¿Xiñee gudiʼnu Dios xiixa pa maʼ nápabe guiráʼ ni?
«Ne yanna, Dios stidu, cudiʼdu xquíxepeʼ lii ne rusisácadu laluʼ purtiʼ nabé sicarú ni» (1 CRÓN. 29:13).
DIIDXAʼ RIUUNDAʼ: 1 NE 2
1, 2. ¿Ximodo nga rudii Jiobá laanu de ni napa?
NACA Jiobá ti Dios ni rudii de ni napa. Guiráʼ ni nápanu zeeda cani de laabe. Stibe guiráʼ oro, plata ne xcaadxi cosa ni rudii Guidxilayú, ne rudiibe guiráʼ ni caquiiñeʼ para chuʼ guendanabani (Sal. 104:13-15; Ageo 2:8). Biblia ná stale biaje biquiiñeʼ Jiobá cani ra biʼniʼ xiixa milagru para gudii ni iquiiñeʼ ca xpinni.
2 Guzéʼtenu ti ejemplu, bidii Jiobá maná ne nisa ca israelita cuarenta iza guyuucaʼ lu desiertu (Éx. 16:35). Ne pur ngue la? «gastiʼ qué ñaadxaʼ laacabe» (Neh. 9:20, 21). Biquiiñeʼ Jiobá profeta Eliseo para guni ti milagru ti gaca ziáʼ caadxi aceite stiʼ ti viuda ni ruzuubaʼ diidxaʼ. Pur nga la? gunda gudíxebe guiráʼ ra nuzaabibe ne biaanaruʼ bueltu stibe para guibaninebe ca xiiñibe (2 Rey. 4:1-7). Ne laaca bidii Jiobá poder Jesús para guni milagru ne gudii guendaró dede né bueltu ora caquiiñeʼ guni ni (Mat. 15:35-38; 17:27).
3. ¿Xi chiguizíʼdinu lu tema riʼ?
3 Zanda iquiiñeʼ Jiobá intiica si ni gacalaʼdxiʼ para gudii ni caquiiñeʼ guiráʼ ni bizáʼ lu Guidxilayú riʼ. Neca zacá, runi invitar Jiobá ca xpinni iquiiñecaʼ ca cosa material ni nápacaʼ para gacanecaʼ organización stibe (Éx. 36:3-7; biindaʼ Proverbios 3:9). ¿Xiñee ribeza Jiobá iquiiñenu ca cosa risaca stinu para gudiʼnu laa caadxi de ni maʼ bidii laanu yaʼ? ¿Ximodo bidii ca xpinni Dios de dxiqué bueltu para gacanecaʼ gaca adorar Dios? ¿Ximodo riquiiñeʼ organización stinu ca donación ni ricaa? Lu tema riʼ zacábinu ca pregunta riʼ.
¿XIÑEE NAQUIIÑEʼ GUDIʼNU JIOBÁ DE NI NÁPANU?
4. ¿Xi ruluinu Jiobá ora racanenu gaca dxiiñaʼ stiʼ?
4 ¿Xiñee rudiʼnu Jiobá de cani nápanu yaʼ? Purtiʼ nadxiinu laabe ne rudiʼnu xquíxepeʼ laabe pur guiráʼ ni maʼ bíʼnibe pur laanu. Dede runiibi ni ladxidoʼno ora guiníʼ íquenu ni. Runi sentirnu casi biʼniʼ sentir rey David ora bisiene xi guiráʼ caquiiñeʼ para cuí yuʼduʼ stiʼ Dios. Laabe guniʼbe guiráʼ ni nápanu zeeda ni de Jiobá ne nga runi guiráʼ ni rudiʼnu laabe zeeda cani de laabe (biindaʼ 1 Crónicas 29:11-14).
5. ¿Ximodo rusihuinni Biblia ora rudiʼnu de ni nápanu sin cuézanu guicaanu xiixa naca ni ti modo risaca para guni adorarnu Dios jneza?
