1, 2. a) ¿Xi ti cosa nabé risaca naquiiñeʼ ganna binni? b) ¿Xiñee nabé risaca guiénenu ni?

NI JMA risaca para stale binni nga gápacaʼ bueltu. Nga runi jma ricá íquecaʼ gápacaʼ cosa risaca o cadi guníticaʼ ni maʼ nápacaʼ. Para xcaadxi la? ni jma risaca para laacaʼ nga xfamíliacaʼ, chuʼcaʼ nazaaca ne ca cosa ni huabeenducaʼ lu xquendanabánicaʼ.

² Peru nuu sti cosa jma risaca que intiica de cani bizéʼtenu riʼ ne cadi naquiiñeʼ gusiáʼndanu ni: guihuinni Jiobá nga napa derechu para guni mandar. Pa qué gápanu laanu la? zanda gusaananu de gúʼyadxinu pabiáʼ risaca ni caninu riʼ pur ca cosa ni rúninu cada dxi o tantu chuʼnu xizaa pur ca guendanagana stinu. Ne nuu sti cosa, ra jma guiénenu Jiobá nga ni runi mandar ne pabiáʼ risaca ni, jma ziuʼnu listu para gudxíʼlunu ca guendanagana ni ridxaagalunu cada dxi ne jma naguidxi zaca amistad ni napanenu laabe.

3. ¿Xi guníʼ Binidxabaʼ de modo runi mandar Dios?

³ Bicaa Binidxabaʼ binni guiníʼ ique pa napa Dios derechu de guni mandar. Laa guníʼ qué rúnibe ni riniʼbe ora runi mandarbe, qué racaláʼdxibe guibáninu galán ne jma nayecheʼ zabani binni pa guni  mandar laca laa (Gén. 3:1-5). Laaca gucaláʼdxibe niniʼbe nin ti binni qué zaca leal Dios de guidubi ladxidóʼ, guiracaʼ zudxiidéchecaʼ modo runi mándarbe pa tiidicaʼ lu guendanagana (Job 2:4, 5). Nga runi, cudii Jiobá lugar tiidiʼ tiempu para guihuinni dxandíʼ ti cosa: nabé feu modo riluxe cani rudxiideche modo runi mandar Dios.

4. ¿Xiñee caquiiñeʼ guihuinni tuu nga napa derechu para guni mandar?

⁴ Nanna dxíchica Jiobá cadi dxandíʼ guiráʼ ni guníʼ Binidxabaʼ. Yanna, ¿xiñee qué huayuni chaahuibe guendanagana riʼ, sínuque cudiirube tiempu para guihuinni pa dxandíʼ ni o pa coʼ yaʼ? Purtiʼ nuu ca ángel ne binni guidxilayú lu guendanagana riʼ. Biblia ná: «Ti ganna binni lii, ni laluʼ Jiobá, lii si nga ni nuu jma luguiáʼ lu guidubi naca guidxilayú» (Salmo 83:18). Stale tu maʼ bicaanáʼ modo runi mandar Jiobá, cásica biʼniʼ primé pareja ni bibani lu guidxilayú. Zándaca gucaa ndiʼ caadxi binni guiníʼ ique napa Binidxabaʼ razón. Nga runi, laga caʼruʼ guiene chaahuiʼ binni ne ca ángel ni bizaaca riʼ, qué ziuu ca guidxi ca, raza, tribu, familia ne binni tobi si. Peru ora maʼ guihuinni Jiobá nga napa derechu guni mandar, qué zusaana de guibani guiráʼ xixenu xaʼnaʼ náʼ gobiernu stibe ne zabiguetaʼ chuʼ guiráʼ ni bizaʼbe tobi si (Efes. 1:9, 10).

5. ¿Ximodo riuʼnu pur derechu ni napa Jiobá de guni mandar?

⁵ Zahuinni jneza modo runi mandar Dios ne zahuinni qué ganna Binidxabaʼ nin binni guni mandar, ne pur nga zanitilucaʼ. Zuni ganar gobiernu stiʼ Dios pur Reinu mesiánicu. Para tiempu ca maʼ bisihuinni ca binni ruzuubaʼ diidxaʼ zanda chuʼcaʼ pur gobiernu stiʼ Jiobá ne qué zusaanacaʼ ni (Is. 45:23, 24). ¿Ñuuláʼdxinu ñuʼnu lade ca xpinni Dios ni ruzuubaʼ diidxaʼ riʼ la? Ñuuláʼdxinu pue. Para nga la? cadi naquiiñeʼ guiaandaʼ laanu ne guiénenu pabiáʼ risaca ni bizaaca riʼ.

