1, 2. ¿Xi eventu chigaca lu iza 2018 ni zucaa binni chuʼ tobi si, ne xiñee nabé risaca ni? (Biiyaʼ foto ni zeeda ra ruzulú tema riʼ).

LAGA ziyaaziʼ Gubidxa, 31 de marzo iza 2018, zadagulisaa millón xpinni Dios ne binni ni riuulaʼdxiʼ guiziidiʼ de laabe para gúnicaʼ Guendaroxhi stiʼ Señor. Dxi rietenaláʼdxidu guendaguti stiʼ Cristu, raca ni ti biaje lu ti iza ne rucaa ni binni chuʼcaʼ tobi si jma que intiica eventu ni raca lu Guidxilayú riʼ.

² Nánnanu guizáʼ riecheʼ Jiobá ne Jesús ora ruuyacaʼ modo ridagulisaa millón binni dxi risaca riʼ lu guidubi Guidxilayú, laga zidiʼdiʼ hora. Biblia maca guníʼ ziuu ti gran muchedumbre dede guirutiʼ zanda ugabaʼ laacaʼ «za ca de irá ladu ne de irá guidxi ne irá idioma riníʼ binni» ne zucaacaʼ ridxi: «Dios stinu ni zuba lu trono bilá laanu, laa ne Dendxu huiiniʼ» (Apoc. 7:9, 10). Guizáʼ sicarú nga guidxiña stale binni dxi rietenaláʼdxinu guendaguti stiʼ Cristu guiráʼ iza para gusisácacaʼ Jiobá ne Jesús.

3. ¿Xi pregunta zacábinu lu tema riʼ?

³ Lu tema riʼ zacábinu tapa pregunta. Primé, ¿ximodo zanda chuʼnu listu para Conmemoración ne cueendunu ni galán? Guiropa,  ¿xiñee racané Conmemoración ca xpinni Dios para chuʼnu tobi si? Guionna, ¿xi zanda gúninu para gacanenu ti chuʼnu tobi si? Ne guidapa, ¿zedandá dxi gúninu últimu Conmemoración la? Pa zacá ni, ¿padxí gaca ni yaʼ?

4. ¿Xiñee risaca nga gúninu stipa chuunu Conmemoración?

⁴ ¿Xiñee nabé risaca nga chuunu Conmemoración? Cadi guiaandaʼ laanu laaca runi adorarnu Dios nga ora riuunu ca reunión ca. Nuunu seguru ruuyaʼ Jiobá ne Jesús tuu nga cani runi stipa pur cadi guiaadxaʼ reunión ni jma risaca raca cada iza riʼ. Racaláʼdxinu gúʼyacabe ziuunu ra chigaca ni pa qué chuʼ xiixa ni dxandipeʼ gucueeza laanu o guizaacanu xiixa. Ora rusihuínninu pur ni gúninu dxandíʼ risaca ca reunión ca para laanu, rudiʼnu jma razón Jiobá para cadi guxhá lanu lu libru ra cá lá cani qué rusiaandabe de laacaʼ. Libru riʼ, laaca laani nga «libru de enda nabani» ra cá lá cani racalaʼdxiʼ Jiobá gudii guendanabani ni qué zaluxe (Mal. 3:16; Apoc. 20:15).

