Xiñee naquiiñeʼ gudiʼnu laanu Jiobá

«Laatu nanna tu sti Dios naa ne rune xhiiña be. Nuchi biseenda be ti ángel ra nuaaʼ.» (HECH. 27:23)

1. 1) Xi naquiiñeʼ guni ti binni ti ganda chúʼnisa. 2) Xi guendarinabadiidxaʼ zacábinu.

 «PUR rini ni bixhii Jesucristu, maʼ guca arrepentirluʼ de ca donda stiluʼ ne maʼ bidiiluʼ lii Jiobá para guʼnuʼ ni na la?» Ndiʼ nga tobi de chupa guendarinabadiidxaʼ ni rúnicabe ora maʼ ziluxe libana para cani chichuunisa. Yanna, xiñee caquiiñeʼ gudiʼnu laanu Jiobá. Xi zabeendunu pa gúninu ni. Para chuulaʼdxiʼ Dios modo runi adorarnu laa, xiñee caquiiñeʼ gúninu ni. Para ganda guicábinu cani gunabadiidxanu riʼ, primeru naquiiñeʼ gánnanu ximodo nga rudii binni laa Dios.

2. Pora nga zanda guininu maʼ bidiʼnu laanu Dios.

² Pora nga zanda guininu maʼ bidiʼnu laanu Dios. Ni zanda gacané laanu guicábinu ni gunabadiidxanu ca nga ni guníʼ Pablu ora zeʼ lu ti barcu ni mayaca guiaaziʼ. Apóstol ca guníʼ «sti Dios naa», ne ca diidxaʼ ca bisihuínnibe maʼ stiʼ Jiobá laabe (biindaʼ Hechos 27:22-24). Laanu, ca xpinni Cristu maʼ stiʼ Jiobá laanu, peru binni guidxilayú «naaze dxiichi binidxaba» laacaʼ (1 Juan 5:19). Ximodo nga guca stiʼ Dios laanu yaʼ. Ra gúdxinu Dios lu ti oración zúninu ni na ne despué guyuunísanu.

3. Xiñee ngue guyuunisa Jesús, ne ximodo rinanda ca xpínnibe ejemplu stibe.

³ Jesús gudixhe ximodo gácani dxi guyuunisa, dxi bisihuínnibe nezalú stale binni maʼ gudixhe íquebe gúnibe xhiiñaʼ Bixhózebe. Peru cumu gúlebe ndaaniʼ guidxi Israel, ti guidxi ni maca bidii laa Jiobá la? maʼ cadi caquiiñeʼ gudiibe laabe Jiobá sti biaje. Ne laaca cadi cayúnibe ni canabaʼ ley que laabe, sínuque cadxíñabe nezalú Bixhózebe para gúnibe ni na. Biblia na gúdxibe Jiobá: «Rarí nuaa para gune ni na luʼ» (Heb. 10:7; Luc. 3:21). Ca dxi stinu riʼ, ca xpinni Cristu rinándanu ejemplu stibe ora riúʼnisanu. Peru ora riúʼnisanu, rusihuínninu nezalú binni maʼ bíninu ti oración ra bidiʼnu laanu Dios.

Cani zabeendunu pa gudiʼnu laanu Jiobá

4. Xi rusiidiʼ ejemplu stiʼ David ne Jonatán laanu de modo naquiiñeʼ gaca xhamigu binni.

⁴ Ora gudii tuuxa laa Dios,  cadi caníʼ si zuni xiixa. Nga runi, cadi naquiiñeʼ guʼyaʼ binni ni casi guendariguite. Peru xi zabeendú binni pa gudii laa Dios. Para ganda guiénenu ni la? guiníʼ íquenu primeru xi ribeendú binni ora gabi tuuxa laa zuni xiixa. Pa ti binni racalaʼdxiʼ gapa ti xhamigu la? primeru naquiiñeʼ quixhe ique cadi gusaana de guizaalaʼdxiʼ xhamigu. Modo guca xhamigu David ne Jonatán nga tobi de ca ejemplu sicarú ni rieeteʼ lu Biblia. Laacabe guyuucabe tobi si dede bíʼnicabe ti pactu (biindaʼ 1 Samuel 17:57 ne 18:1, 3). Yanna riʼ, maʼ huaxiéʼ si tu raca xhamigu casi laacabe ca. Peru cásica dxiqué, yanna riʼ qué rusaana de gaca xhamigu chupa binni ora riguixhe íquecaʼ qué gucheenésaacaʼ laacaʼ ne gacanésaacaʼ (Pro. 17:17; 18:24).

