Lagacané ca xiiñitu gudxiilucaʼ ca guendanagana sticaʼ

GUIRÁʼ ca xiiñinu cadxagalucaʼ stale guendanagana. Cumu nuucabe lade ca binni ni napa espíritu stiʼ guidxilayú ni nuu lu naʼ Binidxabaʼ riʼ la? caquiiñeʼ gudxiilúcabe ni cadi jneza ni «riguba yu cani nahuiini» ca (2 Tim. 2:22; 1 Juan 5:19). Ne cumu laaca cayúnicabe stipa pur guietenaláʼdxicabe de Dios ni bizáʼ laacabe la? napa xidé guni huantárcabe guiráʼ burla ni guni cani qué riuulaʼdxiʼ ni runi crécabe ne nuu tiru dede rizíñecaʼ laacabe (Ecl. 12:1). Ti xpinni Cristu ni láʼ Víctor guníʼ xi bizaaca dxi guzáʼ scuela: «Qué ñaadxaʼ tu niziñe naa, nisi maʼ cuchelaníʼdicabe naa pur nacaʼ Testigu. Guyuu tiru guníʼ iqueʼ maʼ qué ziaaʼ scuela purtiʼ maʼ qué ganda guneʼ huantar guiráʼ ni rúnicabe naa que». a

Ca hombrehuiiniʼ ne ca dxaapahuiiniʼ ca cadi naquiiñeʼ si gudxiilucaʼ guiráʼ ni rucaa binni laacaʼ gúnicaʼ, sínuque laaca naquiiñeʼ gápacaʼ  laacaʼ para cadi gúnicaʼ casi runi xcaadxi binni. Ti dxaapahuiiniʼ láʼ Katy guníʼ: «Cadi galán diʼ runi sentir binni ora gúʼyacabe maʼ gadxé laa de xcaadxi». Alan, ti hombrehuiiniʼ Testigu guníʼ: «Stale biaje biʼniʼ invitar cani guzayaniáʼ scuela naa chizayaniáʼ laacaʼ ca sábadu ne ca domingu; dxandipeʼ la? gupa gana niniáʼ laacabe». Xcaadxi ñuuláʼdxicaʼ ñecaʼ ra richite ca baʼduscuela ca para ñuni ganarcaʼ, peru cumu nánnacabe zándaca guicá guiráʼ ni runi xcaadxi binni ni qué runibiáʼ Dios laacabe la? qué rúnicabe ni. Tania guníʼ: «Nabé riuuladxeʼ quiteʼ pelota. Ca maestru de ra scuela stinneʼ qué rusaanacaʼ de gábicaʼ naa quiteʼ lade equipu stiʼ scuela ra riaaʼ. Guca nagana para naa gabeʼ laacabe qué zuneʼ ni».

Laatu cani napa xiiñiʼ, ximodo zanda gacanetu ca xiiñitu gudxiilucaʼ guiráʼ guendanagana gápacaʼ yaʼ. Jiobá maʼ bisaana lu natu gacanetu laacabe (Pro. 22:6; Efe. 6:4). Naquiiñeʼ gacanetu laacabe guzuubacabe stiidxaʼ Jiobá de guidubi ladxidóʼcabe (Pro. 6:20-23). Zacá qué zúnicabe ni gucaa tuuxa laacabe gúnicabe neca cadi nuutu ra nuucabe.

Nagana nga gapa binni ni guibaniné, gusiniisi ca xiiñiʼ ne guni dxiiñaʼ ni napa ndaaniʼ neza binni ridagulisaa. Ne nuu tu laa naquiiñeʼ guni ni stubi purtiʼ qué gapa xheelaʼ o rucaalú xheelaʼ laa purtiʼ qué runibiáʼ Jiobá. Peru cadi ngasi naquiiñeʼ gúnicabe: laaca ribeza Jiobá cuee cani napa xiiñiʼ ca tiempu para gacanecaʼ xiiñicaʼ ne gusiénecaʼ laacabe xi gúnicabe. Yanna, ximodo zanda gacanetu ca xiiñitu para cadi gúnicaʼ cosa malu ora chuʼ tu gucaa laacaʼ gúnicaʼ xiixa ni cadi jneza, ora chuʼ tu siñe laacaʼ ne ora guidxaagalucaʼ intiica cosa yaʼ.

