1, 2. a) ¿Xi biʼniʼ sentir Jesús pur Ley stiʼ Dios? b) ¿Xiñee zanda guininu cadi jneza modo yenanda ca escriba ne ca fariseu Ley que?

GUNNAXHII Jesús Ley stiʼ Moisés. Ne qué ridxagayaanu ni, purtiʼ Ley que zeeda ni de Jiobá, Bixhózebe, binni ni jma risaca lu xquendanabánibe. Biblia maca bizeeteʼ pabiáʼ naroʼbaʼ cariñu zuni sentir Jesús pur ca ley stiʼ Dios né ca diidxaʼ riʼ: «Riecheʼ ora guneʼ ni naluʼ, Dios stinneʼ, ne nuu ca ley stiluʼ ca lugar jma nagaʼchiʼ napaʼ dentru de naa» (Sal. 40:8). Bisihuinni Jesús pur ni guníʼ ne pur cani biʼniʼ jneza Ley que ne racané ni binni, ne dxandipeʼ zaca cumplir ni (Mat. 5:17-19).

² Zándaca nabé guyuu Jesús triste ora biʼyaʼ cadi jneza modo zinanda ca escriba ne ca fariseu que Ley stiʼ Bixhoze. Dxandíʼ biʼniʼ ca xaíque yuʼduʼ que ca cosa ni jma nahuiiniʼ zeeda luni. Ngue runi gudxi Jesús laacabe: «Purti dede ca guixi rindáʼ naxhi casi menta ne anís ne cominu runi tu cani chii ndaa, ne rudii tu tindaa Dios». Peru ¿xi qué ñúnicabe jneza yaʼ? Laabe guniʼbe: «Peru qué rulabi tu ni jma naquiiñe guni tu ni zeeda lu ley. Ruchee né tu binni ne qué riá tu laacaʼ, ne qué runi cre tu Dios» (Mat. 23:23). Qué ñene ca fariseu que xi ná Ley ne guníʼ íquecaʼ jma risácacaʼ que xcaadxi. Peru Jesús biene xi guiráʼ nuu lu Ley ne laaca biene xi rusiidiʼ cada mandamientu que de Jiobá.

3. ¿Xi zazíʼdinu lu tema riʼ?

 ³ Laanu, ca xpinni Cristu, cadi zinándanu Ley stiʼ pactu que (Rom. 7:6). Yanna, ¿xiñee bidii Dios lugar guicá Ley riʼ lu Biblia yaʼ? Cadi gucuá diʼ ni para chuuláʼdxinu dede ca cosa ni jma nahuiiniʼ zeeda luni, sínuque gucuá ni para guiénenu ne chinándanu cani «jma naquiiñe» gúninu, laacani nga ca principiu ni zeeda luni. Guidúʼyanu ti ejemplu, ¿xi principiu rizíʼdinu ora runi estudiarnu de ca guidxi bixooñeʼ binni para guilá dxiqué? Lu tema gudídinu que bisiene xi caadxi cosa naquiiñeʼ guni ti binni ni cadi laapeʼ biʼniʼ pur guuti tuuxa para guiácabe laa. Tema riʼ zusiene xi rizíʼdinu de Jiobá pur ca guidxi ra bixooñeʼ binni para guilá dxiqué ne ximodo zanda gápanu ca cualidad stibe. Zacábinu chonna pregunta: ¿Ximodo bisihuinni ca guidxi ra bixooñeʼ binni para guilá dxiqué riáʼ Jiobá? ¿Xi rusiidiʼ cani laanu de modo ruuyabe guendanabani? Ne ¿ximodo rusihuinni cani guendaruni jneza stibe? Ra guidúʼndanu cada tobi de laacani guiníʼ íquenu ximodo zanda chinándanu ejemplu stiʼ Bixhózenu ni nuu guibáʼ (biindaʼ Efesios 5:1).

4, 5. a) ¿Xi rúnicabe para cadi gaca nagana chindá tuuxa ni guuti ndaaniʼ tobi de ca guidxi bixooñeʼ binni dxiqué, ne xiñee? b) ¿Xi rusiidiʼ ni laanu de Jiobá?

