1, 2. a) ¿Ximodo nga guendariuudxi zanda gápanu tiempu riʼ? b) ¿Xiñee qué ganda gapa guiráʼ binni guendariuudxi? (Biiyaʼ foto ni zeeda ra ruzulú tema riʼ).

GUIRANU riuuláʼdxinu guibáninu ne guendariuudxi sin chuʼnu xizaa. Guizáʼ rudiʼnu xquíxepeʼ Jiobá pur rudii laanu guendariuudxi ni zeeda de Dios. Laani nga ni riguixhedxí ladxidoʼno ne racané ni para cadi guni sentirnu o guiníʼ íquenu cosa ni cuʼ xizaa laanu (Filip. 4:6, 7). Ne cumu maʼ bidiʼnu xquendanabáninu Jiobá la? «ma nuu né nu Dios tobi si», o maʼ xhamígunu laabe (Rom. 5:1).

² Yanna, caʼruʼ guedandá dxi guedané Dios guendariuudxi para guiráʼ binni. Nabáninu lu ca últimu dxi ne pur nga nuu stale guendanagana ne binni ni ruyubi tinde (2 Tim. 3:1-4). Laanu ca xpinni Cristu napa xidé gudxíʼlunu Binidxabaʼ ne cani cadi dxandíʼ rusiidiʼ (2 Cor. 10:4, 5). Peru ni zándaca gucaa laanu cadi gápanu guendariuudxi nga ca familia stinu ni cadi testigu stiʼ Jiobá. Zándaca nuu tu laa guni burla laanu pur ni runi crenu  o guiniʼcaʼ nápanu donda pur ribiá familia. Dede zándaca gábicaʼ laanu zusaana de gaca xfamíliacaʼ laanu. ¿Xi naquiiñeʼ gánnanu de ora gucaalú familia stinu laanu? ¿Xi zanda gúninu pa nápanu guendanagana riʼ yaʼ?

3, 4. a) ¿Xi zucaa cani bisiidiʼ Jesús binni guni? b) ¿Pora nga jma nagana gaca tuuxa xpinni Jesús?

³ Nanna Jesús qué ziuu binni tobi si pur cani gusiidiʼ ne naquiiñeʼ gapa ca discípulo stiʼ valor purtiʼ zucaalúcabe laacaʼ. Ne pur laani zándaca maʼ qué ziuu ca familia tobi si. Jesús guníʼ: «Cadi zácaxa tu zeda gune binni guidxilayú tobi si, purti cadi nga zeda gune sínuque casi ñaca zedaniá ti espada. Purti zeda ndaa saa hombre ne bixhoze, ne badu dxaapa ne jñaa, ne gunaa ne suegra. Ne ca binni lidxi pe hombre zaca nanalaʼdxi laa» (Mat. 10:34-36).

⁴ ¿Xiñee guníʼ Jesús: «Cadi zácaxa tu zeda gune binni guidxilayú tobi si» yaʼ? Purtiʼ ni racaláʼdxibe nga guiníʼ ique binni xi guiráʼ zadxaagalú cani gacaʼ xpínnibe. Peru ni jma gucuá ique Jesús nga gusiidiʼ «xii nga ni dxandíʼ», cadi guxheleʼ binni de familia stiʼ (Juan 18:37). Peru zanda guizaaca ni. Ngue runi bisiidiʼ Cristu ziuu ora zaca nagana gaca tuuxa discípulo stiʼ, jmaruʼ si ora qué riuulaʼdxiʼ ca xhamígucaʼ o ca familia sticaʼ guiziidiʼ ni dxandíʼ.

5. ¿Xi guiráʼ maʼ biʼniʼ huantar ca discípulo stiʼ Jesús?

⁵ Jesús guníʼ napa xidé chuʼ ca discípulo stiʼ dispuestu gacanacaʼ ora gucaalú familia sticaʼ laacaʼ ne xcaadxi cosa guidxaagalucaʼ (Mat. 10:38). Stale de cani maʼ guca xpinni Cristu huayuni huantarcaʼ burla dede né ora rucaanáʼ familia sticaʼ laacaʼ. Peru jma stale ni huabeendúcabe que ni huaníticabe (biindaʼ Marcos 10:29, 30).