Risaca nga chúʼcabe gaxha de Jiobá

Primé la? caquiiñeʼ guʼyaʼ ca hombrehuiiniʼ ne ca dxaapahuiiniʼ ca Jiobá casi ti Dios ni nabani. Peru caquiiñeʼ chuʼ tu gacané laacabe ti gúʼyacabe «Dios neca qué rihuinni» (Heb. 11:27). Víctor ni maca bizéʼtenu que guníʼ gucané bixhoze ne jñaa laa para gunda guyuu gaxha de Jiobá. Laabe nabe: «Bisiidicabe naa nabé risaca nga guneʼ orar. Rietenalaʼdxeʼ dede  nahuiineʼ runeʼ orar ante gaseʼ. Para naa la? naca Jiobá ti Dios ni nabani». Ñee runi orarnetu ca xiiñitu la? Ñee runadiágatu ca oración ni rúnicabe Jiobá la? Ñee ngueca ca ngueca riníʼcabe la? Ñee rusihuinni oración stícabe xi runi sentírcabe pur Jiobá la? Pa gucaadiágatu ca oración stícabe, zudiitu cuenta pa caniisicabe lu stiidxaʼ Dios.

Sti cosa ni zanda gacané laacabe chúʼcabe gaxha de Jiobá nga gúʼndacabe Biblia stúbicabe. Katy, ni maca bizéʼtenu que na: «Cumu biindaʼ guidubi naca Biblia dxi nahuiineʼ la? gucaneni naa gudieeʼ cuenta, neca nuu tu cucaalú naa, Jiobá nuu para gacané naa». Ñee napa cada tobi de ca xiiñitu ti dxi para gúʼndacaʼ Biblia stúbicaʼ la? (Sal. 1:1-3; 77:12.)

Dxandíʼ, neca tobi si nga ni rusiidiʼ binni xiiñiʼ la? gadxé nga ni rúnicabe. Ne cumu cadi tobi si iza nápacabe la? gadxé gadxé modo zaniisicabe lu stiidxaʼ Dios. Peru pa guirutiʼ tu gacané laacabe la? zaca nagana para laacabe gúʼyacabe Jiobá casi ti binni ni nabani. Bixhózecabe ne jñaacabe naquiiñeʼ gusiidicaʼ laacabe xiná Jiobá, ti cadi guiaandaʼ laacabe ximodo ruuyabe ca cosa ca ratiica nuucabe (Deu. 6:6-9). Ca xiiñitu naquiiñeʼ gánnacaʼ rizaalaʼdxiʼ Jiobá laacaʼ.

Laguiníʼ diidxaʼ ni zanda gacané xiiñitu

Para ganda gacanetu ca xiiñitu la? naquiiñeʼ gánnatu guiníʼnetu laacabe diidxaʼ. Ximodo zanda gaca nga yaʼ. Ra guinabadiidxatu laacabe ne gucaadiágatu ni gábicabe laatu sin guidxiichitu, neca cadi ngue nga cabézatu gunadiágatu. Anne, jñaa chupa hombrehuiiniʼ guníʼ: «Rinabadiidxaʼ laacabe dede ganna xi caníʼ íquecabe ne xi guendanagana cadxaagalúcabe». Ñee runi sentir ca xiiñitu rucaadiágatu laacaʼ la? Tania, ni maca bizéʼtenu que, guníʼ: «Nabé bicaadiaga bixhozeʼ ne jñaa naa ne qué rusiaandacabe ni gabeʼ laacabe. Gúnnacabe tu láʼ ca hombrehuiiniʼ ne ca dxaapahuiiniʼ  guzayaniáʼ scuela ne rinabadiidxacabe naa de laacaʼ ne de xcaadxi cosa ni maca gunidu ante». Casi maʼ bidúʼyanu ca, caquiiñeʼ gucaadiaga binni xiiñiʼ ne guietenaláʼdxicaʼ ni gábicabe laacaʼ ti ganda gacanecaʼ laacabe.

Stale familia maʼ biiyacaʼ galán nga guiniʼné binni xiiñiʼ ora chitocaʼ gueta. Sicaríʼ guníʼ Víctor: «Para laadu nabé risaca ngue guidoʼdo juntu. Cada tobi de laadu rúnidu stipa para cuí guidubi naca familia stinneʼ ruaa mexaʼ ora chidoʼdo gueta. Ne ora maʼ cadoʼdo la? qué zanda guidúʼyadu televisión, gucaadiágadu radiu nin guidúʼndadu xiixa guiʼchiʼ. Peru cumu galán rinidu diidxaʼ la? ora maʼ cadoʼdo gueta ratadxí ladxiduáʼ ne racaneni naa gusiaandaʼ guiráʼ ca guendanagana ni ridxaagaluáʼ ra scuela, purtiʼ nuu tu laa qué ruzuubaʼ diidxaʼ, nisi maʼ cazíñecaʼ binni ne ruquiindecabe naa guneʼ cosa malu». Ne laaca guniʼbe: «Cumu maʼ biaaʼ guinieniáʼ bixhozeʼ ne jñaa ora maʼ cadoʼdo gueta la? qué raca nagana para naa gabeʼ laacabe xiixa cazaacaʼ».

