1. ¿Xi rucaa ca canción ca laanu gúninu?

TI BIAJE, ti hombre ni nabé runibiáʼ binni laa pur letra stiʼ ca canción ni rucaa guníʼ rucaa ca diidxaʼ ca laanu guiníʼ íquenu, ne saa ca rucaa laanu guni sentirnu, peru ca canción ca rucaa cani laanu guni sentirnu ni riníʼ íquenu. Gástiruʼ sti cosa jma galán que «guni sentirnu» ni riníʼ íquenu de Jiobá, Bixhózenu ni nuu guibáʼ, ora maʼ cadúʼndanu ca diidxaʼ riuundaʼ stinu, ra zanda guininu diidxaʼ para gusisácanu laabe ne guininu pabiáʼ nadxiinu laabe. Laanu, ca xpinni Dios, nánnanu nabé risaca nga guidúʼndanu ora maʼ cayuni adorarnu Dios, pa stúbisinu o né ca hermanu de congregación.

2, 3. a) ¿Xi runi sentir caadxi ora gúʼndacaʼ reciu lade ca hermanu? b) ¿Xi pregunta zacábinu lu tema riʼ?

² Yanna, ¿ñee riuuláʼdxinu guidúʼndanu reciu lade ca hermanu la? o rituí lunu? Nuu cultura rituí lu ca hombre ca gúʼndacaʼ ora nuucaʼ lade binni. Pa gúnicabe zacá qué zacané ni congregación, jmaruʼ si pa nin gana ruundaʼ ca ancianu o gadxé ni maʼ cayúnicaʼ ora maʼ cayuundaʼ ca hermanu ( Sal. 30:12).

³ Pa dxandíʼ riénenu laaca cayuni adorarnu Jiobá nga ora maʼ cadúʼndanu ca diidxaʼ riuundaʼ ca, zúninu stipa chuʼnu para guidúʼndanu cani ra reunión. Guinabadiidxanu laca laanu: «¿Ximodo ruuyaʼ ora ridúʼndadu ra reunión yaʼ? ¿Xi zanda guneʼ  para guundaʼ né guendanayecheʼ sin guidxibeʼ yaʼ? ¿Ximodo zanda gusihuinneʼ dxandíʼ cayuneʼ sentir cani riete lu ca diidxaʼ riuundaʼ stidu yaʼ?».

4, 5. ¿Xiñee zanda guininu nabé bisaca para ca israelita que gúʼndacaʼ para guni adorarcaʼ Jiobá?

⁴ Maʼ raca stale siglu de riquiiñeʼ ca xpinni Jiobá saa para gusisácacaʼ Dios. Risaca gánnanu dxi bizuubaʼ ca israelita que diidxaʼ, tobi de ca cosa risaca ni bíʼnicabe para biʼniʼ adorárcabe Dios nga biindacabe. Casi dxi biʼniʼ organizar rey David modo gaca dxiiñaʼ ndaaniʼ yuʼduʼ, biʼniʼ nombrarbe 4,000 levita para gusisácacaʼ Dios né saa. De lade guirácabe, nuu 288 de laacabe ni guizáʼ nanna guʼndaʼ «para Jiobá» (1 Crón. 23:5; 25:7).

⁵ Dxi guca inaugurar yuʼduʼ que tobi de ca cosa nabé risaca ni bíʼnicabe nga bixhídxicabe saa ne biindacabe. Biblia ná: «Ne ora cani ruxhidxi trompeta ne cani ruundaʼ guyuucaʼ tobi si para gusisácacaʼ Jiobá ne gudiicaʼ xquíxepeʼ, ne ora rixidxi ca trompeta que reciu, ca címbalo, ne xcaadxi instrumentu ni riquiiñecabe para guxhídxicabe laga cusisácacabe Jiobá, [...] purtiʼ bidxá tipa guendanandxóʼ stiʼ Jiobá ndaaniʼ lidxi Dios ni dxandíʼ». Nanna dxíchinu, ni guca dxi riʼ biquidxi ni fe stiʼ ca israelita (2 Crón. 5:13, 14; 7:6).

6. ¿Ximodo biquiiñeʼ saa ne guendaruundaʼ tiempu naca Nehemías gobernador stiʼ Jerusalén?