⁴ Biiyaʼ Jiobá cadi gaca nagana para chindácabe ndaaniʼ tobi de ca xhoopaʼ guidxi ra bixooñeʼ binni para guilá dxiqué. Biʼniʼ mandarbe chuʼ chonna guidxi cada ladu de guiiguʼ Jordán. Zaqué jma nagueenda ne cadi nagana para chindá binni ni biiti que ndaaniʼ tobi de laacani (Núm. 35:11-14). Naquiiñeʼ guʼyaʼ ca israelita que cadi gaca feu ca neza ni nuu para chindácabe ca guidxi que (Deut. 19:3). Ne laaca gupa ca judíu que costumbre guzuhuaacaʼ letreru para guluíʼ binni ni biiti que pa ladu cheʼ. Pur guyuu ca guidxi riʼ la? ni guuti que cadi caquiiñeʼ diʼ guxooñeʼ ndaaniʼ sti guidxi, ra zándaca guquiinde laa guni adorar dios ni cadi dxandíʼ.

⁵ Guiníʼ íquenu ndiʼ: biʼniʼ mandar Jiobá guuticabe binni ni guuti tuuxa, peru bidiibe lugar guiácabe ne gápacabe ti binni ni cadi laapeʼ guni pur guuti tuuxa. Ti hombre ni nanna de Biblia bicaa: «Nayaʼniʼ modo nexheʼ gaca guiráʼ ni, zanda guiene tobi cani ne cadi nagana cani. Zaqué nga rusihuinni Dios guendariáʼ». Cadi ti juez malu diʼ Jiobá ni cabeza si guni castigar ca xpinni. Ni rúnibe nga guizáʼ riabe laanu (Efes. 2:4).

6. ¿Xiñee maʼ gadxé guca ca fariseu que de modo naca Dios?

⁶ Gadxepeʼ guca ca fariseu que de Jiobá, laacaʼ qué ñacaʼ xcaadxi. Guidúʼyanu ti ejemplu, ti costumbre gupa ca judíu que nga qué rinacaʼ guni perdonarcaʼ tuuxa gucheené laacaʼ jma de chonna biaje pur ngueca guendanagana. Para gusihuinni Jesús cadi jneza modo rúnicabe la? guniʼbe ti historia ra cayuni orar ti fariseu ne ti ni ruquixe impuestu. Ni ruquixe impuestu que canabaʼ guiáʼ Dios laa. Peru fariseu que ná: «Rudiee diuxquixe lii, Dios, purti cadi naca casi ca  xcaadxi binni. Qué ribanaʼ, cadi malu naa, qué riuaa nia ni cadi xheelaʼ, ne nin cadi naca casi ni ruquixe impuestu riʼ». Guníʼ ique ca fariseu que cadi naquiiñeʼ guiacaʼ binni, purtiʼ rúnicaʼ laacaʼ jma nachaʼhuiʼ que xcaadxi (Luc. 18:9-14).

7, 8. a) Ora guniná tuuxa laanu, ¿ximodo zanda chinándanu ejemplu stiʼ Jiobá? b) ¿Xiñee caquiiñeʼ gácanu humilde para guni perdonarnu xcaadxi?

⁷ Qué chuʼ dxi gácanu casi ca fariseu, ni gúninu nga chinándanu ejemplu stiʼ Jiobá ne gusihuínninu guendariáʼ. Biblia ná: «Cadi gusaana de guni huantarsaatu, ne laguni perdonar de guidubi ladxidoʼto pa tuuxa napa xiixa queja né laatu. Cásica biʼniʼ perdonar Jiobá guiráʼ xixetu, zacaca laguni» (Colosenses 3:13, TNM). Ti modo gúninu ni nga guidúʼyanu cadi gaca nagana para xcaadxi guinábacaʼ perdón laanu (Luc. 17:3, 4). Guinabadiidxanu laca laanu: «¿Ñee ruluéʼ xcaadxi nuaaʼ dispuestu guneʼ perdonar laacaʼ guiráʼ biaje la? ¿Ñee racalaʼdxeʼ guneʼ chaahueʼ ca guendanagana ni gapaʼ né cani guniná naa la?».

