Gusisácanu Dios biaʼ dxi guibáninu

SALMISTA David guníʼ lu ti oración sicaríʼ: «Siadoʼroʼ gudxi naa ximodo qué rusaana de gannaxhiiluʼ binni [...]. Biluíʼ naa neza ra naquiiñeʼ sayaʼ» (Sal. 143:8). Ñee cadi dxandíʼ rudiiluʼ xquíxepeʼ Jiobá ora guiraluʼ gueelaʼ purtiʼ nabániluʼ sti dxi la? Ne cásica biʼniʼ David que, laaca rinábaluʼ laabe gacanebe lii gánnaluʼ xi naquiiñeʼ gúniluʼ ne guʼnuʼ cani jneza.

Laanu, ca xpinni Cristu, rúninu stipa pur gúninu ni na ca diidxaʼ riʼ: «Pa go to o pa gue tu, o intiisi guni tu, laguni irá ni para usisaca tu Dios» (1 Cor. 10:31). Lu cani rúninu guiráʼ dxi zanda gusisácanu Jiobá o guchiichinu laabe. Laaca nánnanu riníʼ Biblia caguu Binidxabaʼ xqueja ca biʼchiʼ ne ca bizaʼnaʼ Cristu «ridxí ne huaxhinni», ne laaca ngaca nga ni cayúnibe ne guiráʼ ca xpinni Dios ni nuu lu Guidxilayú (Apo. 12:10). Nga runi, maʼ gudixhe íquenu gusihuínninu cadi dxandíʼ ni riníʼ Binidxabaʼ ne gusiéchenu ladxidóʼ Jiobá ra gúninu ni nabe «ridxí ne huaxhinni» (Apo. 7:15; Pro. 27:11).

Guzéʼtenu chupa modo zanda gusisácanu Dios guiráʼ dxi. Primé la? naquiiñeʼ guidúʼyanu gunáʼ nga ca cosa ni jma risaca para laanu, ne guiropa la? cadi gusaana de guyúbinu modo gacanenu xcaadxi binni.

Cadi gusaana de gúninu ni na Dios

Dxi bidiʼnu laanu Jiobá la? gúdxinu laabe racaláʼdxinu gúninu ni nabe. Laaca guninu zazanu lu ca neza stibe guiráʼ dxi ne biaʼ dxi guibáninu (Sal. 61:5, 8). Yanna, ximodo rusihuínninu cayúninu ni bidii stiidxanu Jiobá yaʼ. Ximodo rusihuínninu nadxiinu laabe de guidubi ladxidoʼno guiráʼ dxi yaʼ.

Lu Stiidxaʼ Dios cá xi guiráʼ canabaʼ Jiobá laanu (Deu. 10:12, 13). Lu cuadru ra na «Cani na Dios gúninu» zeeda caadxi de ca cosa ni maʼ biʼniʼ mandar Jiobá, ne risaca cani purtiʼ zeedacani de laabe (biiyaʼ lu yaza 22). Yanna, ximodo gánnanu gunáʼ nga ni jma risaca gúninu pa nuu xhupa o xcaadxi cosa ni laaca caquiiñeʼ gúninu oraqueca yaʼ.