⁶ Dxi bicuí ca israelita ni ruzuubaʼ diidxaʼ que ca muru stiʼ Jerusalén sti biaje, biiyaʼ Nehemías, gobernador que, chuʼ levita ni guʼndaʼ ne ni guxhidxi saa. Ora guca inaugurar ca muru que, gucané saa que para jmaruʼ si chúʼcabe nayecheʼ. Guyuu chupa coro naroʼbaʼ «para gudii xquíxepeʼ». Cada tobi guzá gadxé gadxé ladu de lu muru que dede ora bidxaagalúcabe gaxha de yuʼduʼ que. Guizáʼ reciu ruundacaʼ dede zitu runadiágacabe stídxicaʼ (Neh. 12:27, 28, 31, 38, 40, 43). Nanna dxíchinu, guyuulaʼdxiʼ Jiobá ora binadiaga cayuundaʼ ca xpinni para laa né stale guendanayecheʼ.

7. ¿Ximodo bisihuinni Jesús naquiiñeʼ guʼndaʼ ca xpinni para guni adorarcaʼ Dios?

⁷ Tiempu bibani Jesús, risácaruʼ ca diidxaʼ riuundaʼ que para guni adorárcabe Dios jneza. Gudixhe si Jesús modo gaca Guendaroxhi stiʼ Señor, gueelaʼ ni jma risaca, biindanebe ca discípulo stibe diidxaʼ riuundaʼ (biindaʼ Mateo 26:30).

8. ¿Xi ejemplu bisaana ca xpinni Cristu de primé siglu que para laanu?

⁸ Ca xpinni Cristu ni bibani lu primé siglu que bisaanacaʼ ti ejemplu para laanu ra bíʼndacaʼ juntu para guni adorarcaʼ Dios. Dxandíʼ maʼ cadi ndaaniʼ yuʼduʼ que nga ridagulisaacabe, sínuque ndaaniʼ lidxi tuuxa hermanu. Neca zaqué la? biindacabe né stale guendanayecheʼ. Gudxi apóstol Pablo ca xpinni Cristu ni guzané ca diidxaʼ riʼ casi gudxi espíritu santu ni laa: «Lausiidi saa ne laquixhená saa ne stale enda biaaniʼ. Laguunda salmo ne himno ne cantu sti Dios» ne lagudii xquixe (Col. 3:16). Zacaca nga naquiiñeʼ guidúʼndanu ca «cantu sti Dios» ni zeeda lu libru de diidxaʼ riuundaʼ stinu. Naca ca diidxaʼ riuundaʼ riʼ parte de guendaró espiritual ni rudii «mozo ni nuu xpiaani ne ni runi jneza» laanu (Mat. 24:45).

9. a) ¿Xiñee nuu tu laa ridxibi guʼndaʼ reciu ra reunión ne ra asamblea? b) ¿Ximodo naquiiñeʼ guidúʼndanu para Jiobá, ne tuu nga cani naquiiñeʼ gudii ti ejemplu galán? (Biiyaʼ foto ni zeeda ra ruzulú tema riʼ).

⁹ Zándaca nuu de laanu ridxibi guʼndaʼ purtiʼ qué gapa costumbre ca ndaaniʼ xfamilia o lu cultura stiʼ. O zándaca ora guchaaganu  modo ridúʼndanu ne modo ruundaʼ ca cantante profesional ni ruundaʼ lu radiu o lu televisión, guituí lunu o guiníʼ íquenu qué zanda guidúʼndanu. Peru cadi naquiiñeʼ gucueeza ni laanu de guni cumplirnu ni nexheʼ gúninu: guidúʼndanu para Jiobá. Ni naquiiñeʼ gúninu nga guindísanu libru de diidxaʼ riuundaʼ stinu luguiáʼ, guindisaʼ íquenu né guidúʼndanu de guidubi ladxidoʼno (Esd. 3:11; biindaʼ Salmo 147:1). Tiempu riʼ, ndaaniʼ stale Yoo stiʼ Reinu nuu pantalla ra rihuinni letra stiʼ ca diidxaʼ riuundaʼ stinu. Zacané cani laanu guidúʼndanu jma reciu. Ne risaca gánnanu yanna riʼ, maʼ né diidxaʼ riuundaʼ stiʼ Reinu zeeda lu programa stiʼ Scuela stiʼ xhiiñaʼ Reinu para ca ancianu. Ndiʼ rusihuinni pabiáʼ risaca gudii ca ancianu ti ejemplu galán ra gúʼndacaʼ ra reunión.

10. ¿Xi cadi naquiiñeʼ guiaandaʼ laanu pa ridxíbinu guidúʼndanu reciu?

¹⁰ Xcaadxi hermanu qué rinacaʼ gúʼndacaʼ reciu purtiʼ rituí lucaʼ guihuinni stídxicaʼ o purtiʼ riníʼ íquecaʼ cadi galán ruundacaʼ. Peru guiníʼ íquenu ndiʼ. Stale biaje «ruchéʼ nu» ora rininu peru cadi pur nga rusaananu de guininu (Sant. 3:2). Zacaca nga cadi naquiiñeʼ gusaananu de guidúʼndanu para Jiobá purtiʼ si cadi galán ridxi stinu.

