Ittai, naca ti ejemplu para laanu

«NAROʼBA ne de enda ridxagayaa irá ni runi luʼ, Señor Dios ni jma nandxóʼ. Jneza ne sicarú irá ni riguixhe luʼ, lii ni runi mandar irá guidxi. Tuu nga qué idxibi lii ne usisaca lii yaʼ, Señor, purti [lii qué rusaanaluʼ ca xpínniluʼ]». «Cani qué nusisaca dxa mani ngola que ne bidóʼ stiʼ» nga cani biindaʼ canción ca guibáʼ para gusisácacaʼ Dios, ne luni bizeetecabe qué rusaanabe ca xpínnibe (Apo. 15:2-4). Ne laaca ribeza Jiobá cadi gusaana ca xpinni laa (Efe. 4:24).

Peru Binidxabaʼ cuyubi si modo para guxheleʼ laanu de Dios ni runi adorarnu. Neca zacá, stale de laanu cadi cusaananu de gúninu ni na Dios neca cadídinu ra jma nagana. ¡Nabé rusisaca Jiobá stipa rúninu para cadi guixélenu de laa! Biblia cayabi laanu: «Jiobá nadxii guendaruni jneza, ne qué zusaanabe cani qué rixeleʼ de laabe» (Sal. 37:28). Para ganda guni huantarnu la? guníʼ Dios guicá lu Stiidxaʼ ejemplu stiʼ stale hombre ni qué nusaana laabe.  Tobi de laacani nga ejemplu stiʼ Ittai de guidxi Gat.

Ti hombre ni yendeza guidxi Israel

Ittai guca ti hombre ni nabé nanna tinde, ruluíʼ si de guidxi Gat laabe, guidxi ra gule Goliat ne xcaadxi hombre malu ni gúcacaʼ xhenemigu guidxi Israel. Ittai ne 600 hombre stiʼ bixooñecaʼ de xquídxicaʼ ne yendézacaʼ gaxha de Jerusalén. Lá hombre ca málasi rieeteʼ ni lu historia stiʼ David dxi bixooñeʼ de xquidxi purtiʼ bicaalú Absalón xiiñiʼ laa.

David gunna ximodo nuu Ittai ne ca hombre stiʼ, ne zándaca bietenaláʼdxibe dxi bixooñebe ne 600 hombre stibe para chigucachilúcabe Filistea ne guiaanacabe ra runi mandar Akís, rey stiʼ guidxi Gat (1 Sam. 27:2, 3). Xi guni Ittai ne ca xpinni yanna purtiʼ cucaalú Absalón rey David yaʼ. Ñee zacanécabe Absalón la? o David, o nin tobi de laacabe.

Para guicábinu ni gunabadiidxanu ca guidúʼyanu xi bizaaca dxi biree David de Jerusalén. Ra zireebe de guidxi que yendabe ti lugar ni láʼ Bet-merhaq, lá ca riniʼni «Yoo nuu Zitu». Ne ruluíʼ si lani zacá pur últimu yoo ni nuu ndaaniʼ guidxi Jerusalén ante chindá binni ra nuu ca dani stiʼ Cedrón neza zécabe lu dani Olivo (2 Sam. 15:17; nota). David biiyaʼ ximodo nuu ca hombre stiʼ laga cadíʼdicaʼ lade ca dani que. Cadi ca israelita si ni qué nusaana laabe nga nuu lade ca hombre ca, sínuque laaca nuu ca keretita ne ca peletita. Peru Ittai nga sti hombre ni qué nusaana laabe ne 600 hombre stiʼ (2 Sam. 15:18).

Rey David nanna laaca cadiʼdiʼ Ittai lu guendanagana purtiʼ bixooñeʼ de xquidxi, ngue runi gúdxibe laa: «Xiñee chineluʼ laadu yaʼ. Bibiguetaʼ ne guleza ra nuu rey ca [Absalón nga caniʼbe raríʼ]; purtiʼ de gadxé guidxi lii, ne cuxooñeluʼ de xquídxiluʼ. Neegueʼ nga beedandaluʼ, ne yannadxí maʼ guxooñelúneluʼ laadu ratiica chaa ne ora chaa la? ¡Bibiguetaʼ ne yené ca bíʼchiluʼ, ne gaca Jiobá nachaʼhuiʼ ne lii ne guni cré lii!» (2 Sam. 15:19, 20).