⁸ Para guni perdonarnu la? naquiiñeʼ gácanu humilde. Qué niná ca fariseu que ñuni perdonarcaʼ xcaadxi binni purtiʼ guníʼ íquecaʼ jma risácacaʼ que laacabe. Peru laanu, ca xpinni Cristu, naquiiñeʼ gácanu humilde ra guiníʼ íquenu jma risaca xcaadxi que laanu ne gácanu nachaʼhuiʼ ra guni perdonarnu laacaʼ (Filip. 2:3). Guinabadiidxanu laca laanu: «¿Ñee zinandaʼ ejemplu stiʼ Jiobá ne cusihuinneʼ humilde naa la?». Pa gúninu zacá, qué zaca nagana para xcaadxi guinábacaʼ perdón laanu ne laaca cadi nagana zaca para laanu guni perdonarnu laacaʼ. Chuʼnu dispuestu gusihuínninu rianu guiráʼ ora ne cadi guidxiichinu nagueenda (Ecl. 7:8, 9).

9. ¿Ximodo gucané Jiobá ca israelita que gúʼyacaʼ pabiáʼ risaca guendanabani?

⁹ Ti razón nabé risaca pur guyuu ca guidxi ra bixooñeʼ binni para guilá dxiqué nga gapa ni ca israelita para cadi gápacaʼ donda pur guxhiicaʼ rini stiʼ tuuxa ni qué guzaabi gastiʼ (Deut. 19:10). Nadxii Jiobá guendanabani ne nanalaʼdxiʼ «náʼ cani ruxhii rini stiʼ cani qué guzaabiʼ gastiʼ» ne laapecaʼ gúnicaʼ ni (Prov. 6:16, 17). Cumu nácabe ti Dios ni runi ni jneza ne nayá la? para laabe cadi guendariguite nga guuti tuuxa ti binni, neca gácani pur ti accidente. Dxandíʼ, ziácabe ti binni ni cadi laapeʼ guni pur guuti. Peru neca zacá, napa xidé gábibe ca ancianu que xi bíʼnibe. Ne pa gúʼyacabe guti binni ca pur accidente la? napa xidé guiaanabe ndaaniʼ guidxi que dede dxi gatiʼ sumo sacerdote que. Nga riníʼ zándaca raqué guiaanabe biaʼ dxi guibánibe. Zaqué gucané Jiobá ca israelita gudiicaʼ cuenta pabiáʼ risaca guendanabani. Pur respetu nápacabe ni rudii guendanabani, naquiiñeʼ gápacabe stale cuidadu para cadi cúʼcabe xquendanabani xcaadxi ra naxoo pur ni gúnicabe o ni qué gúnicabe.

10. Casi guníʼ Jesús, ¿ximodo bisihuinni ca escriba ne ca fariseu qué nusisácacaʼ xquendanabani xcaadxi?

¹⁰ Qué ninanda ca escriba ne ca fariseu ejemplu stiʼ Jiobá. Bihuinni dxíchica qué nusisácacabe xquendanabani xcaadxi. Gudxi Jesús laacabe: «Purti casi ñaca naaze tu llave para guiene tu stiidxa Dios, peru qué na tu guiene tu, ne nin qué na tu udii tu lugar guiene  xcaadxi» (Luc. 11:52). Laacabe nga naquiiñeʼ ñacanécabe ca binni que ñénecaʼ Stiidxaʼ Dios ne nicaacaʼ guendanabani ni qué zaluxe. Lugar de ñúnicaʼ ngue gucaláʼdxicaʼ nucueezacaʼ laacabe para cadi sanándacabe Jesús, «ni rudii enda nabani» (Hech. 3:15). Pur ni bíʼnicabe riʼ, guluucabe laacaʼ ra naxoo ne ñándaca ninítilucaʼ. Ca xaíque yuʼduʼ riʼ qué lica nizaaláʼdxicaʼ xquendanabani binni ne laaca qué nizaaláʼdxicaʼ ñacanecaʼ laacabe ñuucabe galán, purtiʼ biyúbicaʼ puru para laasicaʼ ne bichacaʼ bi yánnicaʼ. ¡Guizáʼ bininácabe binni ne qué ñácabe laacaʼ!