5 Sti razón pur rudiʼnu Jiobá de ni nápanu nga purtiʼ zacá runi adorarnu laabe. Lu ti visión ni gucuaa apóstol Juan binadiaga caníʼ ca xpinni Jiobá ni nuu guibáʼ ca diidxaʼ riʼ: «Señor [Jiobá] Dios stidu, lii siouʼ nga naquiiñe udxiʼba du ne usisaca du ne iní du nandxóʼ loʼ. Purti lii bizáʼ lu irá xixé ni nuu. Uyáʼ ni ne nuu ru ni purti nga ni na luʼ» (Apoc. 4:11). Nanna dxíchinu Jiobá si nga naquiiñeʼ gusisácanu ne gudxíʼbanu, nga runi naquiiñeʼ gudiʼnu laabe de ni jma galán ni nápanu. Tiempu stiʼ ca israelita, biʼniʼ mandar Jiobá Moisés gabi laacabe gúnicabe saa chonna biaje lu ti iza. Ley que ná: «Nin tobi de laacabe cadi cheʼ xiee náʼ» (Deut. 16:16). Casi maʼ bidúʼyanu ca, gudii tuuxa xiixa cosa material ora raca ca saa riʼ naca ni ti modo para guni adorar ca israelita que Jiobá. Tiempu riʼ, gudiʼnu de ni nápanu sin cuézanu guicaanu xiixa laaca naca ni ti modo risaca para guni adorarnu Dios. Ora rúninu ni rusihuínninu rusisácanu ne racanenu gaca dxiiñaʼ ni cayuni parte de organización stiʼ Jiobá ni nuu lu Guidxilayú riʼ.
6. ¿Xiñee galán gudiʼnu de ni nápanu? (Biiyaʼ foto ni zeeda ra ruzulú tema riʼ).
6 Galán gudiʼnu de ni nápanu ne cadi guicaasinu (biindaʼ Proverbios 29:21). Guzéʼtenu ti ejemplu, guxuíʼlunu bisigaʼdeʼ ti xcuidihuiiniʼ ti regalu bixhoze ne jñaa ne biquiiñeʼ laaca bueltu ni rudiicabe laa gatigá. ¿Cadi dxandíʼ nudiicabe xquíxepeʼ laabe la? O guiníʼ íquenu ti precursor joven ni nabeza né bixhoze ne jñaa ne rudii laacabe bueltu para gacané laacabe lu ca gastu ni raca ra lídxicabe. Zándaca cadi cabézacabe gúnibe ndiʼ, peru zándaca guicaacabe ni purtiʼ nánnacabe zacá rusihuinni xiiñicabe rudii xquíxepeʼ pur guiráʼ ni rúnicabe pur laa. Zaca nga rizaacanu, Jiobá nanna galán nga gudiʼnu laa de ca cosa risaca ni nápanu.
NI BIʼNIʼ CA XPINNI DIOS TIEMPU GUCUÁ BIBLIA
7, 8. a) ¿Ximodo gucané ca xpinni Jiobá de dxiqué para gaca xiixa dxiiñaʼ especial? b) ¿Ximodo gucané ca xpinni Jiobá de dxiqué lu guiráʼ modo para gaca adorar Dios?
7 Lu Biblia zeeda caadxi ejemplu stiʼ ca xpinni Jiobá de dxiqué ni bidii de ni napa. Guyuu biaje, bidiicabe de ni nápacabe para gaca xiixa dxiiñaʼ especial. Casi Moisés la? guluu gana ca israelita gudiicaʼ donación para cuí tabernáculo, ne zaqueca biʼniʼ rey David para gurí yuʼduʼ que (Éx. 35:5; 1 Crón. 29:5-9). Tiempu bibani rey Jehoás, biʼniʼ chaahuiʼ ca sacerdote que lidxi Jiobá né bueltu ni bidii guidxi que (2 Rey. 12:4, 5). Lu primé siglu que, gunna ca xpinni Cristu caquiiñeʼ ca hermanu sticaʼ chuʼ tu gacané laaca purtiʼ nuu ti guendarindaana Judea. Biblia ná cada tobi gucané biaʼ napa (Hech. 11:27-30).
8 Guyuu biaje, ca xpinni Dios bidiicaʼ de ni nápacaʼ para gacanecaʼ cani zániru para gaca adorar Jiobá. Lu Ley ni gucuaa Moisés que ná qué ricaa ca levita que herencia, casi ricaa xcaadxi tribu. Ngue runi xcaadxi israelita que rudiicaʼ laacabe diezmu, nga nga gudiicabe chii ndaa de cani rudii layú stícabe. Ngue racané ni ca levita que gúnicaʼ dxiiñaʼ sticaʼ ndaaniʼ tabernáculo que sin chuʼcaʼ xizaa de xcaadxi cosa (Núm. 18:21). Caadxi iza despué, zacagá biʼyaʼ Jesús né ca apóstol stiʼ modo guca caadxi gunaa nachaʼhuiʼ purtiʼ bichaagacaʼ de ni nápacaʼ para gacanecaʼ laacabe (Luc. 8:1-3).
