá xpiaʼ binni laanu ne gúninu stipa pur gusiéchenu Jiobá, Dios ni rannaxhii yaʼ? Guidúʼyanu xiñee gadxé guendarannaxhii ni racalaʼdxiʼ Dios gápanu de guendarannaxhii ni riete lu 2 Timoteo 3:2-4. Ndiʼ zacané laanu guidúʼyanu ximodo nuunu ne ximodo zanda gápanu guendarannaxhii ni dxandipeʼ zuchá tipa ladxidoʼno ne zusiecheʼ laanu.

4. ¿Xiñee nánnanu cadi malu diʼ nga gannaxhiinu laca laanu?

⁴ Casi maʼ bidúʼyanu ca, Pablo bicaa «zuyubi binni para laa si». ¿Ñee riníʼ ca diidxaʼ ca malu nga gannaxhii binni laca laa la? Coʼ. Normal nga gannaxhiinu laca laanu ne caquiiñeʼ gúninu ni. Zacá nga bizáʼ Jiobá laanu. Jesús guníʼ: «Gunaxhii stobi cásica nadxii lu lii» (Mar. 12:31). Pa cadi nadxiinu laca laanu la? qué zanda gannaxhiinu sti binni. Ne Biblia ná: «Naquiiñe ganaxhii hombre xheela casi nadxii cuerpu stiʼ. Ni nadxii xheela la? nadxii laca laa. Purti iruti raca nanalaʼdxi cuerpu stiʼ, sínuque ruyaana ni ne ranaxhii ni» (Efes. 5:28, 29). Nga runi galán nga gannaxhiinu laca laanu, peru maca nuu pabiáʼ.

5. ¿Ximodo nga ca binni ni nadxii xhaataʼ laca laa?

⁵ Guendarannaxhii ni rapa tobi laca laa ni rieeteʼ lu 2 Timoteo 3:2 cadi normal ni purtiʼ runiná ni binni. Ne rucaa ni laacaʼ guyúbicaʼ para laasicaʼ. Cani nadxii xhaataʼ laca laa riníʼ íquecaʼ de laasicaʼ jma de biaʼ caquiiñeʼ gúnicaʼ ni (biindaʼ Romanos 12:3). Riuucabe xizaa jma pur laacabe que pur xcaadxi. Ne ora qué guiree xiixa jneza, nuu biaje rugaanicaʼ donda xcaadxi, lugar de guiniʼcaʼ nápacaʼ donda. Ti libru ni rusiene ni cá lu Biblia ná cani nadxii laca laa zeeda gácacaʼ casi ti manihuiiniʼ láʼ erizo, manihuiiniʼ riʼ «ridópame ne rácame ti bola, ládime ladu jma naguudxi ne nadxaa rusaaname ni para dentru», ne «ca guichi ni naduxhuʼ stime rusaaname cani neza fuera». Ca binni ni ruyubi para laasi cadi dxandíʼ nayecheʼ nuucaʼ.

6. ¿Xi cosa galán ribeendú ca binni ni rannaxhii Dios?

⁶ Caadxi especialista nacaʼ, ora guníʼ Pablo ximodo zaca binni lu ca últimu dxi, primé bizeetebe de guendarannaxhii ni rapa tobi laca laa purtiʼ laani rucaa ni binni gapa caadxi cualidad cadi galán ni bizeetebe despué. Peru cani nadxii Dios gadxé cualidad rusihuínnicaʼ. Biblia ruzeeteʼ ti binni nadxii Dios rapa guendanayecheʼ, guendariuudxi, paciencia, racané binni, nachaʼhuiʼ, rapa fe, nadóʼ, ne rucueeza laca laa (Gál. 5:22, 23). Sicaríʼ biʼndaʼ ti hombre ni bicaa tobi de ca salmo: «¡Nayecheʼ nga riuu ti guidxi ora nápacaʼ Jiobá casi Dios sticaʼ!» (Sal. 144:15). Naca Jiobá ti Dios nayecheʼ, ne ca xpínnibe rusihuínnicaʼ cualidad ca. Ne sti cosa ni runi ca xpinni Jiobá gadxé de cani nadxii laca laa ne cabeza si puru gudiicabe laa nga purtiʼ nayecheʼ nuucabe pur rudiicabe de ni nápacabe para gacanécabe xcaadxi (Hech. 20:35).