5. Xi zanda guni ti mozo para guiaanané xpixuaanaʼ.

⁵ Ley ni bidii Dios guidxi Israel que laaca bisihuínnini xi ribeendú ti mozo ora gudii stiidxaʼ qué zusaana xpixuaanaʼ. Pa ti mozo racalaʼdxiʼ gaca stiʼ xpixuaanaʼ laa ne qué chuʼ dxi gusaana laabe la? zanda guninebe laa ti pactu. Ley que na: «Pa mozo ca qué gusaana de guiníʼ: “Dxandipeʼ nadxieeʼ xpixuaanaʼ, xheelaʼ, ca xiiñeʼ; qué racalaʼdxeʼ guiaanaʼ libre”, óraque naquiiñeʼ chiné xpixuaanabe laabe nezalú Dios ni dxandíʼ ne gucaa laabe ra puertaʼ o ruaa puertaʼ stiʼ; ne naquiiñeʼ quiide xpixuaanabe diágabe ne ti punzón, ne napa xidé gácabe mozo stiʼ xpixuaanabe biaʼ dxi guibánibe» (Éxo. 21:5, 6).

6, 7. 1) Xi ribeendú binni ora runi ni maʼ gudixhe ique. 2) Xi zabeendunu pa gudiʼnu laanu Jiobá de guidubi ladxidoʼno.

⁶ Ora guichaganáʼ tuuxa naquiiñeʼ guni stipa para guni ni maʼ bidii stiidxaʼ. Pa gúnibe zacá zusihuínnibe rusisácabe xquendaxheelabe ne cadi cayúnibe ni purtiʼ si maʼ biʼniʼ firmarbe ti guiʼchiʼ. Ora nabeza si chupa binni sin guichaganáʼ qué gánnacaʼ pa qué zusaana binni nabezanecaʼ ca laacaʼ, ne zaqueca runi sentir ca xiiñicabe. Peru ca guendaxheelaʼ ni maʼ gudixhe ique guibani casi modo na Biblia, rúnicaʼ stipa pur guni chaahuicaʼ guendanagana sticaʼ ne guendarannaxhii (Mat. 19:5, 6; 1 Cor. 13:7, 8; Heb. 13:4).

⁷ Últimu la? guininu de negocio ne de dxiiñaʼ. Maʼ xadxí ruzeeteʼ Biblia galán nga gudii stiidxaʼ chupa binni ora chigúnicaʼ xiixa negocio o dxiiñaʼ (Mat. 20:1, 2, 8). Nga runi, ora chiguni binni ti negocio o tuuxa chiguniné sti binni dxiiñaʼ, galán guni firmárcabe ti guiʼchiʼ ra cá ni biaanacabe gúnicabe ti cadi gápacabe guendanagana. Dxandíʼ, zabeendunu ni galán pa quixhe íquenu guizaaláʼdxinu xhamígunu, cadi guchéʼnenu xheelanu ne gúninu ni maʼ bidii stiidxanu lu negocio o dxiiñaʼ stinu. Peru nuu ti cosa ni jma risaca que intiica pactu ni guninenu sti binni ni zacané laanu chuʼnu gaxha de Jiobá: gudiʼnu laabe xquendanabáninu para gúninu guiráʼ ni nabe. Guidúʼyanu xi guleendú ca binni ni bibani dxiqué pur bidiicaʼ laacaʼ Jiobá. Laaca zadúʼyanu xiñee ora maʼ bidii tuuxa laa Jiobá cadi zeeda gácani casi ora guiníʼ si zuni xiixa.

Israel guleendú ni galán dxi bidii laa Dios

8. Xii ngue cayabi ca israelita que Jiobá ora bidiicaʼ laacaʼ laabe.

⁸ Guiráʼ ca israelita que bidii stiidxacaʼ gudiicaʼ laacaʼ Jiobá. Laabe bitagulisaabe laacaʼ ñee dani Sinaí ne gúdxibe laacaʼ: «Pa laatu gúnitu guiráʼ ni gabeʼ laatu ne dxandipeʼ gúnitu ni na pactu stinneʼ la? dxandipeʼ zeeda gácatu guidxi stinneʼ ni nabé risaca de lade guiráʼ ca guidxi ni nuu». Óraque bidii stiidxaʼ guidubi naca guidxi que laabe ne nacaʼ: «Maʼ gudixhe íquedu gúnidu guiráʼ ni maʼ guníʼ Jiobá» (Éxo. 19:4-8). Ora bidiicabe laacabe Jiobá cadi bidii stiidxasícabe zúnicabe ni nabe, sínuque laaca bisihuínnicabe maʼ stiʼ Jiobá laacabe. Ngue runi guníʼ Jiobá zapa laacabe casi xiixa nabé risaca.