9. ¿Padé beeda ca donación ni bidii ca xpinni Dios de dxiqué?
9 Gadxé gadxé de ra beeda ca donación ni bidiicabe. Guzéʼtenu ti ejemplu, dxi chití tabernáculo que lu desiertu, ca israelita bidiicaʼ de ni nápacaʼ, zándaca lade cani zeʼ ca cosa ni bireenécabe de Egipto (Éx. 3:21, 22; 35:22-24). Lu primé siglu que, guyuu xpinni Cristu ni bitoo de cani napa casi layú o yoo, ne yenecaʼ bueltu que ra nuu ca apóstol. Ne laacaʼ gudiizicaʼ ni lu ca binni ni caquiiñeʼ ni (Hech. 4:34, 35). Xcaadxi ribeechucaʼ ti ndaa bueltu ne rudiicaʼ donación gatigá para gaca adorar Dios (1 Cor. 16:2). Ngue runi, guiráʼ ca xpinni Cristu dede cani jma ricu hasta cani jma pobre, rudiicaʼ biaʼ nápacaʼ (Luc. 21:1-4).
NI ZANDA GÚNINU TIEMPU RIʼ
10, 11. a) ¿Ximodo zanda gudiʼnu casi bidii ca xpinni Jiobá de dxiqué? b) ¿Ximodo runi sentirluʼ ora racaneluʼ gaca dxiiñaʼ stiʼ Reinu?
10 Tiempu riʼ, zándaca iquiiñeʼ donación para gaca xiixa dxiiñaʼ especial. Zándaca naguixhe congregación stinu guni chaahuiʼ Yoo stiʼ Reinu o gucuí tobi nacubi. O zándaca gusiénecabe laanu caquiiñeʼ bueltu para gaca chaahuiʼ sucursal, para ganda guiaxa guiráʼ gastu ni raca ra asamblea riuunu o para gacané ca hermanu despué de xiixa desastre natural. Laaca riquiiñeʼ cani rudiʼnu ca para gacané ni ca misioneru, ca precursor especial, ca superintendente de circuito ne ca hermanu ni runi dxiiñaʼ ra central mundial ne ndaaniʼ ca sucursal ni nuu lu guidubi Guidxilayú. Laaca nánnanu maʼ gudixhe congregación stinu guseendaʼ ti ndaa bueltu cada beeu para gacané cuiʼ jma Yoo stiʼ Reinu ne Salón de Asamblea para ca hermanu stinu ni nuu lu Guidxilayú.
11 Guiranu zanda gacanenu gaca dxiiñaʼ ni cayuni Jiobá lu ca últimu dxi riʼ. Stale de ca donación ca guirutiʼ ganna tu bidii cani, purtiʼ rusábanu cani ndaaniʼ ca caja ra riaba donación ni nuu ndaaniʼ Yoo stiʼ Reinu sin gudii xcaadxi cuenta o ruséʼndanu ni lu sitiu jw.org. Zándaca guiníʼ íquenu biaʼ donación rudiʼnu ca qué racanepeʼ ni stale. Peru stale de ca donación ni raca tiempu riʼ cadi zeeda cani de caadxi donación naroʼbaʼ, sínuque zeeda cani de stale donación nahuiiniʼ ni rudii cada tobi. Guiráʼ ca hermanu, dede cani napa huaxiéʼ, nácacaʼ casi ca xpinni Cristu de Macedonia ni guyuu lu primé siglu que. Laacaʼ gunábacaʼ gápacaʼ privilegiu de gudiicaʼ de ni nápacaʼ ne bíʼnicaʼ ni de guidubi ladxidoʼcaʼ neca huaxiéʼ nápacaʼ (2 Cor. 8:1-4).
12. ¿Xi runi organización stinu para iquiiñecaʼ ca donación ca jma jneza?