5. Ora maʼ zeeda dxiña dxi ganda Conmemoración, ¿xi naquiiñeʼ gúninu para guidúʼyanu pa naguidxi nuu fe stinu?

⁵ Ora maʼ zeeda dxiña dxi ganda Conmemoración, zanda cueenu tiempu para guni orarnu ne guiníʼ ique chaahuinu ximodo nuu amistad ni nápanu né Jiobá. Biblia ná: «Laguuyaʼ chaahuiʼ pa dxandíʼ nápatu fe, lagusihuinni pa dxandíʼ ni laatu. ¿Ñee qué runi cretu pa nuuné Cristu laatu tobi si la? Pa zacá ni qué ziuulaʼdxiʼ Dios ni rúnitu» (2 Corintios 13:5, TNM). ¿Ximodo zanda gúninu ni yaʼ? Pablo guníʼ naquiiñeʼ guʼyaʼ chaahuinu ximodo nuunu para guidúʼyanu pa naguidxi nuu fe stinu. Nga runi, galán guinabadiidxanu laca laanu: «¿Dxandíʼ runeʼ cré nuaaʼ ndaaniʼ tobi lucha organización ni riquiiñeʼ Jiobá para guni ni nabe la? ¿Runeʼ stipa para guneʼ predicar ca noticia galán stiʼ Reinu biaʼ gándatiʼ la? Pur cani runeʼ, ¿rusihuinneʼ dxandíʼ runeʼ cré nabáninu lu ca últimu dxi ne mayaca guiluxe guni mandar Binidxabaʼ la? ¿Náparuaʼ confianza Jiobá ne Jesús cásica gupaʼ dxi bidieeʼ xquendanabaneʼ laabe la?» (Mat. 24:14; 2 Tim. 3:1; Heb. 3:14). Pa guiníʼ íquenu modo guicábinu ca pregunta riʼ zacané ni laanu gusihuínninu pa dxandíʼ ni laanu.

6. a) ¿Ximodo si nga zanda guicaanu guendanabani ni qué zaluxe? b) ¿Ximodo riuu ti ancianu listu para Conmemoración guiráʼ iza? c) ¿Ximodo zanda chinándanu ejemplu stiʼ hermanu riʼ?

⁶ Ti modo zanda chuʼnu listu para Conmemoración nga guidúʼndanu ca tema ni biree lu Biblia ni caníʼ pabiáʼ risaca dxi riʼ ne guiníʼ íquenu cani (biindaʼ Juan 3:16; 17:3). Ti modo si zanda guicaanu guendanabani ni qué zaluxe nga gunibiaʼnu Jiobá ne gápanu fe Jesús, tobi lucha Xiiñibe. Para chuʼnu listu para Conmemoración ca la? zanda guni investigarnu ca tema ni zacané laanu guidxíñanu jma gaxha de laacabe lu estudiu personal stinu. Guidúʼyanu xi runi ti ancianu ni maʼ napa stale experiencia. Maʼ raca stale iza, rindisaʼ chaahuibe ca tema ni reeda lu revista Torre stiʼ ni rapa ni caníʼ de Conmemoración ne modo rusihuinni Jiobá ne Jesús guendarannaxhii. Cada iza, ca semana ante ganda Conmemoración, ribiguetaʼ ruundabe ca tema riʼ ne riníʼ íquebe pabiáʼ risaca dxi riʼ. Gatigá riguube tobi o chupa tema lade cani maca nápabe. Maʼ bidiibe cuenta ora ruundabe ca información riʼ sti biaje, ora gúʼndabe biaʼ maʼ nexheʼ guiuundaʼ lu Biblia para Conmemoración ne guiníʼ íquebe ni gúʼndabe ca racané ni guiziidibe xcaadxi cosa nacubi guiráʼ iza. Peru ni jma risaca  nga runi sentirbe cada biaje gúnibe ni bizéʼtenu riʼ jma rannaxhiibe Jiobá ne Jesús. Pa guni investigarnu casi runi hermanu riʼ, zanda gacané ni laanu para gannaxhiinu ne gusisácanu laacabe jma ne cueendunu ni galán pur Conmemoración.

7. a) ¿Xi gunabaʼ Jesús lu ti oración gueelaʼ biʼniʼ primé Guendaroxhi stiʼ Señor? b) ¿Ximodo nánnanu maʼ bicabi Jiobá oración stiʼ Jesús?

⁷ Primé biaje guca Guendaroxhi stiʼ Señor, lu oración ni biʼniʼ Jesús gunábabe chuʼ ca discípulo stibe tobi si cásica laabe ne Bixhózebe nuucabe tobi si (biindaʼ Juan 17:20, 21). Nanna dxíchinu bicabi Jiobá oración ni biʼniʼ Xiiñibe ni jma nadxiibe. Aparte de ca reunión ni rápanu, Conmemoración ca rusihuinni ni dxandíʼ nuu ca testigu stiʼ Jiobá tobi si. Dxi riʼ, millón binni de guiráʼ guidxi ne de guiráʼ raza ridagulisaacaʼ lu guidubi Guidxilayú ne rusihuínnicaʼ runi crecaʼ biseendaʼ Jiobá Xiiñiʼ. Nuu lugar, huaxiéʼ si ora ridagulisaa ca religión ne binni de gadxé raza ne ora rúnicabe ni runi saacabe menu laacabe. Peru Jiobá ne Jesús sicarú ruuyacabe xquídxicabe nuu tobi si.

