1. Xi guiráʼ capacidad nabé risaca bidii Jiobá binni ora bizaʼbe laacaʼ.

DXI bizáʼ Jiobá binni, bizaʼbe laacaʼ ne caadxi capacidad nabé risaca. Bíʼnibe laanu né capacidad para guiníʼ íquenu, nga racané laanu guni chaahuinu ca guendanagana stinu ne quíxhenu xi gúninu despué (Proverbios 2:11). Laaca bizaʼbe laanu né capacidad para gúninu xiixa ni maʼ gudixhe íquenu ne ugaandanu cani (Filipenses 2:13). Ne bidiibe laanu conciencia, laani zeeda gaca ni casi ti ridxi ndaaniʼ íquenu ni rabi laanu xii nga ni jneza ne ni cadi jneza. Conciencia ca racané laanu gucáʼnanu pecadu ne guni chaahuinu cani cadi jneza gúninu (Romanos 2:15).

2. Xi racalaʼdxiʼ Jiobá gúninu né guiráʼ capacidad bidii laanu.

² Racalaʼdxiʼ Jiobá iquiiñenu guiráʼ capacidad stinu jneza, purtiʼ nadxii laanu ne racalaʼdxiʼ chuʼnu nayecheʼ. Casi lu Escrituras Hebreas, rábibe laanu pa gácanu binni runi dxiiñaʼ la? zareendú guiráʼ ni quixhe íquenu gúninu. Laaca rabi ni laanu: «Guiráʼ ni ganda gunineluʼ naluʼ, biʼniʼ cani» (Proverbios 21:5; Eclesiastés 9:10).  Ne lu Escrituras Griegas rudiibe laanu ca conseju riʼ: «Ora tiica ganda acané nu binni la? guni nu ni» ne «biaʼ gracia gucuaa cada tobi, laiquiiñeʼ ni para gacanésaatu» (Gálatas 6:10; 1 Pedro 4:10, TNM). Casi maʼ bidúʼyanu ca, racalaʼdxiʼ Jiobá gúninu biaʼ gándatiʼ para chuʼ xcaadxi binni galán ne zaqueca laanu.

3. Xii nga cani qué zanda guni binni.

³ Dxandíʼ, racalaʼdxiʼ Jiobá iquiiñenu guiráʼ capacidad ni bidii laanu, peru nánnabe nuu ni qué zanda gúninu. Laanu la? qué zanda cueenu donda gulenenu, guendaruchee ne guendaguti (1 Reyes 8:46). Laaca qué zanda gucueezanu ni runi xcaadxi binni purtiʼ guiranu zanda gúninu ni gacaláʼdxinu. Ne neca nánnanu stale o maʼ xadxí nabáninu, Jiobá jma nanna que laanu ne jma maʼ xadxí nabani (Isaías 55:9).

4. Xi zadúʼyanu lu tema riʼ.

⁴ Guiráʼ ora naquiiñeʼ gudiʼnu lugar guluíʼ Jiobá laanu xi gúninu. Laaca naquiiñeʼ gápanu confianza zacanebe laanu ne zúnibe xiixa ni qué ñanda ñúninu pur laanu. Peru laaca racalaʼdxiʼ Jiobá guni chaahuinu ca guendanagana stinu ne gacanenu xcaadxi binni. Biblia ná: «Gupa confianza Jiobá ne biʼniʼ ni jneza; bibani lu guidxilayú riʼ, ne cadi gucheeneluʼ laabe» (Salmo 37:3). Ni caníʼ textu riʼ nga, naquiiñeʼ gápanu confianza Jiobá, gúninu ni jneza ne cadi guchéʼnenu laabe. Para gánnanu ximodo gúninu ni la? lu tema riʼ zadúʼyanu ejemplu stiʼ Noé, David ne xcaadxi xpinni Jiobá ni bizuubaʼ diidxaʼ ne gupa confianza laabe. Zadúʼyanu nuu biaje qué ñanda ñúnicabe caadxi cosa, peru gudixhe íquecabe lu ca cosa ni gunda bíʼnicabe.