6. ¿Pabiáʼ risaca guihuinni Jiobá nga napa derechu para guni mandar?

⁶ Casi maʼ bizéʼtenu, guihuinni napa Jiobá derechu para guni mandar nga ti cosa nabé risaca para binni guidxilayú. Jma risaca ni que chuʼ tutiica de laanu nayecheʼ. ¿Ñee riníʼ nga qué risaca ni cayúninu pur guilanu o qué rizaalaʼdxiʼ Jiobá laanu la? Coʼ. ¿Xiñee yaʼ?

7, 8. ¿Xiñee zahuinni napa Dios derechu guni mandar ora guni cumplir ca promesa stiʼ?

⁷ Nabé risácanu para Jiobá. Nadxiibe laanu stale, dede bidiibe lugar guixii rini stiʼ Xiiñibe para gulabe laanu ne ganda gápanu guendanabani ni qué zaluxe (Juan 3:16; 1 Juan 4:9). Pa qué ñuni cumplir Jiobá ca promesa stiʼ, ñapa Binidxabaʼ ti pretextu para niníʼ rusiguiibe, qué runi mandarbe jneza ne qué rinabe gudiibe ni galán binni. Ne laaca pur laani maʼ ñapa ca xhenemigu Dios jma razón, purtiʼ laacaʼ runi búrlacaʼ ne riniʼcaʼ: «Cadi na be zeeda be la? xi guca xa yanna caʼru gueeda be. Ma guti ca bixhoze gola du, peru ze ru guidxilayú cásica laa dxi nabani cabe ne dede dxi uyáʼ ni» (2 Ped. 3:3, 4). Pur nga la? ora guilá ca binni ni guzuubaʼ diidxaʼ, zuuyaʼ Jiobá gácani stobi de cani gusihuinni laabe nga nápabe derechu para guni mandarbe. Biblia ná: «Purtiʼ cásica riaba nisaguié ne nieve de guibáʼ; ne qué ribiguetaʼ cani ra biree cani dede ora guchii cani ca layú ca, ne pur laacani gudii ca layú ca ne guindani guixi lucaʼ, gudiicaʼ biidxiʼ ni gudxiibaʼ lucaʼ ne gudiicaʼ guendaró binni. Zacá zaca diidxaʼ guiniéʼ. Qué zabiguetaʼ ni ra nuaaʼ sin gaca ni, sínuque zuni ni ni racalaʼdxeʼ, ne dxandipeʼ zareendú ni biseendaʼ stiidxaʼ guni» (Isaías 55:10, 11). Ne pur modo runi mandar Jiobá rusihuinni nabé rannaxhii. Nga runi zanda chuʼnu seguru qué zusaanabe de gannaxhiibe ca xpínnibe ni qué gusaana laabe ne nabé zusisácabe laacaʼ (Éx. 34:6).

 ⁸ Gánnanu pabiáʼ risaca derechu ni napa Jiobá para guni mandar qué riníʼ diʼ nga qué risaca ni cayúninu pur guilanu o qué risácanu para Dios. Ni rúninu nga ridúʼyanu chuʼ cada cosa lugar stiʼ, derechu ni napa Jiobá para guni mandar ne ni cayúninu para guilanu. Naquiiñeʼ guiene chaahuinu ndiʼ para cadi gusaana de guyadxinu ni jma risaca ne chuʼnu pur modo runi mandar Jiobá.

9. ¿Xi guníʼ Binidxabaʼ de Job? (Biiyaʼ dibuju ni zeeda ra ruzulú tema riʼ).

