1, 2. a) ¿Xi premiu cabeza ca xpinni Jiobá guicaacaʼ? b) ¿Xi zacané laanu cadi gusaana de guidúʼyadxinu premiu ni cudii Dios laanu? (Biiyaʼ dibuju ni zeeda ra ruzulú tema riʼ).

CÁSICA apóstol Pablo, ca xpinni Cristu ni bibí ni nuu yanna riʼ nápacaʼ ti oportunidad nabé sicarú de guicaacaʼ «premiu ni naguixhe Dios ibáʼ» (Filip. 3:14). Racaláʼdxicabe chuʼnécabe Jesús lu Reinu stiʼ ni nuu guibáʼ ne gacanécabe laa para gacaʼ binni perfectu (Apoc. 20:6). ¡Guizáʼ galán esperanza bidii Jiobá laacabe! Cani zeeda gaca de xcaadxi dendxuʼ gadxé ni cabézacaʼ guicaacaʼ. Cabézacabe guicaacabe ti guendanabani ni qué zaluxe casi premiu ndaaniʼ Guidxilayú riʼ ne ndiʼ nabé rusiecheʼ ni laacabe (2 Ped. 3:13).

² Para gacané Pablo ca hermanu ni bibí que guzuubacaʼ diidxaʼ ne guicaacaʼ premiu que la? gúdxibe laacaʼ ca diidxaʼ riʼ: «Laucaa ique ni nuu ibáʼ» (Col. 3:2). Cadi naquiiñeʼ nusiaandacabe esperanza sicarú ni nápacabe de guibánicabe guibáʼ, ni zeeda gaca casi herencia (Col. 1:4, 5). Pa cabézanu chuunu guibáʼ o guibáninu lu Guidxilayú, nanna dxíchinu ra guiníʼ íquenu guiráʼ ndaayaʼ ni maʼ bidii stiidxaʼ Jiobá ca xpinni zacané ni laanu cadi gusaanaʼ de gúʼyadxinu premiu ni chigudiibe (1 Cor. 9:24).

3. ¿Xidé gudixhená Pablo ca xpinni Cristu?

 ³ Laaca gudixhená apóstol Pablo ca hermanu stiʼ de caadxi peligru ni zanda gucueeza laacaʼ de guicaacaʼ premiu ni cudii Dios laacaʼ. Guzéʼtenu ti ejemplu, bicaabe ra nuu congregación ni nuu Colosas de caadxi binni ni riníʼ nácacaʼ xpinni Cristu peru cadi dxandíʼ, laacaʼ yenándacaʼ ni ná Ley para chuulaʼdxiʼ Dios ni rúnicaʼ lugar de ñápacaʼ fe Cristu (Col. 2:16-18). Laaca guníʼnebe laacaʼ de ca deseu inmoral, ca guendanagana ni gápacaʼ né xcaadxi xpinni Cristu ne ni gápacaʼ ndaaniʼ familia sticaʼ. Ca peligru riʼ nuuruʼ cani yanna, nga runi ca conseju bidii Pablo de laacani risácaruʼ cani. Nga runi, guidúʼyanu xi caadxi modo gudixhená Pablo ca xpinni Cristu de Colosas lu carta ni bicaa ra nuucabe.

4. ¿Xiñee zanda gucueeza ca deseu inmoral laanu de guicaanu premiu ni cudii Dios?

⁴ Bisietenalaʼdxiʼ si Pablo ca hermanu stiʼ de esperanza sicarú ni nápacaʼ, bicaa sicaríʼ: «Nga runi, lagaxha irá ni zeeda de guidxilayú ri ndaani ladxidóʼ to. Nin tobi de laatu cadi chuʼ né ni cadi xheelaʼ, nin guni gasti ni nadxabaʼ. Cadi chi nanda tu ni na ique tu, nin uluiʼlaʼdxi tu guni tu ni cadi jneza. Ne cadi nisi bidxichi ma cá ique tu gapa tu» (Col. 3:5). Ca deseu inmoral ca zanda gaca cani jma nadipaʼ ne guni laacani gunítinu ca tesoro espiritual, casi gaca xhamígunu Jiobá ne esperanza ni nápanu. Ti hermanu ni bidii lugar gucaa ca deseu inmoral ca laa guni ni cadi jneza ne despué biguetaʼ ndaaniʼ congregación guníʼ nabé nadipaʼ modo rucaa cani binni guni cani, ngue runi qué niníʼ ique pa malu ngue ni cayuni ne ora bidii cuenta mápeca biʼniʼ ni ne maʼ qué ñanda ñuni gastiʼ para nucueeza laa.