5. Bisiene ximodo bibani Noé.

⁵ Biblia ná bibani Noé lade binni nabé ridinde ne guyuunecaʼ ni cadi xheelacaʼ (Génesis 6:4, 9-13). Laabe nánnabe ziuu dxi zunitilú Jiobá ca binni malu que. Peru laga cabeza Noé guedandá dxi que, ¡nanna pabiáʼ naná guyuu ladxidoʼbe pur guiráʼ ni cayuni ca binni que yaʼ! Pur cani cadiʼdiʼ Noé que, bidii cuenta nuu cosa ni qué zanda guni, peru laaca bidiibe cuenta nuu cosa ni zanda gúnibe.

6, 7. a) Xi ca cosa qué zanda guni Noé. b) Xiñee zanda guininu nabáninu cásica bibani Noé.

⁶ Ca cosa ni qué zanda guni Noé. Qué nusaana Noé de nucheecheʼ stiidxaʼ Dios  para quixhená ca binni que. Peru qué zanda gucaabe ca binni que gucaadiágacaʼ laabe. Ne laaca qué zanda gusábabe nisaguié que ante de tiempu naguixhe Dios. Napa xidé gapa Noé confianza zuni Jiobá ni bidii stiidxaʼ, gunitilú ca binni malu que, ne zuni ni ora guʼyaʼ maʼ caquiiñeʼ gaca ni (Génesis 6:17).

⁷ Laanu laaca nabáninu lade binni nabé malu ne nánnanu maʼ bidii stiidxaʼ Jiobá gunitilú laacabe (1 Juan 2:17). Peru qué zanda gucaʼnu binni gucaadiágapeʼ ca diidxaʼ nacubi ne galán stiʼ Reinu. Ne laaca qué zanda gúninu xiixa para guzulú gran tribulación ante guizaa tiempu naguixhe Dios (Mateo 24:14, 21). Cásica Noé, naquiiñeʼ gaca fe stinu naguidxi ne gápanu confianza mayaca gunitilú Dios ca cosa malu ca (Salmo 37:10, 11). Nuunu seguru qué zudii Jiobá lugar chuʼruʼ guidxilayú malu riʼ nin sti dxi de ni naguíxhebe guinitilú ni (Habacuc 2:3).

8. Xi jma bicaa ique Noé guni. (Biiyaʼ dibuju zeeda ra ruzulú tema riʼ).

⁸ Ca cosa ni zanda guni Noé. Lugar de niree Noé gana pur qué ñanda ñuni caadxi cosa la? jma bicaa ique cani zanda guni. Casi dxi yetídxibe ca binni que xi chiguni Jiobá bisihuínnibe nápabe fe (2 Pedro 2:5). Nánnanu nabé gucané nga para biguidxi fe stibe. Ne aparte de bicheeche Noé diidxaʼ, bizáʼ arca que módopeʼ gudxi Jiobá laa guni ni (biindaʼ Hebreos 11:7).

9. Ximodo zanda chinándanu ejemplu stiʼ Noé.

⁹ Cásica Noé, laanu laaca rúninu «xhiiña Señor» (1 Corintios 15:58). Ximodo yaʼ. Nuu de laanu racanenu ra cabí ne cayaca chaahuiʼ Yoo stiʼ Reinu ne Salón de Asamblea. Xcaadxi de laanu rúninu dxiiñaʼ casi voluntariu ra raca ca asamblea, Betel ne ndaaniʼ xiixa Oficina de Traducción. Peru ra jma racanenu nga lu dxiiñaʼ ni nápanu de gucheechenu diidxaʼ, purtiʼ laani racané ni gaca esperanza stinu jma naguidxi. Ti hermana ni ruzuubaʼ stiidxaʼ Dios ná ora guiniʼné xcaadxi binni de ca ndaayaʼ stiʼ Reinu, rudii cuenta qué gapa binni nin ti esperanza purtiʼ riníʼ íquecaʼ qué zanda gaca chaahuiʼ ca guendanagana sticaʼ. Peru laanu nápanu ti esperanza ne raca ni jma naguidxi ora gucheechenu diidxaʼ. Esperanza stinu ca racané ni laanu cadi gusaana de guyúbinu guicaanu guendanabani ni qué zaluxe, ni zeeda gaca casi ti carrera para laanu (1 Corintios 9:24).