⁹ Libru stiʼ Job nga tobi de ca libru jma nayooxhoʼ stiʼ Biblia, cani zeeda luni rusihuinni ximodo naquiiñeʼ guidúʼyanu ca cosa ca. Luni ridúʼndanu guníʼ Binidxabaʼ zudxiideche Job Dios pa gacaná stale. Gunábabe Jiobá laapeʼ guniná Job. Qué ñuni diʼ Dios ni, peru bidii lugar laabe guninabe siervu stiʼ para gutiidibe laa prueba. Gudxi Dios laabe: «Lu naluʼ nuu guiráʼ ni nápabe». Biblia ná: «Binidxabaʼ bicabi Jiobá ne ná: “Ridxibi si Job Dios la? Ñee cadi naguuluʼ ti leʼ ni rapa laabe, ni rapa lídxibe, ne ti leʼ ni rapa guiráʼ stibe la? Huaguuluʼ ndaayaʼ dxiiñaʼ rúnibe, ne maʼ bidale ca maniʼ stibe lu guidxilayú. Peru bisaana de gúniluʼ zacá ne bisigaanáʼ, gudaʼnaʼ guiráʼ ni nápabe, ne zuuyaʼ dxíchiluʼ zaguudibe lii nezaluluʼ”. Para gudxi Jiobá Binidxabaʼ: “¡Biaa! Lu naluʼ nuu guiráʼ ni nápabe. ¡Peru cadi gusigaanaluʼ para canuʼ laabe!”. Óraque biree Binidxabaʼ de ra nuu Jiobá» (Job 1:9-12). Ti ratuhuiiniʼ biniti Job guiráʼ ni napa, ca binni runi xhiiñaʼ ne chii xiiñiʼ ni nadxii. Gunda bicaa Binidxabaʼ Job guiníʼ ique casi ora Dios ngue napa donda pur ca yuubaʼ stiʼ (Job 1:13-19). De raqué bicaabe ti guendahuará yuudxuʼ Job ne naná guca ni para laa (Job 2:7). Ne para jmaruʼ si gacanabe la? xheelabe ne chonna hombre ni ná xhamigu laabe guleecaʼ gana laabe (Job 2:9; 3:11; 16:2).

10. a) ¿Ximodo bisihuinni Job qué nusaana Dios? b) ¿Xi qué ñúnibe jneza?

¹⁰ ¿Ñee dxandíʼ ngue ni guníʼ Binidxabaʼ que la? Coʼ, cadi dxandíʼ ni, purtiʼ qué nudxiideche Job Dios (Job 27:5). Peru, guyuu ti tiempu bisiaandaʼ Job xii nga ni jma risaca. Jma gucuá íquebe gusihuínnibe jma nacháʼhuibe ne dede gunábabe gusiénecabe laabe xiñee cadíʼdibe lu ca yuubaʼ que (Job 7:20; 13:24). Zándaca guiníʼ íquenu biaʼsi ngue ni bíʼnibe que pur guiráʼ yuubaʼ gudíʼdibe, peru biiyaʼ Dios caquiiñeʼ cuʼ jneza laabe. ¿Xi gudxi laabe yaʼ?

11, 12. a) ¿Xi biene Job pur gucané Jiobá laa? b) ¿Ximodo gucuaa Job ni yaʼ?

¹¹ Lu capítulo 38 dede 41 de libru stiʼ Job zeeda ca diidxaʼ ni gúdxibe laa, peru nin ti lugar cadi zeeda ra cusiénebe laa xiñee cadiʼdiʼ lu guiráʼ yuubaʼ que. Cadi ngue diʼ nga ni jma racalaʼdxiʼ Jiobá gusiene laabe, casi ora caquiiñepeʼ guni ni. Ni nuu Dios nga gacané Job guiene gastiʼ  nga laa nezalú Dios ora guchaagaʼ laa ne laabe. Ne gucanebe laa guiene nuu cosa ni jma risaca. Biblia ná: «¿Maʼ guníʼ ique chaahuiluʼ pabiáʼ naroʼbaʼ Guidxilayú ca la? Gudxi naa pa nánnaluʼ guiráʼ ndiʼ. ¿Paraa nuu neza ni ziné ra nuu biaaniʼ? ¿Ne paraa riaana gueelacahui, zanda chineuʼ ni dede ra naquiiñeʼ chindá ni ne gudxiguetuʼ ni lu neza para chindá ni ra bireeni la?» (Job 38:18-20). Pur ndiʼ la? bichaa Job modo ruuyaʼ ca cosa que.