9. Xi ndaayaʼ gucuaa ca israelita que ra bidiicaʼ laacaʼ Jiobá.

⁹ Ca israelita que gucuaacaʼ stale ndaayaʼ  dxi maʼ guca stiʼ Jiobá laacaʼ. Qué nusaana Jiobá laacabe, gunnaxhii laacabe ne gupa laacabe casi xiiñiʼ. Dede gudxi laacabe: «Ñee zanda gusiaandaʼ ti gunaa ugadxi xiiñiʼ ne qué guiabe xiiñibe ni gúpabe la? Dede né ca gunaa ca zanda gusiaandacaʼ; peru, naa qué zusiaandadiáʼ lii» (Isa. 49:15). Jiobá biquiiñeʼ Ley stiʼ para gabi xquidxi xi naquiiñeʼ guni, biseendabe cani riguixhená stibe para cuʼ gana laa ne biquiiñebe ca ángel stibe para gápabe laa. Hombre bicaa salmo riʼ guníʼ: «[Jiobá] cayábibe Jacob stiidxabe; cayábibe Israel ca ley ni caníʼ modo guibani binni ne modo runi juzgarbe binni. Nin sti guidxi roʼ qué huayábibe ni» (Sal. 147:19, 20; biindaʼ Salmo 34:7, 19 ne 48:14). Cásica gúpabe Israel, guidxi stibe que, zacaca rápabe ca xpinni Cristu ni maʼ bidiicaʼ laacaʼ laabe.

Xiñee naquiiñeʼ gudiʼnu laanu Dios

10, 11. Xiñee qué ñálenu ndaaniʼ familia stiʼ Jiobá.

¹⁰ Nuu tu riníʼ ique: «Xiñee naquiiñeʼ gudieeʼ naa Jiobá ne chuaanisaʼ para ganda guneʼ ni nabe yaʼ». Ziénenu xiñee pa guietenaláʼdxinu ximodo nuunu nezalú Dios. Pur bichee Adán gulenenu donda ne dede dxiqué maʼ qué ñácanu xiiñiʼ Dios (Rom. 3:23; 5:12). Ne para ganda gueeda gácanu de familia stibe la? naquiiñeʼ gudiʼnu laanu laabe. Guidúʼyanu xiñee.

¹¹ Nin tobi de laanu qué zanda gudii bixhózenu laanu guendanabani sin donda casi modo gudixhe ique Dios ñácani (1 Tim. 6:19). Cumu bichee Adán ne Eva la? maʼ qué ñálenu gaxha de Bixózenu Jiobá ne maʼ qué ñuuyabe laanu casi xiiñibe (zanda gúʼndaluʼ Deuteronomio 32:5). Dede dxi bicheecabe, maʼ qué ñuu binni guidxilayú ndaaniʼ familia stiʼ Jiobá ne maʼ qué ñuucaʼ gaxha de laabe.

12. 1) Ximodo zanda chuʼ ca binni ruchee ndaaniʼ familia stiʼ Dios. 2) Xi caquiiñeʼ gúninu ante chuʼnísanu.

¹² Neca zacá, cada tobi de laanu zanda guinábanu Jiobá uguu laanu ndaaniʼ familia stiʼ, ra nuu ca xpinni ni runi ni na. a Peru ximodo zanda gaca nga pa nácanu binni ruchee yaʼ. Apóstol Pablu bicaa: «Gunda bicueeza enda guti sti Xiiñi Dios de nidxiichi né Dios laanu, neca cuchéʼ né ru nu laa» (Rom. 5:10). Para ganda guicaabe laanu la? naquiiñeʼ guinábanu laabe gacanebe laanu gápanu ti guendabiaaniʼ nayá, ne zusihuínninu ni ra chuʼnísanu (1 Ped. 3:21). Peru nuu xcaadxi cosa ni naquiiñeʼ gúninu ante chuʼnísanu. Primé la? naquiiñeʼ gunibiáʼ chaahuinu Jiobá ne guni crenu zanda gacanebe laanu; de racá naquiiñeʼ gaca arrepentirnu ne guchaʼnu modo nabáninu (Juan 17:3; Hech. 3:19; Heb. 11:6). Xiruʼ caquiiñeʼ gúninu despué yaʼ.