11. a) ¿Ximodo bisihuinni Pablo biiyaʼ guendanabani cásica ruuyaʼ Jiobá ni? b) ¿Xi zacané laanu guidúʼyanu predicación cásica biʼyaʼ Pablo ni?

¹¹ Pa racaláʼdxinu gácanu casi Jiobá ne cadi casi ca xaíque yuʼduʼ que la? naquiiñeʼ guni respetarnu ne gusisácanu guendanabani. Ngapeʼ nga ni biʼniʼ apóstol Pablo, laa biʼniʼ predicar guiráʼ binni biaʼ gúndatiʼ. Ngue runi guníʼ: «Ma cadi naa diaʼ napa donda pa initilú tu» (biindaʼ Hechos 20:26, 27). Cadi biʼniʼ predicarbe para si cadi guni sentirbe nápabe donda o purtiʼ Jiobá biʼniʼ mandar laabe gúnibe ni. Bíʼnibe ni purtiʼ nadxiibe ca binni que ne rusisácabe xquendanabánicaʼ (1 Cor. 9:19-23). Laanu laaca naquiiñeʼ gúninu stipa pur guidúʼyanu guendanabani cásica ruuyaʼ Jiobá ni, purtiʼ laa racalaʼdxiʼ pa ñanda «guiráʼ ñaca arrepentir» (2 Ped. 3:9, TNM). ¿Ñee ngaca racaláʼdxiluʼ la? Pa gúninu stipa pur gusihuínninu guendariáʼ la? zuni predicarnu né stale gana ne ziuʼnu jma nayecheʼ.

12. ¿Xiñee nabé rusisaca ca xpinni Dios gápacaʼ laacaʼ para cadi gacanacaʼ?

¹² Sti modo gusihuínninu ridúʼyanu guendanabani cásica ruuyaʼ Jiobá ni nga gúninu ni ná ca ley ni caníʼ ximodo gapa tobi laa para cadi gacaná. Naquiiñeʼ gápanu cuidadu guiráʼ ora, casi ra gúninu dxiiñaʼ ne ora gusanu carru, dede né ora gúninu dxiiñaʼ de construcción ne mantenimientu ne ora chuunu reunión o asamblea. Jma risaca nga gápanu laanu ne chuʼnu nazaaca que gúninu stale dxiiñaʼ, gápanu bueltu o quíxhenu panda hora gúninu dxiiñaʼ. Qué rusaana Dios stinu de guni ni jneza ne runi ni caquiiñeʼ guni, laanu laaca racaláʼdxinu gácanu casi laabe. Ca ancianu nga naquiiñeʼ gápacaʼ laacaʼ primeru ti cadi guizaacacaʼ xiixa ne gápacaʼ cani nuu gaxha de laacaʼ (Prov. 22:3). Nga runi, pa gusietenalaʼdxiʼ ti ancianu laanu xiixa ley ni caníʼ ximodo gápanu laanu, naquiiñeʼ gucaʼdiáganu laabe (Gál. 6:1). Pa guidúʼyanu guendanabani casi ruuyaʼ Jiobá, qué zápanu «donda pur rini stiʼ tuuxa».

13, 14. ¿Xi naquiiñeʼ guni ca ancianu de guidxi Israel para gusihuínnicaʼ rúnicaʼ ni jneza cásica Jiobá?

¹³ Biʼniʼ mandar Jiobá ca ancianu que chinándacaʼ ca norma ni qué ruchee stiʼ. Ni naquiiñeʼ gúnicabe primé nga gúʼyacabe xi guiráʼ bizaaca. Despué, para gúʼyacabe pa naquiiñeʼ guiácabe binni ni biiti riʼ la? naquiiñeʼ guʼyaʼ chaahuicabe xi bicaa laabe gúnibe ni, ximodo laabe ne xi guiráʼ huayúnibe. Para gusihuínnicabe guendaruni jneza stiʼ Jiobá la? naquiiñeʼ gúʼyacabe pa bíʼnibe ni purtiʼ nanaláʼdxibe binni ca ne pa laapebe bíʼnibe pur guutibe laa (biindaʼ Números 35:20-24). Peru pa caquiiñepeʼ testigu la? zaquiiñeʼ neca chupa binni cheʼ de testigu para guihuinni pa dxandíʼ laapebe bíʼnibe pur guutibe tuuxa (Núm. 35:30).