¹² ¿Ñee naguídxipeʼ guca Jiobá ora guniʼné Job despué de maʼ biʼniʼ sufrir stale la? Coʼ, ne laaca qué ñuuyaʼ diʼ Job ni zaqué. Neca gudíʼdibe lu guiráʼ yuubaʼ que, bizulú biénebe xii ngue cayaca. Dede guniʼbe: «Racaʼ arrepentir pur cani guniéʼ, ne ribiéʼ lu yu dé ne dé ludé para gusihuinneʼ dxandipeʼ cayacaʼ arrepentir». Ngue runi biáʼsipeʼ ora guníʼ Jiobá ca diidxaʼ que ne gudixhedxí cani ladxidóʼ Job (Job 42:1-6). Ante de ngue maca guluu jneza ti joven láʼ Elihú laabe (Job 32:5-10). Biiyaʼ Jiobá modo gucuaabe ni ne guníʼ guyuulaʼdxiʼ ni bíʼnibe purtiʼ bizuubabe stiidxaʼ (Job 42:7, 8).

13. Neca maʼ gudiʼdiʼ ca guendanagana stiʼ Job, ¿ximodo guleendúrube ni galán pur ca diidxaʼ ni guníʼ Jiobá?

¹³ Guleenduruʼ Job ni galán pur ca diidxaʼ ni guníʼ Jiobá que neca maʼ gudiʼdiʼ ca guendanagana stiʼ. Dxandíʼ, guluu Jiobá ndaayaʼ Job sti biaje jma que ante, peru cadi nagueendaca gúpabe guiráʼ ni binítibe sti biaje. Gudiʼdiʼ tiempu dede ra gúpabe gadxe xiiñibe hombre ne chonna gunaa (Job 42:12-14). Zándaca bibanaʼ Job ca xiiñiʼ ni gutiʼ pur donda stiʼ Binidxabaʼ. Ne zándaca guyuu ora beedasilú laabe guiráʼ yuubaʼ gudíʼdibe que. Ne pa biénebe xi pur ngue gudíʼdibe ca prueba que la? zándaca guyuu ora gunabadiidxabe pa caquiiñepeʼ nidíʼdibe guiráʼ ni. Modo tiica si, zanda guiníʼ íquebe ca diidxaʼ ni gudxi Dios laabe. Ngue zacané laabe cadi guchaabe modo ruuyabe ca cosa que ne zaguixhedxí ni ladxidoʼbe (Sal. 94:19).

14. ¿Xi zanda guizíʼdinu de ni bizaaca Job?

¹⁴ Laanu laaca zanda gacané relatu stiʼ Job laanu para gúʼyanu ca cosa ca jneza ne para quixhedxí ni ladxidoʼno. Nga runi, gupa chaahuiʼ Jiobá ni «para usiidi laanu, ti pur laani gata dxí ladxidóʼ no ne cadi ixhacalaʼdxi nu. Ne zacá cadi guiaana nu de icá lú nu Dios» (Rom. 15:4). Ni rusiidiʼ ni laanu nga cadi guiníʼ íquenu stale lu ca cosa ni cazaacanu ne pur laani gusaana de gúʼyadxinu xii nga ni jma risaca: guihuinni Jiobá nga napa derechu para guni mandar. Ne cadi guiaandaʼ laanu ruluinu nuunu pur modo runi mandar Dios ora ruzúʼbanu diidxaʼ dede né lu ca guendanagana jma nadipaʼ, casi biʼniʼ Job.

15. ¿Xi ribeendunu ra ruzúʼbanu diidxaʼ ora tiidinu lu guendanagana?

¹⁵ ¿Xiñee ratadxí ladxidoʼno ora gánnanu pabiáʼ risaca nga guzúʼbanu diidxaʼ? Purtiʼ rusietenalaʼdxiʼ ni laanu cadi pur gana si racananu. Ca  prueba ca qué riníʼ diʼ cani cadxiichiné Dios laanu; óraca nga zanda gusihuínninu racaláʼdxinu guni mandar Dios laanu (Prov. 27:11). Pa guni huantarnu la? ziuuláʼdxiruʼ Jiobá cani gúninu ne jmaruʼ si zacá lunu ni chigudiibe laanu (biindaʼ Romanos 5:3-5). Historia stiʼ Job rusihuinni «nabé nadxii Jiobá ne riaʼ binni» (Sant. 5:11). Nga runi zanda chuʼnu seguru zaguube ndaayaʼ guiráʼ tu chuʼ pur derechu ni nápabe para guni mandarbe. Ora gánnanu ni racané ni laanu gápanu paciencia ne guiéchenu ora guni huantarnu intiica guendanagana (Col. 1:11).

16. ¿Xiñee risaca nga cadi guiaandaʼ laanu naquiiñeʼ guihuinni napa Jiobá derechu para guni mandar?