11, 12. ¿Xi caadxi sugerencia zanda gacané laanu guidúʼndanu jma galán?

¹¹ Zándaca guidxíbinu ora guidúʼndanu purtiʼ cadi nuunu seguru ximodo gúninu ni. Guidúʼyanu caadxi sugerencia ni cadi nagana ni zanda gacané laanu gúninu ni jma galán. *

¹² Ti cosa ni zacané laanu guidúʼndanu reciu ne nadipaʼ nga guizíʼdinu guicaanu bi jneza. Cásica rudii biaaniʼ stipa ti foco, zacaca nga rudii bi ca stipa ridxi stinu para guininu o para guidúʼndanu. Naquiiñeʼ guidúʼndanu biaʼca reciu rininu (biiyaʼ ca sugerencia ni zeeda lu libru Benefíciese de la Escuela del  Ministerio Teocrático, yaza 181 hasta 184, lu subtítulo «Control del volumen de aire»). Ne Biblia peʼ cayabi ca xpinni Dios gucaacaʼ ridxi né stale guendanayecheʼ ora gúʼndacaʼ para laabe (Sal. 33:1-3).

13. Bizeeteʼ xi zanda gúninu para guidúʼndanu sin guidxíbinu.

¹³ Ora gápanu adoración en familia o ora nuunu stúbisinu, gúninu sicaríʼ: cuinu tobi de ca diidxaʼ riuundaʼ ni jma riuuláʼdxinu ne guidúʼndanu letra stini nadipaʼ né gana sin guidxíbinu; despué, guicaanu bi ne guininu ca diidxaʼ ca biaʼca reciu bidúʼndanu ni sin cuezadxinu; ne últimu la? guidúʼndanu ni né biaʼca gana bizulunenu (Is. 24:14). Jma reciu zaree stídxinu, ne nga nga ni jma galán. Cadi guidxíbinu ne cadi guituí lunu.

14. a) ¿Xiñee risaca guxheleʼ ruaanu xcaadxi ora guidúʼndanu? (Biiyaʼ cuadru ni láʼ « Ximodo gúʼndaluʼ jma galán»). b) Bizeeteʼ caadxi sugerencia ni zanda chinándanu para guni chaahuinu ca guendanagana ni rápanu pur ridxi stinu.

¹⁴ Para ganda guiree ridxi stinu reciu la? naquiiñeʼ guxheleʼ ruaʼnu xcaadxi. Nga runi sti sugerencia ni zanda chinándanu ora guidúʼndanu nga guxheleʼ ruaʼnu xcaadxi jma que ora rininu. ¿Peru pa rábinu chaahuiʼ ridúʼndanu o nalásepeʼ ridxi stinu yaʼ? Zadxélanu sugerencia para guni chaahuinu ca guendanagana riʼ lu libru Benefíciese de la Escuela del Ministerio Teocrático, yaza 184, lu cuadru ni láʼ «Cómo superar problemas específicos».

15. a) ¿Xi anunciu guca lu reunión ni raca cada iza ni guca lu 2016? b) ¿Xiñee guca revisar libru de diidxaʼ riuundaʼ stinu?

¹⁵ Lu reunión ni raca cada iza stiʼ Watch Tower Bible and Tract Society of Pennsylvania ni guca lu iza 2016, guca ti anunciu ni nabé bisiecheʼ laacabe. Hermanu Stephen Lett, ni nuu lu Grupu ni Zaniruʼ guníʼ maʼ nuu ti libru de diidxaʼ riuundaʼ nacubi. Zaree lani Guidúʼndanu né guendanayecheʼ para Jiobá. Bisiene hermanu Lett tobi de ca razón para guca revisar libru de diidxaʼ riuundaʼ ni maca nuu que nga para cheʼ ca diidxaʼ ni biquiiñeʼ lu revisión ni guca lu diidxaʼ inglés iza 2013 stiʼ Traducción del Nuevo Mundo  de las Santas Escrituras luni. Nga riníʼ naquiiñeʼ cueecabe o guchaacabe ca diidxaʼ ni maʼ cadi zeeda lu revisión riʼ. Ne laaca guluucabe xcaadxi diidxaʼ riuundaʼ ni caníʼ de predicación ne ra cudiicabe xquíxepeʼ pur sacrificiu stiʼ Jesús. Ne cumu nabé risaca nga guidúʼndanu para guni adorarnu Dios la? gudixhe ique Grupu ni Zaniruʼ guni ti libru de ni jma galán ni gapa pasta cásica stiʼ Traducción del Nuevo Mundo ni guca revisar.