Para laanu nabé risaca nga guidúʼndanu Biblia, guni orarnu, chuunu ca guendaridagulisaa ca ne gucheechenu diidxaʼ, zacá nga rusihuínninu risaca para laanu guni adorarnu Dios (Mat. 6:33; Juan 4:34; 1 Ped. 2:9). Peru nánnanu qué zanda diʼ iquiiñenu guiráʼ tiempu stinu para gúninu puru si xhiiñaʼ Dios. Laaca naquiiñeʼ gúninu dxiiñaʼ, chuunu scuela ne gúninu xcaadxi dxiiñaʼ huiiniʼ ralídxinu. Neca zacá, riguixhe chaahuinu ximodo gúninu cani. Xiñee yaʼ. Ti cadi gucueeza nin tobi de ca cosa ca laanu de chuunu ca guendaridagulisaa ca ne de gúninu xcaadxi cosa ni canabaʼ Dios laanu. Casi pa caníʼ íquenu chuunu de vacación la? primeru ridúʼyanu pa qué zeeda binnigola ni riganna ca binni ridagulisaa, pa qué zápanu guendaridagulisaa de ti dxi, de chupa o de chonna gubidxa. Ne nuu biaje zanda gúninu chupa cosa juntu. Tobi de laacani nga chigusiánenu familia stinu ndaaniʼ Yoo stiʼ Reinu, o iquiiñenu tiempu ricaanu ora maʼ cadeʼnu ra dxiiñaʼ o ra scuela para gucheechenu diidxaʼ. Ora quixhe íquenu gúninu xiixa ni risaca para laanu, casi xi dxiiñaʼ gúninu, pa ziuurunu scuela roʼ o tu gaca xhamígunu la? qué riquiiñeʼ gusiáʼndanu xii nga ni jma risaca lu xquendanabáninu: guni adorarnu Jiobá, Bixhózenu ni nuu guibáʼ ni nadxii laanu (Ecl. 12:13).

 Guyúbinu modo gacanenu xcaadxi binni

Jiobá racalaʼdxiʼ guizaaláʼdxinu binni ne guyúbinu modo gacanenu laacaʼ. Peru Binidxabaʼ rucaa binni guyubi puru para laasi. Guidxilayú stibe dxaʼ de binni ni ruyubi puru «para laa si», nabani «modo na ique» ne ruyubi «guni ni na ique» (2 Tim. 3:1-5; Gál. 6:8). Stale de ca binni ca qué liica riníʼ íquecaʼ pabiáʼ runinacaʼ sti binni ne guiráʼ ni rúnicaʼ. Nga runi, guiráʼ ladu nuu binni ni «zinanda ni na ique» (Gál. 5:19-21).

Peru cani rudii lugar gacané espíritu santu laacaʼ la? nadxiicaʼ binni ne rácacaʼ nachaʼhuiʼ ne laacabe. ¡Guizáʼ maʼ gadxé laacabe de ca binni ni runi ni na ique! (Gál. 5:22.) Biblia cayabi laanu naquiiñeʼ guidúʼyanu xi caquiiñeʼ sti binni primeru, ante gúninu ni riuuláʼdxinu. Nga runi, rizaaláʼdxinu xcaadxi binni, peru qué riguu ruaʼnu lu xpídacabe (1 Cor. 10:24, 33; Fili. 2:3, 4; 1 Ped. 4:15). Jma nga ruyúbinu ximodo gacanenu ca xpinni Cristu; peru laaca rúninu stipa pur gácanu nachaʼhuiʼ ne xcaadxi binni (Gál. 6:10). Ñee zanda guyúbinu ximodo gácanu nachaʼhuiʼ ne binni yanna ca la? (Biiyaʼ cuadru ra na «Ca binni ni naquiiñeʼ gacanenu», ni zeeda lu yaza 23.)

Cadi guiníʼ íquenu maca nuu si ora nga zanda gácanu nachaʼhuiʼ ne binni o cuézanu dede  óraruʼ maʼ bizaaca xiixa (Gál. 6:2; Efe. 5:2; 1 Tes. 4:9, 10). Galán nga pa guiráʼ dxi guidúʼyanu xi caquiiñeʼ binni ne chuʼnu listu para gacanenu laacabe, neca nuu tiru gácani nagana para laanu. Para ganda gacanenu binni la? caquiiñeʼ gudiʼnu laacaʼ tiempu stinu, ca cosa nápanu, ne gábinu laacaʼ ca conseju ni huayacané laanu. Cadi guiaandaʼ ndiʼ laanu, pa de guidubi ladxidoʼno gudiʼnu ni nápanu la? laaca stale nga ni zudii Jiobá laanu (Pro. 11:25; Luc. 6:38).