6. ¿Xi cadi naquiiñeʼ guiaandaʼ laanu pa rucueeza familia stinu laanu de gúninu ni ná Jiobá?

⁶ Qué zusaananu de gannaxhiinu familia stinu pur rucueezacaʼ laanu de gúninu ni ná Jiobá. Peru cadi guiaandaʼ laanu ni jma risaca para laanu nga gannaxhiinu Jiobá ne Cristu (Mat. 10:37). Laaca naquiiñeʼ guietenaláʼdxinu zanda iquiiñeʼ Binidxabaʼ cariñu ni nápanu familia stinu para gusaana de gúninu ni ná Jiobá. Guininu de caadxi cosa ni zándaca guidxaagalunu ne ximodo gudxíʼlunu cani.

7. ¿Xi naquiiñeʼ guni cani cadi Testigu xheelaʼ?

⁷ Biblia ná «zaca ni nagana» para cani guichaganáʼ (1 Cor. 7:28). Peru pa cadi ti testigu stiʼ Jiobá xheelanu la? zándaca jma zápanu guendanagana lu xquendaxheelanu. Neca zacá, naquiiñeʼ guidúʼyanu xquendaxheelanu cásica ruuyaʼ Jiobá ni. Pa qué náʼ xheelanu guni ni ná Jiobá la? cadi pur nga guiníʼ íquenu gusaananu laa o gaca divorciarnu (1 Cor. 7:12-16). Ti gunaa xpinni Cristu naquiiñeʼ guni respetar xheelaʼ casi xaíque neca cadi cudii ni caquiiñeʼ familia stiʼ en sentidu espiritual. Zaqueca nga ti hombre xpinni Cristu, naquiiñeʼ gannaxhii xheelaʼ ne gapa laabe né cariñu neca cadi ti xpinni Cristu xheelaʼ (Efes. 5:22, 23, 28, 29).

8. ¿Xi zanda guinabadiidxanu pa gacalaʼdxiʼ xheelanu ni cadi Testigu quixheʼ pabiáʼ si zanda gúninu lu xhiiñaʼ Jiobá?

⁸ ¿Xi zanda gúninu pa gacalaʼdxiʼ xheelanu ni cadi Testigu quixheʼ pabiáʼ si zanda gúninu lu xhiiñaʼ Jiobá yaʼ? Guzéʼtenu ti ejemplu, ti hermana riʼ cadi Testigu xheelaʼ, hombre riʼ gudixhe panda si dxi zanda guni predicarbe ndaaniʼ semana. Pa guizaacanu ni bizéʼtenu riʼ, guinabadiidxanu: «¿Ñee canabaʼ xheelaʼ naa gusaanaʼ de guneʼ adorar Jiobá la? Pa cadi zacá ni, ¿ñee zanda guneʼ ni canábabe naa la?». Pa gácanu binni ni riuu razón zanda gacané ni cadi gápanu guendanagana (Filip. 4:5).

9. Pa cadi Testigu xheelaluʼ, ¿ximodo zanda gacaneluʼ ca xiiñiluʼ gusisácacaʼ laabe?

 ⁹ Zándaca zaca nagana para laanu gusiniisinu xiiñinu pa qué runi xheelanu ni ná Jiobá. Guzéʼtenu ti ejemplu, napa xidé gusíʼdinu laacabe gúnicabe ni ná mandatu ni zeeda lu Biblia ra ná gusisácacabe bixhózecabe ne jñaacabe (Efes. 6:1-3). Peru ¿pa qué runi xheelanu ni ná ca norma ni zeeda lu Biblia lu xquendanabani yaʼ? Gácanu ti ejemplu ra gusisácanu laabe. Guidúʼyanu ca cualidad galán ni nápabe ne gusihuínninu rusisácanu ca cosa galán ni rúnibe. Cadi guininu mal de laabe nezalú ca xiiñinu. Ni naquiiñeʼ gúninu nga gusiénenu laacaʼ cada binni nga naquiiñeʼ cuí pa zuni ni ná Dios o pa coʼ. Pa gapa ca xiiñinu ti conducta galán zanda gacané ni xheelanu para chuulaʼdxiʼ gunibiáʼ Jiobá.