Gunabadiidxaʼ laca lii: «Panda biaje lu ti semana rahuaniáʼ binnilidxeʼ gueta». Pa quixhe íqueluʼ goneluʼ binnilídxiluʼ juntu la? jma zanda guiníʼneluʼ ca xiiñiluʼ diidxaʼ.

Risaca nga guni ensayarnetu laacabe

Pa guiráʼ semana guni adorarnetu binnilídxitu Dios la? zacaneni laatu guiniʼtu diidxaʼ ni gacané xiiñitu ne zacaneni laacabe gudxiilúcabe xiixa guendanagana gápacabe. Alan, ni maca bizéʼtenu que, guníʼ: «Ora maʼ cayuundané bixhozeʼ ne jñaa laadu Biblia ruyúbicabe modo gánnacabe xi cazaacadu. Ruyúbicabe xiixa tema ni zanda gacané laadu gudxíʼludu guendanagana ni cadídidu». Jñaa Alan guníʼ: «Ora maʼ cadúʼndanedu laacabe Biblia ribeedu tiempu para guni ensayarnedu laacabe. Ngue gucané ca xiiñidu para gusiénecaʼ xi runi crecaʼ ne gusihuínnicaʼ dxandíʼ guiráʼ ni runi crecaʼ ne gucaneni laacabe gudxiilúcabe ca guendanagana stícabe».

Ora gucaa ca xcompañeru ca hombrehuiiniʼ ne ca dxaapahuiiniʼ ca laacaʼ gúnicaʼ xiixa ni cadi jneza, cadi naquiiñeʼ si guiníʼcabe qué zúnicabe ni ne guireecacabe de ra nuucaʼ. Caquiiñeʼ gánnacabe gusiénecabe xiñee  qué zúnicabe ni. Laaca caquiiñeʼ gánnacabe xi gúnicabe ora guni burla tuuxa laacabe pur religión stícabe. Pacaa la? zadxíbicabe ora gusiénecabe xi runi crécabe. Nga runi, pa guni ensayarnetu laacabe zacaneni laacabe cadi guidxíbicabe.

Lu cuadru ni zeeda lu yaza 18, cusihuinni xi zanda iquiiñetu para guni ensayarnetu ca xiiñitu ora guni adorarnetu laacaʼ Dios. Para ganda gácani casi ca guendanagana ni ridxagalúcabe, laguni casi ora cadi jneza nga ni guicábicabe laatu. Ne laaca galán gúʼyatu xi zanda guiziiditu de ca ejemplu ni zeeda lu Biblia. Pa gúnitu ca nga ralídxitu zacaneni ca xiiñitu gudxiilucaʼ ca guendanagana ni guidxagalucaʼ ra scuela ne ratiica nuucaʼ.

Ñee runi sentir ca xiiñitu zanda guiaapacaʼ ra lídxitu la?

Ñee riuulaʼdxiʼ ca xiiñitu guibiguétacaʼ ralídxitu ora guireecaʼ de scuela la? Pa gueeda gaca ralídxitu casi ti lugar ra guiaapaʼ ca xiiñitu, zanda gacaneni laacabe guidxagalúcabe guendanagana ni gápacabe guiráʼ dxi. Ti gunaa Testigu ni cayuni dxiiñaʼ Betel guníʼ: «Ralidxeʼ nga dxandipeʼ bineʼ sentir gúpacabe naa, nga nga tobi de ca cosa ni jma gucané naa dxi guyaaʼ scuela. Nin ñaca ca cosa ni bidxagaluáʼ ra scuela que jma nagana, peru nannaʼ ora chindayaʼ ralidxeʼ ziuaaʼ galán». Ximodo laatu ndaaniʼ lídxitu. Ñee gastiʼ si gaca maca cadxiichitu, maca cadíndetu, ne rusaanatu de guiniʼtu la? o nadxiisaatu, riuutu nayecheʼ ne qué ridíndetu (Gál. 5:19-23). Pa gúʼyatu cayaadxaruʼ gúnitu xcaadxi cosa para gusaana de tíndetu la? galán guyúbitu modo gúnitu guiráʼ ni caquiiñeʼ para ganda guchaatu ne gueeda gaca ralídxitu ti lugar ra guni sentir ca xiiñitu cayápatu laacaʼ.