13. Xiñee caquiiñeʼ quixhe íquenu gudiʼnu laanu Jiobá ti chuʼnu lade familia ni cayuni adorar laabe.

¹³ Para gueeda gácanu de familia ni cayuni adorar Dios, naquiiñeʼ gábinu laabe zúninu guiráʼ ni guinábabe laanu. Xiñee caquiiñeʼ gúninu nga yaʼ. Iquiiñenu ejemplu stiʼ ti hombre napa xiiñiʼ para gusiénenu ni. Hombre ca runibiáʼcabe laa purtiʼ nabé nachaʼhuiʼ. Laa binibiáʼ ti hombrehuiiniʼ ni qué gapa bixhoze nin jñaa, gunnaxhiibe laa ne guníʼ íquebe guicaabe laa casi xiiñibe. Ante guicaabe hombrehuiiniʼ que gúdxibe laa: «Racaladxeʼ gaʼbuʼ naa zuuyaluʼ naa casi bixhózeluʼ, zannaxhiiluʼ naa ne qué zusaanuʼ de guni respetarluʼ naa». Pa qué gúnibe ni canabaʼ hombre ca laabe la? qué zacaa diʼ laabe casi xiiñiʼ. Ñee cadi jneza nga ni canabaʼ hombre riʼ la? Zacaca nga rizaaca ne Jiobá: guiráʼ cani quixhe ique gudiicaʼ laacaʼ laabe rudiibe lugar chuʼcaʼ lade familia stibe. Biblia na: «Lagudii laatu Dios casi ti ofrenda ni nabani. Ofrenda ni zeeda gaca xquendanabánitu ca naquiiñeʼ gudiitu ni Dios si ti gusiéchetu ladxidoʼbe» (Rom. 12:1, La Palabra de Dios para Todos, 2008).

 Zusihuínninu nápanu fe ne nadxiinu Dios

14. Xiñee zanda guininu rusihuínninu nadxiinu Dios ora rudiʼnu laanu laa.

¹⁴ Rusihuínninu nadxiinu Dios ora rudiʼnu laanu laabe. Zanda guchaaganu ni ora rudii stiidxaʼ chupa binni ni chiguichaganáʼ. Dxi guichaganácabe, hombre ca rusihuinni nadxii xnovia ra gábibe laa qué zaxélebe de laa ora tiidicabe lu guendanagana ne ora chúʼcabe galán. Ora guiniʼbe zacá, cadi cayábisibe xheelabe cachaganabe laa, sínuque laaca caniʼbe qué zucheenebe laa. Laaca nanna hombre ca qué zanda diʼ guibánicaʼ juntu pa qué gudii stiidxabe laa. Zacaca nga laani, pa qué gábinu Jiobá chigudiʼnu laanu laa la? qué zanda guicaanu guiráʼ ndaayaʼ ni rapa cani nuu ndaaniʼ familia stibe. Casi maʼ bidúʼyanu, rudiʼnu laanu Dios purtiʼ racaláʼdxinu gaca stibe laanu, ne neca nácanu binni ruchee ne guidxaagalunu intiica cosa qué racaláʼdxinu gusaana de gúninu ni nabe (Mat. 22:37).

15. Xiñee zanda guininu nápanu fe ora rudiʼnu laanu Dios.

¹⁵ Laaca rusihuínninu nápanu fe ora rudiʼnu laanu Dios. Ora rudiʼnu laanu Jiobá rusihuínninu runi crenu laabe ne nánnanu gástiruʼ sti cosa jma galán que chuʼnu gaxha de laabe (Sal. 73:28). Nánnanu zaca nagana para laanu gúninu ni nabe purtiʼ nabáninu «lade binni ni runi ni na ique». Peru nánnanu zaguu Dios ndaayaʼ guiráʼ stipa ni cayúninu casi maca guniʼbe (Fili. 2:15; 4:13). Nánnanu zalaseláʼdxibe laanu ora gucheʼnu purtiʼ binni gulené donda laanu (biindaʼ Salmo 103:13, 14 ne Romanos 7:21-25). Ne laaca nanna dxíchinu zaguu ndaayabe laanu pur guiráʼ stipa ni cayúninu para cadi guchéʼnenu laabe (Job 27:5).