10. ¿Xi zanda guni ti xpinni Cristu ni cadi Testigu xheelaʼ para gusiidiʼ ca xiiñiʼ de Jiobá?

¹⁰ Zándaca hombre o gunaa ni cadi Testigu riʼ gacalaʼdxiʼ cheʼ ca xiiñiʼ saa ni cadi zeeda de ca xpinni Cristu o guiziidiʼ xiixa creencia ni rusiidiʼ religión ni cadi dxandíʼ. Nuu hombre ni cadi Testigu zándaca guinabaʼ xheelaʼ cadi gusiidiʼ ca xiiñiʼ ni zeeda lu Biblia. Peru neca zacá, hermana riʼ runi stipa pur gusiidiʼ ca xiiñiʼ ni dxandíʼ zeeda lu Biblia (Hech. 16:1; 2 Tim. 3:14, 15). Guzéʼtenu ti ejemplu, zándaca hombre riʼ guinabaʼ xheelaʼ cadi gusiidiʼ ca xiiñiʼ ni nahuiiniʼ de Biblia ne cadi chiné laacabe reunión. Neca zuni respetar hermana riʼ decisión stibe, zanda guiniʼné laacabe de ni runi cré cada biaje gapa oportunidad. Zacá zusiidibe ca xiiñibe de Jiobá ne de ca norma stiʼ (Hech. 4:19, 20). Dxandíʼ ra tiidiʼ tiempu laacabe nga guicaacabe  decisión pa zúnicabe ni ná Jiobá o pa coʼ (Deut. 30:19, 20). *

11. ¿Xi pur zándaca gápanu guendanagana né ca familia stinu ni cadi naca Testigu?

¹¹ Ora guzulunu guni estudiarnu Biblia né ca testigu stiʼ Jiobá, zándaca qué ñábinu gastiʼ xfamílianu. Peru ora bíʼyanu jma maʼ naguidxi nuu fe stinu la? bidiʼnu cuenta naquiiñeʼ gácanu nadxibalú ne guinínenu laacabe de cani runi crenu (Mar. 8:38). Pa huayápanu guendanagana né laacabe pur qué gusaananu Jiobá, ¿xi zanda gúninu para chuʼnu tobi si né laacabe ne cadi gusaananu de guzúʼbanu stiidxaʼ Jiobá yaʼ? Guidúʼyanu xi zanda gúninu.

12. ¿Xiñee zándaca ziuu familia stinu zucaalú laanu para cadi gácanu Testigu, ne xi zanda gúninu?

¹² Gúninu stipa pur guiénenu ca familia stinu ni cadi naca Testigu. Guizáʼ nayecheʼ runi sentirnu purtiʼ cazíʼdinu ni dxandíʼ rusiidiʼ Biblia. Peru nuu de ca familia stinu zándaca riníʼ íquecaʼ caguítecabe laanu o nuunu lu ti secta. Zándaca guiníʼ íquecabe maʼ cadi nadxiinu laacabe purtiʼ maʼ qué rúninu xiixa saa. O dede guidxíbicabe guni castigar Dios laanu ora gátinu. Naquiiñeʼ guyúbinu guiénenu xi riníʼ íquecabe ne gucaadiaga chaahuinu laacabe para gánnanu xi riguu xizaa laacabe (Prov. 20:5). Zanda chinándanu ejemplu stiʼ apóstol Pablo, laa biʼniʼ stipa pur guiene irá clase binni purtiʼ zaquesi nga zanda guni predicarbe jma binni de stiidxaʼ Dios. Pa gúninu zacá, zacané ni laanu para guinínenu familia stinu de cani runi crenu (1 Cor. 9:19-23).

13. ¿Ximodo naquiiñeʼ guinínenu ca familia stinu?