16, 17. ¿Xi bidxaa lu libru de diidxaʼ riuundaʼ nacubi stinu?

¹⁶ Para cadi gaca nagana para laanu iquiiñenu libru de diidxaʼ riuundaʼ nacubi riʼ la? nexheʼ chaahuiʼ ca diidxaʼ riuundaʼ riʼ pur tema. Guzéʼtenu ti ejemplu, ca primé 12 diidxaʼ riuundaʼ stini caníʼ cani de Jiobá, ne xi xhono ni zeeda despué caníʼ cani de Jesús ne de sacrificiu stiʼ, ne zacá nexheʼ chaahuiʼ cani. Lu libru de diidxaʼ riuundaʼ riʼ zeeda ti lista lu ca primé yaza stini ra zeeda lá ca diidxaʼ riuundaʼ ca. Racané ni para ganda guidxela xi diidxaʼ riuundaʼ iquiiñeʼ ora rudiicabe ti discursu públicu.

¹⁷ Para ganda guidúʼndanu de guidubi ladxidoʼno la? cadi nagana modo gucuá letra stiʼ caadxi diidxaʼ riuundaʼ ti ganda guiénenu cani ne ganda guidúʼndanu cani. Guidúʼyanu ti ejemplu, diidxaʼ riuundaʼ ni láʼ «Gudiʼnu xquíxepeʼ Jiobá» yanna riʼ lani «Ti oración para gudiʼnu xquíxepeʼ Dios». Laaca bidxaa caadxi diidxaʼ ni maʼ qué riquiiñepeʼ binni yanna, casi lu diidxastiá bichaacabe diidxaʼ «por doquier». Ne laaca biʼniʼ chaahuicabe letra stiʼ stale de ca diidxaʼ riuundaʼ ca para ganda guiaba ti sílaba stiʼ ca diidxaʼ ca lu cada nota sti saa ca. Stobi de ca diidxaʼ riuundaʼ ni bichaacabe lá ne letra stiʼ nga «Gupa chaahuiʼ ladxidoʼloʼ», yanna riʼ lani «Gapa chaahuinu ladxidoʼno». Guca cani pur ca hermana, ca joven ne ca binni nacubi cayé reunión ne asamblea. Ora maʼ cayuundacabe diidxaʼ riuundaʼ riʼ, casi ora ñábicabe xcaadxi xi naquiiñeʼ gúnicaʼ, ne zándaca pur nga qué guni sentírcabe galán.

18. ¿Xiñee caquiiñeʼ gunibiáʼ chaahuinu ca diidxaʼ riuundaʼ ni zeeda lu libru cubi stinu yaʼ? (Laaca zanda gúʼyaluʼ nota).

¹⁸ Stale de ca diidxaʼ riuundaʼ ni zeeda lu libru Guidúʼndanu né guendanayecheʼ para Jiobá gucuá cani casi ñaca cani ti oración para Dios. Racané cani laanu para gábinu laabe ni cayuni sentirnu. Xcaadxi diidxaʼ riuundaʼ rucaa cani laanu cuʼnu gana xcaadxi hermanu para gusihuínnicaʼ guendarannaxhii ne gacanecaʼ xcaadxi (Heb. 10:24). Nga runi galán nga gunibiáʼ chaahuinu saa stiʼ cani, modo riuundaʼ cani ne letra stiʼ cani. Para ganda gúninu ni zanda gucaʼdiáganu cani lu versión ra ruundacabe cani ni nuu lu jw.org. Pa guni ensayarnu cani ra lídxinu la? zazíʼdinu guidúʼndanu cani sin guidxíbinu ne zúninu ni de guidubi ladxidoʼno. *

19. Laanu cani nuunu ndaaniʼ congregación, ¿ximodo zanda gacanenu gaca adorar Jiobá?

¹⁹ Cadi guianda laanu nabé risaca nga guidúʼndanu ora maʼ cayuni adorarnu Dios. Laani nga ti modo nabé risaca guluinu Jiobá nadxiinu laa ne rudiʼnu xquíxepeʼ laa (biindaʼ Isaías 12:5). Ora ridúʼndanu né guendanayecheʼ, né stale gana racanenu xcaadxi guni zacaca. Guiráʼ cani nuu ndaaniʼ congregación, pa nácanu joven, huaniisi o pa nacúbinu la? zanda gacanenu para gaca adorar Dios zacá. Nga runi, cadi gucueeza gastiʼ laanu de guidúʼndanu para laabe de guidubi ladxidoʼno. Chinándanu ni ná mandatu riʼ: «Laguundaʼ para Jiobá». ¡Guidúʼndanu né guendanayecheʼ para Jiobá! (Sal. 96:1).