7. Pa racaláʼdxinu gánnanu pabiáʼ nadxiinu Dios, ¿xi naquiiñeʼ guinabadiidxanu laca laanu?

⁷ ¿Ximodo gánnanu pa jma ziyannaxhiinu laca laanu lugar de jma ñannaxhiinu Dios yaʼ? Guiníʼ íquenu conseju ni zeeda lu Filipenses 2:3, 4. Racá ná cadi naquiiñeʼ guni ca xpinni Cristu xiixa para si tiidicaʼ lu stobi nin para chuʼ tu gudxiibaʼ laacaʼ, ni jma jneza  gúnicabe nga gácacabe nadóʼ ne gusisácabe stobi ne cadi laca laacabe. Ne laaca ruzeeteʼ ni cadi naquiiñeʼ guicá íquecabe stísicabe laaca naquiiñeʼ gucaa íquecabe ni caquiiñeʼ stobi. Guinabadiidxanu laca laanu: «¿Ñee zinandaʼ ni ná ca conseju riʼ lu xquendanabaneʼ la? ¿Ñee runeʼ stipa guneʼ ni ná Dios la? ¿Ñee ruyubeʼ modo gacaniáʼ xcaadxi ndaaniʼ congregación ne lu predicación la?». Nagana nga gudiʼnu de laanu guiráʼ ora. Zándaca caquiiñeʼ gúninu stale stipa ne zusaana de gúninu caadxi cosa ni riuuláʼdxinu. Peru gástiruʼ sti cosa ni zuni laanu jma nayecheʼ que gánnanu riuulaʼdxiʼ Rey stiʼ universu ni rúninu.

8. ¿Xi huayuni caadxi xpinni Cristu pur nadxiicaʼ Dios?

⁸ Guendarannaxhii ni rapa tobi Dios ne deseu ni nápacaʼ de gúnicaʼ jma lu xhiiñabe maʼ bicaa ni caadxi xpinni Cristu gusaanacaʼ carrera sticaʼ ra ñándaca ñuni ganarcaʼ stale bueltu. Ericka, ti hermana ni naca doctora, peru qué nuyubi ñaca tuuxa risaca lu dxiiñaʼ ca. Lugar de ñúnibe nga, gúcabe precursora regular ne yeguni servirnebe xheelabe ndaaniʼ stale gudxi. Laabe guniʼbe: «Nabé stale ni maʼ gudídidu ca lugar ra riníʼcabe sti diidxaʼ ne maʼ nápadu stale xhamígudu. Guizáʼ huayacané ndiʼ laadu lu xquendanabánidu. Runeruaʼ dxiiñaʼ de doctora, peru ni dxandíʼ rusiecheʼ naa ne ruchá tipa ladxiduáʼ nga ra iquiiñeʼ tiempu stinneʼ ne stipa stinneʼ para gusiandaʼ binni en sentidu espiritual ne gacaniáʼ ndaaniʼ congregación».

9. ¿Xiñee qué randa riuu ca binni ni nadxii bueltu nayecheʼ?

⁹ Laaca guníʼ Pablo ximodo zaca binni ora guníʼ: «Nisi bidxichi zacá ique ca». Raca caadxi iza guniʼné ti precursor de Irlanda ti hombre de Dios. Hombre que gulee cartera stiʼ, gulee caadxi billete ne dede ruchá bi yanni ná: «¡Ndiʼ nga dios stinneʼ!». Stale binni riníʼ ique cásica riníʼ ique hombre riʼ neca qué guiníʼ cani. Nadxiicaʼ bueltu ne guiráʼ ca cosa ni zanda sínecaʼ ni. Peru Biblia caguixhená laanu né ca diidxaʼ riʼ: «Tuuxa ni riuulaʼdxiʼ gapa plata la? qué zadxá neca gapa stale plata, ne tuuxa ni riuulaʼdxiʼ gapa stale cosa risaca, laaca qué zadxá neca ñapa jma» (Ecl. 5:10). Cani nadxii bueltu que zusaanaʼ de chuuláʼdxicaʼ gápacaʼ jma ne zabánicaʼ para si guyúbicaʼ gápacaʼ ni. Peru stale tu «huayacaná» ora rúnicaʼ zacá (1 Tim. 6:9, 10).