¹⁶ Dxandíʼ, raca nagana para laanu guiníʼ íquenu guiráʼ ora naquiiñeʼ guihuinni napa Jiobá derechu para guni mandar, jmaruʼ si ora maʼ qué guidxélanu xi gúninu lu xiixa guendanagana. Dede ca guendanagana nahuiiniʼ ca zanda guidúʼyanu cani naroʼbaʼ pa qué gusaana de guiníʼ íquenu cani. Nga runi, galán cadi guiaandaʼ laanu naquiiñeʼ chuʼnu pur derechu ni napa Jiobá para guni mandar ora maʼ cadídinu lu guendanagana.

17. Ra gúninu dxiiñaʼ ni maʼ bidii Jiobá laanu, ¿xiñee zacané ni para cadi gusaana de guyadxinu ni jma risaca?

¹⁷ Ora qué gusaana de gúninu dxiiñaʼ ni maʼ bidii Jiobá laanu zacané ni laanu cadi gusaana de guyadxinu ni jma risaca. Guidúʼyanu ti ejemplu. Ti hermana Testigu láʼ Renee gúpabe ti derrame cerebral, nabé naná ca yuubaʼ bidii laabe ne laaca gúpabe cáncer. Ora gudiicabe laabe tratamientu, runi predicarbe cani runi dxiiñaʼ ra hospital que, ca binni huará nuu raqué ne ca binni riganna laabe. Ti biaje biʼniʼ predicarbe ochenta hora chupa semana arondaʼ ni gútabe raqué. Qué nusaana de nusisácabe derechu ni napa Jiobá para guni mandar dede né ora maʼ chigátibe. Ne dede gucané nga laabe para cadi tan guni sentirbe yuubaʼ stibe.

18. ¿Xi rusiidiʼ experiencia stiʼ Jennifer laanu de ni ribeendú binni ora chuʼ pur derechu ni napa Jiobá para guni mandar?

¹⁸ Dxandíʼ, guiráʼ dxi ridxaagalunu guendanagana ni cadi naróʼbapeʼ, ne laaca racaláʼdxinu guiníʼ íquenu ni jma risaca nga guihuinni napa Jiobá derechu para guni mandar lúcani. Guzéʼtenu ejemplu stiʼ Jennifer, gulézabe chonna gubidxa ndaaniʼ ti aeropuertu para guicaabe avión guibiguétabe ra lídxibe. Tobi pur tobi de ca avión ni chiguiree que raca cancelar hora sticaʼ. Ni jma nagueenda ñúnibe nga ñabe laca laabe, purtiʼ stúbibe nuube raqué ne maʼ bidxágabe. Peru qué ñúnibe ni. Gunábabe Jiobá guluíʼ laabe xi gúnibe para gacanebe xcaadxi binni cabeza guiree avión que, ne laaca maʼ bireecaʼ gana. ¿Xi guleendube yaʼ? Guníʼnebe stale binni de Dios ne bisaanabe stale publicación. Laabe guniʼbe: «Neca nagana biiyaʼ ni bizaaca que, bineʼ sentir guluu Jiobá ndaayaʼ naa ne bidii stipa naa para gusisacaʼ lá casi naquiiñeʼ gaca ni». Rihuinni dxichi, qué nusaanabe de ñuuyadxibe ni jma risaca.

19. ¿Ximodo ruuyaʼ xquidxi Jiobá derechu ni nápabe para guni mandarbe?

¹⁹ Qué huasaana xquidxi Jiobá de guiene pabiáʼ risaca nga derechu ni napa Dios para guni mandar ne huayuucabe pur laani. Nga nga ni runi laacabe gadxé de religión ni cadi dxandíʼ. Cada tobi de laanu naquiiñeʼ chuʼ seguru ngaca cayuni, purtiʼ racaláʼdxinu guni adorarnu Jiobá jneza.

20. ¿Ximodo ruuyaʼ Jiobá ni rúninu para chuʼnu pur derechu ni nápabe de guni mandarbe?

²⁰ Rudii Jiobá cuenta ne rusisaca guiráʼ ni rúniluʼ para chuʼluʼ pur derechu ni nápabe para guni mandarbe laga cayúniluʼ ni nabe ne cayuni huantarluʼ intiica prueba (Sal. 18:25). Lu sti tema ca, zusiene chaahuinu xiñee naquiiñeʼ chuʼnu pur derechu ni napa Jiobá para guni mandar ne ximodo zanda gúninu ni.