12 Runi Grupu ni Zaniruʼ stipa guʼyaʼ ximodo jma jneza iquiiñecaʼ bueltu stiʼ organización (Mat. 24:45). Ca hermanu riʼ runi orarcaʼ ne riníʼ ique chaahuicaʼ ximodo iquiiñecaʼ ni (Luc. 14:28). Dxiqué, tiempu gucuá Biblia ribícabe ca hombre ni ruzuubaʼ diidxaʼ para gúʼyacaʼ modo iquiiñeʼ bueltu stiʼ xquidxi Dios. Biiyacabe iquiiñeʼ bueltu que para si gaca adorar Jiobá. Casi dxi biguetaʼ Esdras Jerusalén ne ziné tesoro ni bidii rey de Persia, casi oro, plata ne xcaadxi cosa ni nisaca jma de 100 millón de dólar tiempu riʼ. Biiyaʼ Esdras ca cosa risaca riʼ casi ti donación para Jiobá, ngue runi bisiene chaahuibe cani ziné cani ximodo gápacaʼ cani neza zecaʼ purtiʼ nuu peligru (Esd. 8:24-34). Xcaadxi iza despué, bitopa apóstol Pablo bueltu para gacané ca hermanu de Judea ne biiyaʼ guiaaziʼ ni jneza cadi «nezalú Señor [Jiobá] si, sínuque ne nezalú binni» (biindaʼ 2 Corintios 8:18-21). Tiempu riʼ, zinanda organización stinu ejemplu stiʼ Esdras ne Pablo. Nga runi, rusiene chaahuicabe ximodo iquiiñeʼ ca donación ni rudii binni.
13. ¿Xiñee maʼ bichaa organización stinu modo runi dxiiñaʼ tiempu riʼ?
13 Nuu biaje, ruchaa caadxi familia modo riquiiñecaʼ bueltu sticaʼ para cadi guni gastu ca jma de biaʼ runi ganarcaʼ. O zándaca guyúbicaʼ modo guibánicaʼ ne huaxiéʼ cosa para gúnicaʼ jma lu xhiiñaʼ Jiobá. Zacagá cazaaca ndaaniʼ organización stiʼ Jiobá. Lu ca últimu iza riʼ, gudixhe íquecabe gúnicabe xcaadxi cosa risaca. Guyuu biaje guca jma gastu de biaʼ donación ni riuu. Pur nga cuyubi xquidxi Jiobá modo cadi gúnicaʼ stale gastu ne modo gúnicaʼ ca dxiiñaʼ ca jma nagueenda. Zacá jma jneza zaquiiñecabe ca donación risaca stinu.
XIMODO RACANÉ CA DONACIÓN STINU LAANU
Zanda gacanenu gaca dxiiñaʼ ni cayaca lu guidubi Guidxilayú riʼ né ca donación ni rudiʼnu. (Biiyaʼ párrafo 14 dede 16).
14-16. a) ¿Xi para riquiiñeʼ ca donación ni rudiʼnu? b) ¿Ximodo huayacané guiráʼ regalu ni maʼ bidii organización stinu lii?
14 Stale hermanu ni maʼ ziné stale iza de cayuni xhiiñaʼ Jiobá nacaʼ qué huadii organización stinu laaca stale regalu casi runi ni yanna. Ne nuu razón para guiníʼcabe zacá. Guzéʼtenu ti ejemplu, lu ca últimu iza gudiʼdiʼ ca guyuu sitiu jw.org ne canal JW Broadcasting. Ne laaca jma maʼ stale idioma nuu Traducción del Nuevo Mundo de las Santas Escrituras yanna riʼ que dxiqué. Ne lu iza 2014 ne 2015, guca caadxi asamblea internacional ni láʼ «Sigamos buscando primero el Reino de Dios» ndaaniʼ caadxi estadiu jma naroʼbaʼ ni nuu ndaaniʼ 14 guidxi lu guidubi Guidxilayú. Nabé guyuulaʼdxiʼ guiráʼ cani guyé asamblea que modo guca ni.
15 Stale tu rudii xquíxepeʼ pur ca cosa sicarú ni rudii organización stiʼ Jiobá laanu. Ti guendaxheelaʼ ni cayuni xhiiñaʼ Jiobá ndaaniʼ ti guidxihuiiniʼ stiʼ Asia, guniʼcaʼ sicaríʼ de canal de televisión ni nápanu: «Nuu biaje runi sentirdu nuudu zitu ne nagueenda rusiáʼndadu xi guiráʼ maʼ bireendú lu xhiiñaʼ Jiobá. Peru ora ridúʼyadu programa ni ridiʼdiʼ lu JW Broadcasting, nagueendaca rietenaláʼdxidu nápadu hermanu lu guidubi Guidxilayú. Raríʼ la? nabé nayecheʼ nuu ca hermanu ni nadxiinu pur JW Broadcasting. Nuu biaje runadiágadu laacabe guiníʼcabe racané ca programa ni ridiʼdiʼ guirá beeu ca laacabe guni sentírcabe nuucabe jma gaxha de cani nuu lu Grupu ni Zaniruʼ. Yanna riʼ, jmaruʼ si nayecheʼ nuucabe purtiʼ nuucabe ndaaniʼ organización stiʼ Dios».