Gúninu ni na Dios «ridxí ne huaxhinni»

Yanna, ximodo zanda gúninu ni na Dios «ridxí ne huaxhinni» yaʼ. Ra cadi gusaana de gúninu guiráʼ ni canabaʼ Jiobá laanu para guni adorarnu laa (Hech. 20:31). Ndiʼ nga caadxi de laacani: guidúʼndanu Biblia guiráʼ dxi ne guiníʼ íquenu ni cadúʼndanu, cadi gusaana de guni orarnu, gúninu stipa para cadi gusaana de chuunu ca guendaridagulisaa ca ne gucheechenu diidxaʼ ratiica nuunu (Sal. 1:2; Luc. 2:37; Hech. 4:20; 1 Tes. 3:10; 5:17).

Ñee cayuni adorarnu Jiobá zacá la? Pa zacá ni la? jma zacá íquenu gusiéchenu Jiobá lu guiráʼ ni gúninu ne zusihuínninu rusiguii Binidxabaʼ. Quixhe íquenu gusisácanu Jiobá lu guiráʼ ni gúninu ne ratiica nuunu. Gudiʼnu lugar gacané ca conseju stibe laanu para cadi guininu o gúninu xiixa ni cadi jneza, ne gacanécani laanu para gánnanu xii nga ni jma jneza naquiiñeʼ gúninu. Ora runi crenu Dios de guidubi ladxidoʼno ne ora riquiiñenu guiráʼ stipa stinu para gúninu ni nabe la? rusihuínninu rudiʼnu xquíxepeʼ laabe purtiʼ racanebe laanu ne rápabe laanu. Laaca naquiiñeʼ guicaanu ca conseju stibe ne gudiʼnu lugar gulídxebe laanu ora gucheʼnu, purtiʼ nácanu binni gulené donda (Sal. 32:5; 119:97; Pro. 3:25, 26; Col. 3:17; Heb. 6:11, 12).

Nga runi, gusisácanu Dios biaʼ dxi guibáninu. Zacá nga «zaziilaʼdxi ladxidóʼ [no]» ne qué zusaana Jiobá de gapa laanu, Bixhózenu ni nuu guibáʼ ni nadxii laanu (Mat. 11:28; Apo. 7:16, 17).

[Cuadro ne dibuju/foto ni zeeda lu yaza 22]

Cani na Dios gúninu

• Guni orarnu gatigá (Rom. 12:12).

• Guidúʼndanu Biblia, guiénenu ni ne gúninu ni cusiidini laanu lu xquendanabáninu (Sal. 1:2; 1 Tim. 4:15).

• Gusisácanu Jiobá lade ca binni ridagulisaa (Sal. 35:18; Heb. 10:24, 25).

• Gudiʼnu ni caquiiñeʼ binnilídxinu, gusíʼdinu laacaʼ de Dios ne guyúbinu modo chuʼcaʼ nayecheʼ (1 Tim. 5:8).

• Gucheechenu ca diidxaʼ nacubi ne galán stiʼ Reinu ne gacanenu binni gaca discípulo (Mat. 24:14; 28:19, 20).

• Guyúbinu modo chuʼnu nazaaca, chuʼnu galán ne Dios ne gúninu xiixa para guni sentirnu galán, casi chichítenu o chizanu xiixa lugar (Mar. 6:31; 2 Cor. 7:1; 1 Tim. 4:8, 16).

• Gúninu ca dxiiñaʼ guicaanu lade ca binni ridagulisaa (Hech. 20:28; 1 Tim. 3:1).

• Gusianu ralídxinu ne ra Yoo stiʼ Reinu ti guihuinni cani galán (1 Cor. 10:32).

[Cuadro ne dibuju/foto ni zeeda lu yaza 23]

Ca binni ni naquiiñeʼ gacanenu

• Ti xpinni Cristu ni maʼ nagola (Lev. 19:32).

• Cani napa xiixa guendahuará o cani nabé riuu triste (Pro. 14:21).

• Ti xpinni Cristu ni caquiiñeʼ xiixa nagueendaca ne zanda gudiʼnu ni laa (Rom. 12:13).

• Tobi de ca binnilídxinu (1 Tim. 5:4, 8).

• Ti xpinni Cristu ni maʼ guti xheelaʼ (1 Tim. 5:9).

• Ti binnigola ni ridagulisaanenu ni nabé runi dxiiñaʼ (1 Tes. 5:12, 13; 1 Tim. 5:17).