10. ¿Xi guníʼ Agur de ca cosa risaca ne de guendapobre?

¹⁰ Dxandíʼ, guiranu caquiiñenu bueltu, purtiʼ nuu ra racané ni laanu (Ecl. 7:12). Yanna, ¿ñee zanda guibani tuuxa nayecheʼ pa guibaniné biaʼ caquiiñeʼ si la? Zanda pue (biindaʼ Eclesiastés 5:12). Agur, xiiñiʼ Jaqué, gunabaʼ Dios: «Cadi guʼnuʼ naa pobre nin ricu. Dané naa guendaró tideniáʼ dxi». Cadi nagana guiénenu xiñee qué nabe gácabe pobre. Laca laabe bisiénebe purtiʼ qué racaláʼdxibe gucaa ni laabe cuánabe, purtiʼ pa gúnibe nga zuni biidibe lá Dios. Peru ¿xiñee gunábabe cadi gudii laabe cosa ni guni laabe ricu yaʼ? Gúdxibe laa: «Ti cadi pur gapa stale maʼ qué gunebiaʼyaʼ lii ne guiniéʼ: “¿Tuu nga Jiobá pue?”» (Prov. 30:8, 9). Zándaca runibiaʼnu binni ni napa jma confianza ca cosa risaca stiʼ lugar de gápacaʼ confianza Dios.

11. ¿Xi guníʼ Jesús de guendarapa bueltu?

¹¹ Cani nadxii bueltu qué zanda gusiéchecaʼ Dios. Jesús guníʼ: «Iruti zanda gapa chupa xpixuaana ne guni ni na iropa cabe tobi si tiru, purti jma zanaxhii be tobi ne zaca nanalaʼdxi be stobi, o pacaa jma zacá nú be ngue ne qué zazaalaʼdxi be stobi que. Zaqueca qué zanda di ganaxhii tu Dios ne ganaxhii ca tu bidxichi». Casi biluxe guníʼ Jesús ca diidxaʼ riʼ: «Cadi guyubi tu gapa tu stale ni risaca ndaani guidxilayú riʼ, purti zanda go bandaa ni ne icá tini ni ne chuʼ gubaana cuana ni. Sínuque laguyubi gapa tu ni risaca ibáʼ  purti ngue qué zo bandaa laa ne qué zacá tini ne qué ziuu gubaana cuana laa» (Mat. 6:19, 20, 24).

12. ¿Xiñee cadi nagana guni servirnu Dios pa guibaninenu ni caquiiñesinu? Bizeeteʼ ti ejemplu.

¹² Stale tu laa maʼ bidii cuenta cadi ribani si binni nayecheʼ ora ribani né huaxiéʼ cosa, sínuque rapa jma tiempu para guni jma lu xhiiñaʼ Jiobá. Ndaaniʼ guidxi Estados Unidos, ti hermanu láʼ Jack gupa ti yoo naroʼbaʼ ne ti negocio, peru bitoobe cani para gácabe precursor, laabe ne xheelabe. Laabe bisiénebe: «Nagana guca para laadu gutoʼdo yoo sicarú ne layú ni nápadu. Peru ca iza bineʼ dxiiñaʼ que cada guibiguetaʼ runeʼ sentir triste pur ca guendanagana rapaʼ ra dxiiñaʼ. Xheelaʼ naca precursora ne guiráʼ ora nuu nayecheʼ. Laa riníʼ: “Gástiruʼ sti jefe casi ni napaʼ”. Yanna ra maʼ nacaʼ precursor la? guirópadu rúnidu dxiiñaʼ para ti binni si, Jiobá».