16 Lu guidubi Guidxilayú, cabí ne cayaca chaahuiʼ biaʼ 2,500 Yoo stiʼ Reinu. Caadxi hermanu de Honduras bicaacaʼ sicaríʼ dxi maʼ chichuucaʼ ndaaniʼ Yoo stiʼ Reinu nacubi sticaʼ: «Guizáʼ nayecheʼ runi sentirdu purtiʼ nuudu ndaaniʼ ti familia ni napa Jiobá lu guidubi Guidxilayú riʼ ne purtiʼ nácadu tobi si né ca hermanu stidu. Pur nga, maʼ guca ni racaláʼdxidu maʼ xadxí, gápadu ti Yoo stiʼ Reinu ndaaniʼ guidxihuiiniʼ stidu». Stale tu riníʼ runi sentir zacá ora guicaa Biblia ne xcaadxi publicación lu stiidxaʼ, ora racanécabe laacaʼ ra guca xiixa desastre natural o ra gúʼyacaʼ xi guiráʼ cabeenducaʼ pur predicación ni raca ra nuu stale binni ne ca lugar ra jma ridiʼdiʼ binni ndaaniʼ xquídxicaʼ.
17. ¿Ximodo nánnanu racané Jiobá xquidxi tiempu riʼ?
17 Stale binni ni cadi naca testigu stiʼ Jiobá raca nagana laacaʼ guni crecaʼ xi guiráʼ randa rúninu né donación si ni rudii binni biaʼ naʼ ladxidóʼ. Yeganna ti ejecutivu ni runi dxiiñaʼ ndaaniʼ ti empresa tobi de ca imprenta stinu ne bidxagayaabe ora gúnnabe puru voluntariu runi dxiiñaʼ raqué, ne raca cani né donación ni rudii binni ne qué raca xiixa eventu para guidopa bueltu. Guniʼbe guizáʼ nagana para gaca ni rúninu ca. Ne dxandíʼ ni nabe ca. Nánnanu randa raca ni purtiʼ racané Jiobá laanu (Job 42:2).
NDAAYAʼ NI RICAANU PUR RUDIʼNU JIOBÁ DE CANI MAʼ BIDII LAANU
18. a) ¿Xi ndaayaʼ ricaanu ra gudiʼnu de ni nápanu para gacanenu gaca xhiiñaʼ Reinu? b) ¿Ximodo zanda gusíʼdinu ca xiiñinu ne cani nacubi ti laaca gudiicaʼ de ni nápacaʼ?
18 Rudii Jiobá laanu privilegiu ne oportunidad de gacanenu gaca dxiiñaʼ jma naroʼbaʼ stiʼ Reinu ni cayaca ca dxi stinu riʼ. Laabe cayábibe laanu pa gúninu ni la? zacaanu ndaayaʼ (Mal. 3:10). Ne laaca cudii stiidxabe ti binni ni rudii de ni napa zabeendú stale ni galán lu xquendanabani (biindaʼ Proverbios 11:24, 25). Ne laaca ziuʼnu jma nayecheʼ purtiʼ «jma nayeche ni rudii que ni ricaa» (Hech. 20:35). Ne laaca nápanu privilegiu de gusíʼdinu ca xiiñinu ne cani nacubi ximodo zanda gudiicaʼ de ni nápacaʼ pur cani rininu ne cani rúninu ne zacá guicaacaʼ stale ndaayaʼ.
19. ¿Ximodo maʼ guluu tema riʼ gana lii?
19 Guiráʼ ni nápanu zeeda cani de Jiobá. Ora rudiʼnu laabe de ni nápanu rusihuínninu nadxiinu laabe ne rudiʼnu xquíxepeʼ laabe pur guiráʼ ni maʼ bíʼnibe pur laanu (1 Crón. 29:17). Dxi bidii guidxi Israel donación para gacanecaʼ cuí yuʼduʼ stiʼ Dios, «guyuu guidxi que nayecheʼ purtiʼ de laacaʼ biale gudiicaʼ regalu, purtiʼ de guidubi ladxidoʼcaʼ nga bidiicaʼ regalu Jiobá» (1 Crón. 29:9). Laanu laaca cadi naquiiñeʼ gusaana de chuʼnu nayecheʼ ne guidxá tipa ladxidoʼno ora gudiʼnu Jiobá de ni maʼ bidii laanu.