Zabáninu nayecheʼ ora gudiʼnu laanu Dios

16, 17. Xiñee ziuʼnu jma nayecheʼ ora gudiʼnu laanu Jiobá.

¹⁶ Nabé nayecheʼ riuʼnu ora gudiʼnu laanu Jiobá purtiʼ rusihuínninu cudiʼnu xquendanabáninu laabe, ne casi guníʼ Jesús: «Jma nayeche ni rudii que ni ricaa» (Hech. 20:35). Dxi bicheeche Jesús diidxaʼ lu Guidxilayú riʼ, bihuinni guyuube nayecheʼ casi na textu ca. Para gunda guleebe tiempu gusiidibe ca binni que guyuu tiru qué niziiláʼdxibe, qué ñobe ne qué ñúnibe cani racaláʼdxibe (Juan 4:34). Ne gástiruʼ sti cosa ni rusiecheʼ laabe que gúnibe ni na Bixhózebe. Ngue runi guniʼbe: «Qué riaana dxie de gune ni riulaʼdxi be» (Juan 8:29; Pro. 27:11).

¹⁷ Jesús gudxi ca discípulo stiʼ xi caquiiñeʼ gúnicaʼ ti guibánicaʼ jma nayecheʼ: «Tu gacalaʼdxi gaca xpinne la? gusiaanda laca laa» (Mat. 16:24). Ora gusiáʼndanu laca laanu o gudiʼnu lugar gabi Dios ni nadxii laanu xi gúninu lu xquendanabáninu la? jma riuʼnu gaxha de laa. Guirútiruʼ zanda gabi laanu xi guninenu xquendanabáninu ne guireecani laanu jneza.

18. Xiñee jma nayecheʼ ribáninu ora gudiʼnu laanu Dios que ora quixhe íquenu gúninu ni na tuuxa binni o gacaláʼdxinu ugaandanu xiixa.

 ¹⁸ Cani gudii laa Jiobá ne guibani modo racaláʼdxibe riuucaʼ jma nayecheʼ que ca binni ni riguixhe ique iquiiñeʼ xquendanabani para guni ni na tuuxa binni o para ugaanda xiixa ni quixhe ique, casi gapa stale bidxichi. Peru jma nayecheʼ nabani ca xpinni Cristu (Mat. 6:24). Dxandíʼ, stale biaje riuucabe nayecheʼ purtiʼ «tobi si runi né [cabe] Dios dxiiñaʼ». Laaca nánnacabe qué nudiicabe laacabe para gúnicabe xiixa dxiiñaʼ, sínuque bidiicabe laacabe ti Dios ni nabé rusisaca laacabe (1 Cor. 3:9). Dios si nga zusisaca stipa ni cayúnicabe para cadi gucheenécabe laa. Dede zacanebe laacaʼ guibiguetaʼ gácacaʼ nahuiiniʼ para qué chuʼ dxi gusaana de gápabe laacaʼ (Job 33:25; biindaʼ Hebreos 6:10).

19. Xi ribeendú ca binni ni gudiicaʼ laacaʼ Jiobá.

¹⁹ Biblia cudii laanu invitación riʼ: «Laidxiña gaxha de Dios, ne laa zadxiña gaxha de laatu» (Sant. 4:8; Sal. 25:14). Guiráʼ ca binni ni gudiicaʼ laacaʼ Jiobá ziuucaʼ jma gaxha de laabe. Lu sti tema ca zadúʼyanu xiñee gástiruʼ sti cosa jma galán que gudiʼnu laanu Jiobá ti gaca stibe laanu.

[Cani cá ñee yaza]

Xi nicábiluʼ

• Pora nga zanda guininu maʼ bidiʼnu laanu Dios.

• Xi zabeendunu pa gudiʼnu laanu Jiobá.

• Xiñee naquiiñeʼ gudii ca xpinni Cristu laacaʼ Jiobá.

[Guendarinabadiidxaʼ stiʼ párrafo]

[Dibuju/foto ni zeeda lu yaza 6]

Jma nayecheʼ ziuʼnu pa guibáninu casi gúdxinu Dios dxi bidiʼnu laanu laa