8. ¿Xi mensaje bidii Jiobá Ezequiel de modo chichuu xquidxi tobi si?

⁸ Laanu ca xpinni Jiobá qué ridxagayaanu xiñee nuunu tobi si. Lu ti mensaje bidii Jiobá profeta Ezequiel bizeeteʼ ximodo chigaca ni. Mensaje que ná zieeguʼ chupa palu, palu «para Judá» ne palu «para José», ne zeeda gaca cani tobi si (biindaʼ Ezequiel 37:15-17). Lu sección ni láʼ «Ni rinabadiidxaʼ cani ruundaʼ», ni beeda lu revista Torre stiʼ ni rapa de julio 2016 bisiene: «Bidii Jiobá Ezequiel ti mensaje de esperanza: guniʼbe ziuu xquídxibe Israel tobi si ora guibiguétacaʼ de esclavu Babilonia. Ne ni guniʼbe riʼ la? bizeetebe laaca ziuu xquídxibe tobi si lu ca últimu dxi riʼ».

9. ¿Ximodo rihuinni dxichi cayaca cumplir profecía stiʼ Ezequiel que guiráʼ iza ora gaca Conmemoración?

⁹ Lu iza 1919, primeru biʼniʼ organizar Jiobá ca ungidu, ni zeeda gaca casi palu «para Judá», ne biʼniʼ laacabe tobi si chaahuiʼ chaahuiʼ sti biaje. Despué bizulú bidaaguʼ jma binni ni napa esperanza guibani lu Guidxilayú riʼ laacabe, cani zeeda gaca casi palu «para José». Bidii stiidxaʼ Jiobá zuchaaga guiropa ni ne zeeda gaca cani tobi si lu naʼ (Ezeq. 37:19). Laabe bíʼnibe ca ungidu ne «xcaadxi dendxuʼ» ca tobi si (Juan 10:16; Zac. 8:23). Tiempu riʼ, tobi si cayuni guiropaʼ grupu riʼ xhiiñaʼ Jesucristu, Rey risaca sticaʼ, laabe nga gudxi Dios siervu stinneʼ David lu profecía stiʼ Ezequiel (Ezeq. 37:24, 25). Guiráʼ iza, rihuinni dxichi pabiáʼ sicarú modo riuu cani riaana de ca ungidu ne xcaadxi dendxuʼ ca tobi si ora ridagulisaacaʼ para guietenaláʼdxicaʼ guendaguti stiʼ Cristu, casi guníʼ Ezequiel que. Yanna, ¿xi zanda guni cada tobi de laanu para cadi gusaana de chuʼnu tobi si ne gacanenu xcaadxi guni ni yaʼ?

10. ¿Ximodo zanda gacanenu para chuʼ xquidxi Dios tobi si?

¹⁰ Ti modo zanda gacanenu para chuʼnu tobi si ndaaniʼ xquidxi Dios nga gácanu humilde. Dxi guyuu Jesús lu Guidxilayú riʼ, gúdxibe ca discípulo stibe naquiiñeʼ gácacaʼ humilde (Mat. 23:12). Lu Guidxilayú riʼ jma nga riníʼ ique binni jma risácacaʼ que xcaadxi. Peru, pa nácanu humilde, zápanu respetu ca hermanu ni zániru ndaaniʼ congregación. Pa racaláʼdxinu chuʼ congregación tobi si la? naquiiñeʼ guzúʼbanu diidxaʼ guiráʼ ora. Peru ni jma risaca nga zusiéchenu Jiobá  pa gácanu humilde, purtiʼ nanaláʼdxibe «cani rudxiiba laca laa, peru racané be cani qué rudxiiba laca laa» (1 Ped. 5:5).