13. ¿Xi zacané laanu gánnanu ximódopeʼ ridúʼyanu bueltu?

¹³ ¿Xi zacané laanu gánnanu ximódopeʼ ridúʼyanu bueltu yaʼ? Naquiiñeʼ guinabadiidxanu laca laanu: «¿Ñee rusihuinneʼ lu xquendanabaneʼ dxandíʼ runeʼ cré ni caníʼ Biblia ximodo naquiiñeʼ guidúʼyanu bueltu la? ¿Ñee jma risaca para naa guneʼ ganar bueltu la? ¿Ñee jma riuaaʼ xizaa pur ca cosa material ca que pur chuaaʼ galán né Jiobá ne ca hermanu ni nuu gaxha de naa la? ¿Ñee napaʼ confianza zudii Jiobá naa guiráʼ ni caquiiñeʼ la?». Zanda chuʼnu seguru qué ziuu dxi gusaana Jiobá ca binni rapa confianza laa (Mat. 6:33).

14. ¿Ximodo nga jma jneza guidúʼyanu ca cosa ni riuuláʼdxinu?

¹⁴ Casi maca gucuá lu Biblia, tiempu riʼ stale tu ruyubi ni chuulaʼdxiʼ si. Cásica nánnanu cadi malu nga guidúʼyanu pabiáʼ zanda gannaxhiinu laca laanu ne pabiáʼ zanda gannaxhiinu bueltu ti cadi guniná cani laanu, laaca cadi malu nga gúninu caadxi cosa para chuʼnu nayecheʼ sin guiaandaʼ laanu maca nuu pabiáʼ zanda gúninu ni. Nuu binni runi cré caquiiñeʼ gusaana tobi guiráʼ ni riuulaʼdxiʼ. Peru cadi nga diʼ nga ni rusiidiʼ Jiobá. Biblia cayabi guiráʼ ca xpinni Dios ni ruzuubaʼ diidxaʼ: «Guyé, gudó guendaró stiluʼ né guendanayecheʼ ne zaqueca güeʼ vinu stiluʼ nayecheʼ» (Ecl. 9:7).

15. ¿Xi riníʼ ca diidxaʼ «zuyubi cabe ni chuʼlaʼdxi cabe»?

 ¹⁵ Ora riete lu 2 Timoteo 3:4 de cani ruyubi ni chuulaʼdxiʼ si caníʼ ni de ca binni ni qué riguu Dios lu xquendanabani. Cadi caníʼ diʼ versículo riʼ zacá íquecabe guyúbicabe ni chuuláʼdxicabe jma que guyúbicabe Dios purtiʼ nga riníʼ zannaxhiicabe laabe neca caadxi. Laani ná ni «zuyubi cabe ni chuʼlaʼdxi cabe lugar de nuyubi cabe Dios». Ti hombre ni nanna stale guníʼ sicaríʼ de versículo riʼ «cadi caníʼ diʼ ni nadxiicabe Dios neca caadxihuiiniʼ. Ni riníʼ ni nga cadi licapeʼ nadxiicabe laabe». Riguixhená ndiʼ cani ruzulú gannaxhii xhaataʼ ca cosa ni riuulaʼdxiʼ. Ca diidxaʼ «zuyubi cabe ni chuʼlaʼdxi cabe» caníʼ ni de ca binni ni jma cá ique gapa gustu lu xquendanabani (Luc. 8:14).

16, 17. ¿Ximodo biʼyaʼ Jesús ca cosa ni runi binni para chuʼ nayecheʼ?

¹⁶ Biiyaʼ Jesús xi zanda guni para chuʼ nayecheʼ. Laabe guyebe ra «uca ti enda xheela» ne laaca guyebe ti saa ra guca ti guendaró (Juan 2:1-10; Luc. 5:29). Ora bibidxi vinu ra cayaca guendaxheelaʼ que, bíʼnibe ti milagru ra bíʼnibe nisa que vinu. Ne sti biaje ora guníʼ binni mal de laabe pur cayobe ne cayeʼbe bisiénebe cadi jneza modo ruuyacaʼ ca cosa que (Luc. 7:33-36).