Ittai bisihuinni qué zusaana David ora guníʼ ca diidxaʼ riʼ: «¡Cásipeʼ nuu Jiobá Dios ni cayuuyaʼ naa ne señor rey stinneʼ la? ra cheʼ señor rey stinneʼ ca laaca zie siervu stiluʼ neca gati o guibani!» (2 Sam. 15:21). Zándaca ora binadiaga David ni guníʼ Ittai ca bietenaláʼdxibe ca diidxaʼ ni guníʼ Rut, jñaa bida bixhózebe (Rut 1:16, 17). Ni guníʼ Ittai ca yendá ni ladxidóʼ David, ngue runi gudxi laabe: «Guyé ne gudiʼdiʼ [ca dani stiʼ Cedrón]». Lu historia ca na «gudiʼdiʼ Ittai guitita que lade ca dani que, ne zaqueca ca xpinni ne guiráʼ cani nahuiiniʼ nuuné laa» (2 Sam. 15:22).

«Para usiidi laanu»

Romanos 15:4 na: «Irá ni ucuá lu Xquiʼchi Dios ucuá para usiidi laanu». Xi rusiidiʼ ejemplu stiʼ Ittai laanu yaʼ. Guiníʼ íquenu xiñee gucanebe David ne qué nusaabe laa. Neca filisteu laabe ne bixooñebe de xquídxibe bidiibe cuenta Jiobá nga ti Dios ni nabani ne laa nga gulí David. Ittai qué niníʼ ique diʼ pa xhenemigu ca filisteu ca israelita. Ne qué niníʼ íquebe David ngue biiti Goliat ne xcaadxi binni xquídxibe (1 Sam. 18:6, 7). Ittai biiyaʼ pabiáʼ nadxii David Jiobá ne pabiáʼ galán ca guenda ni nápabe. Pur nga guyuulaʼdxiʼ David modo laabe, ne bisaana lu nabe ti grupu de ca xpinni para gucaalucaʼ ca xpinni Absalón (2 Sam. 18:2).

Yanna riʼ laaca naquiiñeʼ gúninu stipa para cadi gúninu menu binni ne cadi guni juzgarnu laacaʼ purtiʼ si gadxé costumbre nápacaʼ, gadxé raza laacaʼ ne gadxé guidxi laacaʼ. Modo guca xhamigu David Ittai rusiidiʼ ni laanu pa gunibiaʼnu ne gannaxhiinu Jiobá la? zanda gúninu ni maʼ guninu ca.

 Ora guidúʼndanu ni biʼniʼ Ittai ca, jneza guiníʼ íquenu sicaríʼ: «Ñee laaca qué zusaanaʼ Jesucristu, David ni jma risaca la? Ñee zucheecheʼ diidxaʼ ne stale gana ne zacaniáʼ binni gaca xpinni Cristu ti gusihuinneʼ qué zusaanaʼ laabe la?» (Mat. 24:14; 28:19, 20). «Xi guiráʼ racalaʼdxeʼ guneʼ para gusihuinneʼ qué zusaanaʼ Jesucristu yaʼ».

Ca hombre ni maʼ napa binnilidxi laaca zanda guiníʼ íquecaʼ ejemplu stiʼ Ittai ne chinándacaʼ ni. Pur ni bidii stiidxaʼ guitita que rey ni gulí Jiobá que ne pur yenándabe rey que la? bicaabe ca xpínnibe guni casi bíʼnibe. Zacaca nga raca ora quixhe ique ti hombre guni ni na Jiobá, binnilídxibe laaca runi ni gúnibe. Neca zadíʼdibe lu guendanagana pur ni gudixhe íquebe gúnibe la? cadi naquiiñeʼ gusiaandabe ca diidxaʼ cá lu Biblia riʼ: «Ti binni ni qué rusaana [Jiobá] laaca qué zusaana[be] laa» (Sal. 18:25).

Ora bicaalú si Ittai Absalón nga rieeteʼ lu Biblia ne maʼ qué ruzeeteruʼ ni de laabe. Neca dxi si gudiʼdiʼ David lu guendanagana nga ruzeeteʼ Biblia laabe la? rusiidini laanu ximodo laabe. Ne pur guníʼ Dios guicá ejemplu stibe lu Biblia rihuinni pabiáʼ rusisaca Jiobá ne riguu ndaayaʼ ca xpinni ni qué rusaana laa (Heb. 6:10).