11. ¿Xiñee ora riníʼ íquenu xi riníʼ pan ne vinu ni riquiiñeʼ lu Conmemoración ca racané ni para ganda chuʼnu tobi si?

¹¹ Guiropa modo zanda gacanenu chuʼnu tobi si nga guiníʼ ique chaahuinu xi riníʼ pan ne vinu ni riquiiñeʼ lu Conmemoración ca. Naquiiñeʼ gúninu ni ante ganda gueelaʼ nabé risaca ca ne jmaruʼ si naquiiñeʼ gúninu ni gueelaʼ ca (1 Cor. 11:23-25). Pan sin levadura ca runi representar ni cuerpu sin donda stiʼ Jesús ni bidii casi sacrificiu, ne vinu ca runi representar ni rini ni bixhiibe. Peru cadi naquiiñeʼ si guiénenu xi riníʼ ca símbolo riʼ. Cadi guiaandaʼ laanu, sacrificiu stiʼ Jesús ca bisihuinni ni chupa clase guendarannaxhii jma naroʼbaʼ ni qué huahuinni: guendarannaxhii ni biluíʼ Jiobá ra bidii Xiiñiʼ para gulá laanu ne guendarannaxhii ni biluíʼ Jesús ra guyuu dispuestu gudii xquendanabani pur laanu. Ora guiníʼ íquenu pabiáʼ nadxiicabe laanu laaca naquiiñeʼ gucaa ni laanu gannaxhiinu laacabe. Ne guendarannaxhii ni runi sentirnu ne ni runi sentir ca hermanu pur Jiobá naca ni xiixa ni racané laanu chuʼnu tobi si ne cadi guixélenu.

12. Lu ejemplu stiʼ rey ne ca esclavu stiʼ que, ¿ximodo bisihuinni Jesús ribeza Jiobá guni perdonarnu ca hermanu stinu?

¹² Guionna modo para ganda gacanenu chuʼnu tobi si nga guiale de laanu guni perdonarnu xcaadxi. Ora guni perdonarnu cani guniná laanu, rusihuínninu rudiʼnu xquíxepeʼ Jiobá purtiʼ runi perdonar ca pecadu stinu pur sacrificiu stiʼ Cristu. Guiníʼ íquenu ejemplu guníʼ Jesús ni zeeda lu Mateo 18:23-34. Guinabadiidxanu laca laanu: «¿Ñee rucaa ejemplu riʼ naa guneʼ ni bisiidiʼ Jesús la? ¿Ñee napaʼ paciencia ne rieneʼ ca hermanu la? ¿Ñee nuaaʼ dispuestu guneʼ perdonar cani runiná naa la?». Dxandíʼ nuu pecadu jma naroʼbaʼ que xcaadxi. Ne nuu biaje raca nagana para laanu guni perdonarnu xiixa gúnicabe laanu. Peru ca diidxaʼ guníʼ Jesús ca rusihuinni cani xii nga ribeza Jiobá gúninu (biindaʼ Mateo 18:35). Bisiene Jesús qué zuni perdonar Jiobá laanu pa qué guni perdonarnu ca  hermanu neca nuu razón para gúninu ni. Galán guiníʼ ique chaahuinu ndiʼ. Ora ruzúʼbanu stiidxaʼ Jesús ne runi perdonarnu xcaadxi la? racanenu para cadi gusaana de chuʼnu tobi si ne laaca racanenu xcaadxi guni ni.

13. ¿Ximodo racanenu para chuʼnu tobi si ora rúninu stipa pur chuʼ guendariuudxi lade ca hermanu?

¹³ Ora runi perdonarnu ca hermanu stinu, riuu guendariuudxi ládenu. Cadi guiaandaʼ laanu guníʼ apóstol Pablo naquiiñeʼ gúninu stipa de guidubi ladxidoʼno pur gápanu guendariuudxi purtiʼ maʼ biʼniʼ espíritu santu laanu tobi si (Efes. 4:3). Tiempu chigaca Conmemoración riʼ ne jmaruʼ si gueelaʼ chigaca ni ca, guiníʼ ique chaahuinu ximodo runi tratarnu xcaadxi binni. Guinabadiidxanu laca laanu: «Pur cani runeʼ, ¿ñee rusihuinneʼ cadi nacaʼ ti binni ni ridaa xiana la? ¿Ñee ruuyaʼ xcaadxi runeʼ stipa pur chuʼ guendariuudxi ne racaniáʼ para chuʼdu tobi si la?».