5. ¿Xi zanda gúninu para gápanu laanu ora guidxaagalunu xiixa ni gucaa laanu gucheʼnu?

⁵ Nabé risaca gatananu ne chuʼnu listu para gudxíʼlunu intiica si ni zanda gucaa laanu guchéʼnenu ca norma moral stiʼ Jiobá. Guzéʼtenu ti ejemplu, galán guni cani napa novio pa dede ora guzulucaʼ relación sticaʼ quíxhecaʼ xi nga ca cosa ni qué zúnicaʼ casi dede pabiáʼ zanda guidxíñacaʼ laacaʼ, gudiicaʼ bixiduʼ o chuʼcaʼ stúbicaʼ ti lugar (Prov. 22:3). Laaca zanda guidxaagalú ca xpinni Cristu xiixa guendanagana ora zecaʼ lu xiixa viaje de negocio ne nuucaʼ zitu de ra lídxicaʼ o ra gúnicaʼ dxiiñaʼ né ti gunaa o ti hombre (Prov. 2:10-12, 16). Pa chuʼ dxi guidxaagalunu tobi de ca guendanagana ni bizéʼtenu riʼ, guininu testigu stiʼ Jiobá laanu, gusihuínninu galán xpiaʼnu ne guietenaláʼdxinu xi guiráʼ guendanagana ridxaagalú tobi ora guni coquetear. Jma naquiiñeʼ gápanu cuidadu pa nuunu deprimidu o pa cayuni sentirnu nuunu nadá. Ora cayuni sentirnu zacá, zándaca chuuláʼdxinu chuʼ tuuxa gucaa laanu guni sentirnu caquiiñeʼ laanu. Zándaca gacaláʼdxinu chuʼ tuuxa ni guizaalaʼdxiʼ laanu dede gudiʼnu lugar guidxiña tutiisi binni laanu. Pa chuʼ dxi guizaacanu xiixa zacá, guinábanu Jiobá ne ca hermanu gacanecaʼ laanu para cadi gúninu xiixa ne guni laani gunítinu premiu ni cudii Dios laanu (biindaʼ Salmo 34:18; Proverbios 13:20).

6. ¿Xi naquiiñeʼ guiníʼ íquenu ora cuinu xiixa entretenimientu?

⁶ Para cadi lica guni sentirnu ca deseu inmoral ca, caquiiñeʼ gucáʼnanu ca entretenimientu inmoral. Stale de cani ridiʼdiʼ lu ca entretenimientu nuu yanna riʼ, rusietenalaʼdxiʼ cani laanu modo bibani ca binni de Sodoma ne Gomorra (Jud. 7). Ca binni ni ruuyaʼ modo gaca dxiiñaʼ de entretenimientu riʼ rucaacabe binni guiníʼ ique cadi malu nga gapa tuuxa relación sexual né tuuxa ni cadi xheelaʼ ne qué zápacaʼ guendanagana ni guniná laacaʼ pa gúnicaʼ ni. Cadi naquiiñeʼ guidúʼyadxisinu cani, naquiiñeʼ gatananu ne cadi guiníʼ íquenu qué zácanu gastiʼ pa gúninu cani. Pa qué gápanu cuidadu ora cuinu xiixa entretenimientu la? zanda gusaananu de guidúʼyadxinu premiu ni cudii Dios laanu (Prov. 4:23).

7. ¿Xi guendanagana zándaca chuʼ ndaaniʼ congregación?

⁷ Guiranu nánnanu ti ndaayaʼ nga chuʼnu ndaaniʼ congregación ra nuu ca xpinni Cristu. Ora runi estudiarnu Stiidxaʼ Dios lu ca reunión ca ne ra gacanésaanu né guendarannaxhii ne guendanachaʼhuiʼ racané cani para cadi gusaana de guidúʼyadxinu premiu ni cudii Dios laanu. Peru, nuu biaje zándaca guizaaca xiixa ni qué guiene tuuxa ne guni laani chúʼdinde ca hermanu. Pa qué guni chaahuinu ca guendanagana riʼ zanda guidaʼnu xiana (biindaʼ 1 Pedro 3:8, 9).