¹⁴ Casi maʼ bidúʼyanu, ora maʼ biiyaʼ ca ancianu xi guiráʼ bizaaca naquiiñeʼ guiníʼ íquecaʼ binni que ne cadi ni bíʼnisibe. Caquiiñecabe guendariene, ndiʼ riníʼ naquiiñeʼ gúʼyacabe xiruʼ nuu luni para guiénecabe xipeʼ nga bizaaca. Ngue runi caquiiñeʼ gudii Jiobá laacabe espíritu santu stiʼ para ganda gusihuínnicabe riénecabe, riácabe ne rúnicabe ni jneza cásica runi ni (Éx. 34:6, 7).

15. ¿Ximodo biiyaʼ Jesús ca binni ruchee, ne ximodo biʼyaʼ ca fariseu que laacabe?

¹⁵ Ni jma biʼyaʼ ca fariseu que nga ni biʼniʼ binni ni bichee que ne cadi ni nuu ndaaniʼ ladxidóʼ, o modo naca. Guidúʼyanu xi bizaaca dxi guyé Jesús yetó ra lidxi Mateo. Gunabadiidxaʼ ca fariseu que ca discípulo stiʼ Jesús: «Xiñee zuba né jmaistru tu ca malu ni ruquixe  impuestu ne cani qué rulabi ley pue». Laabe bicábibe: «Cadi caquiiñe cani nazaaca doctor sínuque cani huará. Ndi nga ni gudxi Dios binni chiqué: “Jma racaladxe guiá tu binni, que guedané tu ni gusigaʼde tu naa”. Yanna cayabe laatu laché ne laiziidi xi na ca diidxa ca, purti cadi zeda yube cani nachaʼhui sínuque cani cuchee» (Mat. 9:9-13). ¿Ñee caníʼ Jesús gastiʼ naca nga guchee tuuxa la? Coʼ. Laabe gucaláʼdxibe ñaca arrepentircaʼ. Nguepeʼ nga ti cosa nabé risaca zeeda lu mensaje ni runi predicarbe que (Mat. 4:17). Peru Jesús nanna stale ne bidii cuenta nuu caadxi de «cani ruquixe impuestu ne xcaadxi ni qué rulabi ley» racaláʼdxicaʼ guchaacaʼ. Cadi guyebe ra lidxi Mateo para si gobe, sínuque stale de laacabe nácacabe xpinni Jesús (Mar. 2:15). Triste guininu ni, peru stale de ca fariseu de dxiqué qué ñuuyacaʼ ca binni que casi biʼyaʼ Jesús laacaʼ. Ruuyacabe ca binni que casi binni ruchee ne casi tuuxa ni maʼ qué zanda gaca chaahuiʼ. Gadxepeʼ guca ca fariseu que de Dios ni runi ni jneza ne ni riáʼ ni nacaʼ runi adorarcaʼ.

16. ¿Xii nga ni naquiiñeʼ guʼyaʼ chaahuiʼ ti comité judicial?

¹⁶ Tiempu riʼ, naquiiñeʼ guni ca ancianu stipa pur chinándacaʼ ejemplu stiʼ Jiobá, purtiʼ laa nadxii «guendaruni jneza» (Sal. 37:28). Primeru naquiiñeʼ guni investigar chaahuicabe pa dxandíʼ guca ti pecadu. Pa zacá ni la? óraque zinándacabe ca conseju zeeda lu Biblia ra cayete xi naquiiñeʼ gúnicabe (Deut. 13:12-14). Ca ancianu ni runi dxiiñaʼ lu comité judicial naquiiñeʼ gápacaʼ cuidadu ne gúʼyacaʼ pa maʼ guca arrepentir xpinni Cristu ni biʼniʼ pecadu naroʼbaʼ ca o pa coʼ. Nuu tiru zácani nagana. Nga runi naquiiñeʼ gúʼyacabe ximodo laabe, xi riníʼ íquebe de ni bíʼnibe ca ne xi nuu ndaaniʼ ladxidoʼbe (Apoc. 3:3). Para guiácabe binni ni bichee ca, naquiiñeʼ gusihuinni maʼ guca arrepentir. *

17, 18. ¿Ximodo zanda ganna ca ancianu pa dxandíʼ maʼ guca arrepentir tuuxa? (Biiyaʼ foto ni zeeda ra ruzulú tema riʼ).