10. Bisiene xi biʼniʼ David.

¹⁰ Rey David guca ti hombre ni bisihuinni napa fe, ngue runi nabé gunnaxhii Jiobá laabe (Hechos 13:22). Neca zaqué, nabé naroʼbaʼ pecadu biʼniʼ David: guyuuné ti gunaa ni maʼ bichaganáʼ láʼ Bat-seba. Ne ni jma feu nga, gucaláʼdxibe nucaachibe pecadu stibe ora biyúbibe modo gatiʼ Urías, xheelaʼ gunaa riʼ, lu ti guendaridinde. Ne Urías peʼ bidii David chiné carta ra cayuni mandar gátibe (2 Samuel 11:1-21). Gupa si tiempu, bihuinni ca pecadu stiʼ David (Marcos 4:22). Xi biʼniʼ David óraque yaʼ.

11, 12. a) Xii ngue qué zanda guni David bichee si. b) Xi zuni Jiobá pur laanu pa gaca arrepentirnu.

¹¹ Ca cosa ni qué zanda guni David. Qué zanda guxhá David ca cosa malu ni biʼniʼ. Ngue runi, napa xidé tiidibe caadxi guendanagana biaʼ dxi guibánibe pur laacani (2 Samuel 12:10-12, 14). Para ganda guni huantarbe la? caquiiñeʼ gápabe fe. Naquiiñeʼ gápabe confianza zutiidilaʼdxiʼ Jiobá donda stibe ne zacané laabe guni huantarbe ca guendanagana ni tiidibe pur cani bíʼnibe pa gaca arrepentirbe de guidubi ladxidoʼbe.

¹² Guiranu rucheʼnu purtiʼ guiranu ralenenu donda. Peru nuu pecadu jma malu laacaʼ que xcaadxi. Nuu biaje qué zanda guxhanu xiixa ni gúninu. Zándaca gacananu pur xiixa pecadu ni gúninu (Gálatas 6:7). Peru nápanu confianza lu ni bidii stiidxaʼ Dios laanu: zapa laanu ora maʼ cadídinu lu xiixa guendanagana pa gaca arrepentirnu. Laabe zacanebe laanu neca pur xiixa cadi jneza bíninu nga cayacananu. Biblia ná: «Latáʼ, guni chaahuinu ca guendanagana nápanu —ná Jiobá—. Neca maʼ naxiñáʼ rini ca donda stitu, zaca cani naquichibé casi nieve; neca naxiñáʼ cani casi lari carmesí, zeeda gaca cani naquichiʼ casi lana. Pa gusihuínnitu nuutu dispuestu ne gucaadiágatu la? laatu nga goto ca cosa jma galán nuu lu guidxilayú» (Isaías 1:18, 19; biindaʼ Hechos 3:19).

13. Xi biʼniʼ David para gaca xhamigu Jiobá sti biaje.

¹³ Ca cosa ni zanda guni David. Cumu racalaʼdxiʼ David gaca xhamigu Jiobá sti biaje la? bidii lugar gacanebe laa. Casi dxi guluu jneza Natán, ti profeta stiʼ Jiobá, laabe la? bicaadiágabe laa (2 Samuel 12:13). Laaca gúdxibe Jiobá ca pecadu stibe. Zaqué bisihuínnibe racaláʼdxibe chuulaʼdxiʼ Jiobá ni rúnibe sti biaje (Salmo 51:1-17). Qué nudiibe lugar ñuniná xhaataʼ ca pecadu stibe laabe, sínuque biziidibe de laacani. Ne qué ñuuruʼ dxi ñúnibe ca cosa malu que sti biaje. Gupa si iza, dxi gútibe nácabe ti hombre ni napa fe, ne zacá nga rietenalaʼdxiʼ Jiobá laabe dede yanna (Hebreos 11:32-34).