8, 9. a) ¿Xi cualidad zacané laanu guicaanu premiu ni cudii Dios laanu? b) ¿Xi zacané laanu chuʼnu tobi si pa guniná tuuxa hermanu laanu?

⁸ Pa gápanu xiana, ¿xi zúninu para cadi gucueeza ni laanu de guicaanu premiu ni cudii Dios laanu yaʼ? Gudxi Pablo ca binni de Colosas ca diidxaʼ riʼ: «Nadxii Dios laatu ne ulí laatu para laa. Nga runi laguiá binni ne lagaca nachaʼhui ne laacaʼ. Cadi udxiiba tu laca laatu, lagaca nadóʼ, cadi idxiichi tu neca uyubi cabe uchiichi cabe laatu. Cadi ixhacalaʼdxi saa tu, ne laguni perdonar ni guni stobi laatu. Casi bini perdonar [Jiobá] laatu, zacaca laguni. Peru jma naquiiñe ganaxhii saa tu, purti zacá zaca pe tu tobi si» (Col. 3:12-14).

⁹ Pa gannaxhiinu ne gácanu nachaʼhuiʼ zacané cani laanu guni perdonársaanu. Guzéʼtenu ti ejemplu, pa cayuniná ni guníʼ o ni biʼniʼ tuuxa hermanu laanu la? gúninu stipa pur guietenaláʼdxinu guyuu ora guninu o bíninu xiixa ni bichiichi tuuxa binni. ¿Cadi dxandíʼ rudiʼnu xquíxepeʼ ca hermanu pur bisihuínnicaʼ nadxiicaʼ ne nacháʼhuicaʼ né laanu ra biʼniʼ perdonarcaʼ laanu la? (Biindaʼ Eclesiastés 7:21, 22). Rudiʼnu xquíxepeʼ pur maʼ bisihuinni Jesús nachaʼhuiʼ ra biʼniʼ cani dxandíʼ runi adorar Dios tobi si (Col. 3:15). Guiranu nadxiinu ti Dios si, ti mensaje si runi predicarnu ne laaca ridxaagalunu stale guendanagana. Pa nadxiinu ca hermanu, zácanu nachaʼhuiʼ né laacaʼ ne zuni perdonársaanu, zacanenu chuʼ ca xpinni Cristu tobi si ne jma zacá íquenu guicaanu guendanabani ni chigudii Dios laanu casi premiu.

10, 11. a) ¿Xiñee malu nga gápanu envidia? b) Pa gápanu envidia, ¿ximodo zanda gucueeza ni laanu para cadi guicaanu premiu ni cudii Dios laanu?

¹⁰ Zándaca gunítinu premiu ni cudii Dios laanu pa gápanu envidia. Lu Biblia zeeda caadxi ejemplu ni cusihuinni xiñee malu ni. Guzéʼtenu caadxi ejemplu, gupa Caín envidia biʼchiʼ, Abel, ne biitibe laa. Gupa Coré, Datán ne Abiram envidia Moisés ne bicaalucaʼ laabe. Ne rey Saúl laaca gupa envidia de guirá ca cosa galán ni guleendú David ne gucalaʼdxiʼ ñuuti laabe. Qué ridxagayaanu ruzeeteʼ Biblia: «Purti pa cayó dí laatu [o nápatu envidia] xiñee didi stobi lú tu, ne cada tobi cuyubi para laa si la? qué zanda chuʼ tu tobi si, ne nisi zuni tu ni cadi jneza» (Sant. 3:16).

¹¹ Qué zápanu envidia pa gannaxhiinu ne gácanu nachaʼhuiʼ de guidubi ladxidoʼno. Stiidxaʼ Dios ná: «Pa nadxii lu stobi la? qué zadxiichi né gá lu laa, ne ziá lu laa. Pa nadxii lu stobi la? qué zuyubu tidu lú [o qué zapuʼ envidia laa]» (1 Cor. 13:4). Para cadi gudiʼnu lugar guicaa xcu envidia ndaaniʼ ladxidoʼno, caquiiñeʼ gúninu stipa pur guidúʼyanu ca cosa ca casi ruuyaʼ Jiobá cani. Naquiiñeʼ guiénenu cada tobi de ca hermanu ca zeeda gaca ti ndaa de ti cuerpu, ne nga nga congregación. Ndiʼ zacané laanu guiénenu ni runi sentírcabe casi ná ca diidxaʼ riʼ: «Pa chuʼ tu usisaca tindaa la? laca zieche né irá ca xcaadxi laa» (1 Cor. 12:16-18, 26). Nga runi, lugar de gápanu envidia, ziéchenu ora guicaa xcaadxi ndaayaʼ. Guiníʼ íquenu ni bizaaca Jonatán, xiiñiʼ rey Saúl. Qué ñápabe envidia David, purtiʼ gulí Jiobá laa para gaca rey lugar de nibí laabe. Ni biʼniʼ Jonatán nga bisihuinni nadxii laabe ne guca nachaʼhuiʼ, guluu gana laabe ne gucané laabe (1 Sam. 23:16-18). ¿Zanda chinándanu ejemplu stibe la?