14. ¿Ximodo zanda gusihuínninu runi huantarsaanu né guendarannaxhii?

¹⁴ Guidapa modo gacanenu para chuʼnu tobi si nga guluinu guendarannaxhii cásica runi Jiobá, Dios ni ruluíʼ guendarannaxhii (1 Juan 4:8). Qué chuʼ dxi guininu sicaríʼ: «Nannaʼ naquiiñeʼ guneʼ huantar ca hermanu, peru ni dxandíʼ nga qué riuuladxeʼ modo laacabe». Pa guiníʼ íquenu zacá la? cadi zinándanu ni ná conseju bidii Pablo ora guníʼ naquiiñeʼ guni huantarsaa ca xpinni Cristu né guendarannaxhii (Efes. 4:2). Cadi guníʼ si Pablo naquiiñeʼ guni huantarsaanu, sínuque naquiiñeʼ gúninu ni né guendarannaxhii. ¿Cadi dxandíʼ gadxepeʼ guiropaʼ cosa ca la? Maʼ gulidxi Jiobá binni de guiráʼ ladu ndaaniʼ ca congregación ca (Juan 6:44). Nga runi nápabe razón para gannaxhiibe laacaʼ. Yanna, ¿xiñee guininu qué runi merecer ti hermanu gannaxhiinu laa yaʼ? Naquiiñeʼ gannaxhiinu guiráʼ hermanu casi runi mandar Jiobá laanu gúninu ni (1 Juan 4:20, 21).

15. ¿Xiñee nánnanu zaca últimu Conmemoración?

¹⁵ Zedandá dxi zúninu últimu Conmemoración. ¿Xiñee nánnanu ni yaʼ? Gudxi Pablo ca xpinni Cristu ni naca ungidu cada iza guietenaláʼdxicaʼ guendaguti stiʼ Jesús la? culuiʼcaʼ binni guti Cristu pur laacaʼ ne zúnicaʼ ni dede dxi guibiguétabe (1 Cor. 11:26). Lu profecía ni guníʼ Jesús de dxi mayaca guiluxe guidxilayú riʼ, laaca bizeetebe de ora guedandabe. Sicaríʼ guniʼbe de gran tribulación, ni mayaca guedandá: «Zahuinni seña ibáʼ ma chi ibigueta Hombre Biseenda Dios sti tiru, ne dxi que nga guʼna irá binni guidxilayú ne zuuya ca zeda yete be de ibáʼ lade za, ne stale enda nandxóʼ dede riaqui biaaniʼ. Oraque zaxidxi trompeta reciu ne zuseenda be ca ángel stibe gueda topa irá ni ma ulí be de idubi naca guidxilayú» (Mat. 24:29-31). Zutagulisaa Jesús cani bibí ora chinebe ca ungidu guibáʼ, cani riaanaruʼ lu Guidxilayú tiempu ca. Zaca ndiʼ despué de guzulú gran tribulación, peru ante guzulú Armagedón, lu guerra ca zuni ganar Jesús ne 144,000 ca rey ni nuu lu Guidxilayú (Apoc. 17:12-14). Conmemoración ni gaca ante gueeda Jesús para chiné ca ungidu ca guibáʼ, laani nga últimu ni gaca.

16. ¿Xiñee maʼ gudixhe íqueluʼ cadi guiaadxaluʼ Conmemoración iza riʼ?

¹⁶ Gúninu stipa pur cadi guiaadxanu Conmemoración ni chigaca 31 de marzo 2018. Ne guinábanu Jiobá gacané laanu para cadi gusaana de gusihuínninu nuu xquídxibe tobi si (biindaʼ Salmo 133:1). Cadi guiaandaʼ laanu zedandá dxi chuunu Conmemoración últimu biaje. Peru laga guedandá dxi ca la? gusihuínninu rusisácanu stálepeʼ pabiáʼ sicarú modo riuʼnu tobi si ora ganda Conmemoración.