14. Xi rizíʼdinu de ejemplu stiʼ David.

¹⁴ Xi rizíʼdinu de ejemplu stiʼ David. Pa gúninu xiixa nabé malu la? naquiiñeʼ gaca arrepentirnu de guidubi ladxidoʼno, gábinu Jiobá xi bíninu ne guinábanu laabe gutiidiláʼdxibe donda stinu (1 Juan 1:9). Laaca naquiiñeʼ guinínenu ca binnigola, purtiʼ laacabe zacanécabe laanu gaca xhamígunu Jiobá sti biaje (biindaʼ Santiago 5:14-16). Gudiʼnu lugar gacané Jiobá laanu. Zacá zusihuínninu nápanu confianza ni maʼ bidii stiidxabe laanu: zutiidiláʼdxibe stóndanu. Pa huacheʼnu la? guizíʼdinu de laacani ne gápanu confianza Jiobá ra gúninu xhiiñaʼ (Hebreos 12:12, 13).

15. Xi rusiidiʼ ejemplu stiʼ Ana laanu.

¹⁵ Nánnanu nuuruʼ xcaadxi xpinni Jiobá de dxiqué ni gupa confianza laabe ne bicaa íquecaʼ gúnicaʼ guiráʼ ni gunda ora gudíʼdicaʼ lu guendanagana. Guidúʼyanu ejemplu stiʼ Ana. Guyuu ti tiempu qué ñanda ñápabe xiiñibe. Neca qué zanda guchaabe modo nuube que, peru nápabe confianza zaguixhedxí Jiobá ladxidoʼbe. Ngue runi qué nusaana de ñebe  ndaaniʼ tabernáculo que para guni adorarbe Jiobá ne gábibe laa guiráʼ ni runi sentirbe (1 Samuel 1:9-11). Nabé sicarú ejemplu bisaana Ana para laanu. Zándaca nápanu ti guendahuará o nápanu sti clase guendanagana, ne qué zanda guchaʼnu modo nuunu. Xi zanda gúninu yaʼ. Gusaananu ca cosa ca lu náʼ Jiobá ne guni crenu rizaaláʼdxibe laanu (1 Pedro 5:6, 7). Guyúbinu modo cueendunu ni galán lu ca reunión ni rápanu ne lu xcaadxi cosa ni rudii xquidxi Jiobá laanu (Hebreos 10:24, 25).

16. Xi zanda guiziidiʼ cani napa xiiñiʼ de ejemplu stiʼ Samuel.

¹⁶ Xi zanda guni ca hermanu ni cuzuubaʼ stiidxaʼ Jiobá ne napa xiiñiʼ ni maʼ bisaana de guni ni ná Jiobá yaʼ. Ejemplu stiʼ profeta Samuel zanda gacané laacabe. Cumu maʼ huaniisi ca xiiñiʼ Samuel la? qué ñanda nucaa laacabe ñúnicabe ni ná Dios ne cadi nusaanacabe laa (1 Samuel 8:1-3). Ngue runi bisaanabe ni lu náʼ Jiobá. Peru bíʼnibe stipa pur cadi gusaanabe laa ne gusiéchebe Bixhózebe ni nuu guibáʼ (Proverbios 27:11). Yanna riʼ, stale hermanu ni napa xiiñiʼ laaca zaqueca nabánicaʼ. Xi rúnicabe yaʼ. Rápacabe confianza zaná Jiobá guibiguetaʼ ca binni ruchee ni gaca arrepentir ra nuu, casi biʼniʼ bixhoze hombrehuiiniʼ gudxite xpueltu ni bizeeteʼ Jesús que (Lucas 15:20). Laga cabézacabe gaca ni la? riguixhe íquecabe cadi gusaanacabe Jiobá ne ribézacabe gacané ejemplu stícabe ca xiiñicabe para guibiguétacaʼ ndaaniʼ congregación.