12. ¿Xi conseju zeeda lu Biblia zacané familia stinu para guicaa premiu ni cudii Dios?

¹² Pa gúninu ni ná ca principiu ni zeeda lu Biblia ndaaniʼ familia stinu zápanu guendariuudxi ne ziuʼnu nayecheʼ, ne zacané ni laanu guicaanu premiu ni cudii Dios laanu. ¿Xi conseju bidii Pablo ca familia lu carta ni bicaa ra nuu ca xpinni Cristu de Colosas yaʼ? Sicaríʼ guniʼbe: «Hermana caʼ, lauzuuba stiidxa xheela tu, purti zacá naquiiñe guni ca xpinni Señor. Ne laatu, hermanu caʼ, laganaxhii xheela tu ne cadi aca né tu laaca naduxhuʼ. Ne laatu, baʼdu caʼ, lauzuuba stiidxa bixhoze tu ne jñaa tu de iráʼ, purti nga nga riulaʼdxi Señor. Hermanu caʼ, cadi uyubi tu uchiichi tu xiiñi tu, ti cadi iree ca gana» (Col. 3:18-21). Zándaca huayuuyaluʼ ximodo dede yanna cayacaneruʼ ca conseju riʼ ca hombre ne ca gunaa ni maʼ bichaganáʼ ne ca xiiñicaʼ.

13. ¿Xi zanda guni ti hermana para chuulaʼdxiʼ xheelaʼ guiziidiʼ ni dxandíʼ?

¹³ Guxuíʼlunu ti hermana ni cadi Testigu xheelaʼ, riníʼ ique cadi galán modo runi tratar xheelaʼ laa. ¿Ñee zuni chaahuibe guendanagana riʼ pa tindenebe laa pur xpiaʼ la? Pa gucaabe xheelabe guni ni racaláʼdxibe, ¿ñee zacanebe laa guni ni ná Jiobá la? Zándaca coʼ. Maʼ gadxé si zaca ni pa gusihuínnibe nápabe respetu xheelabe purtiʼ laa nga xaíque ndaaniʼ familia. Zacanebe chuʼ guendariuudxi ndaaniʼ familia stibe, zusisácabe Jiobá ne zándaca dede  ziuulaʼdxiʼ xheelabe guni ni ná Dios. Ne pa gaca ni zacá la? guirópacabe zanda guicaacabe premiu ni cudii Dios (biindaʼ 1 Pedro 3:1, 2).

14. ¿Xi naquiiñeʼ guni ti hermanu pa qué runi respetar xheelaʼ laa?

¹⁴ Guxuíʼlunu ti hermanu ni cadi Testigu xheelaʼ, riníʼ ique qué runi respetar xheelaʼ laa. ¿Ñee zuni respetar xheelabe laabe pa tindenebe laa para gusihuínnibe tu runi mandar ndaaniʼ lídxicabe la? Coʼ. Ribeza Jiobá chinándabe ejemplu stiʼ Jesús ne gannaxhiibe xheelabe (Efes. 5:23). Rusihuinni Cristu laa nga runi mandar congregación, peru rúnibe ni né guendarannaxhii ne paciencia (Luc. 9:46-48). Ti xpinni Cristu ni chinanda ejemplu stiʼ Jesús zándaca chuulaʼdxiʼ xheelaʼ guni ni ná Jiobá.

15. ¿Ximodo rusihuinni ti xpinni Cristu nadxii xheelaʼ?