Sti modo zanda gacanetu ca xiiñitu gudxiilucaʼ ca guendanagana sticaʼ nga gacanetu laacaʼ guidxaagacaʼ binni ni gacané laacaʼ. Xiñee qué guni invitartu xcaadxi xpinni Cristu ni nuu ndaaniʼ neza binni ridagulisaa stitu ora chizanetu binnilídxitu yaʼ. Zanda guiníʼ íquetu gúnitu ti guendaró ralídxitu ne guni invitartu binnigola ni riganna ca neza binni ridagulisaa o guni invitartu caadxi precursor. Ñee runibiaʼtu tuuxa misioneru o betelita ni zanda gaca xhamigu xiiñitu la? Casi guseendacabe carta ra nuucaʼ, o guseendacabe ti correu electrónicu o cuídxicabe laacaʼ lu teléfono. Pa guidxaagacabe ca binni ca zacanecaʼ laacabe sácabe jneza ne quixhe íquecabe ugaandacabe xiixa dxiiñaʼ ndaaniʼ xquidxi Dios. Guníʼ ique si pabiáʼ gucané apóstol Pablu Timoteu (2 Tim. 1:13; 3:10). Laacabe nabé guca xhamígucabe ne ngue gucaneni Timoteu gucaa ique gapa xiixa dxiiñaʼ ndaaniʼ xquidxi Dios (1 Cor. 4:17).

Lacuu gana ca xiiñitu

Riecheʼ Jiobá nga guʼyaʼ cayuni ca hombrehuiiniʼ ne ca dxaapahuiiniʼ ca stipa pur gúnicaʼ ni jneza, neca cucaa guidxilayú stiʼ Binidxabaʼ riʼ laacaʼ gucheecaʼ (Sal. 147:11; Pro. 27:11). Laatu laaca ziéchetu ora gúʼyatu quixhe íquecabe gúnicabe ni jneza (Pro. 10:1). Lagabi xiiñitu nadxiitu laacaʼ ne cadi gusaana de cuʼtu gana laacaʼ. Ejemplu stiʼ Jiobá nga jma galán chinanda cani napa xiiñi. Dxi guyuunisa Jesús, gúdxibe laa: «Lii nga Xiiñe ni nadxiee ne ni rusieche naa» (Mar. 1:11). Cumu chiguidxaagalú Jesús stale guendanagana la? ¡nabé gucané ca diidxaʼ ni gudxi Bixhózebe que laabe! Zacaca naquiiñeʼ gúnitu: lagabi ca xiiñitu nadxiitu laacaʼ ne nayecheʼ nuutu pur ni cayúnicaʼ.

Laatu nánnatu qué zanda gucueezatu binni de gucaa laacabe gúnicabe ni cadi jneza, de guni búrlacaʼ laacabe ne de siñe laacabe. Peru zanda gusiiditu laacabe ximodo guidxaagalúcabe cani. Lagacané laacabe chúʼcabe gaxha de Jiobá. Laguni stipa pur guiniʼtu diidxaʼ ni gacané ca xiiñitu. Laguyubi modo chuuláʼdxicabe ora gúʼndanetu binnilídxitu Biblia ne gaca lídxitu ti lugar ra guni sentírcabe cayápatu laacabe. Pa chinándatu ca conseju riʼ, zaziidiʼ ca xiiñitu gudxiilucaʼ ca guendanagana sticaʼ.

[Ni cá ñee yaza]

[Cuadro ne dibuju/foto ni zeeda lu yaza 18]

CANI ZANDA GUNI ENSAYARTU

Zanda iquiiñetu cani zeeda raríʼ para guni ensayarnetu ca xiiñitu dxi runi adorarnetu laacabe Dios.

▸ Ti maestru guni invitar xiiñidxaapatu quite lade equipu stiʼ scuela ra rié.

▸ Tobi de cani riné hombrehuiiniʼ stitu scuela gabi laabe pa zagúʼbabe gueza ora maʼ zibíʼcabe.

▸ Caadxi baʼduʼ gábicaʼ hombrehuiiniʼ stitu zaguíñecaʼ laabe pa guibiguetaʼ gúʼyacaʼ laabe canagucheechebe diidxaʼ.

▸ Guihuinni guxhidxiná xiiñidxaapatu ti puertaʼ ora canagucheeche diidxaʼ ne guiree ti dxaapahuiiniʼ ni rinebe scuela.

▸ Guinábacabe xiiñidxaapatu gusiene nezalú ca xcompañeru xiñee qué riná guni saludar bandera.

▸ Ti baʼduʼ cadi cusaana de guni burla hombrehuiiniʼ stitu purtiʼ naca Testigu.

[Dibuju/foto ni zeeda lu yaza 17]

Ñee napa cada tobi de ca xiiñitu ti dxi para gúʼndacaʼ Biblia stúbicaʼ la?

[Dibuju/foto ni zeeda lu yaza 19]

Ñee runi invitartu xcaadxi xpinni Cristu ora gúnitu xiixa para chuʼ binnilídxitu nayecheʼ la?