¹⁷ Neca zaqué, qué niquiiñeʼ diʼ Jesús xquendanabani para ñuni guiráʼ ni riuulaʼdxiʼ ti chuʼ nayecheʼ. Bíʼnibe ni ná Jiobá primé lu xquendanabánibe ne bíʼnibe stipa pur gacanebe xcaadxi. Ne guyuube dispuestu gacanabe ne gátibe lu ti yaga para ganda guilá jma binni. Sicaríʼ gúdxibe guiráʼ cani racalaʼdxiʼ chinanda laabe: «Dichoso laatu ora rulaa binni diidxa laatu, ne riladxi ca laatu ne ribee ca falsu luguiá tu purti xpinne laatu. Laguiecheʼ neca cazaaca tu irá nga, purti nabé sicarú ni chi gudii Dios laatu ibáʼ, ne nanna ca tu zacaca biʼni cabe ca profeta sti Dios chiqué» (Mat. 5:11, 12).

18. ¿Xi guendarinabadiidxaʼ zacané laanu gánnanu pabiáʼ rusisácanu ca cosa ni riuuláʼdxinu?

¹⁸ ¿Xi zacané laanu gánnanu pabiáʼ rusisácanu ca cosa ni riuuláʼdxinu yaʼ? Guinabadiidxanu laca laanu: «¿Ñee jma risaca para naa entretenimientu que chaaʼ reunión ne predicación la? ¿Ñee nuaaʼ dispuestu gusaanaʼ caadxi cosa ni riuuladxeʼ guneʼ purtiʼ napaʼ gana guneʼ servir Dios la? Ora cueʼ xi guneʼ para chuaaʼ nayecheʼ, ¿ñee rinabadiidxaʼ pa ziuulaʼdxiʼ Jiobá ni la?». Pa dxandíʼ nadxiinu Dios la? qué zúninu xiixa ni nánnanu qué riuuláʼdxibe, peru laaca qué zúninu xiixa ni riníʼ íquenu zándaca qué ruuyabe jneza (biindaʼ Mateo 22:37, 38).

19. ¿Tu clase binni nga qué ziuu dxi chuʼ nayecheʼ?

¹⁹ Maʼ xhoopaʼ mil iza de cayuniná guidxilayú stiʼ Binidxabaʼ binni. Yanna ra maʼ nabáninu lu ca últimu dxi stiʼ sistema riʼ, dxaʼ Guidxilayú riʼ de binni ni riníʼ ique puru para laasi, ruyúbicaʼ gápacaʼ bueltu ne gúnicaʼ guiráʼ ni riuuláʼdxicaʼ. Jma cá íquecabe gúnicabe ni riuuláʼdxicabe ne xi cueendúcabe de laacani. Qué ziuu dxi chuʼ ca binni ca nayecheʼ. Peru Biblia ná: «Nayecheʼ nga riuu binni ni racané Dios stiʼ Jacob laa, ni napa esperanza Jiobá Dios stiʼ» (Sal. 146:5).

20. Guendarannaxhii ni nápaluʼ Dios, ¿ximodo racané ni lii chuʼluʼ nayecheʼ?

²⁰ Laanu, ca xpinni Jiobá, cada dxi tiidiʼ jma nadxiinu laabe. Ne cada iza jma stale binni runibiáʼ laabe ne rannaxhiicaʼ laabe. Ndiʼ nga ti prueba ni cusihuinni maʼ cayuni mandar Reinu stiʼ Dios ne maʼ cadi candaa zedané ni ndaayaʼ ni qué ruxuíʼlunu. Gúninu ni ná Jiobá ne gánnanu rusiéchenu laabe zanda gacané ni laanu chuʼnu nayecheʼ yanna ne lu ca dxi ni zeeda ca. Lu sti tema ca, zadúʼyanu caadxi de ca cosa cadi galán ni runi tuuxa ora rannaxhii jma laca laa. Ne zadúʼyanu xiñee maʼ gadxé ni de ca cualidad ni napa ca xpinni Jiobá.