¹⁵ Biblia cayabi ca hombre ni maʼ bichaganáʼ: «Ne laatu, hermanu caʼ, laganaxhii xheela tu ne cadi aca né tu laaca naduxhuʼ» (Col. 3:19). Ti xpinni Cristu ni nadxii xheelaʼ, rusisaca laabe ra gucaadiaga ora maʼ caniʼbe ne gusihuinni rusisaca ni guiniʼbe (1 Ped. 3:7). Neca cadi guiráʼ biaje zanda gúnibe ni guinabaʼ xheelabe laabe la? pa guinabadiidxabe xi riníʼ ique zacané ni laabe para guicaabe decisión jneza (Prov. 15:22). Ti hombre ni nadxii xheelaʼ qué rinabaʼ laabe guni respetarbe laa, sínuque runi ganar ni. Ora nadxii ti xpinni Cristu xheelaʼ ne ca xiiñiʼ, zándaca jma nayecheʼ zúnicabe ni ná Jiobá ne zacaacabe guendanabani ni cudii Dios casi ti premiu.

16, 17. Pa joven lii, ¿xi zanda guʼnuʼ para cadi guireeluʼ gana pur modo runi tratar bixhózeluʼ ne jñaaluʼ lii?

¹⁶ Zándaca nácaluʼ ti jovenhuiiniʼ ni biniisi ndaaniʼ ti familia ni naca xpinni Cristu ne riníʼ íqueluʼ qué riene jñaaluʼ ne bixhózeluʼ lii o naduxhunecaʼ lii. Zándaca pa guiníʼ íqueluʼ cucueezacabe lii de guʼnuʼ ni racaláʼdxiluʼ zucaa ni lii guiníʼ íqueluʼ cadi dxandíʼ ribani binni galán ora runi xhiiñaʼ Jiobá. Peru pa guixéleluʼ de ni dxandíʼ, qué zandaa zudiiluʼ cuenta guirutiʼ rizaalaʼdxiʼ lii jma que biaʼ rizaalaʼdxiʼ bixhózeluʼ ne jñaaluʼ lii ne ca hermanu ni nuu ndaaniʼ congregación.

¹⁷ Naquiiñeʼ uguu jneza binni xiiñiʼ. Pa qué niguu jnézacabe lii, ¿ñee qué ninabadiidxaluʼ pa dxandíʼ rizaaláʼdxicabe lii la? (Heb. 12:8). Peru zándaca ni ruchiichi lii nga modo riguu jnézacabe lii. Lugar de jma guiníʼ íqueluʼ nga, biʼniʼ stipa guiéneluʼ zándaca nuu xi rucaa laacabe gúnicabe ni zacá. Nga runi guleza, ne biʼniʼ stipa pur cadi guidxiichiluʼ. Biblia ná ti binni ni riene ne nuu xpiaaniʼ la? qué ridxiichi nagueenda ne nanna gucueeza laa (Prov. 17:27). Biʼniʼ stipa guiníʼ íqueluʼ casi ti binni ni riene, ricaa conseju gudiicabe laa ne qué ridxiichi ne ruyubi ximodo cueendú ni galán de laani sin guiníʼ ique ximodo bidiicabe ni laa (Prov. 1:8). Stale nga ni zabeenduluʼ pa jñaaluʼ ne bixhózeluʼ nácacaʼ xpinni Cristu ne dxandíʼ nadxiicaʼ Jiobá. Nanna dxíchinu racaláʼdxicabe gacanécabe lii ugaandaluʼ guendanabani ni cudii Dios casi ti premiu.

18. ¿Xiñee maʼ gudixhe íqueluʼ cadi gusaana de guyadxiluʼ premiu ni chigudii Dios?

¹⁸ Guiranu nápanu oportunidad de guicaanu premiu sicarú ni cudii Dios laanu: guibani tobi guibáʼ sin gatiʼ o guicaa ti guendanabani ni qué zaluxe ndaaniʼ Paraísu lu Guidxilayú riʼ. Zanda chuʼnu seguru de esperanza nápanu riʼ, purtiʼ ni bizáʼ laanu ca nga bidii stiidxaʼ ni. Laabe guniʼbe ximodo zaca guendanabani stinu ndaaniʼ Paraísu ca: «Guidxilayú riʼ zadxá típani de guiráʼ ni rusiidiʼ Jiobá» (Is. 11:9). Guiráʼ ni guibani lu Guidxilayú riʼ dxi ca, zusiidiʼ Dios laacaʼ. Risaca stipa ni gúninu pur guicaanu premiu ni chigudii Dios laanu. Nga runi, cadi gusaana de guyadxinu ca promesa stiʼ Jiobá. Cadi gudiʼnu lugar chuʼ xiixa ni gucueeza laanu de guicaanu premiu ni cudii Dios laanu.