¹³ Guininu né diidxaʼ nadóʼ. Biblia ná: «Lagüíʼ diidxa jneza» (Col. 4:6). Zanda guinábanu Jiobá gudii laanu espíritu santu stiʼ para guinínenu familia stinu né diidxaʼ nadóʼ ne gácanu nachaʼhuiʼ. Cadi gacaláʼdxinu tinde diidxanenu laacabe pur guiráʼ cani cadi dxandíʼ runi crécabe. Pa guiníʼcabe o gúnicabe xiixa ni guniná laanu la? zanda chinándanu ejemplu stiʼ ca apóstol que. Sicaríʼ bicaa Pablo: «Ora riguu dí cabe laadu la? rabi du laacabe Dios cuʼ ndaaya laacabe. Ne qué rixhacalaʼdxi du ora riladxi cabe laadu. Neca riguixhe cabe mal laadu, peru ruyubi du pur ucuudxi du laacabe [o rinidu ne diidxaʼ nadóʼ]» (1 Cor. 4:12, 13).

14. ¿Xi ribeendunu ora gaca xpiaʼnu galán?

¹⁴ Gaca xpiaʼnu galán. Ora guinínenu familia stinu né diidxaʼ nadóʼ zanda gacané ni para chuʼnu tobi si né laacaʼ, peru ni jma zacané laanu chuʼnu tobi si nga gaca xpiaʼnu galán (biindaʼ 1 Pedro 3:1, 2, 16). Pa gudiʼnu ti ejemplu galán, zanda guʼyaʼ binni nayecheʼ ribaniné ca testigu stiʼ Jiobá xheelacaʼ, rápacaʼ ca xiiñicaʼ ne nayá modo ribánicaʼ ne qué riaadxaʼ gastiʼ laacaʼ. Neca qué gaca ca familia stinu Testigu, zuni sentirnu nayecheʼ purtiʼ nánnanu cusiéchenu ladxidóʼ Jiobá purtiʼ cuzúʼbanu stiidxaʼ.

15. ¿Xi zanda gúninu para cadi tinde diidxanu né ca familia stinu?

¹⁵ Guiníʼ íquenu dede ante xi gúninu. Guiníʼ íquenu xi zándaca gucaa laanu tinde diidxanu né ca familia stinu ne guidúʼyanu ximodo guni chaahuinu ni (Prov. 12:16, 23). Ti hermana de Australia guníʼ: «Qué lica ñuulaʼdxiʼ suegruaʼ ñanna ni dxandíʼ. Ante guinínedu laabe lu teléfono para gánnadu ximodo nuube, naa né xheelaʼ, rinábadu Jiobá gacané laadu para cadi guinidu naduxhuʼ ora guicábidu laabe. Riguixhe chaahuidu xiixa tema para ganda güínedu laabe diidxaʼ galán. Nuu biaje ridinde diidxadu pur religión, peru para cadi guizaaca ngue la? qué rinidu xadxí».

16. ¿Xi zanda gúninu pa cayuni sentirnu nápanu donda pur gudinde diidxanu né ti familia stinu?

 ¹⁶ Ziuu ora qué zanda gucueezanu de tinde diidxanenu ca familia stinu ni cadi Testigu. Ne zándaca guni sentirnu nápanu donda pur laani purtiʼ nadxiinu laacabe ne qué huasaana de gúninu stipa pur gusiéchenu laacabe. Pa zacá runi sentirnu la? cadi guiaandaʼ laanu ni jma risaca nga cadi gusaananu Jiobá que gannaxhiinu familia stinu. Zacá zándaca gacanenu ca familia stinu gudiicaʼ cuenta guendanabani o guendaguti nga nuu para cani guni ni ná Biblia o coʼ. Pa gúnicabe ni o pa coʼ, cadi guiaandaʼ laanu qué zanda guni obligarnu guirutiʼ guni ni ná Jiobá. Peru ni zanda gúninu nga guluinu laacabe xi guirá maʼ guleendunu pur ruzúʼbanu stiidxabe. Laaca cudii Jiobá ti oportunidad laacabe pur guendarannaxhii napa laacabe cásica ni bidii laanu: cuinu gúninu ni ná o coʼ (Is. 48:17, 18).

