CAPÍTULO 22 stiʼ Génesis ruzeeteʼ xi guiráʼ yené Abrahán dxi guyé ti lugar zitu ra yeguni ti sacrificiu para Jiobá. Biblia ná: «Óraque gucuaa Abrahán yaga ni chiguzaaquiné sacrificiu que ne bidxiibaʼ ni xiʼqueʼ Isaac, xiiñiʼ. De raqué gucuaabe gui que lu nabe ne gudxíu que, ne juntu zeʼ guirópacabe» (Génesis 22:6).

Sicaríʼ guníʼ ti binni ni rusiene de Biblia de gui ni rieeteʼ lu versículo ca: «Zándaca qué ñuni huantar gui que biaʼ bindaa viaje» ni biʼniʼ Abrahán ne Isaac. Nga runi, neca qué ruzeeteʼ Biblia ximodo rúnicabe gui tiempu que, zándaca ni caníʼ ni ora ruzeeteʼ ni de «gui» nga ca cosa ni riquiiñeʼ para guicaguí xiixa.

Peru xcaadxi binni ni rusiene de Biblia nacaʼ cadi fácil diʼ nga guni binni gui tiempu que. Zándaca ni jma nagueenda gúnicabe nga chiyúbicabe buu ra lidxi tuuxa vecinu, lugar de guyúbibe xi gucaaguícabe para gúnicabe gui. Nga runi stale biblista nacaʼ yené Abrahán casi ti guisuhuiiniʼ, zandaca liibi ti cadenahuiiniʼ cueʼ ni, raqué nga dxaʼ gui que o buu ni bíʼninebe bele ti gueelaʼ ante (Isaías 30:14). Pa zaqué nga yenécabe gui que la? gunda bicuaanilúcabe ni né chupa chonna ndaa si bandadiʼ stiʼ yaga ra tiica guzuhaadxícabe.