17. Xiñee riguu ejemplu stiʼ viuda pobre que gana laanu.

¹⁷ Sti ejemplu galán ni nápanu nga stiʼ viuda pobre ni bibani ca dxi stiʼ Jesús (biindaʼ Lucas 21:1-4). Laabe qué zanda gúnibe gastiʼ para guchaabe ca cosa ni cadi jneza runi ca binni ni nuu ndaaniʼ yuʼduʼ que. Ne laaca qué zanda gúnibe gastiʼ para cadi gácabe pobre (Mateo 21:12, 13). Peru nápabe confianza Jiobá ne pur ngue biʼniʼ adorarbe laa jneza. Bisihuínnibe riuuláʼdxibe gudiibe de ni nápabe ra bisábabe «chupa de gaayu huiiniʼ», ne ngue nga guiráʼ bueltu nápabe. ¡Nabé naroʼbaʼ confianza ni gúpabe Jiobá! Nánnabe pa gúnibe ni ná Jiobá primé lu xquendanabánibe la? zudii laabe guiráʼ ni caquiiñebe. Cásica viuda que, laanu laaca nápanu confianza zudii Jiobá laanu guiráʼ ni caquiiñenu pa gúninu ni ná Reinu primé lu xquendanabáninu (Mateo 6:33).

18. Bizeeteʼ ejemplu stiʼ ti hermanu ni biʼniʼ xhiiñaʼ Jiobá né stale gana neca gupa guendanagana.

¹⁸ Yanna riʼ, stale hermanu napa confianza Jiobá ne jma ricá íquecaʼ lu ca cosa ni zanda gúnicaʼ, lugar de nicá íquecaʼ lu ca cosa ni qué zanda gúnicaʼ. Guiníʼ íquenu ni bizaaca Malcolm, ti hermanu ni bizuubaʼ stiidxaʼ Jiobá dede dxi guti lu iza 2015. Lu ca iza ni bíʼninebe xheelabe xhiiñaʼ Jiobá, cadi puru si cosa galán bizaacacabe, laaca gúpacabe guendanagana. Laabe guniʼbe: «Lu xquendanabani binni zanda guizaaca xiixa ni cadi cabeza ne nabé riuu guendanagana, peru cani napa confianza Jiobá la? riguube ndaayaʼ laacaʼ». Xi conseju bidii Malcolm yaʼ. «Naquiiñeʼ guinábanu Dios gudii lugar laanu gúninu xhiiñaʼ biaʼ gándatiʼ. Gucáʼ íquenu lu ni zanda gúninu, ne cadi lu cani qué zanda gúninu». *

19. a) Xiñee biáʼsipeʼ nga textu stiʼ iza 2017. b) Ximodo zanda gúninu ni ná textu stiʼ iza 2017.

¹⁹ Cumu «ze dxi jma rusi zinitilú» guidxilayú riʼ la? jma nagana zabani binni (2 Timoteo 3:1, 13). Nga runi, yanna nga jmapeʼ cadi naquiiñeʼ gudiʼnu lugar gucueeza ca guendanagana ca laanu de gúninu xhiiñaʼ Jiobá. Ni jma jneza gúninu nga gápanu confianza Jiobá de guidubi ladxidoʼno ne guiníʼ íquenu lu cani zanda si gúninu. Nga runi, biáʼsipeʼ nga textu ni biaba iza 2017, Salmo 37:3 ra ná: «Gupa confianza Jiobá ne biʼniʼ ni jneza».