¹⁷ Zanda guʼyaʼ Jiobá ne Jesús xi nuu ndaaniʼ ladxidóʼ tuuxa, peru ca ancianu ca coʼ. Nga runi, ¿ximodo zanda gúʼyacabe pa dxandíʼ maʼ guca arrepentir tuuxa yaʼ? Primé la? naquiiñeʼ guinábacabe Dios guendabiaaniʼ ne guendariene (1 Rey. 3:9). Guiropa, napa xidé iquiiñeʼ ca ancianu Biblia ne ca publicación ni rudii mozo ni nuu xpiaaniʼ para gúʼyacaʼ pa cayacaná ladxidóʼcabe «modo racaná cani qué runi cre Dios» o pa racaná ni «modo na Dios» ni ná ca diidxaʼ riʼ nga pa dxandíʼ maʼ guca arrepentirbe de guidubi ladxidoʼbe (2 Cor. 7:10, 11). Naquiiñeʼ gúʼyacabe xi ná Stiidxaʼ Dios de xi runi sentir, xi runi ne ximodo ti binni ni dxandíʼ maʼ guca arrepentir ne tobi ni caʼruʼ gaca arrepentir.

¹⁸ Guionna, naquiiñeʼ guiníʼ íquecabe ximodo binni ca, xi huayúnibe, xi bicaa laabe gúnibe ni ne xi qué zanda gúnibe. Maca bizeeteʼ Biblia de Jesús, Xaíque stiʼ congregación: «Qué zuni juzgarbe binni pur cani gúʼyasibe, qué zugaanibe donda íquecaʼ pur cani gunadiágasibe. Jneza zuni juzgarbe ca pobre, né jneza zulídxibe binni guidxilayú» (Is. 11:3, 4). Gulí Jesús ca ancianu para gápacaʼ congregación stiʼ ne zacanebe laacaʼ para guni juzgarcaʼ cásica modo runi juzgarbe (Mat. 18:18-20). Rudiʼnu xquíxepeʼ purtiʼ nápanu ancianu ni nadxii laanu, cani runi stipa pur chinánda ejemplu stiʼ Jesús. Pur nga, guizáʼ rusisácanu stipa rúnicabe sin guidxágacabe purtiʼ racanécabe xcaadxi gusihuinni guendariáʼ ne guendaruni jneza ndaaniʼ ca congregación stinu.

19. ¿Xi biziidiluʼ de ca guidxi ra bixooñeʼ binni para guilá dxiqué racaláʼdxiluʼ gúniluʼ lu xquendanabániluʼ?

¹⁹ Ley stiʼ Moisés que «rusiidi irá ni naquiiñe ganna binni ne irá ni dxandíʼ» de Jiobá ne de ca principiu ni jneza stiʼ (Rom. 2:20). Guzéʼtenu ti ejemplu, ca guidxi ra bixooñeʼ binni dxiqué rusiidiʼ cani ca ancianu guni juzgarcaʼ jneza. Laaca rusiidiʼ cani laanu cadi gusaana de gannaxhiinu ne guianu xcaadxi (Zac. 7:9). Neca maʼ cadi zinándanu Ley que, guendaruni jneza ne guendariáʼ ca risácaruʼ cani para Jiobá, purtiʼ laabe qué ruchaabe. ¡Ti ndaayaʼ naroʼbaʼ nga gúninu xhiiñaʼ Dios stinu! Nga runi, gúninu stipa pur gápanu ca cualidad sicarú stibe ne guyúbinu guilanu ra nuube.