17, 18. ¿Xi zanda gúninu pa gusaana ti familia stinu Jiobá?

¹⁷ Nabé racananu ora gaca expulsar ti familia stinu o guiníʼ maʼ qué zaca testigu stiʼ Jiobá, zeeda gácani casi ora nutaabicabe ti gudxíu ladxidoʼno. ¿Xi zanda gúninu pa guizaacanu zacá yaʼ?

¹⁸ Gucáʼ íquenu ca cosa espiritual. Para gaca fe stinu naguidxi naquiiñeʼ guidúʼndanu Biblia gatigá, cadi guiáʼdxanu reunión ne gaca prepararnu para chuunu cani, guni predicarnu ne guinábanu stipa Jiobá para guni huantarnu (Jud. 20, 21). Peru ¿pa cayúninu guiráʼ ndiʼ ne cadi cadiʼdiʼ ca yuubaʼ ca yaʼ? Cadi guireʼnu gana. Gucáʼ íquenu xhiiñaʼ Jiobá ni cayúninu, purtiʼ zacané ni laanu guni controlarnu cani riníʼ íquenu ne cani runi sentirnu. Guidúʼyanu xi bizaaca hombre ni bicaa Salmo 73. Guyuu ti tiempu ra guca nagana para laabe guni controlarbe cani riníʼ íquebe ne cani runi sentirbe. Peru ra gucuá íquebe gúnibe xhiiñaʼ Jiobá gucané ni laabe guchaabe modo riníʼ íquebe (Sal. 73:16, 17). Pa gúninu ndiʼ laaca zacané ni laanu.

19. ¿Ximodo zusihuínninu runi respetarnu ora riguu jneza Jiobá?

¹⁹ Guni respetarnu ora uguu jneza Jiobá tuuxa. Neca naná ora riguu jnézacabe tuuxa, guirá ribeendú ni galán despué, dede né binni bichee ca (biindaʼ Hebreos 12:11). Guzéʼtenu ti ejemplu, rinabaʼ Jiobá laanu cadi guidxaaganu ca binni ni maʼ bichee ne qué náʼ gaca arrepentir (1 Cor. 5:11-13). Neca guiuubaʼ de laanu, cadi naquiiñeʼ guinínenu tuuxa familia stinu ni nuu expulsadu pur teléfono, guséʼndanu mensaje ra nuube, carta, correu electrónicu o guinínenu laabe lu ca red social ca pa cadi caquiiñeʼ gúninu ni.

20. ¿Xii nga cadi naquiiñeʼ guiníʼ íquenu?

²⁰ Qué chuʼ dxi guiníʼ íquenu maʼ qué zanda. Guendarannaxhii ca rucaa ni tuuxa cueza, nga runi qué zaníʼ íquenu maʼ qué ziuu dxi guibiguetaʼ cani maʼ bixeleʼ de Jiobá (1 Cor. 13:7). Pa guidúʼyanu cayuni ti familia stinu stipa pur guchaa, guinábanu Dios gudii Biblia stipa laabe para guicaabe invitación riʼ: «Bibiguetaʼ ra nuaaʼ» (Is. 44:22).

21. ¿Xi naquiiñeʼ gúninu pa beeda chuu ti «espada» ndaaniʼ familia stinu pur zinándanu Jesús?

²¹ Guníʼ Jesús naquiiñeʼ gannaxhiinu laa jma qué tutiica binni. Peru zaqueca gúpabe confianza zaca ca discípulo stibe nadxibalú para cadi gusaanacaʼ laabe neca gucaalú familia sticaʼ laacaʼ. Pa ndaaniʼ familia stinu beeda chuu ti «espada» pur zinándanu Jesús la? guyúbinu gacané Jiobá laanu para gudxíʼlunu ca guendanagana guidxaagalunu (Is. 41:10, 13). Guiníʼ íquenu pabiáʼ riechené Jiobá ne Jesús laanu ne zaguucabe ndaayaʼ laanu pur qué rusaananu laacabe. ¿Cadi dxandíʼ guizáʼ rusiecheʼ ndiʼ laanu la?